1. (a) Jehova okwe tu pa eteelelo lilipi? (b) Osha hala okutya ngahelipi ‘okuteelela kOmwene’? (Tala “Outumbulilo wa yelifwa.”)

 JEHOVA okwa pa aveshe ovo ve mu hole eteelelo litunhula. Mafiku ota ka xulifa po omikifi, oluhodi nosho yo efyo. (Eh. 21:3, 4) Ota ka kwafela “ovananheni,” ile tu tye ovalininipiki ovo hava teelele kuye, opo va ninge edu oparadisa. (Eps. 37:9-11) Ote ke shi ningifa yo tashi shiiva kukeshe umwe womufye a kale nekwatafano lopofingo naye, olo tali ka kala la denga mbada li dule nokuli olo hatu hafele paife. Olo itali ka kala tuu eteelelo la denga mbada! Ndele omolwashike hatu dulu okwiitavela kutya omaudaneko aKalunga otaa ka wanifwa shili? Jehova oha wanifa po alushe omaudaneko aye. Otu na etomheno la femba lokukala twa “teelela kOmwene.” * (Eps. 27:14) Ohatu dulu oku shi ulika mokukala twa teelela nelididimiko nosho yo nehafo kuKalunga ketu a wanife po omaudaneko aye.​— Jes. 55:10, 11.

2. Oshike osho Jehova a ninga nale?

² Jehova okwa ulika nale kutya oha wanifa po omaudaneko aye. Diladila koshihopaenenwa shimwe sha tongomana. Jehova okwa udaneka membo lEhololo kutya pefimbo letu ota ka hanganifa ovanhu va dja moiwana, momihoko nomomalaka aeshe, notave ke mu longela melongelokalunga la koshoka. Kunena, ongudu yovanhu oyo ididilikwedi ohai ifanwa “ongudu inene.” (Eh. 7:9, 10) Nonande oya fikama po movalumenhu, movakainhu nosho yo mounona va dja momihoko di lili noku lili, ove li oukwaneumbo umwe wa hangana. (Eps. 133:1; Joh. 10:16) Aveshe ovo vongudu inene ohava udifa yo nouladi. Ohava kala ve lilongekida alushe okuudifila keshe oo ta pwilikine kuvo eteelelo lavo li na sha nounyuni mupe. (Mat. 28:19, 20; Eh. 14: 6, 7; 22:17) Ngeenge ou li umwe womongudu oyo inene, osha yela kutya ou na eteelelo loinima iwa nowe i tala ko i na ondilo.

3. Satana oku na elalakano lilipi?

³ Ondiaboli inai hala u kale u na eteelelo li na sha nonakwiiwa. Oya hala u itavele kutya Jehova ke na ko nasha naave nonokutya ita ka wanifa po omaudaneko aye. Ngeenge Satana okwa pondola oku tu kanififa eteelelo letu, ohatu ka teka omukumo notashi dulika nokuli tu ka efe po okulongela Jehova. Ngaashi hatu ke shi mona, Ondiaboli oya li ya kendabala okuningifa Job a kale ehe na eteelelo noku mu efifa po okulongela Jehova.

4. Oshike hatu ka kundafana moshitukulwa eshi? (Job 1:9-12)

⁴ Moshitukulwa eshi, ohatu ka kundafana eemwiyo odo Satana a li a longifa, opo a teye po oudiinini waJob. (Lesha Job 1:9-12.) Ohatu ka kundafana yo osho hatu lihongo koshihopaenenwa shaJob, nonokutya omolwashike twa pumbwa okudimbuluka kutya Kalunga oku tu hole nota ka wanifa po omaudaneko aye.

5-6. Oshike sha li sha ningilwa Job moule wefimbo lixupi?

⁵ Onghalamwenyo yaJob oya li tai ende nawa. Okwa li ta hafele ekwatafano lopofingo naJehova. Okwa li e na oukwaneumbo wa kula, wa hangana nokwa li oshipuna. (Job 1:1-5) Ndele moule ashike wefiku limwe, Job okwa li a kanifa konyala keshe shimwe. Tete okwa li a kanifa oimuna yaye. (Job 1:13-17) Opo nee okwa li a filwa ovana vaye aveshe. Diladila ashike oule wokafimbo koshiningwanima sha tya ngaho. Ovadali ohava kala va wililwa po neenghono, ngeenge va filwa kamwe komounona vavo. Paife diladila koluhodi nosho yo koudjuu oo Job nosho yo omukulukadi waye va li ve udite, eshi va uda kutya ovana vavo aveshe omulongo ova fya. Naasho itashi kumwifa eshi Job a li a pombola oikutu yaye, eshi ta lili nokwa li a ongotela pedu. ​— Job 1:18-20.

