1. (a) Ki speransa Jeová da-nu? (b) Kuzê ki ‘spéra na Jeová’ krê fla? (Odja “Más splikason”.)

 JEOVÁ da un speransa bunitu pa tudu kenha ki ta ama-l. Ka ta dura el ta ben kaba ku duénsa, tristéza i mórti. (Apo. 21:3, 4) El ta ben djuda kes ‘mansu’ ki sta ta spéra na el pa el ben bira Téra na un paraízu. (Sal. 37:9-11) I el ta ben djuda kada un di nos ten un amizadi ku el mutu más fórti di ki kel ki nu pode ten gósi. Fórti speransa sábi! Má ki bazi nu ten pa nu kridita ma kes promésa di Deus ta ben kunpri? Jeová sénpri ta kunpri kel ki el promete. Pur isu, nu ten bon motivu pa nu ‘spéra na Jeová’. b (Sal. 27:14) Nu ta mostra kel-li óras ki nu ta spéra ku paxénxa i alegria pa Deus ben kunpri se promésas. — Isa. 55:10, 11.

2. Kuzê ki Jeová dja faze?

² Jeová dja da próvas ma el ta kunpri se promésas. Odja un bon izénplu di kel-li. Na livru di Apocalipse, Jeová promete ma na nos ténpu, el ta ben djuntaba algen di tudu nason, tribu i língua pa sirbi-l di manera unidu. Oji kel grupu spesial li ta txomadu un ‘monti di algen’. (Apo. 7:9, 10) Sikrê kel grupu li ten tudu tipu di ómi, mudjeris i kriansas di Téra interu, es é un família ki ta sta na pas i unidu. (Sal. 133:1; João 10:16) Kes ki ta faze párti di kel monti di algen ta prega ku zelu tanbê. Es sta sénpri prontu pa pâpia di ses speransa di un mundu midjór ku kalker algen ki obi.  (Mat. 28:19, 20; Apo. 14:6, 7; 22:17) Si bu ta faze párti di kel monti di algen, di sertéza bu ta da txeu valor pa bu speransa ma kuzas ta midjora.

3. Kal ki é obijetivu di Satanás?

³ Satanás krê tra-u bu speransa. Se obijetivu é pô-u ta kridita ma Jeová ka ta preokupa ku bo i ma El ka ta kunpri se promésas. Si Satanás konsigi tra-nu nos speransa, nu ta perde koraji i talvês ti nu ta para di sirbi Jeová. Sima nu sta ben odja, Satanás tenta tra Jó se speransa i pô-l ta para di sirbi Jeová.

4. Kuzê ki nu sta ben prende na kel studu li? (Jó 1:9-12)

⁴ Na kel studu li, nu ta ben pâpia di alguns armadilha ki Satanás uza pa tenta obriga Jó dexa di ser lial pa Jeová. (Lé Jó 1:9-12.) Tanbê nu ta ben odja kuzê ki nu pode prende ku izénplu di Jó i pamodi ki nu meste lenbra ma Jeová ta ama-nu i ma el ta ben kunpri Se promésas.

5-6. Kuzê ki kontise ku Jó na poku ténpu?

⁵ Jó tinha un vida sábi. El tinha un bon amizadi ku Jeová. El tinha un família grandi i unidu, i el tinha txeu rikéza. (Jó 1:1-5) Má sô na un dia Jó perde kuazi tudu. Primeru, el perde se rikéza. (Jó 1:13-17) Dipôs tudu se fidjus ki el kreba txeu móre. Pensa un bokadinhu na kel disgrasa li. Un pai ku mai ta fika dizorientadu óras ki un di ses fidju móre. Nton imajina modi ki Jó ku se mudjer fika spantadu, ku dór, i dizusperadu kantu es fika ta sabe ma tudu ses 10 fidju móre. Nu ka ta fika dimiradu ma Jó ratxa se ropa pamodi dór i el kai na txon! — Jó 1:18-20.

