1. (a) Ebɛn enyidado na Jehovah dze ama hɛn? (b) Sɛ wɔka dɛ yɛmfa ‘hɛn enyi nto Jehovah do’ a, ɔkyerɛ dɛn? (Hwɛ “Nsɛm Bi A Wɔakyerɛkyerɛ Mu.”)

 JEHOVAH ama hɔn a wɔdɔ no no nyina enyidado papabi. Ɔrennkyɛr, obeyi yarba, awerɛhow nye owu nyina efi hɔ. (Nyi. 21:3, 4) Ɔbɔboa “abrɛfo” anaa hɔn a wɔbrɛ hɔnho adze na hɔn enyi da no do no ma woeesiesie asaase no ma wɔaayɛ Paradise. (Ndw. 37:9-11) Jehovah bɛma hɛn mu biara nye no enya ebusuabɔ a no mu yɛ dzen. Ebusuabɔ a yɛnye no benya no, no mu bɛyɛ dzen akyɛn dza yɛnye no wɔ no ndɛ no mpo. Ebɛn enyidado na ɔkyɛn iyi! Naaso, ebɛnadze na yebotum egyina do aka dɛ dza Nyankopɔn aka biara bɛba mu ɔkwan biara do? Jehovah yɛ kantamanto Nyankopɔn, kyerɛ dɛ, dza ɔka biara ɔyɛ. Iyi ntsi, yɛwɔ biribi a yebotum egyina do dze ‘hɛn enyi ato Jehovah do.’ * (Ndw. 27:14; NWT) Dza yɛyɛ dze kyerɛ dɛ yɛdze hɛn enyi ato Jehovah do nye dɛ, yɛdze abotar na enyigye bɔtweɔn Jehovah kesi dɛ ɔbɛma n’anohoba ahorow nyina aba mu.​—Isa. 55:10, 11.

2. Ebɛnadze na Jehovah ayɛ?

² Jehovah ayɛ biribi dze akyerɛ dɛ dza ɔka biara ɔyɛ. Hom mma yɛnhwɛ iyi ho nhwɛdo kor a ɔda nsew. Jehovah kae too hɔ wɔ Nyikyerɛ nwoma no mu dɛ, wɔ hɛn aber yi do no, ɔbɛma nyimpa a wofi aman, mbusuakuw nye kasa nyina mu ayɛ kor na wɔaasom no wɔ nokwar mu. Ndɛ dɛm nkorɔfo a wɔda nsew yi nye “nyimpadodow kɛse” no. (Nyi. 7:9, 10) Hɔn a wɔwɔ kuw yi mu no yɛ mbarimba, mbaa na mbofra a ɔsor hɔn  honamenyi hwɛbea, kasa a wɔka nye beebi a wofi. Naaso hɔn nyina dze asomdwee na koryɛ rosom Nyankopɔn wɔ wiadze nyina. (Ndw. 133:1; John 10:16) Bio so, nyimpadodow kɛse no mufo dze nsi yɛ asɛnka edwuma no. Wɔwɔ enyidado dɛ Nyankopɔn dze wiadze fofor bi reba, na wɔayɛ krado aber nyina dɛ wɔbɛka ho asɛm akyerɛ hɔn a wɔpɛ dɛ wotsie no. (Matt. 28:19, 20; Nyi. 14:6, 7; 22:17) Sɛ eka nyimpadodow kɛse no ho a, ɔda edzi dɛ ehwɛ ndzɛmba pa kwan na dɛm enyidado no da w’akoma do paa.

3. Ebɛnadze na Satan pɛ dɛ ɔyɛ?

³ Abɔnsam pɛ dɛ ɔsɛɛ enyidado a ewɔ no. Dza ɔpɛ ara nye dɛ ibenya adwen dɛ Jehovah nndwen woho na dza ɔaka no so remmba mu. Sɛ Satan tum sɛɛ hɛn enyidado yi a, annhwɛ a yɛbɔbɔ hu na yɛronnsom Jehovah bio. Adzesua yi mu no, yebohu dɛ Satan yɛɛ ara dɛ ɔbɛsɛɛ Job n’enyidado ama oegyaa Jehovah som.

