1. (a) Mɛni hɛ kɛ nɔ fɔmi nɛ Yehowa ha wɔ? (b) Ke a ke waa ‘ngɔ wa hɛ kɛ fɔ Yehowa nɔ’ ɔ, mɛni e tsɔɔ? (Hyɛ “Munyu Nɛ A Tsɔɔ Sisi.”)

 YEHOWA ha nihi tsuo nɛ a suɔ lɛ ɔ hɛ nɔ kami kpakpa. E be kɛe nɛ e ma ha nɛ hiɔ, aywilɛho yemi kɛ gbenɔ se maa po. (Kpoj. 21:3, 4) E maa ye bua “nihi nɛ a he jɔ” nɛ a ngɔɔ a hɛ kɛ fɔɔ e nɔ ɔ konɛ a tsake zugba a kɛ pee paradeiso. (La 37:9-11) E ma ha nɛ huɛ bɔmi kpakpa nɛ hi e kɛ wa ti nɔ fɛɛ nɔ wa kpɛti. Wa bua maa jɔ huɛ bɔmi nɛ ɔ he po pe huɛ bɔmi nɛ ngɛ waa kɛ lɛ wa kpɛti mwɔnɛ ɔ. Enɛ ɔ ji hɛ kɛ nɔ fɔmi nɛ se be! Se mɛni he je nɛ wa heɔ yeɔ kaa Mawu si womi ɔmɛ maa ba mi ɔ? Ejakaa nɔ́ fɛɛ nɔ́ nɛ Yehowa deɔ ɔ, e peeɔ. Enɛ ɔ tsɔɔ kaa wa ngɛ yi mi tomi kpakpa he je nɛ wa ma nyɛ maa ‘ngɔ wa hɛ kɛ fɔ Yehowa nɔ.’ * (La 27:14) Ke waa kɛ bua jɔmi kɛ tsui si tomi hyɛ Mawu blɔ konɛ e si womi ɔmɛ nɛ ba mi ɔ, e tsɔɔ kaa wa ngɔ wa hɛ kɛ fɔ e nɔ.​—Yes. 55:10, 11.

2. Mɛni nɛ Yehowa sɛ hlami nɛ e pee?

² Yehowa pee níhi nɛ tsɔɔ kaa e yeɔ e si womihi a nɔ. Mo susu nɔ hyɛmi nɔ́ kake ko he nɛ o hyɛ. Ngɛ Kpo Jemi womi ɔ mi ɔ, Yehowa wo si kaa ngɛ wa be nɛ ɔ mi ɔ, e ma bua nihi a nya kɛ je ma slɔɔtohi, lilɛ kɛ gbi slɔɔtohi a mi, konɛ a kɛ kake peemi nɛ sɔmɔ lɛ. Mwɔnɛ ɔ, wa le nimli nɛ ɔmɛ kaa “asafo kuu ngua.” (Kpoj. 7:9, 10) A ji nyumuhi, yihi kɛ jokuɛwi nɛ a je je ɔ mi he slɔɔtohi, se a ba pee  weku kake. (La 133:1; Yoh. 10:16) Nimli nɛ ɔmɛ kɛ kã fiɛɛ ɔ wawɛɛ. A pee klaalo kaa a maa a fiɛɛ hɛ kɛ nɔ fɔmi nɛ a ngɛ nɛ kɔɔ hwɔɔ se he ɔ kɛ ha nihi tsuo nɛ a suɔ nɛ a bu tue. (Mat. 28:19, 20; Kpoj. 14:6, 7; 22:17) Ke o piɛɛ asafo kuu ngua he ɔ, atsinyɛ jemi ko be he kaa o ngɛ si himi kpakpa nɛ maa ba a blɔ hyɛe.

3. Mɛni nɛ Satan suɔ nɛ o pee?

³ Satan sume nɛ o ná hwɔɔ se he hɛ kɛ nɔ fɔmi. E suɔ nɛ o he ye kaa Yehowa susuu we o he, nɛ e be e si womi ɔmɛ a nɔ yee. Ke Satan puɛ wa hɛ kɛ nɔ fɔmi ɔ, wa kɔni mi ma nyɛ maa jɔ̃, nɛ lɔ ɔ ma nyɛ ma ha nɛ wa kpa Yehowa sɔmɔmi. Kaa bɔ nɛ wa le ɔ, Abosiami bɔ mɔde kaa e ma puɛ Hiob hɛ kɛ nɔ fɔmi ɔ, nɛ́ e ha nɛ e kpa Yehowa sɔmɔmi.