⁶ Dipôs Satanás ataka Jó ku un duénsa ki ta poba el ta xinti txeu dór i ki ta daba el vergónha. (Jó 2:6-8; 7:5) Antis di kel-li, pesoas tinha txeu ruspetu pa Jó. Es ta ba pidiba el konsedjus. (Jó 31:18) Má gósi es staba ta ivita-l. El staba el sô. I se irmons, se amigus i ti se npregadus bandona-l! — Jó 19:13, 14, 16.

7. (a) Jó ta atxaba ma el staba ta sufri pamodi kuzê, má kuzê ki el nega faze? (b) Modi ki un algen ki ta sirbi Deus pode pasa pa un prubléma sima di Jó ku se mudjer?

⁷ Satanás krê pa Jó kriditaba ma el staba ta sufri pamodi Jeová staba xatiadu ku el. Pur izénplu, Satanás uza un béntu fórti pa ronba kel kaza na undi ki tudu kes 10 fidju di Jó staba ta kume djuntu. (Jó 1:18, 19) Tanbê el poi lumi ta dixi di séu i kaba ku tudu kes animal di Jó i tanbê kes npregadu ki ta tomaba kónta di es. (Jó 1:16) Dja ki kel béntu i kel lumi ben di séu, Jó pensa ma é Jeová ki manda-s. I pamodi kel-li, Jó ta kriditaba ma Jeová staba xatiadu ku el pamodi algun kuza ki el faze. Má simé, Jó nega maldísua se Pai na Séu. Jó sabia ma duránti monti ténpu el resebe txeu kuza dretu di Jeová. Pur isu, el pensa ma dja ki el setaba kuzas dretu, tanbê el debe setaba kuzas mariadu. El fla: ‘Pa nómi di Jeová kontinua ta ser lovadu.’ (Jó 1:20, 21; 2:10) Nbóra Jó perde se rikéza, se fidjus i se saúdi el  kontinua fiel pa Jeová. Má Satanás ka dizisti.

8. Dipôs, ki armadilha ki Satanás uza kóntra Jó?

⁸ Satanás uza más un armadilha kóntra Jó. El uza três amigu falsu di Jó pa pô-l ta xinti sen valor. Kes ómi li fla Jó ma el staba ta sufri pamodi el faze txeu kuza mariadu. (Jó 22:5-9) Es tenta konvense-l ma sikrê el ka éra un algen mau, kalker sforsu ki el staba ta faze pa agrada Deus ka tinha valor. (Jó 4:18; 22:2, 3; 25:4) Es tenta poi Jó ta pensa ma Deus ka ta amaba el, ma Deus ka ta preokupaba ku el i ma sirbi Deus ka tinha valor. Kes kuza ki es fla pode poba Jó ta pensa ma el staba na un situason ki ka tinha speransa.

9. Kuzê ki djuda Jó ten koraji i forsa?

⁹ Imajina kel-li: Jó sta xintadu na meiu di sinza i ta xinti dór tudu óra. (Jó 2:8) Se amigus falsu sta kontinua ta fla-l ma el ka é un bon algen i ma el ka faze nada ki ten valor. Pa el se prublémas é sima pédras pizadu. I el tene dór na korason pamodi se fidjus ki móre. Na komésu, Jó fika kaladu. (Jó 2:13–3:1) Má si kes três ómi pensa ma fika kaladu éra sinal ma Jó ta bandonaba Jeová, es staba nganadu. Dipôs, talvês Jó labanta kabésa, el djobe kes amigu falsu na róstu i el fla: ‘Ti N móre, N ta mante nha lialdadi!’ (Jó 27:5) Kuzê ki djuda Jó ten txeu koraji i forsa sikrê ku tudu kel sufrimentu? Sikrê na kel momentu más difísil, nunka el ka perde speransa ma Deus ta amaba el i ma el pode kababa ku se sufrimentu. El sabia ma sikrê el moreba, Jeová pode resusitaba el. — Jó 14:13-15.

