1. (a) Finshi Yehova atulaya? (b) Calola mwi ‘ukucetekela Yehova’? (Moneni “Ubulondoloshi.”)

 YEHOVA alilaya ukucitila abantu abamutemwa ifintu ifisuma. Nomba line ali no kufumyapo ukulwala, ukuloosha e lyo ne mfwa. (Ukus. 21:3, 4) Akaafwa “abafuuka” abamucetekela pa kuti bakalenge isonde ukuba paradaise. (Amalu. 37:9-11) Akaleka tukabe ifibusa fyakwe, kabili bucibusa tukakwata bukacila pa fyo bwaba ino nshita. Aya amalayo atulaya yasuma nga nshi! Nomba finshi fingalenga twashininkisha ukuti ifyo Lesa atulaya fikacitika? Pantu Yehova lyonse alacita fyonse ifyo alaya. E mulandu wine tulingile ‘ukumucetekela.’ * (Amalu. 27:14) Tulanga ukuti twalicetekela Lesa nga natutekanya kabili tulesekelela ilyo tulelolela ukuti akafikilishe fyonse ifyo atulaya.—Esa. 55:10, 11.

2. Cinshi Yehova aacita?

² Yehova alilanga ukuti alafikilisha ifyo alaya. Natulandeko pa fyo alanga ukuti alafikilisha ifyo alaya. Mwi buuku lya Ukusokolola, Yehova asobele ukuti muli shino nshiku ali no kuleta abantu ukufuma mu nko shonse, imitundu ne ndimi kabili bali no kwisa mu kupepa kwa cine. Muno nshiku aba bantu bonse babeta ukuti “ibumba likalamba.” (Ukus. 7:9, 10) Nangu ca kuti muli ili ibumba mwaba abaume, abanakashi, e lyo na bana abapusana umutundu, umushobo, no ko  bafuma, balikatana kabili balipanga ulupwa lumo umo babombela Yehova. (Amalu. 133:1; Yoh. 10:16) Na kabili ababa mwi bumba likalamba balabila sana imbila nsuma. Balafwaisha ukwebako abantu abengakutika pe subilo bakwata ilya kuti ifintu fikawama ku ntanshi. (Mat. 28:19, 20; Ukus. 14:6, 7; 22:17) Nga ca kuti mwaba mwi bumba likalamba, ukwabula no kutwishika isubilo lya kuti ifintu fikawama ku ntanshi lyalicindama kuli imwe.

3. Cinshi ico Satana afwaisha?

³ Satana tafwaya ukuti mwakwata isubilo. Ico afwaisha kulenga mwasumina ukuti Yehova tamubikako amano kabili takafikilishe ifyo amulaya. Nga ca kuti Satana alenga isubilo lyesu lyapwa tukafilwa ukuba abashipa kabili kuti twaleka no kubombela Yehova. Nga fintu twalasambilila, ifi fine e fyo alefwaya ukucita kuli Yobo.

4. Cinshi twalasambilila muli cino cipande? (Yobo 1:9-12)

⁴ Muli cino cipande twalasambilila pa fyo Satana acitile pa kufwaya ukuti Yobo aleke ukubombela Yehova. (Belengeni Yobo 1:9-12.) Twalamona ne fyo twingasambilila kuli Yobo e lyo no mulandu tulingile ukulaibukishisha ukuti Lesa alitutemwa kabili akafikilisha ifyo alaya.

5-6. Finshi fyacitikile Yobo mu kashita fye akanono?

⁵ Yobo alikele bwino sana. Ali ni cibusa wa kwa Yehova. Alikwete ulupwa ulukulu ulwa nsansa kabili ali mukankaala. (Yobo 1:1-5) Nomba mu bushiku fye bumo, fyonse ifyo akwete fyalilobele. Ica kubalilapo, inama shakwe balishibile. (Yobo 1:13-17) Lyena abana bakwe bonse abo atemenwe balifwile. Baleni tontonkanyeni pali ifi ifyamucitikile. Abafyashi balomfwa sana ububi nga ca kuti umwana wabo afwa. Nomba elenganyeni ifyo Yobo no mwina mwakwe baumfwile sana ubulanda ilyo abana babo bonse 10 bafwile. E mulandu wine Yobo alepwilile ica kufwala ilyo alelila no kuwa panshi!—Yobo 1:18-20.

