1. Bansadi ya nkaka ya Yehowa waka boma nde nki?

 BETO tadila mambu yina bansadi ya nkaka ya Yehowa kutanaka ti yo. Mpangi Nestor ti nkento na yandi María vandaka kuzola kusala kisika yina bo vandaka ti mfunu ya bansamuni mingi. * Sambu na kusala yo, yo lombaka nde bo kuma ti luzingu ya kukonda mindondo. Kansi bo vandaka kuwa boma nde bo ta vanda ve na kiese kana bo ke zinga kaka ti mbongo fioti. Ntangu mpangi Biniam kumaka Mbangi ya Yehowa na insi yina bo ke teleminaka kisalu na beto, yandi zabaka nde bo ta niokula yandi mutindu yandi me kuma Mbangi ya Yehowa. Yo pesaka yandi boma mingi. Nkutu yandi waka diaka boma mingi sambu na mambu yina bantu ya dibuta na bo lendaka kusala kana bo zaba nde yandi me soba dibundu. Minganga tubaka nde mpangi Valérie kele ti kansere mosi ya mbi kibeni mpi yandi vandaka kunwana sambu na kusosa munganga yina ta sala yandi operasio yina ta zitisa mambu yina yandi ke kwikilaka yina Biblia ke tubaka sambu na menga. Yandi waka boma nde yandi lenda fwa.

2. Sambu na nki beto fwete sala bikesa ya kuwa ve boma?

² Keti nge me waka dezia boma ya mutindu yina? Bantu mingi me waka yo. Kana beto sala ve bikesa ya kukatula boma ya mbi, yo lenda pusa beto na kubaka balukanu ya mbi yina ta bebisa kinduku na beto ti Yehowa. Satana ke zolaka mutindu yina. Kana beto ke wa boma, Satana ke salaka yonso sambu na kupusa beto na kulemfuka ve na bansiku ya Yehowa. Mu mbandu, nsiku ya kulonga nsangu ya mbote.  (Kus. 12:17) Satana kele nku, yandi ke wilaka ve bantu mawa mpi yandi kele ngolo mingi. Ata mpidina, nge lenda kuditanina sambu yandi zwa nge ve. Inki mutindu nge lenda sala yo?

3. Inki ta sadisa beto na kuwa ve boma?

³ Kana beto ke ndima kibeni nde Yehowa ke zolaka beto mpi nde yandi ke sadisaka beto ntangu yonso, beto ta wa ve Satana boma. (Nk. 118:6) Mu mbandu, muntu yina sonikaka Nkunga 118 kutanaka ti mambu ya mpasi kibeni. Yandi vandaka ti bambeni mingi mpi bankaka vandaka bantu ya nene (verse 9, 10). Bantangu ya nkaka, bantu vandaka kuniokula yandi ngolo (verse 13). Mpi Yehowa pesaka yandi ndola ya ngolo (verse 18). Ata mpidina, muyimbi-bankunga yina tubaka nde: “Mono ta wa boma ve.” Inki sadisaka yandi na kudiwa na lutaninu? Yandi zabaka nde ata Yehowa pesaka yandi ndola, Tata na yandi ya zulu vandaka kuzola yandi mingi kibeni. Yandi ndimaka kibeni nde ata yandi kutana ti diambu ya nki mutindu, Nzambi na yandi yina ke zolaka yandi ta vanda ya kuyilama ntangu yonso sambu na kusadisa yandi.—Nk. 118:29.

4. Beto ta wa ve boma ya nki kana beto ke ndima kibeni nde Nzambi ke zolaka beto?

⁴ Beto fwete ndima kibeni nde Yehowa ke zolaka konso muntu na kati na beto. Yo ta sadisa beto na mambu yai tatu: (1) na kuwa ve boma nde beto ta kuka ve kulungisa bampusa ya dibuta na beto; (2) na kuwa ve boma ya bantu mpi (3) na kuwa ve boma ya lufwa. Bampangi yina beto me tubila na paragrafe ya ntete katulaka boma na bo sambu bo ndimaka nde Nzambi ke zolaka bo.

