CAWN AWK CAPAR 27
“BAWIPA Cu I Bochan U”
“BAWIPA cu i bochan u! Zumhnak ngei u, nan lung dong hlah u.”—SALM 27:14.
HLA 128 A Dongh Tiang Fek Tein Um
LANGHTERNAK *
1. (a) Jehovah nih zei ruahchannak dah a kan pek? (b) “Bawipa cu i bochan u” timi sullam cu zeidah a si? (“Biafang Fianternak” ah zoh.)
JEHOVAH nih amah a dawmi vialte kha a ṭha tukmi ruahchannak a pek hna. A rauhhlan ah zawtnak, ngaihchiatnak le thihnak kha a donghter cang lai. (Biat. 21:3, 4) Pathian nih vawlei kha paradis ah a thlen lai tiah aa ruahchanmi, “mi toi ah aa dormi” hna kha a bawmh hna lai. (Salm 37:9-11) Cun kan dihlak in amah he pehtlaihnak ṭha kan ngeih nakhnga a kan bawmh lai i atu ah kan hmuhmi nakin a ṭha deuh tukmi a si lai. Mah cu a ṭha tukmi ruahchannak a si! Pathian biakam pawl a tling hrimhrim lai ti kan zumhnak a ruang ṭha a um maw? Jehovah cu zeitikhmanh ah a biakam a tlolh bal lo. Cucaah ‘Bawipa i bochan’ awkah a ruang ṭha kan ngei. * (Salm 27:14) Pathian nih a biakam a tlinter lai caan kha lungsau tein le lunglawm tein kan hngahnak thawngin amah kan i bochan kha kan langhter.—Isa. 55:10, 11.
2. Jehovah nih zeidah a tuah cang?
2 Jehovah nih a biakam ningin a tuah zungzalmi kha a langhter cang. A min a thangmi tahchunhnak pakhat hi ruathmanh. Biathlam Baibal cauk ah Jehovah nih tuchan ah phun kip, ram kip le holh kip chungin a rami hna kha a thiangmi biaknak ah lungrual tein ka pumh hna lai tiah bia aa kam. Tuchan ah mah phu cu “mibu nganpi” in hngalh an si. (Biat. 7:9, 10) Mah phu ah aa telmi hna cu miphun, holh le hnulei sining aa dangmi pa, nu le ngakchia hna an si ko nain annih cu daihnak in a khatmi chungkhar pakhat an si. (Salm 133:1; Johan 10:16) Mah mibu nganpi cu lungtho tein phung a chimtu zong an si. An chimmi thawngṭha a ngaimi hna sin paohah a ṭha deuhmi vawlei ruahchannak kong chim awkah timhcia an si zungzal. (Matt. 28:19, 20; Biat. 14:6, 7; 22:17) Nang zong mibu nganpi ah naa tel ve ahcun a ṭha deuhmi vawlei ruahchannak cu na caah a sunglawi tukmi a si lai ti cu a fiang ko.
3. Satan i a hmuitinh cu zeidah a si?
3 Satan nih hmailei ruahchannak kha ngeihter aan duh lo. Jehovah nih zei ah a ka rel lo i a biakam ning zongin a tuah lai lo tiah zumhter aan duh. Satan nih kan i ruahchannak kha a hrawh khawh ahcun kan ngeihmi ralṭhatnak cu a tlau lai i Jehovah hmanh kan bia ti men lai lo. Satan nih Job kha aa ruahchannak tlauter awk le Jehovah biak ti lo awkah aa zuammi kha zohhmanh hna u sih.
4. Hi capar ah zei kong dah kan i ruah hna lai? (Job 1:9-12)
4 Hi capar ah Job nih a zumhfehnak a hlawt nakhnga Satan hmanmi lam cheukhat kong kan i ruah lai. (Job 1:9-12 rel.) Cun Job kong in zeidah kan cawn khawh, Pathian nih a kan dawt i a biakam pawl a tlinter lai ti i cinken cu zeicah a herh timi kong zong kan i ruah hna lai.
