NAʼLEBʼ RE TZOLOK 27
«Kʼojkʼooq aawaanm rikʼin li Qaawaʼ» Jehobʼa
«Kʼojkʼooq aawaanm rikʼin li Qaawaʼ, kawaq aachʼool ut chatkuyuq» (SAL. 27:14).
BʼICH 142 Qachapaq qibʼ rikʼin li qoybʼenihom
RUʼUJIL LI TZOLOM *
1. a) Kʼaru naxye qe li Jehobʼa naq tixbʼaanu? b) Chanru naqakʼutbʼesi naq naqakʼojobʼ qachʼool rikʼin li Jehobʼa? (Chaawil li xyaalal).
CHIQAJUNILO li nokoorahok re li Jehobʼa naxye qe naq chi seebʼ trisi li yajel, li rahil chʼoolej ut li kamk (Apoc. 21:3, 4). Tixtenqʼahebʼ li nekeʼxkʼojobʼ xchʼool rikʼin re xchaabʼilobʼresinkil li Ruuchichʼochʼ (Sal. 37:9-11). Tixbʼaanu ajwiʼ naq tooruuq chi wank saʼ amiiwil rikʼin anaqwan, abʼan chaabʼil wiʼ chik saʼ li kutan chalk re. Chʼinaʼus aʼin! Abʼan, kʼaʼut chʼolchʼo chiqu naq ttzʼaqloq ru li naxyeechiʼi qe li Yos? Xbʼaan naq junelik naxbʼaanu li naxye. Wank xyaalal naq tqakʼojobʼ qachʼool rikʼin li Jehobʼa (Sal. 27:14). * Ut, chanru naqakʼutbʼesi naq naqakʼojobʼ qachʼool rikʼin? Wi sa saʼ qachʼool chi roybʼeninkil naq ttzʼaqloq ru li naxyeechiʼi qe (Is. 55:10, 11).
2. Kʼaru ak kixbʼaanu li Jehobʼa?
2 Li Jehobʼa ak kixkʼutbʼesi naq naxbʼaanu li naxyeechiʼi. Qilaq jun chaabʼil eetalil. Saʼ li hu Apocalipsis, li Jehobʼa kixye naq saʼebʼ li qakutan tixchʼutubʼ ebʼ li kristiʼaan li jalan jalanq xtenamit, xteep ut raatinobʼaal re naq teʼxloqʼoni ru saʼ junajil. Li chʼuut aʼin nakʼabʼaʼiik joʼ «xkʼihalebʼ li tenamit» (Apoc. 7:9, 10). Usta saʼ li chʼuut aʼin wankebʼ winq, ixq ut kokʼal li chalenaqebʼ saʼ chixjunil li Ruuchichʼochʼ, wankebʼ saʼ junajil joʼ junkabʼal (Sal. 133:1; Juan 10:16). Joʼkan ajwiʼ, chi anchalebʼ xchʼool nekeʼxkʼe resil li chaabʼil esilal, junelik nekeʼraj aatinak chirix chanru tchaabʼiloʼq li ruuchichʼochʼ, rikʼinebʼ li nekeʼraj abʼink (Mat. 28:19, 20; Apoc. 14:6, 7; 22:17). Wi wankat saʼ xyanq li kʼiila tenamit aʼin, chʼolchʼo naq oxloqʼ chaawu li oybʼenihom aʼin.
3. Kʼaru naraj xbʼaanunkil laj Tza?
3 Laj Tza naraj xmaqʼbʼal chiqu li qoybʼenihom. Naraj naq tqakʼoxla naq li Jehobʼa inkʼaʼ naxkʼe xchʼool chiqix ut naq inkʼaʼ tixbʼaanu li naxye. Wi laj Tza truuq xbʼaanunkil aʼin, moko kawaq ta chik li qachʼool ut naru tqakanabʼ kʼanjelak chiru li Jehobʼa. Joʼ tqil, laj Tza kixyal xmaqʼbʼal li roybʼenihom laj Job re naq inkʼaʼ chik tixloqʼoni ru li Jehobʼa.
