1. (a) Ania a namnama ti inted kadatayo ni Jehova? (b) Ania ti kaipapanan ti “manginanamaka ken Jehova”? (Kitaen ti “Kaipapanan ti Termino.”)

 NAGSAYAAT a namnama ti inted ni Jehova iti amin a mangay-ayat kenkuana. Asidegen a pagpatinggaenna ti sakit, ladingit, ken ipapatay. (Apoc. 21:3, 4) Tulongannanto “dagiti naemma” a mangin-inanama kenkuana inton pagbalinenda a paraiso ti daga. (Sal. 37:9-11) Pagbalinennanto met a posible a maaddaan ti tunggal maysa kadatayo iti nadekdekket a relasion kenkuana ngem iti matagtagiragsaktayo ita. Nagsayaat dayta a namnama! Ngem apay a mamatitayo a matungpalto dagiti kari ti Dios? Kanayon ngamin a tungpalen ni Jehova dagiti karina. Rumbeng laeng ngarud a ‘manginanamatayo ken Jehova.’ * (Sal. 27:14) Maipakitatayo daytoy no siaanus ken siraragsak nga urayentayo a tungpalen ti Dios dagiti karina.​—Isa. 55:10, 11.

2. Ania dagiti naaramidanen ni Jehova?

² Adun dagiti ebidensia a kanayon a tungpalen ni Jehova dagiti karina. Daytoy ti maysa a naisangsangayan nga ebidensia. Iti libro nga Apocalipsis, inkari ni Jehova nga iti panawentayo, pagkakaduaenna dagiti tattao iti amin a nasion, tribu, ken lengguahe, ken pagkaykaysaenna ida iti nadalus a panagdaydayaw. Ita, daytoy espesial a grupo dagiti tattao ket maawagan iti “dakkel a bunggoy.” (Apoc. 7:9, 10) Daytoy a grupo ket buklen dagiti lallaki, babbai, ken ubbing manipud iti intero a lubong a nagduduma ti puli, lengguahe, ken kasasaadda iti biag. Ngem adda talna ken panagkaykaysada kas maysa a pamilia. (Sal.  133:1; Juan 10:16) Naregta met a manangaskasaba dagiti karaman iti dakkel a bunggoy. Namnamaenda nga addanto nasaysayaat a lubong, isu a kanayon a nakasaganada a mangipakaammo iti dayta iti asinoman a mayat a dumngeg. (Mat. 28:19, 20; Apoc. 14:6, 7; 22:17) No karamanka iti dakkel a bunggoy, sigurado a nakapatpateg kenka dayta a namnama.

3. Ania ti kayat ni Satanas a mapasamak?

³ Kayat ti Diablo a maawan kenka ti namnamam. Kayatna a patiem a saannaka nga ipatpateg ni Jehova ken saanna a tungpalen dagiti karina. No agballigi ni Satanas a mangpukaw iti namnamatayo, mabalin a kumapuy ti pakinakemtayo, ken baka agsardengtay pay ketdin nga agserbi ken Jehova. Kas makitatayto, pinadas ti Diablo a pukawen ti namnama ni Job ken pasardengen isuna nga agserbi ken Jehova.

4. Ania ti adalentayo iti daytoy nga artikulo? (Job 1:9-12)

⁴ Iti daytoy nga artikulo, ammuentayo dagiti taktika nga inusar ni Satanas idi inkagumaanna a dadaelen ti kinamatalek wenno integridad ni Job. (Basaen ti Job 1:9-12.) Pagsasaritaantayo met dagiti masursurotayo iti ulidan ni Job ken no apay a masapul a tandaanantayo nga ay-ayatennatayo ti Dios ken tungpalennanto dagiti karina.

5-6. Ania dagiti napasamak ken Job iti maysa laeng nga aldaw?

⁵ Nagmayat idi ti biag ni Job. Nasinged a gayyemna ni Jehova. Nakabakbaknang ni Job ken dakkel ken naragsak ti pamiliana. (Job 1:1-5) Ngem iti maysa laeng nga aldaw, napukawna ti gistay amin nga adda kenkuana. Umuna, napukaw ti kinabaknangna. (Job 1:13-17) Kalpasanna, natay ti amin nga ay-ayatenna nga annak. Panunotem biit dayta a trahedia. Nagsakit para kadagiti nagannak no matay ti maysa kadagiti annakda. Imadyinem ngarud ti pannakakigtot, ladingit, ken miserable a rikna ni Job ken ti asawana idi naammuanda a napandagan ti amin a 10 nga annakda a nakatayanda. Isu met la gayam a pinisang ni Job ti badona ken naglusdoy gapu iti ladingitna!​—Job 1:18-20.

