1. Ndi pinthu pipi pinacitisa abale na alongo anango kugopa?

 ONANI pitsandzo pingasi pya abale na alongo. Nestor na nkazace María akhafuna kuenda katumikira ku mbuto yakuti iri na amwazi mphangwa akucepa. * Toera kucita pyenepi iwo nee akhafunika kugula pinthu pizinji toera akwanise kukoya kobiri. Mbwenye iwo akhagopa kuti nee mbadakwanisa kukhala akutsandzaya angakhala na kobiri yakucepa. Mu ndzidzi udakhala Biniam m’bodzi wa Mboni za Yahova mu dziko yakuti basa yathu ikhakhondeswa, iye aona kuti mbadatcingwa thangwi yakutumikira Mulungu. Iye agopa. Mbwenye cinthu cikhagopa iye kakamwe ndi cakuti banja yace mbidapibva tani ingadziwa kuti iye asankhula uphemberi unoyu. Valérie adzindikira kuti akhali na utenda wa câncer, pontho iye akhanentseka toera kugumana dotoro wakuti mbadankondza mukukhonda kuphatisira ciropa. Natenepa iye akhagopa kuti mbadafa.

2. Thangwi yanji tisafunika kuwangisira toera kukunda kugopa kwathu?

² Kodi imwe musagopa pinthu pyenepi? Azinji a ife asagopa. Mbwenye tingakhonda kukunda kugopa kwathu panango tinacita pisankhulo pyakuipa pyakuti pinafewesa uxamwali wathu na Yahova. Pyenepi ndi pinafuna Sathani. Iye asayesera kuphatisira kugopa kwathu toera kuticitisa kukhonda kubvera mitemo ya Yahova, kuphatanizambo ntemo wakumwaza mphangwa zadidi. (Apok. 12:17) Sathani ndi wakuipa, wakusowa ntsisi na wamphambvu. Mbwenye imwe munakwanisa kutsidzikizika. Munjira ipi?

3. Ninji pinafuna kutiphedza toera kukunda kugopa?

³ Tingakhala na cinyindiro cakuti Yahova asatifuna, pontho iye ali kukhundu yathu, Sathani nee anakwanisa kutigopesa. (Masal. 118:6) Mwacitsandzo, nyakulemba bukhu ya Masalmo  kapitulu 118 athimbana na pinentso pizinji kakamwe. Iye akhali na anyamalwa azinji kuphatanizambo anyamalwa anango akubvekera kakamwe (vesi 9, 10). Midzidzi inango, iye akhadzudzumika kakamwe m’manyerezero (vesi 13). Pontho Yahova ansandika mwakuwanga (vesi 18). Ngakhale tenepo, nyamasalmo unoyu alonga: ‘Ine nee ndinadzagopa.’ Ninji pidancitisa kukhala na cinyindiro ceneci? Iye akhadziwa kuti maseze Yahova ansandika, iye ndi Babace wakuti akhanfuna kakamwe. Nyamasalmo unoyu akhali na cinyindiro cakuti Mulungu wace waufuni mbadam’phedza ndzidzi onsene mwakukhonda tsalakana nyatwa zikhathimbana na iye.—Masal. 118:29.

4. Ndi pinthu pipi pyakuti tinakwanisa kupikunda tinganyindira kuti Mulungu asatifuna?

⁴ Ife tisafunika kukhala na cinyindiro cakuti Yahova asafuna m’bodzi na m’bodzi wa ife. Kukhala na cinyindiro ceneci kunatiphedza toera kukunda kugopa pinthu pitatu: (1) Kugopa kucimwana kutsalakana banja yathu, (2) kugopa anthu na (3) kugopa kufa. Abale na alongo adalongwa pa ndima yakutoma akwanisa kukunda kugopa kwawo thangwi yakunyindira kuti Mulungu asaafuna.

