TULUN-AN NGA ARTIKULO 27
‘Maglaum kay Jehova’
“Nagalaum ako kay Jehova, ang akon bug-os nga pagkatawo nagalaum sa iya; nagahulat ako sa iya pulong.”—SAL. 130:5.
AMBAHANON 128 Magbatas Tubtob sa Katapusan
ANG BINAGBINAGON SA SINI NGA ARTIKULO *
1. (a) Ano nga paglaum ang ginhatag ni Jehova sa aton? (b) Ano ang buot silingon sang ‘maglaum kay Jehova’? (Tan-awa ang “Dugang nga Paathag.”)
GINHATAGAN ni Jehova sang dalayawon nga paglaum ang tanan nga nagapalangga sa iya. Sa indi madugay, dulaon niya ang balatian, kasubo, kag kamatayon. (Bug. 21:3, 4) Buligan niya “ang mga mahagop” nga nagalaum sa iya para mahimo nila nga paraiso ang duta. (Sal. 37:9-11) Nalipay gid kita nga suod kita sa iya subong. Pero sa palaabuton, buligan niya kita nga mangin mas suod pa gid sa iya. Dalayawon gid ini nga paglaum. Pero ngaa makasalig kita nga matuman gid ang mga promisa sang Dios? Pirme gid ginatuman ni Jehova ang iya mga promisa. Gani may rason gid kita nga ‘maglaum kay Jehova.’ * (Sal. 130:5) Mapakita naton nga nagalaum kita sa aton Dios kon mapinasensiahon kita kag malipayon nga nagahulat sa tion nga tumanon na niya ang iya mga promisa.—Isa. 55:10, 11.
2. Ano ang napamatud-an na ni Jehova?
2 Napamatud-an na ni Jehova nga ginatuman gid niya ang iya mga promisa. Binagbinaga ang isa ka dalayawon nga halimbawa. Sa libro sang Bugna, nagpromisa si Jehova nga sa aton tion subong, tipunon niya ang mga tawo halin sa tanan nga pungsod, tribo, kag lenguahe para mag-alagad sa iya sing nahiusa. Subong, kilala ining pinasahi nga grupo sang mga tawo bilang “daku nga kadam-an.” (Bug. 7:9, 10) Bisan pa lainlain ang rasa, lenguahe, kag ginhalinan sini nga mga lalaki, babayi, kag kabataan sa bilog nga kalibutan, nahiusa sila bilang isa ka pamilya kag may paghidait sila. (Sal. 133:1; Juan 10:16) Mapisan man nga nagabantala ining daku nga kadam-an. Pirme sila handa nga isugid sa gusto mamati ang parte sa ila ginalauman nga mas maayo nga kalibutan. (Mat. 28:19, 20; Bug. 14:6, 7; 22:17) Kon isa ikaw sa daku nga kadam-an, sigurado nga ginapabaloran mo gid ang ginalauman mo nga maayo nga palaabuton.
3. Ano ang gusto himuon ni Satanas?
3 Gusto sang Yawa nga madulaan ka sang paglaum. Gusto niya nga magpati ka nga wala nagaulikid si Jehova sa imo kag wala Niya ginatuman ang iya mga promisa. Kon magmadinalag-on si Satanas kag madulaan kita sang paglaum, madula man ang aton kaisog kag posible pa gani nga mag-untat kita sa pag-alagad kay Jehova. Halimbawa, gintinguhaan sang Yawa nga madulaan sang paglaum si Job kag mag-untat sa pag-alagad kay Jehova.
4. Ano ang binagbinagon naton sa sini nga artikulo? (Job 1:9-12)
4 Sa sini nga artikulo, binagbinagon naton kon ano ang ginhimo ni Satanas para mangin indi matutom si Job kay Jehova. (Basaha ang Job 1:9-12.) Binagbinagon man naton kon ano ang matun-an naton sa halimbawa ni Job kag kon ngaa dapat naton dumdumon nga palangga kita sang Dios kag tumanon gid Niya ang Iya mga promisa.