⁶ Satana okwa li yo a etela Job omukifi unyanyalifi nou fifa ohoni. (Job 2:6-8; 7:5) Pomhito imwe, Job okwa li a fimanekwa neenghono kovanhu vomomudingonoko wavo. Ovanhu ova li have uya okupula omayele kuye. (Job 31:18) Ashike paife ova li have mu henuka. Okwa li a talwa ko e li omunhu wongaho, a tondwa kovamwaxe, kookaume kaye nokuli nokovapiya vaye, ovo hava di meumbo laye.​— Job 19:13, 14, 16.

7. (a) Job okwa li ta diladila kutya oupyakadi waye otau dilile kulyelye, ndele okwa li a dika eenyala medu aha ninge shike? (b) Ongahelipi Ovakriste tava dulu okutaalela omayeleko ngaashi oo a ulikwa mefano?

⁷ Satana okwa li a hala Job a itavele kutya ota mono oixuna, molwaashi ina hokiwa vali kuJehova. Pashihopaenenwa, Satana okwa longifa oshikungulu shomhepo shi teye po eumbo omo mwa li ounona omulongo aveshe vaJob tava li pamwe. (Job 1:18, 19) Okwa li yo a etifa omundilo okudja keulu u hanaune po oimuna yaJob nosho yo ovapiya vaye, ovo va li tave i lifa. (Job 1:16) Molwaashi omhepo nosho yo omundilo owa li wa dja keulu, Job okwa li a fika pexulifodiladilo kutya owa dja kuJehova. Osho osha li sha ningifa Job a itavele kutya otashi dulika a nyemateka Jehova monghedi yonhumba, ile yongadi. Ashike nande ongaho, Job okwa li a dika eenyala medu aha tuke Xe womeulu. Okwa li e shii kutya okwa kala ta pewa oinima ihapu iwa kuJehova momukokomoko womido. Okwa li ta tomhafana kutya oku na okutambula ko owii nehalo liwa, ngaashi ashike a li a tambula ko nehafo oinima iwa. Onghee hano, okwa ti: “Edina lOmwene nali  hambelelwe!” (Job 1:20, 21; 2:10) Nonande Job okwa li a kanifa oupuna waye, ovana nosho yo oukolele waye okwa kala omudiinini kuJehova. Ndele Satana hapo a li a xulila opo.

8. Satana okwa li vali a longifa omwiyo ulipi, opo a yeleke Job?

⁸ Satana okwa li yo a longifa vali omwiyo mukwao, opo a yeleke Job. Okwa li a longifa ookaume vatatu ovanaipupulu vaJob, opo ve mu ningife a kale e udite ehe na oshilonga. Ovalumenhu ovo ova ti kutya Job ota mono oixuna, molwaashi okwa nyona omanyono mahapu. (Job 22:5-9) Ova li yo va kendabala oku mu tomha kutya nonande ngeno ka li omukolokoshi, eenghendabala daye adishe dokuhafifa Jehova odongaho elela. (Job 4:18; 22:2, 3; 25:4) Ova li tava kendabala okweetela Job omalimbililo kutya Kalunga ke mu hole, ite ke mu fila oshisho nonokutya okulongela kwaye Kalunga okwongaho. Eendjovo davo oda li tadi dulu okuningifa Job aha kale e na eteelelo.

9. Oshike sha kwafela Job a kale e na ouladi nokukala a pama?

⁹ Kala nee ngeno wa fa u wete oshiningwanima eshi. Job e li omutumba momute noku li mouyahame itau nuwa omeva. (Job 2:8) Ookaume kaye ova li va twikila okupopya kutya ke fi omunhu muwa noke na osho a longa sha fimana. Okwa li a wililwa po komayeleko aye nokwa li a nyika oluhodi, omolwefyo lounona vaye. Potete Job okwa kala a mwena. (Job 2:13–3:1) Ngeenge ookaume kaJob ova li va fika pexulifodiladilo kutya eshi a mwena ota ka efa po Omushiti waye, ova li va puka filufilu. Pomhito imwe, Job otashi dulika a li a yelula omutwe waye ta tale kookaume kaye ovo ovanaipupulu ta ti: ‘Fiyo handi ka fuda mo omufudo wange, itandi ekeleshi ouyuki wange.’ (Job 27:5) Oshike sha kwafela Job a kale e na ouladi nokwa pama, nonande okwa li ta mono oixuna? Job ka li a kanifa eteelelo. Naashi a li a teka omukumo okwa li e shii kutya efiku limwe  Kalunga kaye omunahole ota ka xulifa po okumona oixuna akushe. Okwa li e shii kutya nonande oku fye, Jehova ote ke mu nyumuna.​— Job 14:13-15.

