1. Diad anto ran situasyon ya makalikna tayoy takot?

 ISIP mo pa irayan situasyon na agagi tayo. Si Nestor tan Maria et plano day manboluntaryo ed lugar ya daiset so Tasi. * Pero amta na sayan sanasawa ya kaukolan dan pasimplien so bilay da pian nagawaan da itan. Natatakot ira balet ta ompan agda nasarag so ontan ya klase na kabibilay. Si Biniam et nagmaliw ya Tasi diad sakey ya bansa ya bawal so kimey tayo. Natatakot ta ompan arestoen tan pairapen na gobierno. Pero say mas tatakotan to et no antoy reaksion na pamilya to no naamtaan da ya Tasi la. Si Valerie et a-diagnose ya walay kanser to. Kaukolan toy manpa-opera, pero nairapan ya makalmoy doktor ya ompayag ya anggapoy blood transfusion, kanian natatakot ya ompan ipatey to lay kanser to.

2. Akin et ag-itayo dapat manpapadaeg ed takot tayo?

² Kasin aliknam la irayan klase na takot ya alikna na saray agagi tayo? Dakel ed sikatayo so makakalikna na ontan. No manpadaeg tayod takot tayo, ompan aliwa iray desisyon tayo tan onkapuy lay espiritualidad tayo. Ontan so labay nen Satanas ya nagawa. No nanengneng to ya natatakot tayo, samboten to itan pian natukso tayon ag-unoren iray ganggan nen Jehova, kaiba lay ganggan ya ipulong so maong ya balita. (Apo. 12:17) Tua, mauge-uges tan makapanyari si Satanas, pero walay makatulong pian agto ka natalo. Anto itan?

3. Antoy lanang tayon isipen pian ag-itayo nadaeg na takot?

³ No lanang mon isipen ya inar-aro ka nen Jehova tan naynay mon kaiba, agkan balot nataktakot nen Satanas. (Sal. 118:6) Makaaral tayo ed samay angisulat ed Salmo 118.  Nanduruman problema so dinalan to. Singa bilang, dakel so mamubusol ed sikato, kaiba la ray ataragey ya opisyal (bersikulo 9, 10). Imbaga to met ya singano walay mangitutulak ed sikato na makmaksil kanian ngalngali la onsuko (bersikulo 13). Tan asali to met so dinisiplina nen Jehova (bersikulo 18). Pero anggan ontay situasyon to, kinansionan to nin siansiay Aman Jehova tan imbaga ton: “Agak ontakot.” Akin et maligen so liknaan to tan agtinmakot? Anggano sikatoy adisiplina, amta to ya sikatoy inar-aro na Ama tod tawen. Segurado iyan salmista ya antokaman so situasyon, wadtan ya lanang si Aman Jehova ya ontulong ed sikato.—Sal. 118:29.

4. No kombinsido tayon inar-aro itayo na Dios, anto ran klase na takot so natalo tayo?

⁴ On, dapat kombinsido ka ya inar-aro ka nen Jehova. No agmo pandudaan so panangaro to, natalom iyan taloran klase na takot: (1) say takot ya agmo nalegpet so pamilyam, (2) say takot ed too, tan (3) say takot ya ompatey. Saramay agagi ya abitla ed gapo et ag-adaeg na takot lapud kombinsido ira ya inar-aro ira na Dios.

5. Anto ray pampapagaan na sakey ya ulo na pamilya? (Nengnengen so litrato ed apis.)

⁵ No sakey kan Tasi ya ulo na pamilya, seguradon seseryosoen mo so responsabilidad mo ya legpeten so pamilyam. (1 Tim. 5:8) Nen pandemic, ompan aburido ka ya naekal kad trabahom. Seguro, sankanonot mo no iner so pangalaan moy pambilay na pamilyam, tan say ibayar ed kuryente tan danum. Ompan naisip mo met ya no naekal kad trabaho, ompan agka la makaanap na arum. Odino singa si Nestor tan Maria ya abitlad gapo, ompan manaalangan kayo ya pasimplien so bilay yo ta iisipen yon agyo itan nasarag. Dakel lan agagi so apatitan nen Satanas ta agda nilabanan so ontan ya takot da.

6. Antoy labay nen Satanas ya isipen tayo?

⁶ Labay nen Satanas ya isipen tayon anggapoy pibabali nen Jehova tan agto tayo tulongan ed pangasikaso tayod pamilya tayo. No ontan so isipen tayo, ompan ibaliwala tayo la iray prinsipyo ed Biblia pian ag-itayo naekal ed trabaho.

