1. (a) Akka aha do janji na dilehon Jahowa tu hita? (b) Sian dia do tarida na pos rohatta tu janji ni Debata?

 NUNGNGA dilehon Jahowa janjina tu sude halak na makkaholongi Ibana. Satokkin nai, bahenonna ma dang adong be sahit, hasusaan, dohot hamatean. (Pgk. 21:3, 4) Urupanna do haduan akka halak “na lambok roha” mambahen tano on gabe Paradeiso. (Ps. 37:9-11) Dung i lam akrab ma hubungatta tu Jahowa, lobi sian na tahilala saonari. Janji na luar biasa do on. Jala pasti pasauton ni Jahowa do i. Alana sai ditepati Jahowa do akka janjina. Jadi pos ma rohatta ‘paimahon janji ni Debata na mangolu i’. (1 Tim. 4:10) Toktong ma hita sabar paimahon i.​—Jes. 55:10, 11.

2. Paboa ma contoh na patuduhon sai ditepati Jahowa do janjina.

² Nungnga terbukti Jahowa sai menepati janjina. Contohna di bukku Pangungkapon, marjanji do Jahowa mambahen akka halak sian sude bangso, suku, dohot bahasa marsada manomba Ibana. Jala tutu do i masa. Saonari didok ma nasida “punguan bolon”. (Pgk. 7:9, 10) Nang pe ro sian marragam ras, bahasa, dohot latar belakang, alai marsada do nasida songon keluarga. (Ps. 133:1; Joh. 10:16) Ringgas do nasida marbarita na uli. Sai rade do nasida paboahon tu akka halak na olo manangihon molo haduan na lao adong do portibi na dumenggan. (Mat. 28:19, 20; Pgk. 14:6, 7; 22:17) Molo bagian sian punguan bolon do hamu, pasti arga do janji ni Jahowa i di hamu.

3. Aha do na dihalomohon Sibolis?

³ Lomo do roha ni Sibolis asa unang marpos ni roha be hita tu akka janji ni Jahowa. Tujuanna, asa unang porsea  hita na parduli Jahowa tu hita jala na lao pasautonna akka janjina i. Akibatna gabe gale ma haporseaotta jala dang tasomba be Jahowa. Songon i do na hea diulahon Sibolis tu si Job. Berupaya do ibana mambahen si Job dang marpos ni roha be tu akka janji ni Jahowa, asa unang disomba ibana be Jahowa.

4. Aha do na lao tabahas di artikel on? (Job 1:9-12)

⁴ Di artikel on lao tabahas ma akka cara na dipakke Sibolis lao mambahen si Job maninggalhon Jahowa. (Jaha Job 1:9-12.) Tabahas ma muse aha na boi taparsiajari sian teladan ni si Job, jala boasa ikkon pos rohatta na holong do roha ni Jahowa tu hita jala na lao pasautonna akka janjina.

5-6. Aha do na toppu masa tu si Job?

⁵ Mulana sonang do ngolu ni si Job. Togu do hubunganna tu Jahowa, marlas ni roha do keluargana, jala mora hian do ibana. (Job 1:1-5) Alai toppu ma muba situasina. Parjolo, habis ma sude artana. (Job 1:13-17) Paduahon, mate ma sude anakkonna. Coba ma jo pikkirhon on: Molo adong halak, holan sada pe anakna mate, pasti hancur hian do perasaanna. Apalagi ma si Job dohot istrina, sahali mate ma sappulu anakkonna. Jadi wajar do sappe diribak si Job abitna jala hundul ibana di tano alani lungun ni rohana.​—Job 1:18-20.

⁶ Dibahen Sibolis do muse marsahit na parah si Job. Gabe dang sangap be ibana alani sahitna i. (Job 2:6-8; 7:5) Hape sebelumna halak na sangap do si Job di hutana. Jotjot do ro akka halak mangido nasehat sian ibana. (Job 31:18) Alai dung marsahit ibana, gabe mandao do nasida sian ibana. Bahkan keluargana, ale-alena, dohot akka hatobanna pe mandao do sian ibana.​—Job 19:13, 14, 16.

7. (a) Menurut si Job alani aha do ibana susa, alai aha do na so diulahon ibana? (b) Songon dia do situasi ni si Job na dipatudu di gambar boi masa tu halak Kristen saonari?

⁷ Berusaha do Sibolis mambahen si Job porsea ala na muruk do Jahowa tu ibana umbahen na masa sude hasusaan i. Misalna dibahen Sibolis do haba-haba mangaruppakkon jabu ni anakna, gabe mate ma sappulu anakkon ni si Job. (Job 1:18, 19) Dibahen Sibolis ma muse api turun sian langit manutung akka biru-biru ni si Job dohot akka parkarejona. (Job 1:16) Ala sian langit do haba-haba dohot api i, olo do ra didok roha ni si Job sian Jahowa do i. Ujungna gabe dirippu si Job ma adong tindakanna na mambahen muruk Jahowa. Nang pe songon i, dang hea si Job mamburai Jahowa. Diingot ibana do nungnga dapotna godang akka na denggan sian Jahowa saleleng martaon-taon. Jadi didok rohana, molo nungnga dijalo ibana akka na denggan, ikkon jaloonna do tong akka na so denggan. Gabe didok si Job ma, “Sai toktong ma dipuji goar ni Jahowa.” (Job 1:20, 21; 2:10) Nang pe habis arta ni si Job, mate sude anakna, jala marsahit na parah ibana, torus do setia ibana tu Jahowa. Alai dang sae dope disi, dipakke Sibolis do muse cara na asing.