4. Mɛni he wa maa susu ngɛ ní kasemi nɛ ɔ mi? (Hiob 1:9-12)

⁴ Ngɛ ní kasemi nɛ ɔ mi ɔ, wa ma susu bɔ nɛ Satan bɔ mɔde kaa e ma ha nɛ Hiob nɛ kpa Yehowa anɔkuale yemi ɔ he. (Kane Hiob 1:9-12.) Jehanɛ hu ɔ, wa ma susu nɔ́ nɛ wa ma nyɛ maa kase ngɛ Hiob nɔ hyɛmi nɔ́ ɔ mi kɛ nɔ́ he je nɛ e sa nɛ wa kai kaa Mawu suɔ wɔ nɛ e maa ye e si womi ɔmɛ a nɔ ɔ he.

5-6. Mɛni nyagbahi nɛ Hiob kɛ kpe ngɛ be kpiti mi?

⁵ Jinɛ níhi ngɛ nɔ yae saminya ha Hiob. Huɛ bɔmi kpakpa ngɛ e kɛ Yehowa a kpɛti. E ngɛ weku nɛ kle nɛ bua jɔmi ngɛ mi, nɛ e ji niatsɛ hulɔ. (Hiob 1:1-5) Se ngɛ ligbi kake mi ɔ, Hiob nɔ́ fɛɛ nɔ́ bɔ lɛ. Kekleekle ɔ, e lohwehi tsuo gbo. (Hiob 1:13-17) Lɔ ɔ se ɔ, e bimɛ nɛ e suɔ mɛ ɔ tsuo gbo. Mo susu oslaa nɛ e kɛ kpe ɔ he nɛ o hyɛ. Fɔli haoɔ wawɛɛ ke a bi kake gbo. Benɛ Hiob kɛ e yo ɔ ná le kaa a bimɛ nyɔngma amɛ ná oslaa nɛ a gbo ɔ, hyɛ bɔ nɛ a he mi maa po nɛ a maa ye aywilɛho ha. E be nyakpɛ kaa Hiob kɛ aywilɛho hia e tade ɔmɛ ngɛ e he, nɛ e hɛli nɛ e nɔ si!​—Hiob 1:18-20.

⁶ Lɔ ɔ se ɔ, Satan ha nɛ Hiob nu hiɔ ko nɛ nya wa nɛ e ngɛ zo. (Hiob 2:6-8; 7:5) Loko jamɛ a si fɔfɔɛ ɔ maa ba a, nihi buɔ Hiob wawɛɛ ngɛ e kpɔ ɔ mi. Nihi baa e ngɔ nɛ a ba biɔ lɛ ga womi. (Hiob 31:18) Se piɔ nɛ ɔ lɛɛ a kua lɛ. A kɛ lɛ pee we nɔ́ ko hu. E nyɛmimɛ kɛ e huɛmɛ nɛ nyu bi ngɛ e kɛ mɛ a kpɛti ɔ si lɛ. E sɔmɔli ɔmɛ po kua lɛ!​—Hiob 19:13, 14, 16.

7. (a) Mɛnɔ nɛ Hiob susu kaa e ha nɛ e ngɛ nɔ́ nae, se mɛni nɛ e pee we? (b) Mɛni blɔ nɔ Kristofo no ko kɛ nyagbahi nɛ ngɛ kaa nɔ́ nɛ ngɛ foni ɔ mi ɔ eko ma nyɛ maa kpe?

