1. (a) Yehova umiyo iwa genogen ma kani? (b) ‘Nigeno Yehova thelembene tie ang’o? (Nen “Koro i wec.”)

 YEHOVA umiyo genogen ma ber ni dhanu ceke m’umare. Ceng’ini eni ebidaru remokum, can, man tho. (Nyu. 21:3, 4) Ebikonyo “ju ma mol” ma gigene nidwoko ng’om udok ni paradizo. (Zab. 37:9-11) Bende, ebiketho ng’atuman m’i kindwa ubed ku winjiri ma ceng’ini kude, ma winjirine bibedo ber nisagu ma watie ko kawoni. Eno tie genogen ma ber mi tuko nia! Dong’ lembang’o m’uketho cwinywa tek nia Mungu bipong’o lembe m’eng’olo? Yehova pong’o lembang’ola pare kwa. Pieno, watie kud ukungu mandha mi ‘geno Yehova.’ * (Zab. 27:14) Wanyutho nia wagene, nwang’u wabekuro ku cirocir man kud anyong’a nindo m’ebipong’o i iye lembang’ola pare.​—Isa. 55:10, 11.

2. Yehova udaru timo ang’o?

² Yehova udaru nyutho nia etie ng’atu ma pong’o lembang’ola pare. Wakewec iwi laporne moko acel. I buku mi Lembanyutha, Yehova ung’olo nia i rundi mwa eni, ebidiko dhanu mi thek ceke, mi suru man dhok kara gitim ire i acel. Biblia ulwong’o ungu mi dhanu maeno nia “udul ma dit.” (Nyu. 7:9, 10) Kadok ungu maeno uketho i iye dhanu ma tung’ tung’ i wang’ ng’om zoo  calu ve, jumaco, jumamon, man awiya de, re ceke gitie juruot acel m’ubekwo ku kwiyocwiny i kindgi. (Zab. 133:1; Yoh. 10:16) Dhanu maeno gitie bende jurwey lembanyong’a ma weg amora. Gitie saa ceke ayika niweco pi genogen migi mi ng’om ma ber ku ng’atu moko ci ma biwinjogi. (Mat. 28:19, 20; Nyu. 14:6, 7; 22:17) Tek itie acel m’i kind udul ma dit, m’umbe jiji genogen mi lembe ma ber m’ubebino utie iri gin ma pire tek.

3. Lembakeca pa Sitani tie ang’o?

³ Wonabali ubemito ngo ibed ku genogen pi nindo m’ubino. Lembakeca pare utie ya iyii nia Yehova ubedieng’ ungo piri man nia ebipong’o ngo lembang’ola pare. Tek Sitani uketho wabayu genogen mwa, e amora mwa de bithum man waromo weko kadok nitimo ni Yehova. Calu ma wabineno, Wonabali upimo ninyotho genogen pa Yob man niketho ewek nitimo ni Yehova.

4. Wabiweco iwi lembang’o i thiwiwec maeni? (Yob 1:9-12)

⁴ I thiwiwec maeni, wabiweco iwi bodho ma Sitani utiyo ko pi nidiyo Yob kara enyoth gwoko bedoleng’ pare. (Som Yob 1:9-12.) Wabiweco bende iwi ponji ma wacopo nwang’u kud i lapor pa Yob man iwi thelembe m’ukwayu wapoy nia Mungu umaruwa man nia ebipong’o lembang’ola pare.

5-6. Lembang’o m’unwang’u Yob i kind nindo ma nok kende?

⁵ Kwo ubino ma ber ni Yob. Ebino ku winjiri ma ceng’ini ku Yehova. Juruot pare ubino lee man gibino kwo kud anyong’a, bende jamcinge de bedo lee. (Yob 1:1-5) Re i nindo acel kende ci, Yob ubayu kago piny pare ceke. Mi kwong’o, lonyo pare unyothere. (Yob 1:13-17) I ng’eye, awiya pare ceke utho. Kepar nyanok pi peko maeno. Tho pa nyathin acel kende ci timo jurunyodo rac. Kawoni kelund ipar can ku litho ma Yob ku min ot pare ginwang’u kinde ma giwinjo nia awiya migi apar ceke utho. M’umbe jiji, Yob uyeco bongu mi kume man erwombere i ng’om!​—Yob 1:18-20.

