1. (1) Pafelian ni Yihofa kita to manan a hatokel? (2) ‘Halamham ci Yihofaan’ o manan ko tatodong? (Nengnengen ko Sapitadtad a Sowal.)

 PAFELIAN ni Yihofa ko polong maolahay Cingranan a tamdaw to makapahay hatokel. Kalikito, papalahdawen Ningra ko adada, roray ato patay. (Paˈarawan 21:3, 4) Pafelien Ningra ko halamhamay Cingranan a tamdaw tonini a sera, hanaca padama tonini ‘misamimingay ko falocoˈ a tamdaw’ palo lakoing toniya cikiw. (ˈOlic 37:9-11) Ngaˈay kita anini miingid ci Yihofaan, pairaayto lipahak ita, kawra noikor papatongalen ni Yihofa ko kangaˈay no kalalaˈed ita Cingranan. Tada o makapahay a hatokel konini! Kawra hano ngaˈay pakasoˈlin kita o papalaˈosien no Kawas konini a sakiˈok Ningra hani? Samanen cowa pisamangah ci Yihofa. Iraay ko lalangian ita ‘halamham ci Yihofaan.’ * (ˈOlic 27:14) Pairaen ita ko lipahakay, mihadidi a mitala mamisaheci ko Kawas a palaˈosi to araaw Ningra, mihaen o halamhamayto Cingranan.—Isaya 55:10, 11.

2. Maharekayto ci Yihofa palaˈosi to maanan a sakiˈok hani?

² Maharekayto ci Yihofa misawacay to mitooray to sowal a midemak a Kawas ko Niyah. Nengnengen ko ihkalay a tinakoan. Itini Paˈarawan mikiˈokay ci Yihofa, itini romiˈad ita mamikitini Cingra i kasafinacadan, kasangasaw, kasasiroma no sowal misaˈopo to tamdaw, mikelec a palacecay cangranan midoko Cingranan. Anini onini a ‘taˈangayay ˈopo a tamdaw’ soˈlinay a masadak! (Paˈarawan 7:9, 10) Soˈlin itini lalomaˈ nangra iraay ko faˈinayan fafahiyan, matoˈasay kaemangay, kasafinacadan, kasasiroma no sowal ato cowa ka lecad a lalengawan, kawra ngaˈayay cangra makelec a malacecay masasiolah, malecad o paro no lomaˈ. (ˈOlic 133:1; Yohani 10:16) Onini taˈangayay ˈopo a  tamdaw fanekfekay milasil to ngaˈayay lihaf, misongilaˈ misaday pasowal to faelohay a hekal a makapahay hatokel i makahiay mitengil a tamdaw. (Matay 28:19, 20; Paˈarawan 14:6, 7; 22:17) Ano masalalomaˈay no taˈangayay ˈopo a tamdaw kiso, maedeng misalimlaay kiso to makapahay hatokel noikor.

3. Misamacayay ci Satan sapidemakaw to maanan hani?

³ Misamacayay ci Satan sapiˈafasaw to tokel iso, papiharateng tisowanan to cowa ka ciharateng ci Yihofa tisowanan, cowa ko mamidemak to mikiˈokan. Ano pakasoˈlinen ita ci Satan, o mamalahdaw ko timolo ita, hawad sato a midoko ci Yihofaan. Wa minengneng kita, samaanay ci Akoma mihalaka patoled ci Yopuan, telocto misawad a midoko ci Yihofaan.

4. Onini a lalakaw mamilengo to maanan? (Yopu 1:9-12)

⁴ Onini a lalakaw wa minengneng, tano maanan a pakayraan ci Satan miroero ci Yopuan ecato ka madimadi ci Yihofaan. (ˈOsien ko Yopu 1:9-12.) Milengoho ko lalakaw, mikitini taˈarawan ni Yopu ngaˈay mananam ita ko maanan, ato hano haharatengen ita to maolahay ci Yihofa kitaanan, hanaca o mamidemak to mikiˈokan.

5-6. Itini apotoˈay tatokian tahalifaay to maanan a demak ci Yopu?

