TANE MEKUN 27
“Mejiune Jë Koi Iehova”
“Teqe Iehova ju; catejë, nge tro nyidëti a aegöcatene la hni ’ö; teqe Iehova ju.”—SAL. 27:14.
NYIMA 128 Cile Huti Ju Uti Hë La Pun
MEKUN KA TRU *
1. (a) Nemene la mejiune hnei Iehova hna hamë së? (b) Kola hapeu la kola hape, “troa treqe Iehova”? (Wange ju la “Göi Troa Trotrohnin.”)
IEHOVA a hamëne la ketre mejiune ka mingöminge kowe la itre ka hnimi Nyidrë. Easenyi catre hë tro Nyidrëti a apatrene la itre sine mec, me itre akötr memine la mec. (Hna ama. 21:3, 4) Tro Nyidrëti fe a xatuane “la itre ka menyik,” ene lo itre ka mejiune koi Nyidrë troa aparadraisone la ihnadro. (Sal. 37:9-11) Ketre, tro hmaca kö a sisitria catre la imelekeu së me Nyidrëti elany, hune la aqane imelekeu së me Nyidrëti enehila. Hapeu, tha itre hna thingehnaeane kö la ka amadrinë epun? Pine nemene matre easa mejiune laka, tro kö Iehova a eatrëne la itre hna thingehnaeane celë? Ke ka eatrëne palahi Iehova la itre hnei Nyidrëti hna qaja. Celë hi lai ka uku së troa “treqe Iehova.” * (Sal. 27:14) Nge easa amamane lai ngöne la easa treqene madrine la ijine tro Iehova a eatrëne la aja i Nyidrë.—Is. 55:10, 11.
2. Nemene hë la hnei Iehova hna kuca?
2 Ase hë Iehova a amamane laka, ka eatrëne palahi Nyidrëti la itre hnei Nyidrëti hna thingehnaean. Hane hi la ketre ewekë hnei Nyidrëti hna kuca. Ame ngöne la tusi Hna Amaman, hnei Iehova hna qaja göne la hneijine së laka, tro Nyidrëti a acasine ngöne la hmi ka wië, la itre atr ka xulu qa ngöne la itre nöjei nöj, me nöjei tribu, me nöjei qene lapa. Hna hëne la itre atr cili ka hape, “ka alanyimu atraqatr.” (Sal. 7:9, 10) Ngacama hna nyi atrene la gurupe cili hnene la itre trahmanyi me föe me itre nekönatr, ka isa hane ngönetrei, me qene hlapa, me nöj, ame pe, ka ihnimi catre angatr, me caas, me tingeting. (Sal. 133:1; Ioane 10:16) Ketre, angatre fe a catre cainöjëne la maca ka loi. Eje hi, ajane catr angatr troa ce thawa memine la itre atr la mejiune kowe la fene ka hnyipixe. (Mat. 28:19, 20; Hna ama. 14:6, 7; 22:17) Maine epuni fe hi la ketre ka hane sine la ka alanyimu atraqatr, ke eje hi, ka tru koi epuni la mejiune cili.
3. Nemene la aja i Satana?
3 Aja i Satana matre tha tro kö sa mejiune kowe la itre hna thingehnaeane hnei Iehova. Nge aja i angeic fe tro sa mekune ka hape, tha Iehova kö a hnehengazo së, nge tha tro kö Nyidrëti a eatrëne la itre hna thingehnaean. E tro Satana eatrëne la aja i angeic, tro ha pë trengecatre së, nge tro hë sa nuetriji Iehova. Nge tune la hne së hna troa ce wang, tro Diabolo a sewe Iobu troa nyihlue Iehova, me tha mejiune kowe la itre hnei Iehova hna thingehnaean.
