26. ARTIKJEL FA DAUT STUDIUM
Woo de Leew ons halpen kaun, met Angst foadich to woaren
“De HAR es met mie; ekj woa mie nich ferchten” (PSA. 118:6)
LEET 105 “Gott es Leew”
WAUT WIE SEENEN WOAREN a
1. Fa waut kaun eena Angst haben?
SEE wie mol, waut eenje beläft haben. Nestor un siene Fru María wullen wua deenen, wua daut aun mea Help fäld. b Om daut dee daut kunnen, musten dee met weinja foadich woaren. Oba dee hauden Angst, daut see nich wudden soo schaftich sennen, wan see nich wudden soo väl Jelt haben. Biniam wort eent von Jehova siene Zeijen en een Launt, wua ons Woakj nich en aule Stekjen frie es, un hee wist, daut hee aus eent von Gott siene Deena kunn vefolcht woaren. Daut muak am Angst. Oba hee haud noch angsta doafäa, waut siene Famielje doonen wudd, wan dee daut wudden enwoaren, daut hee eenen nieen Gloowen aunjenomen haud. Valérie wort jesajcht, daut see eene sea schlemme Sort Kjräft haud, un see funk meist nich eenen Dokta, waut de biblische Gruntsauzen äwa daut Bloot respakjten deed. Daut es to vestonen, daut see Angst haud fa stoawen.
2. Wuarom sell wie emma doaraun schaufen, met Angst foadich to woaren?
2 Hast du mol soone Angst beläft? Väle von ons haben. Wan du nich lieescht, soone Angst to kontrollen, dan woascht du veleicht schlajchte Entscheidungen moaken un kaust mau rajcht aunfangen, von Jehova auftokomen. Daut es, waut de Soton well. Hee prooft dise Angst uttonutzen, daut du Jehova saust ojjehuarsom sennen, wua uk daut Jeboot met en es, de goode Norecht to prädjen (Opb. 12:17, NW). Wan de Soton uk väl Macht haft un een schlajchta un grausoma es, kaust du die oba fa am wäaren. Woo?
3. Waut woat ons halpen, met onse Angst foadich to woaren?
3 Wan wie ons secha sent, daut Jehova ons leeft un opp onse Sied es, dan woat de Soton ons nich engrulen kjennen (Psa. 118:6). Biejlikj de Schriewa, waut Psalm 118 schreef, haud väl Trubbels. Hee haud een deel Jäajna, wua uk soone mank wieren, waut väl Macht hauden (Varsch 9-10). Eenjemol wia hee sea unja Druck (Varsch 13). Hee wort uk strenj trajchtjewäsen von Jehova (Varsch 18). De Psalmenschriewa schreef doawäajen: “Ekj woa mie nich ferchten”. Wuarom feeld dee sikj soo secha? Hee wist, daut Jehova am sea leewd, wan dee am uk trajchtjewäsen haud. De Psalmenschriewa wia sikj secha, daut daut krakjt endoont wia, waut am entjäajen kjeem; Gott wudd emma reed sennen, am to halpen (Psa. 118:29).
4. Waut vonne Angst kjenn wie äwakomen, wan wie doaropp vetruen, daut Gott ons leeft?
4 Wie motten ons secha sennen, daut Jehova ons perseenlich leeft. Daut woat ons halpen, dree veschiedne Sorten Angst to äwakomen. (1) De Angst, daut wie nich kjennen fa de Famielje sorjen, (2) de Menschenforcht un (3) de Angst fa dän Doot. De Breeda un Sestren, von dee wie aum Aunfank aul jerät haben, kunnen de Angst äwakomen, wiels dee sikj secha wieren, daut Gott an leewd.
