1. (a) Kidyelelu kyahi kitubhana Jihova? (b) O ‘kudyelela kwa Jihova’ kulombolola ihi? (Tala “Izwelu Yojimbulule.”)

 JIHOVA wabhana kidyelelu kyadikota kwa yó oso amuzolo. Kwakambe ngó bhofele, mwene wandazubha o mauhaxi moso, o kuluwala ni kufwa. (Dij. 21:3, 4) Mwene wandakwatekesa yó “a lenduka,” adyelela kwa mwene kukitula o ixi palayizu. (Jisá. 37:9-11) Mwene wandabhangesa kwila, kala muthu mudyetu ukala ni ukamba wambote ni mwene, utwala nawu kindala ndenge. Kiki kidyelelu kya katunda! Maji ihi itena kutukwatekesa kuxikina ni kidi kyoso kwila, o ikanenu ya Nzambi yanda dikumbidila mwene? Jihova ukumbidila yoso yakanena. Mu kikiphe tutena ‘kudyelela kwa Jihova.’ * (Jisá. 27:14) Tubhanga kiki mu kukinga ni mwanyu, ni kusanguluka kwoso, kuma Nzambi yetu wandakumbidila o vondadi yê.—Iza. 55:10, 11.

2. Ihi yabhange kyá Jihova?

² Jihova walondekesa kyá kwila, mwene ukumbidila o ikanenu yê. Tala o phangu yiyi: Mu divulu dya Dijingunwinu, Jihova wakanena kwila mu izuwa yetu wejibheka athu akwa jixi joso, miji yoso ni madimi moso, phala kumubheza ni muxima umoxi. Lelu, o athu yá a ejiya kala “mundu wavulu.” (Dij. 7:9, 10) Sumbala mu kibuka kiki mwala mayala, ahatu ni ana ndenge atundu mu jixi joso, enyoso ala ngó mwiji umoxi, atululuka we. (Jisá. 133:1; Nzw. 10:16) O athu atokala ku mundu wavulu aboka we o njimbu yambote ya Utuminu ni kuswina kwoso. Ene ala polondo phala kutangela o athu o kidyelelu  kya mundu wambote wandakwiza ku pholo. (Mat. 28:19, 20; Dij. 14:6, 7; 22:17) Se eye ubhanga mbandu ya mundu wavulu, sé phata eye ubhana valolo yavulu mu kidyelelu kya ima yambote yandakwiza ku hádya.

3. Ihi ya mesena kubhanga Satanaji?

³ O Dyabhu kamesena kuma eye ukala ni kidyelelu phala o hádya. Mwene wamesena kwila eye uxikina kuma Jihova katena kutulanga, ni kwila Mwene kanda tena kukumbidila o ikanenu yê. Se Satanaji ubwikisa o kidyelelu ki twala nakyu, nange tutena mwene kweha kusidivila Jihova. Kala kitwanda dilonga, o Dyabhu wasoto kubwikisa o kidyelelu kya Jobe ni ku mubhangesa kweha kusidivila Jihova.

4. Ihi itwanda dilonga mu milongi yiyi? (Jobe 1:9-12)

⁴ Mu milongi yiyi twanda dilonga o jiphitu jabhange Satanaji kwa Jobe phala mwene atene kweha kukala fiyele kwa Jihova. (Tanga Jobe 1:9-12.) Twanda mona we ihi itutena kudilonga kuphangu ya Jobe, ni mukonda dyahi twabhingi kulembalala kuma Jihova wa tuzolo ni kwila mwene wanda kumbidila o ikanenu yê.

5-6. Mu kakithangana kofele, ihi yabhiti ni Jobe?

⁵ Jobe wexile ni mwenyu wambote. Wexile we ni ukamba wambote ni Jihova. Mwene wexile ni mwiji wadikota, asangulukile kyavulu, wexile we mvwama. (Jobe 1:1-5) Maji mu kizuwa kimoxi ngó, o ima yoso ya Jobe yadiboto. Kyadyanga, o ibhaku yê yoso yafu. (Jobe 1:13-17) Mu kusuluka, o twana twê twoso twakazola afu we. Xinganeka bhofele mu maka enyá. Kyoso ki kufwa mona umoxi, o jitata aluwala kyavulu. Xinganeka o dilamba, o mukôndo ni kikote kyakexile nakyu Jobe ni muhatu wê kyoso kya atangela kwila o dikwinyi dya twana twâ twafu. Mukonda dya kiki, kitudiwana mu kwijiya kwila Jobe watandula o divunga dyê, yu wa ditakula bhoxi.—Jobe 1:18-20.