4. Ebɛnadze na yebosusu ho wɔ adzesua yi mu? (Job 1:9-12)

⁴ Satan yɛɛ dza obotum biara mbrɛ ɔbɛyɛ a Job bɛdan n’ekyir ama Jehovah. Yɛbɔhwɛ akwan a ɔfaa do yɛɛ dɛm no ho adze wɔ adzesua yi mu. (Kenkan Job 1:9-12.) Afei so, yɛbɔhwɛ dza yebotum esua efi Job n’asɛm no mu nye siantsir a ɔsɛ dɛ yɛma ɔtsena hɛn adwen mu dɛ Nyankopɔn dɔ hɛn na dza ɔaka biara so bɛba mu.

5-6. Ebɛn asɛm na ɔtoo Job wɔ ber tsiabaa bi mu?

⁵ Nna ndzɛmba rokɔ yie wɔ Job n’asetsena mu. Nna ɔnye Jehovah wɔ ebusuabɔ a no mu yɛ dzen. Afei so, nna ɔwɔ ebusua kɛse a koryɛ wɔ hɔn ntamu. Nna ɔhyɛ noho so dɛ! (Job 1:1-5) Naaso da kor pɛ Job hweer dza ɔwɔ nyina ma ɔkaa kakraabi. Odzi kan, Job n’anyɛmbowa nyina fir ne nsa. (Job 1:13-17) Afei so, ne mba a ɔdɔ hɔn no nyina wuwui. Susu dɛm awerɛhosɛm yi ho kakra. Sɛ awofo bi hɔn ba kor mpo wu a, wodzi awerɛhow paa. Ntsi ɔwodze twa ho mfonyin na hwɛ mbrɛ Job na ne yer yɛɛ hɔn adze aber a wɔtsee dɛ hɔn mba du no nyina ewuwu no. Ɔbɛyɛ dɛ asɛm no tɔɔ hɔn do, hɔn werɛ howee na hɔn adwen tui forae. Ɔnnyɛ nwanwa dɛ aber a Job ridzi awerɛhow no ɔtsetseew n’atar mu na otwae hwee famu!​—Job 1:18-20.

⁶ Adze fofor a Satan dze yɛɛ Job nye dɛ ɔdze enyimguase yarba bi a ɔyɛ yaw baa no do. (Job 2:6-8; 7:5) Ahyɛse no, nna nkorɔfo bu Job paa, ma mpo nna binom kɔ no hɔ kɛgye afotu. (Job 31:18) Naaso, aber a tsebea no baa no dɛm no, nna wɔmmpɛ n’enyim ahwɛ mpo. No nuanom, n’anyɛnkofo nye no nkowaa mpo yii ne baako hyɛɛ ne nsa!​—Job 19:13, 14, 16.

7. (a) Ebɛn adwen na Job nyae wɔ ɔhaw a nna orihyia no ho, naaso ebɛnadze na ɔannyɛ? (b) Ebɛn kwan do na onua bi botum ehyia nsɔhwɛ a ɔtse dɛ dza ɔwɔ mfonyin no mu no?

⁷ Nna Satan pɛ dɛ Job nya adwen dɛ Jehovah no bo efuw no ntsi na oruhu amandze no. Dɛ nhwɛdo no, Satan maa mframa kɛse bi bɔbɔɔ dan a nna Job ne mba du no nyina ehyia mu ridzidzi no ma obui guu hɔn do. (Job 1:18, 19) Afei so, Satan maa ogya fi sor bɛhyeew Job no nguan nye no nkowaa a nna wɔrohwɛ hɔn no. (Job 1:16) Ɔda edzi kofee dɛ mframa na ogya no mmfir nyimpa, ntsi obotum aba dɛ Job nyaa adwen dɛ Jehovah na ɔdze ɔhaw a ɔtse dɛm aba no do. Obotum aba dɛ iyi maa Job nyaa adwen dɛ ɔayɛ biribi ma Jehovah no bo efuw no. Iyi nyina mu no, Job annka asɛm bɔn biara enntsia no sor Egya no. Job gyee too mu dɛ Jehovah ayɛ ndzɛmba pa beberee ama no mfe pii. Ntsi Job dwendween ho dɛ, sɛ ɔdze enyigye agye ndzɛmba pa a Jehovah  dze maa no no a, nna ɔno ɔwɔ dɛ ɔyɛ komm na osuo bɔn no so mu dɛmara. Dɛm ntsi Job kaa dɛ: “Nhyira nka Ewuradze ne dzin.” (Job 1:20, 21; 2:10) Ɔwɔ mu dɛ nna Job n’ahodze efi ne nsa, ne mba ewuwu, na ɔyar paa so dze, naaso nna ɔda ho ara ridzi Jehovah nokwar. Naaso nna Satan nye Job nnwiei.

