1. (a) San Yehofa paamisi u? (b) Fa u sa soi taki we ‘fitoow Yehofa’? (Luku a pisi di den e kai ‘San den wowtu ya wani taki’.)

 YEHOFA gi ala den sama di e dini en wan moin howpu. A paamisi u taki dyonson siki naw de moo, nawan sama o tyali moo, dede seefi naw de moo tu (Openb. 21:3, 4). Yehofa paamisi ‘den safu-ati sama’ di e fitoow en taki ao yeepi den fu meke a goontapu toon wan paladeisi (Ps. 37:9-11). Di den sani ya naw de moo, wi anga Yehofa o toon moo bun mati. Wa poi wakiti fu a ten de doo. Ma saide u sa biibi taki den sani di Yehofa paamisi u o kon tuu? Bika na ala yuu Yehofa e du san a taki. Neen meke u sa ‘fitoow en’ * (Ps. 27:14). Te we wakiti Yehofa anga pasensi, da we soi taki we biibi taki ao du ala den sani di a paamisi u.​—Yes. 55:10, 11.

2. Fa Yehofa soi taki ai du san a taki ala yuu?

² Yehofa soi omen leisi taki ala yuu ai du san a taki. We si a sani ya te u luku a Beibel buku Openbaring. Yehofa be taki aini a buku ya taki a be o tyai wan gaan kulu sama fu ala sowtu nasi, lo, foluku anga tongo kon a wan fu dini en. Nownow u sabi a kulu sama ya enke a ‘gaan kulu’ (Openb. 7: 9, 10). Winsi fa na ala sowtu sama de aini a kulu ya, man, uman, pikin, sama fu ala nasi anga tongo, toku den de enke wan famii (Ps. 133:1; Yoh. 10:16). Den  e peleiki fayafaya. Den de kabakaba fu paati a bun nyunsu gi ala sama di wani aliki (Mat. 28:19, 20; Openb. 14:6, 7; 22:17). Efu ya wan sama di de aini a gaan kulu ya, a musu e bigi gii taki Yehofa gii a howpu ya.

3. San Saatan wani u biibi?

³ Saatan á wani wi abi howpu gi a ten di e kon. A wani u biibi taki Yehofa nai booko ede anga u. A wani u biibi tu taki Yehofa naw du den sani di a paamisi u. A sabi taki efu u be o biibi a sani ya, u be o lasi-ati. Kande wa be o dini Yehofa moo tu. Na aseefi sani ya Saatan be wani du anga Yopu. A be wani Yopu lasi-ati, da a be gwe fika Yehofa.

4. San wo luku aini a artikel ya? (Yopu 1:9-12)

⁴ Aini a artikel ya, wo luku wantu sani di Saatan du anga Yopu fu di a be wani a gwe fika Yehofa. (Leisi Yopu 1:9-12.) Wo si tu fa u sa waka a Yopu baka anga saide a pelensipali fu holi a pakisei taki Yehofa lobi u. Wo si tu saide u mu e biibi taki ao du den sani di a paamisi u.

5-6. San be miti Yopu?

⁵ Yopu be abi wan bun libi. En anga Yehofa a be gaan mati. A be abi wan gaan osufamii di be e piisii. A be gudu tu (Yopu 1:1-5). Ma aini wan dei namo, a lasi ala den sani fi en. Den fosi sani di a lasi, a den gudu fi en (Yopu 1:13-17). Baka dati ala den pikin fi en di a be lobi dede. Pakisei fa Yopu be e fii di den sani ya miti en. Te wan pikin fu wan mma anga dda dede, ná pikin hati a sani ya e hati den. Da denki fa Yopu anga en uman be fii, di den yee taki ala den pikin fu den dede na aseefi dei. Ná pikin dyombo den be musu dyombo. Den be musu fii en te a den boofu-ati. Di Yopu yee a takuu nyunsu ya, a hali en koosi piiti neen sikin, neen a kai holow a doti. Neen a bali kee!​—Yopu 1:18-20.