4. Nemene la hne së hna troa ce wange ngöne la tane mekune celë? (Iobu 1:9-12)
4 Ame ngöne la tane mekune celë, tro sa ce wange la itre nyinyithina i Satana matre sewe Iobu troa nyihlue Iehova. (E jë la Iobu 1:9-12.) Ketre, tro fe sa xomi ini qa ngöne la tulu Iobu me ce wange la kepin matre loi e tro palahi sa mekune laka, Iehova hnimi së, nge tro kö Nyidrëti a eatrëne la itre hnei Nyidrëti hna thingehnaean.
SATANA THELE JËNE TROA APATREN LA MEJIUNE I IOBU
5-6. Nemene la itre ewekë ka traqa koi Iobu?
5 Lolo catre la mele i Iobu. Nge ketre lolo catre fe la imelekeu i angeic me Iehova. Hetrenyi Iobu la ketre fami ka tru nge ka caas. Ame fe angeic, ke ka trene mo. Ngo ngöne hi la ca drai, pë hnyawa ca ewekë i angeic. (Iobu 1:1-5) Ame lo xötrei ke, hna thapa la itre mo i Iobu. Nge ase jë hi lai, ke itre nekö hnimina i angeic. (Iobu 1:13-17) Pane mekune jë së la ka traqa koi Iobu. Akötre catre kowe la kem me thine troa öhne la kola mec la itre nekö i nyidro. Drei jë kö la akötre me hleuhleu i Iobu me ifënekö i angeic, la kola aca tro meci la 10 lao nekö i nyidro. Matre tha sesëkötre kö së la Iobu a kuie zezen la iheetre i angeic, me kei e kuhu hnadro, hatrene laka, akötre catre angeic!—Iobu 1:18-20.
6 Hnei Satana hna axulune la ketre meci koi Iobu, me thaipië angeic. (Iobu 2:6-8; 7:5) Ame ekö, Iobu la ketre atr hna metrötrën, nge tru la itre ka sipo eamo thei angeic. Ngo ame enehila, angatr pena sisi angeic. (Iobu 31:18) Hna nuetrij Iobu hnene la itre trejine me angeic, me itre sinee i angeic, me itre hlue i angeic!—Iobu 19:13, 14, 16.
Ijije hi tro la itre hlue i Iehova enehila a xomi ini qa ngöne la itre jol ka traqa koi Iobu (Wange ju la paragarafe 7) *
7. (a) Ame koi Iobu, drei la qane la itre akötre i angeic, nge hnei angeic kö hna qajangazo Iehova? (b) Tune kaa la aqane tro sa cile catr qëmeken la itupath tune la ka mama ngöne lai foto?
7 Satana a ajane tro Iobu a mekune ka hape, ame la kola traqa la itre jole koi angeic ke hnene laka, tha Iehova hmaca kö a hnimi angeic. Hnei Satana hna ufe la uma Iobu matre kei tran la 10 lao nekö i angeic. (Iobu 1:18, 19) Hnei angeice fe hna axulune la eë qa hnengödrai me dreuthe la itre mamoe me itre hlue i Iobu. (Iobu 1:16) Pine laka, ka ketre pengöne la aqane xulu la enyi me eë, Iobu a mekune ka hape, Iehova la ka axulune lai. Ame pe, tha hnei Iobu kö hna qajangazo Iehova. Atre hnyawa hi angeic laka, ame la trenamo pi angeic, ke hnei Iehova. Nge atre Iobu ka hape, hetre ijine loi me ijine ngazo. Nge ngacama jole ju hë, ngo loi pe tro angeic a kapa. Öni Iobu: “Loi e tro palahi a qaja aloine la ëje i Iehova.” (Iobu 1:20, 21; 2:10, MN) Hnei Iobu hna cile catr ngöne la nöjei pengöne jole cili. Ngazo pe, Satana palahi a thele troa akötrë angeic.
