1. (a) Jehova we tu pa omaundjiro yeṋe? (b) ‘Okuundja ku Muhona’ ku heya tjike? (Tara “kOmambo nga kahururwa.”)

 JEHOVA wa yandja omaundjiro omawa ku avehe mbe mu suvera. Moruyaveze rwopopezu, eye ma yandisa omitjise, oruhoze, nonḓiro. (Omavan. 21:3, 4) Eye ma kavatera “ovanandjenda” mbe nomaundjiro mu ye wokutja eye ma katanaurira ehi moparadisa. (Eps. 37:9-11) Eye ma katjita kutja auhe wetu ma yenene okukara noupanga ouwa ku na ye, okukapita imbwi mbu tu yorokera nai. Tjiri ingo omaundjiro omawa tjinene. Omapu yeṋe ngu tu na wo wokukambura kutja omakwizikiro wa Mukuru maye yenenisiwa? Jehova aruhe u tjita imbi mbya tja ma tjiti. Ku nao, tu nepu ewa ‘rokuundja ku Muhona.’ * (Eps. 27:14) Otjiṋa hi, tu raisa mokuundja nomuretima nondjoroka ku Mukuru wetu okuyenenisa omakwizikiro we.—Jes. 55:10, 11.

2. Ovikwaye Jehova mbya tjita rukuru?

² Jehova wa raisa rukuru kutja u yenenisa omakwizikiro we. Ngatu tare kotjihorera tjimwe. Membo rOmavandururiro, Jehova wa kwizika kutja moruveze rwetu, eye ma wanisa ovandu okuza koviwaṋa, omihoko, nomaraka pekepeke kutja ve rikotamene ku ye mombwaneno. Ndino, otjimbumba tjapeke ho, tji tjiukwa otja “otjimbumba otjinene.” (Omavan. 7:9, 10) Nandarire  kutja otjimbumba hi tji novarumendu, ovakazendu, novanatje okuza mouye auhe, owo eṱunḓu rimwe ndi hupa mohange. (Eps. 133:1; Joh. 10:16) Imba votjimbumba otjinene wina ovazuvarise ovapyuke. Owo ve rirongera okuhaṋasana omaundjiro ngu ve na wo ohunga nouye ouwa, ku nomundu auhe ngu ma puratene. (Mat. 28:19, 20; Omavan. 14:6, 7; 22:17) Ndoovazu oove orupa rwotjimbumba otjinene, tjiwa kutja omaundjiro woviṋa oviwa mbi mavi ya, omananḓengu tjinene kove.

3. Satan u nondando yaye?

³ Omudiaboli ka vanga kutja u kare nomaundjiro woruyaveze. Eye u vanga kutja u kambure kutja Jehova ke rikendere ove, nu kamaa yenenisa omakwizikiro we. Satan tja toṋa okutjita kutja tu pandjare omaundjiro wetu woruyaveze, matu ngundipara, nu mape ya atu isa okukarera Jehova. Otja tji matu katara, Omudiaboli wa kondja okutjita kutja Job aha kara nomaundjiro nu ma ise okukarera Jehova.

4. Morupa ndwi matu katara ku ye? (Job 1:9-12)

⁴ Morupa ndwi, matu kakonḓonona omuano Satan ma kondja okutjita kutja Job ma ise okurira omuṱakame ku Jehova. (Lesa Job 1:9-12.) Eṱe wina matu kahungirira koviṋa mbi matu rihongere okuza kotjihorera tja Job, nokutja ongwaye tji matu hepa okuzemburuka kutja Mukuru we tu suvera nu ma kayenenisa omakwizikiro we.

5-6. Ovikwaye mbya tjitwa ku Job moruveze orusupi?

⁵ Job wa ri nehupo ewa tjinene. Eye wa ri noupanga wopopezu ku na Jehova. Eye wa ri neṱunḓu enene rondjoroka, nu wa ri omutumbe tjinene. (Job 1:1-5) Posi ya, meyuva rimwe Job wa pandjara ape oviṋa avihe. Otjitenga, eye wa pandjara outumbe we. (Job 1:13-17) Okuzambo, ovanatje ve avehe ovasuverwa va ṱa. Ripura ohunga noumba mbwo. Ovanene ve ṱunwa tjinene, indu umwe wovanatje vawo tja ṱu. Ku nao, ripurira koruhoze nomuhihamwatima Job nomukazendu we mbu va ri na wo, indu tji va zuva kutja ovanatje vawo avehe omurongo va ṱu. Katjikumise kutja Job wa taura ozombanda ze moruhoze ne riyumbu pehi.—Job 1:18-20.