⁶ Baka dati Saatan meke Yopu kisi wan takuu siki di be e meke a fii pen (Yopu 2:6-8; 7:5). Fosi den sani ya be miti Yopu, ala sama na a pisi pe a be e tan be e lesipeki en. Neen den be e go akisi fa den mu du son sani (Yopu 31:18). Ma di den sani ya miti en, den á be e si en fu wan sani moo. Ala den mati anga den baala fi en seefi gwe fika en. Den saafu fi en gwe fika en tu.​—Yopu 19:13, 14, 16.

7. (a) Sama Yopu be denki taki be e du ogii anga en? Ma toku san Yopu á be du? (b) Te u luku a fowtow, da san sa miti baala anga sisa aini a ten ya?

⁷ Saatan be wani Yopu biibi taki a fu di Yehofa atiboon neen meke den sani ya miti en. A meke wan gaan winta booko a osu pe ala den tin pikin fu Yopu be sidon e nyan (Yopu 1:18, 19). A meke faya koti komoto a tapu, boon ala den meti fu Yopu anga den sama di be e luku den meti (Yopu 1:16). Fu di a gaan winta anga a faya be komoto a tapu, meke Yopu be denki taki a Yehofa be meke den sani ya miti en. A be e denki taki a wan sani a du meke Yehofa e sitaafu en. Winsi fa den sani ya be miti en, toku noiti a kosi Yehofa. Yopu be sabi taki a omen bun sani Yehofa be du gi en a ten di pasa. Neen meke a be e denki taki efu a be e piisii anga den bun di Yehofa be e du gi en, da a be mu de kabakaba fu nyan pina tu. Neen meke a be taki: ‘Meke sama tan gafa Yehofa nen’ (Yopu 1:20, 21; 2:10). Winsi fa Yopu be lasi ala  en gudu anga den pikin fi en, a tan dini Yehofa anga en hii ati go doo. Di a siki seefi aa gwe fika Yehofa. Ma Saatan á be kaba anga Yopu ete.

8. San a wan taa fasi fa Saatan be tesi Yopu?

⁸ Wan taa sani di Saatan du anga Yopu, a den dii man di be kon neen enke mati. Den man ya be wani Yopu fii enke a soso. Den taigi Yopu taki a wan sani a musu du meke den gaan ogii ya miti en (Yopu 22:5-9). Den be wani Yopu biibi taki, winsi a be e du omen bun sani, toku Gadu nai si den sani de fu wan sani (Yopu 4:18; 22:2, 3; 25:4). Te i luku den sani di den man ya taki, da a leti enke den be wani Yopu biibi taki Yehofa á lobi en. Den ben wani a biibi taki Yehofa nai booko en ede anga en. Den taigi en sani fu a fii enke a fu soso ai dini Yehofa, a naabi nawan wini. Den man ya taigi Yopu tyaipi sani fu booko en.

9. San be yeepi Yopu fu holidoo?

⁹ Puubei fu si san be miti Yopu. A sidon a doti aini asisi. En hii sikin e hati en. En boofu-ati e du en ogii te ai pakisei den pikin fi en di dede. Den sani di be miti en be de enke wan gaan koko siton neen tapu (Yopu 2:8). Pe fu den mati fi en gi en taanga-sikin, den e taigi en omen hati sani fu poli en nen. Ná pikin sani miti Yopu. Na a bigin, Yopu de fi en pii e aliki fa den e poli en nen (Yopu 2:13–3:1). Kande den be denki taki fa Yopu á be e piki den, a tapu a be o tapu fu dini Gadu. Efu a dati den be denki, da den koli denseefi. Di den taki te a sai den, neen Yopu opo ede luku den, neen a taki: ‘Mi o tan dini Gadu fu te mi boo koti!’ (Yopu 27:5) San yeepi Yopu fu holidoo winsi fa ala den sani ya be miti en? A sabi taki a Gadu fi en lobi en. A be e biibi taki a be o yeepi en namo. A be  e biibi tu taki winsi a be dede seefi toku Yehofa o weki en baka. Na a sani de yeepi en fu holidoo di sani be e moo en tuutuu.​—Yopu 14:13-15.