10. Ehokololo laJob otali tu hongo shike?

¹⁰ Ehokololo laJob otali tu hongo kutya Satana ita dulu oku tu fininika tu efe po okulongela Jehova, nonokutya Jehova oku shii eenghalo adishe. Oshimoniwa shaJob otashi tu kwafele yo tu ude ko nawa osho sha kwatelwa mo. Natu ka kundafaneni oilihongomwa imwe yokondadalunde oyo hatu lihongo kuJob.

11. Ngeenge otwa twikile okukala twe lineekela muJehova, ohatu ka kala noushili ulipi? (Jakob 4:7)

¹¹ Job okwa ulika kutya ngeenge otwa twikile okukala twe lineekela muJehova, ohatu ka dula okulididimikila eyeleko keshe nohatu ka kondjifa Satana nomupondo. Osho otashi ka eta oidjemo ilipi? Omishangwa ode tu shilipaleka kutya Ondiaboli otai ke tu ya onhapo. ​— Lesha Jakob 4:7.

12. Eteelelo li na sha nenyumuko ola pameka ngahelipi Job?

¹² Otwa pumbwa okukala tu na eitavelo la pama li na sha neteelelo lenyumuko. Ngaashi sha tumbulwa moshitukulwa sha dja ko, luhapu Satana oha longifa oumbada wokutila efyo, opo e tu ningife tuha kale ovadiinini kuJehova. Satana okwa popya kutya Job ota ka ninga keshe shimwe, nokuli nokweefa po okulongela Jehova, opo a xupife omwenyo waye. Satana okwa li a puka. Nokuli naashi Job a li ta diladila kutya ota ka fya, okwa kala yo omudiinini. Job okwa li a dula okulididimika, molwaashi okwa li e lineekela mouwa waJehova nosho yo meteelelo. Job okwa li a itavela kutya ngeenge Jehova okwa kala ina yukifa oinima ofimbo e li momwenyo, ote ke mu nyumuna monakwiiwa. Eteelelo li na sha nenyumuko ola li oshinima sholela kuJob. Ngeenge nafye otwe li tala ko lolela kufye, itatu ka efa oumbada wokutila efyo u tu efife po okulongela Jehova.

13. Omolwashike twa pumbwa okuyandja elitulemo keemwiyo odo Satana a li a longifa, eshi ta yeleke Job?

¹³ Otu na okuyandja elitulemo keemwiyo odo Satana a li a longifa, eshi a li ta yeleke Job, molwaashi nokunena odo ta longifa. Satana okwa popya oipupulu a ti: “Omunhu keshe [haJob ashike] osho e shi na, te shi yandjele omwenyo waye.” (Job 2:4, 5) Satana okwa hala kutya katu hole shili Jehova Kalunga, nonokutya ohatu ke mu efa po, opo tu xupife eemwenyo detu. Okwa popya vali kutya Kalunga ke tu hole noiha yandje elitulemo keenghendabala detu doku mu hafifa. Molwaashi otu shii omakoto aSatana, inatu itavela oipupulu yaye.

14. Omayeleko ohae tu kwafele ngahelipi tu lishiive nawa fye vene? Shi faneka.

¹⁴ Ngeenge hatu yelekwa, natu longife omhito ya tya ngaho opo tu lishiive nawa fye vene. Omayeleko oo Job a li a taalela, okwe mu kwafela a mone omaunghundi aye noku a pukulula. Pashihopaenenwa, okwa li a mona kutya okwa pumbwa okukulika oukwatya welininipiko filufilu. (Job 42:3) Nafye ohatu dulu okulihonga shihapu kombinga yetu, ngeenge hatu yelekwa. Omumwatate wedina Nikolay, * oo a li a tulwa modolongo nonande ka li e na oukolele, okwa ti: “Odolongo oya fa ashike eshina lo-X-ray, olo hali ulike omaukwatya omeni Omukriste.” Ngeenge otwa didilike omaunghundi etu, otwa pumbwa oku a pukulula.