⁶ I ng’eye Sitani udok ulokere i kum yob man egoye ku remokum ma rac. (Yob 2:6-8; 7:5) I wang’e Yob ubino ng’atu mir awora mi tuko ngo. Dhanu ubed ubino i bang’e pi nisayu juk. (Yob 31:18) Re kawoni gilal kud i kume. Umego pare de giwenje, jurimbe ma ceng’ini man kadok jurutic mi ot pare de gidolo cing’gi cen kud i kume!​—Yob 19:13, 14, 16.

7. (a) Yob ugeno nia masendi pare uai kakani, man ke etimo ngo ang’o? (b) Jakristu copo nyego nenedi ku kit peko m’urombo ku m’ubenen i cal no?

⁷ Sitani umito Yob ugen nia ebeneno can pilembe enyayu ng’eicwiny i Mungu. Ku lapor, Sitani uketho yamu ma dit urungo ot m’awiya apar pa Yob gibino camu i iye karacelo. (Yob 1:18, 19) Eketho mac uai kud i polo ubin unyotho udul leya pa Yob man bende jurutic m’ubino kwayugi. (Yob 1:16) Calu ma yamu ku mac uai kud i polo, Yob ugeno nia Yehova re m’uorogi. Eno uketho enwang’u nia edaru timo lembe moko m’unyayu ng’eicwiny i Yehova. Re kadok kumeno de, Yob ukwero nilamu Mungu. Eng’eyo nia pi oro dupa Yehova umiyo ire piny dupa ma beco. Pieno eparu nia kan ejolo kud anyong’a piny ma beco m’emiyo ire,  ecikere nijolo bende lembe ma reco m’uwok i wiye; uketho eyero kumae: “Mugisa bed kum nying’ Yehova.” (Yob 1:20, 21; 2:10) Kadok nwang’u lonyo pa Yob unyothere, awiya pare utho man remo ugoye de, re asu ecungo ma tek. Ento fodi wang’ Sitani ni kume.

8. Sitani udok utiyo ku bodho mange ma kani?

⁸ Sitani udok utiyo ku bodho mange; ecwalu dhanu adek ma giwacu nia gi jurimb Yob pi niketho Yob uwinjere nia tije mbe. Dhanune giyero nia Yob ubeneno can pilembe etimo lembe dupa ma reco. (Yob 22:5-9) Gitimo bende tego kara eyi nia kadok etie ngo jatimrac de, kero ceke m’ebetimo pi ninyayu anyong’a i Mungu utie mananu. (Yob 4:18; 22:2, 3; 25:4) I andha gibino ketho Yob upar nia Mungu umare ngo, ebedieng’ de ngo kude, man nia ebesendere mananu nitimo ire. Wec migi nang’ romo ketho Yob nwang’u nia genogen umbe i lembe m’ebekedhu kud i iye.

9. Ang’o m’ukonyo Yob nibedo tek man ku tegocwiny?

⁹ Kepim niparu lembuno. Yob ubedo i vuru ma kume uberemo. (Yob 2:8) Jurimbe ubeweko ngo niyero nia etie dhanu ma tije mbe man nia gin moko m’etimo ma cuu acel de mbe. Peko pare ubenure ve cana, man adundene uberemo pir awiya pare m’utho. I acaki Yob ukeubedo ling’. (Yob 2:13–3:1) Ento tek jurimbe giparu nia bedoling’ pa Yob ubenyutho nia eweko Jacwic pare, eca nang’ giwondiri. Copere nia pi kare moko Yob uting’o wang’e malu eneno jurimbe man ewacu kumae: “Abicoro bedocu para cen ungo kud i kuma ma ram abitho ko!” (Yob 27:5) Ang’o m’ukonyo Yob nibedo tek man ku tegocwiny kadok nang’ ebino sendere de? Kadok nang’ cwinye utur de,  ebino ku genogen nia Mungu pare ma Jamer bidaru masendi pare. Eng’eyo nia Yehova bicere kadok etho de.​—Yob 14:13-15.

