1. a) Bulangalire buhe Yehova arhuhere? b) “Okulangalira Yehova k’okuderha gurhe”? (Olole “Amafasiriyo m’Ebinwa.”)

 YEHOVA ahere balala boshi bamuzigire obulangalire busimisize. Hanola hofi-hofi amala amalwala, omugayo, n’olufu. (Ufu. 21:3, 4) Nj’arhabala “aberhohye” bamulangalire bahindamule egulu libe paradizo. (Zb. 37:9-11) Kandi nj’arhabala buli muguma mu rhwabo agwarhe obwira bukomere haguma naye, obu nji bwaba bukwirire bwenene kulusha obu rhugwerhe zene. Obola buli bulangalire bukwirire bwenene orhakalola! Aliko si, bichi birhumire rhwayemera oku kweri ebilagane bya Mungu nji byayenera? Yehova arhabula kuyeneza echilagane chage. Che chirhumire rhugwerhe empanvu nyinja “y’okulangalira Yehova.” * (Zb. 27:14) Rhunajira ntyo amango rhuli rhwalindira omu kulembera eyi rhunagwerhe omwishingo oku Mungu werhu ayeneza emihigo yage.​—Isa. 55:10, 11.

2. Bichi Yehova arhangire kujira?

² Mira Yehova ayerekenaga oku anayeneza ebilagane byage. Kugerera echitabu cha Ufunuo, Yehova alirhulaganyize oku, omu siku zerhu, akahebere haguma abantu kurhenga mu buli shanja, buli buko, na buli lulimi n’akabahebere haguma omu mparamyo echere. Zene, echola chigusho ch’abantu chisomeze chimenyikene nka “chigusho chinene.” (Ufu. 7:9, 10) Chiro akaba oku mw’echola chigusho muli abalume, abakazi n’abana boshi ba buli lubero, barhengere n’omu gulu lyoshi, bali mulala muguma. (Zb. 133:1; Yoh. 10:16) Abola bantu b’echigusho chinene bali bahubiri bagwerhe obushiru. Buli mango babatayari  kuganira na buli yeshi oli tayari kubayunviriza k’obola bulangalire bw’egulu linja. (Mt. 28:19, 20; Ufu. 14:6, 7; 22:17) Akaba oli w’omu chigusho chinene, nta ngangane, obulangalire bw’ebintu binja ogwerhe buli bw’akamaro emwawe.

3. Muhigo guhe Shetani agwerhe?

³ Shetani alonzeze kukunyega obulangalire bwawe. Omuhigo gwage, kuli kukushunika oyemere oku Yehova arhakulagireko n’oku arhakayeneza ebilagane byage. Nka Shetani amagala kurhuyiba obulangalire bwerhu, rhwaheza obushirhu bwerhu, chiro rhwakanaleka kukolera Yehova. Nk’oku rhwabibona, Shetani alichihanganire mpu y’ayiba obulangalire bwa Yubu anamubuze arhagendereraga kukolera Yehova.

4. Bichi rhwaganirako mu gunola mwazi? (Yobu 1:9-12)

⁴ Mu gunola mwazi, rhwaganira oku njira Shetani akolesaga omu kuchihangana akule Yubu oku bushwekerezi bwage emwa Yehova. (Osome Yobu 1:9-12.) Kandi rhwashuba kuganira oku birhwakayiga kugerera omufano gwa Yubu na bulagurhe rhukwanene kuyibuka oku Mungu arhuzigire n’oku ayeneza ebilagane byage.

5-6. Bichi byahikiraga Yubu omu kasanzi kageke?

⁵ Yubu aliri alama akalamo kenja. Aliri asiimira obwira bukomere haguma na Yehova. Aligwerhe mulala gunene guli m’obuguma, analiri muchire bwenene. (Yob. 1:1-5) Aliko mu lusiku luguma aheza hofi ebintu byage byoshi. Alirhangire heza obuchire bwage. (Yob. 1:13-17) Enyuma w’ahola, abana bage bazigirwa boshi bafa. Rhang’owaze k’obola buhanya boshi. Binachubuka bwenene abazere amango mwana wabo muguma amafa. Waza oku mugayo n’okurhogoka Yubu na mukage baligwerhe amango bamenya oku abana babo boshi nk’oku bali 10 bafire. Che charhumaga Yubu abera emyambaro yage n’okuchigalagula ahashi ey’anali alaka!​—Yob. 1:18-20.