⁵ Marihadayay a sinoway ko kaˈorip ni Yopu. Tangongolay ko kalawidang ningra ci Yihofaan, rihadayay a malacafay ko paro no lomaˈ ningra. Roma i, tada cihafayay cingra. (Yopu 1:1-5) Kawra lalomaˈ no cecay romiˈad, maedeng malahdaway ko kihcod ningra. Salakat, malahdaway ko hafay ningra. (Yopu 1:13-17) Ikor, mapatayay ko polong a wawa ningra. Haratengen hena, cecay ko mapatayay a wawa no wama wina taˈangayayto ko kasomad, toya romiˈad mafanaˈ ci Yopu ato fafahi oya moetepay wawa mapatayay maemin, hakowaay ko kacekid, kasomad ato katoled nangra! Mansa cicih han ni Yopu ko rikoˈ, mipitoros i sera.—Yopu 1:18-20.

⁶ Dotoc, paadadaan ni Satan ci Yopu to katalawan a adada, pakangodo cingranan. (Yopu 2:6-8; 7:5) Isalakat mikangodoan no tamdaw ci Yopu, pasayraay cingranan ko ˈalomanay tamdaw micangacang to sakayat. (Yopu 29:7, 8, 21) Kawra nohatini miliyasay ko ˈalomanay cingranan, cowa ko salikaka aca ato widang ningra, halo koli ningra mapiliˈayto cingranan.—Yopu 19:13, 14, 16.

7. (1) Micada to pades ko niyah o maanan ko lalangian saan ci Yopu miharateng hani? Kawra manaˈayay cingra midemak to maanan? (2) Nengnengen ko coka, anini o Krisciyang mamisiˈayaw to maanan malecaday a sapalifet alatek?

⁷ Miolatan ni Satan ci Yopu mararaw ko piharateng, micada cingra to adihayay a roray sahtoay cowato ka haydaen ni Yihofa cingra sanay. Tinakoen, malacafay ko moetepay wawa ningra mitahka i, misaka dademakan ni Satan ko ciˈicelay a fali mitelep to lomaˈ mipaekel a mipatay cangranan. (Yopu 1:18, 19) Mitefadanho ni Satan ko namal nai kakarayan, mipatay to siri ato pakaenay to siri ni Yopu a sikawdan. (Yopu 1:16) Fahal sanay ira a fali ato namal sahtoay o cowa ko matatodongay a demak konini, mansa miharateng ci Yopu onini a pades maedeng ci Yihofa ko midemakay saan. Telocto, miharateng ci Yopu maedeng o pakararaway ko niyah ci Yihofaan saan. Soˈlin mahaen, manaˈayay ci Yopu a mapoˈi to kakarayan Wama. Harateng ni Yopu halafinay a mihecaan adihayay ko malifokay no niyah a sapalemed ni Yihofa, o mamakahi a micada to pades saan. Sanay cingra: ‘Nanay mapadotoc a mapakahemek ko ngangan ni Yihofa.’ (Yopu 1:20, 21; 2:10) Soˈlin malahdaway ko hafay, wawa ato tanektek no tireng ni Yopu, kamayan padotoc a madimadi ci Yihofaan. Kawra, cowa pisawad ci Satan misamsam cingranan.

8. Dotoc ci Satan tano manan a pakayraan midokaˈ ci Yopuan?

 ⁸ Dotoc miocoran ni Satan ko tatolo a tamdaw midokaˈ to falocoˈ ni Yopu. Oniya tatoloay makaniway a widang sanay ko sowal, madeng adihayay ko midemakan ni Yopu a tatiihay a demak, mansa tahalifa tonini kihcod a pades. (Yopu 22:5-9) Sanayho cangra, soˈlin cowa pidemak cingra to tatiihay a demak, cowa ko mamilifok to pihayda no Kawas, samanen ano hakowato ko midemakan ningra saki Kawas, awaay ko kapo saan ko Kawas. (Yopu 4:18; 22:2, 3; 25:4) Papiharatengay cangra ci Yopuan cowa kaolah ko Kawas cingranan, cowa ko mamidimokos cingranan, hanaca midoko to Kawas awaay ko epoc. Ano pakasoˈlin ci Yopu to hatiniay a sowal, o pakayraan no niyah madeng awaayto ko hatokel wa saan miharateng.

