1. (a) Nama harapan ke udah diberi Jehovah ngagai kitai? (b) Nama reti ‘manggaika harapan kitai ba Jehovah’?

 JEHOVAH udah meri harapan ti manah ngagai semua orang ke rinduka Iya. Enda lama da agi, Iya deka muai semua penyakit, penusah ati enggau pemati. (Pem. 21:3, 4) Iya deka nulung “orang ke baruh ati” ke manggaika pengarap ba Iya ngambika ngubah dunya tu nyadi paradais. (Mas. 37:9-11) Iya deka ngasuh tiap iku kitai bisi kaul ti manah enggau Iya. Indah, manah agi ari kaul ke dikembuan kitai enggau Iya diatu. Naka meh pemanah harapan nya! Tang nama kebuah kitai ulih pechaya semaya ari Jehovah deka dikeamatka? Laban Jehovah seruran ngereja utai ti dipadah Iya. Nya kebuah, kitai ulih ‘manggaika harapan kitai ba Petara ti idup.’ (1 Tim. 4:10, NWT) Kitai nunjukka tu lebuh kitai nganti enggau sabar sereta gaga ati seraya Jehovah ngamatka semaya Iya.—Isa. 55:10, 11.

2. Nama udah dikereja Jehovah?

² Jehovah udah nunjukka Diri seruran ngamatka semaya Iya. Perundingka siti chunto tu. Ba bup Pemandang, Jehovah udah besemaya, ba jeman kitai Iya deka mai orang ari semua raban bansa, menua, enggau jaku ngambika beserakup nyembah Iya. Kemayaharitu, raban ti istimewa nya dikumbai  raban orang mayuh. (Pem. 7:9, 10) Taja pan raban tu bisi semua macham orang nyengkaum lelaki, indu sereta bala anak ari serata dunya, tang sida nya siti ruang bilik ti beserakup. (Mas. 133:1; Jhn. 10:16) Sida ari raban orang mayuh tu mega penginjil ti ransing. Sida seruran besedia deka bekunsika harapan pasal dunya ti manah agi ngagai semua orang ke deka ninga. (Mat. 28:19, 20; Pem. 14:6, 7; 22:17) Enti nuan seiku ari raban orang mayuh, semaya pasal utai ti manah ke deka nyadi jemah ila tentu amat berega ba nuan.

3. Nama tuju Sitan?

³ Sitan enggai nuan bisi harapan ti manah. Iya deka nuan pechaya Jehovah enda pedulika nuan lalu Jehovah mega enda ulih ngamatka semaya Iya. Enti Sitan ulih ngasuh kitai lenyau harapan, kitai deka lenyau pemerani. Lalu, kitai mega engka deka badu nyembah Jehovah. Baka ke deka dikerandauka kitai legi, Sitan nguji ngasuh Jop lenyau harapan lalu badu nyembah Jehovah.

4. Nama deka dikerandauka kitai ba artikel tu? (Jop 1:9-12)

⁴ Ba artikel tu, kitai deka beratika baka ni Sitan nguji mejal Jop ngambika badu agi tetap ati ngagai Jehovah. (Bacha Jop 1:9-12.) Kitai mega deka berandauka utai ti ulih dipelajarka kitai ari teladan Jop sereta kebuah kitai patut ingat Petara rinduka kitai lalu deka ngamatka semaya Iya.

5-6. Nama nyadi ngagai Jop dalam siti timpuh ti pandak?

⁵ Jop bisi pengidup ti amat manah. Iya bisi kaul ti rapat enggau Jehovah. Iya bisi ruang bilik ti besai sereta gaga ati. Lalu iya mega amat kaya. (Jop 1:1-5) Tang dalam sehari aja, Jop lenyau nyauka semua utai ti dikemisi iya. Keterubah, iya lenyau semua jelu iya. (Jop 1:13-17) Udah nya, semua anak iya mati. Gambarka penusah nya. Bala apai indai balat tusah ati lebuh seiku ari bala anak sida mati. Nyadi, gambarka penusah ati ti diasaika Jop seduai bini iya lebuh seduai iya ninga pasal sepuluh iku anak seduai iya ke udah mati. Nya kebuah, Jop nyarikka gari diri lalu nyungkurka diri ke tanah laban iya balat tusah ati!—Jop 1:18-20.