⁶ Lyena Satana alwalike Yobo ubulwele ubwabipisha ubwalengele aseebane. (Yobo 2:6-8; 7:5) Ilyo ifi tafilacitika abantu balicindike sana Yobo. Baleya kuli ena pa kuti abapandeko amano. (Yobo 31:18) Nomba ilyo alwele abantu balilekele ukuya kuli ena. Bamunyina ba kwa Yobo, ifibusa fyakwe, e lyo na babomfi bakwe bonse balimutalwike!—Yobo 19:13, 14, 16.

7. (a) Bushe Yobo alemona ukuti ni nani walengele ukuti alecula, lelo cinshi akeene ukucita? (b) Nga fintu tulemona pa cikope, bushe mafya nshi ayo Umwina Kristu engakwata?

⁷ Satana alefwaya Yobo asumine ukuti icalengele alecula ni co Yehova alimufulilwe. Ku ca kumwenako, Satana alengele umwela uukalamba ukuti uwishe ing’anda umo abana ba kwa Yobo 10 baleliila ica kulya. (Yobo 1:18, 19) Na kabili alengele umulilo ukufuma ku muulu uwaocele inama shonse e lyo na babomfi ba kwa Yobo abaleshicema. (Yobo 1:16) Apo umwela e lyo no mulilo fyafumine ku muulu, Yobo afwile atontonkenye ukuti fyafumine kuli Yehova Lesa. Kabili ici calengele Yobo alemona ukuti nalimo alibembukile Yehova. Na lyo line, Yobo alikeene ukutuka Wishi wa ku muulu. Yobo alishibe ukuti pa myaka iingi Yehova alemupeela ifintu ifingi ifisuma. Aletontonkanya ukuti apo ali ne nsansa ilyo Lesa alemupeela ifintu ifisuma, afwile no kusumina ifibi ifyo amucitile. E ico  atile: “Libe ilyapaalwa ishina lya kwa Yehova.” (Yobo 1:20, 21; 2:10) Nangu ca kuti ifyuma ifyo Yobo akwete fyalilobele, abana bakwe balifwile kabili alilwele, alitwalilile uwa cishinka kuli Yehova. Nomba Satana talekele ukumwesha.

8. Cinshi cimbi ico Satana acitile pa kuti eshe Yobo?

⁸ Kwali na cimbi ico Satana acitile, abomfeshe abanankwe ba kwa Yobo batatu ukulanda amashiwi ayalengele aletontonkanya ukuti tacindeme. Aba banankwe balandile ukuti icalengele ukuti Yobo alecula ni co alicitile ifyabipa ifingi. (Yobo 22:5-9) Balefwaya asumine no kuti te mulandu ne fintu ifisuma ifyo acitile, Lesa tabikileko amano. (Yobo 4:18; 22:2, 3; 25:4) Balefwaya aletontonkanya ukuti Lesa tamutemenwe kabili talemusakamana. Na kabili balefwaya aletontonkanya ukuti ukubombela Lesa takwacindeme. Ifyo balelanda nga fyalengele Yobo ukulaumfwa kwati takwali nangu umo uwali no kumwafwa pa mafya akwete.

9. Cinshi calengele Yobo abe uwashipa kabili uwakosa?

⁹ Elenganyeni ukuti Yobo naikala mu mito ninshi alekalipwa icine cine. (Yobo 2:8) Ifibusa fyakwe bekalile fye ukulanda ukuti te muntu umusuma kabili tapaba ifyo acita ifyacindama. Amafya akwete nayamufinina kwati muntu uusendele icipe icafina, kabili ali no bulanda sana pa mfwa ya bana bakwe. Yobo ekele fye tondolo. (Yobo 2:13–3:1) Nga ca kuti aba banankwe batatu abalelanda ifya bufi baletontonkanya ukuti ifi ekele tondolo alefwaya ukuleka ukubombela Yehova, ninshi baleibepa fye. Ilyo papita inshita Yobo nalimo ainuna umutwe wakwe kabili alolesha abanankwe e lyo alanda ati: “Nshakaleke ukuba uwa kaele mpaka ne mfwa yandi!” (Yobo 27:5) Cinshi calengele Yobo ukuba uwashipa kabili uwakosa te mulandu na mafya  yonse ayo akwete? Na lintu Yobo afuupwike sana talekele ukucetekela ukuti Lesa ali no kupwisha amafya yonse ayo akwete. Alishibe ukuti nangu fye afwa, Yehova ali no kumubuusha.—Yobo 14:13-15.