GINTINGUHAAN NI SATANAS NGA MADULAAN SANG PAGLAUM SI JOB
5-6. Ano ang natabo kay Job sa malip-ot lang nga tion?
5 Maayo gid ang kabuhi ni Job. Suod sia kay Jehova. Malipayon ang iya daku nga pamilya, kag manggaranon gid sia. (Job 1:1-5) Pero sa isa lang ka adlaw, halos nadula kay Job ini tanan. Una, nadula ang iya manggad. (Job 1:13-17) Dayon, napatay ang tanan niya nga pinalangga nga kabataan. Hunahunaa kon daw ano ini kasakit kay Job. Nagalalain gid ang mga ginikanan kon mapatay ang isa nila ka bata. Gani imadyina ang nabatyagan ni Job kag sang iya asawa sang nabalitaan nila nga napatay ang napulo nila ka kabataan. Daw indi sila makapati, daw indi nila ini mabaton, kag grabe ang ila kasubo. Bangod sini, gingisi ni Job ang iya bayo sa kalisod kag naghapa sia sa duta.—Job 1:18-20.
6 Dayon, ginhatagan ni Satanas si Job sang balatian nga grabe kasakit kag makahuluya. (Job 2:6-8; 7:5) Sang una, ginarespeto gid si Job sang mga tawo. Nagapangayo sila anay sa iya sang laygay. (Job 31:18) Subong, ginalikawan na nila sia. Ginsikway sia sang iya mga utod, suod nga mga kaupdanan, kag bisan sang iya mga suluguon.—Job 19:13, 14, 16.
Madamo nga kauturan subong ang nakaeksperiensia man sang mga pagtilaw nga pareho sang naagyan ni Job (Tan-awa ang parapo 7) *
7. (a) Ano ang ginpatihan ni Job nga rason kon ngaa nagaantos sia, pero ano ang wala niya ginhimo? (b) Ano nga pagtilaw ang posible nga maeksperiensiahan sang isa ka Cristiano nga pareho sang makita sa piktyur?
7 Gusto ni Satanas nga magpati si Job nga nagaantos sia kay akig sa iya si Jehova. Halimbawa, gingamit ni Satanas ang mamadlos nga hangin para marumpag ang balay nga ginatipunan sang napulo ka kabataan ni Job sang nagakinaon sila. (Job 1:18, 19) Naggamit man sia sang kalayo halin sa langit nga nagsunog sa mga kasapatan ni Job kag sa mga alagad nga nagabantay sa sini. (Job 1:16) Bangod naghalin sa langit ang hangin kag ang kalayo, abi ni Job naghalin ini kay Jehova nga Dios. Gani nagpati si Job nga basi napaakig niya si Jehova. Pero wala ginpakamalaut ni Job ang iya Amay sa langit. Nagsiling si Job nga madamo sia sing maayo nga nabaton halin kay Jehova sa malawig nga panahon. Gani nahunahuna niya nga kon ginbaton niya ang maayo, dapat handa man sia magbaton sang malain. Gani nagsiling sia: “Padayon nga dayawon ang ngalan ni Jehova.” (Job 1:20, 21; 2:10) Bisan pa nadula ni Job ang iya manggad, napatay ang iya kabataan, kag nagbalatian sia, nangin matutom sia gihapon kay Jehova. Pero may ginhimo pa gid sa iya si Satanas.
8. Ano ang masunod nga ginhimo ni Satanas kay Job?
8 Masunod nga gingamit ni Satanas ang tatlo ka tawo nga mga abyan kuno ni Job para magbatyag si Job nga wala sia sing pulos. Nagsiling sila nga nagaantos si Job bangod madamo sia sing ginhimo nga malain. (Job 22:5-9) Gusto man nila nga magpati sia nga bisan pa madamo sia sing ginhimo nga maayo, wala ini ginapabaloran sang Dios. (Job 4:18; 22:2, 3; 25:4) Ginapapati nila si Job nga indi sia palangga sang Dios, indi Niya sia pag-atipanon, kag wala sing pulos ang pag-alagad sa Iya. Bangod sang ila mga ginsiling, posible nga nabatyagan ni Job nga daw wala na sia sing paglaum.
