26-زەرتتەۋ ماقالاسى
ەحوبانىڭ سۇيىسپەنشىلىگى قورقىنىشتان ۇستەم
«ەحوبا مەنىڭ جاعىمدا؛ مەن ەش قورىقپايمىن» (ٴزاب. 118:6).
105-ٵن «قۇداي — سۇيىسپەنشىلىك»
اڭداتپا *
1. قانداي كەزدەرى ٴبىز ادەتتە قورقىنىشقا بوي الدىرامىز؟
ومىردە بولعان مىنا ٷش جاعدايدى قاراستىرىپ وتەيىكشى. نەستور مەن ماريا باۋىرلاستار قاجەتتىلىك بار جەردە قىزمەت ەتكىلەرى كەلەدى *. ٴبىراق بۇل ٷشىن ولارعا تۇرمىستارىن قاراپايىم ەتۋ قاجەت بولادى. سول كەزدە ولار ازىراق اقشا تاپساق، بۇرىنعىداي ٶمىر سۇرە الماي، قينالىپ قالمايمىز با دەپ ۋايىمدايدى. ٴبىزدىڭ ىسىمىزگە قاتاڭ شەكتەۋلەر قويىلعان ٴبىر ەلدە تۇراتىن بينيام باۋىرلاس ەحوبا كۋاگەرى بولعاندا، ەندى مەن سەنىمىم ٷشىن قۋدالاناتىن بولدىم دەپ قورقادى. ٴبىراق «مەنىڭ باسقا ٴدىندى قابىلداعانىمدى بىلگەندە، ۇيىمدەگىلەر نە دەر ەكەن» دەگەن وي وعان بارىنەن دە قورقىنىشتى كورىندى. قاتەرلى ىسىكتىڭ اۋىر تۇرىنە شالدىققان ۆالەريا باۋىرلاس قانسىز ەمدەۋگە كەلىسەتىن دارىگەر تابا الماي، ٴبىراز قينالادى. ٴسۇيتىپ، ەندى مەن ٶلىپ كەتەم بە دەپ قورقادى.
2. نەلىكتەن قورقىنىشپەن كۇرەسۋىمىز كەرەك؟
2 ٴسىزدىڭ دە وسىلاي قورىققان كەزدەرىڭىز بولعان با؟ كوبىمىزدە بولدى. ٴبىراق ەگەر ٴبىز ٶز-ٶزىمىزدى قولعا الىپ، قورقىنىشىمىزدى تىزگىندەپ ۇيرەنبەسەك، سونىڭ جەتەگىندە كەتىپ، بۇرىس شەشىمدەر قابىلداپ قويۋىمىز ابدەن مۇمكىن. سونىڭ كەسىرىنەن ەحوبامەن قارىم-قاتىناسىمىزدى بۇزىپ الۋىمىز عاجاپ ەمەس. ال شايتاننىڭ بار قالايتىنى — وسى. ول ٴبىزدىڭ ەحوبانىڭ زاڭدارىنان اتتاپ كەتۋىمىز ٷشىن جانە ىزگى حاباردى ۋاعىزداماي قويۋىمىز ٷشىن، قورقىنىشىمىزدى پايداسىنا اسىرىپ كەتۋگە تىرىسادى (ايان 12:17). ويتكەنى ول وتە زۇلىم، جاۋىز ٵرى كۇشتى. ٴبىراق ٴسىز ٶزىڭىزدى ودان قورعاي الاسىز. قالاي؟
3. قورقىنىشىمىزدى جەڭۋگە نە كومەكتەسەدى؟
