ULUTAGA NI VULI 27
Mo “Nuitaki Jiova”
“Nuitaki Jiova, mo yaloqaqa qai dei na lomamu.”—SAME 27:14.
SERE 128 Vosota me Yacova na iCavacava
KA ENA VULICI *
1. (a) Na inuinui cava e vakarautaka o Jiova? (b) Cava na kena ibalebale meda “nuitaki Jiova”? (Raica na “iVakamacala ni Vosa.”)
E VAKARAUTAKA o Jiova e dua na inuinui totoka vei ira kece na lomani koya. Sa voleka sara ni vakaotia na tauvimate, lomabibi, kei na mate. (Vkta. 21:3, 4) Ena vukei ira na “yalomalumalumu” era nuitaki koya mera veisautaka na vuravura me parataisi. (Same 37:9-11) Ena vakarautaka tale ga na sala meda veivolekati kina kei koya, ena uasivi sara mai na kena eda marautaka tu ena gauna qo. Sa inuinui totoka dina qori! Ia na yavu cava meda vakabauta kina ni na yaco dina na vosa ni yalayala ni Kalou? E dina tu ga o Jiova ena ka e yalataka. E tiko gona na vuna vinaka meda “nuitaki Jiova” kina. * (Same 27:14) Eda vakaraitaka qori nida waraki koya ena yalovosovoso kei na mamarau me vakayacora na nona inaki.—Aisea 55:10, 11.
2. Na cava sa cakava oti o Jiova?
2 E sa vakaraitaka oti o Jiova ni dau dina ena nona vosa ni yalayala. Dikeva mada e dua na ivakaraitaki vakasakiti. Ena ivola na Vakatakila, e yalataka o Jiova ni na yaco qo ena noda gauna, ena kauti ira mai na tamata mai na veimatanitu, na veiyavusa kei na duivosavosa, qai vakaduavatataki ira ena sokalou savasava. Nikua era kilai na ilawalawa qori me “isoqosoqo levu.” (Vkta. 7:9, 10) Era lewena na tagane, yalewa kei na gone era duidui matatamata, era duivosavosa, e duidui tale ga nodra isususu, era duavata na mataveitacini qo e veiyasa i vuravura. (Same 133:1; Joni 10:16) Era gumatua tale ga na vunautaka na itukutuku vinaka. Era tu vakarau mera wasea nodra inuinui me baleta na vuravura vou vei ira na tu vakarau na rogoca. (Maciu 28:19, 20; Vkta 14:6, 7; 22:17) Ke o lewena na isoqosoqo levu qori e macala ga ni o na maraqeta na inuinui totoka ena veigauna se bera mai.
3. Na cava na nona inaki o Setani?
3 E sega ni vinakata na Tevoro meda nuitaka na veigauna vinaka se bera mai. E nona inaki mo vakabauta ni sega ni kauaitaki iko o Jiova, ni na sega tale ga ni vakayacora nona vosa ni yalayala. Ke rawata o Setani nona inaki meda kua ni nuitaka na veigauna se bera mai, eda na yalolailai sara ga, ena rawa mada ga nida biuti Jiova. Eda na raica ena ulutaga qo ni a saga me cakava qori na Tevoro vei Jope, me kua tale ga ni qaravi Jiova.
4. Na cava eda na veivosakitaka ena ulutaga qo? (Jope 1:9-12)
4 Ena ulutaga qo eda na veivosakitaka na iwalewale e vakayagataka o Setani me kua kina ni yalodina o Jope. (Wilika Jope 1:9-12.) Eda na veivosakitaka tale ga na ka eda vulica ena ivakaraitaki nei Jope kei na vuna e bibi kina meda kua ni guilecava ni lomani keda na Kalou, ena vakayacora tale ga nona vosa ni yalayala.
E SAGA O SETANI ME YALOLAILAI O JOPE
5-6. Na cava e yacovi Jope ena dua na gauna lekaleka?
5 E totoka sara tu ga na bula nei Jope. E marautaka nona veiwekani voleka kei Jiova, e dua nona vuvale levu, eratou dau duavata, e turaga vutuniyau tale ga. (Jope 1:1-5) Ia ena dua ga na siga, e kau tani vua na ka kece qori. Kena imatai, e vakarusai na nona iyau. (Jope 1:13-17) Oti ratou mate kece na luvena. Vakasamataka mada na ituvaki vakaloloma qori, era dau rarawa na itubutubu ni mate e dua na luvedra. Vakasamataka mada nodrau kidroa, rarawa kei na nodrau yalolailai o Jope kei watina ni rau rogoca ni sa mate kece na tini na luvedrau. Sa rauta me dresulaka na nona isulu o Jope ena nona rarawa e qai tekicuva ina qele!—Jope 1:18-20.