10. Kuzê ki stória di Jó ta inxina-nu?

¹⁰ Stória di Jó ta inxina-nu ma Satanás ka pode obriga-nu bandona Jeová i ma Jeová sénpri ta da kónta di tudu kuza ki ta kontise ku nos. Kuzê ki kontise ku Jó tanbê pode djuda-nu ntende midjór kuzê ki sta nvolvidu. Odja alguns lison ki nu pode prende ku stória di Jó.

11. Ki sertéza nu pode ten, si nu kontinua ta kunfia na Jeová? (Tiago 4:7)

¹¹ Jó prova ma si nu kontinua ta kunfia na Jeová, nu pode aguenta kalker prubléma i ten bon rezultadu na luta kóntra Satanás. Ki rezultadu é kel-li? Bíblia ta da-nu sertéza ma Satanás ta fuji di nos. — Lé Tiago 4:7.

12. Modi ki speransa di resureison da Jó forsa?

¹² Nu meste ten un fé fórti na speransa di resureison. Sima nu odja na studu ki pasa, Satanás txeu bês ta uza medu di mórti pa tenta pô-nu ta para di sirbi Deus. Na kazu di Jó, Satanás fla ma Jó ta fazeba kalker kuza, ti mésmu para di sirbi Deus, pa salva se vida. Satanás staba eradu. Mésmu kantu Jó pensa ma el staba ta móre, el kontinua fiel pa Jeová. Se kunfiansa na bondadi di Jeová i kel speransa fórti ki el tinha ma Jeová dipôs ta ben rezolveba se prubléma, djuda-l aguenta firmi. Jó tinha fé ma si Jeová ka rezolveba se prubléma timenti el staba bibu, el ta ben fazeba kel-li óras ki el ben resusitaba el na futuru. Speransa di resureison éra un kuza rial pa Jó. Si speransa di resureison é rial pa nos tanbê, nen amiasa di mórti ka ta pô-nu ta bandona Jeová.

13. Pamodi ki nu meste presta atenson na kes armadilha ki Satanás uza kóntra Jó?

¹³ Nu meste presta txeu atenson na kes armadilha ki Satanás uza kóntra Jó pamodi el ta faze mésmu kuza ku nos oji. Odja kuzê ki Satanás fla: ‘Ómi [ka sô Jó] ta da tudu kuza ki el ten pa se vida.’ (Jó 2:4, 5) Na verdadi, Satanás fla ma nu ka ta ama Jeová di korason i ma nu ta bandona-L si nos vida sta na prigu. Satanás tanbê fla ma Deus ka ta ama-nu i ma El ka ta odja sforsu ki nu ta faze pa nu agrada-L. Dja ki nu sabe kuzê ki Satanás ta tenta faze, anos ki ta spéra na Jeová, nu ka ta kridita na mintiras di Satanás.

14. Kuzê ki prublémas pode mostra sobri nos? Da un izénplu.

¹⁴ Pa nos, prublémas debe ser un oportunidadi pa nu prende sobri nos mê. Kes prubléma ki Jó pasa pa el, djuda-l odja alguns fadja ki el tinha i koriji-s. Pur izénplu, el prende ma el meste tinha más umildadi inda. (Jó 42:3) Nos tanbê nu pode prende txeu sobri nos kabésa óras ki nu ta pasa pa prublémas. Un irmon ki txoma Nikolai, c ki podu prézu sikrê ku prublémas gravi di saúdi, fla: “Kadia é sima un mákina di faze xapa, el ta mostra ki kualidadis ki un algen ten.” Óras ki nu odja ki fadjas ki nu ten, nu pode sforsa pa koriji-s.