DE ANGST, DAUT WIE NICH KJENNEN FA DE FAMIELJE SORJEN
Een Brooda deit met sienen Sän toop feschen, om fa de Famielje to sorjen (See Varsch 5)
5. Waut vonne Sorjen haft een Famieljenvoda veleicht? (See daut Bilt oppe väaschte Sied.)
5 Een gooda Famieljenvoda nemt de Veauntwuatunk sea iernst, fa de Famielje to sorjen (1. Tim. 5:8). Wan du een Famieljenvoda best, dan hast du die veleicht Sorjen jemoakt, aus du en dise Tiet von de Krankheit de Oabeit velieren wurscht. Du hast die veleicht uk Sorjen jemoakt, aus du wurscht emstaunt sennen, fa jenuach Äten to sorjen un aules to betolen, waut fa daut Hus needich wia. Veleicht hautst du uk Angst, daut du wurscht de Oabeit velieren un nich eene fresche finjen. Ooda die jinkj daut soo aus Nestor un María, von dee wie ea aul räden, waut Angst hauden, daut see nich wudden kjennen met weinja Jelt läwen. De Soton haft aul een deel Menschen kunt bat doa brinjen, daut dee opphieeden, Jehova to deenen, wäajen dee dise Angst hauden.
6. Waut prooft de Soton ons entobillen?
6 De Soton prooft ons entobillen, daut Jehova sikj nich om ons kjemmat un daut dee ons uk nich halpen woat, fa de Famielje to sorjen. Daut kaun ons bat doa brinjen, daut wie denkjen, wie motten aules doonen, waut wie kjennen, om de Oabeit to hoolen, wan daut uk soont es, waut jäajen de biblische Gruntsauzen es.
7. Waut vesechat Jesus ons?
7 Jesus, dee dän Voda bäta kjant aus aule aundre, vesechat ons, daut Gott “weet waut jie brucken, ea jie doarom bäden” (Mat. 6:8). Un Jesus weet uk, daut Jehova emma reed es, fa daut to sorjen, waut wie brucken. Aus Christen jehia wie to Gott siene Famielje. Un aus Haupt fa dise Famielje woat Jehova daut selfst emma nokomen, waut en 1. Timotäus 5:8 steit.
Jehova woat doano seenen, daut wie aules haben, waut ons fält. Un eenjemol brukt hee veleicht onse Breeda toom ons halpen (See Varsch 8) d
8. (a) Waut woat ons halpen, de Angst to äwakomen, daut wie nich fa de Famielje sorjen kjennen? (Matäus 6:31-33). (b) Woo kjenn wie de Lied nodoonen, waut eene aundre Sesta eene Moltiet brinjen, soo aus opp daut Bilt to seenen es?
8 Wan wie ons secha sent, daut Jehova ons un onse Famielje leeft, dan kjenn wie ons uk secha sennen, daut hee fa daut sorjen woat, waut wie brucken (läs Matäus 6:31-33). Jehova es sea leeftolich un friejäwrich, un hee well fa ons sorjen! Aus hee de Ieed muak, jeef hee ons nich bloos daut needichste toom äwaläwen. Hee muak de Ieed voll von soone Sachen, waut ons uk scheen gonen kunnen (1. Mo. 2:9). Wan wie eenjemol uk nich mea haben, aus waut wie bloos jroz brucken, well wie oba em Denkj hoolen, daut wie daut haben, wiels Jehova ons daut jejäft haft (Mat. 6:11). Wie motten emma doaraun denkjen, daut daut väl mea wieet es, waut Jehova ons jeft, aus waut wie nu oppjäwen – un dan woat hee ons lota noch daut eewje Läwen jäwen. Daut es, waut Nestor un María uk enworden (Jes. 65:21-22).
9. Waut kaust du von Nestor un María lieren?
9 Nestor un María hauden een goodet Wiedakomen en Kolumbien. Dee sajen: “Wie dochten doaräwa no, ons Läwen eefacha to moaken un dan mea Tiet fa dän Deenst to brucken. Oba wie hauden Angst, daut wie nich wudden schaftich sennen, wan wie nich wudden soo väl Jelt haben.” Waut holp dee, met dise Angst foadich to woaren? Dee dochten doaräwa no, opp woo väl Wäaj Jehova an aul siene Leew jewäsen haud. Un wäajen see sikj secha wieren, daut Jehova fa an sorjen wudd, leeten see äare dia betolde Oabeit toch. Dee vekoften äa Hus un trocken no eene aundre Städ, wua daut aun mea Help fäld toom prädjen. Woo feelen see sikj doaräwa? Nestor sajcht: “Wie haben jeseenen, woo Matäus 6:33 sikj erfeld. Ons haft daut kjeenmol aun tietelje Sachen jefält. Wie sent nu schaftja aus ea.”
