MUTWE WAKULILONGESA 27
“Twaminyina Yehova”
“Twaminyina Yehova! Takama, mbunge ye yikajikize.”—SAMU 27:14.
MWASO 128 Nyongononenu Ndo Kusongo
CHIKUMA CHILEMU *
1. (a) Kutalatala chika Yehova hanatwehe? (b) ‘Kutwaminyina Yehova’ yika chinalumbunuka? (Tala “Ulumbunwiso wa Amwe Maliji.”)
YEHOVA hanahane kutalatala chipema kuli atu eswe waze akumuzanga. Kwasala hakehe mahwisa misongo, yinyengo ni kufwa. (Uso. 21:3, 4) Iye makakwasa “yimbovu” waze akutwaminyina muli iye hanga apwise hashi heswe paraisu. (Samu 37:9-11) Nawa mu chifuchi chaha, mutukapwa ni usepa upema ni Yehova, usepa unahiane uze tuli nawo musono. Chochene, tuli ni kutalatala chipema! Mba mumu liaka mutuhasa kufuliela ngwetu yilakenyo yeswe ya Zambi kumuyikamanunuka? Mumu iye kakumanununa yuma yize akulakenya. Kashika, mutuhasa ‘kutwaminyina Yehova’ ni mbunge yeswe. * (Samu 27:14) Chino mutuchisolola ha kushimbwila ni uhumikizo hamwe ni uwahililo ngwo Zambi mamanununa yilakenyo yenyi.—Iza. 55:10, 11.
2. Chilakenyo chika chize Yehova hanamanununa?
2 Yehova hanasolola pundu ngwenyi, kakumanununa yilakenyo yenyi. Tutalenu chimwe chilweza. Iye kalakenyene mu mukanda wa Usolwelo ngwenyi, ha mashimbu jetu te makunga hamuwika atu aku mavungu, minyachi ni malimi eswe hanga amuwayile mu jila yalita. Musono, atu jacho kakwavuluka ngwo “mbunga yinene.” (Uso. 7:9, 10) Chipwe ngwe kali malunga, mapwo ni ana aku yifuchi yeka ni yeka, nihindu ayo eswe kali asoko. (Samu 133:1; Yoa. 10:16) Chikwo nawa, kakwambujola sango lipema ni mbunge yeswe. Ayo kakulilulieka hanga ambujole kuli waze eswe mazanga kupanjika sango ja chifuchi chaha. (Mateu 28:19, 20; Uso. 14:6, 7; 22:17) Nyi unalingi chihanda cha mbunga yinene, kwamba pundu wakushimbwila ni mbunge yeswe ngwo mu paraisu yuma muyikapema chinji.
3. Yika Satana akuzanga kutulinga?
3 Satana kazangile hanga tupwe ni kutalatala cha kulutwe lia matangwa. Iye kanazange hanga tunyonge ngwetu, Yehova keshi kulihulumba hali yetu nawa ngwetu kechi kamanununa yilakenyo yenyi. Nyi Satana matupiangula ni kupihisa kutalatala chetu, mutuhona hamu ni kwecha kulingila Yehova. Ngwe chize mutumona, Ndiapu kafupile kupihisa kutalatala cha Yombi ni kumutwala hanga eche kuwayila Yehova.
4. Yika mutumona ha mutwe uno? (Yombi 1:9-12)
4 Ha mutwe uno, mutumonaho yize Satana azachishile hanga ashinjile Yombi eche kuwayila Yehova. (Tanga Yombi 1:9-12.) Mutumonaho nawa yize mutulilongesa ha chilweza cha Yombi ni yize muyitwaha shindakenyo ngwetu, Zambi kakutuzanga nawa makamanununa yilakenyo yenyi.
SATANA KAFUPILE KUPIHISA KUTALATALA CHA YOMBI
5-6. Yika yalingiwile kuli Yombi ha amwe mashimbu?