5. Ndi pinthu pipi pyakuti pinakwanisa kudzudzumisa nsolo wa banja? (Onani foto iri patsamba yakutoma.)

⁵ Nkristu wakuti ndi nsolo wa banja asawangisira kakamwe toera kutsalakana banja yace. (1 Tim. 5:8) Khala imwe ndimwe nsolo wa banja, panango mwadzudzumika kakamwe mu ndzidzi wa utenda wa koronaviru kuti panango mbamudaluza basa yanu. Panango imwe mukhadzudzumika kuti munagumana tani cakudya na nyumba toera kukhala pabodzi na banja yanu. Kusiyapo pyenepi, panango imwe mukhagopa kuti mungaluza basa yanu, nee munakwanisa kugumana basa inango. Pontho ninga Nestor na María, panango imwe mukhadzudzumika kuti nee mbamudakwanisa kutsalakana banja yanu na kobiri yakucepa. Sathani asakwanisa kuphatisira pinthu pyenepi toera kucitisa anthu azinji kusiya kutumikira Yahova.

6. Kodi Sathani asayesera kucitanji?

⁶ Sathani asayesera kuticitisa kukhulupira kuti Yahova nee asatsalakana m’bodzi na m’bodzi wa ife, pontho iye nee anatiphedza toera tikwanise kutsalakana banja yathu. Na thangwi ineyi, panango ife tinanyerezera kuti tisafunika kucita pyonsene pinakwanisa ife toera tikhonde kuluza basa yathu, ngakhale kuti pyenepi pinafewesa uxamwali wathu na Yahova.

7. Ndi cinyindiro cipi cidatipasa Yezu?

⁷ Yezu wakuti asadziwa mwadidi kakamwe Yahova, atipasa cinyindiro cakuti Mulungu wathu ‘asadziwa pinthu pinafuna ife mbatidzati kum’phemba.’ (Mat. 6:8) Pontho Yezu asadziwa kuti Yahova ali dzololo toera kutipasa pinafuna ife. Natenepa, ninga Akristu ife ndife ana a Mulungu, pontho tinakwanisa kukhala na cinyindiro cakuti ninga nsolo wa banja, Yahova anacita pinthu mwakubverana na pidalonga iye kuna misolo yonsene ya mabanja pa 1 Timoti 5:8.

8. (a) Ninji pinafuna kutiphedza toera kukunda manyerezero akugopa kuti nee tinakwanisa kutsalakana banja yathu? (Mateu 6:31-33) (b) Tinatowezera tani banja inapangizwa pa foto yakuti ikubweresa cakudya kuna mulongo?

⁸ Ife tingakhala na cinyindiro cakuti Yahova asatifuna, pontho asafuna banja yathu, ife nee tinapenula kuti tinakhala na pinthu pinafuna ife. (Lerini Mateu 6:31-33.) Yahova asafuna kutitsalakana, pontho iye ndi waufuni na Wakupasa mwakudzala manja. Mwacitsandzo, pidacita iye dziko yapantsi, iye acita pinthu pizinji kupiringana basi ene pinthu pyakufunika kuna ife toera tikhale m’maso. Mwaufuni, iye adzadza dziko yapantsi na  pinthu pyakuti mbapidaticitisa kukhala akutsandzaya kakamwe. (Gen. 2:9) Maseze midzidzi inango ife tinakhala na pinthu pyakucepa, tisafunika kukumbuka kuti ndi Yahova adatipasa pinthu pyenepi. (Mat. 6:11) Ife tisafunikambo kukumbuka kuti pinthu pinatipasa Yahova ndi pyakufunika kakamwe kuna ife kupiringana pinthu pidasiya ife nduli. Pontho ntsogolo, iye anadzatipasa umaso wakukhonda mala. Pyenepi ndipyo pidadzindikira Nestor na María.—Iza. 65:21, 22.

9. Mwapfundzanji na citsandzo ca Nestor na María?

⁹ Nestor na María akhali na nyumba yakubalika na basa yadidi ku Kolombiya. Iwo alonga: “Ife tanyerezera kugulisa pinthu pinango toera tikwanise kucita pizinji m’basa ya Yahova, mbwenye mu ndzidzi ubodzi ene tikhagopa kuti panango nee mbatidakwanisa kukhala akutsandzaya na kobiri yakucepa.” Ninji pidaaphedza toera kukunda kugopa? Iwo anyerezera njira zizinji zidaatsalakana Yahova. Pidakhala iwo na cinyindiro cakuti Yahova ndzidzi onsene anaatsalakana, asiya basa yawo yakuti ikhalipa kobiri izinji. Kusiyapo pyenepi iwo agulisa nyumba yawo mbaenda ku mbuto yakuti ikhali na amwazi mphangwa akucepa. Kodi iwo asapibva tani thangwi yakucita cisankhulo ceneci? Nestor alonga: “Ife tisaona undimomwene wa mafala anagumanika pa Mateu 6:33. Ife nee tisasowa cinthu, pontho cincino tiri na umaso wakutsandzaya kakamwe.”