10. Kpawa pa Yob ubeponjowa ku lembang’o?

¹⁰ Kpawa pa Yob ubeponjowa nia Sitani copo diyowa ngo adiya niweko Yehova man nia Yehova ke ung’eyo lembe ceke m’ubetimere. Lembe ma Yob ukadhu kud i iye copo konyowa bende ninyang’ cuu i thelembe m’uketho wabesendara. Wakenen ponji moko ma waromo nwang’u i kum lapor pa Yob.

11. Ka wabemedara nigeno Yehova, cwinywa copo bedo tek i kum lembang’o? (Yakobo 4:7)

¹¹ Yob unyutho kamaleng’ nia ka wabemedara nigeno Yehova, wacopo ciro kit peko moko ci man waromo voyo abidhe pa Sitani. Ka dong’ i ng’eye ke? Lembangora wacu nia Wonabali biringo bor kud i kumwa.​—Som Yakobo 4:7.

12. Genogen mi cer umiyo tego nenedi i kum Yobi?

¹² Ukwayu wamok kii i kum genogen mi cer. Calu ma waneno i thiwiwec m’ukadhu, Sitani betiyo ku lworo mi tho kara wawek nigwoko bedoleng’ mwa ni Yehova. Egam ewacu nia Yob bitimo lembe moko ci, kadok weko timo ni Mungu kara ebed kwo. Sitani uwondere mi tuko de ngo. Kadok kinde ma Yob uneno nia andha ecopo tho de, re asu ekwero nituro cik pa Mungu. Tegocwiny m’ebino ko iwi Yehova pi bero pare man genogen ma tek m’ebino ko i iye ukonye niciro. Yob ubino ku yiyoyic nia ka Yehova udaru ngo peko pare ma fodi ekwo de, ebicere i nindo m’ubino. Ebino ku genogen nia cer bibedo nuti andha. Ka wan de watie ku genogen ma kumeno, wabiweko ngo Yehova kadok i wang’ tho de.

13. Pirang’o wacikara nibedo ku wang’wa i kum bodho ma Sitani utiyo ko pi nimulo i Yob?

¹³ Wacikara nibedo ku wang’wa lee i kum bodho ma Sitani utiyo ko pi nimulo i Yob, kum ebetiyo ku bodho ma rom tin eni. Sitani ukelo adote ma e: “Gin ceke ma dhanu [Yob kende ngo] bedo ko ebimiyo pi kwo pare.” (Yob 2:4, 5) I andha, Sitani uwacu nia wamaru ngo Yehova Mungu, man ka lembe moko uwok waromo weke kara wabodh kwo mwa. Sitani uyero bende nia Mungu de umaruwa ngo man nia ebeneno ngo kero ma wabetimo pi ninyayu anyong’a i iye. Calu ma dong’ wang’eyo pi bodho pa Sitani, wan ma wageno Yehova, wabiweko ngo ewingwa ku bodho parene.

14. Peko copo ketho wang’eyo lembang’o i wiwa giwa? Kemii lapor moko.

¹⁴ Ukwayu wanen peko ma watie ko ni yo mi nwang’u ponji i kumwa giwa. Peko ma Yob unwang’ere ko ukonye ni ng’iyo ng’ico m’ebino ko man niyikogi. Ku lapor, enwang’u nia ukwayu enyuth jwigiri lee i kwo pare. (Yob 42:3) Wan bende waromo nwang’u ponji lee i wiwa giwa ka wabenwang’ara ku peko. Umego moko ma nyinge Nikolay, * ma jutwiyo i kol ma ke nwang’u ebino remo, uyero kumae: “Nindo m’atimo i ot kol ukonya nineno kite ma tung’ tung’ m’abino ku yeny mi timo alokaloka i igi.” Ka waneno nia watie ku ng’ico moko, waromo timo tego nikabe.

