1. Ambeni ye wa la ayeke sara ka e mbeto?

 BÂ AMBENI vrai ye so asi. Nestor na wali ti lo María aye lani ti gue na ndo so a bezoin awafango tënë mingi dä. * Ye oko, ti sara ni, ala bezoin lani ti changé aye na yâ ti gigi ti ala. Me ala sara lani mbeto so ala yeke duti biani na ngia ape tongana ala yeke na nginza mingi ape. Na ngoi so Biniam aga Témoin ti Jéhovah na yâ ti mbeni kodro so a kanga lege na kua ti e dä, lo ga ti bâ so, so lo yeke mbeni wakua ti Nzapa, a peut ti sara ye ti ngangu na lo. A sara lo mbeto. Me lo sara encore mbeto mingi ti ye so azo ti sewa ti lo ayeke sara tongana ala mä so lo yeke na yâ ti mbeni fini bungbi ti vorongo Nzapa. Ti Valérie, a wara lani mbeni sioni cancer na terê ti lo, nga lo sara ngangu ti wara mbeni docteur so ayeke bâ na nene ni aye so lo mä na bê na ni na ndö ti mênë. A yeke na lege ni so mbeto ti tene lo kui apeut ti sara lo.

2. Ngbanga ti nyen la e doit ti sara ngangu ti hon ndö ti mbeto ti e?

² Mbeto ti aye tongaso asara mo awe? A sara mingi ti e awe. Tongana mbeto ahon ndö ti e, peut-être e yeke mû asioni desizion so apeut même ti buba songo ti e na Jéhovah. Ye so Satan aye la. Lo yeke gi nga ti sara kua na mbeto so asara e ti sara si e doro andia ti Jéhovah, na tapande commandement so lo mû na e ti fa nzoni tënë (Apoc. 12:17). Satan ayeke sioni zo, lo sara nzoni bê na zo kete ape nga lo yeke ngangu mingi.  Me mo peut ti bata terê ti mo si lo sara sioni na mo ape. Mo peut ti sara ni tongana nyen?

3. Nyen la ayeke aidé e ti hon ndö ti mbeto so asara e?

³ Tongana e hinga na bê ti e kue so Jéhovah aye e nga so lo yeke mû maboko na e lakue, mbeto ti Satan ayeke sara e ape (Ps. 118:6). Na tapande, zo so asû Psaume 118 awara lani ambeni ngangu kpale. Awato ti lo ayeke lani mingi, ambeni ayeke akota zo (versê 9, 10). Na ambeni ngoi, lo gi bê ti lo mingi (versê 13). Nga Jéhovah apunir lo ngangu (versê 18). Me bê ti zo ti sungo psaume so apusu lo ti he bia, atene: “Mbeto ayeke sara ande mbi pëpe.” Nyen la asara si lo bâ so sioni ye ayeke si na lo ape? Lo hinga lani so atâa so Babâ ti lo ti yayu, Jéhovah, apunir lo, Lo ye lo mingi. Zo ti sungo psaume so ahinga lani na bê ti lo kue so atâa kpale wa la lo wara, Nzapa ti lo so aye lo ayeke lakue nduru ti mû maboko na lo.—Ps. 118:29.

4. Mbeto ti nyen la e peut ti hon ndö ni tongana e yeke na confiance so Nzapa aye e?

⁴ E doit ti hinga na bê ti e kue so Jéhovah aye e oko oko kue. Tongana e hinga tongaso, a yeke aidé e ti hon ndö ti aye ota so ayeke sara ka e mbeto: (1) mbeto ti mû pëpe na azo ti sewa ti e aye so ala bezoin ni, (2) mbeto ti zo nga (3) mbeto ti kuâ. Aita so e sara tënë ti ala na tongo nda ti article so awara lege ti hon ndö ti mbeto ti ala ndali ti so ala hinga na bê ti ala kue so Nzapa aye ala.