⁶ Sitan lalu meri Jop siti penyakit ti amat pedis sereta balat ngemaluka. (Jop 2:6-8; 7:5) Sebedau nya, orang amat bebasaka Jop. Sida ngiga jaku lalau ari iya. (Jop 31:18) Tang diatu, sida nyeliahka diri ari iya. Orang enggai begulai enggau iya. Bala menyadi, kaban belayan, indah orang gaji iya enggai nerima iya!—Jop 19:13, 14, 16.

7. (a) Ba runding Jop, nama kebuah iya merinsa? Taja pia, nama utai ke enggai dikereja iya? (b) Baka ni orang Kristian ulih napi penanggul ke nyauka sama enggau ba gambar ti diayanka?

⁷ Sitan deka Jop pechaya iya merinsa laban Jehovah ringat ngagai iya. Ambika chunto, lebuh sepuluh iku anak Jop benung makai begulai ba siti rumah, Sitan mangka rumah nya ngena kabut ti besai. (Jop 1:18, 19) Iya mega ngasuh kilat ari serega munuh ukai semina bala jelu Jop tang mega orang ke ngibun jelu nya. (Jop 1:16) Kabut enggau kilat nya datai ari serega. Nya kebuah, Jop ngumbai Jehovah meh ke ngasuh utai nya nyadi. Ketegal nya, Jop pechaya iya udah ngasuh Jehovah ringat. Taja pia, Jop enggai nyumpah Jehovah. Jop nemu iya udah nerima mayuh utai ti manah ari Jehovah pengelama betaun-taun. Nya alai, iya berunding enti iya ulih nerima utai ti manah, iya mega patut ulih  nerima utai ti enda manah. Nyadi, Jop madah: ‘Pujika nama Jehovah.’ (Jop 1:20, 21; 2:10) Taja pan Jop udah lenyau semua reta, anak, enggau pengerai iya, tang Jop agi tetap ati ngagai Jehovah. Tang diatu, Sitan deka nguji utai bukai.

8. Nama utai bukai ke digaga Sitan ngagai Jop?

⁸ Sitan ngena tiga iku orang ke pepura nyadi kaban Jop ngambika ulih ngasuh Jop berasai enda berega. Sida madah Jop merinsa laban iya udah ngereja mayuh utai ti jai. (Jop 22:5-9) Sida mega nguji ngasuh Jop pechaya, taja pan iya engka nadai ngereja nama-nama penyai, Jehovah agi enda pedulika semua pemanah ti dikereja iya. (Jop 4:18; 22:2, 3; 25:4) Sida deka ngasuh Jop pechaya Petara enda rinduka iya lalu Petara enda pedulika iya. Nyadi, enti iya nyembah Petara pan, nya nadai reti. Jaku sida ulih ngasuh Jop berasai nadai agi harapan.

9. Nama nulung Jop mengkang kering sereta berani?

⁹ Gambarka situasi nya. Jop duduk ba endur orang muai uras lalu iya seruran berasai pedis. (Jop 2:8) Bala kaban iya madahka, iya ukai orang ti manah lalu utai ke digaga iya enda kala manah. Semua penguji nya balat ngenusahka iya. Ati iya balat tusah ketegal lenyau semua anak ti dikerinduka iya. Terubah iya, Jop nadai bebunyi. (Jop 2:13–3:1) Tang, enti sida ke pepura nyadi kaban Jop ngumbai tu reti iya Jop deka ninggalka Jehovah, runding sida nya salah. Bisi sekali, Jop engka engkadah lalu meda ngagai bala kaban ti pelesu nya. Lalu Jop madah: “Aku deka majak ngumbai diri nadai penyalah nyentuk ngagai maya aku mati.” (Jop 27:5) Nama nulung Jop mengkang kering sereta berani taja pan napi semua pemerinsa tu? Taja pan maya nya Jop berasai balat tusah ati, tang iya nadai kala ngetu ngarapka  Petara deka nulung iya. Iya nemu enti iya mati pan, Jehovah tentu deka ngangkatka iya idup baru.—Jop 14:13-15.

