1. Ngera bebil er a tekoi el lemedakt a rechad?

 MOLATK aika el blekeradel el lechebangel a remesiungel a Jehovah. A Nestor me a bechil er a María a mle sorir el mo olengeseu er a basio lousbech a ruumerk er a klumech. * Me nguaisei engdi tia mo belkul a kmo ngkirir el mo melodech er a blekerdelel a klengar er tir. Te mle medakt el kmo te diak bo el deu a rengrir a di bo lemekesai a ududir. A Biniam a mlei er a klemerang er a beluu el omtok a urered, me ngmiltebengii el kmo ngmo chobangel odechelakl. Tia milkdektii, me nguaisei engdi ngika mle lmuut el medakt er a uldesuel a telungalek er ngii el kirel tia el beches el klechelid er ngii. A Valérie a mlo smecher er a ta er a bedengel a kasinoma el kmal mereched el obriid, e mle meringel er ngii a metik er a toktang er a botk el kongei el diak lousbech a rasech. A Valérie a mle medakt el mad.

2. Ngera uchul me ngkired el meringel el oureor el mo mesisiich a dekted?

² Mla ta el bo momelechesiu chouaika el dakt? A rebetok er kid a mla melechesiu. A lsekum e ngdiak desuubii el mo mtebechel aika el dekted, e kede locha mo meruul a mekngit el omelilt el ngii a sebechel tomellii a deleuill er kid me a Jehovah. Tiakid a soal a Satan. A Satan a dirrek el melasem lousbech a dekted el meruul er kid el mo otngakl a llechul a Jehovah, luldimukl er a llechul el mo omerk er a ungil chais. (Och. 12:17) Satan a kmal imis el mekngit a blekerdelel, e diak lechubechub, e kmal mesisiich. Engdi ngsebechem el mukerreu er ngii. Ngmekera omoruul er tiang?

3. Ngera mo ngosukid el mo mesisiich a dekted?

³ Sel lulterekokl a rengud el kmo a Jehovah a betik a rengul  er kid e obengked, e ngdiak bo demedakt. (Psa. 118:6) El ua tiang, ngike el milluches er a 118 el bliongel er a Psalm a mlo chobangel a kmal meringel el blekeradel. Ngika mle betok a recherrouel el bebil er tir a mle ngarbab el chad (9 me a 10 el kekerei el bades). E ngar ngii aike el taem el blo lomelechesiu er a klou el berraod (13 el kekerei el bades). Ngdirrek el ngilai a mesisiich el omesmechokl er a Jehovah (18 el kekerei el bades). Me nguaisei engdi ngmilengitakl el kmo: “Ng diak bo kmedakt.” Ngera uchul me ngkmal ulemelechesiu er ngii el selebechakl? Ngmle medengei el kmo alta ngilai a omesmechokl, a Jehovah kmal betik a rengul er ngii. Ngmle ulterekokl a rengul el kmo a ngii di el tekoi el bo lechebangel, a Dios er ngii a kltmokl el mo ngosuir.​—Psa. 118:29.

4. Ngera el dakt a sebeched el mo mesisiich er ngii sel bo doumerang el kmo, a Jehovah a betik a rengul er kid?

⁴ Ngkirel mo ulterekokl a rengum el kmo a Jehovah kmal betik a rengul er kau. Tiakid el ulterekokl el reng a mo ngosukid el mo mesisiich aika el kldei el dakt: (1) medakt el kmo ngmo diak el sebeched el msa telungalek er kid aike el lousbech, (2) medakt er a rechad, me a (3) medakt el mad. Tirke el chad el dulsaod er tir er aike el uleak uchei el parakurab a mle sebechir el mo mesisiich er aika el dakt, e le ngmle ulterekokl a rengrir er a bltkil a rengul a Jehovah el mo er tir.