5. Aye wa la apeut ti sara si mbeni mokonzi ti sewa agi bê ti lo mingi? (Bâ foto ti couverture ni.)

⁵ Mbeni mokonzi ti sewa so ayeke Chrétien ayeke bâ na nene ni mingi kua so lo yeke na ni ti bâ lege ti azo ti sewa ti lo (1 Tim. 5:8). Tongana mo yeke mokonzi ti sewa, peut-être na ngoi ti sioni kobela so amû ndo ade ti ninga ape mo gi lani bê ti mo so mo yeke perdre kua ti mo. Peut-être mo gi bê ti mo so mo yeke wara lege ape ti mû na azo ti sewa ti mo kobe nga na ndo ti lango. Peut-être mo gi nga bê ti mo so tongana mo perdre kua ti mo, mo yeke wara mbeni ape. Wala legeoko tongana Nestor na María, so e sara tënë ti ala fade, peut-être mo pensé so ala yeke vivre nzoni ape tongana ala yeke na nginza mingi tongana ti kozo ape. Satan akanga lege na azo mingi ti sara na Jéhovah ndali ti so ala pensé tongaso.

6. Satan ayeke gi ti sara si e pensé nyen?

⁶ Satan ayeke gi ti sara si e pensé so Jéhovah aye e ape nga lo yeke aidé e ape ti bâ lege ti azo ti sewa ti e. Ye so asara si e peut ti bâ so e doit ti sara ye kue so e peut ti sara ti bata kua ti e, même tongana e doit ti sara mbeni ye so apeut ti buba songo ti e na Jéhovah.

7. Atënë wa la Jésus atene so adë bê ti e?

⁷ Jésus, so ahinga Babâ ni nzoni ahon azo kue, adë bê ti e so Nzapa ti e “ahinga aye so [e] yeke na bezoin ni même kozoni si [e] hunda ni na lo.” (Mat. 6:8). Jésus ahinga nga so Jéhovah ayeke nduru ti mû na e aye so e bezoin ni. So e yeke aChrétien, e yeke azo ti sewa ti Nzapa. E peut ti duti sûr so Jéhovah, so ayeke Mokonzi ti sewa ni, ayeke sara ye alingbi na mama-ndia so ayeke na 1 Timothée 5:8.

8. (a) Nyen la ayeke aidé e ti hon ndö ti mbeto so e lingbi pëpe ti mû na azo ti sewa ti e aye so ala bezoin ni? (Matthieu 6:31-33). (b) Tongana nyen la e peut ti mû tapande ti couple so ayeke na yâ ti foto so amû kobe na mbeni ita-wali?

⁸ Tongana e hinga biani so Jéhovah aye e nga na azo ti sewa ti e, e yeke hinga na bê ti e kue so e yeke wara aye so e bezoin ni.  (Diko Matthieu 6:31-33.) Jéhovah aye ti mû na e aye so e bezoin ni; lo ye e nga lo mû na e aye mingi. Na ngoi so Jéhovah acréé sese, lo mû na e aye so e bezoin ni ti ngbâ na fini, me lo ngbâ gï ge ape. Na ndoye, lo sara si sese asi singo na aye so ayeke zia ngia mingi na bê ti e (Gen. 2:9). Même tongana na ambeni ngoi e yeke gï na aye so e bezoin ni, zia e girisa ape so e wara ni ndali ti so Jéhovah la amû ni na e (Mat. 6:11). E doit ti girisa ape so asacrifice so e sara laso ayeke ye oko ape tongana a haka ni na aye so Nzapa ti e ti ndoye ayeke mû na e laso nga na yâ ti angoi so ayeke ga. A yeke ye so Nestor na María ahinga ni.—És. 65:21, 22.

9. Nyen la mo peut ti manda na lege ti tapande ti Nestor na María?

⁹ Nestor na María ayeke lani na mbeni nzoni da nga na nzoni kua na Colombie. Ala tene: “E pensé lani ti duti na aye mingi ape nga ti sara kua mingi ndali ti Jéhovah, me e sara lani mbeto so e yeke duti na ngia ape tongana e yeke na nginza mingi ape.” Nyen la a-aidé lani ala ti hon ndö ti mbeto ti ala ni? Ala gbu li na ndö ti alege mingi so Jéhovah afa so lo ye ala. So ala hinga na bê ti ala kue so lo yeke bâ lakue lege ti ala, ala ke kua ti ala so a futa ala dä nzoni. Ala kä da ti ala na ala gue na mbeni mbage ti kodro ni so a bezoin awafango tënë ti Royaume mingi dä. Tënë ti nyen la ala tene na peko ti desizion so ala mû so? Nestor atene: “E ba so atënë so ayeke na Matthieu 6:33 ayeke tâ tënë. E manke lâ oko ape aye so e bezoin ni. Nga, e yeke na ngia fadeso ahon ti kozo.”

