ARTIKEL PELAJAREN 27
“Ngaraplah man Jahwe”
“Ngaraplah man Jahwe, panglah kam janah petetap ukurndu.”—MS. 27:14.
LAGU 128 Setialah Seh ku Kedungenna
SI IBAHAS *
1. (a) Arapen kai si bereken Jahwe man banta? (b) Kai ertina ‘ngarap man Jahwe’? (Nen “Penjelasen Tambahen.”)
ENGGO bereken Jahwe arapen si luar biasa man kerina kalak si engkelengi Ia. Lanai ndekah masapkenNa penakit, ceda ate, ras kematen. (Ket. 21:3, 4) Alu penampat Jahwe, “kalak si meteruk ukur” si ngarap man baNa, banci pagi erban doni enda jadi pardis. (Ms. 37:9-11) Selain si e, hubungenta ras Jahwe pe seh kel pagi rembakna, ndauh rembaken asangken si gundari. Luar biasa kel arapen e! Kai si erban kita tek maka janji Dibata e pasti terjadi? Perban Jahwe lalap nepati janjiNa. E me sebapna cocok kel adi ‘ngarap kita man Jahwe.’ * (Ms. 27:14) Sibuktiken si e adi sabar kita janah meriah ukurta nimai janji Dibata terjadi.—Jes. 55:10, 11.
2. Kai si enggo buktiken Jahwe?
2 Enggo buktiken Jahwe maka tepatiNa janjiNa. Contohna, bas buku Ketangkasen, erjanji Jahwe maka bas jamanta, persadaNa pagi kerina kalak arah tiap bangsa, suku, ras bahasa guna nembah Ia saja. Kalak e igelari “kelompok jelma si enterem.” (Ket. 7:9, 10) Kelompok enda istimewa kel. Engkai? Perban ersada kalak e bas perkade-kaden sebelang doni si dem alu kedamen. Padahal bas kelompok e lit dilaki, diberu, ras anak-anak arah erbage-bage suku, bahasa, ras latar belakang. (Ms. 133:1; Joh. 10:16) Kalak e pe semangat erberita. Katawari pe, beritaken kalak e arapenna si luar biasa man ise pe si nggit megiken. (Mat. 28:19, 20; Ket. 14:6, 7; 22:17) Adi kam bagin arah kelompok jelma si enterem e, pasti meherga kel kapndu arapen kerna doni si terulin e.
3. Kai tujun Setan?
3 Ate Iblis bene min arapenta. Tujunna gelah ula min kita tek maka perdiateken Jahwe kita ras ula kita tek maka pasti tepati Jahwe janjiNa. Adi berhasil Setan mbeneken arapenta, lanai kita semangat janah banci dungna ngadi kita ngelayani Jahwe. Mbarenda, usahaken Iblis erban bene arapen Jop gelah ngadi ia ngelayani Jahwe.
4. Kai kari sibahas bas artikel enda? (Jop 1:9-12)
4 Bas artikel enda, sibahas kari cara si igunaken Setan gelah lanai Jop setia man Jahwe. (Baca Jop 1:9-12.) Sibahas ka kari kai si banci sipelajari arah usihen Jop, janah engkai perlu siinget maka keleng ate Jahwe kita ras pasti tepatiNa janjiNa.
BENEKEN SETAN ATENA ARAPEN JOP
5-6. Kai si rempet terjadi man Jop?
5 Meriah kel akap Jop ndalani geluhna. Rembak hubungenna ras Jahwe. Enterem keluargana, kompak kel kalak e, janah bayak kel ia. (Jop 1:1-5) Tapi bas sada wari, menam bene kerinana. Tangtangna mate kerina asuh-asuhenna. (Jop 1:13-17) Dung e, mate kerina anakna. Cuba siukuri perasan Jop ras diberuna paksa si e. Pasti getem kel pusuh orang tua adi lit anakna si mate. Emaka pasti sengget kel Jop ras diberuna janah getem kel pusuh kalak e sanga tehna maka enggo mate sepuluhna anakna idabuhi rumah si runtuh. Wajar nge getem kel pusuh Jop, emaka rigatkenna bajuna janah ndabuh ia ku taneh!—Jop 1:18-20.