9. Ci Yopu hano ngaˈay timolo a tanektek hani?

⁹ Haratengen ko pakayraan itiya. Maroˈay ci Yopu itini ˈafoˈafoan, caay ka emem ko adada no tireng. (Yopu 2:8) Soˈlin o adada no kapatay no wawa micinasayho to falocoˈ ningra, o widang ningra mariˈangay a miˈodis to kaˈorip ningra, sapipalakaw to ngangan ningra. O mahaenay a sapalifet malecaday o karetengay a ˈinorong mipaekelay to tireng ningra. Salakat, terep sanay caka somowal ci Yopu. (Yopu 2:13–3:1) Miharateng konini a tatoloay tamdaw awaayto ko hatokel ni Yopu, sapiliyasaw ci Yihofaan ano saan i, tada mararaway cangra. Ikor, micaˈengaway ci Yopu alatek, misamocek minengneng tonini a tatoloay makaniway widang, saan ko sowal: ‘Ano tahirato i patay cowa ko mamifalah kako to madimadi to Kawas!’ (Yopu 27:5) Soˈliˈlin tahalifa to masakenakenaay sapalifet, hano ngaˈayho ci Yopu timolo a tanektek hani? Soˈlin pasangarayto ko kaˈorip ningra, kamayan ira ko hatokel, pakasoˈlin o sidaˈitay a Kawas isalikor o papairato sasayar ningra. Mafanaˈay cingra soˈlin mapatay ko niyah, o papatikolen ni Yihofa paˈorip cingra.—Yopu 14:13-15.

10. O tinakoan ni Yopu mananamay ita ko maanan hani?

¹⁰ O tinakoan ni Yopu mananamay ita, cowa kangaˈay ci Satan pacieci kitaanan miliyas ci Yihofaan, hanaca mafanaˈay ci Yihofa to mifekaday i tireng ita a demak. O nalifetan ni Yopu padamaayho kitaanan cipinang to pina kalimlaan a demak. Dotoc, nengnengen ita ko pina kalimlaan.

11. Ano padadotoc kita mitadiˈec ci Yihofaan, o ngangaˈay pakasoˈlin to maanan hani? (Yakop 4:7)

¹¹ O tinakoan ni Yopu misawacayay, ano padadotoc kita mitadiˈec ci Yihofaan, oha ngangaˈay mihadidi to kihcod a sapalifet, malaˈosi ko picoˈay ci Satanan. Sasamaan ko teloc hani? Sowal no Fangcalay Cudad wa miliyas a milaliw ci Akoma kitaanan.—ˈOsien ko Yakop 4:7.

12. O patikolay maˈorip a hatokel samanay paira to ˈicel ni Yopu?

¹² Oha mamikelec a mitafo kita to hatokel patikol maˈorip. Malecad o masowalay no fafekangay lalakaw, marariday ci Satan misaka dademak to kaciˈangi ita to patay a miroero kitanan, ho ecato ka madimadi kita ci Yihofaan. Sowal ni Satan sapitafoaw to ˈorip no niyah ci Yopu, wa hayi sa kinafalah to kihcod, mifalahho to madimadi no niyah. Mararaway ci Satan. Ci Yopu soˈlin itini pasangaray no kaˈorip a tatokian, itini sakapatayawto ko niyah saan cingra i, cowa pitowakang to Kawas. Pakasoˈlinay cingra o ngaˈayay ci Yihofa, pakasoˈlinayho salikor o papalahdawen ni Yihofa ko kihcod a roray ningra. O pakasoˈlinay falocoˈ ato hatokel ningra padamaay cingranan padadotoc a mihadidi. Pakasoˈlinay ci Yopu, soˈlin itini kaˈoripan ningra a tatokian caka pakaˈaraw tonini a romiˈad, noikor o papatikolen ni Yihofa paˈorip cingra. O patikolay maˈorip a hatokel pakayni ci Yopuan o soˈliˈlinay. Ano o soˈlinay saan kita a minengneng tonini a hatokel, soˈlin micada to saroero ko ˈorip, cowa ko mamifalah kita to madimadi.

