1. (a) Unsa nga paglaom ang gihatag ni Jehova kanato? (b) Unsay gipasabot sa ‘paglaom kang Jehova’? (Tan-awa ang “Termino Gipatin-aw.”)

 SI Jehova naghatag ug nindot nga paglaom sa tanan nga nahigugma kaniya. Sa dili madugay, wad-on niya ang sakit, kagul-anan, ug kamatayon. (Pin. 21:3, 4) Iyang tabangan “ang mga maaghop” kinsa naglaom kaniya nga himoong Paraiso ang yuta. (Sal. 37:9-11) Ug ipaposible niya nga ang matag usa nato makabaton ug suod kaayong relasyon kaniya nga mas labaw pa kay sa atong napahimuslan karon. Pagkanindot niana nga paglaom! Pero nganong makasalig ta nga matuman ang mga saad sa Diyos? Kay si Jehova kanunayng motuman sa iyang mga saad. Busa makalaom gyod ta kang Jehova. * (Sal. 27:14) Mapakita nato ni pinaagi sa mapailobon ug malipayong paghulat nga tumanon sa atong Diyos ang iyang mga saad.​—Isa. 55:10, 11.

2. Unsa nay nahimo ni Jehova?

² Napamatud-an na ni Jehova nga motuman gyod siya sa iyang mga saad. Niay talagsaong pananglitan. Sa basahon sa Pinadayag, si Jehova nagsaad nga sa atong panahon, iyang tigomon ang mga tawo gikan sa tanang kanasoran, tribo, ug pinulongan, ug hiusahon sila sa putling pagsimba. Karon, kining espesyal nga grupo sa katawhan gitawag nga “dakong panon.” (Pin. 7:9, 10) Bisan pag kini nga grupo naglakip sa mga lalaki, babaye, ug mga bata nga lainlaig rasa, pinulongan, ug kultura,  sila malinawon ug nagkahiusa ingong managsoon. (Sal. 133:1; Juan 10:16) Kining dakong panon madasigon pod nga mga magsasangyaw. Pirme silang andam nga isangyaw ang ilang paglaom sa mas maayong kalibotan kang bisan kinsa nga maminaw. (Mat. 28:19, 20; Pin. 14:6, 7; 22:17) Kon apil ka sa dakong panon, seguradong gipabilhan gyod nimo ang nindot kaayong paglaom sa umaabot.

3. Unsay tumong ni Satanas?

³ Gusto sa Yawa nga mawad-an ka sa imong paglaom. Tumong niya nga patuohon ka nga wala ka mahala ni Jehova ug dili Siya motuman sa Iyang mga saad. Kon molampos si Satanas sa paghimo niana, maluya ta ug basin ganig mohunong sa pag-alagad kang Jehova. Sa ato unyang mahisgotan, misulay ang Yawa nga wad-on ang paglaom ni Job ug pahunongon siya sa pag-alagad kang Jehova.

4. Unsay atong hisgotan niini nga artikulo? (Job 1:9-12)

⁴ Niining artikuloha, atong susihon ang mga paagi nga gigamit ni Satanas aron mapugos si Job nga moundang sa pag-alagad kang Jehova. (Basaha ang Job 1:9-12.) Hisgotan sab nato kon unsay atong makat-onan kang Job ug kon nganong angay natong hinumdoman nga gihigugma ta sa Diyos ug tumanon Niya ang Iyang mga saad.

5-6. Unsay nahitabo kang Job sa mubo lang nga panahon?

⁵ Maayo kaayo ang kinabuhi ni Job. Suod kaayo siya kang Jehova. Dato kaayo siya, dako ang iyang pamilya, ug malipayon sila. (Job 1:1-5) Pero sa usa lang ka adlaw, halos tanan ang nawala kang Job. Una, nawad-an siya sa iyang kahayopan. (Job 1:13-17) Dayon namatay ang tanan niyang pinanggang mga anak. Hunahunaa ang maong sakit kaayo nga panghitabo. Ang mga ginikanan mahugno dihang mamatyan ug anak. Busa imadyina ang grabeng kakurat ug kaguol nga gibati ni Job ug sa iyang asawa dihang nahibaloan nila nga namatay ang tanan nilang 10 ka anak. Mao diay nga gigisi ni Job ang iyang besti tungod sa kaguol ug nalup-og siya!​—Job 1:18-20.