5. Ngera el blekeradel a locha mekberedii a bdelul a telungalek? (Momes er a siasing er a medal tia el babier.)

⁵ A Kristiano el bdelul a telungalek a omes er a ngerechelel el mesiou er a telungalek er ngii el kmal klou a ultutelel. (1 Ti. 5:8) A lsekum e kau a bdelul a telungalek e ke locha kmal mle bekikl er a temel a pandemic el kmo, ke mo el loridii a urerem. Ke locha mle bekikl el kmo ngmo meringel er kau omeka er a telungalek er kau e harau er a blimiu. Ke dirrek el locha mlo bekikl el kmo a omoridii a urerem e ngmo el mo diak ko betik a ureor. Me a lechub e ke ua Nestor me a María el ulemdasu el kmo ngmeringel er kau a mesiou er a telungalek er kau el di ousbech a mekesai el udoud. A Satan a mla rulleterir a rebetok el chad el mo omdasu el uaisei e mo diak el losiou er a Jehovah.

6. A Satan ngmelasem el meruul er kid el mo omdasu el uangerang?

⁶ A Satan a melasem el meruul er kid el mo omdasu el kmo a Jehovah a diak el betik a rengul er kid, e diak a mo ngosukid el omekerreu er a telungalek er kid. Tia rullid el mo omdasu el kmo, ngkired el meruul aike el rokui el sebeched me lak bo doridii a urered, mo lmuut me a lsekum e ngmo kired lotngakl a omellach er a Biblia.

7. Ngera ngolterekokl er a rengud er ngii a Jesus?

⁷ A Jesus el ngike el kot el ungil medengelii a Chedam a olterekokl er a rengud el kmo, a Dios a “medengei a ikel [dousbech] er uchei er [a dolengit] er ngii.” (Mt. 6:8) E ngii el Jesus a medengei el kmo a Jehovah a kmal kltmokl el mo meskid aike el dousbech. Kid el Kristiano a chedal a telungalek er a Jehovah. Me ngsebechel mo ulterekokl a rengud el kmo, a bdelul a telungalek er kid el Jehovah a mo oltaut er a omellach el ngar er a 1 Timothy 5:8.

8. (a) Ngera mo ngosukid el mo mesisiich er a dakt el kmo, ngmo el mo diak debsa telungalek er kid aike el lousbech? (Mateus 6:31-33) (b) Ngua desa er a siasing, ngmekera sebeched loukerebai er tirka el obekel el share a kall lobengkel ngika el odos?

⁸ Sel bo lulterekokl a rengud el kmo a Jehovah a betik a rengul er kid me a telungalek er kid, e ngdiak lemeringel er kid oumerang el kmo kede mo ngmai aike el dousbech. (Monguiu er a Mateus 6:31-33.) A Jehovah kmal soal omekerreu er kid, e ngii a kmal bekururau el omeskid aike el dousbech! Sera lomeob er tia el beluulechad e ngdimlak di lerellii el  meskid aike el dousbech el mo melemolem el ngar. Ngoeak a bltkil a rengul e ngmilekekii a beluulechad er a betok el tekoi el mo uchul a deuil a rengud. (Gen. 2:9) Mo lmuut er aike el taem el di lengar ngii aike el kmal dousbech e diak a dechelel me ngkired el melatk el kmo, ngngar ngii aike el dousbech e le Jehovah el omeskid. (Mt. 6:11) Ngdiak el kired el lobes el kmo a ngii di el tekoi el diak bo dengai lekid el nguu a Jehovah el mo kot, a kmal diak lokesiur aike el bo lomeskid a Jehovah er chelechang me a ngar medad el taem. Tiakid a blo lodengelii a Nestor me a María.​—Isa. 65:21, 22.