9. Ano ang nakabulig kay Job nga mangin maisog kag mabakod?
9 Imadyina ini nga eksena. Nagalumpiga si Job sa mga abo, kag kasakit sang iya ginabatyag. (Job 2:8) Sulitsulit nga ginasiling sang mga kaupod niya nga indi sia maayo nga tawo kag wala sing pulos ang tanan niya nga nahimo. Grabe kabug-at sang ginaantos niya nga mga pagtilaw kag sang ginabatyag niya nga kasubo sang mapatay ang iya kabataan. Sang primero, nagahipos lang si Job. (Job 2:13–3:1) Kon ginapensar sang mga kaupod ni Job nga nagahipos sia kay talikdan na niya si Jehova, nagsala gid sila. Posible nga nagtungkaaw sia kag gintulok niya sing diretso ang iya mga kaupdanan sang nagsiling sia: “Tubtob mapatay ako, indi ko pag-isikway ang akon integridad!” (Job 27:5) Ano ang nakabulig kay Job nga mangin maisog kag mabakod wala sapayan sang tanan niya nga ginaantos? Bisan sa tion nga nagaluya gid ang iya buot, wala gid madula ang iya paglaum nga buligan sia sang iya mahigugmaon nga Dios. Kabalo sia nga bisan pa mapatay sia, banhawon sia ni Jehova.—Job 14:13-15.
PAANO NATON MAILOG SI JOB?
10. Ano ang ginatudlo sa aton sang kasaysayan ni Job?
10 Ginatudlo sa aton sang kasaysayan ni Job nga indi kita mapilit ni Satanas nga talikdan si Jehova, kag nabal-an ni Jehova ang tanan nga nagakatabo sa aton. May matun-an pa gid kita sa mga inagyan ni Job. Binagbinaga ang espesipiko nga mga leksion nga matun-an naton kay Job.
11. Kon padayon kita nga magsalig kay Jehova, ano ang sigurado nga matabo? (Santiago 4:7)
11 Napamatud-an ni Job nga kon padayon kita nga magsalig kay Jehova, mabatas naton ang bisan ano nga pagtilaw kag mapamatukan gid naton si Satanas. Ano ang resulta sini? Ginapasalig kita sang Biblia nga magapalagyo ang Yawa sa aton.—Basaha ang Santiago 4:7.
12. Paano napabakod si Job sang paglaum nga pagkabanhaw?
12 Dapat gid kita maglaum sa pagkabanhaw. Ginbinagbinag sa nagligad nga artikulo nga ginagamit ni Satanas ang kahadlok sa kamatayon para mangin indi kita matutom kay Jehova. Nagsiling si Satanas nga himuon ni Job ang tanan para sa iya kabuhi kag magauntat pa gani sia sa pag-alagad kay Jehova kon ara sa peligro ang iya kabuhi. Sala gid si Satanas. Bisan sa tion nga abi ni Job mapatay na sia, nangin matutom gihapon sia kay Jehova. Nagsalig sia nga pakitaan sia ni Jehova sing kaayo kag naglaum gid sia nga dulaon ni Jehova sa ulihi ang iya pag-antos. Nakabulig ini sa iya nga magbatas. Nagtuo si Job nga bisan pa indi magpasilabot si Jehova kag bisan pa mapatay sia, banhawon Niya sia sa palaabuton. Para kay Job, matuod gid ang paglaum nga pagkabanhaw. Kon matuod man sa aton ini nga paglaum, mangin matutom gihapon kita kay Jehova bisan pa ara sa peligro ang aton kabuhi.