8. Cara aha dope na dipakke Sibolis asa putus asa si Job?

⁸ Dipakke Sibolis do muse tolu dongan ni si Job mandok hata na mambahen ibana merasa dang mararga. Didokkon akka donganna i, susa pe si Job ala godang do diulahon ibana akka na sala. (Job 22:5-9) Didok nasida nang pe halak na burju  si Job, dang boi bahenonna las roha ni Debata. (Job 4:18; 22:2, 3; 25:4) Berupaya do nasida mambahen si Job marpikkir na so holong do roha ni Debata tu ibana, dang parduli Debata tu ibana, jala dang adong gunana manomba Debata. Hata ni nasida i boi mambahen si Job putus asa.

9. Boasa boi songon i togu haporseaon ni si Job?

⁹ Bayakkon ma jo situasi on. Hundul ma si Job di orbuk huhut marlungun ni roha. (Job 2:8) Sai didok akka donganna i ma hata na so denggan taringot si Job, asa porsea si Job dang hea diulahon ibana na denggan. Pasti borat hian do situasi ni si Job tikki i. Hira na ditipa batu na massai borat ma ibana. Hape so mago dope lungun ni rohana ala na mate i akka gellengna. Mulana dang dialusi si Job hata ni akka donganna i. (Job 2:13–3:1) Ala sai sip si Job, olo do ra dirippu halak i nungnga mago be haporseaon ni si Job tu Debata. Alai sala do halak i. Ujungna dialusi si Job ma, “Sappe mate au, toktong do au setia tu Debata!” (Job 27:5) Pasti pos situtu do roha ni si Job tikki mandok hatana on. Boasa boi songon i togu haporseaon ni si Job, hape nungnga borat hian sitaononna? Alana dang hea mago pos ni rohana tu janji ni Debata. Porsea do ibana, bahenon ni Debata parholong i do marujung hasusaanna i. Jala yakin do si Job, molo tung pe ikkon mate ibana, paheheon ni Debata do ibana.​—Job 14:13-15.

10. Aha do na boi taparsiajari sian pengalaman ni si Job?

¹⁰ Sian pengalaman ni si Job taboto ma, dang boi Sibolis mamaksa hita maninggalhon Jahowa. Taboto ma muse, diparrohahon Jahowa do sude na masa tu hita. Pengalaman ni si Job pe mangurupi  hita asa boi mangida hasusaatta sian sudut pandang ni Jahowa. Saonari tabahas ma aha dope na boi taparsiajari sian si Job.

11. Aha ma hasilna molo torus hita porsea tu Jahowa? (Jakobus 4:7)

¹¹ Molo torus hita porsea tu Jahowa, boi ma hita martahan mangadopi hasusaan jala marhasil mangalo Sibolis. Aha ma hasilna? Bibel paboahon, gabe lari ma Sibolis sian hita.​—Jaha Jakobus 4:7.

12. Songon dia do janji ni Jahowa taringot haheheon mangurupi si Job asa toktong setia?

¹² Ikkon pos situtu do rohatta tu janji ni Jahowa taringot haheheon. Songon na tabahas di artikel sebelumna, olo do dipakke Sibolis biar ni rohatta tu hamatean asa unang setia be hita tu Jahowa. Najolo didok Sibolis do pasti ulahonon ni si Job do manang aha pe, bahkan maninggalhon Jahowa, asal ma tetap ibana mangolu. Alai sala do Sibolis! Nang pe dirippu si Job mate nama ibana di tikki i, torus do ibana setia tu Jahowa. Pos do rohana patuduon ni Jahowa do haburjuonna tu ibana, jala sai urupan ni Jahowa do ibana asa boi martahan. Diboto si Job do nang pe ikkon mate ibana, alai paheheon ni Jahowa do ibana haduan. Takkas ma, pos situtu do roha ni si Job tu janji ni Jahowa taringot haheheon. Molo songon si Job do hita, pasti toktong do hita setia tu Jahowa nang pe terancam ngolutta.

13. Aha do na taparsiajari sian hata ni Sibolis taringot si Job?

¹³ Sarupa do cara na dipakke Sibolis tu si Job dohot tu hita saonari. Jadi ikkon manat do hita. Didok Sibolis, “Holan dirina sandiri do na dipikkiri jolma [dang holan si Job]. Lehononna do manang aha pe na di ibana asal ma boi mangolu.” (Job 2:4, 5) Didok Sibolis dang tahaholongi Jahowa sian ias ni rohatta, jala pasti tatinggalhon do Ibana molo terancam ngolutta. Didok Sibolis do muse, dang dihaholongi Jahowa hita jala dang diargai Ibana upayatta lao mambahen las rohana. Nang pe songon i, nungnga taboto rencana ni Sibolis tu hita. Jadi unang ma porsea hita tu gabusna i.