8. Ebɛnadze bio na Satan yɛe?

⁸ Dza Satan yɛe bio nye dɛ ɔnam nkorɔfo baasa bi a hɔnara wɔdɛ wɔyɛ Job n’anyɛnkofo do maa Job tsee nka dɛ ɔnnsɛ hwee koraa. Dɛm mbarimba yi kekaa nsɛm pii a ɔkyerɛ dɛ amandze a Job ruhu no dzi dase dɛ ɔayɛ ndzɛmba bɔn pii. (Job 22:5-9) Afei so, wɔyɛɛ ara dɛ wɔbɛma Job enya adwen dɛ, sɛ ɔnnyɛ nyimpa bɔn mpo a, ndzɛmba papa a ɔayɛ nyina Nyankopɔn mmbu no dɛ mfaso wɔ do. (Job 4:18; 22:2, 3; 25:4) Asɛm no nye dɛ nna wɔpɛ dɛ Job nya adwen dɛ Nyankopɔn nndɔ no, ɔremmfa dza ohia mma no, na mfaso biara nnyi ho dɛ ɔbɔsom Nyankopɔn. Nkyɛ nsɛm a wɔkekae no botum ama Job atse nka dɛ onnyi enyidado biara.

9. Ebɛnadze na ɔboaa Job ma onyaa akokodur na ɔhyɛɛ dzen?

⁹ Twa tsebea no ho mfonyin hwɛ. Job refa yaw mu paa na ɔtsena nso mu. (Job 2:8) N’anyɛnkofo a wɔabɛsera no no so, ka ara na wɔreka dɛ ɔnnyɛ nyimpa papa, na dza ɔayɛ nyina mfaso nnyi do. Nna nsɔhwɛ a Job rihyia no ama ɔayɛ hahaaha. Ber kor no ara so, nna ne mba a woewuwu no ama oridzi awerɛhow na n’akoma ebubu. Ahyɛse no dze, Job yɛɛ dzinn, ɔannkasa. (Job 2:13–3:1) Sɛ nna dɛm anyɛnkofo yi adwen yɛ hɔn dɛ osiandɛ Job ayɛ dzinn ntsi obegyaa Nyankopɔn n’ekyir dzi a, ɔnodze nna wɔrokɔ nsu egu bobaa do. Odur beebi no, obotum aba dɛ Job maa ne tsir do hwɛɛ hɔn enyim na ɔkaa dɛ: “Mirinnyi m’emudzi mmfi moho araa ma ekodu dɛ mubowu”! (Job 27:5) Ebɛnadze na ɔboaa Job ma onyaa akokodur na ɔhyɛɛ dzen ɔmmfa ho  nsɔhwɛ a nna orihyia no? Aber a nna n’abaw mu ebu koraa mpo no, ɔdze n’enyi too ne Nyankopɔn a ɔdɔ no no do dɛ ewiei koraa no obeyi ɔhaw a orihyia no efi hɔ. Afei so, nna onyim dɛ sɛ owu mpo a, Jehovah benyan no aba nkwa mu bio.​—Job 14:13-15.