8. Nemene la ketre nyinyithina i Satana koi Iobu?
8 Ame la ketre nyinyithina i Satana ke, hnei angeic hna upe la köni sinee ka ngazo thiina matre troa thaipië Iobu. Öni angatr ka hape, ame la Iobu a akötr ke kolo ke, hetre ewekë ka ngazo hnei angeic hna kuca. (Iobu 22:5-9) Hnei angatre fe hna qaja koi Iobu ka hape, ngacama atr ka meköt angeic, ngo ka gufa la itre huliwa hnei angeic hna kuca koi Akötresie. (Iobu 4:18; 22:2, 3; 25:4) Angatr e cili a thele troa iaö Iobu me hape, tha Iehova kö a hnimi angeic, me thupë angeic, nge ka gufa la itre huliwa i angeic koi Iehova Akötresie. Hnene la itre trengewekë i angatr hna akucakucanyi Iobu.
9. Nemene la ka xatua Iobu troa cile catr?
9 Pane mekune jë la ijine cili. Iobu a lapa ngöne la hnatresij, nge akötre catr angeic. (Iobu 2:8) Nge kola thele troa iaö angeic me akötrë angeic, hnene la itre sinee ka iaö. Iobu palakö a hace fë la mecine la itre nekö i angeic, nge kolo hmaca nyixane la akötre i angeic hnene lo köni sinee ka iaö. Ame lo xötrei ke, pëkö ca meje i Iobu. (Iobu 2:13–3:1) Maine jë, kola mekune hnene la itre sinee ka iaö ka hape, ame la Iobu a lapa thaup ke, Iobu a troa nuetriji Iehova. Ngo ka tria la mekuna i angatr. Maine jë, hnei Iobu hna gala draië me hape koi angatr: “Tha tro kö ni a tije qaja la thinange ka pë ethan, uti hë meci hë ni!” (Iobu 27:5) Nemene la ka xatua Iobu troa cile catr? Ngacama tru ju hë la akötre i Iobu, ngo mejiune i angeic laka, tro kö Iehova a xatua angeic. Atre hi Iobu laka, e tro angeic a mec, ke tro kö Iehova a amele angeic hmaca.—Iobu 14:13-15.
TRO SA NYITIPU IOBU TUNE KAA?
10. Nemene la ini hne së hna xome qa ngöne la hna melëne hnei Iobu?
10 Kola ini së hnene la hna melëne hnei Iobu laka, thatreine kö Satana musinë së troa nuetriji Iehova. Ketre, atre hnyawa hi Iehova la ka traqa koi së. Kolo fe a xatua së troa trotrohnine la itre jol ka traqa koi së. Tro sa ce wang la itre xaa ini qa ngöne la hna melëne hnei Iobu.
11. Nemene la thangan, e tro sa mejiune koi Iehova? (Iakobo 4:7)
11 Hnei Iobu hna amamane laka, e tro sa mejiune koi Iehova, ijiji së hi troa elë hune la nöjei jol ka traqa koi së, me cile koi Satana. Nemene hë la thangan? Öni Tusi Hmitrötr, tro hë Diabolo a iananyi me easë.—E jë la Iakobo 4:7.
12. Tune kaa la aqane xatua Iobu hnene la mejiune kowe la mele hmaca?
12 Loi e tro sa catre mejiune kowe la mele hmaca. Tune lo hne së hna ce wang ngöne la tane mekune hnapan, Satana a nyi jëne la xoue mec matre troa uku së troa nuetriji Iehova. Öni Satana göi Iobu, tro angeic a nuetrij asë, uti fe hë la imelekeu i angeic me Iehova matre tro angeic a mel. Ngo ka tria la mekuna i Satana. Ngacama tru catre la akötre Iobu, nge angeic fe hë a troa mec, ngo tha ase pi kö angeic nuetriji Iehova. Angeic a mejiune laka, Iehova palahi a hnimi angeic. Nge tro kö Nyidrë a apatrene la itre jol ka traqa koi angeic, me mejiune laka, tro kö Iehova a ce me angeic. Celë hi lai ka xatua angeic troa cile catr. Xecie koi Iobu laka, maine tha tro kö Iehova a nyinyine la itre jole i angeic enehila, ngo tro hmaca kö Nyidrëti lai a amele angeic epin. Ka mele e kuhu hni Iobu la mele hmaca. Haawe, e ka xecie koi së la mejiune cili, tha tro kö la xoue mec a sewe së troa mele nyipici.