13. Ano ang matun-an naton sa ginhimo ni Satanas kay Job?
13 Dapat naton tandaan nga ginagamit man ni Satanas sa aton ang pamaagi nga gingamit niya kay Job. Talupangda ang ginsiling ni Satanas: “Ihatag sang tawo [nga nagapatuhoy indi lang kay Job] ang tanan nga yara sa iya tungod sa iya kabuhi.” (Job 2:4, 5) Daw ginasiling ni Satanas nga indi naton matuod nga palangga si Jehova nga Dios kag talikdan naton Sia kon ara sa peligro ang aton kabuhi. Nagsiling man si Satanas nga indi kita palangga sang Dios kag balewala sa Iya ang pagpanikasog naton nga malipay Sia. Bangod nagalaum kita kay Jehova kag kabalo na kita sang gusto himuon ni Satanas, indi na niya kita madaya.
14. Ano ang mabal-an naton parte sa aton kaugalingon kon makaeksperiensia kita sang pagtilaw? Maghatag sing halimbawa.
14 Dapat naton tamdon ang mga pagtilaw nga kahigayunan para makilala naton ang aton kaugalingon. Paagi sa mga pagtilaw nga naagyan ni Job, nabal-an niya ang iya mga kaluyahon kag naghimo sia sang mga pagbag-o. Halimbawa, nabal-an niya nga dapat niya panikasugan nga mangin mas mapainubuson. (Job 42:3) Madamo man kita sang mabal-an parte sa aton kaugalingon kon makaeksperiensia kita sang pagtilaw. Sang ginpriso ang isa ka brother nga si Nikolay, * may malala sia nga mga balatian. Nagsiling sia: “Ang prisuhan daw X-ray, kay kon mapriso ang isa ka Cristiano, makita gid ang iya matuod nga mga kinaiya, ukon kon ano nga mga kinaiya ang wala sa iya.” Kon mabal-an naton kon ano ang aton mga kaluyahon, panikasugan naton nga maghimo sang mga pagbag-o.
15. Kay sin-o kita dapat magpamati, kag ngaa?
15 Dapat kita magpamati kay Jehova, indi sa aton mga kaaway. Nagpamati si Job sing maayo sang naghambal sa iya si Jehova. Ginpamangkot sang Dios si Job para mahangpan niya nga nagaulikid Sia sa iya. Daw ginasilingan sia sang Dios: ‘Nakita mo bala ang akon gahom sa akon mga gintuga? Nabal-an ko ang tanan nga nagakatabo sa imo. Ginahunahuna mo bala nga indi ko masarangan ang pagbulig sa imo?’ Mapainubuson nga nagsabat si Job kag nagpasalamat gid sia sa kaayo ni Jehova. “Sang una nabatian ko lang sa iban ang tuhoy sa imo,” siling ni Job, “apang karon nakita ko na ikaw.” (Job 42:5) Sang ginsiling ini ni Job, posible nga nagalumpiga pa sia sa mga abo, puno sang hubag ang iya lawas, kag nagapangasubo sia bangod napatay ang iya kabataan. Pero ginpasalig ni Jehova si Job nga palangga Niya sia kag nalipay Sia sa iya.—Job 42:7, 8.
16. Suno sa Isaias 49:15, 16, ano ang dapat naton dumdumon kon makaeksperiensia kita sang mga pagtilaw?
16 Subong, posible man nga insultuhon kita sang mga tawo kag kabigon nila kita nga daw wala kita sing pulos. Posible nga pakalainon nila kita ukon ang aton organisasyon kag ‘butangbutangan nila kita sang tanan nga sahi sang kalautan.’ (Mat. 5:11) Natun-an naton sa kasaysayan ni Job nga nagapati gid si Jehova nga mangin matutom kita sa Iya bisan pa makaeksperiensia kita sang mga pagtilaw. Palangga kita ni Jehova kag indi gid niya pagpabay-an ang mga nagalaum sa iya. (Basaha ang Isaias 49:15, 16.) Indi gid pagpamatii ang mga pagpakalain sang mga kaaway sang Dios. Nakaeksperiensia sang mabudlay nga mga pagtilaw ang pamilya sang isa ka brother nga si James nga taga-Turkey. Nagsiling sia: “Narealisar namon nga magaluya lang ang amon buot kon pamatian namon ang mga kabutigan nga ginasiling parte sa katawhan sang Dios. Gani nagpokus kami sa amon paglaum parte sa Ginharian kag padayon kami nga nag-alagad kay Jehova. Bangod sini, wala nadula ang amon kalipay.” Pareho kay Job, nagapamati kita kay Jehova. Ang mga kabutigan nga ginasiling sang aton mga kaaway indi makadula sang aton paglaum.