⁶ Enyuma w’ahola, Shetani alerhera Yubu obulwala bubi bwenene bunakozeze eshonyi. (Yob. 2:6-8; 7:5) Mango maguma Yubu aliri muntu okengerwe bwenene ahantu alilamire. Abantu baliri bayinja kumuhema empanulo. (Yob. 31:18) Aliko ago mango, balikala bali bamuyaka. Alijahikirwe na bene-babo, bera bage b’oku murhima, na chiro abakozi b’ahamwage, nabo balimujahikire!​—Yob. 19:13, 14, 16.

7. a) Bichi Yubu aliri awaza oku bilolere empanvu y’amalibuko mage, aliko bichi alilahire kujira? b) Nka gurhe Omukristu akahurana ebigeregezo bili nk’ebiyerekenwe oku foto eli ahala?

⁷ Shetani alilonzeze Yubu ayemere oku ali alibuka bulala Yehova arhachimuyemerere. Omufano, Shetani akolesa echihusi chikalihire chakumbagaza enju bana 10 ba Yubu baliri mo, eyibalibasangira akalyo haguma. (Yob. 1:18, 19) Anashuba yandagaza omuliro kurhenga embingu, gurhayirhaga ebirhungano bya Yubu byonyine si n’abakozi baliri babishishikala. (Yob. 1:16) Bulala echola chihusi n’ogola muliro byalirhengerere embingu, Yubu awaza oku byarhengerere emwa Yehova. N’echola charhuma Yubu awaza oku hali okuntu akaba ey’agayisize Yehova. Na chiro akaba ntyo, Yubu alahira kuvuma Eshe w’embingu. Yubu alimenyere oku Yehova abaga amuhere bintu binene binja omu myaka yagerere. Bobola, Yubu awaza oku obola aliyemerere ebyola bintu n’obusime, analikwanene ayemere n’eby’ola bibi byamuhikiire. Naho, aderha ntya: “Leka ezino lya Yehova ligenderere kukuuzwa.” (Yob. 1:20, 21; 2:10) Chiro akaba oku Yubu abaga ahezeze obuchire, abana,  amagala mage, aligenderere kubera mwimana emwa Yehova. Aliko Shetani arhalizimala kumugeregeza.

8. Mandi mayeri machi Shetani akolesaga omu kugeregeza Yubu?

⁸ Shetani alikoleseze amandi mayeri omu kugeregeza Yubu; ashunika bera basharhu b’obubeshi ba Yubu, barhume achiyunva oku nta kamaro agwerhe. Abola balume bashobeka Yubu oku ajirire bintu binene bibi che chirhumire ali alibuka. (Yob. 22:5-9) Kandi bachihangana yibamuyemeza oku chiro akaba oku arhaliri nyakola-maligo, byoshi-byoshi aliri ajira mpu y’asimisa Mungu, ntacho byalimalire haba n’akatyu. (Yob. 4:18; 22:2, 3; 25:4) Kweri, baliri bachihangana kujira oku Yubu awaze oku Mungu arhamuzigiire, oku arhali amushishikala, oku n’okumukolera nta kamaro bigwerhe. Ebinwa byabo byakarhumire Yubu awaza oku ntaye wakamukula omu bigeregezo alimo.

9. Bichi byarhabalaga Yubu agwarhe obushiru n’emisi?

⁹ Waza kw’eyi sene. Yubu ayikere omu luvu n’amalumwa mage magenderere. (Yob. 2:8) Bera bage bali bagenderera kumubwira oku arhali muntu mwinja, n’oku arhanasaga kujira chintu chiguma ch’akamaro. Ebigeregezo byage byaliri nka musozi gunene ahekere oku rhwe, n’omugayo g’okuheza abana bage gwaliri nka migera oku murhima gwage. Burhanzi, Yubu aliyorhere asirire. (Yob. 2:13–3:1) Akaba abola bera ba Yubu b’obubeshi baliri bawaza ok’okubona Yubu asirire, k’okuderha oku akolajahika Yehova, baliri bachirhebeka. Halihikire amango Yubu azamula erhwe alola kw’abola bera bage b’obubeshi aderha: “Kuhika ahanafira, ntaleka obushwekerezi bwani!” (Yob. 27:5) Bichi byalirhabere Yubu agwarhe obola bushiru anakomere chiro akaba aliri alibuzwa? Chiro akaba oku amalumwa mage malikalihire bwenene, arhahezaga obulangalire bwage ku Mungu wage w’obuzigire oku nji hagera  amango amufumya na buzinda akamalire ebyola bigeregezo byage. Alimenyere oku chiro afa, Yehova nj’amufula.​—Yob. 14:13-15.