10. Thangwi yanji anthu asagopana unango na ndzace?

¹⁰ Kutomera mu ndzidzi udasiya Adhamu na Eva kubvera Yahova, anthu asathabusana kakamwe unango na ndzace. (Koel. 8:9) Mwacitsandzo, anthu asaphatisira utongi wawo toera kutsalakana mwakuipa anango, mapanga asacita pinthu pyakuipa kakamwe, aphale na atsikana kuxikola asatsalakana andzawo mwakuipa, pontho anthu anango asatsalakana acibale awo mwakuipa. Na thangwi ineyi, anthu asagopana unango na ndzace. Kodi Sathani asayesera tani kuphatisira nsampha unoyu?

11-12. Sathani asaphatisira tani nsampha wakugopa anthu?

¹¹ Sathani asayesera kuphatisira nsampha unoyu wakugopa anthu toera kuticitisa kusiya kumwaza mphangwa na kucita pinthu pinango pinatipanga Yahova. Pontho mukukulumizwa na Sathani, mautongi asakhondesa basa yathu na kutitcinga. (Luka 21:12; Apok. 2:10) Kusiyapo pyenepi, anthu azinji mu dziko ino ya Sathani asalonga uthambi thangwi ya Mboni za Yahova. Natenepa anthu anakhulupira  uthambi unoyu asatisingirira peno kutitsalakana mwakuipa. (Mat. 10:36) Ife nee tisadzumatirwa na misampha inaphatisira Sathani. Thangwi iye aiphatisira kale mu ndzidzi wa apostolo.—Mabasa 5:27, 28, 40.

¹² Sathani nee asaphatisira basi ene nsampha wakugopa atongi. Anthu anango asagopa kuti acibale awo anacitanji angadzindikira kuti iwo ndi m’bodzi wa Mboni za Yahova. Midzidzi inango iwo asagopa kakamwe pyenepi kupiringana kugopa kutsalakanwa mwakuipa. Iwo asafuna kakamwe acibale awo, pontho asafuna kuti acibale awo adziwe Yahova na kunfuna. Natenepa iwo asatsukwala angaona kuti acibale awo akulonga mwakusowa cilemedzo Mulungu wandimomwene na alambiri ace. Ngakhale tenepo, anthu akuti pakutoma akhatcinga acibale awo, mukupita kwa ndzidzi atomambo kutumikira Yahova. Mphapo ndiye tani khala acibale anu asiya kulonga na imwe thangwi yakukhala kwanu m’bodzi wa Mboni za Yahova? Munacitanji?

13. Kukhala na cinyindiro cakuti Mulungu asatifuna kunatiphedza tani tingatcingwa na acibale athu? (Masalmo 27:10)

¹³ Ife tinakwanisa kubalangazwa na mafala adidi kakamwe anagumanika pa Masalmo 27:10. (Lerini.) Ife tingakumbuka kuti Yahova asatifuna kakamwe nee tinagopa pinthu pinafuna kucitika tingatcingwa na acibale athu. Pontho tinakhala na cinyindiro cakuti iye anatipasa nkhombo thangwi yakupirira kwathu. Yahova anatipasa pyonsene pinafunika kuna ife, pontho anatiphedza toera kukhala akukhurudzika na akutsandzaya. Kusiyapo pyenepi, iye anatiphedza toera tikhale na uxamwali wakuwanga na iye. Pyenepi ndi pidadzindikira m’bale Biniam adalongwa pa ndima yakutoma.