9. Ngera sebechem el suub er a Nestor me a María?

⁹ A Nestor me a María a kmal mle ungil a klengar er tir er a Colombia. Te kmo: “Aki ulemdasu er a omekbeot er a klengar er kemam e menglou er a omesiungam, engdi aki mle bekikl el kmo ngmo el mo diak el deu a rengmam a di lekesai a ududam.” Ngera ngilsuterir el mo mesisiich er tia el dektir? Te millebedebek aike el betok el rolel e a Jehovah a mla ochotii a bltkil a rengul el mo er tir. Tir el mlo ulterekokl a rengrir el kmo a Jehovah mo blechoel el omekerreu er tir, a uchul me te chiloit a urerir el ungil a udoud er ngii. Te ulterur a blirir e millukl el mora basio er a belurir el uluusbech er a ruumerk er a klumech. Me ngua ngera uldesuir el kirel a omelilt er tir? A Nestor a kmo: “Aki mla mesa el kmo ngmera el klemerang a Mateus 6:33. Ngkmal dirkak a ta el ki bom olengesonges er aike el ki mousbech. E kmal lmuut el dmeu a rengmam er a klengar er kemam er chelechang.”

10. Ngera uchul me a rechad a mo medakt er a rechad?

¹⁰ A rechad a ngar ngii a blekerdelir el melemall er a rekuk bebil. (Oli. 8:9) El ua tiang, a rechad a mekngit el ousbech a klisiich el lolab, remedengerenger a meruul a kmal mekngit el tekoi, re bully a omecheracheb er a rekuk bebil ngalek er a skuul, me a rebebil er a rechad a kmal mekngit a omerellir el mora telungalek er tir. Sei a uchul me a rechad a medakt er a rechad! Ngmekera Satan e melasem lousbech er tia el dakt er a rechad?

11-12. Ngmekera Satan e ousbech er a datk er a rechad el mei er kid?

¹¹ A Satan ousbech er a dakt er a rechad el melasem el meruul er kid el mo diak domerk er a klumech me aike el ledu er kid a Jehovah. Aika el kabelment el cheltikaik er a Satan a mla merrob a urered e oldechelakl er kid. (Lk. 21:12; Och. 2:10) Kakerous el telengtengil a beluulechad er a Satan omerk a blulak el kirir a Resioning er a Jehovah. A rechad el oumerang  aika el tekoi a mo oltuub er kid me a lechub e te oldechelakl er kid. (Mt. 10:36) Ngmechas a rengud er aika el omerellel a Satan? Ngkmal diak. Ngika uluusbech aika el osisiu el omeruul er a taem er a rekot el Kristiano.​—Rel. 5:27, 28, 40.

¹² A Satan a diak di lousbech er a dakt er a odechelakl er aika el kabelment. A rebebil a lmuut el medakt a uldesuir a rechedal a telungalek er tir el ngaruchei er a omengelebed er a rechad. Ngkmal betik a rengrir er a telungalek er tir e sorir a bo lodengelii a Jehovah e bo lebetik a rengrir er ngii. Ngkmal mo mekngit a rengrir sel lsekum a rechederir a mo melekoi a mekngit el kirel a Dios me a remesiungel. Me nguaisei ngar er a bebil blekeradel e tirke el kmal ulemtok a mlei er a klemerang. Engdi kede mo mekerang a lsekum a rechedal a telungalek er kid otngeklid el klaumerang er kid a uchul?

13. Sel lotngeklid a rechedal a telungalek er kid, e ngmekera e ngosukid sel bo lulterekokl a rengud er a bltkil a rengul a Jehovah el mei er kid? (Psalm 27:10)

¹³ Ngkmal sebechel mechelaod a rengud er aika el klebokel el tekoi el debetik er a Psalm 27:10. (Monguiu.) Sel dolatk er a klungel a bltkil a rengul a Jehovah el mei er kid e ngkmal diak demedakt a tekoi el bo dechebangel. Me ngii a ulterekokl a rengud el kmo ngmo omekngeltengat er kid a doutekangel. A Jehovah a meskid aike el dousbech er a bedenged, uldesued me a rengud, me a tekoi er a klereng el ngaruchei el lmuut el ungil er a ngii di el chad! Tiakid a blo lodengelii a Biniam el dulsaod er ngii er a uchei.

