ARTIK POU ÉTIDYÉ 27
« Mété to èspwar annan Jéova »
« Mété to èspwar annan Jéova ; a pou to gen kouraj é a pou to tchò fò » (PS. 27:14).
KANTIK 128 Endure jusqu’à la fin
KOUTWÉY ASOU SA NOU KÉ WÈ *
1. a) Ki èspwar Jéova bay nou ? b) Kisa sa lé di ‘mété nou èspwar annan Jéova’ ? (gadé nòt-a).
JÉOVA bay tout sa ki kontan li roun bèl èspwar. Titalò, i ké fè maladi, chagren ké lanmò fini (Rév. 21:3, 4). I ké idé « moun ki ka fè yé kò toupiti » é ki ka mété yé èspwar annan li, pou yé fè latè-a divini roun paradi (Ps. 37:9-11). É nou ké pouvé gen roun lanmityé ké li ki lontan pi fò é lontan pi bèl ki sa-la nou gen jòdla. Men roun bèl èspwar nou gen ! Mé poukisa nou pouvé sir ki tousa i promèt ké fèt ? Paské Jéova toujou ka tchenbé so promès ; donk nou pouvé ‘mété nou èspwar annan li *’ (Ps. 27:14). É nou ka montré ki nou ka mété nou èspwar annan li lò nou ka antann jantiman ké tchò kontan ki i fè sa i promèt nou-a (Is. 55:10, 11).
2. Kisa Jéova montré ?
2 Jéova montré ki i toujou ka tchenbé so promès. Annou wè roun di sa bèl promès-ya ki annan liv Révélation-an é ki ka fèt jòdla. Jéova té promèt ki annan nou lépòk, i té ké fè tout pèp ké tout nasyon, ti nasyon kou gran nasyon, ké tout lang vini ansanm pou adoré li annan vré ladorasyon-an. Yé ka aplé sa group-a « granfoul-a » (Rév. 7:9, 10). Menm si annan sa group-a i gen tout kalité mouché, madanm ké timoun ki ka vini di tout koté asou latè-a, é ki ka palé tout kalité lang, yé ka fòrmé roun fanmi ki ka viv annan lapè (Ps. 133:1 ; Jean 10:16). Yé ka préché osi ké bokou balan : yé toujou paré pou palé ké tout moun di èspwar yé gen-an : viv annan roun monn koté lavi-a ké pi bèl (Mat. 28:19, 20 ; Rév. 14:6, 7 ; 22:17). Si to ka fè parti di granfoul-a, sa èspwar-a gen bokou valò pou to, asiré pa pitèt.
3. Kisa Satan lé ?
3 Djab-a lé fè nou pédi èspwar nou gen-an. Pou fè sa, i ka chaché fè nou krè ki Jéova pa mélé ké nou, é ki i pa ké tchenbé so promès. Si Satan ka rivé fè nou pédi nou èspwar, nou pa ké gen kouraj ankò, é nou ké pitèt menm arété sèrvi Jéova. Kou nou ké wè l’, a sa menm i fè ké Jòb : i éséyé fè li pédi èspwar i té gen-an pou i lésé Jéova.
4. Kisa nou ké wè annan sa artik-a ? (Job 1:9-12).
4 Annan sa artik-a, nou ké wè kouman Satan éséyé fòrsé Jòb arété rété fidèl (li Job 1:9-12). Nou ké wè osi kisa èkzanp Jòb ka anprann nou, é poukisa nou pa janmen divèt bliyé ki Jéova kontan nou, é ki i ké fè sa i promèt fè.
SATAN KA ÉSÉYÉ FÈ JÒB PÉDI ÈSPWAR
5-6. Kisa ki rivé Jòb annan roun ti moman ?
5 Tout bagaj té ka alé byen pou Jòb. I té pròch ké Jéova, so fanmi té gran é yé tout té ka viv annan lapè. É i té rich (Job 1:1-5). Mé annan rounsèl lajournen, i pédi près tousa i té gen (Job 1:13-17). Pou koumansé, i pédi tout so zannimo. Apré sa, tout so timoun mouri. A pa té roun ti éprèv ! Lò roun annan yé timoun ka mouri, papa ké manman néyé anba chagren. Alòr imajiné kouman Jòb ké so madanm té divèt annan rounsèl léta lò yé anprann ki yé dis pitit té mouri ! Nou ka konprann poukisa Jòb déchiré so lenj, pou montré ki i té an dèy, épi i tonbé atè ! (Job 1:18-20).