5. Inki lenda pusa mfumu ya dibuta na kudiyangisa mingi? (Tala kifwanisu ya lutiti ya zulu.)

⁵ Mfumu ya dibuta yina kele Mukristu ke zabaka nde kulungisa bampusa ya kinsuni ya bantu ya dibuta na yandi kele mukumba ya mfunu mingi. (1 Tim. 5:8) Kana nge kele mfumu ya dibuta, mbala ya nkaka nge yindulaka nde na nsungi ya maladi ya coronavirus, kisalu na nge ta fwa. Mbala ya nkaka nge vandaka kuyindula nde nge ta kuka ve kuzwa madia mpi mbongo ya kufutila nzo sambu na dibuta na nge. Yo lenda vanda nde, nge vandaka mpi kuwa boma nde kana kisalu na nge me fwa, nge ta kuka diaka ve kuzwa kisalu ya nkaka. Bonso mpangi Nestor mpi mpangi María yina beto me tubila, mbala ya nkaka nge vandaka kuyindula nde nge ta kuka ve kuzinga ti mbongo fioti. Satana me kangaka bantu mingi nzila ya kusambila Yehowa sambu bo vandaka kuyindula mutindu yina.

6. Satana ke sosaka kupusa beto na kuyindula nki?

⁶ Satana ke pusaka beto na kuyindula nde Yehowa ke zolaka beto ve mpi nde yandi ta sadisa beto ve na kulungisa bampusa ya dibuta na beto. Yo lenda pusa beto na kuyindula nde beto fwete sala konso kima yina sambu na kutanina kisalu na beto, yo vanda kima yango ke bebisa kinduku na beto ti Nzambi.

7. Inki Yezu ke ndimisa beto?

⁷ Yezu, yina ke zabaka Tata na yandi mbote kuluta bantu yonso, ke ndimisa beto nde Nzambi na beto ke “zabaka mambu yina [beto] kele na yo mfunu na ntwala nkutu nde [beto] lomba yandi yo.” (Mat. 6:8) Yezu ke zabaka nde Yehowa ke pesaka beto bima yina beto kele na yo mfunu. Beto Bakristu, beto kele na dibuta ya Nzambi. Yehowa kele mfumu ya dibuta na beto. Yo yina, beto fwete ndima nde yandi ta sala mambu yina yandi ke songaka bamfumu ya mabuta na kusala. Mambu yina kele na 1 Timoteo 5:8.

8. (a) Inki ta sadisa beto na kuwa ve boma nde beto ta kuka ve kulungisa bampusa ya dibuta na beto? (Matayo 6:31-33) (b) Mutindu kifwanisu ke monisa yo, nki mutindu beto lenda landa mbandu ya mpangi yina ti nkento na yandi ya me natila mpangi-nkento mosi madia?

⁸ Kana beto ke ndima kibeni nde Yehowa ke zolaka beto mpi dibuta na beto, beto ta ndima  nde yandi ta sadisa beto na kuzwa bima yina beto kele ti yo mfunu. (Tanga Matayo 6:31-33.) Yehowa ke zolaka kusadisa beto na kulungisa bampusa na beto mpi yandi kele Tata ya zola mpi ya ke kabaka mingi. Ntangu yandi salaka ntoto, yandi pesaka bantu bima yina bo ke vandaka ti yo mfunu sambu na kuzinga mpi yandi pesaka bo bima mingi ya nkaka. Yandi salaka bima mingi na ntoto sambu beto vanda na kiese mingi. (Kuy. 2:9) Bantangu ya nkaka, ata kana beto kele ve ti bima mingi kansi beto kele kaka ti bima yina beto kele ti yo mfunu, beto fwete vila ve nde Yehowa muntu me pesa beto yo. (Mat. 6:11) Bima yina Yehowa ta pesa beto kele mfunu mingi kuluta bima yina beto lenda yambula sambu na kusadila yandi mpi na bilumbu ke kwisa, yandi ta pesa beto luzingu ya mvula na mvula. Mpangi Nestor mpi mpangi María bakisaka kieleka yai.—Yez. 65:21, 22.