⁶ Simmaruno, pinagsakit ni Satanas ni Job iti nakaro a nakaibabainanna. (Job 2:6-8; 7:5) Ngamin, mararaem idi iti lugarda. Isu idi ti pagpatpatulongan dagiti tattao. (Job 31:18) Ita, likliklikandan. Maipuerpueran, ad-adaywan payen dagiti kakabsatna, dagiti nadekket a gagayyemna, ken uray dagiti adipenna!​—Job 19:13, 14, 16.

7. (a) Ania ti impagarup ni Job a rason iti panagrigatna, ngem ania ti dina inaramid? (b) Kasano a mabalin met a mapasamak iti maysa a Kristiano ti kas iti makita iti ladawan?

⁷ Kayat ni Satanas a patien ni Job nga agrigrigat isuna gapu ta nakapungtot ni Jehova kenkuana. Isu a bayat nga agkakadua a mangmangan ti amin a 10 nga annak ni Job, nagusar ni Satanas iti nakapigpigsa nga angin a nanggunggon ken nangrebba iti balay nga ayanda. (Job 1:18, 19) Pinagtinnagna met ti apuy manipud langit a nangpuor kadagiti taraken ni Job ken uray kadagiti mangipaspastor kadagita. (Job 1:16) Idiay langit ti naggapuan ti angin ken apuy, isu nga impagarup ni Job a ni Jehova a Dios ti naggapuan dagita. Gapu iti dayta, namati ni Job a baka napagurana ni Jehova. Ngem dina inlunod ti nailangitan nga Amana. Binigbig ni Job nga adun a tawen nga umaw-awat iti nagadu a bendision manipud ken Jehova. Para ken Job, no naragsak isuna a nangawat kadagiti naimbag a bambanag, masapul ngarud nga akseptarenna uray dagiti dakes a banag. Isu  nga imbagana: “Agtultuloy koma a maidaydayaw ti nagan ni Jehova.” (Job 1:20, 21; 2:10) Agingga iti dayta a kanito, nakaya pay met laeng ni Job a sanguen dagiti nakaro a problemana iti pinansial, emosional, ken pisikal. Ngem saan latta a nakontento ni Satanas.

8. Ania ti simmaruno nga inaramid ni Satanas ken Job?

⁸ Adda pay sabali nga inaramid ni Satanas ken Job: dinuroganna ti tallo a peke a gagayyem tapno ipariknada kenkuana nga awan serserbina. Imbagada nga agrigrigat kano ni Job ta nakaaramid iti adu a basol. (Job 22:5-9) Pinadasda met a kombinsiren nga uray no saan a dakes isuna, awan serserbi ti amin a panagporsegina a mangparagsak iti Dios. (Job 4:18; 22:2, 3; 25:4) Kayatda a panunoten ni Job a saan isuna nga ay-ayaten ken ay-aywanan ti Dios. Saan met kano nga ap-apresiaren ti Dios ti panagserbina Kenkuana. Gapu kadagiti imbagada, narikna ni Job a kas man la awanen ti namnamana a makabangon manen.

9. Ania ti nakatulong ken Job tapno agtalinaed a nabileg ken napigsa ti pakinakemna?

⁹ Imadyinem ti eksena: Bayat a nakatugaw ni Job iti kadapuan, di met la sumarsardengen ti ut-ot a marikriknana. (Job 2:8) Kanayon nga adda ibaga dagiti peke a gagayyemna a mangumsi kenkuana ken pinadasda a dadaelen ti reputasionna. Nariknana a dagiti suotna ket kas man la nagdadagsen a bato a naitupak kenkuana, bayat nga agpaspasanaang iti ipapatay dagiti annakna. Idi damo, saan a nagun-uni ni Job. (Job 2:13–3:1) No impapan dagiti peke a gagayyemna a ti panagulimekna ket pakakitaan a tallikudannan ti Namarsua kenkuana, nagkamalida. Posible a timmangad ni Job ken pinerrengna dagiti peke a gagayyemna, sa imbagana: “Agingga a matayak, agtalinaedak nga awan pagkuranganna!” (Job 27:5) Ania ti nakatulong ken Job tapno agtalinaed a nakabilbileg ken napigsa ti pakinakemna iti laksid ti amin a rigat a napasaranna?  Uray iti kasisipngetan nga aldaw ti biagna, pulos a di kimmudrep ti namnamana nga addanto aldaw a bang-aranto met la isuna ti nadungngo a Diosna. Kombinsido nga uray no matay, pagungarento isuna ni Jehova.​—Job 14:13-15.

