1. Улустуң колдуунда таваржып турар коргуушкуннарын чугаалаптыңар.

 САНТЬЯГО * биле Мария суртаалчылар чедишпес черге бараалгаксап турганнар. Ынчангаш оларга чуртталгазын бөдүүнчүдери херек турган. Ынчалза-даа акша-төгериивис эвээжей бээр болза, ёзулуг аас-кежиктиг бооп шыдавас бис деп, олар дүвүреп турганнар. Биниам бистиң ажыл-чорудулгавысты хоруп каан чуртта чурттап турар. Ол Иегованың Херечизи апаргаш, истеп сүрдүреринден коргуп турган. Оон аңгыда, Биниам, төрелдери ооң чаа чүдүлгезин канчаар хүлээп аар ирги дээш, дүвүреп турган. А Валери рактың дүрген өөскүп турар бир хевири-биле аарый берген. Хан чок кезиишкин кылыр хирург эмчини ол тыппайн турган. Аарыг кедерей бээр болза, өлүп кагзымза канчаар дээш, ол коргуп турган.

2. Коргуушкунну чавылдырып өөренири чүге чугула?

² Хөй кезиивис ындыг коргуушкуннар-биле таныш. Ынчалза-даа оларны чавырылдырып өөренири чугула. Чүге дээрге оларга алзыптар болзувусса, Иегова-биле найыралывысты баксырадыптар шиитпирлерни хүлээптер бис. А Эрлик чүгле ону манап турар болгай. Оон аңгыда, ол бисти Иегованың хоойлуларын үреп, чижээ, суртаалдаарын соксадыптар кылдыр, коргуушкунарывысты ажыглап турар (Ажыд. 12:17). Эрлик — араатанзыг, кээргел чок, аажок күштүг хуу-бот-тур. Ынчалза-даа бис камгалал чок артпаан бис.

3. Коргуушкунну ажып эртеринге биске чүү дузалаар?

³ Иегова биске ынак, Ол бис-биле кады деп, быжыг бүзүрээр болзувусса, Эрлик бисти кажан-даа коргудуп шыдавас (Ыд. ыр. 117:6). 117-ги Ырны бижээн Бурганның бараалгакчызының чижээн көрээлиңер. Ол дыка нарын байдалдарга  таваржып чораан. Ооң дайзыннары эңмежок, безин оларның чамдыызы эрге-чагырга ээлеп турган (9, 10-гу шүлүктер). Чамдыкта аңаа шыдажыр арга чок берге турган (13-кү шүлүк). Оон аңгыда, Иегова ону шыңгыы кезеткен (18-ки шүлүк). Ынчалза-даа ыр күүседикчизи: «Корткан херээм чүл?» — деп ырлаан. Чүге ол бодун айыыл чок кылдыр миннип турган? Дээрде Адазы Иегова ону эдип чазаан-даа болза, Ол аңаа дыка ынак деп, ыр күүседикчизи билип турган. Кандыг-даа байдал тургустунуп келзе, сагыш човангыр Бурган аңаа албан дузалаар деп, ол быжыг бүзүреп турган (Ыд. ыр. 117:29).

4. Бурган биске ынак деп чигзинмес болзувусса, кандыг коргуушкуннарны ажып эртиптер бис?

⁴ Иегова биске ынак деп быжыг бүзүрээр болзувусса, үш нептереңгей коргуушкунну ажып эртип шыдаар бис: 1) өг-бүлевисти хандырып шыдавас дээш коргары, 2) кижилерден коргуш, 3) өлүмден коргуш. Бирги абзацта акы-угбалар коргуушкуннарын ажып эртип шыдаан, чүге дээрге Иегованың ынакшылынга чигзинмейн турганнар.

5. Өг-бүле баштыңнары чүү дээш дүвүреп болур? (Журналдың даштында чурукту көрүңер.)