6 Apré sa, Satan bay Jòb roun maladi ki té ka fè l’ soufri bokou é ki té ka fè l’ ronté (Job 2:6-8 ; 7:5). Anvan, tout moun té ka rèspèkté l’. Moun-yan té gen labitid alé wè l’ pou i bay yé konsèy (Job 31:18). Mé aprézan, yé pa té lé wè li ankò. Ni so frè, ni so bon zanmi, ni sa-ya ki té ka travay pou li, yé tout té ka mété l’ asou koté (Job 19:13, 14, 16).
Roun patché frè ké sò pouvé konprann sa Jòb viv, paské yé pasé anba menm kalité éprèv-ya * (gadé paragraf 7).
7. a) Dapré Jòb, kimoun té ka fè li soufri, mé kisa i réfizé fè ? b) Ki éprèv roun krétyen pouvé gen é ki ka sanblé éprèv nou ka wè asou zimaj-a ki k’alé ké paragraf 7-a ?
7 Satan té lé fè Jòb krè ki si i té ka soufri, a té paské Jéova pa té kontan l’ ankò. Parèkzanp, i fè roun gran van krazé kaz-a koté so dis pitit té ka manjé ansanm (Job 1:18, 19). É i fè difé soti di syèl-a pou tchwé tout so zannimo-ya mé osi pou tchwé tout sa ki té ka véyé sa zannimo-ya (Job 1:16). Van-an ké difé-a té ka soti di syèl-a, donk Jòb pansé ki a té Jéova ki té fè sa. É a pou sa i krè ki i té pitèt fè roun bagaj ki té fè li lapenn. Magré sa, i réfizé modi so Papa annan syèl-a. I sonjé ki pannan tout so lavi, i té bay li roun patché bénédiksyon. I di annan so tchò ki, si i té byen kontan asèpté tout bon bagaj Bondjé té bay li, i té divèt osi paré pou asèpté sa ki té mové. A pou sa i di : « A pou yé kontinyé bay non Jéova louwanj » (Job 1:20, 21 ; 2:10). Menm si i té pédi tout so soumaké, so timoun ké so lasanté, i rété fidèl douvan Jéova. Mé Satan patékò fin ké li...
8. Ki ròt bagaj Satan itilizé ké Jòb ankò ?
8 Satan itilizé rounòt bagaj ké Jòb ankò : i sèrvi trwa mouché ki té zanmi ké Jòb swadizan, pou fè l’ santi ki i pa té vo anyen. Sa mouché-ya di ki si Jòb té ka soufri, a paské i té fè roun patché mové bagaj (Job 22:5-9). Yé éséyé fè li krè ki, menm si i pa té sa roun malfra é menm si i té fè tousa i té pouvé pou fè Jéova plézi, Jéova pa té mélé ké sa pyès (Job 4:18 ; 22:2, 3 ; 25:4). Anfèt, yé té lé fè li krè ki Bondjé pa té kontan l’, ki i pa té ké pran swen di li, é ki adoré Bondjé pa té ka sèrvi anyen. Tousa yé di té pouvé fè Jòb krè ki i té fin bat.
9. Kisa ki idé Jòb gen bokou kouraj épi rété fò ?
9 Imajiné sitiasyon-an : Jòb asiz annan sann-an é a pa ti soufri i ka soufri (Job 2:8). So zanmi swadizan pa ka arété di ki i sa roun mové moun é ki i pa janmen fè anyen ki bon. I ka santi so kò krazé akoz di tout éprèv ki tonbé asou li, é so tchò gro ké chagren paské so timoun mouri. Pou koumansé, Jòb pa ka di anyen (Job 2:13 – 3:1). Lò yé ka wè sa, pitèt mouché-ya ki ka fè kousidiré yé sa so zanmi ka pansé ki i tounen do bay so Kréyatèr. Mé yé ka tronpé yé kò. Épi i gen roun moman, pitèt Jòb ka lévé so tèt, i ka gadé yé an mitan yé wéy é i ka di : « Jiktan mo mouri, mo pa ké jen lésé mo fidélité ! » (Job 27:5). Kisa ki idé Jòb pou i gen kouraj konsa, é pou i rété fò magré tout so soufrans ? Menm lò i té pi dékourajé, i pa janmen pédi èspwar ki so Bondjé té ké bay li roun soulajman roun jou. I té savé ki, menm si i té ka mouri, Jéova té ké résisité l’ (Job 14:13-15).
KOUMAN NOU POUVÉ IMITÉ JÒB ?