6 Oti e vakavuna o Setani me tauvi Jope e dua na mate mosimosi e vakavu madua. (Jope 2:6-8; 7:5) Ena dua na gauna e dokai vakalevu o Jope ena nona itikotiko. Era dau lai kere ivakasala vua e levu. (Jope 31:18) Ia qo era sa sega ni lako vua. Era sa yawaki koya na wekana, nona itokani voleka, kei ira mada ga nona dauveiqaravi!—Jope 19:13, 14, 16.
E levu na mataveitacini ena gauna qo era na kila vinaka na veika dredre e sotava o Jope (Raica na parakaravu 7) *
7. (a) Na cava e nanuma o Jope ni vakavuna nona rarawa, ia na cava e sega ni cakava? (b) Na ituvaki cava ena rairai sotava na lotu vaKarisito ena via tautauvata kei na ka e laurai ena iyaloyalo?
7 E vinakata o Setani me vakabauta o Jope ni a rarawa tiko baleta ni sega ni vakadonui koya o Jiova. Me kena ivakaraitaki, e vakavuna o Setani me liwa e dua na batinicagi kaukaua me yavalata na tutunivale e tiko kina na tini na luvei Jope, eratou kana vata tiko. (Jope 1:18, 19) E vakavuna tale ga me lutu mai lagi na bukawaqa me vakama na qelenimanumanu i Jope kei ira na dauveiqaravi era qarava tiko. (Jope 1:16) Ni lako mai lomalagi na cagi kei na bukawaqa e nanuma kina o Jope ni lako mai vei Jiova. E nanuma o Jope ni a vakararawataki Jiova. Ia e sega ni vosavakacacataka na Tamana vakalomalagi. E vakadinata o Jope ni levu na ka vinaka e vakarautaka vua o Jiova ena veiyabaki sa sivi. E tukuna kina ni marau ni ciqoma na ka vinaka, me tu vakarau tale ga me ciqoma na ka ca. E kaya kina: “Me vakacaucautaki tiko ga na yaca i Jiova.” (Jope 1:20, 21; 2:10) Sa sega nona ilavo o Jope, ratou mate na luvena, e tauvimate tale ga ia e yalodina tiko ga vei Jiova. E sega ni yaco ga e keri nona veivakatovolei o Setani.
8. Na iwalewale cava tale e vakayagataka o Setani vei Jope?
8 E vakayagataka e dua tale na iwalewale o Setani vei Jope, e uqeta e tolu na itokani lasu me nanuma kina ni tawayaga. Eratou kaya na tolu na tagane qo ni nona vakararawataki o Jope e vakadinadinataka ni levu nona caka ca. (Jope 22:5-9) Ratou saga tale ga me vakabauta o Jope ni sega ni kauaitaka na Kalou na nona sasaga, se mani vakacava na levu ni ka vinaka e cakava. (Jope 4:18; 22:2, 3; 25:4) Ratou saga me nanuma o Jope ni sega ni lomani koya na Kalou, ni na sega ni karoni koya, ni sega tale ga ni yaga nona sokaloutaki koya. Ena rairai nanuma kina o Jope ni sa tawayaga na kena ituvaki.
9. Na cava e uqeti Jope me yaloqaqa, me dei tiko ga?
9 Raitayaloyalotaka mada ni dabe toka o Jope ena dravusa, e momosi na yagona. (Jope 2:8) Ratou tukuna tiko ga nona itokani ni tamata ca, e sega sara ga ni yaga na ka e cakava. E bikai koya na veika dredre me vaka na vatu lelevu, e vakararawataki koya vakalevu na nodratou mate na luvena. E galu tu ga o Jope. (Jope 2:13–3:1) Eratou nanuma kina na nona itokani ni na vakanadakuya na Dauveibuli o Jope, ia e cala nodratou nanuma. De dua e raici ratou yani na nona itokani lasu qai kaya: “Me yacova niu mate, au na sega ni soro ena noqu yalodina!” (Jope 27:5) Na cava e uqeti Jope me yaloqaqa me dei tale ga ena ituvaki qori? Ena gauna sara ga e yalolailai tu kina, e nuitaka tiko ga ni na vukei koya na nona Kalou dauloloma. E kila ke mate mada ga ena vakaturi koya o Jiova.—Jope 14:13-15.