5 Yombi kapwile ni mwono upema ni usepa upema ni Yehova. Kapwile ni usoko unene walinunga nawa te pichi munene. (Yombi 1:1-5) Alioze ha tangwa limuwika, Yombi yatokesa yuma yeswe. Chitangu, yatokesa upite weswe. (Yombi 1:13-17) Hanyima, ana jenyi eswe yafwa. Achinyonga kama chize Yombi evwile. Yisemi nyi mafwisa mwana umuwika kakwivwa yikola yinji ku mbunge. Haliapwila achinyonga yikola yize Yombi ni mukwo-pwo evwile ha kufwisa ana kumi ha chisuho chimuwika. Yino yeswe yatukwasa kunyingika yize yatwalile Yombi mba asuwe mazalo ni kulimbila-mbila mu mavu!—Yombi 1:18-20.
6 Kusulaho, Yombi mwene yamwasa yikola kuli Satana. (Yombi 2:6-8; 7:5) Shimbu yino te kanda yilingiwa, Yombi kapwile ni kumusa vumbi linji kuli atu waze te atunga no. Ayo kapwile ni kumwita-ta yiyulo. (Yombi 31:18) Alioze hanyima lia yino, atu eswe yaputuka kumuchina. Kapwile ni kumwehuka kuli mandumbu jenyi, masepa chipwe lume tuvumbi twenyi!—Yombi 19:13, 14, 16.
Mandumbu anji musono kanahase kunyingika chize Yombi evwile muze apalikile mu yipikalo (Tala paragrafu 7) *
7. (a) Yombi kanyongene ngwenyi lamba lienyi kuli liakatukile, alioze yika kakalingile? (b) Yipikalo yika mukwa-Kristu mahasa kupalika yinalifu ni yize yili ha chizulie?
7 Satana kazangile hanga Yombi anyonge ngwenyi, Zambi mwe wamunehena lamba liacho. Chakutalilaho, Satana kazachishile chijimbi cha tachi chize chapuzwile zuwo muze te muli ana kumi a Yombi. (Yombi 1:18, 19) Iye nawa kahulumwine kahia mwilu kaze kochele yimuna eswe a Yombi hamwe ni atu waze te anayifungu. (Yombi 1:16) Amu chijimbi ni kahia yakatukile mwilu, yino yatwalile Yombi kunyonga ngwo Yehova mwe wayinehene. Hachino, Yombi yanyonga ngwenyi, kota kalingile chuma chize chevwishile Yehova kupiha. Chipwe chocho, kakambile yuma yipi hali Yehova. Yombi kanyingikine ngwenyi, Yehova kamuhele yuma yipema ha miaka yinji. Chocho yanyonga ngwenyi, nyi kakutayiza yuma yipema yize te akumwaha, katamba kutayiza ni yuma yipi. Mba yamba ngwenyi: “Jina lia Yehova likafumane.” (Yombi 1:20, 21; 2:10) Chipwe ngwe Yombi kayijile, yatokesa upite ni ana jenyi eswe, nihindu kanungine ni kushishika kuli Yehova. Alioze, Satana te kanda achihwisa kumwesa Yombi lamba.
8. Chuma chikwo chika Satana azachishile hanga amwese Yombi lamba?
8 Satana kazachishile nawa chuma chikwo hanga amwese Yombi lamba. Iye yazachisa masepa atatu a mahuza waze atwalile Yombi kulivwa ngwe keshi ulemu. O yamba ngwo, Yombi te kanamono lamba liacho mumu lia yuma yipi yize alingile. (Yombi 22:5-9) Chikwo nawa, yafupa hanga Yombi atayize ngwenyi, chipwe ngwe kalingile yuma yinji yipema, nihindu yuma yacho te kuyishi ulemu kuli Zambi. (Yombi 4:18; 22:2, 3; 25:4) Kwamba pundu, ayo kafupile hanga Yombi anyonge ngwenyi, Yehova keshi kumuzanga, keshi kulihulumba hali iye nawa kuchishi ni ulemu kumulingila. Maliji wano kachi katwalile Yombi kutokesa kutalatala chenyi.