3 شايتانعا قارسى تۇرۋ ٷشىن ەحوبانىڭ ٴبىزدى سۇيەتىنىنە نىق سەنىمدى بولۋىمىز قاجەت (ٴزاب. 118:6). 118-جىردى جازعان ٴزابۇر جىرشىسىن مىسالعا الايىقشى. ونىڭ باسىنا وتە اۋىر قيىندىقتار تۇسكەن بولاتىن. ونىڭ دۇشپاندارى كوپ بولعان، اراسىندا بيلىگى بار كىسىلەر دە بولعان (9، 10 تارماقتار). قاتتى قىسپاققا ۇشىراپ، جانى قينالعان كەزدەرى دە بولدى (13 تارماق). بۇعان قوسا، ەحوبا ونى قاتاڭ تۇزەتكەن (18 تارماق). ٴبىراق وسىنىڭ بارىنە قاراماستان ول: «مەن ەش قورىقپايمىن»،— دەگەن. نە سەبەپتى ول ەشتەڭەدەن قورىقپاي، ٶزىن ٴقاۋىپسىز سەزىنگەن؟ ويتكەنى ەحوبا ونى جازالاسا دا، قاتتى جاقسى كورەتىنىن بىلگەن. باسىنا قانداي كۇن تۋماسىن، قانداي جاعدايعا ۇشىراماسىن، كوكتەگى ٴسۇيۋشى اكەسى وعان كومەككە كەلۋگە ٵزىر ەكەنىنە ەش كۇماندانباعان (ٴزاب. 118:29).
4. قۇدايدىڭ ٴبىزدى سۇيەتىنىنە سەنىمدى بولساق، نەدەن قورىقپايمىز؟
4 ەحوبانىڭ ٴدال ٴسىزدى جاقسى كورەتىنىنە سەنىمدى بولعانىڭىز وتە ماڭىزدى. سوندا ٴسىز ٴجيى كەزدەسەتىن مىنا ٷش قورقىنىشقا بوي الدىرمايسىز. اتاپ ايتقاندا: 1) وتباسىمدى قالاي اسىرايمىن دەپ قورقۋ، 2) ادامنان قورقۋ جانە 3) ولىمنەن قورقۋ. ماقالانىڭ باسىندا ايتىپ كەتكەن باۋىرلاستار ەحوبانىڭ سۇيىسپەنشىلىگىنە سەنىمدى بولعاننىڭ ارقاسىندا وزدەرىنىڭ ۇرەي-قورقىنىشتارىن جەڭە العان.
وتباسىمدى قالاي اسىرايمىن دەپ قورقۋ
5. وتاعالارى قانداي جاعدايلاردا ۋايىمعا سالىنىپ جاتادى؟ (مۇقاباداعى سۋرەتتى قاراڭىز.)
5 ٴماسىحشى وتاعالارى وتباسىن اسىراۋ مىندەتىنە اسقان جاۋاپكەرشىلىكپەن قارايدى (ٴتىم. 1-ح. 5:8). مىسالى، پاندەميا كەزىندە ٴسىز جۇمىسىڭىزدان ايىرىلا جازداعان شىعارسىز. سول كەزدە وتباسىم تاماقسىز قالار ما ەكەن، قالاي كۇن كورەمىز، پاتەر اقشاسىن قالاي تولەيمىز دەپ ۋايىمعا سالىنعان بولارسىز. جۇمىستان شىعارىپ جىبەرسە، باسقا جۇمىستى قالاي تابام دەپ تە قورىققان شىعارسىز. يا بولماسا، نەستور مەن ماريانىڭ جاعدايىنداعىداي، ومىرىمە كەرى اسەرى ٴتيىپ، قينالىپ قالمايمىن با دەپ قورقىپ، جۇمىسىڭىزدى قىسقارتۋدان نە وزگەرتۋدەن تارتىنشاقتايتىن بولارسىز. شايتان وسىنداي قورقىنىشتى تالاي رەت پايداسىنا اسىرىپ، جەڭىسكە جەتكەن.