⁷ Satan suɔ nɛ Hiob nɛ he ye kaa e ngɛ nɔ́ nae ejakaa Yehowa kua lɛ. Kaa nɔ hyɛmi nɔ́ ɔ, Satan kɛ kɔɔhiɔ nɛ nya wa ko tsu ní kɛ hule we nɛ Hiob bimɛ nyɔngma amɛ ngɛ a hɛja jee ngɛ mi ɔ kɛ pue si. (Hiob 1:18, 19) Jehanɛ ɔ hu ɔ, e ha nɛ la je hiɔwe kɛ ba kpata Hiob lohwe ɔmɛ kɛ e sɔmɔli ɔmɛ nɛ a ngɛ e lohwe ɔmɛ a nɔ hyɛe ɔ a hɛ mi. (Hiob 1:16) Akɛnɛ kɔɔhiɔ ɔ kɛ laa tsuo je hiɔwe he je ɔ, Hiob susu kaa e je Yehowa Mawu ngɔ. Enɛ ɔ ha nɛ Hiob susu kaa e tɔ̃ Yehowa nɔ ngɛ blɔ ko nɔ. Ngɛ enɛ ɔmɛ tsuo a se ɔ, Hiob ji e hiɔwe Tsɛ ɔ se. Hiob yɔse kaa e ná ní kpakpahi fuu kɛ je Yehowa ngɔ be ko nɛ be. Lɔ ɔ he ɔ, e susu kaa ke e bua jɔ ní kpakpahi nɛ e nine su nɔ ɔ he ɔ, lɛɛ e sa nɛ e kplɛɛ ní yayahi nɛ a ba a hu nɔ. Enɛ ɔ he ɔ, e de ke: ‘A je Yehowa biɛ ɔ yi.’ (Hiob 1:20, 21; 2:10) E ngɛ mi kaa Hiob be sika, e be bimɛ, nɛ e be he wami hulɔ, se e ya nɔ nɛ e ye Yehowa anɔkuale. Se Satan kɛ lɛ gbi nya lolo.

8. Mɛni nɔ́ kpa nɛ Satan kɛ ka Hiob pee se?

 ⁸ Ngɛ ní nɛ ɔmɛ a se ɔ, Satan ngɔ nihi etɛ nɛ a peeɔ a ní kaa a ji Hiob huɛmɛ ɔ kɛ tsu ní, nɛ a ha nɛ Hiob nu he kaa e he hia we. Nihi etɛ nɛ ɔmɛ tsɔɔ kaa Hiob ngɛ nɔ nae akɛnɛ e pee ní yayami fuu ɔ he je. (Hiob 22:5-9) A bɔ mɔde kaa a ma ha nɛ e he ye kaa ke e pee ní kpakpahi fuu po ɔ, Mawu susuu we e mɔde bɔmi ɔmɛ a he kulaa. (Hiob 4:18; 22:2, 3; 25:4) A ngɛ hlae nɛ Hiob nɛ susu kaa Mawu sume lɛ, Mawu be e nɔ hyɛe hu, nɛ se nami ko be he kaa e maa ya nɔ nɛ e sɔmɔ Mawu. Munyu nɛ ɔmɛ ma nyɛ ma ha nɛ Hiob nɛ susu kaa hɛ nɔ kami ko be.

9. Mɛni ye bua Hiob nɛ e pee kã?

⁹ Mo susu si fɔfɔɛ nɛ ɔ he nɛ o hyɛ. Hiob hii si ngɛ la zu mi, nɛ e ngɛ nɔ nae wawɛɛ. (Hiob 2:8) E huɛmɛ ngɛ munyu yayahi tue kɛ ngɛ lɛ sie, nɛ a ngɛ e biɛ puɛe. E nyagba a pee kaa tlomi ko nɛ jiɔ ngɛ e kuɛ nɔ, nɛ e bimɛ ɔmɛ a gbenɔ ɔ ha nɛ e ngɛ aywilɛho yee wawɛɛ nitsɛ. Sisije ɔ, Hiob tui e nyagba a he munyu. (Hiob 2:13–3:1) Se ke Hiob huɛmɛ nɛ ɔmɛ susu kaa akɛnɛ e tui e nyagba a he munyu he je ɔ, e ma kua Yehowa a, lɛɛ a bua kulaa. Ligbi ko ɔ, Hiob wo e yi nɔ nɛ e hyɛ e huɛ yaya a mɛ a hɛ mi nɛ e de ke: “I be dami ní peemi he ngmɛe kɛ ya si benɛ ma gbo!” (Hiob 27:5, NW) Mɛni ye bua Hiob nɛ e pee kã ngɛ nyagbahi nɛ e kɛ ngɛ kpe ɔ tsuo se? Benɛ e kɔni mi jɔ̃ po ɔ, e ná hɛ kɛ nɔ fɔmi kaa e Mawu nɛ e ngɛ suɔmi ɔ ma ha nɛ e nyagba a se maa po ligbi ko kɛ̃. E le kaa ke e gbo po ɔ, Yehowa ma tle lɛ si.​—Hiob 14:13-15.

10. Mɛni wa kase ngɛ Hiob sane ɔ mi?

¹⁰ Hiob sane ɔ tsɔɔ wɔ kaa Satan be nyɛe maa nyɛ wa nɔ nɛ wa kua Yehowa.  Jehanɛ hu ɔ, Yehowa le níhi tsuo nɛ wa ngɛ mi gblee. Hiob níhi a si kpami ɔ ma nyɛ maa ye bua wɔ konɛ waa nu si fɔfɔɛhi nɛ waa kɛ ngɛ kpee ɔ a sisi saminya. Ha nɛ wa susu ní komɛ nɛ wa ma nyɛ maa kase ngɛ Hiob sane ɔ mi ɔ he.

