1. a) Ka emenigini líchugubei Heowá woun? b) Ka mini lubéi wíchuguni wafiñen luagu Heowá? (Ariha huméi abürüdǘni).

 RÚHALI Heowá aban lubuidun emenigini houn ha hínsiñebaña lun. Yarafa madise lagumuchun lau sandi, íruni luma óunweni (Aruf. 21:3, 4). Líderagubaña ha ǘnabugubaña ani afiñe hagía luagu lun hadügüni Ubóu le paraísume (Sal. 37:9-11). Lanwoun lira, ladügüba katei le lun buídutima lan wamadagua luma Heowá sügǘ luéi guentó. Ma lubuidun emenigini le! Ka uagu chouru wabalin lagunfulirubei lan Bungiu le füramase lubéi? Ladüga gúnfuli lumuti lererun súnwandan. Gébunati lun wafiñerun luagu Heowá (Sal. 27:14). * Ida liña warufuduni afiñe wamá luagu? Arufuda wamuti dan le wagurabahan lau gurasu luma ugundani lun lagunfuliruni sunsuinagubei le füramase lubéi (Isa. 55:10, 11).

2. Ka adüga laalibei Heowá?

² Arufuda laali Heowá gúnfuli lani lererun. Ariha wamá aban lubuidun hénpulu. Füramaseti Heowá tidan líburu Arufudúni lóundaragubaña lan gürigia ha lídangiñetiña sun néchani, türibu luma iñeñe lun háhuduragun súngubei lun lidan aban lau arumani. Uguñe weyu wátiwa lun sétanu le “saragu gürigia” (Aruf. 7:9, 10). Lau sun añahein lan wügüriña, würiña hama irahüñü ha lídangiñetiña ámuñegueinarügü fulasu, rasa, iñeñe lidan sétanu le, sun hagía ítara haña kei ábameme iduheñu úaraguatiña ani darangilutiña (Sal. 133:1; Huan 10:16). Lanwoun  lira, apurichihatiña lau ubebeni ani aranseñu haña lun hayanuhan luagu hemenigi luagu iseri ubóu houn sun ha busenbaña haganbuniña (Mat. 28:19, 20; Aruf. 14:6, 7; 22:17). Anhein lídangiñetu lubéi sétanu le chóuruti gebegi lan lubuidun emenigini le hun.

3. Ka labusenrunbei Satanási libihin?

³ Busenti Mafia lun weferidiruni wemenigin. Le labusenrubei libihin lun wasaminarun meberesen lan Bungiu wau ani magunfulirun lubéi lan le füramase lubéi. Anhein libiha Satanási le labusenrunbei lau weferidiruni wemenigin, lábürühaba warüna ani gayaraabei wígiruni weseriwidun lun Heowá. Kei le lunbei warihini, áfaaguati Mafia lun lagidaruni lemenigin Hobu luéi lun masigi lan áhuduragua lun Heowá.

4. Kaba wakutihan lidan aturiahani le? (Hobu 1:9-12).

⁴ Lidan aturiahani le wakutiha ka lan sádara layusuruboun Satanási lun múaragun lan Hobu lun Heowá (aliiha huméi Hobu 1:9-12). Warihibei giñe ka lan gayaraabei wafurendeiruni lídangiñe lani Hobu hénpulu luma ka lan uagu súdini lubéi waritaguni hínsiñe wamá lun Bungiu luma lagunfulirubei lan le füramase lubéi.

5, 6. Ida liña lasansirun libagari Hobu lidan murusunrügü dan?

⁵ Buiti meha lidin lun Hobu lidan libagari: aban meha wügüri gamadaguati luma Bungiu, gíbetiña meha liduheñu ani lídanñanu meha aban, ani lanwoun lira, aban meha wügüri rísiti (Hob. 1:1-5). Gama lumoun, lídanrügü aban weyu féridi lumuti liibe-agei le lúmabei. Furumiñe aba leferidiruni lirisin (Hob. 1:13-17). Lárigiñe lira aba hóunwegun sun lisaanigu ha wéiribei hínsiñe lun. Samina wamá luagu lamiselu le murusunraü. Wéiriti igarigu le hasandirubei agübürigu dan le lounwen aban hasaani, samina húmati luagu lanarime igarigu luma idiheri le lasandirubei Hobu úara tuma lani weiriou lau híchugun fe hilagua lan 10 hasaanigu. Ma lanarime ligarigu Hobu darí lun laheiridagunu ladaüragun ani bulugua ligía múaragun! (Hob. 1:18-20).