9. Yika yakwashile Yombi kupwa ni hamu ni kutakama?
9 Achinyonga Yombi kanatwame mu uto ni kwivwa yikola yinji. (Yombi 2:8) Masepa jenyi a mahuza kananungu ni kwamba ngwo, iye kali mutu mupi nawa ngwo yuma yeswe yipema yize alingile kuyishi ulemu. Yipikalo yenyi yinamulemena ngwe luliwe lulemu, hamwe ni yikola yize anevu mumu lia kufwa cha ana jenyi. Ku uputukilo, Yombi kahanjikile chuma nichimwe. (Yombi 2:13–3:1) Alioze nyi masepa jacho a saki kanyonga ngwo, kuhola cha Yombi chinasolola ngwo mehuka Tangi yenyi, acho kanaliongo ene. Ha shimbu limwe, Yombi kota yazundula mutwe, yalitala ni masepa jacho a mahuza meso-ni-meso, ni kwamba ngwenyi: “Ndo kufwa chami chichi kwecha ungunu wami.” (Yombi 27:5) Yika yakwashile Yombi kupwa ni hamu ni kutakama chipwe ngwe te kanapalika mu lamba linji? Yize yamukwashile, yili kununga ni kufuliela ngwenyi Zambi yenyi wa zango te mahwisa lamba lienyi. Iye kanyingikine ngwenyi, chipwe ngwe mafwa, nihindu Yehova makamuhindwisa.—Yombi 14:13-15.
KUCHI MUTUHASA KWIMBULULA YOMBI?
10. Yika lusango wa Yombi atulongesa?
10 Lusango wa Yombi katulongesa ngwo, Satana kechi kuhasa kutushinjila hanga twehuke Yehova, nawa ngwo Yehova kananyingika yeswe yize twakupalika ku mwono wetu. Katukwasa nawa tunyingike yuma yeswe yize yinatale ha ushishiko wetu kuli Yehova. Haliapwila tutalenu yikuma yimwe yize mutuhasa kulilongesa hali Yombi.
11. Shindakenyo yika mutuhasa kupwa nayo nyi mutununga ni kujikijila muli Yehova? (Tiangu 4:7)
11 Chilweza cha Yombi chinasolola ngwo, nyi mutununga ni kujikijila muli Yehova, mutuhasa kunyongonona mu yeseko yeswayo ni kulimika ni Satana. Mba yika muyilingiwako? Mbimbiliya yinatwehe shindakenyo ngwo, Ndiapu kumatuchina.—Tanga Tiangu 4:7.
12. Kuchi kutalatala cha uhindukilo chatakamishile Yombi?
12 Twatamba kufuliela chinji ha kutalatala chetu cha uhindukilo. Ngwe chize twamonanga ha mutwe wapalika, Satana kanji-kanji kakuzachisa woma wa kufwa hanga atupiangule tuhone kushishika kuli Yehova. Satana kambile hali Yombi ngwenyi, te mahasa kulinga chuma cheswacho hanga alamwine mwono wenyi, chipwe lume kwecha kulingila Yehova. Alioze Satana te kanaliongo mwene. Mumu chipwe muze Yombi amwene ngwenyi te kwasala hakehe hanga afwe, nihindu yanunga ni kushishika kuli Yehova. Chuma chize chamukwashile, chili kujikijila ha upeme wa Yehova ni kupwa ni shindakenyo ngwenyi, Yehova te mahwisa yipikalo yenyi. Yombi kafulielele ngwenyi, nyi Yehova kahwishile yipikalo yenyi muze te ali ni mwono, nihindu te mayihwisa muze mamuhindwisa kulutwe lia matangwa. Iye kapwile ni kufuliela chinji ha uhindukilo wa afu. Nyi mutufuliela chinji uhindukilo, kukushi chuma nichimwe chize muchitukwika kulingila Yehova, chipwe che kufwa kuchichi kuhasa.