11. Ke wa ya nɔ nɛ wa ngɔ wa hɛ kɛ fɔ Yehowa nɔ ɔ, mɛni nɔ mi mami nɛ wa ma ná? (Yakobo 4:7)

¹¹ Hiob sane ɔ ha nɛ wa na kaa ke wa ya nɔ nɛ wa ngɔ wa hɛ kɛ Yehowa nɔ ɔ, wa ma nyɛ ma fĩ si ngɛ wa ka amɛ a mi, nɛ wa ma nyɛ maa te si kɛ wo Satan. Ke wa pee jã a, mɛni maa je mi kɛ ba? Ngmami ɔ ha nɛ wa ná nɔ mi mami kaa Abosiami maa tu fo kɛ je wa he.​—Kane Yakobo 4:7.

12. Mɛni blɔ nɔ nɛ gbogboehi a si tlemi ɔ he hɛ kɛ nɔ fɔmi nɛ Hiob ngɛ ɔ wo lɛ he wami?

¹² E sa nɛ wa ná hemi kɛ yemi nɛ e mi wa ngɛ gbogboehi a si tlemi ɔ mi. Kaa bɔ nɛ wa na ngɛ ní kasemi nɛ sɛ enɛ ɔ hlami ɔ mi ɔ, behi fuu, Satan bɔɔ mɔde kaa e ma ha nɛ waa ye gbenɔ gbeye, konɛ wa kpa Yehowa anɔkuale yemi. Ngɛ Hiob sane ɔ mi ɔ, Satan tsɔɔ kaa Hiob maa ngmɛɛ nɔ́ fɛɛ nɔ́ nɛ e ngɛ ɔ he, nɛ e ma kpa Yehowa po sɔmɔmi konɛ e kɛ he e yi wami. Satan susumi ɔ dɛ kulaa. Benɛ níhi a mi wa ha Hiob nɛ e miɔ nɛ e ma gbo po ɔ, e ya nɔ nɛ e ye Yehowa anɔkuale. Nɔ mi mami nɛ e ngɛ kaa Yehowa peeɔ nɔ kpakpa, kɛ hɛ kɛ nɔ fɔmi nɛ e ngɛ kaa nyagbenyagbe ɔ, Yehowa ma dla níhi tsuo ɔ ye bua lɛ nɛ e fĩ si. Hiob ngɛ hemi kɛ yemi kaa ke Yehowa tsu we e sane ɔ he ní nɛ e gbo po ɔ, e ma tle lɛ si hwɔɔ se. Hiob he ye kaa gbogboehi a si tlemi ɔ ji nɔ́ nitsɛ. Ke wa na gbogboehi a si tlemi ɔ kaa nɔ́ nitsɛ ɔ, wa be wa hemi kɛ yemi ɔ he ngmɛɛ ke a ngɛ wa he gbeye woe kaa a maa gbe wɔ po.

13. Mɛni he je nɛ e sa nɛ wa hɛ nɛ hi níhi nɛ Satan kɛ tsu ní ngɛ Hiob sane ɔ mi ɔ nɔ ɔ?

¹³ E sa nɛ wa yo Satan ga tsɔmihi nɛ e kɛ tsu ní ngɛ Hiob blɔ fa mi ɔ, ejakaa e ngɔɔ níhi kaa jã kɛ baa wa nɔ mwɔnɛ ɔ. Mo susu Satan nya pomi ɔ he nɛ o hyɛ, e de ke: “Nɔ́ tsuaa nɔ́ nɛ ngɛ nɔ ko dɛ ɔ, [tsa pi Hiob pɛ] e ma nyɛ ngɔ kɛ ha, ke e yi ma na wami kɛkɛ ɔ.” (Hiob 2:4, 5) Lɔ ɔ Satan ngɛ tsɔɔe kaa suɔmi nɛ wa ngɛ kɛ ha Yehowa Mawu ɔ ji wa tsui mi, nɛ ke wa wami ya je oslaa mi ɔ, wa ma kua lɛ. Satan ya nɔ nɛ e tsɔɔ kaa Mawu sume wɔ, nɛ e nɛ́ mɔde nɛ wa ngɛ bɔe kaa wa maa pee níhi nɛ sa e hɛ mi ɔ. Akɛnɛ wa le nɔ́ nɛ Satan ngɛ hlae nɛ e pee he je ɔ, wa he we e lakpa munyu nɛ ɔmɛ yi.