⁶ Mu kusuluka Satanaji watakula uhaxi wadikota kwa Jobe, o uhaxi wenyú wexile mu mukwatesa jisonyi. (Jobe 2:6-8; 7:5) Ande dya kubhita o ima yiyi, o athu mu mbanza ya Jobe, exile mu muxila kyavulu. O athu akexile muya kwa mwene phala kumubhinga kitendelesu. (Jobe 31:18) Maji kyoso kyakatele, o athu amubhele dikunda. Kakexile dingi kumubhana valolo ku jiphange jê, ku makamba mê, katé mwene ku akalakadi’ê!—Jobe 19:13, 14, 16.

7. (a) Mu kibanzelu kya Jobe, nanyi wexile mu mutalesa hadi, maji mwene kabhange ihi? (b) Kyebhi o Kidistá kyatena kudibhana ni ibhidi yadifwangana ni yadibhele nayu Jobe ni muhatu wê?

⁷ Satanaji wamesenene kwila Jobe uxikina kuma wexile mutala hadi mukonda Jihova waluwalele ni mwene. Mu kifika, Satanaji wabhangesa kwila, kumoneka kitembu kyadikota kyabwikisa o inzo mwakexile o dikwinyi dya twana twa Jobe. Enyoso akexile mudya ni kunwa afu. (Jobe 1:18, 19) Mwene watumikisa we tubhya tundé ku dyulu, tu twabwikisa o ibhaku yoso ya Jobe ni akalakadi akexile mu ilanga. (Jobe 1:16) Kuma o kitembu ni tubhya twatundile ku dyulu, Jobe wabanzele kwila Jihova mwéne wa itumikisine. Mukonda dya kiki, Jobe wafikile kwila waluwalesele Jihova. Né kiki, mwene kaxongwena o Tata yê ya dyulu. Jobe wejidile kwila mu mivu yavulu Jihova wamubhele ima yavulu yawabha. Mwene wabanzele kwila se wasangulukile mu kuxikina o ima yambote, watokalele we kukala polondo phala kuxikina o ima yayibha. Mwene wambe: “Dijina dya Ngana a kale mu ku di ximana jinga!” (Jobe 1:20, 21; 2:10) Sumbala Jobe wakatele kyavulu, o jimbote jê jadiboto,  o twana twê twafu, né kiki mwene wakolokotele fiyele kwa Jihova. Maji Satanaji kasuku bhenyobho.

8. Ihi dingi yabhange Satanaji kwa Jobe?

⁸ Satanaji wafunyisa makamba atatu a makutu a Jobe, phala kumubhangesa kudivwa kala muthu wakambele valolo. Ene ambe kwila Jobe wakexile mutala hadi mukonda wabhangele ima yavulu yayibha. (Jobe 22:5-9) Asoto ku muxikinisa kwila né mwene Jobe wabhangele ima yavulu yambote, Nzambi kabhele valolo ku ima yenyoyo. (Jobe 4:18; 22:2, 3; 25:4) Ene abhangesa we Jobe kuxikina kwila Nzambi kamuzolele, kexile mu musuwa, ni kwila mwene kexile ni valolo bhupholo ya Nzambi. O izwelu yâ, yabhangesa Jobe kudivwa kala o hadi yê kiyeji bhwa dingi.

