1. Itthu xeeni sinniiriha woova?

 NROWE niwehe mixankiho anna ni arokora akina yaarina aya. Munna Nestor ni mwaarawe oniihaniwa María, yaaniphavela orowa orumeela mapuro oothowa anamalaleerya. b Wira aphwanye yoolukama aya, awo yaahaana wiixutta orumeela musurukhu vakhaani. Awo yaanoova wira khiyaarowa ohakalalaka mwaha wa orumeelaka musurukhu vakhaani. Okathi Biniam aakhanle awe Namoona a Yehova elapo muteko ahu onilupatthiwa aya, aahoona wira akhala murumeyi a Muluku aamulupatthiwaka. Nto eyo yaahimuxankiha vanceene. Masi owo aahitepa woova okathi uupuwela awe moota amusi awe yaarowa aya woonela etiini awe esya. Murokora oniihaniwa Valérie aahiphwanyaniwa kanser oowoopiha ni oowaakuva wiiva. Nto aahiimananiha omphwanya meetiku aarowa omooperari ohimuhelenle ephome. Tthiri murokora ole aanoova okhwa.

2. Xeeni ninreerela ahu oxintta woova?

² Niireke mootoko woova itthu ntoko iyo? Anamunceene a hiyo nootoko woova. Vakhala wira khaninkasoopa woova wahu, woova iwo pooti oniiriha opaka soothanla sinrowa ohonona ompatthani ahu ni Yehova. Eyo ti etthu Satana oniphavela awe. Maana Satana pooti orumeela woova wira oniirihe ohiya wiiwelela sooruma sa Muluku, ohela muhina yooruma ya olaleerya. (Wiis. 12:17) Satana tootakhala ni ookhalana owerya. Masi hata vari siiso, munoowerya wiikhapelela wira muhihapuxiwe ni Satana. Moota xeeni?

3. Etthu xeeni enrowa onikhaliherya oxintta woova?

 ³ Akhala wira nnookupali ni murima wootheene wira Yehova onniniphenta, eyo piiyo, Yehova ori ni hiyo, Satana khonrowa owerya onoopopiha. (Esal. 118:6) Mwa ntakiheryo, mulipa-oolepa Esalimo 118, aahikhalana mixankiho sookhulumula. Owo aahikhalana awanani oowerya waahela muhina atthu yaarina okhulupale (nwehe eversiikulu 9 ni 10). Okathi mukina, owo aanixankihiwa vanceene (nwehe eversiikulu 13). Nave aahipwapweliwa aahiiso ottaruxiwa ni Yehova (nwehe eversiikulu 18). Hata vaari siiso, owo aalempe wira: “Tivó vahinòvaka etthu”. Etthu xeeni yaamukhaliherya okhala oolipa ni oovareleleya? Aanisuwela wira hata aattaruxiwe, Tiithi awe a wiirimu aanimphenta vanceene. Nasalimo ole aanikupali ni murima awe wootheene wira hata aarina mixankiho, Muluku awe oophenta ammukhaliherya. — Esal. 118:29.

4. Nakupali wira Muluku onniniphenta, inamuna xeeni sa woova ninrowa ahu oxintta?

⁴ Nihaana okupali ni murima wootheene wira Yehova onniniphenta. Akhala wira nnookupali eyo, enoonikhaliherya oxintta itthu tthaaru nnoova ahu. Itthu sene tiiya: (1) woova ohiwerya waavaha atthu a etthoko ahu yoolya ni itthu sinaathowa, (2) owoova atthu ni (3) woova okhwa. Atthu naalavunle ahu ettima yoopacerya, yaahixintta woova mwaha woowi yaanikupali ni murima wootheene wira Muluku onnaaphenta.