6. شايتان بىزگە قانداي وي سالۋعا تىرىسادى؟
6 شايتان بىزگە «ەحوبا ٵرقايسىسىمىزدىڭ قامىمىزدى ويلاپ وتىرمايدى، اركىم ٶز وتباسىنىڭ كۇيىن ٶزى كۇيتتەۋى كەرەك» دەگەن وي سالىپ، سوعان سەندىرگىسى كەلەدى. سونىڭ ناتيجەسىندە «مەيلى، كيەلى كىتاپ پرينسيپتەرىنە كوز جۇمۋعا تۋرا كەلسە دە، وسى جۇمىسىمنان ايىرىلىپ قالماۋدىڭ بار امالىن جاساۋىم كەرەك» دەگەن تۇجىرىمعا كەلۋىمىز مۇمكىن.
7. يسا ٴبىزدى نە دەپ سەندىرگەن؟
7 ٴبىزدىڭ كوكتەگى اكەمىزدىڭ قانداي ەكەنىن يسادان ارتىق ەشكىم بىلمەيدى. ال ول بىلاي دەگەن: «اكەلەرىڭ وزدەرىڭ سۇراماي تۇرىپ-اق، سەندەرگە نە كەرەك ەكەنىن بىلەدى» (مات. 6:8). بۇعان قوسا، ول ەحوبانىڭ ٴبىزدى قاجەتىمىزبەن قامتاماسىز ەتۋگە دايىن ەكەنىن بىلەدى. ٴماسىحشى رەتىندە ٴبىز ەحوبانىڭ وتباسىنىڭ ٴبىر مۇشەسىمىز. ەندەشە، وسى وتباسىنىڭ وتاعاسى ەحوبا تىموتەگە 1-حات 5:8 دەگى ٶزى جازدىرعان ٴپرينسيپتى ٶزى ۇستاناتىنىنا سەنىمدى بولايىق!
8. ا) وتباسىمدى اسىراي الماي قالام دەگەن قورقىنىشتى جەڭۋگە نە كومەكتەسەدى؟ (ماتاي 6:31—33) ٵ) سۋرەتتە ايەل باۋىرلاسقا تاماق اكەلە جاتقان ەرلى-زايىپتىدان نە ۇيرەنەمىز؟
8 ەحوبانىڭ ٴبىزدى جانە وتباسىمىزدى سۇيەتىنىنە سەنىمدى بولساق، قاجەتىمىز بولماي قالماس پا ەكەن دەپ ۋايىمدامايمىز (ماتاي 6:31—33 وقىڭىز). ەحوبا ٴبىزدىڭ قامىمىزدى جاساۋعا اسىق. ول نەتكەن جومارت تا قامقور قۇداي! ول اۋەل باستا جەردى جاراتقاندا، بىزگە ەڭ قاجەت دەگەندى عانا بەرىپ، ايتەۋىر ولمەستىڭ قامىن جاساپ قويا سالعان جوق. ول جەر بەتىن ٴبىزدى راقاتقا بولەيتىن تاڭعاجايىپ نارسەلەرگە تولتىردى (مۇس. 1-ج. 2:9). كەيدە بىزدە كۇنەلتۋگە قاجەتتى نارسەلەر عانا بولۋى مۇمكىن. ٴبىراق ٴبىز سونىڭ بارىنا قۋانىپ، ول نارسەلەردىڭ بىزدە ەحوبانىڭ ارقاسىندا بار ەكەنىن ۇمىتپاۋىمىز كەرەك (مات. 6:11). ەسىمىزدە بولسىن، ٴبىز قانداي قۇرباندىققا بارمايىق، بۇل ەحوبانىڭ ٴقازىر جانە بولاشاقتا بەرەتىن باتالارىمەن سالىستىرعاندا تۇك ەمەس! نەستور مەن ماريا وسىعان قالاي كوز جەتكىزگەندەرىن بىلەيىك (يشايا 65:21، 22).
