1. (1) ¿Kasa anasü waʼatapajaka nutuma Jehová? (2) ¿Kasa aküjüneeka achiki süka tü pütchikat «paʼatapaja tü kasa anasü naaʼinrajatkat Jehová»? (Paashajeʼera tü nootakat).

 EESÜ kasa anasü waʼatapajaka nutuma Jehová. Nüküjain wamüin najaʼttireerüin soʼu palit kaʼi tü ayuuliikat, tü mojuukalü aaʼin jee tü outaakat (Alat. Map. 21:3, 4). Nükaalinjeena na anamiakana süpüla paʼaraiisüinjatüin natuma tü Mmakat, nayajaʼa na aʼatapajakana tü kasa anasü naaʼinrajatkat (Sal. 37:9-11). Aleewashii waya nümaa maaʼulu, nükaalinjeenapejeʼe waya süpüla aleewain maʼin waya nümaa mapeena. Anataʼaleesüjaʼa maʼin tü kasa waʼatapajakat. ¿Jamüsü watüjaaka saaʼu nikeraajeerüin Jehová nünüiki? Shia süka nikeraajüin shia waneepia. Müsüjeseʼe sümüin tü Bibliakat: «Paʼatapaja tü kasa anasü naaʼinrajatkat Jehová» (Sal. 27:14). * Jaʼyasü waaʼu waʼatapajüin tü kasa anasü naaʼinrajatkat Jehová wanaa sümaa nnojoluin süshapalaain maʼin waaʼin otta ayatüle talatüin waaʼin sümaʼinruʼu waʼatapajüin tia (Is. 55:10, 11).

2. ¿Kasa pütchi nikeraajaka Jehová maaʼulu?

² Wainma kasa naaʼinraka Jehová wayaawataka atuma shiimain nikeraajüin nünüiki. Eesü wanee pütchi nikeraajaka suluʼu Alateetkat Mapeena. Saashin tia pütchikat nüneekeerü Jehová wayuu saʼakajee shiʼiruku wayuu süpüshuaʼa sainküinjee mmakat süpüla naʼwaajüin nia. «Na wayuu wattakana aalii», münüshii naya maaʼulu (Alat. Map. 7:9, 10). Eeshii naʼaka tooloyuu, jieyuu, tepichi, na naatakana oumain, eʼiruku otta anüiki. Mayaainjeʼe müin nakuwaʼipa, pawalaawajiraashii jee paaʼinwajiraashii naya suluʼu mmakat süpüshuaʼa (Sal. 133:1; Juan 10:16). Akaʼaya nayakana, yalayalasü naaʼin sünain aküjaa tü pütchi anasükat. Naküjain naʼatapajüin anainjatüin tü mmapaʼakat  namüin na aapajeenakana nanüiki (Mat. 28:19, 20; Alat. Map. 14:6, 7; 22:17, TNM). Naʼakale pia na wayuu wattakana aalii, watüjaa aaʼulu kojutuin pümüin tü kasa anasü paʼatapajakat nutuma Maleiwa.

3. ¿Kasa keeʼireeka naaʼin Satanás?

³ Keeʼireesü naaʼin Satanás nnojoluin waʼatapajüin tü kasa anasü eejeetkat mapeena. Keeʼireesü naaʼin wekiiruʼuinjatüin nnojoluin jülüjain waya naaʼin Jehová otta nnojoleerüin nikeraajüin nünüiki wamüin. Nuuntule naaʼinrüin tia Satanás, nnojoleerü yalayalain waaʼin otta eeshii süpüla wooʼulaain suulia aʼyatawaa nümüin Jehová. Nüchajaain sukuwaʼipa Satanás süpüla nnojoluin naʼatapajüin Job tü kasa anasü eejeetkat nutuma Maleiwa otta süpüla nuuʼulaain suulia aʼyatawaa nümüin.

4. ¿Kasa wekirajaainjatka anain sünain ekirajaayakat tüü? (Job 1:9-12).

⁴ Sünain ekirajaayakat tüü, wekirajaweerü anain tü naaʼinrakat Satanás süpüla nnojolin waneepiain Job nümaa Jehová nutuma (paashajeʼera Job 1:9-12). Wekirajaajeerü anain tü watüjakat sünainjee nukuwaʼipa Job otta jamüin wayaawatüinjatka saaʼu alin waya nüpüla Jehová jee nikeraajeerüin süpüshuaʼa nünüiki.