13. Hnauëne la tro sa xomi ini qa ngöne la itre nyinyithina i Satana koi Iobu?
13 Loi e tro sa xomi ini qa ngöne la itre nyinyithina i Satana koi Iobu, ke aqane tro fe angeice lai a tune koi së enehila. Hane hi la hna qaja hnei Satana ekö, öni angeic: “Itre ewekë asë hna hetrenyi hnene la atr [tha Iobu casi kö], tro angeic a hamë hnane la mele i angeic.” (Iobu 2:4, 5) Kösë Satana qaja ka hape, tha easë kö a hnimi Iehova. Nge tro sa nuetriji Nyidrë pine la mele së. Ame koi Satana, tha Iehova fe kö a hnimi së. Nge tha Nyidrëti kö a nyipiewekëne la itre trengecatr hne së hna nue troa amadrinë Nyidrë. Pine laka, atre hi së la itre nyinyithina i Satana, tha tro pi kö sa mejiune kowe la itre trengathoi angeic.
14. Nemene la hna amamane hnene la itre itupath? Qaja jë la ketre ceitun.
14 Loi e tro sa nue la itre itupath matre amamane la sipu pengö së. Hnene la itre itupath ka traqa koi Iobu hna xatua angeic troa atre la itre xaa thiina nyine tro angeic a saze. Hnei Iobu hna öhne laka, tha ka ipië kö angeic. (Iobu 42:3) Ketre tu së fe, tro sa öhne la itre thiina nyine tro sa saze la kola traqa la itre itupath. Öni Nikolay, * ketre trejine hna akalabusin, nge ka trene sine mec ka hape: “Ceitune hi la kalabus memine la easa passé radio thei droketre. Kola amamane la itre thiina ka loi ka ej e kuhu hni ne la keresiano.” E traqa jë së öhne la itre tria së, tro hë së lai a thel troa saze.
15. Drei la hne së hna troa dreng, nge pine nemen?
15 Loi e tro sa drei Iehova, ngo tha itre ithupëjia kö. Hnei Iobu hna dreng hnyawa la Iehova a ithanata koi angeic. Hnei Iehova hna hnying koi Iobu matre tro angeic a öhne laka, Iehova a hnimi angeic. E thupen, hnei Iobu hna amamane la ipië i angeic me olene koi Iehova. Öni angeic: “Hnenge hna drenge la kola qeje nyipë, ngo ame hë enehila, öhnyi nyipëti hë ni.” (Iobu 42:5) Iobu a qaja la itre trengewekë cili, lo ijine angeic a kelem la ha nekö i angeic, me lapa ngöne la hnatresij, nge tiqa la ngönetrei angeic hnei piagotre. Ame ngöne la ijine cili, hnei Iehova hna amamane la ihnimi Nyidrë, me madrine i Nyidrë koi Iobu.—Iobu 42:7, 8.