9. نەستور مەن ماريانىڭ ۇلگىسىنەن وزىڭىزگە نە ٴتۇيدىڭىز؟
9 كولۋمبيالىق نەستور مەن ماريا باۋىرلاستار تابىسى جاقسى جۇمىس ىستەپ، ادەمى ۇيلەرىندە تۇرىپ جاتتى. ٴبىر كەزدە ولار تۇرمىسىمىزدى قاراپايىم ەتىپ، ەحوباعا كوبىرەك قىزمەت ەتسەك قايتەدى دەپ ويلانا باستايدى. ٴبىراق تابىسىمىز ازايسا، قۋانىشتى ٶمىر سۇرە الماي قالمايمىز با دەپ تە قورقادى. ولار بۇل قورقىنىشتى قالاي جەڭدى؟ ولار ەحوبانىڭ وزدەرىنە تالاي رەت سۇيىسپەنشىلىگىن كورسەتكەنى جايلى جاقسىلاپ ويلانادى. ەحوبانىڭ ەشقاشان تاستامايتىنىنا كوزى جەتكەن ولار جالاقىسى جوعارى جۇمىستارىن تاستاپ، ۇيلەرىن ساتىپ، قاجەتتىلىك بار جەرگە كوشىپ بارادى. ٴقازىر ولار وسى شەشىمدەرىنە وكىنە مە؟ كۇيەۋى نەستور بىلاي دەيدى: «ٴبىز ماتاي 6:33 تەگى سوزدەردىڭ راستىعىن ٶز كوزىمىزبەن كوردىك. وسى كۇنگە دەيىن تارشىلىق كورگەن كەزىمىز بولمادى. ٴتىپتى دەسەڭىز، ٴبىز بۇرىنعىدان دا باقىتتى ٶمىر كەشىپ جاتىرمىز».
ادامنان قورقۋ
10. نەلىكتەن ادامدار وزگەلەردەن قورقادى؟
10 ادام مەن حاۋا قۇدايدان باس تارتقالى بەرى ادامدار ٴبىر-بىرىنە ٴجابىر كورسەتىپ كەلەدى (ۋاع. 8:9). مىسالى، بىرەۋلەر بيلىگىن پايدالانىپ باسقالارعا قورلىق كورسەتەدى، قىلمىسكەرلەر جاۋىز ارەكەتتەرگە بارادى، مەكتەپتەگى بۇزاقى بالالار باسقالارعا ٴتيىسىپ، قورقىتىپ جاتادى. ٴتىپتى ٴبىر ۇيدە ٶز وتباسى مۇشەسىنەن سوققى جەپ، ٴجابىر كورىپ جۇرگەندەر بار. سوندىقتان دا ادامداردىڭ ٴبىر-بىرىنەن قورقاتىنى تۇسىنىكتى جاعداي. ٴبىراق شايتان وسى سەزىمدى دە وزىمىزگە قارسى پايدالانىپ كەتۋى مۇمكىن. قالاي؟
11، 12. شايتان ادام الدىنداعى قورقىنىشتى قالاي وزىڭىزگە قارسى قولدانادى؟
11 شايتان ٴبىزدىڭ ادام الدىنداعى قورقىنىشقا بوي الدىرىپ، ۋاعىزداماي قويعانىمىزدى جانە ەحوبانىڭ وسيەتتەرىنەن اتتاپ كەتكەنىمىزدى قالايدى. مىسالى، شايتاننىڭ ىقپالىمەن كەيبىر ۇكىمەتتەر ٴبىزدىڭ ىسىمىزگە تيىم سالىپ، باۋىرلاستاردى قۋدالاپ كەلەدى (لۇقا 21:12؛ ايان 2:10). ونىڭ ۇستىنە، شايتاننىڭ دۇنيەسىندەگى كوپتەگەن ادامدار ٴبىز جايلى جالعان اقپارات تاراتىپ، وتە جامان وتىرىك سوزدەر ايتادى. سوعان سەنىپ قالعاندار كەيىن ٴبىزدى كەلەكە-مازاق ەتەدى، ٴتىپتى كۇش كورسەتەدى (مات. 10:36). دەسە دە شايتاننىڭ بۇنداي ارەكەتتەرى بىزگە جاڭالىق ەمەس. ول I عاسىردا دا ماسىحشىلەرگە قارسى ٴدال وسىنداي تاسىلدەردى قولدانعان (ەل. ٸس. 5:27، 28، 40).