10. Ebɛnadze na yebotum esua efi Job n’asɛm no mu?

¹⁰ Job n’asɛm no ma yehu dɛ Satan runntum nnhyɛ hɛn dɛ yengyaa Jehovah som. Afei so, Jehovah nyim dza yɛrefa mu nyina. Yebotum so enya esuadze afofor bi efi dza ɔtoo Job no mu. Hom mma yɛnhwɛ ndzɛmba pɔtsee bi a yebotum esua efi Job hɔ.

11. Sɛ yɛkɔ do nya Jehovah no mu gyedzi a, ebɛn awerɛhyɛmu na yebotum enya? (James 4:7)

¹¹ Dza Job yɛe no daa no edzi dɛ sɛ yɛkɔ do nya Jehovah no mu gyedzi a, yebotum egyina nsɔhwɛ biara a yebehyia no ano, na yaako etsia Satan. Sɛ yɛyɛ dɛm a, ebɛnadze na obefi mu aba? Kyerɛwnsɛm no ma yenya awerɛhyɛmu dɛ, Abɔnsam boguan efi hɛn nkyɛn.​—Kenkan James 4:7.

12. Ebɛn kwan do na owusoɛr ho enyidado a Job wɔ no hyɛɛ no dzen?

¹² Ɔsɛ dɛ yesuo owusoɛr ho enyidado a yɛwɔ no mu dzen. Dɛ mbrɛ yehunii wɔ adzesua a odzi iyi enyim mu no, Satan pɛ dɛ yɛdze hɛn adwen si owu ho suro a yɛwɔ no do mbrɛ ɔbɛyɛ a yerinndzi Jehovah nokwar. Satan kaa dɛ Job bɛyɛ biribiara dze aper no nkwa. Nna ɔrepɛ akyerɛ dɛ sɛ ɔsɛ dɛ Job gyaa Jehovah som mpo dze per no nkwa a, ɔbɛyɛ. Nna Satan nnyim dza ɔrekeka. Aber a nna Job gye noho a ɔnngye, na ogyina owu na nkwa nkwanta mpo no, ɔkɔr do dzii Jehovah nokwar. Nna ɔwɔ gyedzi dɛ Jehovah bɛyɛ ndzɛmba papa ama no. Afei so nna ɔwɔ enyidado a no mu yɛ dzen dɛ mbrɛ ɔtse biara Jehovah bɛgye no efi ne haw no mu. Iyi boaa no ma otumii gyinaa dza nna orihyia no ano. Nna Job gye dzi dɛ sɛ Jehovah anngye no emmfi ne haw no mu na owu mpo a, daakye bi obenyan no aba nkwa mu bio. Nna Job gye owusoɛr no dzi paa. Hɛn so, sɛ yɛgye owusoɛr no dzi na wɔdze owu hunahuna hɛn mpo a, yɛbɔkɔ do ara edzi Jehovah nokwar.

13. Ebɛnadze ntsi na ɔsɛ dɛ yɛma hɛn enyi da hɔ wɔ dza Satan yɛe dze sɔɔ Job hwɛe no ho?

¹³ Ɔsɛ dɛ yɛma hɛn enyi da hɔ paa wɔ dza Satan yɛɛ dze sɔɔ Job hwɛe no ho, osiandɛ ndɛ so dɛmara na ɔyɛ dze sɔ hɛn hwɛ. Hyɛ asɛm a Satan kae yi nsew. Ɔkaa dɛ: “Dza nyimpa [nnyɛ Job nko] wɔ nyinara ɔdze ma per no nkwa.” (Job 2:4, 5) Dza nna Satan reka ara nye dɛ yɛnndɔ Jehovah ahen biara ntsi sɛ ɔba no dɛ yegyina owu na nkwa nkwanta a, yebegyaa n’ekyir dzi dze aper hɛn nkwa. Bio so, nna Satan repɛ akyerɛ dɛ Nyankopɔn nndɔ hɛn na dza yɛyɛ ma no nyina onnhu. Yenyim dza Satan pɛ dɛ ɔyɛ, naaso osiandɛ yɛdze hɛn werɛ ahyɛ Jehovah mu ntsi, Satan ne ndaadaa no mmpusuw hɛn koraa.