14. Ngera sebechem el suub er a Biniam?

¹⁴ A Biniam a mlo Sioning er a Jehovah alta ngmle medengei el kmo ngsebechel mo chuarm er a meringel el odechelakl. Molatk er a rolel e a klemedengei er ngii er a bltkil a rengul a Jehovah el mo er ngii, a ngilsuir el mo mesisiich er a dakt er a rechad. Ngdmu el kmo: “A odechelakl a mle lmuut el meringel er sel kullatk er ngii. Me nguaisei engdi ak mle lmuut el medakt er a ultok er a telungalek er ngak. Ak mle bekikl el kmo a omelilt er ngak el mo ta er a Sioning er a Jehovah a mo tomellii a rengul a demak el ngii a diak el ngar er a klemerang, me a telungalek er ngak a mo omdasu el kmo ak chelsengsang.” Nguaisei engdi a Biniam a mle ulterekokl a rengul el kmo a Jehovah omekerreu er a rebetik er a rengul. Ngmelekoi el kmo: “Ak millebedebek er a rolel e a Jehovah mla ngosuterir a rebebil el outekangel a ringelel a siungel a telungalek er tir, omengetukel er a rechad, me a recheldebechel er a rechad el  merael el melemall. Ak mle medengei el kmo a bo kuba blakerreng el mora Jehovah e ngmo omekngeltengat er ngak. Ngar er aike el taem el blo kkelebus e dirrek el blo kchuarm a meringel el odechelakl, e ak mlo mesa el kmo a Jehovah a kmal ngosukid er sel taem el dousbech er ngii a lsekum e kede melemolem el oba blakerreng.” A Jehovah a mera el mlo Demal a Biniam, me a rechedal a ulechotii el kmo te mera el telungalek er ngii.

15. Ngera uchul me kede medakt el mad?

¹⁵ A Biblia di bleketakl el melekoi el kmo, a kodall a cheraro. (1 Ko. 15:25, 26) Nglocha kmal mo ouedikel a rengud sel dolatk a mad, tokubets sel lsekum kid me a lechub e ngbetik er a rengud a kmal smecher. Ngera uchul me kede medakt el mad? E le Jehovah milebid el soad el ngar el mo cherechar. (Oli. 3:11, NW) E uaisei, a tabesul el uldasu el kirel a kodall a sebechel ngosukid el mo omekerreu er a klengar er kid. El ua tiang, ngsebechel el rullid el mo menga kall el ungil er a bedenged e mo blechoel el exercise e osiik a ngelsurir a retoktang e mo melai a kar a lsekum e ngkirel, me lak bo luchul e bo desecher e mad.

16. Ngmekera Satan e ousbech er a dekted el diak el soad el mad?

¹⁶ A Satan a medengei el kmo kede kmal mengreos er a klengar er kid. Ngika melekoi el kmo kede mo otngakl a rokui el tekoi el mo lmuut er a deleuill er kid me a Jehovah el olsobel er a klengar er kid. (Job 2:4, 5) Ngika kmal cheleuid! Me nguaisei engdi ngii el dirk “oba klisiich er a kodall” a uchul me ngousbech er tia el dekted el diak el soad el mad el meruul er kid el mo choitii a Jehovah. (Heb. 2:14, 15) Ngar er a bebil blekeradel e a rechad el cheltikaik er a Satan a omekdakt er a remesiungel a Jehovah el kmo, te mo mekodeterir a lak lotngakl a klaumerang er tir. E ngar er a kuk bebil er a blekeradel e a Satan ousbech a emergency er a rolel a tekoi er a ukeruul el melasem el meruul er kid el mo otngakl a llechul a Jehovah. A retoktang me a lechub a rechedad el diak el ngar er a klemerang a locha mo orrimel er kid el mo ousbech a rasech, e tia melemall er a llechul a Dios. Me a lechub a chad a oldubech er kid el mo kongei a therapy el ngii omtok a omellach er a Biblia.