15. Otu na okupwilikina kulyelye, nomolwashike?

¹⁵ Otu na okupwilikina kuJehova, ndele hakovatondi vetu. Job okwa li a pwilikina noukeka, eshi Jehova a li ta popi. Kalunga okwa li a pula Job omapulo onhumba a ti: ‘Mbela ou  shii kutya ondi na eenghono di fike peni? Ondi shii ashishe osho she ku ningilwa. Mbela oto diladila kutya ohandi nyengwa oku ku fila oshisho?’ Job okwa li a nyamukula nelininipiko nokwa li a pandula neenghono ouwa waJehova. Okwa ti: “Nde ku udile ashike omatwi, ndelenee paife [nomesho] ange nde ku mona.” (Job 42:5) Eshi Job a popya eendjovo odo, otashi dulika a li natango e li omutumba momute, olutu laye la li li yadi oidinda nokwa li a nyika oluhodi, omolwefyo lovana vaye. Ashike nande ongaho, Jehova okwa li e mu shilipaleka kutya oku mu hole nokwe mu hokwa.​— Job 42:7, 8.

16. Metwokumwe naJesaja 49:15, 16, oshike twa pumbwa okukaleka momadiladilo, ngeenge twa taalela omayeleko?

¹⁶ Kunena, ovanhu otashi dulika ve tu ule omalaka, ile va ungaunge nafye twa fa tuhe na oshilonga. Otashi dulika va kendabale okunyona po edina letu tu li oohandimwe, ile tu li ehangano ‘noku tu popila mowii aushe.’ (Mat. 5:11) Otwe lihonga moshihopaenenwa shaJob kutya, Jehova oku na elineekelo kutya ohatu ka kala ovadiinini kuye, ngeenge twa taalela omayeleko. Jehova oku tu hole, noita ka efa ovo ve mu lineekela. (Lesha Jesaja 49:15, 16.) Onghee hano, ino yandja elitulemo komalundilo oo taa di kovatondi vaKalunga. Omumwatate Jakob wokuTurkey, oo oukwaneumbo waye wa li wa taalela omayeleko a kwata moiti, okwa ti: “Otwa li twa mona kutya okupwilikina koipupulu i na sha noshiwana shaKalunga otashi ke tu teya omukumo. Onghee otwa li twa yandja elitulemo keteelelo li na sha nOuhamba notwa li twe lipyakidila  moilonga yaJehova. Naasho osha li she tu kwafela tu kaleke po ehafo letu.” Ngaashi Job, nafye otu na okupwilikina kuJehova. Katu na okweefa oipupulu yovatondi vaJehova i nyone po eteelelo letu.

17. Oshike we lihongo moshihopaenenwa shovalumenhu novakainhu ovadiinini ovo va tumbulwa mOvaheberi etukulwa 11?

¹⁷ Job oku li ashike umwe womovapiya vaJehova ovo va kala ovadiinini nova pama, nonande ova li va taalela omayeleko a kwata moiti. Monhumwafo oyo omuyapostoli Paulus a shangela Ovaheberi okwa popya yo ta ulike kuvakwao vahapu nokwa ti ove li ‘ongudu inene yeendombwedi.’ (Heb. 12:1) Aveshe ovo ova li va pita momayeleko a kwata moiti, ashike ova kala ovadiinini kuJehova. (Heb. 11:36-40) Mbela elididimiko nosho yo oilonga yavo youdiinini oya li yongaho? Hasho nandenande! Nonande eshi va li momwenyo inava mona omaxunganeko aeshe e shi taa wanifwa, ova li va twikila okukala va teelela kuJehova. Molwaashi ova li ve shii kutya ova hokiwa kuJehova, ova li ve na elineekelo kutya otava ka mona ewanifo lomaxunganeko oo. (Heb. 11:4, 5) Oshihopaenenwa shavo otashi dulu oku tu pameka tu kale twa tokola toko okukala twa teelela kuJehova.

18. Owa tokola toko okuninga shike? (Ovaheberi 11:6)

¹⁸ Kunena otu li mounyuni oo tau ende nokunaipala. (2 Tim. 3:13) Ashike Satana onghee ngoo ta twikile okuyeleka oshiwana shaKalunga. Kashi na nee mbudi kutya ohatu ka shakeneka omashongo elipi monakwiiwa, natu kaleni twa tokola toko okulongela Jehova noudiinini, ‘twe lineekela muKalunga omunamwenyo.’ (1 Tim. 4:10) Dimbuluka kutya ondjabi oyo Kalunga a li a pa Job otai ulike kutya “Jehova omunalukeno nomunanghenda.” (Jak. 5:11) Nafye natu kaleni ovadiinini kuJehova nokukala tu na oushili kutya ota ka pa ondjabi ovo “tave mu kongo va mana mo.”​— Lesha Ovaheberi 11:6.