1. a) Ki èspwa Jéova ban-nou ? b) Lèwvwè yo ka di ‘mèt èspwa an nou adan Jéova’, ka sa vé di ? (gadé nòt-la).

 JÉOVA ka ba moun ki enmé-y on bèl èspwa toubònman. Talè, ponmoun pé’é malad ankò, ponmoun pé’é ka pléré pas i anpenn ankò é ponmoun pé’é mò ankò pas Jéova ké fè tout sé biten-lasa disparèt (Rév. 21:3, 4). I ké édé « moun ki ni imilité » é ki ka mèt èspwa a yo adan-y fè latè vin on paradi (Sòm 37:9-11). É lanmityé-la nou ké ni èvè-y la ké pi bèl ankò é ké pi solid ankò ki tala nou ja ni la èvè-y la. Mésyé ! Mi on bèl èspwa mi ! Men poukwa nou pé sèten a san pou san kè sé pwomès-lasa ké réyalizé ? Jéova toujou ka tchenn a mo a-y. Sé pousa, nou pé ‘mèt èspwa an nou adan Jéova b’ (Sòm 27:14). É nou ké montré kè nou ka mèt èspwa an nou adan-y lèwvwè nou ka atann èvè onlo pasyans é èvè onlo jwa kè i réyalizé pwojé a-y (Iz. 55:10, 11).

2. Ka Jéova ja fè ki ka montré-nou kè nou pé fè-y konfyans ?

² Jéova toujou ka tchenn a mo a-y é i ja montré-nou sa. An-nou palé dè on pwomès ki bèl toubònman é kè nou ka touvé adan liv a Larévélasyon. Jéova té pwomèt kè a épòk an nou, i té’é sanblé moun ki ka sòti adan tout nasyon, adan tout tribi é adan tout lang é kè sé moun-lasa té’é adoré-y é kè yo té’é soudé. Yo ka kriyé gwoup-moun-lasa, ‘gran foulmoun-la’ (Rév. 7:9, 10). Adan gran foulmoun-lasa, ni misyé, ni madanm é ni timoun. Yo pa ni menm nasyonalité-la, yo pa ka sòti menm koté-la é yo ka palé tout kalté lang men yotout ka viv anpé é yo ka fòwmé onsèl fanmi ki soudé (Sòm 133:1 ; Jan 10:16). Yo ka palé ba moun ki alantou  a yo dè bèl èspwa-la yo ni la kè talè, biten-la ké pibon adan mond nouvo la é yo ka chèché tout ti lokazyon pou palé dè sa (Mat. 28:19, 20 ; Rév. 14:6, 7 ; 22:17). Si ou ka fè pawti a gran foulmoun-la, sèten bèl èspwa-lasa ni onlo valè pou-w.

3. Ki òbjèktif Dyab-la ni ?

³ Onsèl biten ki adan tèt a Dyab-la sé fè-nou pèd bèl èspwa-la nou ni la. É pou i rivé fè sa, i ka chèché fè-nou kwè kè Jéova pa ka entérésé-y a nou é kè i pé’é tchenn pwomès a-y. Si i ka rivé atenn òbjèktif-lasa, nou pé’é ni kouraj ankò é nou ké jous ba Jéova do. Kon nou ké vwè-y adan awtik-lasa, sé konsa i aji èvè Jòb pou fè-y pèd èspwa a-y é pou fè-y lagé Jéova.

4. Ka nou ké vwè adan awtik-lasa ? (Jòb 1:9-12).

⁴ Satan fè tousa i té pé pou i té pé sa anpéché Jòb rété fidèl a Jéova. Adan awtik-lasa, nou ké vwè ki métòd i itilizé pou fè sa (li Jòb 1:9-12). Nou ké vwè osi ka ègzanp a Jòb ka aprann-nou é nou ké vwè poukwa fò pa nou jen oubliyé kè Bondyé enmé-nou é kè i ké réyalizé pwomès a-y.