9. Ihi yakwatekesa Jobe kuswina kyavulu?

⁹ Xinganeka bhofele: Jobe waxikama mu uthôkwa, wala ni jindolo javulu. (Jobe 2:8) O makamba mê amusuluka mu kumutangela kwila, mwene muthu wayibha ni kwila yoso yabhange kiyala ni valolo. O ibhidi ya mudibhana nayu yedi kala matadi a neme, ya mu mubhangesa kudivwa kyayibha, o mukôndo wala nawu mukonda dya kufunda o twana twê, wala hanji ku muxima wê. Ku dimatekenu Jobe wadixibha. (Jobe 2:13–3:1) Se o kudixibha kwa Jobe kwabhangesa o makamba mê a makutu kubanza kwila, mwene wejibhana dikunda ku Mubhangi wê, ene adinganala kyavulu. Kwabhixila kithangana, nange mu kutala swi bhu mesu a makamba mê a makutu, Jobe wambe: “Katé bhu nga kà fwila, nuka ngi di sandula mu kidi kyami.” (Jobe 27:5) Ihi yakwatekesa Jobe kuswina kyavulu, sumbala ni ibhidi yexile mudibhana nayu? Né mwene kyoso kya luwalele kyavulu, mwene wexile ni kidyelelu kya kwila o Tata yê ya henda wejizubha o hadi yoso yexile mutala. Wejidile we kwila né mwene se wejifwa, Jihova weji mufukununa.—Jobe 14:13-15.

10. O musoso wa Jobe utulonga ihi?

¹⁰ O musoso wa Jobe utulonga kwila Satanaji katena ku tujijidika kubhana dikunda kwa Jihova ni kwila Jihova wejiya yoso itubhita nayu. Wene we utukwatekesa kutendela o maka utudibhana nawu. Tala o madisá ututena kudilonga mu phangu ya Jobe.

11. Ihi yanda bhita se tusuluka mu kudyelela kwa Jihova? (Tiyaku 4:7)

¹¹ O phangu ya Jobe itulonga kwila, se tusuluka mu kudyelela kwa Jihova, tutena kukolokota mu kibhidi kyosokyoso ni kuditunda kyambote mu kuzoka ni Dyabhu. Ihi yandabhita? O Bibidya ilondekesa kwila Dyabhu wanda tulenga.—Tanga Tiyaku 4:7.

12. Kyebhi o kikanenu ku difukunukinu kyabhangesa Jobe kukolokota?

¹² Twabhingi kukala ni kixikanu kya kolo mu kikanenu kya difukunukinu. Kala ki twadilongo mu milongi ya tundumu, Satanaji ubhangesa kwila o wôma utwala nawu ku athu, utubhangesa kubhana dikunda kwa Jihova. Kwa Jobe, Satanaji wambe kwila Jobe wejibhanga yoso, katé mwene kubhana dikunda kwa Jihova phala kubhulula o mwenyu wê. Maji Satanaji wadinganala. Katé mwene kyoso kya fikile kwila wejifwa, Jobe wakolokotele mu ufiyele wê kwa Jihova. O kidyelelu kyê mu mbote ya Jihova ni kuxikina kwila Jihova wejizubha o hadi yexile mutala, kwa mubhangesa kukolokota. Jobe wexile ni kixikanu kya kwila se Jihova keji mukwatekesa, kyoso mwene kyexile hanji ku mwenyu, Jihova weji mufukununa ku hádya. Jobe wexile ni kixikanu kyakolo mu kikanenu kya difukunukinu. Se o kikanenu kiki kya kidi we phala etu, né mwene se atwambela kwila anda tujibha, kitwanda bhana dikunda kwa Jihova.

13. Mukonda dyahi twatokala kudilanga ku mibhetu yatele Satanaji kwa Jobe?

¹³ Etu twatokala kudilanga ku mibhetu yatele Satanaji kwa Jobe, mukonda lelu mwene wene muta we o mibhetu yiyi. Tala o makutu atele Satanaji: “O muthu [ki Jobe ngó] yoso yala na-yu u i bhana mu ku kula o mwenhu wê.” (Jobe 2:4, 5) Mu kidi, Satanaji wamba kwila Jihova Nzambi ki twamuzolo, ni kwila twandabhana dikunda kwa Jihova phala kubhulula o mwenyu wetu, se kibhana. Satanaji wamba we kwila Nzambi katuzolo, mwene kabhana valolo mu nguzu itubhanga phala ku musidivila. Kuma twejiya kyá o ima yamesena kubhanga Satanaji, etu kituxikina o mibhetu yê.