⁶ Lárigiñe lira, aba lagayuahan Satanási luagu Hobu lau aban lanarime sandi le nibusigarídünati (Hob. 2:6-8; 7:5). Inebeti meha Hobu houn gürigia darí lun háluahani lun líchugun adundehani houn (Hob. 31:18). Lárigiñe sun le lásügürübei, aba hadisedun líbirigu, lánigu paaná ha yarafatimabaña lun hama ha eseriwidubaña lun luéi (Hob. 19:13, 14, 16).

7. a) Según lisaminan Hobu ka meha adügübei lun lasufurirun, ani ka maha lubéi ladügün? b) Ka sügǘ lásügürübei Hobu le gayaraabei lásügürüni aban kristiánu? (Ariha humóun iyawaü to lídanboun párafu 7).

⁷ Busenti meha Satanási lun lasaminarun Hobu lasufuriruña lan ladüga magundanhali lan Heowá lau. Ligía ladügübei Satanási lun láfurun aban lanarime garabali lun téiguadun muna to ñein habéi 10 lisaanigu Hobu efeduha (Hob. 1:18, 19). Adügati giñe lun lábürühan watu gemeti siélugiñe ani áfaragua lumutiña libiñanigu Hobu ani mámarügüñanu hagía láfaragua watu ligía, hilaguatiña giñe ha óunigirubaliña (Hob. 1:16). Kei le siélugiñe lubéi liabin watu gemeti ligía, ábati lasaminarun Hobu Heowá lan óunahabalin. Ani adügati lira lun lasaminarun Hobu adügaali lan somu katei le aubei magundan lan Heowá. Lau sun lira míñaragun lumuti Hobu Bungiu Lúguchi le siélubei. Subudi lumuti giñe lidan lan sun irumu le winwan laalibei ru lumuti lan Heowá sun katei le buíduburiti lun, ligíati ítara kei lánharun lun le buídubei mosu meha giñe lánharun lun  katei le wuribabei. Ligía lariñagubei: “Biniwalá liri Bungiu!” (Hob. 1:20, 21; 2:10). Lau sun féridi lániña meha Hobu lisaanigu, liseinsun luma látuadi uaraguamémegili meha lun Heowá. Gama lumoun, adügayati Satanási amu katei.

8. Ka amu sádara layusuruboun Satanási lun lagayuahan luagu Hobu?

⁸ Yúsuti Satanási ábaya sádara lun lagayuahan luagu Hobu. Yúsuti ǘrüwa lumadagu Hobu lun hadügün lun wuriba lan lasandiragun Hobu lungua. Ariñagatiña wügüriña ha lasufurirubei lan Hobu ladüga adüga lan saragu katei wuribati (Hob. 22:5-9). Hóuchatiña yebe lun hafiñeragüdüni Hobu meberesen lan átiri hali lan katei buiti ladüga meberesen lan Bungiu lau sun áfaaguni le ladügübei (Hob. 4:18; 22:2, 3; 25:4). Láluguña meha Satanási lun lasaminarun Hobu mínsiñe lan lun Heowá, móunigirun lubéi lan ani mebegi lan sun le ladügübei lidan leseriwidun lun Heowá. Lau le hariñagubei wügüriña ha adügati lun lasaminarun Hobu maranserunbei lan liturobulin.

9. Ka íderagubalin Hobu lun lakipurun erei luma ganigi?

⁹ Samina wamá luagu sügǘ le. Ñun liña Hobu lidan kaliki, ani lauñein gáriti wéyuagu áriebu (Hob. 2:8). Sigitiña lumadagu ariñaga aban lan gürigia wuribati ligía, ani adüga hamuti sun hayaraati lun hawiyeduni liri. Wéiriti óuchawaguni le meha lásügürübei Hobu kamá hamuga aban óunwenbu dübü, ani adügati hóunwegun lisaanigu lúntima laganwoundun ligarigu. Furumiñe mani liña meha Hobu (Hob. 2:13–3:1). Anhein samina habéi lumadagu lígirubei lan Hobu leseriwidun lun Heowá, bulíeiguatiña. Aba liñuruni Hobu larihin hawagu lumadagu aba lariñagun houn: “Sun winwan nan, narufudamémebei luagu madurun nan; máhabadina luagu richá humá lau híchugun nidurun!” (Hob. 27:5). Ka íderagubalin Hobu lun derebugu  lan luma lun ganigi lan laganagua saragu asufuriruni? Ni lidan sügǘ hénrenguti le, meferidirun lumuti lemenigin luagu líderagubei lan Bungiu le hínsiñehabubei lun. Subudi lumuti íbini lan lounwe láguyuguagüdübei lan Heowá (Hob. 14:13-15).