6 Kenca si e, iban Setan Jop kena penakit si mekelek si erban mela. (Jop 2:6-8; 7:5) Gel-gel e, ergai kalak kel Jop. Enterem kalak si rusur mindo nasehat man bana. (Jop 29:7, 8, 21) Gundari lanai ia diate kalak e. Turang seninana, teman-temanna, bage pe pelayanna lanai nggit erteman ras ia!—Jop 19:13, 14, 16.
Enterem turang seninata pernah ngadapi situasi si mirip ras si adapi Jop (Nen paragrap 7) *
7. (a) Ise akap Jop si erban kesusahenna, tapi kai si la ilakokenna? (b) Bagi si lit bas gambar, masalah kai si banci saja iadapi kalak Kristen?
7 Ate Setan tek Jop maka kesusahenna terjadi perban merawa Jahwe man bana. Emaka, iban Setan angin si meter ngancurken rumah ingan anak-anak Jop sangana man-man. (Jop 1:18, 19) Ban Setan ka reh api langit nari si erban mate asuh-asuhen Jop bage pe pelayanna si ngurussa. (Jop 1:16) Perban angin ras api e rehna langit nari, emaka akap Jop Jahwe si erbanca. Tek Jop maka merawa Jahwe man bana. Amin gia bage, la nggit Jop numpahi Bapakna si i surga. Itehna maka sedekah enda enggo melala si mehuli si bereken Jahwe man bana. Akap Jop, adi enggo alokenna si mehuli, arus ka ia nggit ngaloken si la mehuli. Emaka nina Jop, “Mbera-mbera gelar Jahwe lalap ipuji.” (Jop 1:20, 21; 2:10) Amin pe enggo lanai lit erta Jop, lanai lit anak-anakna, sakit ka ia, tetap ia setia man Jahwe. Tapi Setan lenga puas.
8. Kai ka si iban Setan man Jop?
8 Kenca si e, igunaken Setan ka cara si deban guna nyerang Jop. Ibanna reh telu teman Jop. Iban temanna e lanai akap Jop merga bana. Kataken kalak e maka susah Jop perban enggo ilakokenna melala kesalahen. (Jop 22:5-9) Kataken kalak e ka maka bicara mehuli pe perbahanen Jop, labo lit ertina akap Dibata. (Jop 4:18; 22:2, 3; 25:4) Usahaken kalak e gelah tek Jop maka labo keleng ate Dibata ia, labo diate Dibata ia, janah labo ergai Jahwe pelayanenna. Adi tek Jop man ranan kalak e, banci ia putus asa.
9. Kai si erban Jop megenggeng ras paguh?
9 Cuba sibayangken situasi enda. Jop sangana kundul bas abu, lalap kapna mesui. (Jop 2:8) Lalap ituduh temanna maka ia labo kalak si bujur janah labo lit ertina kerina si mehuli si lakokenna sedekah enda. Mberat kel akap Jop masalahna e, bali bagi njujung batu si galang. Nce, getem ka pusuhna perban enggo mate anakna. Tangtangna sinik Jop. (Jop 2:13–3:1) Adi akap temanna sinik ia perban enggo tadingkenna Jahwe, enggo salah duga kalak e. Dungna, banci saja tatap Jop teluna temanna e janah nina, “Seh ngasa aku mate, tetap aku setia man Dibata!” (Jop 27:5) Kai si erban Jop megenggeng ras paguh amin pe sangana kitik kel ukurna? Lalap lit arapenna, tek ia masapken Jahwe pagi kerina kesusahenna. Tehna maka amin pe mate ia, pasti nge ia pekeke Jahwe.—Jop 14:13-15.
UGA CARATA NGUSIH JOP?
10. Kai si banci sipelajari arah Jop?
10 Pengalamen Jop ngajari kita maka labo banci ipaksa Setan kita nadingken Jahwe. Sipelajari ka maka iangkai Jahwe nge kerina si terjadi man banta. Pengalamen Jop pe nampati kita meteh kerna tuduhen Setan man kita kerina. Mari sibahas kai saja si banci sipelajari arah Jop.