5-6. Adan on batzyé, onlo biten rivé Jòb. Ki biten ésa ?

⁵ Zafè a Jòb té ka maché byen. I té bon bon zanmi èvè Jéova, i té ni on fanmi ki té soudé é sé té on moun ki té rich (Jòb 1:1-5). Men adan onsèl jouné, i pèd près tousa i té ni. Dabò pou yonn, tout zannimo a-y mò (Jòb 1:13-17). É aprésa, i pèd tout timoun a-y. Mésyé, sa dwèt té rèd ! Lèwvwè on fanmi ka pèd on timoun, sa rèd toubònman. Men Jòb é madanm a-y, a pa on timoun tousèl yo pèd ni 2 men sé sé 10 timoun-la yo té ni la kè yo pèd la. Sa dwèt fè-yo on chòk. Ou ka imajiné jan yo dwèt mèt men si tèt é jan li é madanm a-y dwèt té ka soufè ! Nou ka tou konprann poukwa Jòb chiré lenj a-y é poukwa i jété kò a-y atè. Lè on moun té ka chiré lenj a-y konsa, sa té vé di kè i té andèy (Jòb 1:18-20).

⁶ Aprésa, Satan fè Jòb trapé on maladi ki té ka fè-y soufè toubònman é maladi-lasa té ka fè-y wont (Jòb 2:6-8 ; 7:5). Avan i té tonbé malad, onlo moun té ka rèspèkté-y. Ni moun ki té ka vin vwè-y pou mandé-y konsèy (Jòb 31:18). Men konnyéla, yo pa té vé vwè-y ni an blan ni an nwè. Sé frè a-y la pa té vé vwè-y, sé bon bon zanmi-la i té ni pa té vé vwè-y nonplis é kanta sé sèwvitè la i té ni la, pa menm palé ! (Jòb 19:13, 14, 16).

7. a) Pou Jòb, kimoun ki té ka fè-y soufè, men ka i pa jen fè ? b) Ki éprèv ki ka sanm tala ki asi imaj-la ki k’ay èvè paragraf 7 la on krétyen pé rivé a jwenn jòdijou ?

⁷ Satan té vé kè Jòb mèt an tèt a-y kè si i té ka soufè sé pas Bondyé pa té ka béni-y ankò. Pa ègzanp, timoun a Jòb té sanblé adan on kaz pou yo té manjé ansanm é pannan yo té ka manjé, Satan fè on van lévé é van-lasa soukwé kaz-la é kaz-la tonbé asi sé timoun-la (Job 1:18, 19). Aprésa, i fè difé sòti an syèl-la pou détwi tout troupo a Jòb men a pa sé troupo-la difé-la détwi tousèl. Difé-la détwi sé moun-la ki té ka véyé sé troupo-la osi (Jòb 1:16). Van-lasa é difé-lasa a pa té dé biten ki natirèl. Kifè, Jòb konpranndèdi kè sé Jéova ki té fè sa. Pétèt i pansé kè i té fè on biten é kè i pa té ka fè Jéova plézi ankò. Men magré tousa, i pa té dakò menm menm menm pou modi Pap’a-y ki an syèl-la. I sonjé kè toutolon a vi a-y Jéova ba-y onlo bénédisyon. Kifè, i di an tchè a-y kè si i té asèpté sé bon biten-la Jéova té ba-y la èvè onlo jwa, fò i té asèpté osi sé mové biten-la  Jéova ka fè vin asi-y la. Sé pousa, i di : « Fò moun kontinyé ba non a Jéova louwanj » (Jòb 1:20, 21 ; 2:10). Menmsi i pèd tousa i té ni, i pèd timoun a-y é i pa té ni on bon santé ankò, i rété fidèl a Jéova. Men Satan poto’o fin èvè-y.