10. Ka larufudahabei le lásügürübei Hobu woun?

¹⁰ Arufudahati abahüdaguni luáguti Hobu siñá lan lafosuruniwa Satanási lun wígiruni wáhuduragun lun Heowá lúmati aríagu liña lan Heowá lun sun le wásügürübei. Larufudahaba le lásügürübei Hobu luma lani hénpulu fiu katei súdini woun. Ariha wamá fiu lídangiñe guentó.

11. Ka gayaraabei wachoururuni ánhawa afiñera luagu Heowá súnwandan? (Santiagu 4:7).

¹¹ Arufudahati le asuseredubei lun Hobu, ánhawa lan afiñera luagu Heowá súnwandan, wawanduba lan furumiñeguarügü óuchawaguni. Kaba wibiha? Chóurugüda tumuti Bíbülia woun lanurahaba lan Satanási wawéi (aliiha huméi Santiagu 4:7).

12. Ida liña líchugun emenigini lánina águyuguni derebugu lun Hobu?

¹² Lunti wárügüdün luagu emenigini lánina águyuguni. Kei lafuranguagüdüniwa lidan aturiahani le lubaragiñebei le, yusu lumuti Satanási anufudei luéi óunweni lun múaragun wamá lun Heowá. Samina wamá luagu likesin Hobu. Ariñagati Satanási luagu Hobu ladügüba lan Hobu furumiñeguarügü katei lun lesefuruni libagari íbini lun lígiruni leseriwidun lun Heowá. Bulíeiguati Satanási! Íbini dan le lasaminarubei Hobu lounwen lan úaraguamemeti lun Heowá. Ka san uéigiñe úaragua lubéi saragu? Afiñeti meha Hobu luagu buidu lan Heowá ani hemenigiti luagu laume lan lásügürün dan laransehabei lan Heowá sun katei. Afiñeti anhein lan mibihin ídemuei sun wínwangili lan láguyuguagüdübei lan Bungiu ámuñegü. Inarüni meha emenigini lánina águyuguni lun Hobu. Anhein giñe inarüni lubéi emenigini le woun madügünbei anufudei luéi óunweni lun weferidiruni emenigini le wawagubei.

13. Ka uagu buídubei lubéi wadüga lau wetenirun tun burí sádara to layusuruboun Satanási lun Hobu?

¹³ Buiti wadüga lau wetenirun tun burí sádara to layusuruboun Satanási luagu Hobu lugundun genegeguatu tuma burí to layusuruboun uguñe weyu. Ariha waméi iyeeni le lariñagubei, ani mámarügü luagu Hobu, ariñaga lumuti giñe hawagu sun gürigia. Ariñagati: “Aranseñu liña gürigia lun ladügüni liyaraati lun lesefuruni libagari” (Hob. 2:4, 5). Le labusenrunbei Satanási lariñagun mama lan inarüni ínsiñeni le wasandirubei luagu Heowá, ani wígirubei lan weseriwidun lun Wabungiute anhein lídanñein lubéi denchaü wabagari. Ariñagati giñe, mínsiñe wamá lun Heowá ani mebegi lan áfaaguni le wadügübei lun wagundaaragüdüni. Sun wagía le íchugubalin wemenigin luagu Heowá meyeedun lubadiwa Satanási ladüga subudi wamaaru lisadaran.

14. Ka wasubudirubei dan le wásügürün lídangiñe somu óuchawaguni, ani ka hénpulu lunbei líderaguniwa lun gunfuranda wamani katei le?

¹⁴ Mosu warihini óuchawaguni kei aban chansi lun warihini ida waña lan. Seriwiti lénrengunga le lásügürübei Hobu lun líchugun fe mosu lan laransehan fiu katei lidan ligaburi. Kei hénpulu arihati mosu lan láfaagun lúntima ǘnabugu lan (Hob. 42:3). Wagía giñe sun gayaraati waransehani wagaburi dan le wásügürün lídangiñe somu óuchawaguni. Ligía meha asuseredubei lun Nikolái, * le meha adaürǘbei íbini sandi lan.  Ariñagati: “Íderagua lumutina dan le násügürübei furisunrugu lun narihini kaba lan nasansira lidan nigaburi”. Dan le wasubudiruni megei wamá asansiruni aba wáfaagun lun wadügüni asansiruni ligía.

