1. (1) ¿Kʼãrẽ nebiata jʉ̃ãbibʉ Jeowabara? (2) ¿Kʼãrẽta jarakĩrãbʉ Jeowata jʉ̃ãibara? (Akʉra yi notata).

 ẼBẼRARÃ Jeowa mejãcha kãgapanʉrãra Jeowabara nebiata jʉ̃ãbibʉ, kayata jõbiyi, sopʉata akʉza beita (Apoc. 21:3, 4). Kʼarebayi ẽbẽrarã iyideba nebia jʉ̃ãpanʉrãra naʉ̃ drʉa ẽjũã bia babidamarẽã (Sal. 37:9-11). Adewara idi dayirãta iyi neũdukʼawuabʉrʉ maʉ̃ ewaridera iya kʼarebayi audre iyi neũdukʼawua bia bʼaita. Naʉ̃ nebia jʉ̃ãpanʉra arigʉ yibia. ¿Kʼãrẽa ĩjãseapanʉ maʉ̃ra aripe berabarita? Jeowaba jarabʉra aripe obʉ baera. Maʉ̃ kʼarea dayirãba jʉ̃ãpanʉ Jeowata (Sal. 27:14). * Dayirãba sobiade jʉ̃ãpanʉbʉrʉ mawũãra ũdubidayi Jeowaba nebia weyi abʉra jʉ̃ãpanʉta (Is. 55:10, 11).

2. ¿Kʼãrẽta ozebʉrʉ Jeowabara?

² Jeowabara ũdubi zebʉrʉ iya jarabʉra aripe obʉta. Akʉdaya naʉ̃ yizata. Iya Apocalipsis librode jarasi idi ewaride ẽbẽrarã badumaebemata akʉza badu bedʼea bedʼeabʉrata ãba yi jʉrebibasita mawũã ãbaʉba iyaʼa yiwidʼidamarẽã. Naʉ̃ra ẽbẽrarã trʉ̃gapanʉ mejãcha ẽbẽrarãta (Apoc. 7:9, 10). Maʉ̃ra ẽbẽrarãnera edabʉ yuwẽrãta, yumakẽrãrata, warrarata, wũãwũã zakerata, ẽbẽrarã awuara awuaraka bedʼeapanʉrata akʉza pʉwʉrʉ awuara awuaraka bʉrata. Mamina mawũãsidu ãyira mebẽrã kĩrãkʼa ãbapanʉ (Sal. 133:1; Juan 10:16). Adewara naʉ̃ra ẽbẽrarã mejãchabara sobiade jaradiapanʉ ãya nebia jʉ̃ãpanʉ ʉ̃rʉ akʉza yi ẽbẽrarã ãyi bedʼea ũrĩkĩrãpanʉrãra ãyara jarapanʉ naʉ̃ drʉara audre bia bʼaita (Mat. 28:19, 20; Apoc. 14:6, 7; 22:17). Bʉta maʉ̃ra ẽbẽrarã mejãchade edabʉbʉrʉ sobiade jʉ̃ãbʉbaibara maʉ̃ nebiara.

3. ¿Kʼãrẽta kãgabʉ Diarubara?

 ³ Diarubara kãgabʉ dayirãba Jeowadeba nebia jʉ̃ãbʉra aduadamarẽã, maʉ̃ba iya kãgabʉ dayirãba krĩchamarẽã Jeowabara dayirãra kãga ẽãta akʉza krĩcha ẽãta. Adewara kãgabʉ krĩchadamarẽã Jeowaba jarabʉra aripe berabari ẽãta. Maʉ̃ta mawũã berabarira dayirãba zowaĩnĩgʉa erbʉra aduaseapanʉ akʉza Jeowa ode panʉta idubʉseapanʉ. Atia akʉdayi sãwũã Diaruba aduabikĩrãbasita Jobʼba jʉ̃ãbadata, mawũã maʉ̃neba jĩgababita Jeowadeba.

4. ¿Kʼãrẽta kʼawuadayi naʉ̃ artikulodera? (Job 1:9-12).

⁴ Naʉ̃ artikulode kʼawuadayi kʼãrẽta osita Diaruba Job kʼẽrẽpabʉ aduabita (akʉra Job 1:9-12). Akʉza akʉdayi kʼãrẽta kʼawuaseapanʉta Job yizadeba adewara kʼawuadayi kʼãrẽa yibiata kĩrãbeita Jeowaba dayirãra kãgata akʉza iya jarabʉra wãrĩnu aripe berabarita.