15. Kenha ki nu debe obi ku el i pamodi?

¹⁵ Nu meste obi ku Jeová, envês di obi ku nos inimigus. Jó presta txeu atenson kantu Jeová pâpia ku el.  Deus faze Jó alguns pergunta pa djuda-l pensa. El fla-l: ‘Bu sta odja nha puder na kuzas ki N faze? N sabe dretu di tudu kuza ki kontise ku bo. Bu ta atxa ma N ka pode kuida di bo?’ Jó responde ku umildadi i el mostra txeu gratidon pa bondadi ki Jeová mostra-l. El fla: ‘Ku nhas obidu N obi ta papiadu di bo, má gósi, N sta ta odja-u ku nhas própi odju.’ (Jó 42:5) Bu ta lenbra na undi ki Jó staba kantu el fla kes kuza li? Inda el staba xintadu na meiu di sinza, ku korpu xeiu di frida i tristi pamodi se fidjus móre. Ma simé, Jeová prova se amor pa Jó i El garanti-l ma El staba kontenti ku el. — Jó 42:7, 8.

16. Sima sta na Isaías 49:15, 16, kuzê ki nu debe lenbra di el óras ki nu ta pasa pa prublémas?

¹⁶ Oji tanbê algen pode insulta-nu i trata-nu sima si nu ka ten valor. Es pode ‘konta mintira i fla tudu tipu di kuzas mariadu kóntra’ nos pa tenta suja nos nómi i nómi di nos organizason. (Mat. 5:11) Stória di Jó ta inxina-nu ma Jeová ta kunfia ma nu ta kontinua lial pa el óras ki nu sta pasa pa prubléma. Jeová ta ama-nu i nunka el ka ta bandona kes ki ta spéra na el. (Lé Isaías 49:15, 16.) Ka bu presta atenson na ninhun mintira ki inimigus di Deus ta konta! Tiagu, ki é un irmon di Turkia ki se família pasa pa prublémas gravi, fla: “Nu da kónta ma  obi mintiras sobri povu di Deus ta dizanimaba nos. Pur isu, nu konsentra na nos speransa di Reinu i nu kontinua na nos trabadju pa Jeová i kel-li djuda-nu kontinua ku nos alegria.” Sima Jó, nu ta obi ku Jeová! Kes mintira di nos inimigus ka ta kaba ku nos speransa.

17. Kuzê ki bu ta prende ku izénplu di kes ómi ku mudjeris fiel ki Hebreus kapítlu 11 ta pâpia di el?

¹⁷ Jó é un di kes sérvu di Jeová ki kontinua ku koraji i forsa kantu el pasa pa prublémas gravi. Na karta ki apóstlu Polu skrebe pa ebreus, el pâpia di txeu otus sérvu di Jeová ki el txoma di ‘txeu tistimunha sima núven’. (Heb. 12:1) Tudu es pasa pa prublémas gravi. Má duránti ses vida es kontinua fiel pa Jeová. (Heb. 11:36-40) Foi atoa ki es aguenta firmi i ki es sforsa? Klaru ki nau! Nbóra duránti ses vida es ka odja tudu promésas di Deus ta kunpri, es kontinua ta spéra na Jeová. I dja ki es tinha sertéza ma Jeová staba kontenti ku es, es tinha kunfiansa ma es ta ben odjaba kes promésa ta kunpri. (Heb. 11:4, 5) Ses izénplu pode djuda-nu sta disididu na kontinua ta spéra na Jeová.

18. Kuzê ki bu sta disididu na faze? (Hebreus 11:6)

¹⁸ Nu sta vive na un mundu ki sta piora kada bês más. (2 Tim. 3:13) Satanás inda ka para di poi povu di Deus na próva. Ka ta nporta ki prubléma nu pasa pa el, nu debe sta disididu na trabadja duru pa Jeová, ku sertéza ma ‘nu poi nos speransa na un Deus bibu.’ (1 Tim. 4:10) Lenbra ma kel ki Deus ben faze na fin pa Jó prova ‘ma Jeová ten grandi konpaxon i el é mizerikordiozu.’ (Tia. 5:11) Sima Jó, nu debe kontinua lial pa Jeová, ku sertéza ma el ta ben rekonpensa ‘kes ki ta djobe-l asériu.’ — Lé Hebreus 11:6.