Satan Nih Job Aa Ruahchannak Tlauter Awkah Aa Zuam
5-6. Caan tawite chungah Job nih zeidah a rak ton?
5 Job cu nun nuam tein a nung i Jehovah he pehtlaihnak ṭha zong a ngei. An chungkhar cu an tam i an lung aa rual, cun ngeihchiah zong tampi an ngei. (Job 1:1-5) Asinain nikhat te ah Job nih a ngeihmi dihlak ti awk tlukin a rak sung. A hmasa ah a thilri chawva pawl a rak sung. (Job 1:13-17) Cun a dawtmi a fale vialte zong an thi dih. Mah thil sining kha chikkhat in ruathmanh. Nulepa caah fale pakhat thih hmanh hi lung a fak tuk. Cucaah Job le a nupi nih an fale pahra ningin an thi dih timi thawng an theih tikah zeitluk in dah an lau lai, an ngaih a chiat lai i an lung a fah lai ti khi na mitthlam ah cuanter hmanh. Job nih a ngaih a chiat tuk caah a thil a thleh i vawlei ah a bawhmi cu khuaruahhar awk a si lo!—Job 1:18-20.
6 Cun Satan nih Job kha a fak tukmi le fih a nung tukmi hma in a khahter. (Job 2:6-8; 7:5) Mah hlan ahcun Job cu mi nih upat tukmi pakhat a rak si. Ruahnak cheuhnak hal awkah a sinah an ra tawn. (Job 31:18) Asinain atu ahcun an hrial cang. A unau, a hawile le amah salle hmanh nih an hlawt!—Job 19:13, 14, 16.
Tuchan unau tampi nih Job tonmi sunghzatlaknak hna kha an hngalhthiam khawh (Catlangbu 7 zoh) *
7. (a) Job nih sifah harnak a tonnak a ruang kha zeitindah a ruah, asinain zei tuah awkah dah a rak al? (b) Khrihfa pakhat cu hmanthlak ah langhtermi thil he tahchunh khawh a simi hneksaknak pakhat kha zeitindah a ton khawh?
7 Satan nih Job kha Jehovah mithmai ṭha ka sungh caah sifah harnak ka tonmi a si tiah zumhter a duh. Tahchunhnak ah, Satan nih Job fale pahra hmunkhat ah nuam tein rawl an eiṭinak inn hrawh awkah thlichia kha a rak hman. (Job 1:18, 19) Cun vancung in mei a tlakter i Job ngeihmi saṭil pawl le saṭil a zohkhenhtu pawl kha a thah dih hna. (Job 1:16) Thli le mei cu vancung in a rami an si caah Job nih Jehovah Pathian sinin a rami a si tiah a rak ruah. Cucaah Job nih lam khatkhat in Jehovah ngaih ka chiatter tiah a rak ruah. Cutin ruat ko hmanh sehlaw Job nih vancung a Pa kha chiat a rak serh duh lo. Job nih kum tampi chung Jehovah sinin thilṭha tampi ka hmu ti kha a hngalh. Cucaah Job nih thilṭha kha lunglawm tein ka cohlan ahcun thilṭhalo zong ka cohlan awk a si tiah a rak ruah. Hitin a ti: “BAWIPA min cu thangṭhat si ko seh.” (Job 1:20, 21; 2:10) Job nih a chawva, a fale le a ngandamnak hna a sung dih ko nain Jehovah cungah zumhfek tein a um zungzal. Asinain Satan nih a cungah a dang thil tuah dingin aa zuam rih.
