1. So sa šaj te daravi amen?

 RAZMISLIN ando akala trin situacije. O Nestor hem i Marija, manglje te đan te služinen uduri kaj isi pobari potreba. b Te šaj te ćeren odova, on valjanđe te živinen poskromno. Ama, darandilje da li ka oven bahtale ako ka ćeren odova. Amaro phral kova vićini pe Binijam, ulo e Jehovaso svedoko ki phuv kaj amare aktivnostija tane zabranime. Ov haljilo so sebepi odova šaj te doživini progonstvo hem odolese darandilo. Ama, pana pobuter darandilo ando odova so olesi porodica ka phenel so menjinđa pi religija. Jekha phenjaće koja vićini pe Valeri, o doktorija phenđe so isi la rak. Oj darandilji da li šaj te arakhi doktore kova ka mangel te operisini la bizo rat. Isto ađahar, darandilji hem so šaj te merel.

2. Sose valjani te kontrolišina amari dar?

² Šaj hem amen daraja ando asavke buća. Ako na đanaja sar te kontrolišina amari dar, šaj te ana pogrešna odluke hem te rumina amaro amalipe e Jehovaja. A o Satana baš odova mangela. Ov mangela sebepi i dar te na šuna e Jehovase zapovestija, pa čak hem i zapovest te propovedina (Otkr. 12:17). Ov tano but lošno, okrutno hem moćno. Ama, akana ka dikha so šaj te zaštitina amen olestar.

3. So ka pomožini amen te na dara?

³ Ked hijam uverime so o Jehova mangela amen hem soj tano ki amari strana, amen na ka dara ando Satana (Ps. 118:6). Na primer, e manušese kova pisinđa o  118. psalam hine but pharo ko životi. Hine le but dušmanija, a disave olendar hine ko baro položaj (9. hem 10. stih). Disavo puti, hine le but bare problemija (13. stih). Čak o Jehova ukorinđa le (18. stih). Ama, iako sa odova desinđa pe lese, ov phenđa: „Na ka darav.“ Sose phenđa odova? Odolese so đanđa so iako o Jehova ukorinđa le, ov tano oleso Dad kova but mangela le. Ov hine sigurno savo god problemi te ovel le, oleso Dad tano uvek othe te pomožini lese (Ps. 118:29).

4. Savi dar šaj te pobedina ako hijam uverime so o Jehova mangela amen?

⁴ Amen valjani te ova uverime so o Jehova mangela amen. Odova šaj te pomožini amen te pobedina amari dar ko najhari trin buća: (1) dar so na ka šaj te brinina amen andi amari porodica, (2) dar ando manuš hem (3) dar ando meribe. O phralja hem o phenja kolendar vaćerđam ko prvo odlomko pobedinđe pi dar odolese so hine sigurna so o Jehova mangela len.

5. Aso so šaj te sikirini pe jekh poglavari? (Dikh i slika ki naslovno strana.)

⁵ O poglavarija isi len odgovornost te brininen pe andi pi porodica (1. Tim. 5:8). Ako hijan poglavari, šaj ki pandemija but brininđan tut so ka našale ti buti hem so ka ovel tuće pharo te arakhe aver. Sar poglavari, ti odgovornost tani te ane ko ćher, te platine i kirija hem o računija. Ama, šaj brininđan tut da li ka uspine te ćere odova? Ja šaj sar o Nestor hem i Marija mislineja so našti te menjine ti buti hem te živine poskromno. But manuša osetinena pe ađahar. Odolese o Satana iskoristini odova te ćhinavi len te služinen e Jehovase.

6. Ko so o Satana mangela te verujina?

⁶ O Satana mangela te verujina so o Jehova na brinini pe amendar hem so na mangela te pomožini amen te brinina amen andi amari porodica. Sebepi odova, šaj te mislina so valjani te ćera sa soj tano đi amende te na bi našalaja amari buti, čak iako odova šaj te rumini amaro amalipe e Jehovaja.