14. Mwapfundzanji na citsandzo ca Biniam?

¹⁴ Biniam akhala m’bodzi wa Mboni za Yahova maseze akhadziwa kuti mbadatcingwa. Onani kuti kukhala na cinyindiro cakuti Yahova asanfuna kwaphedza tani Biniam toera kukunda kugopa anthu. Iye alonga: “Ine ndikhagopa kutcingwa na mautongi, mbwenye cinthu cikhagopa ine kakamwe ndi kutcingwa na acibale anga. Kusiyapo pyenepi, ine ndikhagopa kuti cisankhulo cidacita ine cakukhala m’bodzi wa Mboni za Yahova mbacidatsukwalisa pai wanga, pontho acibale anga mbadanyerezera kuti ine nee ndine mwana wadidi.” Ngakhale tenepo, Biniam akhali na cinyindiro cakuti Yahova ndzidzi onsene asatsalakana ale anafuna iye. Biniam athimiza: “Ine ndanyerezera njira idaphedza Yahova anthu anango mu ndzidzi ukhathimbana iwo  na nkandzo wakusowa kobiri na kutsalakanwa mwakuipa. Ine ndikhadziwa kuti ndingapitiriza kukhala wakukhulupirika kuna Yahova, iye mbadandipasa nkhombo. Mu ndzidzi udakwatwa ine mbandiendeswa nkaidi, pontho mbandimenywa kazinji kene, ine ndakwanisa kuona kuti Yahova ndzidzi onsene asatiphedza tingapitiriza kukhala akukhulupirika kuna iye.” Yahova adzakhala Baba wandimomwene kuna Biniam, pontho atumiki a Yahova apangiza kuti ndi abale ace andimomwene.

15. Thangwi yanji tisagopa kufa?

¹⁵ Bhibhlya isalonga kuti kufa ndi nyamalwa. (1 Akor. 15:25, 26) Panango ife tinadzudzumika tinganyerezera pya kufa, makamaka khala ife peno m’bodzi wa anyakufunika athu ali kuduwala kakamwe. Mphapo thangwi yanji tisagopa kufa? Thangwi Yahova aticita na cifuno cakukhala m’maso kwenda na kwenda. (Koel. 3:11) Kukhala na maonero adidi thangwi yakugopa kufa kunatiphedza toera kutsidzikiza umaso wathu. Mwacitsandzo, kunatiphedza toera kucita pisankhulo pyadidi thangwi ya pyakudya na kucita masendzekero akuwangisa manungo. Kusiyapo pyenepi, kunatiphedza toera kuenda ku nyumba yaungumi tingaduwala na kucalira kucita pinthu pyakuti pinaikha umaso wathu pangozwi.

16. Sathani asaphatisira tani kugopa kufa toera aticitise kusiya kutumikira Yahova?

¹⁶ Sathani asadziwa kuti ife tisafuna kakamwe umaso wathu. Pontho iye asalonga kuti ife tinasiya kubvera Yahova basi ene toera kupulumusa umaso wathu. (Yobe 2:4, 5) Mbwenye unoyu nee ndi undimomwene. Nakuti Sathani “ali na mphambvu za kupha,” iye asaphatisira kugopa kufa toera kuyesera kuticitisa kusiya kutumikira Yahova. (Aheb. 2:14, 15) Midzidzi inango, anthu anatsogolerwa na Sathani asalonga kuti anatipha tingakhonda kusiya kutumikira Yahova. Pontho midzidzi inango, Sathani asabandza mwai mu ndzidzi unaduwala ife toera kutiyesera kuti tiphatisire ukondzi wakuti nee usabverana na pinalonga Bhibhlya. Madotoro peno acibale athu akuti nee asatumikira Yahova, panango anatikakamiza toera kubuluswa ciropa peno kuikhwa ciropa mbatipwaza ntemo wa Mulungu. Kusiyapo pyenepi, panango munthu unango anayesera kutipanga toera tisake ukondzi wakuti nee usabverana na pinalonga Bhibhlya.