8. Satan nih Job cungah zeidah a tuah rih?
8 Job nih man ka ngei lo timi ruahnak a ngeih nakhnga Satan nih Job hawikom deu pathum kha a hman hna. Job nih thilṭhalo tampi a tuah caah sifah harnak a tonmi a si tiah mah pa hna nih an ti. (Job 22:5-9) Job nih thilṭha tampi a tuah ko nain mah kha Pathian nih zei ah a rel lo timi zumhnak a ngeih nakhnga zong an i zuam. (Job 4:18; 22:2, 3; 25:4) Cun Pathian nih a ka daw lo, a ka zohkhenh lo i a rian ka ṭuanmi zong man a ngei lo timi ruahnak a ngeih nakhnga zong an i zuam. An chimmi bia nih Job kha ruahchannak a ngei lomi bantukin a umter khawh.
9. Ralṭhat awk le lungṭhawn awkah Job kha zeinihdah a bawmh?
9 Mah hi na mitthlam ah cuanter hmanh. Job cu vutcam lakah a ṭhu i a fak tukmi hma kha a tuar. (Job 2:8) A hawile nih a ziaza he aa tlaiin zaangfahnak ngei loin an doh i a thang an chiat. A tonmi hneksaknak nih a rit tukmi lung bantukin a nenh i a fale an thih dih caah a lung a kekkuai dih. A hmasa ah Job cu dai tein a um. (Job 2:13–3:1) A hawile nih cutin dai tein a ummi cu Job nih Jehovah kha a hlawt hnik caah a si tiah an ruah, asinain mah cu a hmaan lo. Voikhat cu Job nih a hawikom deu hna kha zoh in hitin a ti men hna lai: “Ka thih tiangin ka sual lo, ka tinak kha ka ngol bal lai lo!” (Job 27:5) Sifah harnak a tong ko nain ralṭhat awk le lungṭhawn awkah Job kha zeinihdah a bawmh? A lung a dongh tuk lio hmanhah dawtnak a ngeimi Jehovah nih a ka bawmh lai timi ruahchannak kha a ngei peng. Ka thih hmanhah Jehovah nih a ka thawhter ṭhan lai ti kha Job nih a hngalh.—Job 14:13-15.
Job I Zohchunh Khawh Ning
10. Job kong in zeidah kan cawn khawh?
10 Jehovah hlawt awkah Satan nih a kan hnek kho lo ti le Jehovah nih thil sining vialte a hngalh dih ti kha Job kong in kan cawn. Job hmuhtonnak nih aa pehtlaimi thil sining hna kha ṭha tein hngalhthiam awkah a kan bawmh khawh. Job kong in a dang kan cawn khawhmi a kong cheukhat kha zohhmanh hna u sih.
11. Jehovah kan i bochan peng ahcun zeidah kan zumh khawh? (Jeim 4:7)
11 Jehovah kan i bochan peng ahcun hneksaknak vialte kha kan inkhawh lai i Satan zong hlawhtling tein kan doh khawh lai ti kha Job hmuhtonnak nih a langhter. A phichuak cu zeidah a si? Khuachia nih aan zaamtak hna lai tiah Baibal nih a ti.—Jeim 4:7 rel.
12. Thawhṭhannak ruahchannak nih Job kha zeitindah thazaang a ngeihter?
12 Thawhṭhannak ruahchannak cungah a fekmi zumhnak ngeih a hau. A hmasa capar ah kan i ruah cang bantukin Satan nih Jehovah cungah zumhfek tein kan um nakhnga lo thihnak ṭihnak kha a hman. Job kong zongah Satan nih Job kha a nunnak khamhnak caah Jehovah hmanh a hlawt ko lai tiah a ti. Asinain Satan cu a palh. Job nih ka thi cang lai timi ruahnak a ngeih lio hmanhah Jehovah cungah zumhfek tein a rak um peng. Jehovah ṭhatnak cungah zumhnak a ngei i a donghnak ah Jehovah nih a cungah ding tein thil a tuah lai timi a fekmi zumhnak a ngei. Cun Jehovah nih ka nun lioah a ka bawmh lo hmanhah hmailei ah a ka thawhter ṭhan lai tiah Job nih a zumh. Job nih thawhṭhannak ruahchannak kha a rak zumh taktak. Kannih zong thawhṭhannak kha kan zumh taktak ahcun thihnak ṭihnak nih kan zumhfehnak kha a hnorsuang kho lai lo.