10. Kisa istwè Jòb ka anprann nou ?
10 Istwè Jòb ka anprann nou ki Satan pa pouvé fòrsé nou lésé Jéova, é ki Jéova byen savé tousa ki ka rivé nou. Sa ka idé nou konprann pi byen osi kisa ki dèyè éprèv-ya. Mé aprézan, annou wè annan ki sitiasyon nou pouvé imité Jòb.
11. Si nou ka kontinyé fè Jéova konfyans, di kisa nou pouvé sir ? (Jacques 4:7).
11 Sa ki rivé Jòb ka montré nou ki si nou ka kontinyé fè Jéova konfyans, nou ké pouvé tchenbé annan nenpòrt ki éprèv. É nou ké rivé pa bay Satan pyès chans. Labib-a ka di nou ki si nou ka fè sa, Djab-a ké pran kouri lwen di nou (li Jacques 4:7).
12. Kouman èspwar rézirèksyon-an bay Jòb fòrs ?
12 Nou divèt krè rèd annan rézirèksyon-an. Kou nou wè l’ annan ròt artik-a, souvan Satan ka sèrvi zafè pè mouri-a pou éséyé fè nou arété sèrvi Jéova ké fidélité. Satan di ki Jòb té ké fè tousa i té pouvé, menm arété sèrvi Jéova, pou sové so lavi. Mé a pa té vré menm ! Jòb rété fidèl douvan Jéova, menm lò i té krè ki i té ké mouri. Si i rivé tchenbé, a paské i té gen konfyans annan bonté Jéova-a é paské i té sir ki Jéova té ké ranjé tout bagaj. I té sir ki si Jéova pa té ka mété lanmen pou li pannan i té vivan, i té ké fè l’ pita lò i té ké résisité l’. Jòb té ka krè rèd annan rézirèksyon-an. Si nou menm osi nou ka krè rèd annan rézirèksyon-an, anyen pa ké pouvé fè nou arété sèrvi Jéova, menm si yé ka ménasé tchwé nou.
13. Poukisa nou divèt byen gadé kouman Satan fè ké Jòb ?
13 Nou divèt byen gadé kouman Satan fè ké Jòb, paské i ka fè menm bagaj-ya ké nou jòdla. Gadé sa i di : « Roun moun [pa Jòb rounso] ké bay tousa i gen pou so lavi » (Job 2:4, 5). Anfèt, dapré Satan, a pa kontan nou kontan Jéova, é si nou gen pou sové nou lavi, nou ké arété adoré li lanmenm. Anplis di sa, i ka di ki Bondjé pa kontan nou, é i pa menm ka wè tousa nou ka fè pou fè li plézi. Kou nou byen savé kouman Satan ka fè, nou pa ka lésé li bloublou nou é nou ka kontinyé mété nou èspwar annan Jéova.
14. Kisa éprèv-ya pouvé idé nou wè ? Bay roun èkzanp.
14 Nou divèt wè éprèv-ya kou roun okazyon pou nou anprann bagaj asou nou menm. Lò Jòb té annan éprèv, sa idé l’ wè sa i té gen pou chanjé. Parèkzanp, i anprann ki i té divèt gen plis imilité (Job 42:3). Nou menm osi, lò nou gen roun éprèv, nou pouvé anprann bokou bagaj asou nou menm. Nikolay * sa roun frè yé mété lajòl magré tout problèm santé i té gen. Men sa i ka di : « Lajòl, a kou lò nou k’alé fè roun èskanèr : sa ka montré nou sa ki pa k’alé koté nou. » É lò nou ka wè ki défo nou gen, nou pouvé travay pou korijé yé.
15. Kimoun nou divèt kouté, é poukisa ?
15 Nou divèt kouté Jéova, nou pa divèt kouté nou lèlmi. Jòb byen kouté lò Jéova palé pou li. Jéova fè li réfléchi. Anfèt i di : « Gadé tousa mo fè gras a mo pwisans. Mo byen savé tousa ki ka rivé to. Ès to krè mo pa pouvé pran swen di to ? » A ké imilité Jòb réponn é i montré ki i té gen rékonésans pou bonté Jéova-a. I di : « Mo zorè té tandé palé di to, mé, aprézan, mo ka wè to ké mo pròp wéy » (Job 42:5). Lò Jòb di sa i té pitèt asiz toujou annan sann-an, so kò kouvri ké bobo. É so timoun té toujou annan tonm-an. Pourtan, Jéova montré li ki i té kontan l’ é ki i té ka fè li plézi (Job 42:7, 8).