17. Mwakubverana na Aroma 8:37-39, thangwi yanji ife nee tisafunika kugopa kufa?

¹⁷ Maseze ife nee tisafuna kufa, ife tisadziwa kuti Yahova nee anasiya kutifuna ngakhale tife. (Lerini Aroma 8:37-39.) Axamwali a Yahova angafa, iye asapitiriza kuakumbukira, thangwi kuna iye iwo aciri m’maso. (Luka 20:37, 38) Yahova asafuna kakamwe kualamusa muli akufa. (Yobe 14:15) Iye alipa kale ntengo ukulu kakamwe toera tikwanise kukhala na “umaso wakukhonda mala.” (Juwau 3:16) Ife tisadziwa kuti Yahova asatifuna kakamwe, pontho asatitsalakana. Natenepa, m’mbuto mwakusiya kutumikira Yahova tingabva kupha peno tingapangwa kuti tinaphiwa, tisafunika kunyindira kuti iye anatibalangaza, anatipasa udziwisi na mphambvu. Pyenepi ndi pidacita mulongo Valérie na mamunace.—Masal. 41:3.

18. Mwapfundzanji na citsandzo ca mulongo Valérie?

¹⁸ Pikhali Valérie na pyaka 35 pyakubalwa, iye adzindikira kuti akhali na ntundu unango wa utenda wakugopswa wa câncer. Onani kuti kukumbuka kuti Yahova asanfuna kwam’phedza tani toera kukunda kugopa kufa. Iye alonga: “Pidadziwa ine kuti ndiri na utenda wa câncer, ine pabodzi na mamunanga tatsukwala kakamwe. Ine ndikhafunika kucitwa operasau ikulu toera ndipitirize kukhala m’maso. Ndayesera kulonga na madotoro azinji, mbwenye  iwo nee atawira kundicita operasau mukukhonda phatisira ciropa. Ine ndagopa kakamwe, mbwenye thangwi yakubvera ntemo wa Mulungu, ine nee ndatawira kuphatisira ciropa toera kucitwa operasau. Mu umaso wanga onsene ine ndisakwanisa kuona kuti Yahova asandifuna kakamwe. Mbwenye ndzidzi unoyu ine ndikhafunikambo kupangiza kuti ndisanfuna. Ndzidzi onsene ukhabva ine mphangwa zakuipa, ndikhawangisira toera kutsandzayisa Yahova, tayu Sathani. Mukupita kwa ndzidzi, ine ndadzacitwa operasau mukukhonda phatisira ciropa. Maseze ine ndisapitiriza kubva kupha, Yahova ndzidzi onsene asanditsalakana. Mwacitsandzo, mbandidzati kudzindikirwa kuti ndiri na utenda unoyu, ife tapfundza pa misonkhano ya mpingo nsolo wakuti ‘Enfrente com coragem os problemas atuais.’ * Nsolo unoyu watiwangisa kakamwe. Ife tisauleri mwakubwereza-bwereza. Misolo ninga ineyi na kupitiriza kucita mabasa anango auzimu ninga kumwaza mphangwa na kugumanika pa misonkhano, pyaphedza ine na mamunanga toera kupitiriza kukhala akukhurudzika mbaticita pisankhulo pyadidi.”

19. Ninji pinafuna kucitika mwakukhonda dembuka?

¹⁹ Na ciphedzo ca Yahova, Akristu pa dziko yonsene yapantsi asakwanisa kukunda pinentso pyakusiyana-siyana na mayesero a Dyabo. (1 Ped. 5:8, 9) Natenepa imwe munakwanisambo. Mwakukhonda dembuka, Yahova anadzatsogolera Yezu pabodzi na Akristu akudzodzwa “toera kufudza mabasa a Dyabo.” (1 Juwau 3:8) Buluka penepo, atumiki a Mulungu anantumikira pa dziko yapantsi ‘nee anadzathuswa, pontho nee anadzagopa cinthu.’ (Iza. 54:14; Mik. 4:4) Ngakhale ndzidzi unoyu mbudzati kufika, ife tisafunika kuwangisira toera tikunde kugopa.

20. Ninji pinafuna kutiphedza toera tikwanise kukunda kugopa?

²⁰ Tisafunika kupitiriza kuwangisa cinyindiro cathu cakuti Yahova asatifuna, pontho iye asatsidzikiza atumiki ace. Ife tinakwanisa kucita pyenepi tinganyerezera na kulonga kuna anango njira idatsidzikiza Yahova atumiki ace a kale. Pontho ife tinakwanisambo kukumbuka njira idatiphedza Yahova mu nyatwa zidathimbana na ife. Natenepa, na ciphedzo ca Yahova, ife tinakwanisa kukunda kugopa.—Masal. 34:4.