4. Kʼaru tqatzʼil rix saʼ li tzolom aʼin? (Job 1:9-12).
4 Saʼ li tzolom aʼin tqatzʼil rix li raʼal li kiroksi laj Tza re naq laj Job tixqʼet ribʼ chiru li Jehobʼa (taayaabʼasi Job 1:9-12). Tqil ajwiʼ li naqatzol rikʼin laj Job ut kʼaʼut aajel ru xjultikankil naq li Jehobʼa nokooxra ut naq tixbʼaanu li naxye.
LAJ TZA KIRAJ NAQ LAJ JOB TIXQʼET RIBʼ CHIRU LI JEHOBʼA
5, 6. Chanru kijalaak li xyuʼam laj Job?
5 Chaabʼil chaq li xyuʼam laj Job xbʼaan naq wank choʼq ramiiw li Jehobʼa, nim li xjunkabʼal ut wank saʼ junajil, ut qʼaxal bʼihom (Job 1:1-5). Abʼan, chiru jun kutan jayeʼq chik ma kikanaak chi maakʼaʼ kʼaru re. Xbʼeenwa kikanaak saʼ nebʼaʼil (Job 1:13-17). Moqon keʼkamk chixjunil li ralal xkʼajol, li raarokebʼ chaq xbʼaan. Qakʼoxlaq li rahilal li kixkʼul. Naq nakamk junaq li alal kʼajolbʼej, qʼaxal narahoʼk saʼ xchʼool li naʼbʼej yuwaʼbʼej; qakʼoxlaq rix li rahil chʼoolejil li kirekʼa laj Job ut li rixaqil naq xeʼrabʼi naq keʼkamk li 10 chi ralal. Joʼkan peʼ naq laj Job kixqʼich li raqʼ ut kitʼaneʼk chiru chʼochʼ! (Job 1:18-20).
6 Moqon chik, laj Tza kixkʼe xyajel laj Job ut kixrahobʼtesi xchʼool (Job 2:6-8; 7:5). Li kristiʼaan nekeʼroxloqʼi chaq laj Job, ut nekeʼxpatzʼ chaq xnaʼlebʼebʼ re (Job 31:18). Abʼan maajewanbʼil chik xbʼaanebʼ li ras ut ebʼ li riitzʼin, ebʼ li ramiiw ut ebʼ li xmoos (Job 19:13, 14, 16).
Naabʼalebʼ laj paabʼanel anaqwan nekeʼxtaw ru chiʼus li kixkʼul laj Job. (Chaawil li raqal 7). *
7. a) Ani kixkʼoxla laj Job naq kikʼehok re li rahilal saʼ xbʼeen, ut kʼaru inkʼaʼ kixbʼaanu? b) Kʼaru li rahilal naru tixkʼul junaq laj paabʼanel? (Chaawil li jalam u re li raqal 7).
7 Laj Tza kiraj naq laj Job tixkʼoxla naq yook xkʼulbʼal li rahilal xbʼaan naq moko sa ta chik saʼ xchʼool li Jehobʼa rikʼin. Joʼkan naq, laj Tza kiroksi jun li kawil iqʼ re naq ttʼaneʼq li ochoch bʼarwiʼ yookebʼ chi ninqʼehik li 10 chi ralal (Job 1:18, 19). Kixbʼaanu ajwiʼ naq ttʼaneʼq chaq xaml saʼ choxa re xkamsinkil li xketomq ut ebʼ li xmoos (Job 1:16). Chʼolchʼo ru naq li iqʼ ut li xaml aʼin wank ani kikʼamok chaq re. Joʼkan naq laj Job kixye naq li Jehobʼa kitaqlank chaq re, ut kixkʼoxla naq wank kʼaru inkʼaʼ us kixbʼaanu chiru li Jehobʼa. Usta joʼkan kixkʼul, maajunwa kixmaajewa li Jehobʼa. Kixkʼoxla bʼan naq chixjunil li kʼaru wank re chalenaq rikʼin li Jehobʼa ut tento ajwiʼ tixkʼulubʼa chixjunil li rahilal li tchalq saʼ xbʼeen. Joʼkan naq kixye: «Usilaatinanbʼil taxaq xkʼabʼaʼ li Qaawaʼ!» Jehobʼa (Job 1:20, 21; 2:10). Usta maakʼaʼ chik li xbʼihomal, li xkawilal xchʼool ut li xjunxaqalil, maajunwa kixtzʼeqtaana li Jehobʼa. Abʼan laj Tza inkʼaʼ tixkanabʼ xyalbʼal rix.