14. Sɛ yerihyia nsɔhwɛ a, ebɛnadze na obotum aboa hɛn ma yeehu afa hɛnho? Fa mfatoho kyerɛkyerɛ mu.

¹⁴ Sɛ yehyia nsɔhwɛ a, ɔsɛ dɛ yebu no dɛ ɔyɛ hokwan a yebotum dze ayɛ hɛn mu nhwehwɛmu. Nsɔhwɛ a Job hyiae no maa ohun mberɛwyɛ ahorow bi a ɔsɛ dɛ odzi ho dwuma. Dɛ nhwɛdo no, nna ɔbrɛ noho adze dze, naaso obohun dɛ ɔsɛ dɛ ɔyɛ pii ka ho. (Job 42:3) Hɛn so, sɛ yehyia nsɔhwɛ a, obotum ama yeehu mberɛwyɛ ahorow bi a yɛwɔ. Nna hɛn nua Nikolay * yar dzendzenndzen, naaso wɔdze no kɔtoo efiadze. Ɔkaa dɛ: “Dɛ mbrɛ obi twa X-ray a ɔma wohu dza ɔwɔ no mu no, dɛmara na sɛ wɔdze Christiannyi bi kɔto efiadze a, dza ɔwɔ n’akoma mu da edzi.” Sɛ yenya ara hu mberɛwyɛ bi a yɛwɔ a ɔsɛ dɛ yedzi ho dwuma.

15. Woana na ɔsɛ dɛ yetsie no, na ebɛnadze ntsi a?

 ¹⁵ Jehovah na ɔsɛ dɛ yetsie no na nnyɛ hɛn atamfo bi a. Job yɛɛ dzinn tsiee Jehovah aber a ɔnye no rekasa no. Nyankopɔn nye Job susuu nsɛm ho. Kwan bi do no, nna ɔtse dɛ mbrɛ oribisa no dɛ: ‘Hwɛ ndzɛmba a mabɔ, ehu tum a mowɔ? Dza erefa mu nyina m’enyi tua. Edwen dɛ murunntum nnhwɛ wo anaa?’ Job brɛɛ noho adze na ɔkyerɛɛ enyisɔ wɔ ndzɛmba pa a Jehovah ayɛ ama no no ho. Dɛm ntsi ɔkaa dɛ: ‘M’asowa na medze tsee wo nka; na afei dze medze m’enyiwa ehu wo.’ (Job 42:5) Obotum aba dɛ, aber a Job kaa dɛm asɛm no, nna ɔda ho ara tse nso mu, nkubankuba ayɛ noho twom, na oridzi awerɛhow wɔ ne mba no hɔn wu no ho. Ne nyina mu no, Jehovah maa Job hun dɛ ɔda ho ara dɔ no na ɔgye no to mu.​—Job 42:7, 8.

16. Dɛ mbrɛ Isaiah 49:15, 16 ma yehu no, sɛ yehyia nsɔhwɛ a, ebɛnadze na ɔsɛ dɛ yɛma ɔtsena hɛn adwen mu?

¹⁶ Ndɛ so, nkorɔfo botum ahyehyɛ hɛn ahorba na wɔaama yɛatse ntse nka dɛ gyama mfaso biara nnyi hɛnho. Wɔbɔ mbɔdzen dɛ wɔbɛsɛɛ Jehovah n’asomfo anaa n’ahyehyɛdze no dzin na wɔka nsɛmbɔn nyina to hɛn do akɔhwi mu.’ (Matt. 5:11) Job n’asɛm no ma yehu dɛ Jehovah wɔ ahotodo wɔ hɛn mu dɛ sɛ yehyia nsɔhwɛ a, yɛbɔkɔ do ara edzi no nokwar. Jehovah dɔ hɛn paa na hɔn a wɔdze hɔn enyi to no do no, ɔremma hɔn nsa nnsi famu dabiarada. (Kenkan Isaiah 49:15, 16.) Ɔnnsɛ dɛ yetsie nsɛmbɔn biara a Nyankopɔn n’atamfo ka fa no nkorɔfo ho no! James yɛ hɛn nua a ɔwɔ Turkey. Ɔnye n’ebusua hyiaa nsɔhwɛ a no mu yɛ dzen pii. Ɔkaa dɛ: “Yehun dɛ sɛ yetsie akɔhwisɛm a nkorɔfo ka fa Nyankopɔn n’asomfo  ho no a, obotum ama hɛn abaw mu eebu. Dɛm ntsi yɛdze hɛn adwen sii dza Nyankopɔn n’Ahendzi no bɛyɛ ama hɛn no do na yɛkɔr do yɛɛ pii wɔ Jehovah no som mu. Dɛm a yɛyɛe no maa yɛkɔr do nyaa enyigye.” Job tsiee Jehovah na dɛmara na hɛn so yɛyɛ! Yɛmma akɔhwisɛm a hɛn atamfo ka fa hɛnho no nnsɛɛ enyidado a yɛwɔ no.

