1. Yashshiya amaridabati awugeetee?

 AMARIDA Yihoowa Markkata gakkida ha hanotata qoppa. Nestoorinne A machchiyaa Maariya, aassiyaageeti keehi koshshiyoosaa biidi haggaazanawu koyidosona. * SHin yaatanawu, eti bantta deˈiyo hanotaa laammana koshshiis. Gidoppe attin, eti guutta miishshan deˈana koshshikko, tumuppe ufayttana danddayokko giidi yayyidosona. Biniyaami Yihoowa Markka gidido wode nu oosoy teqettido biittan deˈees; I Xoossaa asa gidiyo gishshawu bana yedetay gakkana danddayiyoogaa akeekiis. Hegee A yashshiis. SHin, A ooratta haymaanootiyaabaa soo asay eriyo wode waataneeshsha giidi keehi yayyiis. Vaalera bana keehi iita kansseree oyqqidoogaa eraasu; qassi suuttaa xeelliyaagan Geeshsha Maxaafay yootiyoobaara maayettiya I ammanuwaa bonchchiya dottoriyaa demmanawu A metootaasu. Hayqqana danddayays gaada A yayyidoogee bessiyaaba.

2. Nuuni yayyiyoogaa agganawu baaxetana koshshiyoy aybissee?

² Neeni hegaadan yayya eray? Nuuppe daroti yayyoos. Nuuni yayyiyoogaa aggana xayikko, Yihoowaara dabbotido nu dabbotaa moorana danddayiya iitabaa kuuyana danddayoos. Seexaanay koyiyoobay hegaa. Mishiraachchuwaa sabbakanaadan odettida azazuwaa gujjin, Yihoowa higgetuyyo nuuni azazettennaadan oottanawu I yashshaa goˈettanawukka malees. (Ajj. 12:17) Seexaanay iita, qareti baynnaagaanne wolqqaama. SHin neeni appe naagettana danddayaasa. Waatada?

3. Yayyiyoogaa agganaadan nuna aybi maaddanee?

 ³ Yihooway nuna siiqiyoogaanne ubbatoo maaddanaagaa nuuni ammanettikko, Seexaanay nuna yashissenna. (Maz. 118:6) Leemisuwawu, keehi unˈˈettanaadan oottiya amaridabay Mazamure 118 xaafidaagaa gakkiis. Maatay deˈiyo amaridaageeta gujjin, awu daro morkketi deˈoosona (paydo 9, 10). Issi wode, I keehi unˈˈettiis (paydo 13). Qassi Yihooway A mintti seeriis (paydo 18). SHin he mazamuraawee hagaadan giis: “Taani yayyikke.” I keehi woppu gaanaadan oottidabay aybee? Yihooway A seerikkokka, saluwan deˈiya ba Aaway A keehi siiqiyoogaa erees. Mazamuraawiyaa gakkida metoy ayba gidikkonne, siiqiya A Xoossay A maaddanawu ubbatoo giigi uttidoogaa ammanettiis.—Maz. 118:29.

4. Xoossay nuna siiqiyoogaa nuuni ammanettikko, aybaa yayyiyoogaa aggana danddayiyoo?

⁴ Yihooway nuna siiqiyoogaa nuuni ammanana koshshees. Yashshiya heezzubata yayyiyoogaa agganaadan hegee nuna maaddana, hegeetikka, (1) nu soo asawu koshshiyaabaa kunttana danddayokko giidi yayyiyoogaa, (2) asa yayyiyoogaa, qassi (3) hayquwaa yayyiyoogaa. Doometta menttuwan odettida ishanttinne michchontti Xoossaa siiquwan ammanettido gishshawu yayyiyoogaa aggidosona.

5. So asawu huuphe gidida uri hirgganaadan oottana danddayiya hanotati awugeetee? (Koyro sinttan deˈiya misiliyaa xeella.)