5. Itthu xeeni sikhanle owaaxankiha ahooleli a itthoko? (Nwehe efootu ya ekaapa.)

⁵ Ahooleli a itthoko makristau, aakhalana muritti woowaavaha atthu a etthoko aya itthu sinaathowa. (1 Tim. 5:8) Akhala wira mwa muhooleli a etthoko, okathi ola wa koronaviru mwaanoova woomoliwa muteko. Nave pooti wira mwaanoova ohiwerya waavaha atthu a etthoko anyu yoolya, opuro wookhala aahiiso ohiwerya oliverya itthu sa etthoko anyu. Nave-tho, woonasa wene mwaanoova wira akhala wira mwaamuyelela muteko, khimwarowa owerya ophwanya muteko mukina. Ntoko Nestor ni María nimulavunle ahu wanipacerya, woonasa wene mwaanoova opaka marukunuxo a muteko anyu wa mulaponi muupuwelaka wira khamuniwerya okhala murumeelaka musurukhu vakhaani. Musuweleke wira Satana oowerya owiiriha atthu anceene ohiya omurumeela Yehova, mwaha wa woova itthu iyo.

6. Satana oniphavela onikupaliha exeeni?

⁶ Satana oniphavela onikupaliha wira Yehova khonniphenta, khonnikhapelela ni khonrowa onikhaliherya okhapelela etthoko ahu. Nto eyo, pooti oniiriha wuupuwela wira nihaana opaka sootheene ninwerya ahu wira nihoomoliwe muteko hata nipakaka etthu enrowa ohonona ompatthani ahu ni Yehova.

7. Etthu xeeni Yesu aahimmye awe?

⁷ Yesu, yoowo onimusuwela oratteene Tiithi ihu a wiirimu waavikana atthu akina, aahimmye wira Muluku “onnisuwela sinoothowani, hata muhinatthi onvekela”. (Math. 6:8) Nave Yesu onnisuwela wira Yehova onniphavela onivaha itthu sinnithowa. Makristau ootheene eekeekhai aniirela mpantta emusi ya Muluku. Nto okhala wira muhooleli a emusi awe, nikupaliki ni murima wootheene wira Yehova onootthara malakiheryo orumme awe olempwa 1 Timootheyo 5:8.

8. (a) Etthu xeeni enrowa onikhaliherya oxintta woova ohiwerya ovaha yoolya etthoko ahu? (Matheyo 6:31-33) (b) Ntoko enooniherya aya elatarato, ninrowa otthara sai ntakiheryo na anamathelana aninvaha yoolya murokora mmosa?

⁸ Akhala wira nnookupali ni murima wootheene wira Yehova onniniphenta ni onniphenta emusi ahu, eyo enoonikhaliherya okupali wira Yehova onoonivaha itthu sootheene  sinnithowa. (Mmusome Matheyo 6:31-33.) Yehova onniphavela onikhapelela ni onivaha itthu sinnithowa, maana owo toovaha! Mwa ntakiheryo, okathi aapattunxe awe elapo, khahiyo wira Yehova aanivanhe paahi itthu saarowa onikhaliherya okhalaka akumi, masi owo aahisariha valaponi itthu sinnihakalaliha vanceene. (Maph. 2:9) Hata nikhalanaka itthu vakhaani paahi wira nikhale akumi, ti vooloka wuupuwela wira Yehova tonnivaha itthu wira nikhaleke akumi. (Math. 6:11) Nave ti vooloka wuupuwela wira itthu nimphwanya ahu niinaano-va, khasinlikana ni itthu Yehova onnivaha awe ni onrowa awe onivaha muhoolo. Eyo ti etthu aawenhe awe Nestor ni María. — Yes. 65:21, 22.

9. Yoowiiranya ya Nestor ni María, ewiixuttinheni exeeni?

⁹ Nestor ni María yaakhala oColômbia, awo yaahikhalana empa yooreera ni muteko yaaliviwa aya musurukhu munceene. Awo anihimya so: “Hiyo naaphavela okhweiherya okumi ahu wira nincererye muteko ahu woolaleerya. Masi naanoova ohihakalala mwaha woorumeela musurukhu vakhaani paahi”. Etthu xeeni yaakhalihenrye anamathelana ala oxintta woova iwo? Awo yaahuupuwela moota Yehova oonihenrye awe wira onnaaphenta vanceene. Nto eyo yaahaakhaliherya okupali wira Yehova aamwaavahaka itthu sootheene saathowa. Nto yaahihiya muteko ole yaaliviwa aya musurukhu munceene, yaahitumiha empa aya ni yaahithaamela muttetthe woothowa anamalaleerya. Yoonenle sai nuumala othaama? Nestor onihimya so: “Hiyo nooweha mookumini mwahu wira moolumo ari Matheyo 6:33, teekeekhai. Khetonko onithowa etthu ya werutthuni. Vano ninnihakalala vanceene ovikana khalai”.