10. San a toli fu Yopu e leli u?

¹⁰ A toli fu Yopu e leli u taki Saatan á poi tapu u fu dini Yehofa. Ai leli u tu taki Yehofa e si ala den sani di e miti u. Den sani di miti Yopu anga a fasi fa a holidoo, e leli u tu taki u poi holidoo winsi san e miti u. Meke u luku wantu taa sani di u sa leli fu a toli fu Yopu.

11. San u sa biibi taki Yehofa o du efu we fitoow en? (Yakowbesi 4:7)

¹¹ A fasi fa Yopu holidoo e leli u taki efu we fitoow Yehofa, ao yeepi u fu holidoo tu winsi sowtu tesi Saatan e tyai kon aw tapu. San o de a bakapisi? Beibel taki te Saatan si taki u nai gi abaa, ao lon gwe.​—Leisi Yakowbesi 4:7.

12. Fa a biibi di Yopu be e biibi taki Yehofa poi weki en baka be yeepi en?

¹² Efu we biibi tuutuu taki Yehofa poi weki u baka winsi u dede, wo holidoo winsi san e miti u. Enke fa u be luku aini a artikel di pasa, da Saatan wani du sani anga u fu u sa feele te da wa dini Yehofa moo. A be taki Yopu be o du ala sani soso fu tan a libi. A taki a be o gwe fika Yehofa seefi fu di aa wani dede. Ma a lei Saatan lei. Bika winsi fa Yopu be sabi taki a be sa dede, toku noiti a gwe fika Yehofa. A fitoow di a be e fitoow Yehofa, be yeepi en fu holidoo. A be e biibi tuutuu taki winsi a be o dede seefi, Yehofa be o weki en baka. Efi ye biibi tuutuu taki Yehofa o weki i baka winsi i dede, yo holidoo tu winsi sai miti i.

13. Saide wa mu feegete a fasi fa Saatan tesi Yopu?

¹³ Aini a ten ya, a denseefi fasi fa Saatan be tesi Yopu ai tesi u tu. Neen meke u mu de na ain. Te u luku san Saatan be taki da we si taki a ná Yopu wawan a be taki o gwe fika Yehofa te sani e miti en. Bika a taki: ‘Te wan sama de fu dede, ao du ala san a poi fu tan a libi’ (Yopu 2:4, 5). Saatan wani soi anga sani ya taki a ná fu di u lobi Yehofa meke we dini en. Neen meke efu u si taki wo dede wo du ala san u poi fu tan a libi, u naw booko wi ede fu dini Yehofa moo. Ma a ná dati wawan Saatan taki. A taki tu taki Yehofa á lobi u, a fu soso we dini en. Ma efu we fitoow Yehofa, da Saatan naw fende u koli anga den lei fi en.

14. Gi wan ageisitoli di e soi san den tesi di e miti u, e yeepi u fu kon si.

¹⁴ Te tesi e miti i, i mu si en enke wan a okasi fu kon sabi iseefi moo bun. Den sani di be miti Yopu be yeepi en fu si pe a swaki anga san a mu du taa fasi. A be kon si taki a be mu abi moo sakafasi (Yopu 42:3). Te tesi e miti u, useefi sa si omen sani di u mu kengi tu. Wan baala di den e kai Nikolay, * a sikisiki a be de di den poti en a sitaafu-osu. A taki: ‘Te den poti wan Kotoigi a sitaafu-osu, da a de enke te dataa e meke wan fowtow fu si pe fu wan sama sikin wan siki de.’ Efii si taki yu abi wan manii di i mu kengi, ya mu daaidaai fu kengi en.