13. Job tukforhnak caah Satan hmanmi lam hna kha zeicah lungthin kan pek awk a si?
13 Satan nih Job tukforhnak caah a hmanmi lam hna kha tuchan zongah a hman rih caah mah kong kha lungthin kan pek awk a si. Satan sualpuhnak hi zohhmanh u: “[Job lawng si loin] Mi nih cun a ngeihmi vialte cu a nunnak caah cun a sian ko lai ta.” (Job 2:4, 5) Satan nih Jehovah Pathian kha an daw taktak lo i an nunnak khamhnak ca ahcun Pathian kha an hlawt ko lai tiah sual a kan puh. Cun Pathian nih a kan daw lo i a lunglawmhter awkah kan i zuamnak zong zei ah a rel lo tiah Satan nih a ti. Satan aa zuamnak vialte kha kan hngalh caah a mihlennak hna kha kan zum lo.
14. Kan tonmi hneksaknak nih zeidah a langhter khawh? Tahchunhnak pe.
14 Hneksaknak hna kha kanmah kong i hngalhnak caanṭha in kan hmuh awk a si. Job kha a tonmi hneksaknak nih a derthawmnak kha a hngalhter i, i remh awkah a bawmh. Tahchunhnak ah, toidornak tam deuh in ngeih ka hau ti kha a hun hngalh. (Job 42:3) Kannih zong hneksaknak kan ton tikah kan kong kha tam deuh in kan hun hngalh khawh ve. A dam lo tuk buin thongthlak a simi unaupa Nikolay * nih hitin a ti: “Thonginn cu X-ray bantuk a si, Khrihfa pakhat i a chunglei sining hna kha a langhter.” Kan derthawmnak kan i hngalh tikah mah kha kan i remh khawh.
15. Aho bia dah kan ngaih awk a si, zeicah?
15 Kan ral pawl si loin Jehovah bia kha kan ngaih a herh. Job nih Jehovah chimmi bia kha ṭha tein a ngaih. Zeitluk in dah a zohkhenh ti kha a hngalhthiam nakhnga Pathian nih hitin biahalnak cheukhat a tuah: ‘Ka thilser khawhnak ṭhawnnak hi na hmu maw? Na cungah a tlungmi thil vialte hi ka hngalh dih. A ka zohkhenh kho lo tiin maw na ruah?’ Job nih toidornak he a lehrulh i Jehovah ṭhatnak cungah aa lawm tuk. Cucaah hitin a ti: “Hna theihnak lawngin nangmah cu ka rak in theih, Sihmanhsehlaw atu cu ka mit in kaan hmuh cang.” (Job 42:5) Job nih mah bia a chim tikah vutcam lakah a ṭhut lio, a pum ah a fakmi hma in a khah lio le a fale thihnak ruangah a ngaih a chiat tuk lio a si men lai. Cutin a si ko nain Jehovah nih Job a dawt le a mithmai ṭha a hmuh kha a langhter.—Job 42:7, 8.
16. Isaiah 49:15, 16 ningin hneksaknak kan ton tikah zei cungah dah lungthin kan pek awk a si?
16 Tuchan zongah mi nih an kan serhsat men lai i man a ngei lomi bantukin an kan pehtlaih men lai. Pumpak pakhat in asiloah kan bupi in kan thang an kan chiat men lai, cun “lih a phunphun” zong an kan puh men lai. (Matt. 5:11) Jehovah nih hneksaknak kan ton tikah a cungah zumhfek tein kan um lai tiah a zumh ti kha Job kong in kan hngalh. Jehovah nih a kan dawt i amah aa bochanmi hna kha zeitikhmanh ah a hlaw hna lai lo. (Isaiah 49:15, 16 rel.) Pathian ral pawl thangchiatnak bia cungah lungthin pe hlah! A chungkhar nih hneksaknak tampi a tongmi, Turkey ah a ummi unaupa James nih hitin a ti: “Pathian miphun kong he aa tlaiin lihbia an chimmi ngaihnak nih kan lung a donghter ti kha kan hun hngalh. Cucaah Pennak ruahchannak cungah lungthin kan pek i Jehovah rian kha lungtho tein kan ṭuan peng. Cutin kan tuah caah kan i lawm kho peng.” Job bantukin Jehovah bia kha kan ngaih! Kan ral pawl lihbia nih kan i ruahchannak kha a hrawk kho lo.