10. Xeeni nihintikinihiwa ahu waaweha apinaatamu awoovaka apinaatamu akhwaaya?

¹⁰ Okhuma okathi Adamu ni Eva yaamutthekenle aya Muluku, apinaatamu annikumiheryana mixankiho sinceene. (Mus. 8:9) Mwa ntakiheryo, atthu anceene annipuherya okhulupale aya, khasireere ikrime, anaxikola annaaveeha anaxikola akhwaaya ni atthu akina annaahasula vootakhala atthu a etthoko aya. Vannooneya wira apinaatamu anniwoova apinaatamu akhwaaya! Satana onirumeela sai owoova atthu wira onihapuxe?

11-12. Satana onirumeela sai owoova atthu wira onihapuxe?

¹¹ Satana onnirumeela owoova atthu wira oniirihe ohiya omwiiwelela Yehova ni ohiya olaleerya. Ikuvernu sikina sineettihiwa ni  Satana sinnikhoottiha muteko wahu woolaleerya ni sinninlupattha. (Luka 21:12; Wiis. 2:10) Olumwenku ola wootakhala onilamuleliwa ni Satana, onniwootherya itthu sootakhala Anamoona a Yehova. Nto mwaha wa itthu iyo nnootheriwa ahu, atthu anceene annintuphela, anniniveeha ni khanniphavela. (Math. 10:36) Nto niireke itthu iyo sinnintikiniha. Nnaari. Okhuma okathi wa arummwa, Satana onnirumeela itthu iyo sa olavilavi wira owoopopihe makristau eekeekhai. — Mit. 5:27, 28, 40.

¹² Woova olupatthiwa khahiyo kapwitthi mmosa paahi Satana onimurumeela awe wira onihapuxe. Atthu akina annoova itthu sikina ovikana olupatthiwa ni otupheliwa. Maana awo aniwoova amusi aya. Nto awo anoova wira amusi aya yasuwela wira vano Anamoona a Yehova, anrowa waalupatthaka. Annaaphenta vanceene amusi aya ni aniphavela wira amusi aya amusuwele ni amphenteke Yehova. Nto vannaawereya vanceene okathi aniwiiwa aya amusi aya amunyoholaka Yehova ni anna ni arokora a mmulokoni. Okathi mukina, amusi yaale yaanilupattha, nuuvira okathi annimusuwela ni omukokhorela Yehova. Ankhi akhala wira amusi anyu khanoophavelani mwaha wa omurumeela Yehova? Munrowa opaka exeeni?

13. Okupali wira Yehova onniniphenta, onrowa onikhaliherya sai akhala wira amusi ahu anooninyanyala? (Esalimo 27:10)

¹³ Moolumo ari Esalimo 27:10, pooti onimaaliha vanceene. (Musome.) Hata amusi ahu anilupatthaka ni aninyokhaka, ti vooloka wuupuwela wira Yehova onniniphenta vanceene. Nto nikupaliki ni murima wootheene wira Yehova onoonitthuvela akhala wira nnoovilela. Yehova onoonivaha itthu sootheene wira nikhale akumi, onoonikhaliherya omaaleleya ni ohakalala ni onoonikhaliherya ohihiya okhalana ompatthani wooloka ni yena. Eyo ti etthu aawenhe awe Biniam nimulavunle ahu wanipacerya.

