1. (a) Anni nga iddanama i niyawa nittam ni Jehova? (b) Anni i kayà kagian na ‘magiddanama kani Jehova’? (Innan i “Kebalinan na Termino.”)

 MAKAKKASTA i iddanama nga niyawa ni Jehova ta ngamin nga mangiddu ta nisa. Aranni ngana nga pawanan na i taka-taki, paddaddam, anna patay. (Nep. 21:3, 4) Uffunan na noka danuri “minappakalinno” nga magiddanama ta nisa tapenu mapabbalidda tu paraiso i davvun. (Sal. 37:9-11) Sonu duttal yatun nga tiempo, posible ngana noka para ta kada tadday nittam nga mabbalin tu madukko i relasiottam kani Jehova. Mas paga nga madukko yatun anne ta relasiottam ta nisa sangawe. Anni ngana mabba kasta natun nga iddanama! Ngatta makasiguradu ittam nga tuppalan noka na Dios i promesa na ira? Kanayun nga kuan ni Jehova nu anni i nipromesa na. Yayya nga awayya tam i ‘magiddanama kani Jehova.’ * (Sal. 27:14, NW ) Mepasingattam yatun nu mapasensia nga innaggattam nga tuppalan na Dios tam i ngamin nga nipromesa na.​—Isa. 55:10, 11.

2. Anni ngana i nakua ni Jehova?

² Napakurug ngana ni Jehova nga kanayun nga tuppalan na i nipromesa na. Yaw i tadday nga angngarigan. Ta libru na Nepakannammu, nipromesa ni Jehova nga ta tiempo tam, pattaraddayan na i ngamin nga totolay maggafu ta ngamin nga nasion, tribu, anna lengguahe, tapus mattaradday ira nga masserbi ta nisa. Magalan yatun nga espesial nga grupo na totolay sangawe bilang i “magaru nga totolay” onu dakal nga ammung. (Nep. 7:9, 10) Maski nu madduruma i lahi danatun nga lallaki, babbay, anna abbarabbing, gitta da i tattadday nga  familia anna memammo ira. (Sal. 133:1; Juan 10:16) Matalikarag gapa nga mallayyagayya danuri parte na dakal nga ammung. Sigga-paran ira kanayun nga ikagi ta maski sinni nga maya nga magginna i pagiddanama da ta mas makasta nga mundo. (Mat. 28:19, 20; Nep. 14:6, 7; 22:17) Nu parte ka na dakal nga ammung, siguradu nga kuruga tagibalorammu i iddanamam ta mappange.

3. Anni i kayà ni Satanas?

³ Kayà ni Satanas nga mawawammu i pagiddanamam ta mappange. Gakkag na nga kurugammu nga ari naka ikavurungan ni Jehova anna ari na nga tuppalan i promesa na ira. Oras tu mapawan na i pagiddanama tam, makkafi i nono tam anna baka magimmang ittam paga lagu nga masserbi kani Jehova. Gigiammuattam ngana nu kunnasi nga pinurueban ni Satanas nga pawanan i pagiddanama ni Job tapenu magimmang yayya nga masserbi kani Jehova.

4. Anni i gigiammuattam taw nga artikulo? (Job 1:9-12)

⁴ Gigiammuattam taw nga artikulo i taktika ira nga inusa ni Satanas tapenu daralan i kinamatalo ni Job kani Jehova. (Bibbigan i Job 1:9-12.) Ammuattam gapa nu anni ira i magigiammu tam kani Job anna nu ngatta mawag tu daddammattam nga ayatan ittam na Dios anna tuppalan na noka i promesa na ira.

5-6. Anni i nesimmu kani Job?

⁵ Makasta bi i pattolay ni Job. Madukko i relasion na kani Jehova, dakal i familia na, magayayya ira, anna kitarriku yayya. (Job 1:1-5) Ngem ta tadday laman nga aggaw, maggi nawawan ni Job ngamin danatun. Ollu, nawawan na i kinariku na. (Job 1:13-17) Tapus natay i ngamin nga iddeddukan na nga ána na. Imajinammu ngana laman yatun nga nesimmu. Fermi i taki na para ta magana nu matay i tadday ta ana da. Kunnasi ngana laman gafu i natageno ni Job anna na atawa na turi ta nammuadda nga natay ngamin i mafulu nga ána da? Siguradu nga nakaddagan ira anna fermi i daddam da. Mantindiattam gafu nu ngatta ta sobra nga daddam ni Job, pinisil na i sinnung na anna natomba yayya!—Job 1:18-20.