16. Dapré Isaïe 49:15, 16, kisa nou divèt kontinyé sonjé lò nou gen éprèv ?
16 Jòdla osi, moun-yan pouvé jouré nou, épi fè ké nou kousidiré nou pa té vo anyen. Sèrten ka « di tout kalité manti » asou nou, pou gaté nou répitasyon ouben répitasyon òrganizasyon Jéova-a (Mat. 5:11). Mé istwè Jòb ka anprann nou ki Jéova sir ki nou ké rété fidèl lò nou ké jwenn éprèv. I kontan nou é i pa ké janmen lésé sa-ya ki ka mété yé èspwar annan li (li Isaïe 49:15, 16). Donk annou pa kouté manti lèlmi Bondjé ka di. James sa roun frè ki ka rété an Tirki. So fanmi jwenn roun patché sitiasyon ki té rèd menm. Men sa i ka di : « Nou randé nou kò kont ki lò nou té ka kouté manti yé té ka di asou sèrvitèr Bondjé-ya, sa té ka dékourajé nou. Donk nou mété nou lidé asou èspwar Rwayonm-an é nou kontinyé sèrvi Jéova ké tout nou fòrs. A sa ki fè si nou tchò té toujou kontan. » Wi, kou Jòb, annou kouté Jéova é annou pa lésé manti nou lèlmi ka di, fè nou pédi èspwar nou gen-an !
TO ÈSPWAR KÉ FÈ TO TCHENBÉ
Jòb rousouvwè bénédiksyon paské i rété fidèl. Li ké so madanm viv lontan ké tchò kontan * (gadé paragraf 17).
17. Kisa èkzanp wonm ké fanm fidèl-ya ki annan Hébreux chapit 11 ka anprann nou ?
17 A pa Jòb rounso ki kontinyé gen kouraj é ki rété fò douvan lanmò. Annan lèt i ékri pou Ébré-ya, apot Pòl ka palé di roun patché ròt sèrvitèr Jéova é i ka di ki a « roun patché témwen » (Héb. 12:1). Sa sèrvitèr Jéova-ya jwenn éprèv ki té rèd, mé yé rété fidèl douvan Jéova pannan tout yé lavi (Héb. 11:36-40). Ès yé andirans ké tousa yé fè pou fè Jéova plézi, a té pou anyen ? Awa ! Menm si yé pa wè promès Bondjé réyalizé lò yé té vivan toujou, yé kontinyé mété yé èspwar annan li. É paské yé té sir ki yé té ka fè Jéova plézi, yé té sir osi ki yé té ké wè so promès fèt roun jou (Héb. 11:4, 5). Yé èkzanp ka idé nou ankò pi désidé kontinyé mété nou èspwar annan Jéova.
18. Kisa to byen désidé fè ? (Hébreux 11:6).
18 Jòdla, pi sa ka alé, pi bagaj-ya ka vin mové (2 Tim. 3:13). É Satan ké kontinyé voyé éprèv pou sèrvitèr Bondjé-ya. Mé kèlkéswa problèm nou ké jwenn, annou byen désidé travay rèd pou Jéova paské nou sir ki « nou mété nou èspwar annan roun Bondjé ki vivan » (1 Tim. 4:10). « Sa Jéova fè pou [Jòb] lò tout bagaj té fini » ka montré ki i « gen bokou lanmou pou nou é i plen ké mizérikòrd » (Jacq. 5:11). Kou Jòb, annou rété fidèl douvan Jéova, é a pou nou sir ki i ké rékonpansé « moun-yan ki ka chaché l’ ké tout yé tchò » (li Hébreux 11:6).
KANTIK 150 Cherche Dieu pour être délivré
^ Lò nou ka sonjé roun moun ki tchenbé rèd annan roun patché éprèv, souvan nou ka sonjé èkzanp Jòb. Kisa sa ki rivé sa mouché-a ki té fidèl ka anprann nou ? Nou ka anprann ki Satan pa pouvé fòrsé nou lésé Jéova. Nou ka anprann osi ki Jéova byen savé tousa ki ka rivé nou. É menm fason i fè éprèv Jòb fini, i ké fè noupa fini roun jou osi. Si annan sa nou ka fè, nou ka montré ki nou vréman sir di sa, sa lé di ki nou annan sa-ya ki ka ‘mété yé èspwar annan Jéova’.
^ POU BYEN KONPRANN : Yé ka sèrvi mo ébré-a « èspéré », pou palé di roun moun ki ka antann roun bagaj é ki présé sa bagaj-a rivé. Sa pouvé lé di osi fè roun moun konfyans ouben konté asou li (Ps. 25:2, 3 ; 62:5).
^ Yé chanjé déztrwa non.