⁶ Dayon gihatagan ni Satanas si Job ug ngutngot ug makauulaw kaayong sakit. (Job 2:6-8; 7:5) Sa wala pa nâ mahitabo, si Job tinahod kaayo sa ilang komunidad. Ang mga tawo magpatambag pa gani niya. (Job 31:18) Karon ila na siyang gilikayan. Nagpalayo niya ang iyang mga igsoon, ang mga suod kaniya, ug bisan ang iyang mga sulugoon!​—Job 19:13, 14, 16.

7. (a) Unsay gituohan ni Job nga hinungdan sa iyang pag-antos, pero unsay wala gyod niya himoa? (b) Unsa tingali maatubang sa usa ka Kristohanon nga parehas sa makita diha sa hulagway?

⁷ Gusto ni Satanas nga patuohon si Job nga nag-antos siya kay nasuko si Jehova kaniya. Pananglitan, gipahuros ni Satanas ang kusog nga hangin aron mahagsa ang balay diin nangaon ang tanang 10 ka anak ni Job. (Job 1:18, 19) Nagpakanaog sab siyag kalayo gikan sa langit ug gisunog ang mga karnero ni Job ug ang mga sulugoon nga nag-atiman niini. (Job 1:16) Kay ang hangin ug kalayo naggikan sa langit, nagtuo si Job nga si Jehova nga Diyos ang hinungdan niini. Tungod ana, naghunahuna si Job nga basig napasuko niya si Jehova. Bisan pa niana, wala gyod tungloha ni Job ang iyang langitnong Amahan. Miingon si Job nga sulod sa taas na nga panahon, daghan siyag nadawat nga maayo gikan kang Jehova. Naghunahuna siya nga kon iyang gidawat ang maayo, kinahanglan nga andam sab siyang modawat sa dili maayo. Busa siya miingon: “Padayong dayegon ang ngalan ni Jehova.” (Job 1:20, 21; 2:10) Bisan pag si  Job nawad-ag kabtangan, mga anak, ug maayong panglawas, nagmatinumanon gihapon siya kang Jehova. Pero wala mohunong si Satanas.

8. Unsay sunod nga paagi nga gigamit ni Satanas?

⁸ Si Satanas mihimog laing paagi; iyang gigamit ang tulo nga nagpakaaron-ingnong higala ni Job aron ipabati kang Job nga wala siyay pulos. Miingon sila nga nag-antos si Job kay daghan siyag gihimong daotan. (Job 22:5-9) Ila pod siyang gipatuo nga bisan tingali wala siyay gihimong daotan, ang iyang mga paningkamot nga mohimog maayo walay bili sa Diyos. (Job 4:18; 22:2, 3; 25:4) Sa ato pa, gusto nilang maghunahuna si Job nga wala siya higugmaa ug atimana sa Diyos ug walay bili ang iyang pag-alagad Kaniya. Ang ilang gisulti posibleng makapabati kang Job nga wala na siyay paglaom.

9. Unsay nakatabang kang Job nga magpabiling lig-on?

⁹ Imadyina ang nahitabo. Si Job naglingkod sa abo, ug way hunong ang iyang kasakit. (Job 2:8) Wala siya lung-i sa iyang mga kauban; padayon nilang gidaot ang iyang pagkatawo ug reputasyon. Bug-at kaayo ang iyang gipas-ang mga problema, ug daw giduslak ang iyang kasingkasing sa kaguol tungod sa kamatayon sa iyang mga anak. Sa primero, naghilom lang si Job. (Job 2:13–3:1) Kon ang mga kauban ni Job nagtuo nga ang iyang paghilom nagpasabot nga iya nang biyaan si Jehova, nasayop sila. Si Job​—nga posibleng mihangad ug mitan-aw sa iyang mga kauban—​miingon: “Hangtod nga ako mamatay, dili gyod nako wad-on ang akong integridad!” (Job 27:5) Unsay nakatabang kang Job nga magpabiling lig-on bisan pa sa tanan niyang pag-antos? Tinuod, guol kaayo siya, pero wala gyod siya mawad-ig paglaom nga tabangan siya sa iyang mahigugmaong Diyos. Nahibalo siya nga bisag mamatay siya, banhawon siya ni Jehova.​—Job 14:13-15.