5, 6. ¿Kasa alataka nümüin Job soʼuleʼeya wanee kaʼi?

⁵ Anasü maʼin nukuwaʼipa Job. Aleewashi maʼin nia nümaa Jehová, wainma nüpüshi, paaʼinwajiraashii naya otta wainma nuwashirüin (Job 1:1-5). Shiasaʼa soʼuleʼeya wanee kaʼi, amülouisü süpüshuaʼa tia nuulia. Amülouisü palajana nuwashirüin (Job 1:13-17). Süchikijee, outushii napüshuaʼa na nüchonniikana. Aluʼuwatshi maka Job. Mojushaatasü naaʼin wanee wayuu nünaajaale wanee nüchon, shialeekajaʼa nukuwaʼipa Job sümaa nuʼwayuuse natüjaapa saaʼu outuin na polooshiikana nüchonnii. Nüchatajaain nüsheʼin Job shiyaawase mojuin naaʼin jee aʼwachiraashi nia mmoluu (Job 1:18-20).

⁶ Nüntirüin Satanás wanee ayuulii kashüülasü maʼin nünainmüin Job, eʼrüshi japülii sutuma tia (Job 2:6-8; 7:5). Süpülapünaa müin nukuwaʼipa, kojutupuʼushi maʼin nia sümüin wayuu, antapuʼushii naya nünainmüin süpüla nachuntuin kaalinwaa nümüin (Job 31:18). Naʼleejüin nia na nüpüshikana, na naʼaleewainyuukana otta na aʼyataakana nümüin (Job 19:13, 14, 16).

7. (1) ¿Kasa nunoujaka anain Job süchiki tü müliaa niʼrakat? (2) ¿Kasa nnojotka naaʼinrüin? (3) ¿Kasa eeka süpüla sülatüin nümüin wanee anoujashi maʼaka tü alatakat nümüin Job? (Piirakaa sümüin tü ayaakuaakat süpülajatka pütchikat 7).

⁷ Keeʼireesü naaʼin Satanás nunoujain Job niʼrüin müliaa sutuma jashichin Maleiwa nümüin. Jamüshijaʼa Satanás, nüjütüin wanee wawai sünainmüin tü piichi eejanale jutkatüin na nüchonniikana Job sünain ekawaa (Job 1:18, 19). Otta müsia, nujutuin wanee siki iipünaajee ajaʼttiraka nümüʼlüin namaʼaleʼeya na aaʼinmajakana shia (Job 1:16). Süka chejeejatüin tü sikikat iipünaajee sümaa tü wawaikat, jülüjasü naaʼin Job niain Jehová kajünalain shia nünainmüin. Jashichiyaashi Maleiwa nümüin naaʼinruʼu sutuma wanee kasa mojusü naaʼinraka. «Maʼaka naapüin Maleiwa kasa anasü tamüin, ¿nnojotsüche süpüla taapaain tü kasa mojusükaʼaya?», müshi nia. Nnojotpejeʼe mojuin nünüiki nümüin Maleiwa. Anuu sooʼomüin nünüiki: «Ayata kojutuin nünülia Jehová» (Job 1:20, 21; 2:10). Mayaainjeʼe amüloulin nuwashirüin, outuin nüchonnii jee ayuulin nia, ayatüshia nia waneepiain nümaa Maleiwa. Eepejeʼe sooʼomüin kasa ooʼulakünaka aka naaʼin Job nutuma Satanás.

8. Püküja wane kasa naaʼinraka Satanás süpüla nuuʼulaküin naaʼin Job.

⁸ Eesü wanee kasaʼaya naaʼinraka Satanás  süpüla nuuʼulaküin naaʼin Job. Nuluwataain apünüinshii naʼaleewainyaashii Job nünainmüin. ¿Kasa apüla? Süpüla nanoujirüin Job maalin nia apülawaa. Naashin naya wayuukana, alatüsü tia kasa mojusükat nümüin Job süka kaainjalain nia noʼuluʼu Maleiwa (Job 22:5-9). Nanoujireein Job nnojoluin kachipünaain naaʼin Maleiwa nukuwaʼipa, jaʼitasü naaʼinrüin kasa anasü noʼuluʼu (Job 4:18; 22:2, 3; 25:4). Nanoujireein Job maalin nia nüpüla Maleiwa, nnojoleechin naaʼinmajüin nia otta mojuteerüin nümüin tü niʼyataainkat. Sükajee tü namakat, eesüjaʼa jülüjale naaʼin Job mepin tü alatakat nümüin.