⁶ Tumunug nga pinuntiria ni Satanas i gawa-gawayyan ni Job. Pinattaki na yayya tu grabe anna kappasiran nga taki. (Job 2:6-8; 7:5) Dati bi nga respetadu si Job na totolay ta diadda. Umay paga lagu ira nga makitabarang ta nisa. (Job 31:18) Ngem sangaw, lillillitadda ngana yayya. Inara-arayyuan yayya na wawwaragi na anna pinanawan yayya na madukko nga kokkofun na, maski paga lagu na mismu ira nga doroban na!—Job 19:13, 14, 16.

7. (a) Anni i kinurug ni Job nga rason nu ngatta mazziga-riga yayya, ngem anni i ari na vuluvuga kingngua? (b) Nu meparubang i tadday nga Cristiano ta situasion nga gitta na masingan ta picture, anni nakuan i kuan na?

⁷ Kayà ni Satanas nga kurugan ni Job nga mazziga-riga yayya megafu ta nawawan na i fabor ni Jehova. Inusa ni Satanas i masiki-sikan nga paddag tapenu daralan i balay nu sitaw makkaravulu nga kiminang i mafulu nga ána ni Job. (Job 1:18, 19) Pinattaga na gapa i afi maggafu ta langi yayya nga natay i aya-ayam ni Job kunne na gapa i doroban na ira nga manangngal tatun ira. (Job 1:16) Ta langi i naggafuan na paddag anna na afi yari tu abbo ni Job nga naggafu yatun kani Jehova. Megafu tatun, kinurug ni Job nga baka mapporay talaga si Jehova ta nisa. Ngem manaki lagapa ni Job nga makkagi tu marake kontra ta Yama na ta langi. Ammu na nga napakaru ngana nga makasta nga gannug i niyawa nisa ni Jehova ta nappasa ira nga dagun. Yatutta nanono na nga nu inalawa na i makasta ira nga  gannug, mawag gapa nga akseptan na i marake ira nga mesissimmu nisa. Kinagi na: “Paray nakuan tu medayaw lagapa i ngagan ni Jehova.” (Job 1:20, 21; 2:10) Matalo lagapa si Job kani Jehova maski nu nawawan na i kinariku na, natay i ána na, anna nattaki yayya. Ngem ari yayya inimmangan ni Satanas.

8. Anni paga nga taktika i inusa ni Satanas kani Job?

⁸ Kunnaw labbi gapa i taktika ni Satanas kontra kani Job. Inusa na i tallu nga appe nga kokkofun ni Job tapenu mepatageno da ta nisa nga awan tu sesserbi na. Kakkagiadda nga mazziga-riga si Job megafu ta aru i marake nga kukukuan na. (Job 22:5-9) Pinuruebadda gapa yayya nga kumbinsian nga maski nu anni karu na kuan na nga mapia, ari na vuluvuga mapagayayya i Dios. (Job 4:18; 22:2, 3; 25:4) Kayà da nga paddudan ni Job nga ayatan yayya na Dios anna tangngallan na yayya. Kayà da gapa nga nonopan na nga awan tu kwenta na passerbi na ta Dios. Tatun ira nga kinakkagi da, awayya nakuan nga mawanan tu iddanama si Job.

9. Anni i nakoffun kani Job tapenu maggutu anna massikan i nono na?

⁹ Imajinammu i situasion ni Job. Agga-lupegag yayya ta avu, tapus sumussussu i taki na. (Job 2:8) Ari nga magiggimmang i kakavvulu na nga daralan i reputasion na anna awan kanu vuluvuga tu kingngua na nga mapia. Gitta na natavvunan yayya tu madammo ira nga problema. Madudduddug gapa i futu na ta daddam nga mataga-tageno na ta patay na ána na. Ta ollu na bi, ari nga mattattannug si Job. (Job 2:13–3:1) Ngem nu abbo na kakavvulu ni Job nga pallikuran na ngana si Jehova, nakkamali ira ta kunnaw i tumunug nga nesimmu. Sisinu nga nilipay ni Job i appe nga kokkofun na tapus kinagi na ta nira: “Adde sonu matay ngà, ariakku wawwanan i integridad ku!” (Job 27:5) Anni i namaggutu anna namasikan ta nono ni Job ta ngamin nga nappasa-pasan na?  Maski turi ta fermi i nipakkafi na nono na, ari vuluvuga nawawan i pagiddanama ni Job nga uffunan balaman yayya na minaggiddu nga Dios na. Ammu na nga maski nu matay yayya, paginnolayan noka yayya ni Jehova.​—Job 14:13-15.