7. Ko so o Isus uverini amen?

⁷ O Isus kova najšukar penđari pe Dade, uverini amen so amaro „nebesko Dad đanela so valjani [amenđe] hem angleder te [zamolina] le aso odova“ (Mat. 6:8). Ov tano sigurno so o Jehova ka brinini pe amendar. Amen sar e Jehovase sluge hijam deo andi Jehovasi porodica. O Jehova tano poglavari andi odija porodica, odolese šaj te ova sigurna so ov kokri ka ićeri pe ko načelo andi 1. Timoteju 5:8.

8. (a) So ka pomožini amenđe ako daraja so na ka šaj te brinina amen andi amari porodica? (Matej 6:31-33) (b) So šaj te sikljova ando bračno par kotar slika?

⁸ Ked hijam uverime so o Jehova mangela amen hem amare porodica, ka ova sigurna so ka del amen sa so valjani amenđe. (Čitin Matej 6:31-33.) O Jehova tano phravde vasteso hem dela amen sa so valjani amenđe. Ked ćerđa i phuv, ov na ćerđa samo o osnovna buća kola valjanena amenđe te preživina, nego pherđa i phuv but šuže bućencar ko kola šaj te uživina (Post. 2:9). Čak iako disavo puti jedva ikljovaja ko krajo, na valjani te bistra so amen ipak uspinaja ko odova. O Jehova niked na ka aćhavi  amen bizo ništa (Mat. 6:11). Amen na valjani te bistra so ako žrtvujinaja diso sebepi o Jehova, ov pana akana ka del amen pobuter ando odova so žrtvujinaja, a ki budućnost ka del amen o večno životi. Baš odova haljilje o Nestor hem i Marija (Is. 65:21, 22).

9. So šaj te sikljova ando Nestor hem andi Marija?

⁹ O Nestor hem i Marija hine len but šužo ćher hem buti ki Kolumbija. On phenena: „Amen razmislinđam te đa uduri kaj tani pobari potreba. Te šaj te ćera odova, valjanđam te podjednostavina amaro životi. Ama, razmislinđam da li ka ova bahtale, sose na ka oven amen o buća kola akana isi amen.“ So pomožinđa len te pobedinen odija dar? On razmislinđe sar o Jehova đi akana mothovđa lenđe so mangela len hem so ov uvek brininđa pe olendar. Odolese on aćhavđe pi buti, bikinđe po ćher hem selinđe pe uduri kaj isi pobari potreba. Sar osetinđe pe palo odova? O Nestor phenela: „Haljiljum kobor tane ćaće o lafija ando Matej 6:33. Niked ništa na falinđa amenđe, akana čak hijam pobahtale nego angleder.“

10. Sose nane čudno so o manuša darana jekh jekhestar?

¹⁰ Pana ando vreme sar o Adam hem i Eva pobuninđe pe protiv o Jehova, o manuša ćerena lošnipe jekh jekhese (Prop. 8:9). Na primer, o manuša kola tane ki vlast lošno ponašinena pe premalo avera manuša. O kriminalcija ćerena baro nasilje. O ćhave maltretirinena jekh jekhe ki škola, čak hem o manuša ki pi porodica ponašinena pe lošno jekh jekheja. Odolese nane čudno so o manuša darana jekh jekhestar. Sar o Satana koristini i dar ando manuš protiv amende?

11-12. Sar o Beng koristini i dar ando manuš protiv amende?

¹¹ O Satana dela sa pestar te ćhivel amen te dara ando manuša, odolese so sebepi odija dar amen šaj te ćhinava te propovedina. Ov utičini upro manuša kola tane ki vlast te zabraninen amare aktivnostija hem te progoninen amen (Luka 21:12; Otkr. 2:10). Isto ađahar, but manuša vaćerena hovajbe ando Devleso narodo. Okola so šunena odola hovajba marena amenđe muj hem čak pretinena  so ka maren amen (Mat. 10:36). Akala buća o Satana na ćerela prvo puti. Ov pana ko prvo veko koristinđa ista buća te daravi e Devlese narodo (Dela 5:27, 28, 40).