BULIGAN KA SANG IMO PAGLAUM NGA MAGBATAS
Bangod nangin matutom si Job, ginpakamaayo sia ni Jehova. Malipayon gid sia kag ang iya asawa sa ila malawig nga kabuhi (Tan-awa ang parapo 17) *
17. Ano ang natun-an mo sa halimbawa sang matutom nga mga alagad ni Jehova nga ginsambit sa Hebreo kapitulo 11?
17 Isa lang si Job sa madamo nga alagad ni Jehova nga nangin maisog kag mabakod bisan pa nakaeksperiensia sila sang mabudlay nga mga pagtilaw. Sa sulat ni apostol Pablo sa mga Hebreo, gintawag niya sila nga “tuman kadaku nga panganod sang mga saksi.” (Heb. 12:1) Naagyan nila ang mabudlay nga mga pagtilaw, pero nangin matutom sila kay Jehova sa bilog nila nga kabuhi. (Heb. 11:36-40) Kanugon lang bala sang ila pagbatas kag pagpanikasog? Indi gid. Bisan pa wala nila makita nga natuman ang tanan nga promisa sang Dios samtang buhi sila, padayon sila nga naglaum kay Jehova. Kag bangod sigurado sila nga nalipay sa ila si Jehova, nagasalig sila nga makita gid nila nga matuman ini nga mga promisa. (Heb. 11:4, 5) Mapalig-on kita sang ila halimbawa nga padayon nga maglaum kay Jehova.
18. Ano ang dapat mo himuon? (Hebreo 11:6)
18 Subong, nagalain pa gid nga nagalain ang kahimtangan sang kalibutan. (2 Tim. 3:13) Wala nagauntat si Satanas sa pagtilaw sa katawhan sang Dios. Bisan ano pa nga kabudlayan ang maeksperiensiahan naton sa palaabuton, kabay pa nga himuon naton ang aton bug-os nga masarangan para kay Jehova, kay nagasalig kita nga “ginpahamtang naton ang aton paglaum sa buhi nga Dios.” (1 Tim. 4:10) Dumdumon naton nga ang pagpakamaayo nga ginhatag sang Dios kay Job nagapamatuod “nga si Jehova mapinalanggaon gid kag maluluy-on.” (Sant. 5:11) Kabay pa nga mangin matutom man kita kay Jehova kag magsalig nga padyaan niya ang “mga hanuot nga nagapangita sa iya.”—Basaha ang Hebreo 11:6.
AMBAHANON 150 Pangitaa ang Dios Para Maluwas
^ Kon nagapamensar kita sang tawo nga nagbatas sang mabudlay nga mga pagtilaw, masami nga mapensaran naton si Job. Ano ang matun-an naton sa mga inagyan sining matutom nga tawo? Matun-an naton nga indi kita mapilit ni Satanas nga talikdan si Jehova. Matun-an man naton nga nabal-an ni Jehova ang tanan nga nagakatabo sa aton. Kag paagi kay Jehova, nadula ang tanan nga ginaantos ni Job, gani maabot man ang tion nga dulaon Niya ang tanan naton nga pag-antos. Kon ginapakita naton sa aton ginahimo nga kumbinsido gid kita sa sini, nalakip kita sa mga ‘nagalaum gid kay Jehova.’
^ DUGANG NGA PAATHAG: Ang Hebreo nga tinaga nga gin-translate nga “maglaum” nagakahulugan sing “paghulat” sing malipayon sa tion nga tumanon na sang Dios ang iya mga promisa. Nagapahangop man ini sang pagsalig sa iya.—Sal. 25:2, 3; 62:5.
^ Gin-islan ang pila ka ngalan.