⁵ Бурганның бараалгакчылары өг-бүлезин хандырар хүлээлгеге шыңгыы хамаарылгалыг (1 Тим. 5:8). Эргим өг-бүле баштыңнары, коронавирустуң ужундан хөй-ле бергелерге таварышкан силер. Ажылды чидирип алыр болзумза, өске ажылды кайыын тывар мен деп сагышсырап, өг-бүлемни азырап, бажың өртээн төлеп шыдавайн барзымза канчаар деп дүвүреп турган чадавас силер. Азы Сантьяго биле Мария ышкаш, эвээш акшага чурттаары болдунмас деп бодап турган чадавас силер. Шак ындыг коргуушкуннар — Эрликтиң биске удур ажыглап турар күштүг чепсээ-дир.

6. Эрлик бисти чүү чүвеге бүзүредирин кызыдып турар?

⁶ Эрлик бажывыска мындыг бодалдарны сиңирерин кызыдып турар: Иегова бараалгакчыларының дугайында сагыш човавайн турар, Ол биске өг-бүлевисти азыраарынга дузалавас. Ооң мегезинге бүзүрей бээр болзувусса, «ам канчаар, ажылды чидирбес дээш, библейжи дүрүмнерни хажыдып болур» деп, бодал бажывыска кирип кээп болур.

7. Иисус бисти чүү чүвеге бүзүреткен?

⁷ Иисус Адазын кымдан-даа артык эки билир. Ынчангаш ол бисти: «Адаңардан дилеп четтикпейн чыдырыңарда-ла, Ол силерге чүү херегин билир» — деп бүзүредип турар (Мф. 6:8). Бурган бистиң хереглелдеривистиң дугайында сагыш човаарынга кезээде белен деп, Иисус бичии-даа чигзинмейн турар. Чүге дээрге Бурган бисти Бодунуң өг-бүлезиниң кежигүннери кылдыр санап турар. Ынчангаш Иегова өг-бүлениң Баштыңы болганда, Ол 1 Тимофейге 5:8-те бижээн дүрүмге шыңгыы хамаарылгалыг.

8. а) Өг-бүлевисти хандырып шыдавас бис дээн коргуушкунга алыспазынга чүү дузалаар? (Матфей 6:31—33). б) Чурукту көрүңер. Угбавыска аъш-чем эккелген өг-бүле биске кандыг чижек көргүскен?

⁸ Бурган биске болгаш өг-бүлевиске ынак деп бүзүрээр болзувусса, Ол биске бүгү херек чүүлдү бээр деп чигзинмес бис. (Номчуптуңар: Матфей 6:31—33.) Иеговага бис дээш сагыш човаарынга ынак. Ол чымчак сеткилдиг, беримчелиг Адавыс-тыр! Черни чаяап тургаш, Ол кижилерге чүгле амыдыраарынга херек чүүлдерни эвес, а өөрүшкү эккээр бүгү чүвени база берген (Э. д. 2:9). Ынчангаш акшавыс чүгле херек чүүлге чедер үеде безин, чок чүүлче эвес, а бар чүвеже кичээнгейни салыр болзувусса эки. Чүге дизе Иегова бис дээш сагыш човап турар болгай (Мф. 6:11). Чүнү-даа чидирип алган болзувусса, амгы үеде Иегованың берип турар  база келир үеде бээр бүгү чүүлүнге ол бичии-даа деңнешпес деп сактып чоруулуңар. Аңаа Сантьяго биле Мария шынзыккан (Иса. 65:21, 22).

9. Сантьяго биле Марияның чижээнден чүнү өөренип ап турар бис?

⁹ Колумбияда чурттап турар Сантьяго биле Мария чараш бажыңныг, эки ажылдыг турган. «Чуртталгавысты бөдүүнчүдүп алгаш, оон-даа хөй бараалгаксап турган бис. Ынчалза-даа биске ындыг өскерлиишкиннер кылыры коргунчуг болган. Эвээш акша-биле амыдыраар болзувусса, чуртталгавыс солун эвес апаар-даа ышкаш» — деп, Сантьяго биле Мария чугаалаан. Оларга ол коргушту ажып эртеринге чүү дузалаан? Ооң мурнунда Иегова оларга ынакшылын каш-даа катап көргүскен деп, олар сактып эгелээн. Чүү-даа боор болза, Иегова оларны черле кагбас деп быжыг бүзүрел оларны эки шалыңныг ажылдан үнүп алырынче оттурган. Сантьяго биле Мария бажыңын садыпкаш, суртаалчылар чедишпес чурттуң бир кезиинче көже бергеннер. Ол өг-бүле хүлээп алган шиитпири дээш хараадаан бе? Сантьяго мынча деп харыылаан: «Матфей 6:33-те сөстер ылап шын чорду! Бисте шупту херек чүве бар. Бис оон-даа аас-кежиктиг апарган бис».