DE MENSCHENFORCHT
10. Wuarom es daut nich toom wundren, daut de Menschen Angst haben fa aundre?
10 Von don aus Adam un Eva sikj jäajen Jehova jestalt haben, haben de Menschen sikj omzajcht jeschot (Liera 8:9). Eenje brucken biejlikj äare Macht, om aundre schlajcht to behaundlen, de Vebräakja brucken Jewault, de Schoolkjinja, waut sikj fa hecha talen, beleidjen de aundre un saten dee unja Druck un eenje Menschen behaundlen mau rajcht äare Famielje sea schlajcht. Daut es nich toom wundren, daut de Menschen Angst haben fa aundre. Woo well de Soton dise Angst utnutzen?
11-12. Woo nuzt de Soton de Menschenforcht ut?
11 De Soton brukt de Menschenforcht, om ons soo Angst to moaken, daut wie sellen opphieren met prädjen ooda aundret doonen, waut Jehova haben well. De Rejierungen haben sikj von dän Soton brucken loten, om ons Woakj to vebeeden un ons to vefoljen (Luk. 21:12; Opb. 2:10). De Menschen en dän Soton siene Welt vespreeden faulsche Iedeeen un beese Läajes äwa Jehova siene Zeijen. Un soone, waut daut jleewen, spotten veleicht äwa ons ooda doonen ons mau rajcht waut aun (Mat. 10:36). Wundat ons daut, daut de Soton ons soo aunjript? Nich werkjlich. Dee haft daut aul en de Aposteltiet emma jedonen (Apj. 5:27-28, 40).
Wan onse Famielje uk jäajen ons es, kjenn wie ons oba secha sennen, daut Jehova ons leeft (See Varsch 12-14) e
12 De Angst, daut de Rejierungen jäajen ons sennen woaren, es oba nich daut eensje, waut de Soton brukt. Eenje haben angsta doafäa, waut de Famielje doonen woat, wan see Jehova siene Zeijen woaren, aus wan se an kjarpalich waut aundoonen wudden. See leewen äare Famielje un wellen, daut dee Jehova kjanen lieren un dän leewen. An deit daut wee, wan de Famielje schlajcht von Gott rät un von siene Deena. Eenjemol haft doa wäa von daut Frintschoft de Woarheit aunjenomen, wan dee verhäa uk sea doajäajen wia. Oba waut, wan de Famielje nuscht mea well met ons to doonen haben, wäajen daut, waut wie jleewen? Waut woa wie dan doonen?
13. Woo kaun ons daut halpen, met Jäajenstaunt en de Famielje foadich to woaren, wan wie weeten, daut Gott ons leeft? (Psalm 27:10).
13 De scheene Wieed en Psalm 27:10 kjennen ons Troost jäwen (läs). Wan wie doaräwa nodenkjen, woo sea Jehova ons leeft, dan woa wie nich Angst haben, wan wie uk Jäajenstaunt haben. Un wie kjennen ons uk secha sennen, daut hee ons beloonen woat, wan wie uthoolen. Jehova woat ons aules jäwen, waut wie toom läwen brucken un woat ons halpen, daut wie ruich un schaftich sent un daut wie am noda komen kjennen. Kjeena kaun daut soo goot aus Jehova! Daut es, waut Biniam beläwd, von dän wie ea aul räden.