9. ¿Jamüsü yalayalaka naaʼin Job soʼunnaa tü müliaa niʼrakat?

⁹ Jülüjataa waaʼin nukuwaʼipa Job. Maa weʼrakai naaʼin joyotuin saʼaka paliʼi sümaa aishaatain nümüin nütapaʼa (Job 2:8). Akaʼaya na naʼaleewainyaashiikana, ayatüsia naküjain kojuyatua kaainjalain nia otta nnojoluin kasain saamüin tü naaʼinrakat. Watta maʼin saalii müliaa antaka nünainmüin Job otta mojushaatasü naaʼin nachiirua na nüchonnii outakana. Yüütüshi neʼe Job noulia na naʼaleewainyaashiikana (Job 2:13–3:1). «Alüʼütshi süpüla niyüülajüin Maleiwa, nnaasaʼa yüütüin neʼe nia», shiale nekiiruʼuin tia na naʼaleewainyaashiikana, nnojotsüjaʼamata nayaawatüin saaʼu tü nikiiruʼukat Job. Nialetka nikii Job sümaa niirakaain namüin sünain nümüin namüin: «¡Jaʼitaichi outuin taya, ayatajachia neʼe taya nümaa Jehová!» (Job 27:5). ¿Jamüsü yalayalaka naaʼin Job soʼunnaa tü müliaa niʼrakat? Shia süka jülüjain naaʼin tü kasa anasü naaʼinrajatkat Jehová mayaasüjeʼe mojushaatain naaʼin soʼu tia. Nütüjaa aaʼu nüsoʼireʼereerüin naaʼin Jehová outule nia (Job 14:13-15).

10. ¿Kasa watüjaka sünainjee tü alatakat nümüin Job?

¹⁰ Tü watüjakat sünainjee tü alatakat nümüin Job shia nütüjaain saaʼu Jehová süpüshuaʼa tü alatakat wamüin. Otta nnojoluin süpüla nuuʼuleʼerüin  waya Satanás suulia aʼyatawaa nümüin Jehová, jaʼitasü nüpüleeruaain waaʼin. Eesü sooʼomüin kasa watüjaka sünainjee nukuwaʼipa Job, wekirajaa soʼutku.

11. ¿Kasa waaʼinreetka ayatüle weʼitaain waaʼin nünain Jehová? (Santiago 4:7).

¹¹ Sutuma tü naaʼinrakat Job, watüjaa aaʼu eein süpüla wachecherüin waaʼin soʼunnaa müliaa ayatüle weʼitaain waaʼin nünain Jehová otta müsia eein süpüla waʼleejüin Satanás. ¿Kasa anasü weʼreetka suluʼujee tia? Shia wattaluʼujeechin woulia chi Yolujaakai saashin tü Bibliakat (paashajeʼera Santiago 4:7).

12. ¿Jamüsü sükatchinraka naaʼin Job sutuma nüsoʼireʼereerüin naaʼin Maleiwa?

¹² Waʼatapajüin maʼin tü kaʼi süsoʼiraainjatkalü oʼu wayuu süchikijee outaa. Wekirajaaitpa anain suluʼu ekirajaaya 26 niimolojuin waya Satanás seema outaa shiiʼiree nnojoluin waneepiain waya nümaa Maleiwa. Nüküjain Satanás naaʼinreerüin kasa eekai eein Job shiiʼiree katüin noʼu, jaʼitashi niyüülajüle Maleiwa. Eʼrüikaiche wayumüin Satanás makaʼa nünüiki nüchiki Job. Ayatüshia waneepiain Job nümaa Maleiwa mayaainjeʼe niʼrüin outaa nooʼomüin. Nüchecherüin naaʼin Job süka niʼitaain naaʼin sünain nümüliajeechin nia Jehová otta süka naʼatapajüin maʼin naaʼinreerüin kasa anasü. Mayaainjeʼe nnojoluin niʼrüin Job nükaalinjain nia Jehová kataiwaʼaya noʼu, niʼitaain naaʼin sünain nüsoʼireʼennüinjachin aaʼin mapeena. Naʼatapajashaatain tia Job. Shiimainre wamüin süsoʼiraainjatüin saaʼin wayuu süchikijee outaa otta waʼatapajüle naaʼinrüinjatüin tia Maleiwa, ayateena waya waneepiain nümaa jaʼitashii weimmolojunüin süka outaa.