7. Antoy impaseguro nen Jesus?

⁷ Oniay impaseguro nen Jesus: “Amta la na Ama yo so nakaukolan yo antis kayon onkerew ed sikato.” (Mat. 6:8) Nibaga to itan ta kabkabat ton maong si Aman Jehova. Amta to ya labalabay nen Jehova ya iter iray pankaukolan tayo. Tandaan tayo ya parte itayo na pamilya nen Jehova. Lapud sikato so Ama, makaseguro tayo ya gawaen ton mismo imay prinsipyo ya impaisulat to diad 1 Timoteo 5:8.

8. (a) Antoy nepeg tayon tandaan pian agtayo panaburidoan ya maong so pankaukolan na pamilya tayo? (Mateo 6:31-33) (b) Diad litrato, panon tayon naalig so alimbawa na sanasawa ya angawit na panangan parad sakey ya sister tan say anak to?

⁸ No kombinsido tayo ya inaro itayo nen Jehova tan inaro toy pamilya tayo, agtayon balot pandudaan ya talagan iter to ray pankaukolan tayo. (Basaen so Mateo 6:31-33.) Diad tua, sankamaaroan tan sankamaiteran si Aman Jehova. Nen ginawa to so dalin, nayari pa komon ya say palsaen to et saramay kaukolan tayo labat pian nabilay tayo. Pero andi, dakdakel ni so ginawa to pian na-enjoy tayoy bilay. (Gen. 2:9) Panon to balet no say bilay tayo et ‘sankaalmo-sankaluto’? Misalamat tayo nin siansia ta seseguroen nen Jehova ya ag-itayo napapaulyanan diad kada agew. (Mat. 6:11) No bilang ta wala ray insakripisyo tayo parad si Jehova, tandaan tayo ya ag-iratan makakiking ed saray bendisyon ya iter tod  sikatayo natan tan diad balon mundo. Apaneknekan itan ya mismo nen Nestor tan Maria.—Isa. 65:21, 22.

9. Antoy naaralan mo ed alimbawa nen Nestor tan Maria?

⁹ Mainaway bilay di Nestor tan Maria diad Colombia. “Implano mi ya pasimplien so bilay mi pian mas dakel so nagawaan mi parad si Jehova,” so kuan da. “Pero natatakot kami met ta ompan agmi nasarag so manbilay ya simpli.” Antoy ginawa ra pian nalabanan day takot da? Inisip da so amin ya kamaongan nen Jehova ed sikara. Lapud satan, akombinse ira ya inar-aro ira nen Jehova tan agto ran balot paulyanan. Kanian nan-resign ira ed trabaho da anggano baleg so sueldo ra. Inlako day abung da, insan ira inmalis ed lugar diad Colombia ya daiset so Tasi. Kasin pagbabawian day desisyon da? Oniay imbaga nen Nestor: “Apatunayan mi ya tua so Mateo 6:33. Inter nen Aman Jehova so amin ya nakaukolan mi, tan mas maliket kami natan.”

10. Akin et agtayo la pankelawan ya antakot na too so kapara ton too?

¹⁰ Manlapu lad impanrebelde nen Adan tan Eva ed si Jehova, puro kaugsan lawari so gagawaen na too ed kapara ton too. (Ecl. 8:9) Singa bilang, wala ray opisyal ya aabusoen day autoridad da, ondadakel so kriminal, anggan ugugaw et bubully-en day kaklase ra, tan say arum ingen et mamaltratoen day mismon kapamilya ra. Agtayo la sirin pankelawan no akin ya antakot na too so kapara ton too. Panon ya uusaren nen Satanas so takot ed too pian onkapuy so espiritualidad tayo?

11-12. Panon ya uusaren nen Satanas so takot ed too pian pakapuyen itayo?

¹¹ Uusaren nen Satanas so takot ed too pian agtayo la unoren si Jehova tan ontunda tayo lan manpulong. Susugsogan to ray gobierno kanian ibabawal day kimey tayo tan papairapen da tayo. (Luc. 21:12; Apo. 2:10) Dakel met ya totoo natan so mangikakayat na katilaan tungkol ed saray Tasi nen Jehova. Wala ray napapanisia da kanian bubusolen, iinsultoen, tan sasakitan da tayo ni ingen. (Mat. 10:36) Pero diad tua, aliwa la yan balo ta diad panaon na saray apostol et ontan lay ginawa nen Satanas.—Gawa 5:27, 28, 40.

¹² Balet aliwan gobierno labat so uusaren nen Satanas pian nataktakot to iray lingkor na Dios. Say mas pampapagaan na arum et no antoy reaksion na pamilya ra no naamtaan  dan manaaral la ray Biblia ed saray Tasi. Siempre, inar-aro day pamilya ra tan labay da ya manaral met ira komoy Biblia tan nakabat day Dios ya Jehova. Diad tua, ansaki-sakit pa no narengel moy kapamilyam ya balaw-balawen da iray Tasi tan anggapoy respeto ra ed tuan Dios. Pero wala ray kapamilya tan kakanayon na saray agagi tayo ya dati et kontra, pero nagmaliw lanlamang iran Tasi. Antoy gawaen mo balet no intakwil ka na pamilyam lapud pinilim so manlingkor ed si Jehova?