13. Yika twalilongesa ha yize Satana ambile hali Yombi?
13 Chili chilemu kunyingika kanawa yuma yize Satana azachishile hanga eseke Yombi, mumu ye akuzachisa nawa musono. Ivwenu mahuza waze Satana ambile: “Mutu [hi Yombi wika ko] mecha yeswe ali nayo ha kulamwina mwono wenyi.” (Yombi 2:4, 5) Ha kwamba maliji wano, Satana yasolola ngwenyi, yetu kutushi kuzanga Yehova ni mbunge yeswe, nawa ngwenyi nyi matwita hanga tusakule kulingila Yehova ni kulamwina mwono wetu, musakula kulamwina mwono wetu. Chikwo nawa, Satana yamba ngwenyi, Yehova keshi kutuzanga nawa ngwenyi keshi kupala tachi jize twakusa hanga tumuvwise kuwaha. Alioze, amu tunanyingika yize Satana anafupu kutulinga, kutuchi kutayiza mahuza jacho.
14. Yika yipikalo yakutukwasa kunyingika? Hana chilweza.
14 Twatamba kumona yipikalo ngwe jila yize muyitukwasa kulinyingika kanawa. Yipikalo yakwashile Yombi kunyingika ulelu wenyi ni kwalumuna yimwe ku mwono wenyi. Chakutalilaho, iye kanyingikine ngwenyi te kanafupiwa kulikehesa. (Yombi 42:3) Ni yetu mutuhasa kulinyingika kanawa muze mutupalika mu yipikalo. Ndumbu Nikolay, * yoze asele mu zuwo lia ususu chipwe ngwe kayiza, yamba ngwenyi: “Mashimbu waze nalingile mu zuwo lia ususu, kangukwashile kunyingika yitanga yize te ngunafupiwa kupwa nayo.” Kashika, nyi twanyingika ulelu wetu, mutusa tachi hanga tululieke haze tunafupiwa.
15. Iya twatamba kupanjika, nawa mumu liaka?
15 Twatamba kupanjika Yehova, hi akwa-kole jetu ko. Yombi kapanjikile kanawa Yehova muze ahanjikile nenyi. Yehova yakwasa Yombi kunyonga ha kumuhula yihula ngwe yino: ‘Shina unanyingika ndundo jize nazachishile hanga ngutange yuma yeswe? Yami ngunanyingika yuma yeswe yize unapalika ku mwono we. Shina unamono ngwe chichi kuhasa kukufunga?’ Yombi yakumbulula ni kulikehesa ni kusakwila Yehova ha upeme wenyi. Iye yamba ngwenyi: “Nevwile ni matwi jami lufuma wenu, alioze haliapwila ngunanumono zwalala.” (Yombi 42:5) Muze Yombi ambile maliji wano, kota te kanatwame mu uto, ni yilonda ha mujimba weswe ni kwivwa yikola mumu lia kufwa cha ana jenyi. Chocho, Yehova yasolola zango ni utayizo wenyi hali Yombi.—Yombi 42:7, 8.
16. Kulita ni Izaia 49:15, 16, yika twatamba kwiwuluka muze mutupalika mu yipikalo?
16 Musono, atu mahasa kutusosomba ni kutukekuna. Ayo nawa mahasa kufupa kupihisa lufuma wetu hanji wa ululikiso ni ‘kutulamikiza yuma ya ungulungulu.’ (Mateu 5:11) Lusango wa Yombi katulongesa ngwo, Yehova kakufuliela ngwenyi mutununga ni kushishika kuli iye muze mutupalika mu yipikalo. Yehova kakutuzanga chinji, kashika kechi keza kehuka waze akufuliela muli iye. (Tanga Izaia 49:15, 16.) Hachino, kanda tupwa ni kupanjika sango ja mahuza jize akwa-kole ja Zambi akuhanjika. James, umwe ndumbu wa ku Turquia yoze wamwene lamba linji hamwe ni usoko wenyi, yamba ngwenyi: “Twanyingikine ngwetu, kupanjika yuma ya mahuza yize atu akwamba hali tuvumbi twa Yehova te muchihasa kutuhongesa ku ufulielo. Chocho, yitulihulikila ha kutalatala chetu ni kulihana chinji mu mulimo wa Yehova. Yino ye yatukwashile kufunga uwahililo wetu.” Ngwe Yombi, yetu twakupanjika Yehova! Yuma ya mahuza yize akwa-kole akwamba, kuyichi kuhasa kupihisa kutalatala chetu.