10. Finshi tusambilila ku lyashi lya kwa Yobo?

¹⁰ Ilyashi lya kwa Yobo liletusambilisha ukuti Satana te kuti atupatikishe ukuleka ukubombela Yehova, no kuti Yehova alishiba amafya yonse ayo tukwata. Ifyacitikile Yobo kuti fyalenga twaishiba bwino icalengele ukuti Satana alete amafya pali Yobo. Natumone fimo ifyo twingasambililako kuli Yobo.

11. Nga twatwalilila ukucetekela Yehova, cinshi cikacitika? (Yakobo 4:7)

¹¹ Ifyo Yobo acitile fitusambilisha ukuti nga twatwalilila ukucetekela Yehova, kuti twashipikisha amafya no kukaana Satana. Cinshi cikacitika nga twakaana Satana? Amalembo yatila akafulumuka kuli ifwe.—Belengeni Yakobo 4:7.

12. Bushe isubilo lya kuti abafwa bakabuuka lyakoseshe shani Yobo?

¹² Tufwile ukucetekela sana ukuti abafwa bakabuuka. Nga fintu twasambilile mu cipande cafumineko, Satana ilingi alalenga twalatiina ukufwa pa kuti tuleke ukuba aba cishinka kuli Yehova. Ilyo Satana ale-esha Yobo atile, Yobo kuti acita icili conse ukubikapo fye no kuleka ukuba uwa cishinka kuli Yehova pa kuti apusushe ubumi bwakwe. Ifi Satana alandile fya bufi. Na lintu Yobo alemona ukuti alafwa, alitwalilile ukuba uwa cishinka kuli Yehova. Icalengele ashipikishe amafya ni co alicetekele sana ukuti Yehova musuma kabili ali no kufumyapo amafya akwete. Alicetekele ukuti nangu ca kuti Yehova tafumishepo amafya ayo akwete, nga afwa ali no kumubuusha ku ntanshi. Na kabili alishininkishe ukuti abafwa bakabuuka. Na ifwe nga natucetekela ukuti abafwa bakabuuka, tatwakaletiina ukufwa ica kuti twaleka no kuba aba cishinka kuli Yehova.

13. Mulandu nshi tulingile ukubikila amano ku fyo Satana acitile pa kwesha Yobo?

¹³ Tufwile ukubika sana amano ku fyo Satana acitile pa kwesha Yobo pantu na pali ino nshita Satana e fyo acita pa kutwesha. Satana alandile ati: “Conse ico umuntu [te Yobo fye] akwata kuti apeelela pa mweo wakwe.” (Yobo 2:4, 5) Satana alelanda ukuti Yehova Lesa tatwamutemwa kabili kuti twaleka ukumubombela pa kuti fye tupusushe ubumi bwesu. Satana alandile no kuti Lesa tatutemwa kabili nangu tumubombela tabikako amano. Apo twalishiba ukuti ico Satana afwaisha kutufumya kuli Yehova, tatukutika ku bufi ubo alanda.

14. Bushe amafya kuti yalenga shani twaishiba ifyo twaba? Langilileni.

¹⁴ Nga twakwata amafya, tufwile ukulayamona ukutila kuti yalenga twaishiba ifyo twaba. Amafya ayo Yobo akwete yalengele aishiba umo alekabila ukubombela. Ku ca kumwenako, aishileishiba ukuti alingile ukuba sana uwaicefya. (Yobo 42:3) Na ifwe bene kuti twaishiba ifyo twaba nga twakwata amafya. Munyinefwe Nikolay, * uo bakakile mu cifungo nangu ca kuti alelwalilila, atile: “Icifungo caba kwati ni mashini ya X-ray iyo babomfya pa kumona ifilubene mu kati ka mubili ifyo tushingamona na menso. Kanshi na mafya yene kuti yalenga twayishiba bwino ica kuti twamona no mo tulingile ukuwamya.” Nga twaishiba ifyo tushicita bwino tufwile ukubombelapo.