9. Mbandu ya mpangi Nestor ti nkento na yandi María ke longa nge nki?

⁹ Mpangi Nestor ti nkento na yandi María vandaka ti nzo ya kitoko mpi kisalu ya mbote na Colombie. Bo tubaka nde: “Beto zolaka kuteka bima na beto ya nkaka mpi kusala mingi sambu na Yehowa. Kansi beto vandaka kuwa boma nde kana beto kele ve ti mbongo mingi, beto ta vanda ve na kiese.” Inki sadisaka bo na kukatula boma? Bo yindulaka mambu mingi yina Yehowa sadilaka bo ya ke monisa nde yandi ke zolaka bo. Bo ndimaka nde ntangu yonso Yehowa ta lungisa bampusa na bo mpi bo yambulaka bisalu na bo yina bo vandaka kufuta bo mbongo mingi. Bo tekaka nzo na bo mpi bo kwendaka na bwala mosi ya insi na bo kisika yina mpusa ya bansamuni ya Kimfumu vandaka mingi. Inki bo ke tuba sambu na lukanu yina bo bakaka? Mpangi Nestor ke tuba nde: “Beto ke monaka kulungana ya mambu yina Matayo 6:33 ke tubaka. Beto ke kondaka ve ata kima. Mpi bubu yai, beto ke zingaka na kiese kibeni.”

10. Sambu na nki bantu ke waka bantu ya nkaka boma?

¹⁰ Banda Adami ti Eva me kolamaka na Yehowa, bantu ke sadilanaka mambu ya mbi. (Lon. 8:9) Mu mbandu, bantu ke sadilaka kiyeka na bo sambu na kusadila bantu ya nkaka mambu ya mbi, babandi ke sadilaka bantu ya nkaka mambu ya mbi, bana ya nzo-nkanda ke sadilanaka mambu ya mbi mpi bo ke finganaka mpi bantu ya nkaka ke niokulaka bantu ya mabuta na bo. Yo yina, bantu ke waka bantu ya nkaka boma. Inki Satana ke salaka ntangu beto ke wa bantu boma?

11-12. Inki Satana lenda sala kana beto ke wa bantu boma?

¹¹ Kana beto ke wa bantu boma, Satana lenda pusa beto na kuyambula kulonga nsangu ya  mbote mpi na kusala ve mambu ya nkaka yina Yehowa ke songaka beto na kusala. Satana me pusaka baluyalu na kubuyisa kisalu na beto mpi na kuniokula beto. (Luka 21:12; Kus. 2:10) Na nsi-ntoto yai ya Satana, bantu mingi ke panzaka bansangu ya luvunu mpi bo ke kusilaka Bambangi ya Yehowa makambu. Bantu yina ke ndimaka mambu yina ya luvunu lenda seka beto to nkutu bo lenda nwanisa beto. (Mat. 10:36) Keti beto fwete yituka sambu na mayele ya mbi yina Satana ke sadilaka? Beto fwete yituka ve ata fioti. Yandi sadilaka mpi mayele yina ya mbi na mvu-nkama ya ntete.—Bis. 5:27, 28, 40.

¹² Satana ke pusaka baluyalu na kutelemina beto. Katula yina, yandi ke sadilaka mpi mayele ya nkaka. Bantu ya nkaka ke waka boma ya mambu yina bantu ya mabuta na bo ta tuba kana bo me kuma Bambangi ya Yehowa kuluta nkutu mambu ya mbi yina bo lenda sadila bo. Bo ke zolaka bantu ya mabuta na bo mingi kibeni mpi bo ke zolaka nde bantu ya mabuta na bo kuzaba Yehowa mpi kuzola yandi. Bo ke waka mpasi mingi ntangu bantu ya mabuta na bo ke zitisaka ve Nzambi ya kieleka mpi bansadi na yandi. Bantu ya nkaka yina vandaka kutelemina bantu ya mabuta na bo yina vandaka Bambangi ya Yehowa me kumaka Bambangi ya Yehowa. Ebuna nki beto ta sala kana bantu ya dibuta na beto me buya beto sambu beto me kuma Bambangi ya Yehowa?

13. Inki mutindu kundima nde Nzambi ke zolaka beto ta sadisa beto ntangu bantu ya dibuta na beto me buya beto? (Nkunga 27:10)

¹³ Mambu yina kele na Nkunga 27:10 lenda pesa beto kikesa. (Tanga.) Kana beto ke bakisa nde Yehowa ke zolaka beto kibeni, beto ta wa ve boma ya mambu yina ta salama ata kana bantu ya dibuta na beto me buya beto. Beto ke ndima nde Yehowa ta sakumuna beto kana beto ke kanga ntima. Yehowa ta pesa beto bima yonso yina beto kele ti yo mfunu, yandi ta sadisa beto na kuvanda na ngemba mpi na kiese mpi yandi ta sadisa beto na kubikala pene-pene na yandi. Ata muntu mosi ve lenda sala yo kuluta Yehowa. Mpangi Biniam yina beto me tubila na luyantiku monaka mambu yai na luzingu na yandi.