12 شايتان ٴبىزدى قورقىتۋ ٷشىن تەك ۇكىمەتتى عانا قولدانبايدى. كەيبىر ادامدار شىندىقتى بىلگەندە، تۋىستارى بۇنى قالاي قابىلدايتىنىن ۋايىمدايدى. ولار ٷشىن سوققىعا جىعىلعاننان گورى سول قورقىنىشتىراق كورىنەدى. ارينە، ولار وتباسى مۇشەلەرىن قاتتى جاقسى كورگەندىكتەن، ولاردىڭ دا ەحوبانى تانىپ-ٴبىلىپ، جاقسى كورىپ كەتكەنىن قالايدى. ال ەگەر تۋىستارى شىنايى قۇداي جايلى جانە ونىڭ حالقى جايلى اۋىر سوزدەر ايتىپ جاتسا، بۇل ولاردىڭ جاندارىنا باتادى. الايدا كەيبىر باۋىرلاستاردىڭ تۋىسقاندارى العاشىندا قارسى بولعانمەن، كەيىن شىندىققا كەلگەن. ەگەر ٴسىزدىڭ تۋىسقاندارىڭىز سەنىمىڭىزگە بولا سىزبەن اراقاتىناسىن ٷزىپ، ارالاسپاي قويسا، نە ىستەيسىز؟
13. وتباسىمىز بىزدەن باس تارتقاندا، نەگە ەحوبانىڭ ٴبىزدى سۇيەتىنىنە سەنىمدى بولۋىمىز كەرەك؟ (ٴزابۇر 27:10)
13 ٴزابۇر 27:10 داعى (وقىڭىز) جانعا قۋات بەرەتىن سوزدەر جايلى وي جۇگىرتەتىن بولساق، بۇل كوڭىلىمىزگە جۇبانىش سيلايدى. ەحوبانىڭ بىزگە دەگەن ىستىق سۇيىسپەنشىلىگىن ۇمىتپاساق، ۇرەيگە بەرىلىپ، ۋايىمدامايمىز. تاباندىلىقپەن سوڭىنا دەيىن توتەپ بەرسەك، ەحوبا مىندەتتى تۇردە جارىلقايتىنىنا دا سەنىمدى بولامىز. راسىندا دا، بىردە-ٴبىر ادام ەحوبادان ارتىق ٴبىزدىڭ رۋحاني، تاندىك، ەموسيالىق جاعدايىمىزدى جاساي المايدى! جوعارىدا ايتىلعان بينيام بۇنى ٶز باسىنان وتكەرگەن.