5, 6. ¿Kʼãrẽta berabarisi Jobʼra?

⁵ Jobʼra biabasi, iyira Jeowa neũdukʼawuabasi. Maʉ̃ daucha iyi mebẽrãra kʼabanabasi akʉza ãbabasi. Adewara iya plata mejãcha erbasi (Job 1:1-5). Mamina ewari abaʉde jõma aduasi. Nããrãra aduasi iya nekʼãrẽ jõma erbadata (Job 1:13-17). Maʉ̃are beisi iyi wũãwũãra jõma, maʉ̃rãra iyara mejãcha kãgabasi. Wũãwũã aba beibʉrʉdera yi yibarirãra mejãcha sopʉapanʉ. Maʉ̃ba krĩchadaibara kʼãrẽaba sopʉasidata Jobʼta yi kimaʉ̃me kʼawuasidade ãyi wũãwũãra jõma beisita. Jobʼba maʉ̃ta ũrĩside iyi sopʉabʉ ũdubiya iyi wuata jẽguetasi (Job 1:18-20).

⁶ Diarubara kaya mitiata diasi Jobʼara (Job 2:6-8; 7:5). Jobʼara ẽbẽrarãbara wawia ũdubipanasi, ãya ũrãgʼa nesidabʉdera Jobʼidu wãpanasi (Job 31:18). Mamina iyi mawũã kayada tẽãra ẽbẽrarãba ũdu amasida akʉza bedʼea amasida. Iyi mebẽrãba akʉza iyi neũdukʼawuaraba adewara iyi nezokʼaraba kãgade ẽ basi (Job 19:13, 14, 16).

7. (1) ¿Kʼaiba zʉbʉriabibʉta krĩchabasi Jobʼbara akʉza kʼãrẽta oẽ basi?(2) ¿Dayirãra sãwũã Job kĩrãkʼa abarika berabariseabʉ? (Akʉra poto parrapo 7debemata).

⁷ Diaruba kãgabasi Jobʼba krĩchamarẽã iyira mawũã zʉbʉrianʉmʉta Jeowaba bia akʉ ẽ basi baera. Maʉ̃ kʼarea pʉãdrʉ zromata zokʼasi de kora bʉeita, mawũã Job wũãwũãra 10 mama ãba badata beaita (Job 1:18, 19). Adewara tʉbʉta zokʼasi mawũã Job nedʉwʉrʉra akʉza iyi nedʉwʉrʉra akʉbadara makenaita (Job 1:16). Jobʼba kʼawuasi maʉ̃ pʉãdrʉra akʉza maʉ̃ tʉbʉra bari ze ẽ basita maʉ̃ kʼarea krĩchasi maʉ̃ra Jeowaba zokʼasita iyiʉ̃me kĩrʉbasi baera akʉza iya kayiruata osi baera. Mawũãsidu Jobʼra imitia bedʼea ẽ basi Daizeze ʉ̃rʉ. Awuarabʉrʉ krĩchasi Jeowaba iya nebia diadata iya jidasibʉrʉ abarika nemitia diabʉrʉsida jidaibarata. Maʉ̃ kʼarea iya jarasi: Jeowa trʉ̃ra yi zroma babidua» (Job 1:20, 21; 2:10). Jobʼra zʉbʉriasimina akʉza iyi nebiasi aduasimina adewara mejãcha kayasimina, Jeoware kʼẽrẽpabasi. Mamina Diarubara mamabai idubʉ ẽ baibasi Jobʼra.

8. ¿Kʼãrẽ nekʼãrẽ awurudeba zʉbʉriabisi Diarubara Jobʼra?

⁸ Diaruba jʉrʉsi sãwũã nekʼãrẽ awurudeba zʉbʉriabita Jobʼra. Zokʼasi neũdukʼawuara zeri ẽãta ũbea, mawũã naʉ̃raneba Jobʼta iyikʉza sopʉa sentibita.  Naʉ̃ra ẽbẽrarãbara jarasida Jobʼra zʉbʉriabʉta iya nemitia mejãcha oda kʼarea (Job 22:5-9). Adewara krĩchabikĩrãpanasi iya maʉ̃ra kayirua oẽ basimina akʉza iyi ẽbẽra biamina Jeowabara iyira bia akʉ ẽ baibasita (Job 4:18; 22:2, 3; 25:4). Ãyara kãgabasi Jobʼba krĩchamarẽã Jeowabara iyira kãga ẽãta akʉza krĩcha ẽãta. Maʉ̃ kʼarea biga ẽãta Jeowaba zokʼabʉ oira. Ãya jaradaba Jobʼa krĩchabisi iyi zʉbʉriara wua jõ ẽ baita.