10. Anni i magigiammu tam ta istoria meyannung kani Job?

¹⁰ Nagigiammu tam ta istoria ni Job nga ari ittam mafersa ni Satanas nga pallikuran si Jehova anna ammu ni Jehova i ngamin nga mesissimmu ta nittam. Makoffun gapa yatun tapenu mas nga malippawa tam i nelagum ira nga isyu tatun. Ammuattam ngana i karuan nga magigiammu tam kani Job.

11. Nu kanayun ittam nga mattalo kani Jehova, ta anni ittam nga makasiguradu? (Santiago 4:7)

¹¹ Pinakurug ni Job nga nu kanayun ittam nga mattalo kani Jehova, maattammattam i maski anni nga kapurueba anna malabanattam si Satanas. Anni i resulta natun? Ipasiguradu nittam na Biblia nga arayyuan ittam na Diablo.​—Bibbigan i Santiago 4:7.

12. Kunnasi nga pinasikan na iddanama nga paginnolay si Job?

¹² Mawag tu masikan i pagiddanama tam ta paginnolay. Gitta gare na nagigiammu tam ta nappasa nga artikulo, usu-usan ni Satanas i assing tam ta patay tapenu daralan i kinamatalo tam kani Jehova. Kinagi ni Satanas nga kuan ni Job i ngamin tapenu laman mepaliag i inango na, maski nu mawag na i magimmang nga masserbi kani Jehova. Ngem mali si Satanas. Maski turi ta abbo ni Job nga matay ngana yayya, matalo lagapa yayya kani Jehova. Nakapagattam si Job megafu ta kumbinsidu yayya nga mapia si Jehova anna magiddanama gapa yayya nga itunung gabbalaman ni Jehova i ganna-gannug. Mangurug si Job nga maski nu ari na nga malawa i uffun ni Jehova ta nisa ta katolena, magga paginnolayan na yayya ta mappange. Kuru-kurug kani Job i iddanama nga paginnolay. Nu kurug gapa nittam yatun nga iddanama, ari tam vuluvuga likuran si Jehova maski paga nu mappeligro i inango tam.

13. Ngatta ari tam kattaman i taktika ira nga niyusa ni Satanas kani Job?

¹³ Mawag tu ari tam nga kattaman i taktika ira nga niyusa ni Satanas kani Job megafu ta danatun gabbalaman nga taktika i usu-usan na ta nittam sangawe. Kunnaw i akusasion ni Satanas: “Iyawa na tadday nga tolay [ari laman tu si Job] i ngamin nga egga sa para ta inango na.” (Job 2:4, 5) Kakkagian ni Satanas nga ari tam mabba talaga iddukan si Jehova nga Dios anna pallikurattam yayya tapenu laman mepaliag i inango tam. Kakkagian paga ni Satanas nga ari ittam nga ayatan na Dios anna awan tu pakialam na ta kukukuattam tapenu mapagayayya yayya. Megafu ta ammu tam nu anni i kayà ni Satanas nga mesimmu, ari ittam nga mappelogo ta taktika na ira.

14. Anni i ipasingan na kapurueba ira meyannung ta nittam? Iyilustra.

¹⁴ Mawag nga imammatattam i kapurueba ira nga oportunidad tapenu mas makilala tam i sarili tam. Nakaduffun kani Job i kapurueba ira nga inarubanna tapenu masingan na i pakkafian na ira anna metunung na danatun. Angngarigan na, nagigiammu na nga mas kawagan na paga i mabbalin tu mapakalinno. (Job 42:3) Maski sittam, mas makilala tam i sarili tam nu mapurueban ittam. Kunnatun i nesimmu kani Brother Nikolay. * Nefuku yayya maski egga i grabe nga taka-takitan na. Kinagi na: “I affukutan ay kunna X-ray. Ipasingan na i kononaggan nga ugali na tadday nga  Cristiano.” Nu masingattam ngana i pakkafiattam ira, awayya tam nga ikaguman nga itunung danatun.