14. بينيامنىڭ وقيعاسىنان قانداي ساباق الدىڭىز؟
14 بينيام كۋاگەرلەر اياۋسىز قۋدالاناتىن ەلدە تۇرىپ جاتسا دا، ەحوبا كۋاگەرى بولادى. ەحوبانىڭ ونى سۇيەتىنىنە سەنىمدى بولعانى وعان قۋعىن-سۇرگىنگە توتەپ بەرۋگە قالاي كومەكتەستى؟ ول بىلاي دەيدى: «مۇنشالىقتى قاتتى قۋعىن-سۇرگىن كورەم دەپ ويلاماپپىن. ٴبىراق مەن وتباسىمنىڭ قارسىلىعىنان بۇدان دا قاتتى قورىقتىم. اكەمدى جەرگە قاراتاتىن بولدىم، وتباسىمنىڭ كوز الدىندا شىرىگەن جۇمىرتقا بولىپ، ٴقادىر-قاسيەتىمنەن ايىرىلاتىن بولدىم دەپ ۋايىمدادىم». ٴبىراق ول ەحوبا ٶزىنىڭ سۇيىكتى قىزمەتشىلەرىن ەشقاشان تاستامايتىنىنا كوز جەتكىزدى. قالاي؟ «قىزمەتشىلەرى اقشادان قىسىلعاندا، وزگەلەر ولاردى ٴبولىپ-جارعاندا، توپ بولىپ شابۋىل جاساعاندا، ەحوبا ولاردى قالاي قامقورلاعانى جايلى وي جۇگىرتتىم. سوندا ادالدىعىمنان تايماي تۇراتىن بولسام، ەحوبا مەنى جارىلقايتىنىن ٴتۇسىندىم. بىرنەشە رەت تۇتقىندالعاندا، ٴتىپتى ازاپتالعان كەزىمدە دە ەحوبا وزىنە ادال جاندارعا ٵردايىم كومەككە كەلەتىنىن ٶز كوزىممەن كوردىم»،— دەيدى ول. ەحوبا بينيامعا اسقار تاۋداي اكە بولىپ، ونىڭ حالقى بينيامنىڭ وتباسىنا اينالدى.
ولىمنەن قورقۋ
15. ولىمنەن قورقاتىنىمىز نە سەبەپتى قالىپتى جايت؟
15 كيەلى كىتاپتا ٶلىم ٴبىزدىڭ جاۋىمىز ەكەنى ايتىلعان (قور. 1-ح. 15:25، 26). ٶزىمىز نە تۋىسقاندارىمىز اۋىر دەرتكە شالدىققاندا، ٶلىمدى ويلاپ، ۇرەيلەنىپ كەتەتىن شىعارمىز. ولىمنەن قورقاتىن سەبەبىمىز — ەحوبا ٴبىزدى ومىردەن راقات الىپ، ماڭگى جاساسىن دەپ جاراتقان (ۋاع. 3:11). بۇل قورقىنىشتىڭ پايداسى دا بار. ٶمىرىمىزدى ساقتاۋ ٷشىن ٴبىز دۇرىس تاماقتانامىز، دەنە جاتتىعۋلارىن جاسايمىز، قاجەت كەزدە دارىگەرگە بارىپ، ەم-دوم قابىلدايمىز جانە ٴقاۋىپتى جاعدايلاردان اۋلاق جۇرەمىز.
16. شايتان ٶلىم الدىنداعى قورقىنىشتى قالاي پايدالانىپ كەتۋگە تىرىسادى؟
16 شايتان ٴبىزدىڭ ٶمىردى قاستەرلى سانايتىنىمىزدى جاقسى بىلەدى. ونىڭ ايتۋىنشا، ٴبىز جانىمىزدى ساقتاۋ ٷشىن بارلىق نارسەگە دايىنبىز، ٴتىپتى ەحوبادان باس تارتىپ كەتۋدەن دە تايىنبايمىز (ٵيۇپ 2:4، 5). بۇل — بارىپ تۇرعان وتىرىك! ٴبىراق شايتان ادامدى «ولىمگە ۇشىراتا الادى»، سوندىقتان ول ەحوبانى تاستاپ كەتۋىمىز ٷشىن، ولىمنەن قورقاتىنىمىزدى پايدالانۋعا تىرىسادى (ەۆر. 2:14، 15). مىسالى، ول ٶز ىقپالىنداعى ادامدار ارقىلى كەيبىر باۋىرلاستاردى «سەنىمىڭنەن باس تارتپاساڭ، ولتىرەمىز» دەپ قورقىتادى. اۋىر دەرتكە شالدىعىپ، ولىممەن الىسىپ جاتقان كەزىمىزدى دە پايدالانىپ كەتۋگە تىرىسادى. سوندايدا دارىگەرلەر نە تۋىسقاندارىمىز جان-جاقتان ٴبىزدى قىسپاقتاپ، قۇدايدىڭ زاڭىن بۇزىپ، قان قۇيۋعا كوندىرمەك بولاتىن شىعار. نەمەسە كەيبىرەۋلەر ەحوبانىڭ پرينسيپتەرىنە قايشى كەلەتىن ەم ٴتۇرىن ۇگىتتەۋى مۇمكىن.