11. Kai hasilna adi lalap kita tek man Jahwe? (Jakup 4:7)
11 Arah pengalamen Jop terbukti maka adi lalap kita tek man Jahwe, ngasup kita ngadapi percuban kai pe janah banci silawan Setan. Kai hasilna? Bas Pustaka ikataken maka adi silawan Iblis, kiam me ia arah kita nari.—Baca Jakup 4:7.
12. Uga arapen kekeken mpegegehi Jop?
12 Perlu kita tek kel man arapen kekeken. Bagi si enggo sibahas bas artikel sebelumna, lalap igunaken Setan kebiaren man kematen gelah la kita setia man Jahwe. Mbarenda ituduh Setan maka nggit Jop ngelakoken kai pe, termasuk ngadi ngelayani Jahwe, gelah banci tetap nggeluh. Tapi Setan salah. Amin pe akap Jop ia enggo nandangi mate, tetap ia setia man Jahwe. Si erban Jop tetap megenggeng eme kinitekenna man Jahwe ras arapenna si paguh. Tek ia maka Jahwe mehuli janah imasapkenNa nge pagi masalahna. Bicara la pe imasapken Jahwe masalahna sanga ia nggeluh denga, tek Jop pasti nge pagi ia ipekeke. Jelas kel arapen kekeken e man Jop. Adi arapen e pe jelas man banta, la sipediat kebiaren man kematen erban kita la setia man Dibata.
13. Kai si banci siteh arah perbahanen Setan man Jop?
13 Arus tutus ateta mperdiateken pengalamen Jop, perban kai si ilakoken Setan man Jop lakokenna ka man banta. Cuba siperdiateken tuduhen Setan enda, nina, “Kai pe si lit bas sekalak jelma [labo Jop saja] pasti berekenna gelah banci tetap nggeluh.” (Jop 2:4, 5) Ituduh Setan maka labo tuhu-tuhu keleng ateta Jahwe janah nggit kita nadingken Ia sanga terancam geluhta. Ate Setan tek min kita maka labo keleng ate Dibata man banta janah labo diateNa usahata bas erban meriah ukurNa. Perban enggo siteh cara-cara si biasa igunaken Setan janah ngarap kita man Jahwe, la kita tek man bualna e.
14. Kai si banci siteh kerna dirita sanga siadapi percuban? Ban perumpamanna.
14 Sianggap min percuban e jadi kesempaten guna nandai dirita. Percuban si iadapi Jop nampati ia meteh kai kelemahenna ras uga mpehulisa. Contohna, itehna maka perlu denga ipebelinna sipat meteruk ukur. (Jop 42:3) Kita pe banci reh jelasna sitandai banta sanga siadapi percuban. Sekalak turang seninata si gelarna Nikolay, * ipenjaraken amin pe mekelek kel penakitna. Nina, “Penjara bali bagi alat ronsen si nampati kita meteh sipat-sipat si apai si perlu sipebelin.” Adi enggo siteh kai kelemahenta, banci siusahaken mpehulisa.
15. Ise si arus sibegiken, ras engkai?
15 Si arus sibegiken eme Jahwe, labo musuh-musuhta. Tutus kel ate Jop mperdiateken kai si ikataken Jahwe man bana. Iban Jahwe piga-piga penungkunen man Jop guna mbuktiken maka perdiatekenNa nge Jop. Tempa-tempa nina Jahwe, ‘Cuba perdiateken kai si enggo Kuciptaken. Mbelin kel kuasaKu, janah Kuteh kai si sangana adapindu. Akapndu kin la banci Kusampati kam?’ Iergai Jop kel kiniulin Jahwe. Alu meteruk ukur bagenda nina, “Mbarenda enggo kubegi kerna Kam. Tapi gundari, mataku enggo ngidah Kam.” (Jop 42:5) Sanga katakenna bage, banci saja Jop kundul denga bas abu, kerina dagingna bisulen denga, janah getem denga pusuhna perban enggo mate kerina anakna. Amin gia bage, sampati Jahwe Jop gelah tek ia maka keleng nge ateNa Jop janah labo Ia merawa man bana.—Jop 42:7, 8.