8. Kʼaru chik li raʼal kiroksi laj Tza rikʼin laj Job?
8 Laj Tza kiroksi jun chik li raʼal re xrahobʼtesinkil laj Job. Kiroksi oxibʼ li winq li keʼxkʼe ribʼ choʼq ramiiw re naq tixkʼoxla naq maakʼaʼ naʼok wiʼ. Xeʼxye re laj Job naq yook xkʼulbʼal li rahilal xbʼaan naq kixbʼaanu naabʼal li maaʼusilal (Job 22:5-9). Keʼraj ajwiʼ xyeebʼal re, naq inkʼaʼ truuq xsahobʼresinkil xchʼool li Yos usta inkʼaʼ kixbʼaanu aʼin (Job 4:18; 22:2, 3; 25:4). Xeʼraj naq tixkʼoxla naq inkʼaʼ naraheʼk xbʼaan li Yos, inkʼaʼ t-ileʼq ut naq maakʼaʼ aj e naq tixloqʼoni ru. Li xeʼxye maare kixbʼaanu naq laj Job tixkʼoxla naq maakʼaʼ chik truuq xbʼaanunkil.
9. Kʼaru kitenqʼank re laj Job re naq inkʼaʼ txuwaq ut kawaq xchʼool?
9 Qakʼoxlaq li yook chi kʼulmank. Laj Job chunchu saʼ li cha, ut kʼajoʼ li xrahilal (Job 2:8). Ebʼ li ramiiw inkʼaʼ nekeʼxkanabʼ xrahobʼtesinkil xchʼool ut xtzʼajninkil li xkʼabʼaʼ. Joʼkan naq, qʼaxal ra kirekʼa ribʼ laj Job, ut li xkamikebʼ li ralal xkʼajol naxyotʼ li raanm. Maakʼaʼ kixye saʼ xtiklajik (Job 2:13–3:1). Saʼ xkʼabʼaʼ aʼin, ebʼ li ramiiw xeʼxkʼoxla tana naq tixtzʼeqtaana li Jehobʼa, abʼan moko joʼkan ta. Xwulak xhoonalil naq laj Job kixkaʼya ebʼ li ramiiw ut kixye rehebʼ: «Chalen toj saʼ linkamik inkʼaʼ tinkʼulubʼan li nekeye» (Job 27:5). Kʼaru kitenqʼank re laj Job re naq inkʼaʼ txuwaq ut kawaq xchʼool usta wank saʼ rahilal? Xbʼaan naq kʼojkʼo xchʼool naq li Jehobʼa maajunwa tixkanabʼ xjunes. Naxnaw ajwiʼ, naq wi tkamq, li Jehobʼa tixwaklesi wiʼ chik chi yoʼyo (Job 14:13-15).
CHANRU TOORUUQ XKʼAMBʼAL QE RIKʼIN LAJ JOB?
10. Kʼaru naqatzol chirix laj Job?
10 Li kixkʼul laj Job naxkʼut chiqu naq laj Tza inkʼaʼ naru xminbʼal qu re naq tqatzʼeqtaana li Jehobʼa ut naq li Jehobʼa naxnaw chixjunil li naqakʼul. Li reetalil laj Job naxkʼut chiqu jalan chik li naʼlebʼ. Anaqwan qilaq wiibʼ oxibʼ rehebʼ aʼin.