15. Sinni i mawag nga ginnattam, anna ngatta?

¹⁵ Mawag tu magginna ittam kani Jehova, ari tu ta kalabattam ira. Nagginna tu mapia si Job ta pakibbida nisa ni Jehova. Gitta na kakkagian na Dios kani Job: ‘Masingammu kari i pakapangnguà nga mamaratu? Nasingakku ngamin i nesimmu niko. Nononopammu kari nga ari taka mawayya tangngallan?’ Mapakalinno nga simibbag si Job anna fermi i appappabalo na ta kinapia ni Jehova. Kinagi na: “Naginna na talingà ira i meyannung nikaw, ngem sangawe masingan naka ngana na matà ira.” (Job 42:5) Turi ta kinagi yatun ni Job, awayya na nga agga-sapelta paga yayya ta avu ira. Napannuan tu vutali i baggi na anna maddaddam paga yayya ta patay na ána na. Ngem maski kunnatun, kinagi ni Jehova i pangiddu na kani Job anna nipasiguradu na nga egga ta nisa i fabor na.​—Job 42:7, 8.

16. Base ta Isaias 49:15, 16, anni nakuan i agga-nono tam nu meparubang ittam ta kapurueba ira?

¹⁶ Kunnatun gapa ta kaggawattam. Iinsultowadda ittam anna tratuadda ittam nga gitta na awan tu sesserbi tam. Awayya na paga nga daraladda i reputasiottam, kunnari gapa na organisasiottam, anna ‘para-paraketadda ittam.’ (Mat. 5:11) Kagitta na nesimmu kani Job, magigiammu tam nga makkomfiansa si Jehova ta nittam nga mattalupaddiattam nga matalo ta nisa nu mapurueban ittam. Iddukan ittam ni Jehova anna ari na vuluvuga pagurayan danuri magiddanama ta nisa. (Bibbigan i Isaias 49:15, 16.) Ari tam nakuan ginnan i  panara-daral na kalaban ira na Dios! Yatun i napakurug ni Brother James nga taga-Turkey. Neparubang ta grabe nga kapurueba i familia na. Kinagi na: “Nagigiammu mi nga i pagginna ta kinaladdug meyannung ta totolay ira na Dios ay mamakkafi ta nittam. Yari tu nifokus mi i nono mi ta iddanama nga iyawa na Pappatulan anna nattalupaddiakkami nga aktibo ta serbisiu kani Jehova. Gafu tatun, ari mi nawawan i pagayayya mi.” Kagitta ni Job, magginna ittam kani Jehova! Ari nga madaral na kinaladdug ira na kalabattam i iddanama tam.

17. Anni i magigiammum ta ehemplo na matalo nga lallaki anna babbay ta Hebreo kapitulo 11?

¹⁷ Tadday laman si Job ta napakaru nga aripan ni Jehova nga nattalupaddian nga magutu anna matuyag maski ta grabe ira nga kapurueba. Ta tura ni apostol Pablo ta Hebreo ira, kinagi na gapa nga ‘napakaru i totolay nga nangipasingan ta angngurug da.’ (Heb. 12:1) Neparubang ira ta grabe nga kapurueba ngem matalo lagapa ira kani Jehova. (Heb. 11:36-40) Nasayang kari i pagatta-attam anna pallallappo da? Ari vuluvuga! Maski paga ari da nasingan i ketuppalan na ngamin nga promesa na Dios durante ta katoleda, nitulu-tuloy da nga magiddanama kani Jehova. Megafu ta siguradu ira nga nala da i fabor ni Jehova, komfiansa ira nga masingadda noka i ketuppalan na promesa ira. (Heb. 11:4, 5) Mapasikan na ehemplo da i determinasiottam nga tulu-tuloy nga magiddanama kani Jehova.

18. Anni i determinadu nga kuammu? (Hebreo 11:6)

¹⁸ Sangawe, mattotolay ittam ta mundo nga mas paga maggrabe i kinadake na. (2 Tim. 3:13) Ari paga nga nabaling si Satanas nga mamurueba ta totolay na Dios. Maski anni paga i meparubang ta nittam, determinadu ittam nakuan nga mallallappo nga mattrabahu para kani Jehova. Makkomfiansa ittam nga ‘matolay i Dios nga pagiddanamattam.’ (1 Tim. 4:10) Daddammattam nga pakurugan na pinanguffun na Dios kani Job nga “i Yafu [nga Jehova] ay minaggallallo anna minaggiddeddu.” (Sant. 5:11) Paray nakuan ta mattalupaddian ittam gapa nga matalo kani Jehova. Mattalo ittam nga “bala-balattan na Dios danuri i magaleg sa.”​—Bibbigan i Hebreo 11:6.