9. ¿Jobʼra kʼãrẽa zowaĩnĩgʉabasi mejãcha zʉbʉriasimina?

⁹ Krĩchadadrʉ naʉ̃ta, Jobʼra jewedabʉta itarra ʉ̃rʉ adewara iyi kaya pʉaba zʉbʉriabibʉ ewaride akʉza diamasi (Job 2:8). Adewara iyi neũdukʼawuarãra iyi ʉ̃rʉpanʉ akʉza iyi ʉ̃rʉ imitia bedʼeapanʉ. Maʉ̃ra bedʼea zroma jõma kʼarea Jobʼra sopʉabʉbaibara, maʉ̃ daucha iyi wũãwũãra beida kʼareabida mejãcha so zʉbʉriabʉbaibara. Abaedara iyara kʼãrẽ jara ẽ (Job 2:13-3:1). Jobʼta chupeabasibʉrʉ iyi neũdukʼawuarabara krĩchaseabasi iyara Jeowa odebʉta idubʉita, mamina maʉ̃ra sewida. Maʉ̃ tẽã Jobʼbara akʉbʉbaibara iyi neũdukʼawuarata mõbe naʉ̃ta jarabʉ: «Mʉ̃ bei ẽ nããra iyiʉ̃me kʼẽrẽpa bayi mʉ̃ra» (Job 27:5). Jobʼra, ¿kʼãrẽa zowaĩnĩgʉabasi mejãcha zʉbʉriasimina? Iya iyi mejãcha zʉbʉriasimina ĩjãbasi baera Jeowaba kʼarebaita. Jeowata jʉ̃ãbʉta adua ẽ basi. Iya kʼawuabasi iyi beisidu Jeowaba jẽda piradrʉbibasita (Job 14:13-15).

10. ¿Kʼãrẽta jaradiabʉ Job nebʉrabara?

¹⁰ Job nebʉraba jaradiabʉ Diarubara obe ẽãta dayirãba idubʉmarẽã Jeowa odebʉta. Job sãwũã berabaridaba nebiata  jaradiabʉ. Atia akʉdayi iyi yizadeba kʼãrẽta kʼawuaseapanʉta.

11. ¿Dayirãba ewari jõmaʉ̃nẽ Jeowa ʉ̃rʉ ĩjãbʉbʉrʉ kʼãrẽta ũdudai? (Santiago 4:7).

¹¹ Jobʼba ũdubisi dayirãba Jeowata ewari jõmaʉ̃nẽ ĩjãpanʉbʉrʉ bedʼea zroma zebʉrʉra awuantaita akʉza Diaruba dayirãba Jeowa odebʉta idubʉmarẽã bʉdera idubʉ ẽ baita. Mawũã opanʉbʉrʉ, ¿kʼãrẽta berabari? Daizeze Bedʼeaba jarabʉ Diarura wãita dayirãmaeba (akʉra Santiago 4:7).

12. Jobʼbara ĩjãbasi Jeowaba jẽda piradrʉbi ʉ̃rʉ, ¿maʉ̃bara sãwũã so zarea diasi iyira?

¹² Artikulo berabariside kʼawuasida Diarubara kãgabʉta dayirã kʼẽrẽpabʉta idubʉdamarẽã. Maʉ̃ kʼarea zokʼabʉ bei kʼarea perabʉta, mamina dayirãbara wãrĩnu ĩjãibara Jeowaba jẽda piradrʉbita. Krĩchadadrʉ Job berabaridata. Diarubara jarasi Jobʼbara Jeowade obʉra idubʉibasita mawũã iyi bebʉ adua ẽ baita. Naʉ̃ra wãrĩnu ẽ basi. Job iyi mejãcha zʉbʉriasimina akʉza iyi beidu krĩchasimina idubʉ ẽ basi Jeowa odebʉta. ¿Kʼãrẽba kʼarebasi iya maʉ̃ awuantaira? Iya kʼawuabasi Jeowara ẽbẽra biata akʉza jʉ̃ãbasi Jeowaba jõma ara oita. Iya ĩjãbasi maʉ̃ ewaride Jeowaba iyita kʼareba ẽ basibʉrʉ tẽã ʉ̃ra zeide jẽda piradrʉbibasita. Jobʼbara wãrĩnu ĩjãbasi Jeowaba jẽda piradrʉbi ʉ̃rʉra, dayirãbida abarika ĩjãpanʉbʉrʉ kʼẽrẽpapanañi awururaba beadaita jarapanʉmina.