14. Waut kjenn wie von Biniam lieren?
14 Biniam wort eent von Jehova siene Zeijen, wan hee uk wist, daut hee kunn sea vefolcht woaren. Wäajen hee wist, daut Jehova am leewd, kunn hee met Menschenforcht foadich woaren. Hee sajcht: “De Vefoljunk wia noch schlemma aus ekj docht. Oba ekj haud angsta fa dän Jäajenstaunt von miene Famielje aus fa de Rejierungen. Ekj haud Angst, daut ekj mienen Voda, waut Jehova nich deent, beleidjen wudd un daut de Famielje denkjen wudd, daut ekj to nuscht to brucken wia, wäajen ekj eent von Jehova siene Zeijen wort.” Oba Biniam wia sikj secha, daut Jehova emma fa dee sorcht, waut hee leeft. Hee sajcht wieda: “Ekj docht uk doaräwa no, woo Jehova aundre jeholpen haft, biejlikj em tieteljen foadich to woaren, met Ojjerajchtichkjeit omtogonen ooda wan sikj eene Grupp jäajen an toopstunt. Ekj wist daut, wan ekj wudd tru bliewen, wudd Jehova mie säajnen. Aus ekj ieremol enjestopt un soogoa jekjwält wort, beläwd ekj selfst, woo sea Jehova deejanje halpt, waut tru bliewen.” Jehova wort fa Biniam werkjlich een Voda un sien Volkj siene Famielje.
DE ANGST FA DÄN DOOT
15. Wuarom es daut gaunz jeweenlich, Angst fa dän Doot to haben?
15 De Bibel sajcht, daut de Doot een Fient es (1. Kor. 15:25-26). Veleicht hab wie Angst fa dän Doot, un besonda, wan wie ooda een aundra, dän wie leewen, eene schlemme Krankheit haft. Wuarom hab wie Angst fa stoawen? Wiels Jehova ons soo jemoakt haft, daut wie dän Wensch haben, fa emma to läwen (Liera 3:11, NW). Daut es nich schlajcht, Angst to haben fa dän Doot, wiels daut kaun ons halpen, ons Läwen to beschitzen. Daut kaun ons biejlikj bat doa brinjen, daut wie goode Entscheidungen moaken, waut wie äten, woo sea wie ekserseisen, daut wie eenen Dokta no Help froagen, daut wie Medizien ennämen, wan daut needich es, un ons Läwen nich onneedich en Jefoa brinjen.
16. Woo nuzt de Soton de Angst fa dän Doot ut?
16 De Soton weet, daut wie ons Läwen väl räakjnen. Un dee behaupt, daut wie aules oppjäwen wudden, mau rajcht ons Veheltnis met Jehova, wan wie doaderch ons Läwen raden kunnen (Hiob 2:4-5). Oba daut es plaut jeloagen! Wäajen de Soton “dän Doot veuasoaken kaun”, prooft dee de Angst fa dän Doot uttonutzen, daut wie Jehova veloten (Heb. 2:14-15, NW). Eenjemol brukt de Soton de Menschen, om ons wäajen dän Doot unja Druck to saten, daut wie von onsen Gloowen auffaulen sellen. Ooda de Soton prooft daut uttonutzen, wan wie drinjent eene Doktarie brucken, daut wie doaderch jäajen Jehova gonen. De Doktasch ooda wäa von de Famielje, waut nich Jehova deent, moakt ons veleicht Druck, daut wie ons sellen Bloot enlakjen loten, wan daut uk jäajen Gott sien Jesaz es. Ooda aundre wellen ons bemotten, soone Doktarieen auntonämen, waut jäajen de Gruntsauzen von de Schreft sent.
17. Wuarom bruck wie no Reema 8:37-39 no nich Angst haben fa dän Doot?
17 Wan wie uk nich stoawen wellen, kjenn wie ons doawäajen secha sennen, daut Jehova nich opphieren woat, ons to leewen (läs Reema 8:37-39). Wan Jehova siene Frind stoawen, helt hee dee soo em Denkj, aus wan dee noch läwen (Luk. 20:37-38). Hee haft een Velangen, dee wada vom Doot opptowakjen (Hiob 14:15). Jehova haft eenen dieren Pries betolt, daut wie “daut eewje Läwen haben” kjennen (Joh. 3:16). Wie weeten, woo sea Jehova ons leeft un fa ons sorcht. Soo, enne Städ daut wie Jehova veloten, wan wie krank sent ooda soogoa dän Doot ver ons haben, well wie am leewa no Troost, Weisheit un Krauft froagen. Daut es krakjt, waut Valérie un äa Maun deeden (Psa. 41:4).