10. Ngbanga ti nyen la a yeke na lege ni ti tene azo asara mbeto ti amba ti ala?

¹⁰ Ngbene ye na ngoi so Adam na Ève ake yanga ti Jéhovah ti ga na ni, azo ayeke sara sioni na amba ti ala (Zo-ti. 8:9). Na tapande, azo ayeke sara kua na komandema ti ala ti sara sioni na amba ti ala, asioni zo ayeke sara asioni ye, na ekole, a-élève ayeke zonga amba ti ala nga ala yeke zia mbeto na yâ ti ala nga ambeni zo ayeke sara ye même na ngangu na azo ti sewa ti ala. Li ti e akpe ape so azo ayeke sara mbeto ti amba ti ala. Tongana nyen la Satan ayeke gi ti sara kua na mbeto so ti sara sioni na e?

11-12. Tongana nyen la Satan ayeke sara kua na mbeto ti zo ti sara sioni na e?

¹¹ Satan agi ti sara si mbeto ti azo ahon ndö  ti e tongaso si e zia ti fa tënë wala e zia ti sara ambeni ye so Jéhovah ahunda na e. Satan ayeke pusu azo ti gouvernement ti kanga lege na kua ti e nga ti sara aye ti ngangu na e (Luc 21:12; Apoc. 2:10). Na yâ ti dunia ti Satan so, azo mingi ayeke kangbi atënë so ayeke na lege ni ape nga na asioni mvene na ndö ti aTémoin ti Jéhovah. Azo so ayeda na amvene so apeut ti he e wala même ti pika e (Mat. 10:36). Eskê li ti e akpe na akode ti Satan so? Ên-ën. Lo yeke sara kua na akode so ngbene ye na ngoi ti akozo Chrétien.—Kus. 5:27, 28, 40.

¹² Mbeto ti tene azo ti gouvernement akanga lege na e ayeke gï oko ye so Satan ayeke sara na kua ape. Ti ambeni zo, mbeto ti ye so afami ti ala ayeke sara tongana ala ga Témoin asara ala mingi ahon mbeto ti pika. Ala ye afami ti ala mingi nga ala ye ti tene ala hinga Jéhovah nga ala ye lo. A sara ala vundu ti mä afami ti ala ayeke tene asioni tënë ti tâ Nzapa nga na awakua ti lo. Me ti ambeni fami so ake tâ tënë kozo, ambeni ngoi na pekoni ala yeda na ni. Me ka tongana afami ti e ake e ndali ti afini ye so e mä na bê na ni, e yeke sara ye tongana nyen?

13. Tongana nyen la tongana e hinga na bê ti e kue so Nzapa aye e ayeke aidé e ti gbu ngangu tongana afami ti e ake e? (Psaume 27:10).

¹³ Pendere tënë so ayeke na Psaume 27:10 apeut ti dë bê ti e. (Diko ni.) Tongana e girisa ape so Jéhovah aye e mingi, mbeto ayeke sara e ape même tongana azo ti sewa ti e ake e. E yeke nga na confiance so lo yeke futa ande e ndali ti so e gbu ngangu. Jéhovah ayeke mû na e ye kue so e bezoin ni ti ngbâ na fini, ti gi bê ti e ape nga ti duti na ngia nga lo yeke aidé e ti ngbâ nduru na lo. Mbeni zo so apeut ti sara ni nzoni ahon lo ayeke dä ape. A yeke ye so Biniam, so e sara tënë ti lo fade, ahinga ni.