15. Kaba un gaganbadi wamá, ani ka uagu?

¹⁵ Lunti Heowá lan waganba mama wáganiñu. Téniti Hobu lun le lariñagubei Heowá dan le layanuhanbei luma. Lun ladügün Heowá lun lasaminarun Hobu aba lariñagun aban katei kei burí le lun: “Ariha baali san nubafu lidan sun le nadügübei? Subudi numuti sun le ásügürübei bun. Mafiñetibu san gayara lan nóunigirunibu?”. Lau ǘnabuguni luma óunwenbu eteingiruni luagu lubuidun Heowá aba lóunabuni Hobu: “Aganbaharügütina meha buagu, gama lumoun guentó ariha náadibu lau nagu” (Hob. 42:5). Dan le lariñagunbalin Hobu dimurei burí le másiñati anihagua lan ñun lidan kaliki, lau lura buin lau guméi ani ayahuaha lárigiñe hóunwegun lisaanigu. Lidan sun le gádanbalin Hobu aba lariñagun Heowá lun hínsiñe lan lun ani chóurugüdalei lun gunda lan lau (Hob. 42:7, 8).

16. Según Isaíasi 49:15, 16, ka lunbei gabaroun wamani dan le wásügürün lídangiñe óuchawaguni?

¹⁶ Uguñe weyu másiñati hanabaguniwa gürigia o hóuseruniwa kamá hamuga mebegitiwa. Másiñati giñe hálugun hawiyeduni wiri o tiri óundaruni to ñein wabéi ani “ariñaga hagía sun luwuyeri iyeeni” wawagu (Mat. 5:11). Arufudati abahüdaguni luáguti Hobu afiñe lan Heowá úaraguamemebadiwa lan íbini wásügürün lídangiñe óuchawaguni. Hínsiñetiwa lun Heowá ani maweiyasunbei abulieidaña ha íchugubalin hemenigi luagu (aliiha huméi  Isaíasi 49:15, 16). Meberesenbaadiwa lau iyeeni le hachüühabei láganigu Bungiu. Ariha waméi le lariñagubei James, le awinwandubei Turükía le ásügürübei lídangiñe óuchawaguni le hanarimeti úara hama liduheñu. Ariñagati: “Rútiwa fe ánhawa lan etenira lun iyeeni le ariñawagúbei hawagu lumutuniña Bungiu, lábürühaba lan warüna. Aba wetenirun lun emenigini lánina Larúeihan Bungiu luma lun beresegu wamá lidan weseriwidun lun Heowá, ítara liña wakipuragun woungua gúndaañu”. Áyeiha waméi lani Hobu hénpulu ani aganba waméi Heowá. Magumucha lan iyeeni le hariñagubei wáganiñu lau wemenigin!

17. Ka wafurendeirubei hawagu wügüriña hama würiña ha uágubaña layanuhóua lidan Ebüréu kapítulu 11?

¹⁷ Mámarügüñein Hobu hádangiñe lubúeingu Heowá arufuda ganigi luma iderebugu laganagua lénrengunga. Tidan gárada to labürühaboun apostolu Pábulu houn kristiánugu ebüréana ayanuhati hawagu saragu lubúeingu Bungiu ani ariñagati añahein lan “saragu gürigia ha arufuda hamaalibei hafiñen” (Ebü. 12:1). Lau sun sügǘ hamá lídangiñe óunwenbu burí óuchawaguni sun hagía úaraguatiña lun Heowá lidan sun habagari (Ebü. 11:36-40). Huuti san áfaaguni luma awanduni le hadügübei? Anha huuti. Íbini marihin hamani lagunfulirun sun füramase le ladügübei Bungiu, mígirun hamuti híchuguni hemenigi luagu. Kei chouru habalin gunda lan Heowá hau, subudi hamuti harihibei lan lagunfulirun füramasei le ladügübei (Ebü. 11:4, 5). Lau wasaminarun luagu hani hénpulu ruti erei woun lun wíchuguni wemenigin luagu Heowá súnwandan.

18. Ka lunbei wadügüni meberesenga óuchawaguni le lunbei liabin? (Ebüréu 11:6).

¹⁸ Wuribatimarügaaña gürigia ubouagu (2 Tim. 3:13). Anihagua Satanási óuchaguaña lubúeingu Bungiu. Meberesenga óuchawaguni le lunbei liabin sigí wamá eseriwida lun Heowá tau sun wanigi, “lugundun ru wamaali lan wemenigin luagu Bungiu le wínwanbei” (1 Tim. 4:10). Haritagua waméi arufuda lan abiniruni le líchugubei Bungiu lun Hobu areida ‘lan Bungiu ani gudemehabu ligía’ (Sant. 5:11). Ítara kei Hobu, sigí wamá úaragua lun Heowá súnwandan lau ichouruni “líchuguba lan hafayeiruáha ha áluahabalin” (aliiha huméi Ebüréu 11:6).