14. Mbandu ya mpangi Biniam ke longa nge nki?

¹⁴ Mpangi Biniam kumaka Mbangi ya Yehowa ata yandi zabaka nde bamfumu ya luyalu vandaka kuniokula kibeni Bambangi ya Yehowa ya insi na yandi. Mpangi Biniam zabaka nde Yehowa ke zolaka yandi. Beto tala mutindu yo sadisaka yandi na kuwa ve bantu boma. Yandi ke tuba nde: “Bo niokulaka Bambangi ya Yehowa mingi kuluta mutindu mono vandaka kuyindula. Kansi mono vandaka kuwa boma mingi nde bantu ya dibuta na mono ta niokula mono mingi kuluta bamfumu ya luyalu. Mono vandaka kuwa boma nde kana mono kuma Mbangi ya  Yehowa, yo ta pesa papa na mono yina vandaka ve kusambila Yehowa mpasi mingi mpi nde bantu ya dibuta na mono ta zitisaka mono diaka ve.” Ata mpidina, mpangi Biniam ndimaka kibeni nde ntangu yonso Yehowa ke sadisaka bantu yina yandi ke zolaka. Mpangi Biniam ke tuba nde: “Mono yindulaka mutindu Yehowa me sadisaka bantu ya nkaka na kukanga ntima na mpasi ya mbongo, ntangu bantu ya nkaka vandaka kutuba mambu ya mbi sambu na bo mpi kuniokula bo. Mono zabaka nde kana mono ke kangama kaka na Yehowa, yandi ta sakumuna mono. Ntangu bo vandaka kukanga mono mbala mingi mpi kubula mono ngolo, mono monaka mutindu Yehowa ke sadisaka beto kana beto ke kangama kaka na yandi.” Yehowa kumaka mpenza papa ya mpangi Biniam mpi bansadi ya Yehowa kumaka kibeni bantu ya dibuta na yandi.

15. Sambu na nki yo ke vandaka ve ntangu yonso mbi na kuwa lufwa boma?

¹⁵ Biblia ke tuba nde lufwa kele mbeni. (1 Bak. 15:25, 26) Beto lenda wa boma ya lufwa kana beto to bantu yina beto ke zolaka ke bela ngolo. Sambu na nki beto ke waka lufwa boma? Sambu Yehowa me tulaka mpusa ya kuzinga mvula na mvula na bantima na beto. (Lon. 3:11) Yo ke vandaka ve mbi ntangu yonso na kuwa boma ya lufwa sambu yo lenda sadisa beto na kutanina luzingu na beto. Mu mbandu, yo lenda sadisa beto na kubaka lukanu ya mbote na yina me tala kudia madia yina ke tunga nitu, kusala ngalasisi, kusosa lusadisu ya minganga mpi kunwa nkisi kana beto ke bela mpi kutula ve luzingu na beto na kigonsa.

16. Inki Satana ke salaka kana beto ke wa lufwa boma?

¹⁶ Satana ke zabaka nde beto ke zolaka ve kufwa. Yandi ke tubaka nde beto lenda bebisa ata kinduku na beto ti Yehowa kaka sambu na kubikala na luzingu. (Yobi 2:4, 5) Kansi yo kele kibeni luvunu. Satana kele “muntu yina kele ti ngolo ya kufwa.” Yo yina, yandi ke sadilaka boma ya lufwa sambu na kupusa beto na kuyambula Yehowa. (Baeb. 2:14, 15) Bantangu ya nkaka, Satana ke pusaka bantu na kusonga beto nde kana beto me yambula ve kusadila Yehowa, bo ta fwa beto. Bantangu ya nkaka, Satana lenda mona nde beto ke bela ngolo mpi yandi lenda pusa beto na kuyambula kusadila Yehowa. Minganga to bantu ya dibuta na beto yina ke sambilaka ve Yehowa lenda pusa beto na kundima nde bo vutula beto menga. Yo ta sala nde beto fwa nsiku ya Nzambi. To muntu ya nkaka lenda pusa beto na kundima lusansu yina ke wakana ve ti minsiku ya Biblia.