⁵ So asawu huuphe gidida Kiristtaanee ba soo asawu deˈuwaassi koshshiyaabaa kunttiyo aawatettaa xoqqu ootti xeellees. (1 Xim. 5:8) Neeni so asawu huuphe gidikko, mata wodeppe haa simmin ubbasaa gakkida harggiya wodiyan ne oosuwaappe yedetettana gaada hirggennan waaya aggana. Neeni ne soo asawu koshshiya qumaa shiishshanawu woy deˈiyoosaa demmanawu danddayikke gaada hirggennan aggakka. Qassi neeni ne oosuwaappe yedetettikko, hara ooso demmana danddayikke gaada yayyennan waaya aggana. Woy qassi guutta miishshan deˈiyoogee neeyyo danddayettennaba gaada Nestooraagaadaaninne Maariyiigaadan qoppennan aggakka. Seexaanay daro asay hegaadan yayyiyoogaa gaasuwan Yihoowawu haggaaziyoogaa agganaadan oottiis.

6. Seexaanay nuuni ay qoppanaadan oottanawu malii?

⁶ Nuuni Yihooway nuna siiqenna, qassi nu soo asawu koshshiyaabaa kunttanaadan nuna maaddenna giidi qoppanaadan oottanawu Seexaanay malees. Hegaappe denddidaagan, nuuni nu oosuwaappe yedetettennan agganawu nuussi danddayettida ubbabaa oottana bessees giidi qoppana danddayoos. Ubba qassi, Xoossaara nu dabbotido dabbotaa moorana danddayiyaabaa oottana danddayoos.

7. Yesuusi nuuyyo yootidobay aybee?

⁷ Nu Xoossay ‘nuussi koshshiyaabaa nuuni woossanaappe kasetidi eriyoogaa,’ ba Aawaa oogaappenne aaruwan eriya Yesuusi yootiis. (Maa. 6:8) Qassi Yihooway nuussi koshshiyaabaa kunttanawu giigi uttidoogaa Yesuusi erees. Nuuni Kiristtaane gidiyo gishshawu Xoossaa soo asaa yara. Yihooway nu soo asawu Huuphe, qassi so asawu huuphe gidida ubbay oottanaadan 1 Ximootiyoosa 5:8n I yootidobaa polanaagaa nuuni ammanettana danddayoos.

8. (a) Nu soo asawu koshshiyaabaa kunttana danddayokko giidi yayyiyoogaa agganaadan nuna aybi maaddanee? (Maatiyoosa 6:31-33) (b) Misiliyan qonccidaagaadan, issi michcheessi qumaa immiya azinaanne machchiyo waati milatana danddayiyoo?

⁸ Yihooway nunanne nu soo asaa siiqiyoogaa ammanettikko, nuussi koshshiyaabaa nuuni demmanaagaa ammanettana. (Maatiyoosa 6:31-33 nabbaba.) Yihooway nuussi koshshiyaabaa kunttanawu koyees, qassi I hegaa siiquwaaninne kehatettan kunttees. I saˈaa medhdhido wode, nu deˈuwawu koshshiyaabaa  immiyoogaa xalla gidennan, hegaappe aarobaa oottiis. Nuuni ufayttanaadan I saˈan darobaa medhdhiis. (Doo. 2:9) Issi issitoo nuuyyo koshshiyaaba xallay deˈikkonne, Yihooway immido gishshawu, nuussi koshshiyaabay deˈidoogaa hassayana danddayoos. (Maa. 6:11) Yihooway immiyoobay ha wodiyan nuuni aggi bayiyoobaappe keehi aadhdhiyoogaa ubbatoo hassayana koshshees. Qassi sinttappe I nuuyyo merinaa deˈuwaa immana. Nestoorinne Maariya hegaa akeekidosona.—Isi. 65:21, 22.

9. Nestooranne Maariyi hanotaappe neeni ay tamaarana danddayay?

⁹ Nestoorinne Maariya Kolombbiyan injje deˈuwaa deˈoosona. Eti hagaadan giidosona: “Nuuni nu deˈuwaa sima oottiyoogaanne kaseegaappe aaruwan haggaaziyoogaa xeelliyaagan qoppida; shin guutta miishshan deˈiyoogee waayi ufayssana giidi yayyida.” Yayyiyoogaa agganaadan eta aybi maaddidee? Yihooway etawu daro ogiyan bessido siiquwaa eti wotti dentti qoppidosona. I etawu koshshiyaabaa ubbatoo kunttanaagaa ammanettidi, daro miishshaa demissiya bantta oosuwaa aggidosona. Eti bantta keettaa bayzzidi he biittan Kawotettaabaa sabbakiyaageeti keehi koshshiyoosaa biidosona. Yaatin, kuuyidobaa xeelliyaagan etawu aybi siyettii? Nestoori hagaadan giis: “Maatiyoosa 6:33y yootiyoobay tuma gidiyoogaa nuuni akeekida. Asatettawu koshshiyaabay nuussi mule pacci erenna. Qassi nuuni haˈˈi keehi ufayttidi deˈoos.”