10. Кижилерниң бот-боттарындан коргуп турарында чүге кайгамчык чүве чок?

¹⁰ Ада́м биле Еваның үезинден тура, кижилер бот-боттарынга хора чедирип чоруур (Эккл. 8:9). Чижээ, дарга-бошка улус эрге-чагыргазын эрттир ажыглап турар, а кем-херек үүлгедиишкиннери кайда-даа болуп турар. Школачылар чаңгысклассчыларын куду көрүп, а чамдык улус бодунуң-на чоок улузун каржы аажылап турар. Ынчангаш кижилер бот-боттарындан коргар боорга, ында кижи кайгаар чүве чок. Эрлик ол коргуушкунну канчаар ажыглап турар?

11, 12. Кижилерден коргушту Эрлик биске удур канчаар ажыглап турар?

¹¹ Бистер кижилерден корткаш, Бурганның хоойлуларын үреп азы суртаал ажылын соксадыптар кылдыр, Эрлик күзеп турар. Ооң салдарынга алыскан чамдык чурттарның баштыңнары ажыл-чорудулгавысты хоруп, бисти истеп сүрүп турар (Лк. 21:12; Ажыд. 2:10). Хөй улус Иегованың Херечилериниң дугайында шын эвес информацияны тарадып, ажыы-биле нүгүлдеп турар. А ол нүгүлге бүзүрээн улус бисти кыжырып, бисче каржыланып турар (Мф. 10:36). Ынчалза-даа ол кайгамчык эвес. Эрлик шак ындыг арганы  бирги векте база ажыглап турган (Аж.-ч. 5:27, 28, 40).

¹² Эрге-чагыргалар талазындан истеп сүрүүшкүннерден аңгыда, Эрлик база бир чепсекти ажыглап турар. Чамдык улус Иегованың Херечилери апаргаш, чоок улузу аңаа таарзынмайн баар ирги бе дээш коргуп турар. Ол чүүл оларны эттеп-согар кыжаныгдан артык коргудуп турар. Олар чоок улузунга ынак болгаш, Иегованы билип алгаш, Аңаа ынак апарган болза деп күзеп турар. Ынчангаш кажан чоок улузу Иегованың болгаш Ооң бараалгакчыларының дугайында багай чүве чугаалаарга, оларга аарышкылыг. Ынчалза-даа алыс шынга удурланып турган төрелдер соонда Иегованың Херечизи апарган таварылгалар база бар. А бир эвес чоок улузувус чаа чүдүлгевис дээш бистен хая көрнү бээр болза, канчаар бис?

13. Өг-бүлевис бистен хая көрнү бээр болза, Иегованың ынакшылынга бүзүрел биске канчаар дузалаар? (Ырлар 26:10).

¹³ Ырлар 26:10-да бижээн чараш сөстер бистерни оожургадып турар (номчуптуңар). Чоок улузувус бистен хая көрнү-даа бээр болза, кортпас бис, чүге дээрге Иегова биске дыка ынак деп билир болгай бис. Быжыг туруштуувус дээш, Бурган бисти албан шаңнаар деп бүзүрээр бис. Иегова кымдан-даа артык бис дээш сагыш човап шыдаар. Ол амыдыралга херек бүгү чүүлдү, сагыш-сеткиливистиң болгаш Ооң-биле быжыг хамаарылгалыг болурунга дузалаар шупту чүвени бээр. Биниамның чижээ ону бадыткап турар.

14. Биниамның чижээнден чүнү өөренип ап турар бис?