14. Nyen la mo peut ti manda na lege ti tapande ti Biniam?

¹⁴ Biniam aga Témoin ti Jéhovah atâa so lo hinga so a peut ti sara ye ti ngangu mingi na lo. Bâ tongana nyen la so Biniam ahinga so Jéhovah aye lo a-aidé lo ti hon ndö ti mbeto ti zo. Lo tene: “Aye ti ngangu so asara na mbi ayeke sioni mingi ahon ti so mbi pensé na ni. Me mbi sara mbeto ti kangango lege ti afami ti mbi mingi ahon aye ti ngangu so azo ti gouvernement ayeke sara na mbi. Mbi sara lani mbeto so desizion so mbi mû ti ga Témoin ti  Jéhovah ayeke zia vundu na bê ti babâ ti mbi so ayeke Témoin ape nga afami ti mbi ayeke ne mbi encore ape.” Ye oko, Biniam ahinga lani na bê ti lo kue so Jéhovah ayeke bâ lakue lege ti azo so Lo ye ala. Biniam atene: “Mbi gbu li na ndö ti fason so Jéhovah a-aidé azo ti gbu ngangu na yâ ti kpale ti nginza, kengo zo ndali ti mara ti lo nga aye ti ngangu so gbâ ti azo asara na zo. Mbi hinga lani so tongana mbi ngbâ be-ta-zo na Jéhovah, lo yeke sara tufa na ndö ti mbi. Na ngoi so a gbu mbi fani mingi nga a sara même pasi na mbi, mbi bâ tongana nyen la Jéhovah ayeke aidé e lakue tongana e ngbâ be-ta-zo na lo.” Jéhovah aga lani vrai Babâ ti Biniam, nga awakua ti Lo aga avrai fami ti lo.

15. Ngbanga ti nyen la a yeke na lege ni ti sara mbeto ti kuâ?

¹⁵ Bible atene so kuâ ayeke mbeni wato (1 aCor. 15:25, 26). E peut ti sara mbeto ti kuâ, mbilimbili tongana terê ti e wala ti mbeni zo so e ye lo ason ngangu. Ngbanga ti nyen la e yeke sara mbeto ti kuâ? Ngbanga ti so Jéhovah asara e na nzara ti ngbâ na fini lakue lakue (Zo-ti. 3:11). Me mbeto ti kuâ apeut ti bata e. Na tapande, a peut ti pusu e ti te nzoni kobe, ti sara sport, ti bâ docteur, ti nyon yorö tongana bezoin ni ayeke dä nga ti kpe ti zia fini ti e senge senge na lê ti kpale.

16. Tongana nyen la Satan ayeke gi ti wara go na ndö ti mbeto ti kuâ so ayeke sara e?

¹⁶ Satan ahinga so fini ti e ayeke kota ye mingi na e. Me lo tene so e yeke dö aye kue ti zia, même songo ti e na Jéhovah, gï ti bata fini ti e (Job 2:4, 5). Satan ayeke na raison oko ape. Me so Satan “ayeke na ngangu ti ga na kuâ,” lo yeke gi ti wara go na ndö ti mbeto ti kuâ so e yeke na ni ti sara si e zia Jéhovah (aHéb. 2:14, 15). Na ambeni ngoi, azo so ayeke na gbe ti komandema ti Satan atene ala yeke fâ aTémoin ti Jéhovah tongana ala bere mabe ti ala ape. Na ambeni ngoi nde, Satan apeut ti bâ so e yeke na mbeni kpale ti seni so a doit ti bâ lege ni hio, na lo peut ti sara kua na ni ti sara si e doro ndia ti Nzapa. Adocteur wala afami ti e so ayeke aTémoin ape apeut ti pusu e ti yeda ti tene a zia mênë na terê ti e, mbeni ye so ague nde na ndia ti Nzapa. Wala mbeni zo apeut ti gi ti sara si e yeda na mbeni kode ti kaïngo kobela so ague nde na amama-ndia ti Bible.