11. Kʼaru chʼolchʼooq chiqu wi kʼojkʼo qachʼool rikʼin li Jehobʼa? (Santiago 4:7).
11 Laj Job kixkʼut naq, wi kʼojkʼooq qachʼool rikʼin li Jehobʼa, tooruuq xkuybʼal yalaq kʼaru chi aaleek ut xtzʼeqtaanankil laj Tza. Ut, kʼaru rusilal naxkʼam chaq aʼin? Li Santil Hu naxye naq laj Tza t-eleliq chiqu (taayaabʼasi Santiago 4:7).
12. Chanru kikawresiik xchʼool laj Job naq ebʼ li kamenaq teʼwakliiq wiʼ chik chi yoʼyo?
12 Tento naq chʼolchʼooq chiqu naq ebʼ li kamenaq teʼwakliiq wiʼ chik chi yoʼyo. Joʼ xqil saʼ li tzolom rubʼelaj, laj Tza naraj naq tqaxuwa li kamk re naq tqatzʼeqtaana li Jehobʼa. Qakʼoxlaq li kixkʼul laj Job. Laj Tza kixye naq tixtzʼeqtaana li Jehobʼa ut tixbʼaanu yalaq kʼaru re xkolbʼal li xyuʼam joʼ ajwiʼ xkanabʼankil li Jehobʼa. Abʼan moko joʼkan ta! Usta ra li yook xkʼulbʼal malaj kixkʼoxla naq tkamq, laj Job maajunwa kixtzʼeqtaana li Jehobʼa. Ut, chanru kixkuy chixjunil aʼin? Xbʼaan naq kʼojkʼo xchʼool naq chaabʼil xnaʼlebʼ li Jehobʼa ut naxpaabʼ naq saʼ jun kutan tixtuqubʼ ru li xchʼaʼajkilal. Naxpaabʼ naq, usta inkʼaʼ ttenqʼaaq naq yoʼyo, naxnaw naq saʼ li kutan chalk re li Jehobʼa tixwaklesi wiʼ chik chi yoʼyo. Chʼolchʼo chiru laj Job naq ebʼ li kamenaq teʼwakliiq wiʼ chik chi yoʼyo. Ut wi naqapaabʼ ajwiʼ aʼin, junelik tiikaq qachʼool chiru li Jehobʼa usta teʼxye naq tooʼeʼxkamsi.
13. Kʼaʼut naq aajel ru naq tqakʼe reetal li raʼal li kiroksi laj Tza rikʼin laj Job?
13 Qakʼehaq reetal li raʼal li kiroksi laj Tza rikʼin laj Job, xbʼaan naq aʼan ajwiʼ naroksi saʼebʼ li qakutan. Qilaq chanru kiqʼabʼaak laj Job xbʼaan laj Tza joʼ ajwiʼ chixjunil li kristiʼaan. Kixye: «Li winq kawal wank chi xqʼaxtesinkil chixjunil, re xkolbʼal li xyuʼam» (Job 2:4, 5). Laj Tza kiraj xyeebʼal naq moko yaal ta naq naqara li Jehobʼa, ut wi wank saʼ xiwxiwal li qayuʼam, tqatzʼeqtaana. Naxye ajwiʼ naq li Jehobʼa inkʼaʼ nokooxra ut naq moko oxloqʼ ta chiru li naqabʼaanu. Abʼan, wi naqakʼojobʼ qachʼool rikʼin li Jehobʼa, laj Tza maajunwa tooxbʼalaqʼi xbʼaan naq naqanaw li raʼal li naroksi.
14. Kʼaru naʼelk chi kutankil naq naqanumsi junaq li rahilal, ut kʼaru li eetalil nokooxtenqʼa chi xtawbʼal ru aʼin?
14 Ebʼ li aaleek naru nokooʼeʼxtenqʼa re rilbʼal chanru li qanaʼlebʼ. Li kixkʼul laj Job kitenqʼank re chi xkʼebʼal reetal naq wank kʼaru tixjal joʼ xkubʼsinkil ribʼ (Job 42:3). Laaʼo ajwiʼ naru naqakʼe reetal naq tento tqachaabʼilobʼresi li qanaʼlebʼ naq naqakʼul junaq li rahilal. Aʼin kixkʼul laj Nikolái, * li xeʼxkʼe saʼ tzʼalam usta yaj. Aʼan naxye: «Linwanjik saʼ li tzʼalam xinxtenqʼa chi xkʼebʼal reetal naq toj wank kʼaru tento tinjal». Naq naqakʼe reetal bʼar nokoopaltoʼk, naru naqachaabʼilobʼresi.