17. Mutindu Baroma 8:37-39 ke monisa yo, sambu na nki beto fwete wa ve lufwa boma?

¹⁷ Ata beto ke zolaka ve kufwa, beto me zaba nde Yehowa ta landa kuzola beto ata kana beto me fwa. (Tanga Baroma 8:37-39.) Kana banduku ya Yehowa me fwa, yandi ke landaka kuyibuka bo kaka bonso nde bo kele na luzingu. (Luka 20:37, 38) Yandi ke vandaka ti mpusa ya ngolo ya kuvutula bo na luzingu. (Yobi 14:15) Yehowa futaka ntalu ya mingi sambu beto ‘baka luzingu ya mvula na mvula.’ (Yoa. 3:16) Beto ke zabaka nde Yehowa ke zolaka beto mingi kibeni mpi yandi ke sadisaka beto. Beto fwete yambula ve Yehowa ntangu beto ke bela to ke zola kufwa. Kansi beto fwete tudila yandi ntima sambu yandi pesa beto kikesa, mayele mpi ngolo. Mpangi Valérie ti bakala na yandi salaka mpidina.—Nk. 41:3.

18. Mbandu ya mpangi Valérie ke longa nge nki?

¹⁸ Ntangu mpangi Valérie vandaka ti bamvula 35, minganga tubaka nde yandi kele ti kansere ya ngolo. Beto tala mutindu zola ya Yehowa sadisaka yandi na kuwa ve lufwa boma. Yandi ke tuba nde: “Ntangu bo songaka mono nde mono kele ti kansere, yo pesaka mono ti bakala na mono mpasi mingi kibeni. Yo lombaka nde bo sala mono operasio ya ngolo sambu na kubeluka. Mono solulaka ti minganga mingi kansi bo yonso buyaka kusala mono operasio kukonda nde bo vutula mono menga. Mono waka boma,  kansi sambu mono zolaka kuzitisa bansiku ya Nzambi, mono buyaka nde bo vutula mono menga. Na luzingu na mono ya mvimba, Yehowa me monisaka nde yandi ke zolaka mono mingi. Mono fwete monisa mpi nde mono ke zolaka Yehowa. Konso ntangu yina minganga ke songaka mono nsangu mosi ya mbi, yo ke pusaka mono na kusala yonso sambu na kupesa Yehowa kiese kansi ve Satana. Nsuka-nsuka, bo salaka mono operasio kukonda nde bo vutula mono menga. Yo lutaka mbote. Tii bubu yai, mono ke belaka. Ata mpidina, ntangu yonso Yehowa ke pesaka beto bima yina beto ke vandaka ti yo mfunu. Mu mbandu, na lukutakanu ya dibundu ya nsuka ya mposo na ntwala nde bo songa mono nde mono kele ti kansere ya ngolo, beto longukaka disolo, ‘Nunga Bampasi ya Bubu yai ti Kikesa.’ * Disolo yina pesaka beto kikesa mingi kibeni. Beto tangaka yo mbala mingi. Masolo ya mutindu yina mpi kulanda kulonga nsangu ya mbote mpi kukwenda na balukutakanu ke sadisaka mono ti bakala na mono na kuvanda na ngemba mpi na kubaka balukanu ya mbote.”

19. Inki ta salama ntama mingi ve?

¹⁹ Yehowa me sadisaka Bakristu na ntoto ya mvimba na kukatula boma na mambu ya mpasi yina bo ke kutanaka ti yo mpi yandi me sadisaka bo na kutelemina Diabulu. (1 Pie. 5:8, 9) Yandi ta sadisa nge mpi. Ntama mingi ve Yehowa ta songa Yezu mpi bantu yina ta yala ti yandi “na kufwa bisalu ya Diabulu.” (1 Yoa. 3:8) Na nima, bansadi ya Nzambi yina ke sadilaka yandi awa na ntoto ta ‘wa boma ata ya kima mosi ve mpi bo ta vanda ve ti kikuma ya kutekitila.’ (Yez. 54:14; Mika 4:4) Na ntwala nde ntangu yina kulunga, beto fwete sala yonso sambu na kukatula boma na beto.

20. Inki ta sadisa beto na kukatula boma?

²⁰ Beto fwete landa kundima kibeni nde Yehowa ke zolaka bansadi na yandi mpi yandi ke taninaka bo. Beto ta sala yo kana beto ke yindula mingi mpi ke tubila mutindu Yehowa taninaka bansadi na yandi na bilumbu me luta. Beto fwete yibuka mutindu yandi me sadisaka beto mosi na kukanga ntima na mambu ya mpasi kibeni. Ee, Yehowa ta sadisa beto na kukatula boma.—Nk. 34:4.