10. Nama ulih dipelajarka kitai ari cherita Jop?

¹⁰ Cherita Jop ngajar kitai, Sitan enda ulih mejal kitai ninggalka Jehovah lalu Jehovah nemu pasal semua utai ti nyadi. Utai ke nyadi ba Jop nulung kitai meretika siti-siti utai ke benung nyadi. Peratika sekeda utai ke ulih dipelajarka kitai ari Jop.

11. Nama utai ulih dipechayaka kitai enti kitai terus arapka Jehovah? (James 4:7)

¹¹ Ari teladan Jop, kitai ulih meda, enti kitai terus bepanggai ba Jehovah, kitai ulih tan ngenatka sebarang penguji lalu mujur ngelaban Sitan. Nama asil iya? Bup Kudus madahka, Sitan deka rari ari kitai.—Bacha James 4:7.

12. Baka ni harapan pasal pengangkat ari mati ngeringka Jop?

¹² Kitai patut bisi pengarap ti tegap pasal semaya pengangkat ari mati. Baka ke dipadah ba artikel sebedau tu, Sitan suah deka kitai takut ke pemati ngambika kitai badu agi tetap ati ngagai Jehovah. Baka utai ke nyadi ba Jop, Sitan madahka Jop deka ngereja sebarang utai indah badu nyembah Jehovah, ngambika ulih nyelamatka nyawa iya empu. Utai ti dipadah Sitan nya salah. Indah lebuh Jop ngumbai diri deka mati, iya agi tetap ati ngagai Jehovah. Jop pechayaka pemanah Jehovah lalu iya amat arapka Jehovah ulih nulung iya betan napi penanggul. Jop pechaya enti Jehovah enda nulung iya lebuh iya agi idup, Jehovah tentu deka ngangkatka iya idup baru jemah ila. Semaya pasal pengangkat ari mati nya nyata ba Jop. Enti semaya nya mega nyata ba kitai, indah enti pemati deka nabanka nyawa kitai pan, kitai enda badu nyembah Jehovah.

13. Nama ulih dipelajarka kitai ari utai ti dikereja Sitan ngagai Jop?

¹³ Kitai patut beratika utai ti dikereja Sitan ngagai Jop laban Sitan ngereja utai ti sama ngagai kitai kemayaharitu. Peratika jaku tuduh Sitan: “Mensia [ukai semina Jop] deka ngelengkaka semua utai, asal nyawa iya idup.” (Jop 2:4, 5) Nyadi, Sitan madahka kitai enda rinduka Jehovah enggau pengabis ati, lalu kitai deka ninggalka Jehovah enti nya ulih nyelamatka nyawa kitai. Sitan mega madah, Petara enda rinduka kitai, lalu Iya enda beratika pengawa kitai ti bebendar deka ngelantangka ati Iya. Ketegal kitai nemu utai ti deka dikereja Sitan, kitai enda pechayaka pemula iya.

14. Nama ulih ditemu kitai pasal diri empu lebuh napi penanggul?

¹⁴ Kitai patut ngumbai penanggul nya siti peluang alai kitai ulih belajar pasal diri empu. Penanggul ke ditapi Jop nulung iya nemu pengelemi diri sereta nemu chara ngemetulka pengelemi nya. Ambika chunto, iya belajar iya patut baruh agi ati. (Jop 42:3) Kitai ulih belajar mayuh utai pasal diri empu lebuh kitai napi penanggul. Seiku menyadi lelaki ke benama Nikolay, b dijil taja pan iya balat merinsa ketegal napi mayuh penanggul ba pengerai. Ku iya madahka: “Maya aku ba jil, aku nyau sedar pasal sifat ke patut dikemansangka aku.” Pengudah kitai nemu pengelemi diri, kitai ulih mutarka nya.