8. Ki dòt biten Satan fè Jòb ?

⁸ Satan sèvi èvè ondòt métòd ankò pou kouyonné Jòb ; i pousé 3 boug ki té ka di kè yo té zanmi a-y krazé moral a-y. Sé boug-lasa ba-y lenprésyon kè i pa té ni pon valè. Yo di-y konsa kè si i ka soufè bon soufè la sé pas i fè onlo mové biten (Jòb 22:5-9). Yo éséyé fè-y kwè osi kè menmsi i té ja fè onlo éfò pou fè Bondyé plézi, sa pa té ni pon valè pou Jéova ankò (Jòb 4:18 ; 22:2, 3 ; 25:4). An réyalité, yo té vé fè Jòb kwè kè Bondyé pa té enmé-y, kè i pa té’é pran swen a-y é kè sa pa té ka vo lapenn kè i adoré Bondyé. Sa yo di-y la té pé fè-y pèd èspwa.

9. Ka ki édé Jòb ni tousa kouraj é ka ki édé-y ni fòs konsa magré tout sé pwoblèm-la i té ka jwenn la ?

⁹ An-nou imajiné sa. Jòb sizé adan onpakèt sann é i ka soufè bon soufè la (Jòb 2:8). Sé zanmi-la i konpranndèdi i té ni la ka kontinyé di-y kè i sé on mové moun é yo ka kontinyé di-y osi kè tousa i ja fè adan vi a-y pa ni pon valè. Jòb ka santi kè i ka néyé anba tout sé éprèv-la i ka jwenn la é tchè a-y an bobo lèwvwè i ka sonjé tout timoun a-y kè i pèd. Odépa, i pa’a di ayen (Jòb 2:13 – 3:1). É pétèt kè sé boug-la ki té la la kwè kè sa té vlé di kè Jòb té ba Kréyatè a-y do. Men yo té ka pèd fil a yo. Onlè, Jòb gadé-yo anmitan zyé é mi sa i di-yo : « Jiskatan an mò, an pé’é lagé fidélité an mwen ! » (Jòb 27:5). Men ka ki édé Jòb ni tousa kouraj é ka ki édé-y ni fòs konsa magré tout sé pwoblèm-la i té ka jwenn la ? Menm lèwvwè i té pi ba ki tè, i toujou mèt an tèt a-y kè on jou Bondyé ké soulajé-y é i  pa jen pèd èspwa-lasa. I té sav kè menmsi i vin mò, Jéova ké résisité-y (Jòb 14:13-15).

10. Ka ègzanp a Jòb ka aprann-nou ?

¹⁰ Ègzanp a Jòb ka montré-nou kè Satan pé pa oblijé-nou lagé Jéova é kè Jéova konnèt byen tousa ki ka rivé-nou. Anplisdisa, ègzanp-lasa ka édé-nou konprann pibyen poukwa Jòb touvé-y adan sitiyasyon-lasa é kijan sa ka konsèwné-nou osi. Konnyéla, an-nou vwè adan ki domenn an pawtikilyé nou pé imité Jòb.

11. Siwvwè nou ka kontinyé mèt konfyans an nou adan Jéova, dè ki biten nou pé sèten ? (Jak 4:7).

¹¹ Tousa ki rivé Jòb ka montré-nou kè siwvwè nou ka kontinyé mèt konfyans an nou an Jéova, nou ké kapab andiré nenpòt ki difikilté é nou ké pé doubout douvan Satan. Alò, ka ki ké rivé ? Labib ka di kè Dyab-la ké kouri lwen an nou (li Jak 4:7).