10. Unsay gitudlo kanato sa estorya sa kinabuhi ni Job?

¹⁰ Ang estorya sa kinabuhi ni Job nagtudlo nato nga dili ta mapugos ni Satanas nga biyaan si Jehova ug nga si Jehova nahibalo sa tanang nagakahitabo. Makatabang pod ni nga mas masabtan nato ang mga isyu nga konektado niini nga hitabo. Konsideraha ang pipila ka leksiyon nga atong makat-onan kang Job.

11. Unsay atong madahom kon padayon tang mosalig kang Jehova? (Santiago 4:7)

¹¹ Gipamatud-an ni Job nga kon padayon tang mosalig kang Jehova, makalahutay ta sa bisan unsang pagsulay ug masuklan nato si Satanas. Ug unsay atong madahom? Gipasaligan ta sa Kasulatan nga ang Yawa mokalagiw gikan kanato.​—Basaha ang Santiago 4:7.

12. Sa unsang paagi napalig-on si Job sa paglaom sa pagkabanhaw?

¹² Kinahanglang lig-on ang atong pagtuo sa pagkabanhaw. Sa nahisgotan sa nag-unang artikulo, sagad gamiton ni Satanas ang kahadlok nga mamatay aron ikompromiso nato ang atong integridad. Sa kahimtang ni Job, miingon si Satanas nga buhaton ni Job ang tanan, bisan ang pagkompromiso sa iyang integridad, aron lang dili siya mamatay. Sayop si Satanas. Bisan dihang nagtuo si Job nga mamatay na siya, wala siya mokompromiso. May pagsalig siya sa pagkamaayo ni Jehova ug lig-on ang iyang paglaom nga tabangan gyod siya ni Jehova, ug tungod niana, nakalahutay siya. May pagtuo si Job nga kon dili siya tabangan ni Jehova samtang buhi siya, banhawon ra unya siya sa Diyos. Tinuod gyod kang Job ang paglaom sa pagkabanhaw. Kon kini nga paglaom tinuod kanato, dili gyod nato ikompromiso ang atong integridad bisan pag posible tang mamatay.

13. Nganong dili nato angayng balewalaon ang mga paagi nga gigamit ni Satanas kang Job?

¹³ Dili nato angayng balewalaon ang mga paagi nga gigamit ni Satanas kang Job, kay mao pod ni ang iyang gigamit kanato karon. Matikdi ang akusasyon ni Satanas: “Ang tawo [dili lang si Job] maghatag sa tanan niyang nabatonan alang sa iyang kinabuhi.” (Job 2:4, 5) Sa ato pa, nangangkon si Satanas nga wala gyod ta mahigugma kang Jehova nga Diyos ug nga ato Siyang biyaan kon mao nay makaluwas sa atong kinabuhi. Miingon pod si Satanas nga wala ta higugmaa sa Diyos ug nga balewala ra Niya ang atong mga paningkamot nga mapalipay Siya. Kay napasidan-an na, kita nga naglaom kang Jehova dili mailad ni Satanas.

14. Unsay atong mahibaloan bahin sa atong kaugalingon dihang makaatubang tag mga pagsulay? Iilustrar.

¹⁴ Angay natong isipon ang mga pagsulay ingong kahigayonan nga mas mailhan ang atong kaugalingon. Ang mga pagsulay nga naatubang ni Job nakatabang niya nga makita ang iyang mga kahuyangan ug matul-id kini. Pananglitan, iyang nakat-onan nga kinahanglan siyang mahimong mas mapaubsanon. (Job 42:3) Daghan pod tag makat-onan bahin sa atong kaugalingon dihang mag-atubang tag mga pagsulay. Ang brader nga si Nikolay * gipriso bisag naa siyay grabeng mga sakit. Siya miingon: “Dihang napriso ko, mora kog gi-X-ray, kay nakita nako kon unsang mga kinaiya ang angay nakong pauswagon.” Kon mailhan na nato ang atong mga kahuyangan, makahimo na tag mga paagi nga matul-id kini.