15. Ani tento tqabʼi, ut kʼaʼut?
15 Tento tqabʼi li naxye li Jehobʼa, maawaʼ ebʼ li xikʼ nekeʼilok qe. Laj Job kixkʼe xchʼool chi abʼink naq li Jehobʼa kiʼaatinak rikʼin. Re xkʼebʼal chi naʼlebʼak, li Jehobʼa kixye: «Ma nakaakʼe reetal linwankilal rikʼin li xinyobʼtesi? Kutan saqenk chiwu chixjunil li yookat xkʼulbʼal. Ma nakaakʼoxla naq inkʼaʼ tinruuq aawilbʼal?». Laj Job kixkubʼsi xwankil ut kixbʼanyoxi re li Jehobʼa, naq kixye: «Junxil xinnaw kaʼajwiʼ li kʼaru xeʼxye chawix; abʼan anaqwan xwil aawu» (Job 42:5). Joqʼe kixye aʼin laj Job?, maare naq chunchu saʼ li cha, numtajenaq xox chirix ut yook xyaabʼankil rix li xkamikebʼ li ralal xkʼajol. Usta yook xnumsinkil aʼin, li Jehobʼa kixye re, naq naxra ut sa saʼ xchʼool rikʼin (Job 42:7, 8).
16. Joʼ naxye Isaías 49:15, 16, kʼaru wanq saʼ qachʼool naq tqanumsi li rahilal?
16 Saʼebʼ li qakutan maare ebʼ li kristiʼaan tooʼeʼxhobʼ ut teʼxkʼutbʼesi naq maakʼaʼ nokooʼok wiʼ. Maare teʼraj xtzʼajninkil li qakʼabʼaʼ joʼ ajwiʼ li qamolam ut «teʼxye chixjunil li tikʼtiʼ» chiqix (Mat. 5:11). Li kixkʼul laj Job naxkʼut naq li Jehobʼa naxnaw naq tiikaq qachʼool chiru naq tqanumsi li rahilal. Li Jehobʼa nokooxra ut maajunwa tixkanabʼ ebʼ li nekeʼxkʼojobʼ xchʼool rikʼin (taayaabʼasi Isaías 49:15, 16). Miqapaabʼ li tikʼtiʼ li nekeʼxye li xikʼ nekeʼilok re li Yos. Qilaq li kixye laj James, li wank Turquía, li kixnumsi naabʼal li chʼaʼajkilal rochbʼen li xjunkabʼal. Aʼan naxye: «Wi naqakʼe saʼ qachʼool li tikʼtiʼ li nekeʼxye chirix li xtenamit li Jehobʼa, tchʼinaaq qachʼool. Joʼkan naq xqakʼe qachʼool chirix li Xʼawabʼejilal li Yos ut li puktesink, chi joʼkan maajunwa kichʼinaak qachʼool». Qakʼamaq qe rikʼin laj Job ut qabʼihaq li Jehobʼa. Chi joʼkan, li tikʼtiʼ li nekeʼxye li xikʼ nekeʼilok re li Jehobʼa inkʼaʼ tixchʼina qachʼool chirix li naqoybʼeni!