10. Bichi engani ya Yubu erhuyigirize?

¹⁰ Engani ya Yubu erhuyigirize oku Shetani arhakarhuseza rhujahike Yehova, n’oku Yehova naye ayinji byoshi rhuli rhwageramo. Ebi Yubu agereremo, byakarhurhabala kandi rhuyunve bwinja ebibazo birhulolere. Rhushambale ku bintu biguma rhwakayiga kugerera omufano gwa Yubu.

11. Bichi rhwakachizera nka rhwamagenderera kulangalira Yehova? (Yakobo 4:7)

¹¹ Yubu aliyerekene oku, amango rhwamagenderera kulangalira Yehova, rhwakalembera buli chibazo choshi-choshi n’okuhima amashumi ma Shetani. Byanaja byaba gurhe? Amandiko marhubwirire oku Shetani arhulibirha.​—Osome Yakobo 4:7.

12. Nka gurhe obulangalire b’obufuke bwalihebere Yubu emisi?

¹² Birhuhemere rhugwarhe obwemere bukomere omu bufuke. Nk’oku rhwabonaga omu mwazi gugerere, Shetani anazigana kukolesa obuba rhugwerhe oku lufu, mpu yirhuheza obushwekerezi bwerhu emwa Yehova. Amango aliri ageregeza Yubu, Shetani aderha oku Yubu akahanire echintu choshi-choshi chiro n’obushwekerezi bwage emwa Mungu mpu y’ayokola akalamo kage. Shetani alichirhebekere. Chiro n’amango Yubu aliri awaza oku ali hofi kufa, aligenderere kubera mwimana emwa Yehova. Obwizere bwage omu bwinja bwa Yehova n’obulangalire bukomere b’oku Yehova nj’ashuba kukwiza ebintu, byalimurhabere agenderere kulembera. Yubu aligwerhe obwemere b’oku, akaba Yehova arhamurhabere anachili muguma-guma, akamufulire omu mango mayinjire. Yubu aliyemerere ok’obulangalire b’obufuke buli b’okuli. Akaba rhubwene ok’obulangalire b’obufuke buli b’okuli, chiro n’amango abantu bamarhuyubahisa oku barhuyirha, rhurhakaleka obushwekerezi bwerhu emwa Yehova.

13. Bichi rhwayigire oku bilolere okuntu Shetani ageregezaga Yubu?

¹³ Rhukwanene kumenya bwinja amayeri Shetani akolesaga omu kugeregeza Yubu, bulala achili akolesa ezola njira zene omu kurhugeregeza. Hala echi Shetani arhushobekaga: “Omuntu [s’arhali Yubu yenyine] ahaana buli chintu choshi agwerhe y’ayokola akalamo kage.” (Yob. 2:4, 5) Omu kuderha ntyo, kweri Shetani aliri arhushobeka oku rhurhazigira Yehova loshi. Kandi Shetani ayerekana oku Mungu arharhuzigira n’oku ebi rhunajira byoshi mpu yirhumusimisa, arhabilagako. Bulala rhumenyere ebi Shetani ali alonza, rhurhayemera obola bubeshi bwage.

14. Bichi rhwakamenya oku birhulolere kugerera ebigeregezo? Lerha omufano.

¹⁴ Rhukwanene kubona oku ebigeregezo kali kasanzi k’okurhurhabala rhuchimenye rhwenyine. Ebigeregezo Yubu alihurene byalimurhabere arhegere obuzamba aliherhe anabuhindamule. Omufano, aliyigire oku bimuhemere akuze bwenene engeso y’okuchirhohya. (Yob. 42:3) Nerhu rhwakamenya obuzamba bwerhu amango rhuli omu bigeregezo. Mwene-werhu oyirikirwe Nikolay, * walishwekerwe omu pirizo chiro akaba oku aligwerhe ebibazo bikomere by’amagala, aderha ntya: “Esiku naligezeze omu pirizo zalintabere menye obuzamba bwani, ntegere n’engeso zinja nkwanene nkuze omu kalamo kani.” Amango rhwamamenya obuzamba rhugwerhe, rhwanajira okwerhu koshi yirhuhindamuka.