15. Kinsay angay natong paminawon, ug ngano?

¹⁵ Kinahanglang maminaw ta kang Jehova, dili sa atong mga kaaway. Naminaw pag-ayo  si Job dihang nakigsulti kaniya si Jehova. Gitabangan sa Diyos si Job nga makaamgo, nga mora bag giingnan siya: ‘Nakita ba nimo diha sa akong gipanglalang kon unsa ko ka gamhanan? Nahibalo ko sa tanan nga nahitabo nimo. Naghunahuna ba ka nga dili ka nako kayang atimanon?’ Tungod ana, naapresyar pag-ayo ni Job ang pagkamaayo ni Jehova, ug siya mapainubsanong miingon: “Ang akong mga dalunggan nakadungog bahin kanimo, apan karon ang akong mga mata nakakita kanimo.” (Job 42:5) Dihang gisulti ni Job kining mga pulonga, tingali naglingkod pa gihapon siya sa abo, nalukop gihapon siyag mga hubag, ug hilabihan pa ang iyang kaguol sa kamatayon sa iyang mga anak. Bisan pa niana, gipasaligan ni Jehova si Job nga Iya siyang gimahal ug giuyonan.​—Job 42:7, 8.

16. Sumala sa Isaias 49:15, 16, unsay angay natong hinumdoman dihang makaatubang ug mga pagsulay?

¹⁶ Karon pod, insultohon tingali ta sa mga tawo ug isipon nga walay pulos. Tingali ilang daoton ang atong reputasyon o ang atong organisasyon ug “butangbutangan [ta] sa tanang matang sa buhat nga daotan.” (Mat. 5:11) Nakat-onan nato sa kinabuhi ni Job nga si Jehova may pagsalig nga magpabilin tang maunongon kaniya dihang mag-atubang ug mga pagsulay. Gihigugma ta ni Jehova, ug dili gyod niya biyaan kadtong naglaom niya. (Basaha ang Isaias 49:15, 16.) Ayaw paminawa ang bisan unsang pagpangdaot nga gisulti sa mga kaaway sa Diyos! Ang brader nga si James, nga taga-Turkey, ug ang iyang pamilya nakasinatig grabeng mga pagsulay. Siya miingon: “Nakita namo nga maluya mi kon  maminaw mi sa mga pagpangdaot bahin sa katawhan sa Diyos. Maong nagpokus mi sa among paglaom sa umaabot ug nagpabiling dasig sa among pag-alagad kang Jehova. Tungod ana, wala mawala ang among kalipay.” Sama kang Job, maminaw ta kang Jehova! Ang mga pagpangdaot nga gisulti sa atong mga kaaway dili makapalong sa atong paglaom.

17. Unsay imong makat-onan sa matinumanong mga lalaki ug babaye sa Hebreohanon kapitulo 11?

¹⁷ Si Job usa lang sa mga alagad ni Jehova nga nagpabiling lig-on bisan pa sa grabeng mga pagsulay. Sa sulat ni apostol Pablo sa mga Hebreohanon, gihisgotan niya ang uban pa ug gitawag sila nga “bagang panganod sa mga saksi.” (Heb. 12:1) Silang tanan nakaagig grabeng mga pagsulay, pero nagmatinumanon gihapon sila kang Jehova sa tibuok nilang kinabuhi. (Heb. 11:36-40) Nasayang ba ang ilang paglahutay ug paningkamot? Wala gyod! Bisag wala nila makita ang katumanan sa tanang saad sa Diyos sa buhi pa sila, padayon silang milaom kang Jehova. Ug kay segurado sila nga si Jehova nalipay kanila, masaligon sila nga ilang makita ang katumanan sa maong mga saad. (Heb. 11:4, 5) Ang ilang ehemplo makapalig-on sa atong determinasyon nga padayong molaom kang Jehova.

18. Unsay determinado nimong himoon? (Hebreohanon 11:6)

¹⁸ Karon, nagpuyo ta sa kalibotan nga nagkagrabe ang pagkadaotan. (2 Tim. 3:13) Padayon gihapong ginasulayan ni Satanas ang katawhan sa Diyos. Pero bisan unsang kalisdanan ang atong maatubang, hinaot padayon tang maningkamot pag-ayo sa pag-alagad kang Jehova, kay nahibalo ta nga “kita naglaom sa buhi nga Diyos.” (1 Tim. 4:10) Hinumdomi nga ang gihimo sa Diyos kang Job nagpamatuod nga “si Jehova mabination kaayo ug maluluy-on.” (Sant. 5:11) Hinaot magpabilin pod tang maunongon kang Jehova kay segurado ta nga Iyang gantihan kadtong “sinserong nangita kaniya.”​—Basaha ang Hebreohanon 11:6.