16. Thenge la Isaia 49:15, 16, nemene la nyine tro sa lapa mekune la easa cile kowe la itre jol?
16 Ame fe enehila, kola qaqa easë me thaipië easë. Nge kolo fe a silitrengathoi së, memine la organizasio Iehova. (Mat. 5:11) Ame pe, mejiune Iehova laka, tro kö sa mele nyipici ngöne la itre itupath. Tru la ihnimi Nyidrëti koi së. Nge tha tro kö Nyidrëti a nuetrije la itre ka mejiune koi Nyidrë. Celë hi lai ka mama qa ngöne la hna melëne hnei Iobu. (E jë la Isaia 49:15, 16.) The nyipiewekëne kö la itre ithupëjia me Akötresie ka xöjetriji së! Hnei James me fami angeic ka mele e Turquie, hna hane melëne la itre jole ka tru. Öni angeic: “Akötre catre hun la eahuni a drenge la kola silitrengathoine la organizasio Iehova. Matre hnei eahuni e cili hna catre mejiune kowe la Baselaia, me catre huliwa koi Iehova. Celë hi lai ka xatua eahun tro palahi a madrin.” Tui Iobu, easa drengethenge Iehova! Tha easa kö a nue la itre trengathoi ne la itre ithupëjia troa apatrene la mejiune së.
TRO LA MEJIUNE A XATUA EPUN
Hna amanathithi Iobu ke, hnei angeic hna mele nyipici. Tru catre la itre manathith hnei angeic me föi angeic hna kapa qaathei Iehova (Wange ju la paragarafe 17) *
17. Nemene la hna ini së hnene la tulu ne la itre hlue i Iehova ngöne Heberu 11?
17 Hetre xaa hlue i Iehova ka tui Iobu, itre ka mele nyipici me catr ngöne la itre itupath. Hnei Paulo hna qeje angatr ngöne la tusi Heberu ka hape, itretre “anyipicine ka ala nyim.” (Heb. 12:1) Ngacama hnei angatr asë hi hna cile kowe la itre jol ka tru, ngo hnei angatr palahi hna mele nyipici koi Iehova. (Heb. 11:36-40) Ka gufa kö la itre trengecatre i angatr? Waea! Nyipici laka, tha hane ju kö angatr öhne la itre hna thingehnaean, ngo hnei angatr palahi hna mejiune koi Iehova. Nge Iehova a madrine koi angatr. Matre xecie koi angatr laka, tro kö angatr a öhne elany la itre hna thingehnaean. (Heb. 11:4, 5) Tro la tulu i angatr a xatua së troa catre mejiune koi Iehova.
18. Nemene la nyine tro sa isine troa kuca? (Heberu 11:6)
18 Ame enehila, kola tro ngazo la fen. (2 Tim. 3:13) Nge Satana palahi a tupath la itre hlue Iehova. Ngacama tru ju hë la itre jol ka traqa koi së, ngo easa isine troa catre huliwa koi Iehova, me “mejiune kowe la Akötresie ka mel.” (1 Tim. 4:10) Öhne kö epun la aqane amanathithi Iobu hnei Iehova? Kolo hi lai a amamane ka hape, ka “nyipi menyike la ihnimi Iehova nge ka iutipi.” (Iako. 5:11) Loi e tro sa mele nyipici koi Iehova, ke tro kö Nyidrëti a “nyithupene kowe la itre ka thele Nyidrë.”—E jë la Heberu 11:6.
NYIMA 150 Thele Akötresieti Jë Matre Mele Nyipunie
^ Maine tro sa qeje itupath ka tru, ke canga tro hi sa meku Iobu. Nemene la ini hne së hna xome qa ngöne la hna melëne hnei Iobu? Easa öhne laka, thatreine kö Satana musinë së troa nuetriji Iehova. Ketre, atr asë hi Iehova la itre ewekë ka traqa. Nge tune la aqane apatrene Iehova la nöjei akötre Iobu, tro fe Nyidrëti elanyi a apatren la itre akötre së. Nge, e tro sa amamane laka, xecie koi së la itre ewekë cili, easë hi lai a cememine la itre ka “treqe Iehova.”
^ GÖI TROA TROTROHNIN: Ame la hnaewekë “mejiun” ke kolo lai hape, troa “treqene” la ketre ewekë hne së hna ajane catrën. Kolo fe a qaja la troa lapaune kowe la ketre atr, me troa qaja asë koi angeic la itre aliene hni së.—Sal. 25:2, 3; 62:5.
^ Hna saze la ëj.