14. Ikkon songon dia do hita memandang hasusaan na masa tu hita? Paboa ma contoh.

¹⁴ Hasusaan na taadopi boi do gabe kesempatan lao mamareso diritta. Hasusaan na masa tu si Job, mangurupi ibana mamboto kelemahanna jala songon dia carana padenggatton i. Misalna gabe diboto si Job ma na porlu dope ibana asa lam marserep ni roha. (Job 42:3) Songon i ma hita. Taanggap ma hasusaatta i gabe kesempatan lao mamareso diritta. Donganta si Nikolay * na dipenjara nang pe marsahit na parah mandok, “Tikki na dipenjara i au, songon na di-rontgen do huhilala. Gabe huboto ma akka sifat na dia na porlu hupadenggan.” Molo nungnga taboto aha kelemahanta, berupaya ma hita padenggatton i.

15. Ise do na ikkon tatangihon, jala boasa?

¹⁵ Ikkon Jahowa do na tatangihon, unang akka musutta. Ditangihon si Job do Jahowa tikki makkatai tu ibana. Hira na didok Jahowa do tu si Job, ‘Diida ho do akka toppaanku na luar biasa i? Na dirippu ho do dang sanggup au mangurupi ho? Pos ma roham, huparrohahon do sude na masa tu ho.’ Ujungna diakkui si Job do kesalahanna jala diargai ibana do haburjuon ni Jahowa. Didok si  Job ma mangalusi, “Saleleng on dibege pinggolhu do taringot tu Ho, alai saonari nungnga diida matakku Ho.” (Job 42:5) Tikki sadihari do si Job mandokkon i? Tikki hundul dope ibana di orbuk, tikki marsahit dope ibana, jala tikki lungun dope rohana ala mate anakkonna. Alai nungnga boi dihilala ibana na holong roha ni Jahowa tu ibana, jala na arga do ibana di Jahowa.​—Job 42:7, 8.

16. Aha do na ikkon torus taingot molo masa hasusaan tu hita? (Jesaya 49:15, 16)

¹⁶ Saonari godang do halak na menghina hita jala mambahen hita merasa dang mararga. Diparoa-roa nasida do hita asa hancur reputasitta manang reputasi ni organisasi. (Mat. 5:11) Alai sian pengalaman ni si Job taboto do, pos situtu do roha ni Jahowa na boi hita toktong setia tu Ibana nang pe godang hasusaatta. Holong hian do roha ni Jahowa tu hita. Dang hea ditinggalhon Ibana akka halak na marpos ni roha tu Ibana. (Jaha Jesaya 49:15, 16.) Jadi unang ma tabege gabus ni akka musu ni Jahowa. Songon i do na dibahen donganta si James na tinggal di Turki. Godang do hasusaan na dihilala keluargana. Didok ibana, “Husadari hami do, molo hubege hami akka gabus na dipandok akka halak taringot tu organisasitta, gabe gale do hami. Jadi berfokus do hami tu janji ni Debata. Jala toktong do hami bersemangat melayani Jahowa. Gabe boi ma hami torus marlas ni roha.” Alani i, tatiru ma si Job. Jahowa ma na tatangihon. Alana gabus na dipandok  akka musutta, boi do mambahen mago pos ni rohatta tu janji ni Debata.

17. Aha do na boi taparsiajari sian naposo ni Jahowa na disurat di Heber bindu 11?

¹⁷ Dang holan si Job naposo ni Jahowa na toktong barani jala togu tikki masa hasusaan. Dipaboa Apostel Paulus do di bukku Heber, godang dope na asing na setia songon si Job. Dos ‘songon ombun do godang ni nasida’. (Heb. 12:1) Nang pe masa hasusaan, alai torus do nasida setia tu Jahowa saleleng mangolu nasida. (Heb. 11:36-40) Memang dang diida nasida dope saut sude janji ni Jahowa i, alai torus do nasida paimahon janji i. Sia-sia do kerja keras dohot ketekunanna i? Daong. Ala nungnga berupaya nasida mambahen las roha ni Jahowa, pasti idaon ni nasida do annon saut sude janjina i. (Heb. 11:4, 5) Jala gabe teladan do nasida di hita asa toktong marpos ni roha tu janji ni Jahowa.

18. Aha do tekadmuna dung taparsiajari artikel on? (Heber 11:6)

¹⁸ Saonari, lam tu jahatna do portibi on. (2 Tim. 3:13) Dang menyerah dope Sibolis mambahen susa naposo ni Debata. Nang pe songon i bertekad ma hita torus melayani Jahowa. Jala torus ma ‘tapaima-ima janji ni Debata na mangolu i’. (1 Tim. 4:10) Taingot ma, pasu-pasu na dilehon Jahowa tu si Job mambuktihon, na parholong do Jahowa i jala parasi roha. (Jak. 5:11) Jadi songon si Job, toktong ma hita setia tu Jahowa. Jala pos ma rohatta pasu-pasuon ni Debata do “halak na marsitutu mangalului Ibana”.​—Jaha Heber 11:6.