EDA NA VAKATOTOMURI JOPE VAKACAVA?
10. Na cava eda vulica ena kena itukutuku o Jope?
10 Eda vulica ena itukutuku kei Jope ni sega ni rawa vei Setani me vakaukauataki keda meda biuti Jiova, e kila vinaka tale ga o Jiova na keda ituvaki. Eda kila vinaka ena veika e sotava o Jope na veika e okati tiko kina. Raica mada eso na ka eda vulica vei Jope.
11. Na cava ena yaco ke da nuitaki Jiova tiko ga? (Jemesa 4:7)
11 E vakaraitaka o Jope ke da nuitaki Jiova eda na vosota na veika dredre qai vorati Setani. Na cava ena yaco? E vakadeitaka vei keda na iVolatabu ni na dro tani na Tevoro.—Wilika Jemesa 4:7.
12. E vakadeitaki Jope vakacava na inuinui ni veivakaturi?
12 E bibi meda vakabauta na inuinui ni veivakaturi. Me vaka e vakamacalataki ena ulutaga sa oti, e vinakata o Setani meda rerevaka na mate meda kua kina ni yalodina. Me vaka e laurai ena kena ituvaki o Jope, e tukuna o Setani ni na sega ni yalodina me rawa ga kina ni bula. E cala o Setani. E yalodina tiko ga o Jope ena gauna e nanuma kina ni sa voleka ni mate. E vosota rawa ga ni nuitaka na vinaka i Jiova kei na nona kila ni na vukei koya. E nuidei o Jope ni kevaka ena sega ni vukei koya o Jiova ni se bula tiko, ena vakaturi koya ena dua na gauna e muri. E vakabauta sara ga o Jope na inuinui ni veivakaturi. Nida vakabauta dei na inuinui qori eda na yalodina tiko ga kevaka mada ga eda mate.
13. Na cava e bibi kina meda kauaitaka na iwalewale e vakayagataka o Setani vei Jope?
13 Meda kauaitaka na iwalewale e vakayagataka o Setani vei Jope ni vakayagataka tale tiko ga nikua. Dikeva na ka e tukuna o Setani: “Ena solia na tamata [sega ni o Jope ga] na ka kece e tu vua me bula kina.” (Jope 2:4, 5) E kaya tiko o Setani nida sega ni lomani Jiova da qai biuti koya meda rawa ni bula kina. E tukuna tale ga o Setani ni sega ni lomani keda na Kalou, ni sega ni kauaitaka na noda sasaga meda vakamarautaki koya. Nida kila na ka e cakava tiko o Setani eda sega kina ni vakacalai ena iwalewale e vakayagataka.
14. Na cava eda na kila nida sotava na veika dredre?
14 Meda raica na ituvaki dredre eda sotava me gauna vinaka meda kila eso na ka me baleti keda. Na ituvaki dredre e sotava o Jope e vulica kina ni tiko eso nona malumalumu me veisautaka. Kena ivakaraitaki, e vulica o Jope ni vinakati me yalomalumalumu vakalevu. (Jope 42:3) Eda rawa ni kila eso tale na ka me baleti keda nida sotava na veika dredre. E dua na tacida o Nikolay * e bala e valeniveivesu ni tauvimate bibi tu, e kaya: “Noqu tiko e valeniveivesu au mai kila kina ni tiko eso na itovo e vinakati meu veisautaka.” Nida sa kila na noda malumalumu meda veisautaka sara.
15. Meda vakarorogo vei cei? Na vuna?
15 E bibi meda vakarorogo vei Jiova sega vei ira na keda meca. E vakarorogo vinaka o Jope ni vosa vua o Jiova, e vaka ga e tukuna tiko vua na Kalou: ‘O raica noqu kaukaua ni veibuli? Au kila vinaka na ka kece e yacovi iko. O nanuma niu sega ni rawa ni karoni iko?’ E vakamalumalumutaki koya o Jope qai vakavinavinakataka nona yalovinaka o Jiova, e kaya: “Na daligaqu sa dau rogoca tu me baleti kemuni, ia qo au sa raici kemuni ena mataqu.” (Jope 42:5) Kena irairai ni se dabe tiko ga o Jope ena dravusa, e tauvi bo na yagona, ratou sa bulu tale ga na luvena ni cavuti qori. Ia e vakadeitaka o Jiova na nona lomani Jope, e vakadonui koya tale ga.—Jope 42:7, 8.