15. Sama u mu aliki? Saide neen u mu e aliki?

¹⁵ Ala yuu u mu aliki Yehofa. Wa mu aliki den sama di wani tapu u fu dini en. Yopu be e aliki bun di Yehofa be e taki  anga en. Yehofa be akisi en taki: ‘I nai si a kaakiti fu mi te i luku den sani di mi meke noh? Mi si ala den sani di miti i. I denki taki mi á poi solugu i?’ Yopu soi sakafasi di a piki Yehofa. A soi taki ai bigi gi en taki Yehofa e soi sama bun-ati. Neen meke a be taki: ‘Mi be e yee fii, ma now miseefi si i’ (Yopu 42:5). Di Yopu be taki a sani ya, a be sidon aini a asisi ete. Ala en sikin be de fanyaa anga soo. Den pikin fi en seefi be de aini geebi ete tu. Toku Yehofa soi en taki a lobi en. A soi en tu taki ai piisii anga en.​—Yopu 42:7, 8.

16. Enke fa Yesaya 49:15, 16 e soi, da san u mu holi a pakisei te tesi e miti u?

¹⁶ Den sani di be miti Yopu sa miti wi aini a ten ya tu. Kande sama e soso i, efuso wisiwasi i. Kande son sama ‘e lei gii’ efuso e paati lei fu a olikanisâsi (Mat. 5:11). A toli fu Yopu e soi u taki Yehofa e biibi taki te tesi miti u, u naw gwe fika en. Yehofa lobi i tuutuu, noiti ao feegete i. (Leisi Yesaya 49:15, 16.) Neen meke ya mu aliki den sani di den feyanti fu Yehofa e taki. James a wan baala fu Tolukukondee. Wan gaan tesi be miti a famii fi en. A taki: ‘U be kon si taki efu be e aliki den sani di sama e taki fu a foluku Yehofa, u biibi be o kon swaki. Neen meke u be e poti ala u pakisei na a howpu di Yehofa gi u anga a dini di u mu dini en. A san ya yeepi u fu wa lasi u piisii.’ Leti enke Yopu efu ala yuu we aliki Yehofa, den sani di den feyanti fu we taki naw poli a howpu fu u.

17. San u sa leli fu den sama di Pawlesi kai aini Hebrewsama kapitel 11?

¹⁷ Yopu a wan fu den sama di Beibel e taki be holidoo di omen tesi be miti en. Aini a biifi di apostel Pawlesi be sikiifi gi den Hebrew Kelesten, a be kai wantu taa sama tu di be holidoo di tesi be miti den. A be taki: ‘A omen kotoigi bosu lontu u enke wan gaan woluku’ (Heb. 12:1). A omen tesi be e miti den tu, ma noiti den á gwe fika Yehofa (Heb. 11:36-40). Ná pikin wini den fende di den holidoo. Winsi fa den á be si fa ala den sani di Yehofa be paamisi den kon tuu, tokuso den be e biibi taki wan dei den o kon tuu namo. Fu di den be sabi taki Yehofa lobi den, meke den be e biibi taki den o si fa den sani di a paamisi den o kon tuu (Heb. 11:4, 5). A fasi fa den holidoo e yeepi u fu biibi taki, den sani di Yehofa paamisi u o kon tuu.

18. San i de kabakaba fu du? (Hebrewsama 11:6)

¹⁸ We libi aini wan goontapu di e kon moo ogii dei fu dei (2 Tim. 3:13). Saatan nai tapu fu tesi den sama di e dini Yehofa tu. A omen sani o miti wi aini ten di e kon. Ma aa de fu u feele den sani di o miti u ‘bika we fitoow wan Gadu di de a libi’ (1 Tim. 4:10). Pakisei fa Yehofa be yeepi Yopu di sani be miti en. A fasi fa a be yeepi en e soi taki ‘Yehofa lobi sama tuutuu. A abi tyali-ati tu’ (Yak. 5:11). Neen meke winsi san e miti i, i sa biibi taki Yehofa e pai den sama di e ‘suku en’ anga den hii ati.​—Leisi Hebrewsama 11:6.