12. Jòb té ka kwè adan la rézirèksyon. Kijan sa ba-y fòs ?

¹² Nou ni lèspwa kè Jéova ké résisité moun ki mò men fò-nou sèten dè sa a san pou san. Kon nou vwè-y adan awtik a simenn pasé, konm Satan sav kè nou pè mò, souvantfwa, i ka sèvi èvè sa pou anpéché-nou rété fidèl a Jéova. Satan di kè Jòb té’é paré a fè nenpòt ki biten é kè i ké jous paré a lagé Jéova pou sové vi a-y. Men i té ka pèd fil a-y. Jòb rété fidèl a Jéova menm lèwvwè i konpranndèdi i té kay mò. I té sèten kè Jéova té ni onlo bonté é i té sèten osi kè Jéova té’é réglé sitiyasyon-la é sa édé-y andiré. I té sèten a san pou san osi kè si Jéova pa té ka fè ayen pou-y lè i té vivan, i té’é fè sa apré, lèwvwè i té’é résisité-y. Jòb té sèten kè Jéova té’é résisité-y é pou-y, a pa té on èspwa a malpapay. Si nou osi, nou ka kwè fò adan la rézirèksyon, menmsi yo ka mennasé-nou é kè yo ka di-nou kè yo ké tchouyé-nou, nou pé’é lagé Jéova é nou ké rété fidèl a san pou san.

13. Lè nou ka gadé sa Satan fè Jòb, ka sa ka aprann-nou ?

¹³ Lè nou ka pran on ti tan pou gadé sé métòd-la Satan itilizé la èvè Jòb, sa entérésan toubònman pas i ka sèvi èvè sé menm métòd-la jòdijou. Enki gadé sa limenm di Jéova : « On nonm [a pa Jòb tousèl] ké bay tousa i ni pou sové vi a-y » (Jòb 2:4, 5). Donk i ka di kè nou pa enmé Jéova vréman é kè si sé pou sové vi an nou, nou jou parèt a lagé Jéova. Anplisdisa, i ka di kè Bondyé pa enmé-nou é kè i pa menm ka vwè tout sé éfò-la kè nou ka fè la pou fè-y plézi. Men konm nou sav ola Satan bizwen vin èvè nou, nou pa ka kwè sé manti-la i ka ban-nou la.

14. Lè nou ka jwenn on éprèv, ka sa pé édé-nou vwè ? Bay on ègzanp.

¹⁴ Lèwvwè nou ka jwenn on éprèv, fò-nou vwè sa kon on lokazyon pou nou konnèt-nou pibyen. Sé éprèv-la Jòb jwenn la édé-y vwè adan ki domenn i té bizwen pwogrésé é sa édé-y fè sa ki fo pou kò a-y vin pibon adan sé domenn-lasa. Pa ègzanp, i vwè kè fò i té ni plis imilité (Jòb 42:3). Menmjan-la, lèwvwè nou ka jwenn on éprèv, sa pé édé-nou konnèt-nou pibyen. Nikolay c sé on frè yo té mèt lajòl alòskè kò a-y pa té bon menm. Mi sa i ka di : « Lè ou ka fè on radyo, sa ka fè-w vwè sa ki ka pasé andidan kò a-w é kè ou pé pa vwè konsa. Menmjan-la osi, lè ou ka jwenn on bout-rèd sa ka fè-w vwè ki biten pou ou travay adan pèwsonalité a-w. » Dépi nou rèmawké kè nou ni on défo, nou pé fè sa ki fo pou pwogrésé adan domenn-lasa.

15. Kimoun pou nou kouté é poukwa ?

¹⁵ Sé Jéova pou nou kouté, a pa lènmi  an nou. Lèwvwè Jéova palé ba Jòb, i pran tan kouté-y byen. Jéova fè-y rézonné é sé konsi i té ka di-y : « Gadé tousa an kréyé grasa puisans an mwen. An sav byen tousa ou ka viv. Ès ou ka pansé an pé’é pé okipé-mwen dè-w ? » Èvè onlo imilité é èvè onlo rèkonésans pou tout bonté-la Jéova ni la, Jòb di-y konsa : « An té ja tann-palé dè-w, men konnyéla, an ka vwè-w an dé zyé an mwen » (Jòb 42:5). Pétèt lè Jòb di sé pawòl-lasa, i té sizé adan onpakèt sann é kò a-y té plen bobo toujou. A moman-lasa, timoun a-y té an tonm-la osi. Men magrésa, Jéova fè-y sonjé kè i enmé-y é kè i fyèw dè-y (Jòb 42:7, 8).