⁶ Okuzambo, Satan wa yandja omutjise omuzeu ku Job mbwa wisa onḓengu ye. (Job 2:6-8; 7:5) Ngunda e hi ya muna omarorero, ovandu va tengere Job tjinene. Owo aave kapura ondunge ku ye. (Job 31:18) Oviṋa mbyo tji vya tjitwa, owo va uta okukara kokure na ye. Eye wa nakaurwa i yomarumbi we, omapanga we wopopezu nu nandarire ovakarere ve omuini.—Job 19:13, 14, 16.

7. (a) Job aa munu kutja omauzeu we aaye zu pi, nu wa panḓa okutjita vi? (b) Omomuano uṋe Omukriste mu ma yenene okumuna omauzeu otja tji pa raisiwa motjiperendero?

⁷ Satan aa vanga kutja Job ma kambure kutja ouzeu mbwa muna omena rokutja Jehova wa pindika ku na ye. Otjotjihorera, Satan wa ungurisa otjivepo otjinamasa okuwisa ondjuwo mu mwa ri ovanatje avehe va Job omurongo, mbaave ri eriro pamwe. (Job 1:18, 19) Eye wina wa raura omuriro okuza keyuru na u nyono ovinamuinyo vya Job novakarere ve mbaave vi tjevere. (Job 1:16) Mena rokutja ombepo nomuriro vya za keyuru, Job aa munu kutja vya za ku Jehova. Nu mena ranao, Job aa muna kutja ngahino wa pindikisa Jehova. Nandarire nao, Job wa panḓa okusenga Ihe womeyuru. Job aa tjiwa kutja oure wozombura, Jehova we mu pa oviṋa ovingi oviwa. Ku nao, aa munu kutja ndoovazu wa ri nondjoroka okuyakura imbi oviwa, eye wina ma sokuyakura imbi ovivi. Ku nao, eye wa tja: “Ena re ngari  tangwe!” (Job 1:20, 21; 2:10) Nandarire kutja Job wa pandjara ouini we, ovanatje ve, nu wa ṱunwa kouveruke we, eye wa kayenda komurungu okurira omuṱakame ku Jehova. Posi ya Satan we mu rora notjiṋa tjarwe.

8. Otjikwaye tjarwe Satan tja rora na tjo Job?

⁸ Okuzambo Satan wa ungurisa ovandu vetatu mbaave tjiti aayo omapanga wa Job, okutjita kutja Job me rimune okuhinonḓengu. Ovarumendu mba aave tja Job wa muna ouzeu mena roviṋa ovingi ovivi mbya tjita. (Job 22:5-9) Owo wina aave kondjo okutjita kutja ma kambure kutja nandarire kehi yoviṋa ovingi oviwa mbya tjita, Mukuru ka vara ozongondjero nḓo. (Job 4:18; 22:2, 3; 25:4) Nu aave kondjo okutjita kutja Job ma mune kutja Mukuru kee mu suvera, ke rikendere ku ye, nu omerikotameneno we ku ye ya ri omungandjo. Omambo wawo mape ya ya tjita kutja Job ma mune kutja ongaro ye kamaai runduruka.

9. Ovikwaye mbya vatera Job okukara nouvanḓe nomasa?

⁹ Ripura notjiṋa hi. Job u ri momihihamo omingi nu wa haama momutwe. (Job 2:8) Omapanga we maye mu raere kutja kamundu omuwa, nu oviṋa avihe mbya tjita omungandjo. Omauzeu we ye ri tjimuna omutwaro omuzeu kombanda ye, nu u noruhoze tjinene mena rovanatje ve mba ṱu. Kotjirutenga Job wa mwina. (Job 2:13–3:1) Indu ovarumendu mbu mave tjiti aayo omapanga wa Job, tji mave ripura kutja Job tja mwina nao ma isa Jehova, owo ve ri posyo. Okuzambo Job mape ya wa yere otjiuru tje na tara ku wo, na tja: “Me kara pokutja hi nondjo nga keyuva ronḓiro yandje.” (Job 27:5) Ovikwaye mbya vatera Job okukara nouvanḓe nomasa nandarire kehi yomauzeu ngaa munu? Nandarire kutja wa wire momuinyo tjinene, eye wa ri nomaundjiro wokutja Mukuru we worusuvero me mu vatere okuisa po omauzeu we. Eye aa  tjiwa kutja nandarire kutja wa ṱu, Jehova me mu pendura.—Job 14:13-15.