13. ¿Jamüsü wekirajaainjatka sünain tü naaʼinrakat Satanás süpüla nuuʼulaküin naaʼin Job?

¹³ Tü ooʼulakünakalü aka naaʼin Job nutuma Satanás meematsü aka saaʼin tü ooʼulakünakalü aka waaʼin maaʼulu. Müsüjeseʼe anain maʼin wekirajaale suluʼujee tü Bibliakat süchiki tü naaʼinrakat Satanás nüka Job. Anuu tü alawaa nüküjakat Satanás nüchiki Job otta süchiki wayuu süpüshuaʼa: «Naapeerü chi wayuukai süpüshuaʼa tü kasa nümaʼanakat süpüla katüin noʼu» (Job 2:4, 5). Tü nüküjeekalü achiki Satanás shia nnojoluin shiimain alin wapüla Jehová otta eein süpüla wooʼulaain suulia aʼyatawaa nümüin shiiʼiree katüin woʼu. Nüküjain Satanás maalin waya nüpüla Jehová otta nnojoluin kasajatüin nümüin tü waaʼinrakat nüpüleerua. Süka watüjaain saaʼu tü keeʼireekat naaʼin Satanás, nnojoishii waya oonooin sümaa tü alawaa nüküjakat.

14. ¿Kasa eeka süpüla wayaawatüin saaʼu sünain wakuwaʼipa weʼrüle müliaa? Püküja tia sükajee wanee sukuwaʼipa.

¹⁴ Eesü kasa anasü watüjaka sünainjee tü müliaa weʼrakat. Sünainjee tü müliaa niʼrakat Job, niyaawata aaʼu eein waneirua kasa nunouteʼerüinjatka sünain nukuwaʼipa. Jamüshijaʼa nia, niyaawata aaʼu nnojoluinjatüin yaletüin naaʼin (Job 42:3). Müshiʼiya wayakana, eesü tü kasa anasü watüjakat sünainjee tü müliaa weʼrakat. Anuu nünüiki wanee wawala kanüliashi Nikolá, * apüreesajinnüshi nia mayaainjeʼe ayuulin maʼin nia: «Soʼunnaa püreesain taya, tayaawata aaʼu tü tanouteʼerüinjatkat sünain takuwaʼipa. Müsü aka saaʼin wanee maakina anakaka taya taleʼeruʼupünaa». Wayaawatapa saaʼu tü wanouteʼerüinjatkat sünain wakuwaʼipa, waaʼinramaata shia.

15. (1) ¿Jarai woonooinjachikai amaa anüiki? (2) ¿Jamüsü waaʼinrajatka tia?

¹⁵ Anashii woonoole sümaa nünüiki Jehová suulia woonooin sümaa nanüiki na waʼünüükana. Jülüjasü maʼin naaʼin Job nünüiki Jehová soʼunnaa naashajaain nümaa. Müshi nümakai aaʼin Jehová nümüin Job mayaa: «¿Nnojotsüjasaʼa piyaawatüin aaʼu pülain taya  saaʼujee tü kasa takumalakat? Tatüjaa aaʼu süpüshuaʼa tü müliaa piʼrakat. ¿Iseeiche tachiki taaʼinmajüin pia paaʼinruʼu?». Kojutusü maʼin nümüin Job nümüliajüin nia Jehová. Anuujeseʼe nünüiki: «Taapapuʼu achikichi pia, aluʼujasaʼa jooluʼu teʼrüichipa pia» (Job 42:5). ¿Jalajachi Job soʼunnaa nüküjain tia pütchikat? Eeshiʼija süpüla yalajachin joyotuin nia saʼaka paliʼi, yooisü nüta otta kaamakashi nia. Soʼunnaa tia, nüküjain Jehová nümüin alin nia nüpüla otta anain nukuwaʼipa noʼuluʼu (Job 42:7, 8).