¹⁴ Биниамның чуртунда Иегованың Херечилерин каржы-дошкун истеп сүрүп-даа турар болза, ол дөмей-ле Бурганга бараалгаар деп шиитпирлээн. Иегованың ынакшылынга быжыг бүзүрел кижилерден коргуушкунну ажып эртеринге аңаа канчаар дузалаан? Ол мынча деп үлешкен: «Истеп сүрүүшкүннер мээң бодап турганымдан артык коргунчуг болган. Ынчалза-даа өг-бүлемниң талазындан багай хамаарылга мени оон-даа күштүг дүвүредип турган. Иегованың Херечизи апаар болзумза, ачам меңээ чөгенип каар, а өг-бүлем мени өөдежок кижи кылдыр санаар деп бодап кээри безин меңээ дыка коргунчуг турган». Ынчалза-даа Иегова Аңаа ынак кижилерниң дугайында кезээде сагыш човаар деп, Биниам чигзинмейн турган. Ол улаштыр мынча дээн: «Иегова кады бүзүрээн акы-угбаларымга экономиктиг бергелерни, оларга удур көөр хөөн чок чорукту, улустуң халдаашкыннарын ажып эртеринге  канчаар дузалаанын бо-ла бодаар турган мен. Иеговага бердинген артып каар болзумза, Ол мени албан шаңнаар деп билир турган мен. Мени чаңгыс эвес удаа тудуп хоругдап, эттеп-соп, безин эриидеп хинчектеп турган. Ынчалза-даа Бурганга шынчы артып каар болзувусса, Ол кезээде биске дузалаар деп ылап көрген мен». Иегова Биниамга ёзулуг Адазы, а Иегованың Херечилери аңаа ёзулуг өг-бүлези апарган.

15. Өлүрүнден чүге коргуп турар бис?

¹⁵ Библияда өлүмнү дайзын деп адаан (1 Кор. 15:25, 26). Бодувус азы чоок киживис берге аарып турар болза, өлүмнүң дугайында бодаары безин коргунчуг. Өлүрүнден чүге коргуп турар бис? Чүге дизе Иегова бисти мөңге чурттаар күзелдиг кылдыр чаяап каан (Эккл. 3:11). Өлүмден коргуш амы-тынывысты камгалаарынга дузалап болур. Чижээ, ол бисти шын чемнениринче, зарядка кылырынче, херек апарган үеде эмчилеп, эмнениринче болгаш амы-тынывысты айыылдан камгалаарынче оттуруп турар.

16. Эрлик өлүмден ала чайгаар коргуушкунувусту канчаар ажыглаарын кызып турар?

¹⁶ Амы-тынывысты кайы хире үнелеп турарывысты Эрлик дыка эки билир. Амы-тынын камгалаар дээш, олар бар-ла чүүлүн бериптер, безин Иегова-биле найыралдан ойталаар деп, Эрлик бисти буруудадып турар (Иов 2:4, 5). Кандыг кончуг чүдек меге чоор! Ындыг-даа болза, «өлүмнүң күжүн эдилээн эрлик» дүжүп бербейн турар. Ол ала чайгаар «өлүмден коргуушкуннувусту» ажыглап, Бургандан ойталаарынче бисти албадап турар (Евр. 2:14—15). Эрликке чагырткан улус, бир эвес Иегованың бараалгакчылары бүзүрелинден ойталавас болза, «силерни өлүрер бис» деп кыжанып болур. Чок болза, биске дүрген эмчи дузазы херек апаарга, Эрлик ол байдалды ажыглап, Иеговага дыңнангыр эвес апаарынче бисти ыдалап болур. Эмчилер болгаш Иеговага бүзүревес өг-бүлениң кежигүннери бисти хан куттурарынче албадап, Бурганның хоойлузун үрептер кылдыр негеп болур. Азы библейжи дүрүмнерге таарышпас эмнээшкинни шилип алырынче көгүдүп болур.

17. Өлүмден чүге корткан херээ чок? (Римчилерге 8:37—39).