KUTALATALA CHETU CHAKUTUTAKAMISA
Yehova kawahishile Yombi mumu lia ushishiko wenyi. Iye ni mukwo-pwo yazuka yiwape ya Yehova (Tala paragrafu 17) *
17. Yika twalilongesa ha yilweza ya malunga ni mapwo ashishika waze anatongola ha A-Hepreu 11?
17 Yombi kali umwe wa kuli tuvumbi twa Yehova yoze wanungine ni kusolola hamu ni tachi muze apalikile mu yipikalo yinji. Mu mukanda uze asonekenene A-Hepreu, postolo Paulu yatongola tuvumbi akwo anji, ha kwavuluka ngwo, “mbunga yinene ya yela.” (Hepre. 12:1) Ayo eswe kapalikile mu yipikalo yinji, chipwe chocho, yanunga ni kushishika kuli Yehova. (Hepre. 11:36-40) Shina kunyongonona cho ni tachi jize asele yayile mu meya? Ka, kuyakayile mu meya! Chipwe ngwe ha mashimbu jacho o kakamwene kumanunuka cha yilakenyo yeswe ya Zambi, nihindu kanungine ni kutwaminyina muli Yehova. Nawa mumu lia kunyingika ngwo kapwile ni utayizo wa Yehova, yino yaehele shindakenyo ngwo, te mamona umanunuko wa yilakenyo yenyi yeswe. (Hepre. 11:4, 5) Yilweza yo muyihasa kutwaha tachi hanga tununge ni kutwaminyina muli Yehova.
18. Kulita ni A-Hepreu 11:6, yika watamba kulinga?
18 Musono, tuli mu chifuchi chize chinayi ni kupihia hita shimbu. (2 Timo. 3:13) Satana kananungu ni kusa tuvumbi twa Zambi mu cheseko. Chipwe ngwe mutupalika mu yipikalo yeswayo, nihindu twatamba kusa tachi hanga tulingile Yehova ni mbunge yetu yeswe ni kutwaminyina “muli Zambi ya mwono.” (1 Timo. 4:10) Twiwulukenu ngwetu, mutapu uze Yehova awahishilemo Yombi, unasolola pundu ngwo Zambi kapwa “wa too ni vumbi ni keke.” (Tia. 5:11) Ni yetu mutuhasa kununga ni kushishika kuli Yehova ni kupwa ni shindakenyo ngwetu, iye makawahisa eswe “waze akumufupa.”—Tanga A-Hepreu 11:6.
MWASO 150 Fupenu Zambi Akanulamwine
^ Muze twakunyonga hali mutu yoze wanyongonwene mu yipikalo yinji, kanji-kanji twakwiwuluka Yombi. Yika mutuhasa kulilongesa ha chilweza cha lunga yono washishika? Mutulilongesa ngwetu, Satana keshi kuhasa kutushinjila hanga twehuke Yehova. Nawa ngwetu, Yehova kananyingika yuma yeswe yize yakulingiwa ku mwono wetu. Chikwo nawa, ngwe chize ahwishile yipikalo ya Yombi, iye makahwisa lamba lieswe lize twakumona. Nyi twasolola ku yitanga yetu ngwetu twakufuliela mu yuma yino, mutupwa mukachi ka atu waze ‘akutwaminyina Yehova.’
^ ULUMBUNWISO WA AMWE MALIJI: Liji lia Hepreu “kutwaminyina” kanji-kanji liakulumbunuka “kushimbwila” chinji chimwe chuma. Mulihasa kulumbunuka nawa kujikijila umwe mutu hanji kumufuliela.—Samu 25:2, 3; 62:5.
^ Majina amwe kapwa kwalumuna.