10. Ania ti masursurotayo iti pakasaritaan ni Job?

¹⁰ Iti pakasaritaan ni Job, masursurotayo a saannatayo a mapilit ni Satanas a mangtallikud ken Jehova ken ammo ni Jehova ti amin a mapaspasamak kadatayo. Makatulong met dayta tapno mas maawatantayo dagiti nairaman nga isyu. Kitaentayo ti dadduma nga espesipiko a masursurotayo ken Job.

11. Ania ti manamnamatayo no kanayontayo nga agtalek ken Jehova? (Santiago 4:7)

¹¹ Pinaneknekan ni Job a no kanayontayo nga agtalek ken Jehova, maibturantayo ti aniaman a pakasuotan ken agballigitayo a mangbusor ken Satanas. Ania ngay ti resultana? Ipanamnama ti Kasuratan a panawannatayto ti Diablo.​—Basaen ti Santiago 4:7.

12. Ania ti naitulong ken ni Job ti namnama a panagungar?

¹² Masapul a kumpettayo a siiirut iti namnama a panagungar. Kas nadakamat iti napalabas nga artikulo, masansan nga us-usaren ni Satanas ti panagbuteng ken patay tapno saantayo nga agmatalek ken Jehova. Iti napasamak ken Job, imbaga ni Satanas nga aramiden kano ni Job ti amin, nga uray la ikompromisona payen ti kinamatalekna, tapno laeng masalbarna ti biagna. Ngem kamali ni Satanas. Uray idi kasla saanen a malisian ni Job ti ipapatay, nagtalinaed latta a matalek ken Jehova. Nakapagibtur ni Job ta nagtalek a ni Jehova ket naimbag. Naan-anay pay a nanginanama nga ilintegto met laeng ni Jehova ti bambanag. Ngem uray no bilang saan nga ilinteg ni Jehova ti bambanag bayat a sibibiag ni Job, kombinsido isuna nga aramidento ti Dios dayta inton pagungarenna iti masanguanan. Agpaypayso ken Job ti namnama a panagungar. No agpaypayso met dayta kadatayo, saantayo nga isuko ti kinamatalektayo uray no kasla ditayon malisian ni patay.

13. Apay a masapul a tantandaanantayo dagiti inaramid ni Satanas ken Job?

¹³ Masapul a tantandaanantayo dagiti inaramid ni Satanas ken Job ta kasta met laeng ti ar-aramidenna ita kadatayo. Panunotem daytoy nga akusasion ni Satanas: “Ited ti tao [saan la a ni Job] ti amin nga adda kenkuana para iti biagna.” (Job 2:4, 5) Parparuaren ngarud ni Satanas a saantayo a talaga nga ay-ayaten ni Jehova a Dios ken tallikudantayo isuna tapno masalbartayo ti biagtayo. Parparuaren met ni Satanas a saannatayo nga ay-ayaten ti Dios ken saanna nga ap-apresiaren dagiti panangikagumaantayo a mangparagsak kenkuana. Gapu ta ammotayon dagiti ar-aramiden ni Satanas ken mangin-inanamatayo ken Jehova, saannatayo a maallilaw.

14. No adda dagiti pannubok, ania ti maammuantayo maipapan iti bagitayo? lyilustrar.

¹⁴ No adda dagiti pannubok, gundawaytayo dayta tapno mas maam-ammotayo ti bagitayo. Dagiti pannubok ket nakatulong ken Job tapno makitana dagiti pagkapuyanna ken makorehirna dagita. Kas pagarigan, naamirisna a kasapulanna ti agbalin pay a napakpakumbaba. (Job 42:3) Adu met ti maammuantayo iti bagitayo no adda pannubok. Imbaga ti kabsat a ni Nikolay, * a naibalud uray adda dagiti grabe a sakitna: “Ti pagbaludan ket kasla X-ray. Maipakitana ti agpaypayso a kinatao ti maysa a Kristiano.” No nakitatayon dagiti pagkapuyantayo, agporsegitayo a mangkorehir kadagita.