15. Inde rhukwanene kuyunviriza na bulagurhe?

 ¹⁵ Rhukwanene kuyunviriza Yehova s’arhali abashombanyi berhu. Yubu aliri ayunviriza bwinja-bwinja amango Yehova aliri aganira naye. Mungu abaza Yubu ebibazo, kweri aliri nk’oli waderha ntya: ‘Ka wabwene emisi yani y’okulema? Menyere byoshi byakuhikiire. K’owazize oku nta kulagireko?’ Yubu ashubiza oku bwirhohye ey’anagwerhe eshukurani nene oku bwinja bwa Yehova. Aderha: “Amarhwiri mani mayunvirhe oku bikulolere, aliko lero, namaja nakubona n’amasu mani.” (Yob. 42:5) Bishobokene oku amango aderhaga ebyola binwa, Yubu aliyikere omu luvu, ey’omubiri gwage guyunjwire mahurhe, ey’anachili alakira abana bage bafire. Chiro akaba ntyo, Yehova amuyereka oku amuzigire kweri, anamuyemerere.​—Yob. 42:7, 8.

16. Nk’oku olwandiko lwa Isaya 49:15, 16 luderhere, bichi rhukwanene kuyibuka amango rhuli rhwahurana ebigeregezo?

¹⁶ Zene nerhu, abantu bakarhudukanga n’okurhubona nka rhuli bantu ba busha. Bakalonza kuharabisiza buli muguma werhu erenge changwa “bakashobeka [olubaga lwerhu] buli chintu chibi.” (Mt. 5:11) Engani ya Yubu erhuyerekere oku Yehova achizerere oku rhwagenderera kubera bimana amango rhwamahurana ebigeregezo. Yehova arhuzigire arhakanajahika haba n’akatyu balala bamulangalire. (Osome Isaya 49:15, 16.) Omenye wayunviriza ebinwa by’obubeshi abashombanyi ba Mungu bali barhuderhako! Mwene-werhu James, olamire omu Turquie ey’omulala gwage guli gwahurana ebigeregezo, aderhere ntya: “Rhwarhegera ok’okuyunviriza  obubeshi buli bwaderhwa oku lubaga lwa Mungu, kwakarhuvunire omurhima. Bobola rhwaseza obwenge bwerhu oku bulangalire b’Obwami n’okugenderera kukola akasi ka Yehova. Echola charhurhabala rhurhahezaga omwishingo gwerhu.” Kuguma na Yubu, rhunayunviriza Yehova! Obubeshi bw’abashombanyi berhu burhakamala obulangalire bwerhu.

17. Bichi omufano gw’abalume n’abakazi bashamberwe omu Waebrania sura 11 gukuyigirize?

¹⁷ Yubu ali muguma omu bakozi ba Yehova baligenderere kugwarha obushiru n’emisi amango baliri bahurana n’ebigeregezo bikomere. Omu maruba Paulo ayandikiraga Abaebrania, alishambere ku bandi banene anabahamagala “chichu chinene ch’abahamirizi.” (Ebr. 12:1) Boshi balihurene ebigeregezo bikomere; aliko babera bemana emwa Yehova omu kalamo kabo koshi. (Ebr. 11:36-40) K’okulembera kwabo n’akasi kabo kakomere byaliri bya busha? Nanga chiro haba n’akatyu! Nkabaga omu kalamo kabo koshi barhabonaga ebilagane bya Mungu byayenera, aliko baligenderere kumulangalira. Na bulala balichizerere oku Yehova abayemerere, balimenyere kweri oku nji byayenera. (Ebr. 11:4, 5) Omufano gwabo gwakarhuheba emisi rhuhigirire kugenderera kulangalira Yehova.

18. Bichi ohigirire kujira? (Waebrania 11:6)

¹⁸ Rhulamire omu gulu lili lyagenderera kubiha kulusha. (2 Ti. 3:13) Shetani agenderere kugeregeza abantu ba Mungu. Chiro rhwahurana ebigeregezo bili gurhe, rhwakahigirira kukolera Yehova n’obushiru eyi rhunachizerere oku “rhuhebere obulangalire bwerhu mu Mungu werhu olamire.” (1 Ti. 4:10) Oyibuke, ebi Mungu ajiriraga Yubu biyerekene “oku Yehova agwerhe obuzigire bukomberere anali wa lukogo.” (Yak. 5:11) Rhugendererage nerhu kubera bemana emwa Yehova, eyi rhunachizerere oku agisha “balala banamulonza n’omurhima goshi.”​—Osome Waebrania 11:6.