13. ¿Dayirãbara kʼãrẽa biʼia akʉibara Diaruba kʼãrẽta osita Jobʼba Jeowa odebʉta idubʉmarẽã baside?

¹³ Dayirãbara biʼia akʉibara Diaruba kʼãrẽta osita Jobʼba Jeowa odebʉta idubʉmarẽã baside idi ewadebida abarika okĩrãbʉ baera. Akʉdadrʉ Diaruba kʼãrẽta jarasita Job ʉ̃rʉ akʉza ẽbẽrarã jõma ʉ̃rʉ. Iya jarasi: «Yumakẽrãba jõma erbʉra iyi bebʉbari diayi» (Job 2:4, 5). Diaruba jarakĩrãbasi dayirãbara Jeowara soiduba kãgabʉ ẽãta akʉza dayirãta Jeowa odebʉ kʼarea beaita topobʉrʉ jidaita dayirã bebʉ ẽdrʉbita. Adewara jarabʉ Jeowabara dayirãra kãga ẽãta akʉza iyara biʼia akʉ ẽãta, dayirãba iyi kʼarea kʼãrẽ obʉra. Dayirãba Jeowata jʉ̃ãpanʉbʉrʉ Diaruaʼa sewabi ẽ bayi, kʼawuapanʉ baera iya kʼãrẽta zokʼabʉta dayirãba Jeowa o idubʉmarẽã.

14. ¿Dayirãba bedʼea zroma ũdubʉrʉdera kʼãrẽta kʼawuaseapanʉ akʉza kʼãrẽ yizaba kʼarebabʉ naʉ̃ ʉ̃rʉ audre bia ũrĩta?

¹⁴ Bedʼea pʉa ũdubʉba kʼarebayi dayikʉza audre biʼia ũdukʼawuaita. Jobʼba zʉbʉria ũdudabara kʼarebasi iya kʼawuaita kʼãrẽta ara oibarabasita. Bari jaraita, ũdusi iyara audre edabʉta krĩchabʉta ũdubibarabasita (Job 42:3). Dayirãbida bedʼea zroma ũdubʉrʉdera kʼawuaseapanʉ kʼãrẽta awuara oibarata. Mawũã berabarisi Nikoláita, * iyira karselʼeda bʉesida mejãcha kayabasimina. Iya jarabʉ: «Karselʼeda bʼaiba kʼarebasi mʉ̃a kʼawuaita kʼãrẽne audre bia oibarabasita». Dayirãba kʼawuabʉdade kʼãrẽne awuara oibarata jʉrʉseapanʉ sãwũã ara oita.

15. ¿Kʼai bedʼeata ũrĩbara akʉza kʼãrẽa?

¹⁵ Ũrĩbara Jeowa bedʼeata, ũrĩ ẽ baibara dayi nejʉraraba jarabʉta. Jobʼbara kĩrãkita ũrĩsi Jeowaʼa iyiʉ̃me bedʼeasidera. Iyi biʼia krĩchabita Jeowaba naʉ̃ta widisi: «¿Mʉ̃a nekʼãrẽ parãnaneba ũdubʉka bʉa mʉ̃ zareara? Mʉ̃a biʼia kʼawuabʉ bʉa jõma kʼãrẽ ũdu zebʉrʉra. ¿Bʉmara mʉ̃a bʉra biʼia akʉ ẽka?». Jobʼba  eda krĩchabʉta ũdubi kʼãrãpe akʉza biga diabʉta ũdubi kʼãrãpe naʉ̃ta jarasi: «Mʉ̃ kʉwʉrʉba ũrĩbaribasi bʉ ʉ̃rʉ, mamina idibʉrʉ mʉ̃ dabʉba ũdubʉrʉ bʉra» (Job 42:5). ¿Kĩrãbebʉka Job samabasita maʉ̃ bedʼea jarasidera? Iyira waidide itarra ʉ̃rʉ jewedabasi akʉza kayabasi, maʉ̃ daucha sopʉabasi iyi wũãwũãra beida kʼarea. Iyi mawũãnʉmʉne Jeowaba jarasi mejãcha kãgabʉta akʉza iya bia akʉbʉta (Job 42:7, 8).