15. Asino ti masapul a denggentayo, ken apay?

 ¹⁵ Masapul a ni Jehova ti denggentayo, saan a dagiti kabusortayo. Dimngeg a naimbag ni Job idi kinasarita ni Jehova. Pinagpanunot ti Dios ni Job, a kas man la ibagbagana: ‘Ammom kadi a naparsua ti amin a banag gapu iti pannakabalinko? Ammok ti amin a mapaspasamak kenka. Panagkunam, saanka a maaywanan?’ Sipapakumbaba a simmungbat ni Job ken inapresiarna unay ti kinaimbag ni Jehova. “Adda dagiti nangngegko maipapan kenka,” imbagana, “ngem ita, makitkitakan kadagiti bukodko a mata.” (Job 42:5) Mabalin a nakadalupisak pay laeng ni Job iti kadapuan, ginaddil ti intero a bagina, ken dungdung-awanna ti ipapatay dagiti annakna idi imbagana dagita a sasao. Ngem impasigurado ni Jehova nga ay-ayatenna latta ni Job ken adda kenkuana ti paborna.​—Job 42:7, 8.

16. Sigun iti Isaias 49:15, 16, ania ti masapul a laglagipentayo no maipasangotayo kadagiti suot?

¹⁶ Ita, mabalin met nga insultuendatayo dagiti tattao ken tratuendatayo a kasla awan serserbitayo. Baka padasenda a dadaelen ti reputasiontayo kas indibidual wenno kas maysa nga organisasion ken ‘padpadaksendatayo.’ (Mat. 5:11) Masursurotayo iti pakasaritaan ni Job nga agtalek ni Jehova nga agtalinaedtayo a matalek no maipasangotayo kadagiti suot. Ay-ayatennatayo ni Jehova ken dinanto pulos panawan dagidiay mangin-inanama kenkuana. (Basaen ti Isaias 49:15, 16.) Dimo dengdenggen ti aniaman nga agkakadakes nga ibagbaga dagiti kabusor ti Dios! Ni James, a kabsat a taga-Turkey, ken ti pamiliana ket naipasango  kadagiti nakaro a suot. Imbagana: “Naamirismi a makapaupay ti dumngeg kadagiti kinaulbod maipapan iti ili ti Dios. Isu a nagpokuskami iti namnamatayo iti Pagarian ken nagtultuloykami a naregta nga agserbi ken Jehova. Gapu iti dayta, kanayon a naragsakkami.” Kas ken Job, ni Jehova ti denggentayo! Ti adu a kinaulbod nga iwarwaras dagiti kabusortayo dida mapukaw ti namnamatayo.

17. Ania ti masursurom iti ulidan dagiti matalek a lallaki ken babbai iti Hebreo kapitulo 11?

¹⁷ Maysa laeng ni Job kadagiti adipen ni Jehova a nagtalinaed a nabileg ken napigsa ti pakinakemna idi napasaranna dagiti nakaro a suot. Iti surat ni apostol Pablo kadagiti Hebreo, adu pay ti dinakamatna, ken inawaganna ida kas “dakkel a grupo dagiti saksi a kas iti napuskol nga ulep.” (Heb. 12:1) Nakapasarda amin kadagiti nakaro a suot, ngem nagtalinaedda a matalek ken Jehova iti intero a panagbiagda. (Heb. 11:36-40) Sayang kadi ti panagibtur ken panagsakripisioda? Sigurado a saan! Nupay saanda a pulos nakita ti kaitungpalan ti amin a kari ti Dios idi sibibiagda pay, nagtultuloyda a nanginanama ken Jehova. Ken gapu ta naan-anay a namatida a nagun-odda ti pabor ni Jehova, nagtalekda a makitadanto met laeng ti kaitungpalan dagiti karina. (Heb. 11:4, 5) Ti ulidanda ti mangpabileg iti determinasiontayo nga agtultuloy a manginanama ken Jehova.

18. Ania ti determinasionmo? (Hebreo 11:6)

¹⁸ Ad-addanto pay a dumakes ti lubong a pagbibiagantayo. (2 Tim. 3:13) Saan pay a namingga ni Satanas a mangsuot iti ili ti Dios. Aniaman ti mapasamak iti masanguanan, determinadotayo nga agtrabaho para ken Jehova, ta “agtalektayo iti sibibiag a Dios.” (1 Tim. 4:10) Laglagipentayo no kasano a ni Job ket binendisionan ti Dios. Ebidensia dayta a “ni Jehova ket nadungngo unay ken naasi.” (Sant. 5:11) Agtalinaedtayo met koma a matalek ken Jehova, ta masiguradotayo a gunggonaanna dagidiay “napasnek a mangsapsapul kenkuana.”​—Basaen ti Hebreo 11:6.