15. Jaku sapa ke patut didinga kitai, lalu nama kebuah?

¹⁵ Kitai patut ningaka Jehovah, ukai munsuh kitai. Jop ninga enggau manah lebuh  Jehovah bejaku ngagai iya. Petara nanya Jop: ‘Kati nuan bisi meda kuasa Aku? Aku nemu semua utai ke udah nyadi ba nuan. Kati nuan ngumbai Aku enda ulih nyaga nuan?’ Tu nulung Jop beratika pengibuh Jehovah ngagai iya. Enggau ati ti baruh sereta asai terima kasih ti dalam ngagai pemanah Jehovah, Jop madah: “Dulu menya, aku semina nemu utai ti dipadahka orang ngagai aku, tang diatu aku udah meda Nuan ngena mata aku empu.” (Jop 42:5) Jop engka agi duduk ba endur orang muai uras lebuh iya nyebut utai nya. Tubuh iya penuh enggau pisa, lalu iya agi benung tusah ati ketegal bala anak iya ke udah mati. Taja pia, Jehovah agi ngayanka pengerindu ngagai Jop lalu madahka Diri gaga ati ke Jop.—Jop 42:7, 8.

16. Nitihka Isaiah 49:15, 16, nama utai ke patut dikingatka kitai lebuh napi penguji?

¹⁶ Kemayaharitu, orang engka ngeleseka kitai lalu ngumbai kitai nadai guna. Sida engka nguji ngenyaika nama kitai tauka nama gerempung kitai, lalu “nyebut semua macham utai ti bula ngelaban” kitai. (Mat. 5:11) Ari cherita Jop, kitai belajar Jehovah pechaya kitai deka mengkang tetap ati ngagai Iya taja pan kitai napi penguji. Jehovah rinduka kitai lalu enda kala ninggalka orang ke arapka Iya. (Bacha Isaiah 49:15, 16.) Anang pedulika jaku ti bula ke dipadah munsuh Petara! Ruang bilik menyadi James ari menua Turki, bisi napi mayuh penguji. Ku iya madah: “Kami sedar enti kami ningaka utai ti bula pasal nembiak Petara,  nya deka ngelemika kami. Nya alai, kami fokus ba harapan pasal Perintah Petara lalu mengkang sibuk ngereja pengawa ke Jehovah. Ketegal nya, kami ulih mengkang gaga ati.” Baka Jop, kitai patut ningaka Jehovah! Pemula ke dipadah bala munsuh kitai enda ulih ngasuh kitai lenyau harapan.

17. Nama ulih dipelajarka nuan ari teladan lelaki enggau indu ti tetap ati ke dipadah ba Hebrew bagi 11?

¹⁷ Jop nya seiku ari mayuh nembiak Jehovah ke mengkang kering sereta berani lebuh napi mayuh penguji ti balat. Ba surat ke ditulis rasul Paul ngagai orang Hebrew, iya madahka sida nya siti raban saksi ti mayuh amat. (Heb. 12:1) Sida napi mayuh penguji ti balat tang sepemanjai pengidup sida, sida mengkang tetap ati ngagai Jehovah. (Heb. 11:36-40) Kati pengeliat ati enggau pemagas sida nadai reti? Tentu enda! Taja pan sida enda kala meda semua semaya Petara dikeamatka lebuh sida agi idup, tang sida terus manggaika pengarap sida ngagai Jehovah. Lalu ketegal sida pechaya sida udah ngelantangka ati Jehovah, sida ulih yakin sida deka meda semua semaya nya dikeamatka. (Heb. 11:4, 5) Teladan sida ulih ngasuh kitai keran agi deka terus manggaika pengarap ba Jehovah.

18. Nama utai ti keran deka digaga nuan? (Hebrew 11:6)

¹⁸ Kemayaharitu, kitai idup ba dunya ti majak jai-sejai. (2 Tim. 3:13) Sitan agi nguji nembiak Petara. Enda ngira nama penguji ke deka datai ila, arapka semua kitai bebendar gawa ke Jehovah, lalu terus ‘manggaika harapan kitai ba Petara ti idup.’ (1 Tim. 4:10, NWT) Kingatka meh, berekat ke diberi Petara ngagai Jop pengudah iya napi semua penguji nya nunjukka Jehovah nya “penuh laban penyiru enggau pengasih.” (Jas. 5:11) Arapka semua kitai mengkang tetap ati ngagai Jehovah, lalu andalka Iya deka merekatka “orang ke ngiga Iya.”—Bacha Hebrew 11:6.