14. Mɛni nɛ kahi ma nyɛ maa ye bua wɔ nɛ wa yɔse ngɛ wɔ nitsɛmɛ wa he? Mo ha enɛ ɔ he nɔ hyɛmi nɔ́.

¹⁴ E sa nɛ waa na kahi kaa he blɔ nɛ wa ná nɛ waa kɛ maa kase ní komɛ ngɛ wɔ nitsɛmɛ wa he. Kahi nɛ Hiob kɛ kpe ɔ ye bua lɛ nɛ e yɔse e gbɔjɔmi komɛ nɛ e tsu a he ní. Kaa nɔ hyɛmi nɔ́ ɔ, e kase kaa e sa nɛ e ba e he si wawɛɛ. (Hiob 42:3) Wɔ hu wa ma nyɛ maa kase níhi fuu ngɛ wa he ke waa kɛ ka ngɛ kpee. Hiɔ nɛ nya wa ko ngɛ nyɛminyumu ko nɛ a tsɛɛ lɛ ke Nikolay * nya gbae. Se ngɛ enɛ ɔ tsuo se ɔ, a wo lɛ tsu. E de ke: “Tsu womi ngɛ kaa X-ray machine. E haa nɛ o naa su komɛ nɛ e sa nɛ o bɔ he mɔde.” Ke wa nyɛ nɛ wa yɔse wa gbɔjɔmi ɔmɛ ɔ, wa ma nyɛ ma tsu a he ní.

15. Mɛnɔ nɛ e sa nɛ waa bu lɛ tue, nɛ mɛni he je?

¹⁵ E sa nɛ waa bu Yehowa tue, se pi wa he nyɛli ɔmɛ. Hiob bu tue saminya benɛ  Yehowa kɛ lɛ tu munyu ɔ. Mawu kɛ Hiob susu níhi a he, nɛ e bi lɛ ke: ‘Anɛ o na he wami nɛ i kɛ bɔ níhi ɔ lo? I le níhi nɛ ba o nɔ ɔ tsuo. O susu kaa i be nyɛe nɛ ma ye bua mo lo?’ Hiob hɛ sa ní kpakpahi tsuo nɛ Yehowa pee kɛ ha lɛ ɔ, nɛ e je he si bami mi kɛ ha sane bimi ɔmɛ a heto. E de ke, “Jamɛ a be ɔ, níhi nɛ nihi de mi ngɛ o he kɛkɛ lɛ i le, se amlɔ nɛ ɔ lɛɛ i na mo paa kɛ imi nitsɛ ye hɛngmɛ.” (Hiob 42:5) Eko ɔ, benɛ Hiob tu munyu nɛ ɔmɛ ɔ, loloolo ɔ, e hii si ngɛ la zu mi, pahi ngɛ e nɔmlɔ tso ɔ he tsuo, nɛ e bimɛ ɔmɛ ngɛ yɔkɔ ɔ mi. Se kɛ̃ ɔ, Yehowa ha nɛ Hiob ná nɔ mi mami kaa e suɔ lɛ nɛ e bua jɔ e he.​—Hiob 42:7, 8.