16. Isaías 49:15, 16ba jarabʉdebara, ¿kʼãrẽta kĩrãbedaibara bedʼea zroma ũdubʉdadera?

¹⁶ Idi ewade ʉ̃kʉrʉ ẽbẽrarãba i jʉra jaraseapanʉ dayirãta mawũã ẽ bʉrʉ bia edada ẽ bayi. Ãyara dayirã ʉ̃rʉ akʉza dayirã organizasion ʉ̃rʉ imitia bedʼeabikĩrãpanʉ, maʉ̃ kʼarea sewidata jarapanʉ dayirã ʉ̃rʉ (Mat. 5:11). Job yizaba jaradiabʉ Jeowabara ĩjãbʉta dayirãra kʼẽrẽpapanaseabʉta bedʼea zroma ũdubʉmina. Jeowabara mejãcha kãgabʉ dayirãra akʉza kĩrãdua ẽ bayi iyi ʉ̃rʉ ĩjãpanʉra (akʉra Isaías 49:15, 16). Ũrĩna ẽ baibara Daizeze nejʉraraba dayirã ʉ̃rʉ sewida jarapanʉra. Akʉdadrʉ James yizata, iyira Turquíadebema. Iya akʉza iyi mebẽrãbawaraʉba bedʼea zromata ũdu zebʉrʉ. Iya jarabʉ: «Daiba kʼawuasida Daizeze pʉwʉrʉ ʉ̃rʉ imitia jarapanʉta ũrĩpanasibʉrʉ sopʉadaibasita, maʉ̃ ʉ̃rʉ krĩchai kaʉde daibara krĩchasi Daizeze Nokʼoba kʼãrẽ nebia wei ʉ̃rʉ, adewara daiba oseabʉta osida Jeowaita, naʉ̃ba kʼarebasi dai sobia adua ẽ baita». Dayirãbara Jobde kĩrãkʼa oibara akʉza Jeowaba  jarabʉta ũrĩbara. Sewida dayirã nejʉraraba jarabʉ kʼarea, idubʉ ẽ baibara Jeowa jʉ̃ãbʉta.

17. Hebreos 11de bedʼeabʉ mebẽrã kʼẽrẽpapanana ʉ̃rʉ, ¿kʼãrẽta kʼawuaseapanʉ ãyi yizadeba?

¹⁷ Job abapaibʉrʉ zowaĩnĩgʉabʉta ũdubi ẽ basi bedʼea zroma ũdusidera. Pabloba jarasi kristianora ebreora mebẽrã mejãchaʉbida zowaĩnĩgʉa ũdubisidata (Heb. 12:1). Jõmaʉ̃ta bedʼea zroma ũdusimina kʼẽrẽpapanʉne beisida (Heb. 11:36-40).¿Ãya awuantada kʼarea nebia ũdusidaka? Mawũã, Jeowaba ãya jaradara jõma ũduda ẽ basimina aduada ẽ basi Jeowa jʉ̃ãpanʉta. Ãya kʼawuapanasi Jeowaba ãyira biʼia akʉbʉta. Maʉ̃ba ĩjãpanasi Jeowaba nebia diaya adara ãyabida ũduibasita (Heb. 11:4, 5). Ãyi yiza ʉ̃rʉ krĩchaiba kʼarebabʉ dayirãbida ĩjãita Jeowaba nebia weyi abʉra.

18. ¿Ʉ̃ra zeide kʼãrẽ kayirua zeita kʼawuada ẽ mina kʼãrẽta odaibara? (Hebreos 11:6).

¹⁸ Naʉ̃ drʉara wuabʉrʉ mitia wã (2 Tim. 3:13). Akʉza Diarubara jʉrʉbʉ sãwũã kayirua obita Daizeze ode panʉrãra. Ʉ̃ra zeide kʼãrẽ kayiruata ũduita kʼawua ẽ mina, opanadrʉ Jeowaba zokʼabʉta soiduba akʉza iyita ĩjãpanaera (1 Tim. 4:10). Job nebʉraba ũdubibʉ «Jeowaba soborekea akʉbʉta akʉza so zʉbʉria akʉbʉta dayirãra» (Sant. 5:11). Job kĩrãkʼa ewari jõmaʉ̃nẽ kʼẽrẽpapanaibara akʉza ĩjãibara Jeowaba «iyi jʉrʉbʉara nebiata diabʉta» (akʉra Hebreos 11:6).