14. Ntakiheryo na Biniam, ninniixuttiha exeeni?

¹⁴ Biniam aahikhala mukristau hata aasuwela wira kuvernu a elapo awe aanaalupattha vanceene Anamoona a Yehova. Osuwela wira Yehova aanimphenta vanceene, ti etthu yaamukhalihenrye Biniam oxintta owoova atthu. Owo onihimya so: “Olupatthiwa iwe waari wuulupale ovikana miyo kuupuwela aka. Etthu yaatepa okoopiha ovikana olupatthiwa ni kuvernu waari olupatthiwa ni amusi aka. Miyo kaanoova omunyoonyiha paapa aka, yoowo aahaakhanle Namoona a Yehova ni owiiriha amusi aka wuuliwa muru mwaha  wa yoothanla aka”. Masi Biniam aanikupali ni murima wootheene wira Yehova, onnaakhapelela atthu ootheene onaaphenta awe. Biniam onitthokiherya so: “Miyo kaanuupuwela moota Yehova aakhalihenrye awe anna ni arokora akina ovilela othoiwa musurukhu, nthalu ni otupheliwa. Kaanisuwela wira kaahihiye omurumeela Yehova, owo aamukireeliha. Okathi kaamakela aka otthukweliwa mukhatteya, omaniwa ni ohasuliwa, kaahiweha ni maitho aka ala wira Yehova onninikhaliherya okathi wootheene akhala wira khaninhiya ororomeleya”. Yehova aahikhala paapa a Biniam, ni anna ni arokora yaahikhala amusi awe.

15. Xeeni okathi mukina vari aya vooloka woova okhwa?

¹⁵ Biibiliya onihimya wira okhwa nwanani. (1 aKor. 15:25, 26) Tivonto nnoovaha ahu okhwa okathi ninwereiwa ahu aahiiso okathi mmusi ahu oniwereiwa awe eretta yuulupale. Masi xeeni nnoova ahu okhwa? Mwaha woowi Yehova onipattunxe wira nikhaleke mahiku ootheene. (Mus. 3:11) Okathi mukina, woova okhwa onninikhapelela. Mwa ntakiheryo, woova okhwa onniniiriha opaka soothanla sooloka sa moota ninlya ahu, orowa oxipitaali naawereiwaka ni olooliwa akhala wira vannireerela. Nave ninnikhootta opaka itthu saarowa oniiva.

16. Satana onittottela sai mureerelo woova wahu okhwa wira onihapuxe?

¹⁶ Satana onnisuwela wira ninnivaha efaita yinceene okumi ahu. Masi owo ohimmye wira hiyo nnooleva itthu sootheene ohela muhina ompatthani ahu ni Yehova wira nikhale akumi. (Yobi 2:4, 5) Masi owo onimootha! Okhala wira Satana ookhalana “owerya wa okumiherya okhwa”, owo onnirumeela woova okhwa wira onihiihe omurumeela Yehova. (aHeeb. 2:14, 15) Okathi mukina, Satana onnaaruma atthu ootakhala murima owoopopiha arumeyi a Yehova ahimyaka wira anoowiiva akhala wira khanihiya omukokhorela Yehova. Nave okathi ninwereiwa ahu, Satana onnittottela mureerelo wira oniirihe ohiiwelela malamulo a Yehova. Okathi mukina mameetiku ni amusi ahu ahikhanle Anamoona a Yehova, pooti onikhanyererya oheleliwa ephome, etthu yeeyo enikhoottihiwa ni Yehova. Nave awo pooti onikhanyererya weemererya enamuna ya olooliwa ehinivarihana ni malamulo a mBiibiliyani.