16. Kai si arus siinget sanga siadapi masalah? (Jesaya 49:15, 16)
16 Gundari pe, banci saja tokoh-tokohi kalak kita janah la ergaina. Banci saja pemejin-mejinna gelarta ntah pe gelar organisasita ras “katakenna kerina bual si jahat kerna” kita. (Mat. 5:11) Tapi, arah pengalamen Jop, siteh maka tek Jahwe banci nge kita tetap setia man baNa sanga siadapi masalah. Keleng ate Jahwe kita janah labo pernah tadingkenNa kalak si ngarap man baNa. (Baca Jesaya 49:15, 16.) Ula sibegiken pitnah arah musuh-musuh Dibata! Turang Seninata James arah Turki si keluargana ngadapi masalah si mberat ngataken, “Isadari kami maka banci kitik ukur kami adi begiken kami ranan si la tuhu kerna umat Dibata. Emaka si ukuri kami eme arapen kerna Kerajan Dibata janah tetap lakoken kami pelayanen kami man Jahwe. Alu bage, banci kami tetap ermeriah ukur.” Sibegikenlah Jahwe bali bagi Jop! Ranan si la tuhu arah musuhta labo banci mbeneken arapenta.
ARAPEN BANCI ERBAN MEGENGGENG
Bereken Jahwe pasu-pasu man Jop perban ia setia. Meriah akap Jop ras diberuna ndalani geluhna janah gedang umur kalak e (Nen paragrap 17) *
17. Pelajaren kai si banci sidat arah kalak si setia si ikataken bas Heber pasal 11?
17 Labo Jop saja umat Jahwe si tetap megenggeng ras paguh sanga ngadapi masalah si mberat. Enterem ka nge si bage. Enda teridah arah surat si itulis Rasul Paulus man kalak Heber. Katakenna kalak e “saksi si bagi embun.” (Heb. 12:1) Kerina kalak e ngadapi masalah si mberat, tapi tetap kalak e setia man Jahwe segedang geluhna. (Heb. 11:36-40) Sia-sia nge kai si lakoken kalak e? Pasti lang! Amin pe la idah kalak e janji Dibata terjadi bas geluhna, tetap kalak e ngarap man Jahwe. Perban teh kalak e enggo ibanna meriah ukur Jahwe, tek kalak e pasti nge pagi idahna janji Jahwe terjadi. (Heb. 11:4, 5) Usihen kalak e nampati kita tetap ngarap man Jahwe.
18. Kai tekadta? (Heber 11:6)
18 Gundari kita nggeluh bas doni si reh dekahna reh jahatna. (2 Tim. 3:13) Seh asa gundari Setan lalap denga nguji umat Dibata. Tapi la soal kai pe si nandangi siadapi, ertekad kita guna tutus ngelayani Jahwe perban “erpengarapen kita man Dibata si nggeluh.” (1 Tim. 4:10) Ingetlah, pasu-pasu Dibata man Jop perban ia setia mbuktiken “maka lembut kel kekelengen Jahwe ras mbelin perkuah ateNa.” (Jak. 5:11) Mbera-mbera kita pe tetap setia man Jahwe. Tek kita pasti upahi Jahwe “kalak situhu-tuhu ndarami Ia.”—Baca Heber 11:6.
LAGU 150 Rehlah ku Dibata
^ Sanga siukuri kerna kalak si tetap megenggeng amin pe mberat masalahna, biasana mis siinget Jop. Kai si banci sipelajari arah Jop si setia? Setan la banci maksa kita nadingken Jahwe, janah iteh Jahwe kerina si terjadi man banta. Mbarenda masalah Jop imasapken Jahwe. Masalahta pe pagi imasapken Jahwe ka nge. Adi sibuktiken arah perbahanenta maka tuhu-tuhu kita tek kerna si e, e ertina ‘ngarap kita man Jahwe.’
^ PENJELASEN TAMBAHEN: Kata “arapen” bas bahasa Heber ertina “nimai” alu semangat. Kata e pe banci kang maksudna tek kita man sekalak jelma ntah pe siandalken ia.—Ms. 25:2, 3; 62:5.
^ Piga-piga gelar enggo iganti.