13. No intakwil ka na pamilyam, akin et makatulong no lanang mon nonoten ya inar-aro ka nen Jehova? (Salmo 27:10)

¹³ Balibalin dalepdepen imay nabasa ed Salmo 27:10. (Basaen.) No sankanonot tayo ya inar-aro itayo nen Jehova, agtayo mapaga anggano itakwil itayo na mismon pamilya tayo. Sakey ni, amta tayo ya seguradon bendisyonan nen Jehova so amin ya sakripisyo tan panaanos tayo. Insipan nen Jehova ya sikato lay akauley ya mangiter ed pisikal, emosyonal, tan espiritual ya pankaukolan tayo. Isip mo pa, wala ni kasi mas maong ya mangasikaso ed sika nen say si Jehova? Imanoen tayoy naeksperiensya nen Biniam ya abitla ed gapo, tan nengnengen tayo no panon ton alikna so panangasikaso nen Jehova.

14. Antoy naaralan mo ed alimbawa nen Biniam?

¹⁴ Nandesisyon si Biniam ya manlingkor ed si Jehova anggano amta to ya imbawal tan papairapen na gobierno iray Tasi nen Jehova diad bansa ra. Antoy akatulong ed sikato pian nalabanan toy takot ed too? Sankanonot to ya sikatoy inar-aro nen Jehova. Oniay istorya to: “Grabe so impamairap ed siak na gobierno. Pero diad tua, say mas sankanonot ko et say reaksion na pamilyak. Natatakot ak ya ompan nadismaya ed siak si tatay ko tan agak la respetoen na saray kapamilyak.” Pero kombinsido si Biniam ya agan balot paulyanan nen Jehova iramay inar-aro To. Oniay imbaga nen Biniam: “Lanang kon iisipen no panon ya tinulongan nen Jehova iray agagi pian naanosan day irap na bilay, nitepel day ag-inkahustisya, tan nasarag day panag-insulto tan panamairap. Segurado ak ya bendisyonan to ak no agak onikban ed sikato. Aminpiga ak ya naaresto tan asalik ni ingen so a-torture, pero apaneknekan kon mismo ya talagan wadtan si Jehova ya ontulong ed sikatayo, basta manmatoor tayo labat.” On, si Jehova so nagmaliw ya Tatay  nen Biniam, tan saray agagi so nagmaliw ya pamilya to.

15. Akin et normal labat ya antakot tayoy ompatey?

¹⁵ Ibabaga na Biblia ya say patey et sakey ya kabusol o kalaban. (1 Cor. 15:25, 26) No walay kaaro o kapamilya tayon mansasakit na grabe, mapagpaga tayo ta agtayo labay ya sikatoy ompatey. Akin et walay ontan ya liknaan tayo? On ta inyan nen Jehova ed puso tayo ya say labay tayo et manbilay na andi-anggaan kanian agtayo labay so ompatey. (Ecl. 3:11) Diad tua, walay nitulong na ontan ya liknaan. Singa bilang, lapud antakot tayoy ompatey, mangan tayoy masustansia tan man-exercise tayo. No walay sakit tayo, manpa-doktor tayo tan oninum tayoy tambal. Iwasan tayo met iray kagagawa tan situasyon ya mangipeligro ed bilay tayo.

16. Panon ya uusaren nen Satanas so takot ya ompatey pian napatitan iray lingkor na Dios?

¹⁶ Amta nen Satanas ya inaro tayoy bilay tayo. Pero ibabaga to ya gawaen tayo kunon amin pian labat naisalba tayoy bilay tayo anggano naderal so relasyon tayod si Jehova. (Job 2:4, 5) Dakel la balet ya lingkor nen Jehova so nampatunay ya aliwan tua itan. Pero lapud walay pakayari nen Satanas ya mamatey tan amta to ya antakot tayoy ompatey, uusaren to itan ya takot pian agtayo la unoren si Jehova. (Heb. 2:14, 15) Uusaren to met iray alipores to pian taktakoten iray lingkor nen Jehova ya pateyen da ra no agda ikbanan so katooran da. No maminsan, samboten nen Satanas ya tuksoen itayon ibaliwala iray prinsipyo nen Jehova no nipepeligro lay bilay tayo lapud graben sakit o antokaman ya emergency. Diad onia ran situasyon, ompan piliten itayo na saray doktor o kapamilya tayon aliwan Tasi pian manpasaksak itayo na dala. Ompan wala met so mankombinsi ed sikatayo ya salien tayoy sakey ya klase na therapy o panagpatambal ya kontra ed prinsipyo na Biblia.