16. Kaa bɔ nɛ a tsɔɔ ngɛ Yesaya 49:15, 16, mɛni nɛ e sa nɛ e hi wa juɛmi mi ke waa kɛ kahi ngɛ kpee?

¹⁶ Mwɔnɛ ɔ hu ɔ, nihi ma nyɛ ma jɛ wɔ, nɛ a kɛ wɔ maa hi si kaa nɔ́ nɛ wa he hia we. Eko ɔ, a maa bɔ mɔde kaa a maa gbe wa he guɛ aloo a maa gbe asafo ɔ he guɛ, nɛ a maa “tu lakpa munyu yayami slɔɔtohi kɛ si” wɔ. (Mat. 5:11) Hiob sane ɔ ha nɛ wa na kaa Yehowa Mawu ngɛ nɔ mi mami kaa wa maa ya nɔ nɛ wa maa ye lɛ anɔkuale ke waa kɛ kahi ngɛ kpee. Yehowa suɔ wɔ, nɛ e be nihi nɛ a ngɔɔ a hɛ kɛ fɔɔ e nɔ ɔ kuae kɔkɔɔkɔ. (Kane Yesaya 49:15, 16.) Koo ngɔ o juɛmi kɛ ma he guɛ gbemi munyuhi nɛ Mawu he nyɛli tuɔ ɔ nɔ! James nɛ e ngɛ Turkey nɛ e weku ɔ kɛ kahi fuu kpe ɔ de ke: “Wa yɔse kaa ke wa buɔ lakpa munyuhi nɛ a tuɔ kɛ siɔ Mawu we bi tue ɔ, e ma jɔ̃ wa kɔni mi. Lɔ ɔ he ɔ, wa ngɔ wa juɛmi kɛ ma Matsɛ Yemi ɔ he hɛ kɛ nɔ fɔmi nɛ wa ngɛ ɔ nɔ, nɛ wa yaa nɔ nɛ wa peeɔ babauu ngɛ Yehowa sɔmɔmi  mi. Enɛ ɔ ha nɛ wa ngɛ bua jɔmi.” Kaa bɔ nɛ Hiob pee ɔ, wɔ hu wa buɔ Yehowa tue. Lakpa munyuhi nɛ wa he nyɛli tuɔ ɔ be nyɛe ma puɛ hɛ kɛ nɔ fɔmi nɛ wa ngɛ ɔ.

17. Mɛni o kase ngɛ nyumuhi kɛ yihi anɔkualetsɛmɛ nɛ a wo a ta ngɛ Hebri Bi yi 11 ɔ a nɔ hyɛmi nɔ́ ɔ mi?

¹⁷ Yehowa sɔmɔli nɛ a ya nɔ nɛ a pee kã benɛ a kɛ kahi ngɛ kpeɔ a kpɛti nɔ kake ji Hiob. Ngɛ sɛ womi nɛ bɔfo Paulo ngma kɛ ya ha Hebri Bi ɔmɛ mi ɔ, e tu ni kpahi fuu a he munyu nɛ e tsɛ mɛ ke “odasefohi babauu nitsɛnitsɛ.” (Heb. 12:1) Mɛ tsuo a kɛ kahi nɛ a mi wa kpe, se a ya nɔ nɛ a ye Yehowa anɔkuale ngɛ a si himi mi. (Heb. 11:36-40) Anɛ si nɛ a fĩ kɛ a mɔde bɔmi ɔ pee yaka lo? Dɛbi kulaa! E ngɛ mi kaa ngɛ a si himi mi tsuo, a nɛ́ Mawu si womi ɔmɛ a mi bami mohu lɛɛ, se a ya nɔ nɛ a ngɔ a hɛ kɛ fɔ Yehowa nɔ. Nɛ akɛnɛ a le kaa Yehowa kplɛɛ a nɔ he je ɔ, a ngɛ nɔ mi mami kaa a maa na si womi ɔmɛ a mi bami. (Heb. 11:4, 5) A nɔ hyɛmi nɔ́ ɔ ma nyɛ maa wo wɔ he wami nɛ waa ya nɔ nɛ waa ngɔ wa hɛ kɛ fɔ Yehowa nɔ.

18. Mɛni nɛ o fia o pɛɛ si kaa o maa pee? (Hebri Bi 11:6)

¹⁸ Mwɔnɛ ɔ, níhi ngɛ puɛe kulaa ngɛ je nɛ wa ngɛ mi nɛ ɔ mi. (2 Tim. 3:13) Satan ngmɛɛ we Mawu we bi a he, e yaa nɔ nɛ e kɛ kahi baa a nɔ. Ngɛ nyagbahi nɛ waa kɛ maa kpe hwɔɔ se ɔ tsuo se ɔ, nyɛ ha nɛ waa fia wa pɛɛ si kaa wa ma tsu babauu kɛ ha Yehowa, nɛ waa ngɔ “wa hɛ kɛ fɔ Mawu hɛ kalɔ ɔ nɔ.” (1 Tim. 4:10) Nyɛ ha nɛ wa kai kaa nɔ́ nɛ Mawu pee kɛ ha Hiob ɔ tsɔɔ kaa “Yehowa mi mi hi wawɛɛ nɛ e ji mɔbɔ nalɔ.” (Yak. 5:11) Kaa bɔ nɛ Hiob pee ɔ, nyɛ ha nɛ waa ya nɔ nɛ waa ye Yehowa anɔkuale nɛ wa ná nɔ mi mami kaa e maa jɔɔ “nihi nɛ a ngɛ e se blɔ hlae wawɛɛ” ɔ.​—Kane Hebri Bi 11:6.