17. Ti gue oko na aRomain 8:37-39, ngbanga ti nyen la e bezoin ti sara mbeto ti kuâ ape?

¹⁷ Atâa so e ye ti kui ape, e hinga so Jéhovah ayeke ngbâ ti ye e même tongana e kui. (Diko aRomain 8:37-39.) Tongana akamarade ti Jéhovah akui, lo yeke dabe ti lo na ala mo bâ mo tene ala ngbâ na fini (Luc 20:37, 38). Lo yeke ku kungo ti kiri na ala na fini (Job 14:15). Jéhovah afuta mbeni ngere so ayeke kota mingi, tongaso si e ‘lingbi ti wara fini ti lakue lakue.’ (Jean 3:16). E hinga so Jéhovah aye e mingi nga lo yeke bâ lege ti e. Tongaso, ahon ti zia Jéhovah na ngoi so terê ti e ason wala a tene a yeke fâ e, e yeke zia bê ti e na lo ti wara dengo bê, ndara nga na ngangu. A yeke tâ gï ye so Valérie na koli ti lo asara lani la.—Ps. 41:3.

18. Nyen la mo peut ti manda na lege ti tapande ti Valérie?

¹⁸ Na ngoi so Valérie ayeke lani na ngu 35, a wara mbeni sioni cancer so asara azo mingi ape na terê ti lo. Bâ tongana nyen la ndoye a-aidé lo ti hon ndö ti mbeto ti kuâ. Lo tene: “Na ngoi so mbi mä so mbi yeke na cancer, a changé gigi ti mbi na koli ti mbi gï hio tongaso. A doit lani ti sara na mbi mbeni kota opération si mbi ngbâ na fini. Mbi bâ adocteur  mingi, me ala kue ake ti opéré mbi sân mênë. Mbeto ahon ndö ti mbi me ndali ti ndia ti Nzapa, mbi ke ti mû mênë. Na yâ ti gigi ti mbi, Jéhovah afa so lo ye mbi mingi. Fadeso, lege azi na mbi ti fa so mbi ye lo. Lakue tongana mbi mä mbeni sioni tënë na ndö ti seni ti mbi, a yeke sara si mbi kiri mbi leke même na bê ti mbi ti zia ngia na bê ti Jéhovah na ti zia pëpe si Satan asö benda. Na nda ni, a opéré mbi nzoni sân mênë. Atâa so mbi yeke lakue na akpale ti seni, Jéhovah ayeke mû na e lakue aye so e bezoin ni. Na tapande, na ngoi ti bungbi ti nda-yenga so e sara kozo ti tene a wara cancer na terê ti mbi, e manda article so li ni ayeke ‘Gbu ngangu na yâ ti aye ti ngangu ti laso.’ * Article so adë bê ti e lani mingi. E diko ni fani mingi. A-article tongaso nga na aye so e yeke sara lakue ti voro Jéhovah asara si mbi na koli ti mbi e wara siriri ti bê nga a-aidé e ti gi bê ti e ahon ndö ni ape nga ti mû anzoni desizion.”

19. Nyen la aga nduru ti si awe?

¹⁹ Grâce na mungo maboko ti Jéhovah, aChrétien na ndö ti sese kue ahon ndö ti akpale so ala wara nga ala dö sese na Zabolo (1 Pi. 5:8, 9). Mo nga mo peut ti sara ni. Fafadeso, Jéhovah ayeke mû yanga na Jésus nga na azo so ayeke komande legeoko na lo “ti futi akusala ti Zabolo.” (1 Jean 3:8). Na pekoni, awakua ti Nzapa so ayeke sara na lo na sese ge ayeke “sara mbeto ti ye oko pëpe nga kota mbeto ayeke hon ndö ti [ala] pëpe”. (És. 54:14; Mi. 4:4). Juska ti si na ngoi ni so, e doit ti sara ngangu ti hon ndö ti mbeto ti e.

20. Nyen la ayeke aidé e ti hon ndö ti mbeto?

²⁰ E doit ti ngbâ ti duti na confiance mingi so Jéhovah aye e nga lo yeke bata awakua ti lo. Ye so ayeke aidé e ti sara ni ayeke ti gbu li na ndö ti aye so Jéhovah asara ândö ti bata awakua ti lo nga ti sara lisoro na ndö ni. E peut nga ti dabe ti e na aye so lo sara ti aidé e wani ti gbu ngangu na yâ ti angangu kpale. Grâce na mungo maboko ti Jéhovah, e peut ti hon ndö ti mbeto.—Ps. 34:4.