16. Dapré Izayi 49:15, 16, ka pou nou mèt fon an tèt an nou lè nou ka jwenn éprèv ?

¹⁶ Jòdijou osi, moun pé ka jiré-nou oben fè-nou konprann kè nou pa ni pon valè. Ni dòt moun osi ki pé éséyé détwi répitasyon an nou oben détwi répitasyon a òwganizasyon an nou. Pousa, yo ka di tout kalté manti asi nou pou fè-nou ditò (Mat. 5:11). Men ègzanp a Jòb ka montré-nou kè Jéova ka fè-nou konfyans. I sèten kè nou ké rété fidèl a-y menmsi nou anba éprèv. Jéova enmé-nou é i pé’é jen lagé moun ki ka mèt èspwa a yo adan-y (li Izayi 49:15, 16). An-nou fè tousa nou pé pou nou pa kouté tout sé manti-la lènmi a Bondyé ka bay la pou fè-nou ditò ! James, sé on frè ki ka rété an Tiwki é fanmi a-y viv dé sitiyasyon ki té rèd toubònman. Mi sa i ka èspliké : « Nou rann-nou kont kè lèwvwè nou té ka kouté sé manti-la yo té ka bay la asi sèwvitè a Bondyé, sa té ka dékourajé-nou.  Kifè, nou désidé konsantré-nou asi bèl èspwa-la nou ni la, kivédi asi Wayòm-la é nou désidé fè tousa nou té pé pou sèvi Bondyé èvè onlo balan. Sa édé-nou kontinyé mèt jwa an tchè an nou. » An-nou fè kon Jòb : an-nou kouté Jéova é an-nou fè tousa nou pé pou pa lésé manti a lènmi an nou fè-nou pèd èspwa.

17. An Ébré chapit 11, nou ka touvé ègzanp a onlo nonm é madanm ki rété fidèl a Bondyé. Ka ègzanp a yo ka aprann-nou ?

¹⁷ A pa Jòb tousèl ki té ni onlo kouraj é ki rété fidèl a Jéova magré sé éprèv-la i jwenn la. Lè nou ka gadé liv a Ébré, lapòt Pòl ka palé dè onpakèt sèwvitè a Bondyé, é i ka di kè yo sé « on gwo niyaj témwen » (Ébr. 12:1). Sèwvitè a Bondyé jwenn onlo éprèv ki té rèd toubònman men yo rété fidèl a Jéova tout vi a yo (Ébr. 11:36-40). Ès sa té vo lapenn kè yo fè tousa ? Wi ! Menmsi yo pa té ni tan vwè tout pwomès a Jéova réyalizé lèwvwè yo té vivan, yo kontinyé mèt èspwa a yo adan Jéova. Yo té sèten kè yo té ka fè Jéova plézi é yo té sèten osi kè on jou yo té’é vwè sé pwomès-la Jéova fè la réyalizé (Ébr. 11:4, 5). Ègzanp a yo ka ban-nou bon fòs é ka édé-nou pou nou kontinyé mèt èspwa an nou adan Jéova.

18. Ka ou byen désidé a fè ? (Ébré 11:6).

¹⁸ Pi sa k’ay é pi mond-lasa ka vin mové (2 Tim. 3:13). Satan ké kontinyé fè sèwvitè a Bondyé jwenn éprèv men kèlkèswa sé difikilté-la nou ké jwenn la, fò-nou byen désidé a sèvi Jéova èvè onlo balan pas nou sèten kè nou mèt èspwa an nou adan Bondyé-la ki vivan la (1 Tim. 4:10). ‘Jan-la Jéova fè sa fin pou Jòb la’ ka montré-nou kè « Jéova enmé-nou èvè tandrès é kè i plen mizérikòd » (Jak 5:11). Alò nou osi, an-nou rété fidèl a Jéova, é an-nou ni konfyans kè i ké rékonpansé « moun ki ka chèché-y vréman » (li Ébré 11:6).