17. Base ed Roma 8:37-39, akin et agtayo dapat takotan so patey?

¹⁷ Natatalosan nen Jehova ya agtayo labay so ompatey, pero ipapaseguro tod sikatayo ya “anggan say patey . . . et agbalot makapangisian ed sikatayo ed panangaro [to].” (Basaen so Roma 8:37-39.) Agbalot lingwanan nen Jehova iray inatey lan kakaaro to. Diad tua, ibabaga na Biblia ya diad nonot to et mabilay iran amin. (Luc. 20:37, 38) Ontan lay panangaro tod sikara kanian labalabay to la ran bilayen. (Job 14:15) Balbaleg ingen so imbayar to pian “nawalaan [itayo] na bilay ya andi-anggaan.” (Juan 3:16) On, tandaan tayo ya inar-aro itayo nen Jehova tan mabmabli tayo ed pakanengneng to. Kanian imbes ya agka manmatoor ed si Jehova no mansakit ka na grabe o walad peligro so bilay mo, ipikasim ed sikato ya ikdan to kay karunongan, biskeg, tan deen na nonot pian nasarag mo itan ya situasyon. Ontan ya ontan so ginawa nen Sister Valerie tan say asawa to.—Sal. 41:3.

18. Antoy naaralan mo ed alimbawa nen Valerie?

¹⁸ Nen 35 so taon nen Valerie, a-diagnose ya walay kanser to. Natatakot ta atan imay klase na kanser ya maples ya onggrabe. Pero imanoen no panon ton adaeg so takot tod patey lapud panangaro. Oniay istorya to: “Abigbigla kami nen asawak nen a-diagnose ak ya walay kanser ko. Imbaga na doktor ya kaukolan koy manpa-opera. Abayagan kami ya nananap na doktor ya man-opera ed siak ta ag-ira ompayag ya aga ak saksakan na dala. Mapagpaga ak, pero desidido ak ya unoren so ganggan nen Jehova kanian talagan agko labay so manpa-blood transfusion. Diad interon bilay  ko, impaliknad siak nen Jehova ya inar-aro to ak. Tsansak met la natan ya ipanengneng ed sikato ya inar-arok met. Kada no walay makapakapuy ya ibaga na doktor, diman mas ombibiskeg so determinasyon ko ya paliketen si Jehova pian aga manalo si Satanas. Ag-abayag, walan siansiay doktor ya pinmayag ya man-opera ed siak ya anggapoy blood transfusion. Anggano wala nin siansiay sakit ko, agkami papaulyanan nen Jehova. Diad tua, antis ak ya a-diagnose, tinalakay ed aral imay artikulon ‘Panalonad Saray Problema Tekep na Inkakpel.’ * Balbaleg so nitulong to iman ya artikulo. Aminpigapiga min binasa. Nambasa kami na arum ni ran artikulo ya singa ontan, tan agmi pinaulyanan so panagpulong tan pipiaral mi. Kanian kalmado kami nen asawak, tan duga iray desisyon mi anggano mairap so situasyon.”

19. Antoy asingsingger lan nagawa?

¹⁹ Diad tulong nen Jehova, nasasarag na saray lingkor to ed interon mundo iray mair-irap ya situasyon tan ag-ira manpapatalo ed Diablo. (1 Ped. 5:8, 9) Sarag mo met ya taloen si Satanas! Asingsingger lan iganggan nen Jehova si Jesus tan saray kaiba ton arari “pian deralen . . . iray kimey na Diablo.” (1 Juan 3:8) No nagawa la itan, anggapo lay takotan na saray lingkor na Dios diad dalin tan ‘anggapo lay sengegan na panggiwgiw da.’ (Isa. 54:14; Miq. 4:4) Legan tayo balet ya aalagaren itan, gawaen tayoy anggaay nayarian tayon labanan so takot tayo.

20. Antoy gawaen tayo pian ag-itayo nadaeg na takot?

²⁰ Kaukolan tayon pabiskegen so tiwala tayo ya inar-aro itayo nen Jehova tan protektaan to iray lingkor to. Antoy makatulong pian nagawaan tayo itan? Maabig no lanang tayon isipen tan panistoryaan no panon ya prinotektaan nen Jehova iray lingkor to nensaman. Tan agtayo met lilingwanan no panon itayo lan tinulongan ya mismo nen Jehova pian nasarag tayo ray problema tayo. On, diad tulong nen Jehova, sarag tayon taloen iray pakakatakotan tayo!—Sal. 34:4.