10. Asay issoy issuwaa yayyiyoogee garamissennay aybissee?

¹⁰ Addaameenne Hewaana Yihoowa bolli makkaloosappe doommidi asay issoy issuwaa qohees. (Era. 8:9) Leemisuwawu, asay ba maataa harata qohanawu goˈettees, makkalanchchati iitabaa oottoosona, wolqqaama naati banttanaara tamaariyaageeta timirtte keettan cayoosonanne yashissoosona, qassi amarida asay bantta soo asaakka meqqeti baynna ogiyan oyqqees. Asay asa yayyiyoogee garamissiyaaba gidenna! Seexaanay nuna qohanawu nuuni asaa yayyiyoogaa waati goˈettanawu malii?

11-12. Seexaanay nuna qohanawu nuuni asaa yayyiyoogaa waati goˈetti?

¹¹ Sabbakiyoogaa woy nuuni oottanaadan Yihooway yootido harabaa oottiyoogaa agganaadan, Seexaanay nuuni asaa keehi yayyanaadan oottanawu malees. Seexaanay kawotettati nu oosuwaa muleera digganaadaaninne nuna  yedettanaadan oottees. (Luq. 21:12; Ajj. 2:10) Seexaanaa alamiyan deˈiya asay Yihoowa Markkata xeelliyaagan bala qofaanne iita wordduwaa aassees. He wordduwaa ammaniya asay nuna qilliiccana, woy qohanakka danddayees. (Maa. 10:36) Seexaanaa hiillan nuuni garamettana bessii? Bessenna. I hegaa koyro xeetu layttan goˈettiis.—Oos. 5:27, 28, 40.

¹² Seexaanay goˈettiyo miishshay nuuni kawotettati gattiyo yedetaa yayyanaadan oottiyoogaa xalla gidenna. Amaridaageeti eti Yihoowa Markka gidiyo wode bantta so asay woyganeeshsha giidi yayyoosona. Eti banttana gakkiya qohuwaappe aaruwan issi issitoo hegaa keehi yayyoosona. Eti bantta soo asaa keehi siiqoosona, qassi bantta soo asay Yihoowa eranaadaaninne A siiqanaadan koyoosona. Eta soo asay tumu Xoossaanne awu goynniyaageeta bonchchennaagaa bessiyaabaa haasayishin eti siyiyo wode azzanoosona. Gidoppe attin, issi issitoo koyro tumaa eqettiya so asay guyyeppe tumaa siyiis. Nu soo asaa yarati nu ooratta ammanuwaa gaasuwan nunaara gayttanawu koyana xayikko shin? Nuuni waatanee?

13. Nu soo asay nuna eqettikko, Xoossaa siiquwan nuuni ammanettiyoogee nuna waati maaddana danddayii? (Mazamure 27:10)

¹³ Mazamure 27:10n odettida ufayssiya qofan nuuni minettana danddayoos. (Nabbaba.) Yihooway nuna keehi siiqiyoogaa nuuni hassayikko, nu soo asay nuna eqettikkonne aybi hananeeshsha giidi mule yayyokko. Qassi, Yihooway nu genccaa gishshawu nuna woytanaagaa ammanettana danddayoos. Yihooway nu deˈuwaassi koshshiya ubbabaa nuussi immana, nuuni woppu gaanaadaaninne ufayttanaadan nuna maaddana, qassi nuuni aara dabbotaa minttidi deˈanaadan ooppenne aaruwan maaddana! Qommoora abaa denttido Biniyaami hegaa akeekiis.