17. Moovarihana ni aRoma 8:37-39, xeeni vahinreerela aya woova okhwa?

¹⁷ Khuuvo mutthu oniphavela okhwa. Masi hata nikhwaaka, nikupaliki ni murima wootheene wira Yehova khonrowa oniliyala ni khonrowa ohiya oniphenta. (Mmusome aRoma 8:37-39.) Okathi Yehova onikhweliwa awe mpatthani awe, owo onnimuupuwela vanakhala ntoko wira owo mukumi. (Luka 20:37, 38) Nto, owo onnilipelela nihiku onrowa awe omuhihimuxa wira otthikele okhala mukumi. (Yobi 14:15) Yehova ooliva esisapo yuulupale wira ‘nikhalane okumi woohimala’. (Yoh. 3:16) Tthiri ninnoona wira Yehova onniniphenta vanceene ni onninikhapelela. Nto okathi ninkhalana ahu muxankiho onrowa oniiriha okhwa, hiyo nihaana olipa ni Yehova nikupaliki wira onoonimaaliha, onivaha ankhili ni ikuru. Eyo ti etthu aapanke awe Valérie ni iyawe. — Esal. 41:4

18. Yoowiiraneya ya murokora Valérie, enniixuttiha exeeni?

¹⁸ Okathi Valérie aarina awe iyaakha 35, aahiphwanyaniwa kanser ootakhala ni ohinimakela okhumelela. Nto niphento naahimukhaliherya oxintta woova okhwa. Owo onihimya so: “Okathi kaaphwanyaninwe aka kanser, eyo yaahikiriipiha murima miyo ni iyaka. Nto wira kikhale mukumi, kaahaana wooperariwa. Kaahivaanela ni mameetiku manceene aniwooperari atthu, masi ootheene aya yaahikhootta okooperari  ahirumeelaka ephome! Miyo kaahoova vanceene, masi nkaakhanle oopaka etthu Yehova onikhoottiha awe ni weemererya oheleliwa ephome. Okumi aka wootheene, Yehova ohooniherya wira onnikiphenta. Nto okathi ole, kaahaana wooniherya wira kinnimphenta Yehova. Okathi wootheene meetiku aakileela awe ihapari sooriipiha murima, kaaniimananiha omuhakalaliha Yehova ni ohimweemererya Satana oxintta. Nuuvira okathi kaahooperariwa kihiheleliwe ephome. Nnaamwi mpakha va kiwereiwaka, Yehova onninivaha itthu sootheene sinnithowa. Mwa ntakiheryo, ehalaka esumana emosa wira kiphwanyaniwe kanser ole, naahithokorerya mmulokoni mwaha waahimya wira: ‘Nilipeke Murima Okathi Sinniphwanya Aya Mixankiho sa Vano’. c Mwaha ole waahinikhaliherya vanceene ni naahitthikela osoma ikwaha sinceene. Ohihiya ovara miteko sa Muluku, ntoko olaleerya ni orowela mithukumano ni mwaha ole, waahinikhaliherya okhalana murettele, moonelo wooloka ni opaka soothanla sooloka”.

19. Etthu xeeni enrowa wiiraneya moohipisa?

¹⁹ Akhaliheriwaka ni Yehova, anna ni arokora a olumwenku wootheene annixintta mixankiho ni annimuxintta Satana Diabo. (1 Ped. 5:8, 9) Nyuwo-tho, munoowerya oxintta mixankiho sanyu ni omuxintta Diabo. Moohipisa, Yehova onrowa omuruma Yesu ni makristau oothanliwa wira ‘apwetexe miteko sa Diabo’. (1 Yoh. 3:8) Nuumala-vo, ‘khivo-tho enrowa owopopiha’ atthu anrowa omurumeelaka Yehova mahiku ootheene. (Yes. 54:14; Mik. 4:4) Nilipelelaka ophiya okathi owo, nihaana wiimananiha oxintta woova wahu.

20. Etthu xeeni enrowa onikhaliherya oxintta woova wahu?

²⁰ Nihihiye olipiha okupali wahu wira Yehova onniniphenta ni onninikhapelela. Nto oweha soowiiraneya sa atthu akina ni wuupuwelela moota Yehova aakhalihenrye awe ni waakhapelela arumeyi awe a khalai, onoonikhaliherya vanceene. Nave nihaana wuupuwela moota Yehova onikhalihenrye awe oxintta mixankiho sahu. Nto nikhaliheriwaka ni Yehova, nnoowerya oxintta woova wahu! — Esal. 34:5.