¹⁷ Амы-тынывыс үстүп каар-даа болза, Бурган биске дөмей-ле ынак деп билир бис. (Номчуптуңар: Римчилерге 8:37—39.) Ол чок апарган өңнүктерин сактып, оларны дириг кылдыр бодап чоруур (Лк. 20:37, 38). Ол оларны диргизерин аажок күзеп турар (Иов 14:15). Иегова «Аңаа бүзүрээн кижи бүрүзү... мөңге амыдыралдыг болзун дээш», бедик өртекти төлеп, эргим Оглун өргүлге берген (Ин. 3:16). Бурганывыс биске дыка ынак база бис дээш сагыш човап чоруур деп билир бис. Ынчангаш аар-берге аарып-даа тургаш азы бисти өлүрерин кыжанып-даа турар болза, Иеговадан кажан-даа хая көрүнмээлиңер. А харын-даа Оон оожургалды, мерген угаанны болгаш күштү дилээлиңер. Валери биле ооң ашаа шак ынчаар кылганнар (Ыд. ыр. 40:4).

18. Валериниң чижээнден чүнү өөренип ап турар бис?

¹⁸ 35 харлыында Валери дүрген өөскүп турар, ховар рактың хевири-биле аарый берген. Иеговага ынакшыл аңаа өлүмден коргуушкунну ажып эртеринге канчаар дузалаан? Ол мынча дээн: «Мээң аарыым билдинип кээрге, чуртталгавыс хенертен өскерли берген. Кезиишкин эртер ужурлуг турган мен. Элээн хөй хирург эмчилерге барган мен, ынчалза-даа оларның кайызы-даа хан чок кезиишкин кылырынга чөпшээрешпээн. Меңээ дыка коргунчуг турган. Ынчалза-даа мен Бурганның хоойлузун үревес дээш, хан куттурбас деп хөөнненип алган мен. Иегова чуртталгамның  дургузунда меңээ дыка хөй катап ынакшылын көргүскен. Ам менде Аңаа кайы хире күштүг ынаамны көргүзер арга тыптып келген. Эмчи кадыым дам баксырап турар деп чугаалаарга-ла, Иегованы оон-даа артык өөртүксээр күзелим күштелип орган. Эрликке тиилеттирбес деп шиитпирлеп алган мен. Соонда меңээ хан чокка операцияны чедиишкинниг кылган. Кадыым багай хевээр-даа болза, Иегова меңээ бүгү херек чүүлдү берип турар. Чижээ, рактыг мен деп билип каан хүнүмнүң бетинде, каш хонук бурунгаар, чыышка „Сохраняйте мужество в бедственные времена“ * деп статьяны сайгарып турган бис. Ол меңээ ёзулуг херек чүүл болган! Бис ашаам-биле ону катап-катап номчуп турган бис. Шак ындыг статьялар, ол ышкаш Бурган-биле хамаарылганы быжыглаар эки чаңчылдар сагыш-сеткиливиске оожургалдыг болурунга база шын шиитпирлерни хүлээринге биске дузалап турар».

19. Удавас чүү боор?

¹⁹ Иегованың дузазы-биле бүдүн делегей кырында акы-угбалар бергелерни ажып эртип, Эрликти тиилеп турар (1 Пет. 5:8, 9). Ол тиилекчилерниң аразында силер база бар силер! Удавас Иегова Иисуска болгаш ооң-биле кады чагырар улуска «эрликтиң ажыл-херээн дазылындан тура тыртарын» дагзып каар (1 Ин. 3:8). Ооң соонда «оларны моон соңгаар кым-даа коргудуп-дүвүретпес» база олар Бурганга айыыл чок байдалда бараалгаар (Мих. 4:4; Иса. 54:14). Амдыызында ол кайгамчык үе келбээнде, коргуушкунга алыспас дээш кызаалыңар.

20. Коргуушкунну ажып эртеринге биске чүү дузалаар?

²⁰ Иегова өңнүктеринге ынак база оларны камгалап турар деп чүүлге бүзүреливисти быжыктырары чугула. Ону канчаар кылып болур бис? Эрткен үеде Иегова бараалгакчыларын канчаар камгалап турганын ханы боданып, ооң дугайында өскелер-биле үлежиилиңер. Ол ышкаш берге байдалдарда Иегованың биске канчаар дузалаанын база утпаалыңар. Бурганывыстың ачызында коргуушкуннарывысты тиилеп шыдаар бис! (Ыд. ыр. 33:5).