10. Ehungi ra Job mari tu hongo tjike?

¹⁰ Ehungi ra Job ri tu honga kutja Satan kamaa yenene okutuṋiṋikiza okuisa Jehova, nokutja Jehova u tjiwa ongaro aihe mu tu ri. Ehungi ra Job wina ri tu vatera okuzuva nawa oviṋa avihe mbya kayenda po. Ngatu tare koviṋa tjiva mbi matu yenene okurihongera ku Job.

11. Indu tji twa kayenda komurungu okukara nongamburiro mu Jehova, ouwa waye mbu matu munu? (Jakobus 4:7)

¹¹ Job wa raisa kutja indu tji twa kayenda komurungu okukara nongamburiro mu Jehova, eṱe matu yenene okutuurunga omarorero ngamwa ayehe nokupirukira Satan nondoṋeno. Ouwa waye mbu matu munu? Omatjangwa ye tu pa ongamburiro kutja Omudiaboli ma tupuka na zu po pu eṱe.—Lesa Jakobus 4:7.

12. Omomuano uṋe omaundjiro wombendukiro mu ya yanḓiparisa Job?

¹² Matu hepa okukara nongamburiro yomasa mombendukiro. Otja tji pa tamunwa morupa ndwa kapita, Satan potuingi u tjita kutja tu tire onḓiro kutja tu ise okurira ovaṱakame ku Jehova. Motjihorera tja Job, Satan wa tja Job ma tjiti otjiṋa ngamwa atjihe, nandarire okuisa okurikotamena ku Jehova, kutja ma yame omuinyo we. Satan wa ri posyo. Nandarire kutja Job aa munu kutja ma ṱu, eye wa kayenda komurungu okurira omuṱakame ku Jehova. Eye wa ri nongamburiro mouwa wa Jehova, nu omaundjiro nga ri na wo wokutja Jehova ma ṱunu avihe koupwe, ye mu vatera kutja ma tuurunge. Job wa ri nongamburiro kutja, ndoovazu Jehova ke mu vaterere ngunda e nomuinyo, Eye meke mu pendura moruyaveze. Job wa ri nongamburiro yomasa mombendukiro. Indu tji tu nongamburiro yomasa mombendukiro, onḓiro kamaai tjiti kutja atu ha rire ovaṱakame.

13. Ovikwaye mbi matu rihongere okuza ku imbi Satan mbya tjita ku Job?

¹³ Matu sokuyandja ombango koviṋa Satan mbya ungurisa ku Job, mena rokutja eye u ungurisa omiano otjingevyo ndino. Tara komuano Satan me tu kuminina. Eye wa tja: “Omundu [ngu he ri Job uriri] ma isa oviṋa vye avihe andakuzu eye ma sora okukara nomuinyo.” (Job 2:4, 5) Ku nao, Satan u tu kuminina kutja katu ya suvera Jehova Mukuru tjiri, nokutja matu yenene okumwesa indu okutjita nao tji maku yenene okuyama omiinyo vyetu. Satan u tja Mukuru kee tu suvera nu kamunu ozongondjero nḓu tu tjita kutja tu tjate ku Ye. Mena rokutja tu tjiwa imbi Satan mbye kondja okuyenenisa, eṱe katu kambura movizeze vye.

14. Omarorero ye tu vatera okumuna ye ohunga na eṱe oveni? Sasaneka.

¹⁴ Matu sokuvara omarorero otjomuano wokuritjiwa oveni. Omarorero Job nga muna ye mu vatera kutja ma mune oungundipare tjiva mbwa ri na wo, nu ma ungurire ko. Otjotjihorera, eye we rihonga kutja ma hepa okurisusuparisa tjiri. (Job 42:3) Eṱe wina matu yenene okurihonga ovingi ohunga na eṱe oveni indu tji tu ri kehi yomarorero. Omurumendu omukambure wena Nikolay, * ngwa tuwa motjovakamburwa nu ngwa verere tjinene, wa tja: “Oruveze ndu mba ri motjovakamburwa rwe ndji vatera okumuna ovikaṋena mbyee hepa okuungurira ko.”  Indu tji twa tjiwa oungundipare wetu, eṱe tu yenena okuungurira ko.