¹² Ama, o Satana koristini pana diso te šaj te daravi amen. Disave pobuter darana ando odova sar olengi porodica ka reagujini so on ulje e Jehovase svedokija, nego ando progonstvo. On but mangena pe porodica hem mangena te pomožinen len te upoznajinen e Jehova. Ama, but tane tužna ked olengi porodica marela muj e Jehovase hem e phralenđe. Disavo puti, baš odola kola protivinđe pe amenđe, ovena e Jehovase svedokija. Ama, so ako neko andi amari porodica na mangela te ovel le više ništa amencar sose uljam Svedokija? Sar tegani ka osetina amen?

13. Sar e Devleso mangipe pomožini amen ked amare na mangena te ovel len ništa amencar? (Psalam 27:10)

¹³ Šaj but te pomožinen amen o lafija ando Psalam 27:10. (Čitin.) Odolese so odothe pisini so o Jehova but mangela amen, čak iako amare na mangena te ovel len ništa amencar. Šaj te ova sigurna so o Jehova ka blagoslovini amen sebepi amari istrajnost. Ov ka del amen sa odova so valjani amenđe, ka pomožini amen te ovel amen mir, te ova bahtale hem te ova uzo leste. Amaro phral o Binijam uverinđa pe ko odova.

14. So šaj te sikljova ando Binijamin?

¹⁴ O Binijamin ulo e Jehovaso svedoko, iako đanđa so ki odija phuv isi progonstvo. Ama, odova so but manglja e Jehova pomožinđa lese te na daral ando manuša. Ov phenela: „Ando progonstvo kova hine but baro ki odija phuv na darandiljum odobor kobor darandiljum so mo dad ka ovel razočarimo ked ka šunel so hijum e Jehovaso svedoko. Darandiljum so ni mi porodica više na ka poštujini man.“ Ama, o Binijamin hine sigurno so o Jehova ka pomožini okolenđe kola mangena le. Ov pana phenela: „Razmislinđum odolestar kobor o Jehova pomožini amare phralenđe hem phenjenđe ked isi len finansijska problemija, ked avera marena lenđe muj ja ked doživinena nasilje. Đanđum so ako ka aćhovav uzo Jehova, ov ka del man snaga te  istrajinav. Ked ćhivđe man ko phanlipe hine maje but pharo sose but mučinđe man. Ama, tegani dikhljum kobor o Jehova pomožini okolenđe kola aćhona lese verna.“ E Binijaminese o Jehova ulo sar Dad, a oleso narodo sar porodica.

15. Sose tano normalno te ovel amen dar ando meribe?

¹⁵ Ko Devleso Lafi pisini so o meribe tano amaro dušmani (1. Kor. 15:25, 26). Ked razmislinaja ando meribe, šaj but te sekirina amen pogotovo ked amen ja neko andi amari porodica tane but naborme. Ama, sose daraja ando meribe? Odolese so ked o Jehova ćerđa amen, ov ano amende ćhivđa i želja te živina večno (Prop. 3:11). Disavo puti tano šukar te ovel amen asavki dar. Odolese so odija dar šaj te podstaknini amen pošukar te brinina amen ando amaro sastipe, te pazina so haja, te đa redovno ko doktori, te la redovno amare lekija hem te cida amen ando buća kola šaj amaro životi te ćhiven ki opasnost.

16. Sar o Satana mangela te iskoristini amari dar ando meribe?

¹⁶ O Satana đanela kobor amen ceninaja o životi. Odolese, ov phenela so amen ka da sa, čak ka irina amaro dumo e Jehovase, samo te šaj te aćhova đivde (Jov 2:4, 5). Naravno so o Satana nane upravu. Ama, sebepi so „isi le moć te prouzrokujini o meribe,“ ov šaj te iskoristini amari dar ando meribe te irina amaro dumo e Jehovase (Jevr. 2:14, 15). Disavo puti o manuša upro kola ov utičini, šaj te pretinen amenđe so ka mudaren amen ako na odrekninaja amen andi amari vera. Ja šaj ka valjani te đa ki disavi operacija. Tegani, o Satana šaj te ćhivel amen te na ićera amen ko Jehovase načelija. Na primer, o doktorija ja amari porodica koja na služini e Jehovase šaj te ćhivel amen te la rat. Ja neko šaj te ćhivel amenđe ki godi te razmislina odolestar te prihvatina disavo lečenje kova nane premalo Jehovase načelija.