18. Waut kaust du von Valérie lieren?
18 Aus Valérie 35 Joa wia, säden se to ar, daut see eene schlemme Sort Kjräft haud. See wie mol, woo de Leew ar jeholpen haft, met de Angst foadich to woaren, daut see stoawen wudd. See sajcht: “Aus ekj enwort, daut ekj Kjräft haud, endad sikj ons Läwen sea haustich. Mie fäld een grootet Oppereeschen, wan ekj aum läwen bliewen wull. Ekj fruach miere Doktasch, oba dee wullen mie nich onen Bloot opperieren. Ekj haud Angst, oba wäajen ekj Gott siene Jesazen kjand, wull ekj mie nich loten Bloot enlakjen. Jehova haud mie aul emma soo väl Leew jewäsen. Nu haud ekj eene goode Jeläajenheit, am miene Leew to wiesen. Emma wan dee mie schlajchte Norechten brochten, wia ekj mie noch eenja, Jehova schaftich to moaken un nich dän Soton jewennen to loten. Ekj haud dan een Oppereeschen onen Bloot. Wan miene Jesuntheit uk noch nich goot es, haft Jehova ons oba noch emma daut jejäft, waut wie brukten. Biejlikj wia wie een utgangs Wäakj en een Toopkomen, wua wie dän Woaktorm-Artikjel studieeden, ‘En schwoare Tieden Moot haben’. c Daut wia eene Wäakj ea, aus se ons daut säden, daut ekj Kjräft haud. Dis Artikjel haft ons sea väl Troost jejäft. Wie läsden dän emma wada. Soone Artikjels aus dit un goode jeistelje Jewanheiten to haben, haft ons ennalich Fräd jejäft un jeholpen, ruich to bliewen un goode Entscheidungen to moaken.”
MET ANGST FOADICH WOAREN
19. Waut woat boolt passieren?
19 Met Jehova siene Help kjennen Christen äwa de gaunze Welt met Schwierichkjeiten foadich woaren un dän Soton wadastonen (1. Pet. 5:8-9). Du kaust daut uk. Meist fuaz woat Jehova Jesus un dän siene Metharscha de Aunwiesunk jäwen, “dän beesen Fient siene Woakjen kaputt to moaken” (1. Joh. 3:8). Kjeena woat dan Gott siene Deena oppe Ieed “enjsten ooda grulen” (Jes. 54:14; Micha 4:4). Bat daut bat doa es, mott wie doaraun schaufen, met onse Angst foadich to woaren.
20. Waut woat ons halpen, met Angst foadich to woaren?
20 Wie motten onsen Gloowen wieda stoakjen un doaropp vetruen, daut Jehova ons leeft un siene Deena beschitzen woat. Daut kjenn wie, wan wie doaräwa nodenkjen un met aundre doaräwa räden, woo Jehova siene Deena ieeschtemma aul beschizt haft. Un wie kjennen uk doaraun denkjen, woo hee ons perseenlich aul en schwoare Tieden jeholpen haft. Met Jehova siene Help kjenn wie met Angst foadich woaren! (Psa. 34:5).
LEET 129 Well wie wieda tru uthoolen
a Daut es nich emma schlajcht, wan wie Angst haben, wiels daut beschizt ons. Oba ons kaun daut uk schoden, wan wie too Angst haben. Wuarom? Wiels de Soton well daut utnutzen, daut wie sellen schlajchte Entscheidungen moaken. Wie motten emma doaraun schaufen, daut wie dise Sort Angst unja Kontroll kjrieen. Waut woat ons halpen? Dis Artikjel woat ons wiesen, daut wie kjennen met aule Angst foadich woaren, wan wie ons secha sent, daut Jehova opp onse Sied es un ons leeft.
b Eenje Nomes hab wie hia jeendat.
c See dän Wachtturm vom 15. Oktooba 2012, S. 7-11.