15. Ni nani uo tufwile ukukutikako, kabili mulandu nshi?

 ¹⁵ Tulingile ukukutika kuli Yehova te ku balwani besu. Yobo alebikako sana amano Yehova nga alelanda nankwe. Ifipusho ifyo Lesa aipwishe Yobo, fyalengele amone ukuti alimubikileko amano. Cali kwati Yehova alemweba ukuti: ‘Bushe walimona amaka yandi ku fintu ifyo nabumba? Nalishiba fyonse ifyakucitikila. Bushe ulemona ukutila kuti nafilwa ukukusakamana?’ Yobo ali-icefeshe kabili alimwene ukuti Yehova musuma. Atile: “Namumfwilile mu fya kumfwaumfwa fye, lelo nomba amenso yandi yamumona.” (Yobo 42:5) Yobo nalimo alandile aya mashiwi ninshi naikala mu mito, umubili wakwe wali fye ifilonda fyeka fyeka kabili ninshi aleloosha abana bakwe abafwile. Na lyo line, Yehova alandile ukuti alitemenwe Yobo kabili alilangile ne fyo amutemenwe.—Yobo 42:7, 8.

16. Ukulingana na mashiwi yaba pali Esaya 49:15, 16, cinshi tufwile ukulaibukisha nga twakwata amafya?

¹⁶ Na muno nshiku mwine abantu kuti batusaalula no kutulenga ukumoneka kwati tatwacindama. Balafwaya ukutonawila ishina ne shina lya cilonganino kabili ‘balatubepesha ubufi ubwalekanalekana.’ (Mat. 5:11) Ku lyashi lya kwa Yobo tusambililako ukuti Yehova alicetekela ukuti tukatwalilila ukuba aba cishinka kuli ena na lintu tuli na mafya. Yehova alitutemwa kabili takabale asha bonse abamucetekela. (Belengeni Esaya 49:15, 16.) Mwilabika sana amano ku malyashi ya bufi ayo abalwani ba kwa Lesa balanda. Munyinefwe James uwa ku Turkey uo ulupwa  lwakwe lwakwete amafya ayakalamba, atile: “Twailwike ukuti nga tulekutika ku bufi ubo abantu balanda pa bantu ba kwa Lesa kuti twafuupuka. Kanshi twabikile fye amano ku fyo Ubufumu bwa kwa Lesa bukatucitila kabili twalebombesha mu mulimo wakwe. Ne ci calengele tulesekelela.” Nga filya Yobo alecita, na ifwe tulakutika kuli Yehova! Ubufi ubo abalwani besu babepa tabulenga isubilo lyesu ukupwa.

17. Finshi mwingasambilila ku baume na banakashi aba cishinka abalembwa mwi buuku lya AbaHebere icipandwa 11?

¹⁷ Kwaliba ababomfi ba kwa Yehova na bambi abengi abatwalilile ukuba ne cishinka lintu bakwete amafya nga filya Yobo acitile. Ilyo Paulo alembeele abaHebere kalata, alandile pali aba ababomfi ba kwa Yehova ukuti ‘libumba lya nte.’ (Heb. 12:1) Bonse balikwete sana amafya, na lyo line balitwalilile aba cishinka kuli Yehova. (Heb. 11:36-40) Bushe ifyo baleshipikisha no kubombesha kwabo fyaile fye nga mu menshi? Awe nakalya! Nangu ca kuti ilyo bali no mweo tabamwene uko amalayo yonse ayo Yehova alaile yafikilishiwa, balitwalilile ukucetekela Yehova. Kabili apo balicetekele ukuti Yehova alibatemenwe, tabaletwishika ukuti fyonse ifyo alaya fikafikilishiwa. (Heb. 11:4, 5) Ifyo bacitile kuti fyalenga twatwalilila ukucetekela Yehova.

18. Cinshi mulefwaisha ukucita? (AbaHebere 11:6)

¹⁸ Pali ino nshita ifintu mu calo fileya filebipilako fye. (2 Timote 3:13) Satana taleka ukwesha abantu ba kwa Lesa. Te mulandu na mafya tukakwata ku ntanshi, lekeni tutwalilile ukulabombela Yehova no kushininkisha ukuti “twasubila muli Lesa wa mweo.” (1 Tim. 4:10) Muleibukisha ukuti filya Lesa apaalile Yobo filanga ukuti “Yehova wa nkumbu nga nshi kabili wa luse.” (Yako. 5:11) Kanshi na ifwe natutwalilile ukuba aba cishinka kuli Yehova no kucetekela ukuti “alalambula abamufwaisha.”—Belengeni AbaHebere 11:6.