17. Premalo Rimljanima 8:37-39, sose na valjani te dara ando meribe?

¹⁷ Niko amendar na mangela te merel. Ama, amen đanaja so o Jehova na ka ćhinavi te mangel amen ako odova ka desini pe. (Čitin Rimljanima 8:37-39.) Ked oleso amal merela, e Jehovase tano ov pana đivdo ki godi (Luka 20:37, 38). Ov jedva ađićeri te vazdel le (Jov 14:15). O Jehova platinđa bari cena te šaj amen te ovel amen večno životi (Jov. 3:16). Ov mangela amen hem brinini pe amendar. Odolese, ked hijam naborme, umesto te irina lese amaro dumo, amen valjani te roda olestar te zorjaćeri amen, te del amen snaga, te utešini amen hem te del amen mudrost. Baš odova ćerđe i Valeri hem olako rom (Ps. 41:3).

18. So sikljovja andi Valeri?

¹⁸ Ked i Valeri hine la 35 berš, o doktorija phenđe laće so isi la rak. Te dikha sar o mangipe pomožinđa la te pobedini i dar ando meribe. Oj phenela: „Ked o doktorija phenđe maje so isi man rak, mo životi menjinđa pe prekali rat. Valjanđe te ćeren maje jekh but phari operacija. Đeljum ko but doktorija, ama svako olendar phenđa maje so našti te operisini man bizo rat. Iako but darandiljum, na hine sila koja bi ćhivela man te lav rat. Setinđum man kobor o Jehova mangela man, a akana hine mo redo te  mothovav kobor me mangava ole. Svako puti ked bi dobinava disavi lošno vest, me bi ovava pana poodlučno te šunav e Jehova hem te na mukhav e Benge te pobedini. Ko krajo, mi operacija nakhlja bizo rat. Iako pali operacija valjanđa maje pana disavo vreme te saćovav, o Jehova uvek dinđa man odova so valjanđa maje. Na primer, kurko dive angleder o doktorija te phenen maje so isi man rak, ko sastanko razmotrinđam o članko ’Hrabro se suočimo s problemima‘. c Akava članko but ohrabrinđa amen hem odolese but putija čitinđam le. O člankija sar soj tano akava, i služba hem o sastankija pomožinđe maje hem me romese te ovel man mir ko vilo hem te ana šukar odluke ko mo životi“.

19. So pana hari ka ovel?

¹⁹ Ko celo sveto, e Jehovase svedokija isi len bare pharipa. Ama sebepi so o Jehova pomožini lenđe, on šaj te pobedinen e Benge (1. Petr. 5:8, 9). Pana hari, o Devel ka phenel pe Ćhavese hem okolenđe kola ka vladinen oleja te „uništinen e Bengese delija“ (1. Jov. 3:8). Palo odova, sa e Jehovase sluge kola ka oven ki phuv na ka ovel len sostar te daran (Is. 54:14; Mih. 4:4). Ama, đi na avela odova vreme, de sa tutar te pobedine i dar.

20. So ka pomožini amenđe te pobedina i dar?

²⁰ Valjani hem ponodri te uverina amen ko odova so o Jehova mangela amen hem so brinini pe amendar. Amen šaj te ćera odova ako hor razmislinaja odolestar sar o Jehova pomožinđa pe slugenđe angleder hem sar pomožinđa lično amenđe. Uzi Jehovasi pomoć, amen šaj te pobedina i dar (Ps. 34:4).