13. Hano mamisinanot kita to pakayraan ni Satan miˈodis ci Yopuan hani?

¹³ O sasinanoten ita tano maanan a pakayraan ci Satan miˈodis ci Yopuan, samanen wa tano malecaday a pakayraan cingra miˈodis kitanan. Sinanoten ko sakokot ni Satan, sanay cingra: ‘O tamdaw [cowa ko ci Yopu aca] o niyah aca ko miharatengan, wa hayi saan mifalah to kihcod a midipot to ˈorip no niyah.’ (Yopu 2:4, 5) O sowal ni Satan, cowa ko soˈlinay kita maolah ci Yihofaan, ano ira ko katalawan no ˈorip, o mamiliyasto kita Cingraanan. Roma i, somowalayho ci Satan cowa ka olah ko Kawas kitanan, cowa ko mamisalimla to kihcod nano demak ita Cingraanan. Ano mafanaˈay to pakayraan ni Satan, o halamhamay ci Yihofaan a tamdaw cowato ko mamalipalaw no mangah ni Satan.

14. O sapalifet ngaˈay patalahkal to maanan? Tano tinakoan mitadtad.

¹⁴ O sapalifet o sakacipinangaw ita to niyah a toki han ko pinengneng. O malifaay ni Yopu a sapalifet padamaay cingranan mihapinang to dangoc no niyah, padamaayho cingranan a mafalic. Tinakoen, mahapinangay ningra mamitongal a misapoener ko niyah. (Yopu 42:3) Ano tahalifa kita to sapalifet i, wa matongal ko kacipinang to niyah. O cecay faˈinayan salikaka ci Nikora * iraay ko mahaenay a nalifetan. Soˈlin pakidemay ko adada no tireng ningra, kamayanho pakayni i pihakelongan a mapalit. Sanay cingra: “O kapalitan malecaday to X-kowang, ngaˈayay patalahkal to kemoday a capeling no Krisciyang.” Ano mahapinang ita ko dangoc no niyah, oha mamisaˈicel a misalof.

15. O nima a sowal ko tatengilen ita hani? Misamaanay?

¹⁵ O sowal ni Yihofa ko tatengilen ita, cowa ko sowal no ˈada. Pasowal ci Yihofa ci Yopuan i, misinanotay ci Yopu mitengil. Tano  adihayay a salicay ci Yihofa papiharateng ci Yopuan, malecaday o milicayay Cingra ci Yopuan: ‘Maˈaraway iso ko taˈangayay a ˈicel Ako misangaˈ to maamaan han? Mafanaˈay Kako to mifekaday kihcod a demak i tireng iso, awaay ko pakayraan Ako midimokos tisowanan sanay kiso miharateng han?’ Maherek ci Yopu mitengil misapoenerayto ko falocoˈ, mahapinangay ningra tada ngaˈayay ci Yihofa, matomesayto ko miakoˈiday a falocoˈ. Sanay ci Yopu: ‘Isalakat matengilay ako ko nano demak Iso, maˈarawayto ako Kiso nohatini.’ (Yopu 42:5) Somowal ci Yopu tonini a sowal i, maroˈayho itini i ˈafoˈafoan alatek, o dokaˈ no tireng cowaho ka adah, o somad pakayni kapatay no wawa cowaho ka sayar. Soˈliˈlin cowaho ka taˈlif ko sapalifet ni Yopu, kawra maherekayto ci Yihofa paihkal to maolahay ko Niyah ci Yopuan, mihaydaayho cingranan.—Yopu 42:7, 8.