16. Me vaka e tukuni ena Aisea 49:15, 16, na cava meda nanuma tiko nida sotava na veika dredre?
16 Nikua tale ga, de dua era na vosavakacacataki keda eso ra qai kaya nida tawayaga. Era na rairai saga mera vakacacana na keda irogorogo se na irogorogo ni isoqosoqo, ra qai “vosavakacacataki” keda. (Maciu 5:11) Eda vulica ena ka e sotava o Jope ni nuidei o Jiova nida na yalodina tiko ga vua nida sotava na veika dredre. E lomani keda o Jiova, ena sega ni biuti ira na nuitaki koya. (Wilika Aisea 49:15, 16.) Kua ni kauaitaka nodra vakaucacataki keda na meca ni Kalou! E kaya e dua na tacida mai Taki o James, e sotava na veika dredre na nona vuvale: “Keitou kila ni keitou na yalolailai kevaka keitou rogoca tiko ga na lasu me baleti ira na tamata ni Kalou. Keitou kauaitaka gona na inuinui ni Matanitu ni Kalou qai gumatua tiko ga neitou qaravi Jiova. Keitou marau tiko kina.” Me vakataki Jope ga, eda vakarorogo vei Jiova! Na nodra lasu na keda meca ena sega ni vakaseavutaka na noda inuinui.
ENA VAKADEITAKI IKO NA NOMU INUINUI
E vakalougatataki o Jope ena nona yalodina, e dede nodrau marautaka vakaveiwatini na veivakalougatataki i Jiova (Raica na parakaravu 17) *
17. Na cava o vulica ena nodra ivakaraitaki na tagane kei na yalewa yalodina era tukuni ena Iperiu wase 11?
17 O Jope e dua vei ira na dauveiqaravi i Jiova e yaloqaqa qai dei tiko ga ni sotava na veika dredre. Ena nona ivola na yapositolo o Paula vei ira na Iperiu, e cavuta e levu tale na ivakaraitaki, e kaya ni “levu sara na ivakadinadina.” (Iper. 12:1) Era sotava tale ga na ituvaki dredre, ia era yalodina vei Jiova. (Iper. 11:36-40) Vakacava e tawayaga na nodra vosota kei na nodra cakacaka vakaukaua? Sega! Nira se bula era sega ni raica na kena vakayacori na vosa ni yalayala kece ni Kalou, ia era nuitaki Jiova tiko ga. Nira kila ni vakadonui ira o Jiova, era nuidei kina nira na raica na kena vakayacori nona vosa ni yalayala. (Iper. 11:4, 5) Na nodra ivakaraitaki ena uqeti keda meda nuitaki Jiova tiko ga.
18. Na cava meda gumatua ni cakava? (Iperiu 11:6)
18 Nikua eda bula tiko ena vuravura e torosobu tiko ga na kena ivakarau. (2 Tim. 3:13) E se sega ni cegu nona vakatovolei ira na tamata ni Kalou o Setani. Eda na sotava e levu tale na ituvaki dredre. Meda gumatua tiko gona na qaravi Jiova, eda nuidei ni ‘yavutaki vua na Kalou bula na noda inuinui.’ (1 Tim. 4:10) Nanuma na nona vakalougatataki Jope o Jiova, e vakaraitaka ni “dau veikauaitaki qai dau yalololoma.” (Jeme. 5:11) Meda yalodina tiko mada ga vei Jiova, meda nuidei ni na vakaicovitaki ira na “vakasaqarai koya ena yalogu.”—Wilika Iperiu 11:6.
SERE 150 Vakasaqara na Kalou Mo Bula
^ Nida vakasamataka e dua e sotava na veika dredre, eda dau nanumi Jope. Na cava eda vulica ena ka e sotava na turaga yalodina qori? Eda vulica ni o Setani e sega ni rawa ni vakaukauataki keda meda biuti Jiova. Eda vulica tale ga ni kila vinaka o Jiova na keda ituvaki. Me vaka ga ni vakaotia na veika dredre e sotava o Jope, ena vakaotia tale ga na veika dredre eda sotava. Ke da vakaraitaka ena ka eda cakava nida vakabauta na veika qori, eda na wili vata kei ira era “nuitaki Jiova” dina.
^ IVAKAMACALA NI VOSA: Na vosa vakaIperiu e vakadewataki me “nuitaka” e kena ibalebale meda “waraka” e dua na ka. E tiko tale ga kina na vakasama nida nuitaka e dua se vakararavi vua.—Same 25:2, 3; 62:5.
^ Sa veisau eso na yaca.