14. Biniyaama hanotaappe neeni ay tamaarana danddayay?

¹⁴ Biniyaami bana wolqqaama yedetay gakkana danddayiyoogaa erikkonne, Yihoowa Markka gidiis. Biniyaami bana Yihooway siiqiyoogaa eriyoogee asa yayyiyoogaa agganaadan A waati maaddidaakko qoppa. I hagaadan giis: “Taani qoppidoogaappe keehi aadhdhiya yedetay tana gakkiis. SHin, nu soo asay tana eqettiyoogaa kawotettay gattiyo yedetaappe aaruwan yayyaas. Taani Yihoowa Markka gidanawu kuuyidoogee ammanenna ta aawaa azzanttana, qassi nu soo asay hegaappe simmin tana bonchchennaadan oottana gaada yayyaas.” Gidoppe attin, Yihooway siiqiyoogeetuyyo  koshshiyaabaa ubbatoo kunttanaagaa Biniyaami ammanettiis. I hagaadan giis: “Harati miishshaa metuwaa, eta asay coo ixxiyoogaanne eta gakkiya yedetaa genccanaadan Yihooway eta waati maaddidaakko taani wotta dentta qoppaas. Taani Yihoowawu ammanettada deˈikko, I tana anjjana. Nuuni ammanettidi deˈikko, nuuyyo maadoy koshshiyo wodiyan Yihooway nuna keehi maaddiyoogaa taani darotoo qashettidonne bukettido wode beˈaas.” Biniyaamayyo Yihooway tumu Aawa gidiis, qassi Yihoowa asay awu tumu so asa gidiyoogaa bessiis.

15. Hayquwaa yayyiyoogee wottin deˈiyaaba gidiyoy aybissee?

¹⁵ Geeshsha Maxaafay hayqoy morkke gidiyoogaa yootees. (1 Qor. 15:25, 26) Nuuni woy nu siiqiyo uri keehi sahettiyo wode, hayquwaabaa qoppidi hirggana danddayoos. Nuuni hayquwaa yayyiyoy aybissee? Nuuni merinawu ufayttidi deˈanaadan oottidi Yihooway nuna medhdhido gishshataassa. (Era. 3:11) SHin, hayquwaa yayyiyoogee nu deˈuwaa naaganaadan nuna maaddana danddayees. Leemisuwawu, hegee nuuni bollawu maaddiya qumaa maanaadaaninne ispporttiyaa oottanaadan, koshshikko dottoriyaa maaduwaa oychchanaadaaninne xaliyaa goˈettanaadan, qassi qohiyaabaappe naagettanaadan nuna denttettana danddayees.

16. Seexaanay nuuni hayquwaa yayyiyoogaa goˈettanawu waati malii?

¹⁶ Nuuni nu deˈuwaa xoqqu ootti xeelliyoogaa Seexaanay erees. Hegaa gishshawu, I nuuni paxa deˈanawu Yihoowaara dabbotido dabbotaakka aggana giidi yootees. (Iyy. 2:4, 5) Seexaanay keehi baliis! SHin, Seexaanawu ‘hayquwaa kaalettiyo wolqqay deˈiyo’ gishshawu, I Yihoowa nu agganaadan oottanawu nuuni hayquwaa yayyiyoogaa goˈettanawu malees. (Ibr. 2:14, 15, NW) Nuuni nu ammanuwaa aggana xayikko, Seexaanay koyiyoobaa oottiya asati nuna woranawu issi issitoo yashissoosona. Haroode qassi, Seexaanay nu ammanuwaa shugissanawu nuuni hayqqanaadan oottana danddayiya harggiyaa goˈettana danddayees. Dottoreti woy ammanenna so asay nuuni Xoossaa higgiyaa kanttidi suuttaa goˈettanaadan wolqqanttana danddayoosona. Woykko Geeshsha Maxaafay yootiyo maaraara maayettenna akkamuwaa akkamettanaadan nuna ammanttanawu issi uri malana danddayees.