16. Mikitini Isaya 49:15, 16, ano misiˈayaw kita to sapalifet i, haharatengen ko maanan hani?

¹⁶ Malecaday anini, misamsamay ko roma tamdaw kitanan alatek, awaay ko kapo ita saan minengneng. Mitonganganayho cangra kitanan ato likakawa ita, ‘tano masakenaay tatiihay a sowal mipaoraf’ kitaanan. (Matay 5:11) O tinakoan ni Yopu pahapinangay kitaanan, pakasoˈlinay ci Yihofa kitaanan, pakasoˈlin itini sapalifet o mamadimadi kita Cingranan, padadotoc halamham Cingranan. Tada maolahay ci Yihofa kitaanan, cowa ko mamifalah kitaanan. (ˈOsien ko Isaya 49:15, 16.) O mamidokaˈ kitanan a sowal no ˈada no Kawas, cowa ko tatengilen ita! Cecay faˈinayan salikaka ci Canmos itiniay i Tureki, o paro no lomaˈ nangra na misiˈayaway to pakidemay a sapalifet, sanay cingra: “Cipinangay kami, ano tengilen niyam ko pakayniay finawlan no Kawas a mangah, o  mamatoled ko falocoˈ. Mihaenay misamacayay kami to hatokel no Hongti Kitakit, hanaca misaˈicel matayal saki Yihofaan. Mihaenay ko demak, hato ngaˈayay kami padadotoc a lipahak.” Malecad ci Yopuan, o tatengilen ita ko sowal ni Yihofa, ano mihaen o mangah no ˈada cowato ko papalahdaw to hatokel no mita.

17. Mikitini misowalan no Hipray saka 11 fedengan a madimadiay a sikawdan mananamay iso ko maanan hani?

¹⁷ ˈAlomanay madimadiay sikawdan ni Yihofa na iraay ko timolo itini pakidemay sapalifet padadotoc a mihadidi, o masalalomaˈay a tinakoan ci Yopu. Itini Hipray masowalay no tarokos ci Pawlo ko adihayay ngaˈayay taˈarawan, hanaca pangangan cangraanan to ‘taˈangayay a ˈopo sano toˈemay a misawacayay tamdaw.’ (Hipray 12:1) Na tahasiˈayaway cangra to pasangaray katalawan a demak, kawra padadotocay cangra madimadi to Kawas ci Yihofaan. (Hipray 11:36-40) O pihadidi nangra ato karoray sahtoay awaay ko epoc han? Cowa ka hatira. Itiniho cangra toniya hekal i, soˈlin cowa pakaˈaraw to kalaˈosi no sakiˈok no Kawas, kawra kamayanho padotoc halamham ci Yihofaan. Pakasoˈlinay cangra malifokayto no niyah ko pihayda no Kawas, mansa pakasoˈlin to papakaˈaraw ko niyah to mamalaˈosi maemin ko sakiˈok no Kawas. (Hipray 11:4, 5) O taˈarawan nangra o papaˈicel to pisetek ita to falocoˈ, pakalalok kitaanan padadotoc halamham ci Yihofaan.

18. Mamisetek kiso to falocoˈ samaan ko pidemak? (Hipray 11:6)

¹⁸ Anini, o pakayraan no hekal mangalefay ko tatiih. (2 Timoti 3:13) Padotocay ci Satan paira to pasangaray no finawlan no Kawas. Ano o maananto ko masiˈayaway ita a pasangaray, o mamisetek kita to falocoˈ padadotoc misaˈicel matayal saki Yihofaan, pakasoˈlin o halamhaman ita i ‘o soˈlinay materek a Kawas.’ (1 Timoti 4:10) Haratengen, o sapafeli ni Yihofa ci Yopuan a minaroˈan misawacayay ‘matomesay to damsayay ci Yihofa, hanaca siniˈadaay to tamdaw.’ (Yakop 5:11) Nanay padadotoc kita madimadi ci Yihofaan, pakasoˈlin Cingranan to ‘papalifon to mikifalocoˈay a micangacang Cingranan a tamdaw.’—ˈOsien ko Hipray 11:6.