LI QOYBʼENIHOM TOOXTENQʼA RE NAQ WANQ QAKUYUM
Laj Job kixkʼul naabʼal li osobʼtesihom xbʼaan naq tiik xchʼool. Ut keʼosobʼtesiik xbʼaan li Jehobʼa re naq sahaqebʼ saʼ xchʼool. (Chaawil li raqal 17). *
17. Kʼaru naqatzol rikʼinebʼ li ixq ut winq, li naʼaatinak wiʼ li tasal 11 re Hebreos?
17 Moko kaʼaj tawiʼ laj Job kaw xchʼool ut inkʼaʼ kixuwak naq kixnumsi ebʼ li chʼaʼajkilal. Saʼ li esilhu li kixtzʼiibʼa li apóstol Pablo choʼq rehebʼ laj hebreo, naq kiʼaatinak chirix naabʼalebʼ chik laj kʼanjel chiru li Jehobʼa, kixye naq kʼajoʼ «xkʼihalebʼ laj chʼolobʼahom yaal» (Heb. 12:1). Usta xeʼxkʼul naabʼal li chʼaʼajkilal, junelik tiikebʼ chaq xchʼool chiru li Jehobʼa (Heb. 11:36-40). Joʼkan naq, ma xeʼxtaw rusilal naq xeʼxyal xqʼe chi xnumsinkil aʼin? Joʼkan tzʼaqal. Usta inkʼaʼ xeʼril chanru kitzʼaqlok ru chixjunil li kixyeechiʼi li Yos, abʼan keʼxkʼojobʼ chaq xchʼool rikʼin. Nekeʼxnaw naq li Jehobʼa naxkʼulubʼa li xkʼanjelebʼ, joʼkan naq chʼolchʼo chiruhebʼ naq ttzʼaqloq ru chixjunil li naxyeechiʼi (Heb. 11:4, 5). Xkʼoxlankil rix aʼin nokooxtenqʼa re naq junelik kʼojkʼooq qachʼool rikʼin li Jehobʼa.
18. Kʼaru tento raj tqabʼaanu maakʼaʼ naxye li tqakʼul? (Hebreos 11:6).
18 Qʼaxal yook chi numtaak li maaʼusilal saʼ xbʼeen li Ruuchichʼochʼ (2 Tim. 3:13). Ut laj Tza toj yook xyalbʼal rixebʼ laj kʼanjel chiru li Yos. Maakʼaʼ naxye kʼaru tqakʼul, miqakanabʼ kʼanjelak chiru li Jehobʼa chi anchal qachʼool, xbʼaan naq «wank qasahil oybʼenihom rikʼin li yoʼyookil Yos» (1 Tim. 4:10). Qajultikaq naq li kixkʼul laj Job naxkʼut naq «li Qaawaʼ aʼan aj toqʼobʼanel u ut aj uxtaan» (Sant. 5:11). Joʼ laj Job, junelik tiikaq qachʼool chiru li Jehobʼa, chʼolchʼooq chiqu naq aʼan trosobʼtesi ebʼ «li nekeʼsikʼok re» (taayaabʼasi Hebreos 11:6).
BʼICH 150 Li Yos aʼan aj Kolonel
^ Naq naqakʼoxla jun li qas qiitzʼin li kixnumsi li rahilal, maare nachalk saʼ qachʼool laj Job, li tiik chaq xchʼool chiru li Jehobʼa. Kʼaru naqatzol rikʼin li kixkʼul? Naq laj Tza inkʼaʼ truuq xminbʼal qu re xtzʼeqtaanankil li Jehobʼa. Naqatzol ajwiʼ naq li Jehobʼa naxkʼe reetal chixjunil li naqakʼul. Tqil ajwiʼ chanru li Jehobʼa kirisi li xrahilal laj Job, ut joʼkan ajwiʼ tixbʼaanu qikʼin. Wi naqakʼutbʼesi rikʼin li qabʼaanuhom naq chʼolchʼo chiqu aʼin, naru naqaye naq naqakʼojobʼ qachʼool rikʼin li Jehobʼa.
^ XNIMAL RU NAʼLEBʼ: Li aatin «kʼojkʼooq qachʼool rikʼin» saʼ li aatinobʼaal hebreo naraj xyeebʼal roybʼeninkil junaq li naʼlebʼ chi anchal qachʼool ut xkʼojobʼankil qachʼool rikʼin anihaq (Sal. 25:2, 3; 62:6).
^ Xjalmank wiibʼ oxibʼ li kʼabʼaʼej.