16. Saashin Isaías 49:15, 16, ¿kasa jülüjainjatka waaʼin soʼunnaa weʼrüin müliaa?

¹⁶ Akaʼaya maaʼulu, eesü süpüla airuʼuluin sünüiki jee mojutuin waya sümüin wayuu. Eesü süpüla süküjünüin watta saalii perulaa wachiki shiiʼiree mojutuin waya otta mojutuin na aküjaliikana pütchi nüchiki Jehová (Mat. 5:11). Sünainjee tü alatakat nümüin Job, watüjaa aaʼu niʼitaain naaʼin Jehová sünain waneepieenain waya nümaa soʼunnaa weʼrüin müliaa. Aishii waya nüpüla Jehová otta nnojoleena nüpütüin namüiwaʼa na aʼatapajakana tü kasa eejeetkat nutuma (paashajeʼera Isaías 49:15, 16). Jalia woonoʼojayaai sümaa tü alawaa naküjakat wachiki na nüʼünüükana Maleiwa. Jülüjataa waaʼin tü naaʼinrakat wanee wawala kanüliashi James, kepiashi nia Turquía, wainma müliaa niʼraka sümaa nüpüshi. Anuu nünüiki: «Wayaawata aaʼu sümalajaweerüin wanoula waapajüle otta jülüjale waaʼin tü perulaa aküjünakat süchiki nupueulose Maleiwa. Shia waaʼinmaaka maʼin tü waʼyataainkat nümüin Jehová sümaa jülüjain waaʼin tü kasa anasü waʼatapajakat eejeetka nutuma Maleiwa nuluwataapeena saaʼu tü mmakat. Sutuma waaʼinrüin tia, ayatüsia talatüin waaʼin sünain aʼyatawaa nümüin». Woonoo sümaa nünüiki  Jehová maʼaka naaʼinrüin shia Job. Ayataʼaya waʼatapajüin tü kasa anasü eejeetkat nutuma Maleiwa, jaʼitasü naküjain alawaa wachiki na waʼünüükana.

17. ¿Kasa pütüjaka süchiki nakuwaʼipa na wayuu wattakana aalii aküjünakana achiki suluʼu Hebreokana kapiitulo 11?

¹⁷ Job nia wanee noʼutku na aʼyataapuʼukana nümüin Jehová yalayatkai aaʼin otta achechetkai naaʼin soʼunnaa müliaa. «Na wayuu wattakana aalii», müshi Pablo namüin na hebreokana nachiki na wayuu achechetkana naaʼin soʼunnaa müliaa (Heb. 12:1, TNM). Mayaainjeʼe wainmain tü müliaa neʼrakat, ayatüshiʼiya waneepiain naya nümaa Jehová (Heb. 11:36-40). ¿Amülasüche naʼyataain jee nachecherüin naaʼin soʼunnaa müliaa? Nnojottaa. Mayaainjeʼe nnojoluin neʼrüin kataiwaʼaya noʼu süpüshuaʼa tü nikeraajüinjatkat Maleiwa, ayatüsia naʼatapajüin tia. Süka natüjaain saaʼu anain nakuwaʼipa noʼuluʼu Jehová, neʼitaain naaʼin sünain neʼreerüin shikeraajüin süpüshuaʼa tü nümakat (Heb. 11:4, 5). Maʼaka naaʼin nayakana, anasü waʼatapajashaatale nikeraajüin Maleiwa süpüshuaʼa tü nümakat.

18. ¿Kasa keeʼireeka maʼin paaʼin paaʼinrüin? (Hebreokana 11:6).

¹⁸ Oʼunusü suluʼu mojuin maʼin sukuwaʼipa wayuu maaʼulu (2 Tim. 3:13). Ayatüsia nüchajaain Satanás nuuʼulaküin saaʼin nupueulose Maleiwa. Jaʼitairü kasain alatüin wamüin mapeena, ayataʼaya waaʼinmaain waʼyataain nümüin Jehová sümaa weʼitaain waaʼin nünain «chi Maleiwa katakai atüma soʼu wayuu sünain nuuntüin nuʼtteʼerüin wayuu süpüshua» (1 Tim. 4:10). Süka anakuwaʼipalin Job nutuma Jehová, watüjaa aaʼu nümüliajüin wayuu eekai süchecherüin saaʼin soʼunnaa müliaa sümaa naaʼinrüin wainma kasa anasü napüleerua (Sant. 5:11). Ayataʼaya waneepiain waya nümaa Jehová maʼaka naaʼinrüin shia Job. Shiimain «naapeerüin kasa anasü namüin na achajaakana maʼin nüchiki» (paashajeʼera Hebreokana 11:6, TNM).