17. Mbarimba na mbaa anokwafo a wɔaka hɔnho asɛm wɔ Hebrewfo tsir 11 no, ebɛnadze na yebotum esua efi hɔn hɔ?

¹⁷ Sɛ yeyi Job si nkyɛn a, Jehovah n’asomfo pii so kɔr do daa akokodur edzi na wogyinaa hɔn nan do pintsinn aber a nna worihyia nsɔhwɛ a no mu yɛ dzen no. Ɔsomafo Paul kaa Jehovah n’asomfo pii ho asɛm wɔ ne krataa a ɔkyerɛwee kɛmaa Hebrewfo no mu no. Ɔkaa hɔnho asɛm dɛ wɔyɛ “adasefo mununkum kɛse.” (Heb. 12:1) Ɔwɔ mu dɛ hɔn nyina hyiaa nsɔhwɛ a no mu yɛ dzen dze, naaso wɔkɔr do ara dzii Jehovah nokwar. (Heb. 11:36-40) Aso abotar a wɔdaa no edzi aber a nna worihyia nsɔhwɛ no nye mbɔdzen a wɔbɔe no yɛɛ gyan? Ɔnntse dɛm koraa! Ɔwɔ mu dɛ Nyankopɔn n’anohoba nyina ammba mu wɔ hɔn aber do dze, naaso wɔkɔr do dze hɔn enyi too Jehovah do. Osiandɛ nna wonyim dɛ Jehovah agye hɔn ato mu ntsi, nna wɔgye dzi dɛ daakye bi Nyankopɔn n’anohoba bɛba mu ma wɔdze hɔn enyi ehu. (Heb. 11:4, 5) Hɔn nhwɛdo no botum aboa hɛn ma yaahyɛ hɛn bo a yeesi dɛ yɛbɔkɔ do ara dze hɛn enyi ato Jehovah do no mu dzen.

18. Ebɛnadze na esi wo bo dɛ ebɛyɛ? (Hebrewfo 11:6)

¹⁸ Wiadze a yɛtse mu yi, ndzɛmba sɛɛ ara na ɔresɛɛ. (2 Tim. 3:13) Satan kɔ do ara sɔ Nyankopɔn n’asomfo hwɛ. Ɔmmfa ho nsɔhwɛ biara a yebehyia no, ɔsɛ dɛ yesi hɛn bo dɛ yɛbɔkɔ do ara ayɛ pii wɔ Jehovah no som mu. Osiandɛ yɛgye dzi paa dɛ “yɛdze hɛn enyidado ato [Nyankopɔn] tseasefo” no do. (1 Tim. 4:10) Kaa dɛ ekyir yi Jehovah hyiraa Job. Iyi ma yehu dɛ Jehovah wɔ ‘ayamuhyehye nye ehumbɔbɔr.’ (Jas. 5:11) Hɛn so, ɔsɛ dɛ yɛkɔ do dzi Jehovah nokwar, na yɛgye dzi dɛ obehyira hɔn a hɔn enyi aber ‘rohwehwɛ n’ekyir kwan’ no.​—Kenkan Hebrewfo 11:6.