17. ريمدىكتەرگە 8:37—39-تارماقتارعا ساي، نەگە ولىمنەن قورقۋدىڭ قاجەتى جوق؟
17 ارينە، ەشقايسىسىمىز ولگىمىز كەلمەيدى. ٴبىراق قانداي جاعدايعا ۇشىراساق تا، ٴتىپتى ٶلىپ قالساق تا، ەحوبانىڭ سۇيىسپەنشىلىگىنەن ايىرىلمايتىنىمىزدى بىلەمىز (ريمدىكتەرگە 8:37—39 وقىڭىز). قايتىس بولعان دوستارىن ول ەش ۇمىتپايدى، ەحوبا ٷشىن ولار ٵلى دە ٴتىرى (لۇقا 20:37، 38). قۇدايىمىز ولارعا قايتادان ٶمىر سيلايتىن كەزدى اڭسايدى (ٵيۇپ 14:15). ٴبىز «ماڭگىلىك ومىرگە يە بولۋىمىز» ٷشىن ەحوبا وتە جوعارى قۇن تولەپ قويعان (جوح. 3:16). ٴبىز ەحوبا قۇدايىمىزدىڭ ٴبىزدى قانشالىقتى جاقسى كورەتىنىن، قامىمىزدى ويلايتىنىن بىلەمىز. سوندىقتان اۋىرىپ قالعاندا نە بىرەۋلەر ولىممەن قورقىتقاندا، ٴبىز قۇدايىمىزدى تاستاپ كەتپەيمىز. قايتا، ونى پانا ەتىپ، ودان جۇبانىش، دانالىق، كۇش سۇرايمىز. ۆالەريا مەن كۇيەۋى ٴدال وسىلاي ەتكەن (ٴزاب. 41:3).
18. ۆالەريادان نە ۇيرەندىڭىز؟
18 ۆالەريا 35 جاسىندا وتە سيرەك كەزدەسەتىن قاتەرلى ىسىكتىڭ اۋىر تۇرىنە شالدىعادى. ول بىلاي دەيدى: «بۇل حاباردى ەستىگەندە، ٴبىر ساتتە ٶمىرىمىز استان-كەستەن بولىپ، ەسىمىزدى جيا الماي قالدىق. امان قالۋ ٷشىن ماعان وتە كۇردەلى وتا جاساۋ كەرەك بولدى. ٴبىراق قانشا ىزدەسەك تە، بىردە-ٴبىر حيرۋرگ قانسىز وتا جاساۋعا كەلىسپەدى. سوندا ەندى مەن ٶلىپ قالام با دەپ قورقىپ كەتتىم. ٴبىراق ەحوبانىڭ زاڭىن بۇزىپ، قان قۇيدىرۋدان ٷزىلدى-كەسىلدى باس تارتتىم». قالاي ۆالەريا سۇيىسپەنشىلىكتىڭ ارقاسىندا قورقىنىشىن جەڭدى؟ «ەحوبا مەنى وسى ۋاقىتقا دەيىن سۇيىسپەنشىلىگىنە بولەپ كەلدى ەمەس پە؟ ال ەندى بۇل مەنىڭ وعان دەگەن سۇيىسپەنشىلىگىمدى دالەلدەيتىن ٴسات ەدى. دارىگەرلەر ماعان جامان حابار ايتقان سايىن، ەحوبانىڭ جۇرەگىن قۋانتامىن، شايتاننىڭ جەڭۋىنە جول بەرمەيمىن دەگەن شەشىمىم بەكي ٴتۇستى. تۇبىندە ماعان قانسىز-اق ٴساتتى وتا جاسالدى. دەنساۋلىعىم ٵلى دە سىر بەرىپ تۇرادى، ٴبىراق ەحوبا ٴبىزدى ٵردايىم قاجەتىمىزبەن قامداپ كەلەدى. مىسالى، ماعان ناقتاما قويىلاردىڭ الدىنداعى اپتادا قاۋىمدا «قيىندىقتارعا تويتارىس بەر!» * دەگەن ماقالانى قاراستىردىق. بۇل ماقالا كۇيەۋىم ەكەۋمىزگە جۇبانىشتىڭ كوزى بولدى. ونى قايتا-قايتا وقىپ شىقتىق. باسقا دا ماقالالاردىڭ جانە رۋحاني ىستەرمەن اينالىسا بەرگەنىمىزدىڭ ارقاسىندا سابىر ساقتاپ، جانتىنىشتىعىنا يە بولدىق، ٵرى دۇرىس شەشىمدەر قابىلدادىق».