17. Roome 8:37-39y yootiyoogaadan, hayquwaa yayyana koshshennay aybissee?

¹⁷ Nuuni hayqqanawu koyokko; shin hayqqikkokka, Yihooway nuna siiqiyoogaa aggennaagaa eroos. (Roome 8:37-39 nabbaba.) Yihoowa dabboti hayqqikkokka, eti paxa deˈiyaabadan I eta hassayees. (Luq. 20:37, 38) I eta hayquwaappe denttanawu laamotees. (Iyy. 14:15) Nuuni “merinaa de7uwaa” demmanaadan Yihooway alˈˈo waagaa qanxxiis. (Yoh. 3:16) Yihooway nuna keehi siiqiyoogaanne nuussi qoppiyoogaa eroos. Yaatiyo gishshawu, nuuni sahettiyo wode woy hayquwaa yayyiyo wode, Yihoowa aggiyoogaappe I immiyo minttettuwan, aadhdhida eratettaaninne wolqqan ammanettoos. Vaaleranne I azinay hegaadan oottidosona.—Maz. 41:3.

18. Vaaleri hanotaappe neeni ay tamaarana danddayay?

¹⁸ Vaaleriyyo layttay 35 gidido wode, bana keehi iita kansseree oyqqidoogaa eraasu. Vaalera hayquwaa yayyiyoogaa agganaadan Yihoowa siiqoy O waati maaddidaakko beˈa. A hagaadan gaasu: “Kansseree tana oyqqidoogaa taani erido wode, ta azinaynne taani keehi dagammida. Taani paxa deˈanawu shuhettana koshshiis. Taani daro dottoreta zoretaa bessikkonne, suuttaa immennan shukkanawu eti ixxis giidosona. Taani keehi yayyaas, shin suuttaa goˈettiyoogee Xoossaa higgiyaara  maayettenna gishshawu ekkennan ixxaas! Ta deˈo laytta ubban, Yihooway tana keehi siiqiyoogaa bessiis. Taani A siiqiyoogaa haˈˈi bessana danddayays. Dottoreti tawu ubbatoo iitabaa yootoosona, hegee taani Yihoowa ufayssanawunne Seexaanaa yeellayanawu murttido murttiyaa yaa minttiis. Wurssettan, taani suuttaa goˈettennan loˈˈo hanotan shuhettaas. Sakkiyaabay tana aggana xayikkonne, nuuyyo koshshiyaabaa Yihooway ubbatoo immiis. Leemisuwawu, kansseree tana oyqqidoogee erettanaappe kase saaminttaa wurssettan shiiqiyo nu gubaaˈe shiiquwan, ‘Ha Wodiyan Gakkiya Metuwan Xalan Gencca’ * giya huuphe yohuwaa xannaˈida. Ha huuphe yohoy nuna keehi minttettiis. Nuuni hegaa zaari zaari nabbabida. Hagaa mala huuphe yohota nabbabiyoogeenne ayyaanaaban loˈˈobaa meeze oottiyoogee nuuni woppu gaanaadaaninne loˈˈobaa kuuyanaadan nuna maaddiis.”

19. Mata wode aybi hananee?

¹⁹ Yihooway maaddin, kumetta saˈan deˈiya Kiristtaaneti metiya hanotata xoonidosonanne Dabloosa loytti eqettidosona. (1 PHe. 5:8, 9) Neenikka yaatana danddayaasa. ‘Xalahe halaqaa oosuwaa xayssanaadan’ Yihooway Yesuusanne aara haariyaageeta mata wode azazana. (1 Yoh. 3:8) Hegaappe simmin, Xoossawu haggaaziya saˈan deˈiya asay ‘aybaassikka yayyennanne dagammenna.’ (Isi. 54:14; Mik. 4:4) Gidoppe attin, he wodee gakkanaashin nuuni yayyiyoogaa agganawu loytti baaxetana koshshees.

20. Yayyiyoogaa agganaadan nuna aybi maaddanee?

²⁰ Yihooway ba ashkkarata siiqiyoogaanne naagiyoogaa nuuni ubbatoo loytti ammanettana bessees. I kase ba ashkkarata waati naagidaakko wotti dentti qoppiyoogeenne hegaabaa haasayiyoogee loytti ammanettanawu nuna maaddana. Qassi, nuuni unˈˈettanaadan oottiya hanotata genccanaadan I nuna waati maaddidaakko hassayana danddayoos. Yihooway maaddin, nuuni yayyiyoogaa aggana danddayoos!—Maz. 34:4.