15. Matu sokupuratena ku uṋe, nu omena raye?

¹⁵ Eṱe matu hepa okupuratena ku Jehova, nu ka kovanavita na eṱe. Job wa yandja ombango indu Jehova tja hungira ku na ye. Mukuru momambo warwe wa tja nai ku Job: ‘Hapo mo munu omasa wandje ngu mba uta na wo oviṋa? Ami me tjiwa oviṋa avihe mbya tjitwa kove. Hapo mo munu kutja ami himee yenene okukutjevera?’ Job wa zira momuano womerisusuparisiro nondangi kouwa wa Jehova. Eye wa tja: “Ami mba tjiwa imbi porwavyo ovakwetu mbi ve ndji raerere, nungwari nambano ami mbe Ku munu nomeho wandje omuini.” (Job 42:5) Job mape ya wa haamene momutwe, orutu rwe rwe urire ovirwaro nu wa ri moruhoze mena rovanatje ve mba ṱa, indu tja hungira omambo ngo. Nandarire nao, Jehova wa raera Job kutja we mu suvera nu u nonyuṋe mu ye.—Job 42:7, 8.

16. Otja ku Jesaja 49:15, 16, ovikwaye mbi matu sokuripurira ko indu tji tu ri kehi yomarorero?

¹⁶ Ovandu ndino wina ve tu hungira omambo omavi nokututjinda tjimuna kaweṱe ovandu vonḓengu. Owo mape ya ave kondjo okuzunḓa ena retu otjovandu poo otjotjira ‘nokuhungira ovizeze ngamwa avihe’ ohunga na eṱe. (Mat. 5:11) Okuza kehungi ra Job, matu rihongo kutja Jehova u nongamburiro mu eṱe kutja matu kayenda komurungu okurira ovaṱakame ku ye, indu tji tu ri kehi yomarorero. Jehova we tu suvera nu kamaa isa imba mbe nomaundjiro mu ye. (Lesa Jesaja 49:15, 16.) O yandja ombango komambo ngamwa omavi nge hungirwa i yovanavita  na Mukuru. Omurumendu omukambure wena James, ngwa za koTurkey, nu ngwa muna omarorero omazeu pu neṱunḓu re, wa tja: “Twa muna kutja okupuratena kovizeze ohunga novakarere va Mukuru maku tu wisa momuinyo. Ku nao, aatu yandja ombango komaundjiro ngu tu na wo mOuhona wa Mukuru, nu twa ungura noupyuke motjiungura tja Jehova. Mena ranao, eṱe twa kara nondjoroka.” Eṱe tu puratena ku Jehova tjimuna Job tjaa tjiti. Ovizeze ovanavita mbi ve hungira ohunga na eṱe, kavi tjiti kutja tu pandjare omaundjiro wetu.

17. Mo rihongere ko ye okuza kotjihorera tjovarumendu novakazendu ovaṱakame mba tamunwa mOvaheberi ekondwa 11?

¹⁷ Job iumwe wovakarere va Jehova mba raisa ouvanḓe nokupanḓera po kehi yomarorero omazeu. Morutuu rwe kOvaheberi, omuapostele Paulus wa hungira ohunga novengi varwe, na tja owo ‘otjimbumba otjinene tjovahongonone.’ (Hebr. 12:1) Owo va tuurunga omarorero omazeu, posi ya va kayenda komurungu okurira ovaṱakame ku Jehova. (Hebr. 11:36-40) Hapo onḓaro orure yawo nokuungura oukukutu ya ri omungandjo? Kako. Nandarire kutja kave munine omayenenisiro ayehe womakwizikiro wa Mukuru, owo va kayenda komurungu okukara nomaundjiro mu Jehova. Nu mena rokutja aave tjiwa kutja Jehova u nonyuṋe mu wo, owo va ri nongamburiro kutja mave kamuna omakwizikiro ngo amaye yenenisiwa. (Hebr. 11:4, 5) Otjihorera tjawo matji tu pe omasa wokukayenda komurungu okukara nomaundjiro mu Jehova.

18. Ove we rimanene okutjita tjike? (Ovaheberi 11:6)

¹⁸ Ndino tu hupa mouye mbu ririra ko ouvi. (2 Tim. 3:13) Satan ke ya mana okurora ovakarere va Mukuru. Nandarire kutja komurungu ku nomauzeu ngu matu kamuna, ngatu rimanene okuungurira Jehova oukukutu “atwa twa omaundjiro wetu mu Ndjambi omunamuinyo.” (1 Tim. 4:10) Zemburuka kutja, ondjambi Mukuru ndja yandja ku Job i raisa kutja “Muhona we ura notjari nounyaṋutima.” (Jak. 5:11) Ngatu kayende komurungu okukara nouṱakame ku Jehova tjimuna Job, nu tu kare nongamburiro kutja “Eye u yandja ondjambi ku imba mbe Mu paha.”—Lesa Ovaheberi 11:6.