Naa Ruahchannak Nih Aan Khamh Lai
Job cu a zumhfehnak ruangah thluachuah pek a rak si. A nupi he Jehovah thluachuah kha caan saupi tiang an hmu (Catlangbu 17 zoh) *
17. Hebru dal 11 ah langhtermi zumhfekmi pa le nu hna kong in zeidah na cawn khawh?
17 Job cu a fakmi hneksaknak lakah ralṭha tein le fek tein a um pengmi Jehovah salle lakah pakhat a si. Lamkaltu Paul nih Hebru mi hna sin a cakuat ah “a nganmi tehte bu” tiah auh a simi a dang mi tampi kong kha a langhter. (Heb. 12:1) An dihlak in a fakmi hneksaknak hna an tong ko nain an nunchung Jehovah cungah zumhfek tein an um peng. (Heb. 11:36-40) An ngeihmi inkhawhnak le an i zuamnak cu pakpalawng a si maw? A si hrimhrim lo! An nunchung ah Pathian biakam vialte a tlinmi cu an hmu lo nain Jehovah kha an i bochan peng. Jehovah mithmai ṭha kan hmu ti kha an hngalh caah Pathian biakam pawl a tlinmi kan hmu lai ti zong an zumh. (Heb. 11:4, 5) An hmuhtonnak nih Jehovah i bochan peng ding timi kan biakhiahnak kha a fehter chin.
18. Zei tuah awkah dah bia na khiah? (Hebru 11:6)
18 Tuchan kan vawlei sining cu a chia chin. (2 Tim. 3:13) Satan nih Pathian miphun hneksaknak kha a ngol rih lo. Hmailei ah zuamcawhnak tampi kan tong ko lai nain teima tein Jehovah rian ṭuan awkah biakhiak hna u sih law ‘kan i ruahchannak cu a nungmi Pathian cungah bunh’ hna u sih. (1 Tim. 4:10) Pathian nih Job kha “Bawipa cu zaangfahnak le zawnruahnak in a khatmi a si” ti langhternak caanṭha a pekmi kha philhhlah. (Jeim 5:11) Kannih zong Jehovah cungah zumhfek tein um hna u sih law “amah a kawlmi” cu laksawng a pek hna ti kha zum hna u sih.—Hebru 11:6 rel.
HLA 150 Khamhnak caah Pathian Kawl
^ Hneksaknak tampi a tongmi mi pakhatkhat kong kan ruah tikah Job kha kan lung ah a chuak ko lai. Mah zumhfekmi pa sinin zeidah kan cawn khawh? Satan nih Jehovah hlawt awkah a kan hnek kho lo ti kha kan hngalh. Cun Jehovah nih thil sining vialte a hngalh dih ti zong kan hngalh. Jehovah nih Job tonmi hneksaknak vialte a donghter bantukin kan tonmi sifah harnak vialte zong nikhatkhat ah a donghter ve lai. Mah kong kan zumh kha kan tuahsernak in kan langhter ahcun ‘Bawipa aa bochanmi’ hna lakah kan i tel ve lai.
^ BIAFANG FIANTERNAK: “Ruahchannak” timi Hebru biafang i a hrampi a sullam cu thil pakhatkhat kha lungtho tein “hngah” kha a si. Cun mi pakhatkhat kha zumh asiloah i bochan timi sullam zong a ngei kho.—Salm 25:2, 3; 62:5; 71:5.
^ Min cheukhat thlen a si.