17. Ngua losaod a Rom 8:37-39, ngera me ngdiak el kired el medakt er a kodall?

¹⁷ Me alta ngdiak el soad el mad, engdi kede medengei el kmo a demad e ngdiak leterebengii a bltkil a rengul a Jehovah el mei er kid. (Monguiu er a Rom 8:37-39.) A resechelil a Jehovah sel lemad e te ngar omeltkel me te ua ledirk el chad er osengel. (Lk. 20:37, 38) Ngkmal urungulel a olekiis er tir el lmuut el me ngar. (Job 14:15) A Jehovah kilkedir a kmal ngarbab el char me bo lsebeched el “mo ngar el diak a ulebengelel.” (Jn. 3:16) Kede medengelii a klungel a bltkil a rengul me a ulekerreuil a Jehovah el mei er kid. Me ngdiak bo dechitii sel bo desecher me a lechub a lsekum e ngsebeched el mad, kede bai mo er ngii el kirel a ongelaod, llomeserreng, me a klisiich. Tiakid a lurruul er ngii a Valérie me a bechil.​—Psa. 41:3.

18. Ngera sebechem el suub er a Valérie?

¹⁸ A Valérie er a le 35 a rekil e ngmlo smecher er a kasinoma el kmal mereched el lobriid. Molatk er a rolel e a bltikerreng er a Jehovah ngilsuir el mo mesisiich er a dektel el diak el soal el mad. Ngdmu el kmo: “A klengar er kemam a di mle kiul el mengodech er a rektek. A kuluusbech er a klou el botk. Ak milengedecheduch er a rebetok el toktang er a botk, engdi te dimlak el kengei el lomotk a lak kuusbech a rasech. Ak kmal mle medakt, me nguaisei engdi llechul a Dios a uchul me ngdimlak a rolel e kkengei  er a usbechel a rasech. Chelsel a klengar er ngak e a Jehovah mla ochotii er ngak a klou el bltkil a rengul. Chelecha e ngtechall el kuchotii a bltkil a renguk el mo er ngii. Ngbek el taem el krenges a mekngit el chais e ngmengal meruul a renguk el mo rullii a Jehovah el mo dmeu a rengul e diak kbecherei a Satan me bo lekats. Ngmlo sebechir el metkak el diak lousbech a rasech. Me alta ngdirk ngar ngii a secherel a bedengek, me nguaisei a Jehovah blechoel el omeskemam aike el ki mousbech. El ua tiang, sel miting er a uchei er a bo kudengei el kmo ak kasinoma, e aki milsuub er a suobel el dai er ngii a ‘Oba Blekeu er a Taem er a Chelebuul.’ * Tia el suobel a kmal millisiich er kemam. Aki milenguiu er ngii el betok el taem. Suobel el uaikang me a dirrek el omesiungam a rullak ngak me a bechik el mo omelechesiu er a budech e mengellakl a rengmam e meruul a ungil omelilt.”

19. Ngera di kmedung el mo duubech?

¹⁹ Ngoeak a ngelsuil a Jehovah e a Rekristiano el meliuekl er a beluulechad el rokir a mla mo mesisiich a meringel el blekeradel e mtekengii a Diabelong. (1 Pe. 5:8, 9) Kau me ngdirrek el sebechem el meruul el uaisei. Ngdi kmedung e a Jehovah mo dmu er a Jesus me tirke el mengedereder el obengkel me te “[tomall] a urerel a Diabelong.” (1 Jn. 3:8) Uriul er tiang e a rechedal a Dios el mesiou er ngii er tia el chutem a mo “selebechakl er a ulecheracheb me a kdekudel.” (Isa. 54:14; Mik. 4:4) Me nguaisei engdi chelecha el dongiil er tiakid el taem, e ngkired el oureor el mo mesisiich a dekted.

20. Ngera mo ngosukid el mo mesisiich a dekted?

²⁰ Ngkired el melemolem el melisiich er a klaumerang er kid el kmo, a Jehovah betik a rengul er a rechedal e omekerreu er tir. Kede mongeseu el meruul uaisei sel dolebedebek e douchais el kirel a rolel e a Jehovah ulemekerreu er a rechedal er a ngar er a mong. E sebeched el melatk er a rolel e ngmla ngosukid el outekangel a meringel el blekeradel. Ngoeak a ngelsuil a Jehovah e ngsebeched el mo mesisiich a dekted!​—Psa. 34:4.