15. Ukwayu wawinj ng’a, man ke pirang’o?

¹⁵ Ukwayu wawinj Yehova, judegi mwa re ngo. Yob ugam uketho wiye kilili  kinde ma Yehova ubeweco kude. Mungu unyamu i lembe ku Yob. I ayi moko ve ebino yero ire kumae: ‘Nyo ibeneno de tego mi cwic para? Ang’eyo lembe ceke m’inweng’iri ko. Iparu nia acopo dieng’ kudi ngo?’ Yob udwoko lembe ni Yehova ku jwigiri man ku foyofoc pi bero pare. Ewacu kumae: “Naka awinjo piri ku winj mi ith; ento kawono wang’a neni.” (Yob 42:5) Kinde ma Yob ubino yero wec maeno, ubenen nia nwang’u fodi asu ebedo i vuru, kume ukwot ku vur man can n’i iye pir awiya pare m’utho. Kadok kumeno de, Yehova unyutho ire nia emare man nia anyong’a nege pire.​—Yob 42:7, 8.

16. Nimakere kud Isaya 49:15, 16, wacikara nigwoko ang’o i wiwa kinde ma wa n’i peko?

¹⁶ Tin de dhanu copo cayuwa man giromo tiyo kudwa calu ve tijwa mbe. Gicopo ii nicido nyingwa man nying’ dilo mwa ma nwang’u ‘gibecwayu vupo i wiwa man gibeyero kwond lembe ma tung’ tung’ ma reco.’ (Mat. 5:11) Kpawa pa Yob ubeponjowa nia Yehova ung’eyo nia wabigwoko bedoleng’ mwa ire kinde ma wabenwang’ara ku peko. Yehova umaruwa man ebiweko ngo ju m’ugene. (Som Isaya 49:15, 16.) Kud icik ithi i kum wec moko ci mi vupo ma judegi pa Mungu gibemewo! Umego James mi ng’om mi Turquie ma juruot pare unwang’iri ku peko ma tung’ tung’ uyero kumae: “Wanwang’u nia niwinjo vupo ma jubemewo iwi dhanu pa Mungu romo turo cwinywa. Pieno waketho wiwa zoo i kum genogen mi Ker pa Mungu man wamedara  ku tic pa Yehova. Lembuno uketho wabayu ngo anyong’a mwa.” Calu Yob, wawinjo mwa Yehova! Vupo mi judegi mwa nyotho ngo genogen mwa.

17. Inwang’u ponji ma kani i kum lapor mi weg yiyoyic ma juweco pigi i Juebrania thek 11?

¹⁷ Yob utie acel m’i kind jurutic pa Yehova dupa ma gibedo ku tegocwiny man gicungo ma tek i wang’ amulaic. I barua ma Paulo ukiewo ni Juebrania, eweco pi dhanu mange dupa, elwong’ogi nia “afuru ma dit . . . mi jumulembe.” (Ebr. 12:1) Gin ceke gikadhu kud i peko ma dongo; re asu gigwoko bedoleng’ migi ni Yehova. (Ebr. 11:36-40) Nyo cirocir ma ginyutho man tic ma tek ma gitimo ubedo mi mananu? Ungo nyanok de! Kadok nwang’u i nindo mi kwo migi gineno ngo pong’o mi lembang’ola pa Mungu ceke de, re gimediri nigeno Yehova. Bende, calu ma ging’eyo nia ginwang’u bero i wang’ Yehova, cwinygi bedo tek nia lembe ceke m’eng’olo bitimere. (Ebr. 11:4, 5) Lapor migi copo miyo tego i kumwa kara wamedara nigeno Yehova.

18. Itie ku lembakeca mi timo ang’o? (Juebrania 11:6)

¹⁸ Tin wabekwo i ng’om m’ubemedere ameda nidoko rac. (2 Tim. 3:13) Sitani fodi ujigo ngo niketho dhanu pa Mungu i amulaic. Kadok wabinwang’ara kud amulaic ma nenedi i wang’wa de, wek wabed ku lembakeca ma watim ko ni Yehova ku tego mwa ceke man wabed ku tegocwiny nia “waketho genogen mwa i Mungu ma kwo.” (1 Tim. 4:10) Poy nia mugisa ma Mungu umiyo ni Yob ubenyutho “nia Yehova utie jamer lee man e jakisa.” (Yak. 5:11) Dong’ wan de wamedara nigwoko bedoleng’ mwa ni Yehova man wabed ma cwinywa tek nia ebimiyo sukulia “ni dhanu m’ubeyenye ku cwinygi ceke.”​—Som Juebrania 11:6.