قورقىنىشىمىزدى جەڭەيىك
19. جاقىن ارادا نە بولادى؟
19 ەحوبانىڭ كومەگىمەن جەر-جەردەگى ماسىحشىلەر ٵرتۇرلى قيىندىقتاردى ەڭسەرىپ، شايتانعا تويتارىس بەرىپ كەلەدى (پەت. 1-ح. 5:8، 9). بۇل ٴسىزدىڭ دە قولىڭىزدان كەلەدى! وتە جاقىن ارادا ەحوبا بۇيرىق بەرىپ، يسا مەن ونىمەن بىرگە بيلىك ەتەتىندەر «ٸبىلىستىڭ ىستەرىن تالقاندايدى» (جوح. 1-ح. 3:8). سودان كەيىن جەر بەتىندە ەحوباعا قىزمەت ەتەتىن حالىقتى «ەشتەڭە قورقىتپايدى، شوشىتپايدى دا» (يشايا 54:14؛ ميحا 4:4). ال سول ۋاقىت كەلگەنشە، قورقىنىشىمىزعا بوي الدىرماي، ونىمەن كۇرەسە بەرەيىك.
20. قورقىنىشتى جەڭۋگە نە كومەكتەسەدى؟
20 ٴبىز ەحوبانىڭ ٶز قىزمەتشىلەرىن سۇيەتىنىنە، قورعايتىنىنا ودان بەتەر سەنىمدى بولا بەرۋىمىز كەرەك. بۇل ٷشىن ونىڭ ەجەلگى قىزمەتشىلەرىنە قالاي قورعان بولعانى جايلى وي جۇگىرتىپ، بۇل تۋرالى وزگەلەرمەن سويلەسسەك بولادى. سونداي-اق ەحوبا ۋايىمعا باتىراتىن جاعدايلارعا كەزىككەنىمىزدە جەكە بىزگە قالاي كومەكتەسكەنىن دە ەستە ۇستايىق. وسىلايشا ەحوبانىڭ كومەگىنىڭ ارقاسىندا قورقىنىشتى جەڭە الامىز! (ٴزاب. 34:4).
129-ٵن تاباندى بولامىز
^ قورقىنىش — ادامعا ٴتان سەزىم، ٵرى ول ٴبىزدى قاۋىپتەن ساقتايدى. ٴبىراق كەيدە ٴبىز قورقىنىشقا بوي الدىرساق، ونىڭ زيانىن كورۋىمىز مۇمكىن. ويتكەنى شايتان سول سەزىمدى وزىمىزگە قارسى پايدالانىپ كەتەدى. ەندەشە قورقىنىشتى تىزگىندەپ ۇيرەنگەنىمىز ٴجون. بۇل ٷشىن ەحوبانىڭ ٴبىزدى سۇيەتىنىنە، قولدايتىنىنا سەنىمدى بولۋىمىز كەرەك. سوندا كەز كەلگەن قورقىنىشىمىزدى جەڭە الامىز.
^ كەيبىر ەسىمدەر وزگەرتىلگەن.