14. O ibhidi itena kutukwatekesa kubhanga ihi? Bhana phangu.

¹⁴ Tutena we kumona o ibhidi kala kithangana kyafwama phala kuditonginina mudyetu. O ibhidi ya dibhele nayu Jobe yamukwatekesa kumona bhebhi bhwa zozele, ni kutolola o ima yexile mu muzozesa. Mu kifika, mwene wadilongo kwila watokalele dingi kulenduka. (Jobe 42:3) Etu we tutena kudilonga kyavulu kyoso ki tudibhana ni ibhidi. Sayi phange amwixana Nikolawu, * amutele mu kaleya, né mwene ni uhaxi wabhonzo wexile nawu. Mwene wambe: “O kithangana ki ngabhiti mu kaleya, ngamono se idifwa yebhi ingabhingile kulondekesa dingi kyambote ku mwenyu wami.” Kyoso kitwijiya o ima ituzozesa, twabhingi kubhanga yoso itutena phala kutolola o ima yiyi.

15. Nanyi twatokala ku mwivwa, ni mukonda dyahi?

¹⁵ Kitwatokala kubhana mátwi ku jinguma jetu, majiphe twatokala kwivwa Jihova. Jobe wevu kyambote kyoso Jihova kya zwelanê. Nzambi waxinganeka kiki ni Jobe: ‘Eye utena  kumona o kutena kwami kwa kubhanga o ima? Eme ngejiya kyambote yoso yabhiti n’eye. O kwila uxinganeka kuma kingitena ku kulanga?’ Ni kulenduka kwoso ni kisakidilu kwa Jihova, Jobe watambwijila: “Ngana, ki nga kwijidile kyambote, nga kwívwa jinga ngó ni mátwi mami; maji o kiki, mesu’ami ala ku ku mona.” (Jobe 42:5) Eye ulembalala hanji se Jobe wexile kwebhi kyoso kyatumbula o izwelu yiyi? Mwene waxikamene hanji mu uthôkwa, wexile hanji ni jifidila javulu ku mukutu ni kuluwala kwadikota, mukonda dya twana twê twafwile. Né kiki, Jihova walondekesa o henda yê kwa Jobe, ni kwila wamuxikina.—Jobe 42:7, 8.

16. Kala kilondekesa o divulu dya Izaya 49:15, 16, ihi itwatokala kubanza kyoso ki tudibhana ni ibhidi?

¹⁶ Mu izuwa ya lelu, o athu a tu xongwena, atutalatala kyayibha atumona kala kitwala ni valolo. Ene asota kuxidisa o majina metu ni kuxongwena we o kilunga kyetu ni ‘ku tu tatela makutu, ni ku tu zwela ima yayibha.’ (Mat. 5:11) O musoso wa Jobe u tu longa kwila Jihova u dyelela kuma kyoso ki twanda dibhana ni ibhidi, twanda kolokota mu ufiyele wetu kwa mwene. Jihova wa tuzolo, mwene nuka wanda xisa yo amudyelela. (Tanga Izaya 49:15, 16.) Kana kubhana matwi ku makutu ene muzwela o jinguma ja Nzambi! Phange Nzwá watungu mu ixi ya Turquia, mwene ni mwiji wê adibhanene ni ibhidi yavulu, mwene wambe: “Etu twamono kuma o kwivwa o makutu alungu ni mundu wa Nzambi kyeji tuluwalesa. Kyenyiki twasolo kudikwatenena mu kidyelelu kya Utuminu wa Nzambi ni kusuluka mu kubhanga jinga o sidivisu ya Jihova.  Mukonda dya kiki, twasuluka mu kusanguluka.” Kala Jobe, etu we tubhana mátwi kwa Jihova! O makutu a jinguma jetu katena kuzubha o kidyelelu kyetu.

17. Ihi itudilonga ku phangu ya mayala ni ahatu otumbule mu divulu dya Jihebelewu kibatulu 11?

¹⁷ Jobe phangu imoxi ngó ya selevende ya Jihova, wakolokota mu ufiyele wê, né mwene ni ibhidi yavulu. Mu divulu dya Jihebelewu, poxolo Phawulu wazwela we yalungu ni athu engi, yu wa exana “kifuxi kyadikota kya jimbangi.” (Jih. 12:1) Enyoso adibhele ni ibhidi yavulu ku mwenyu wâ, maji né kiki akolokotele mu ufiyele wâ kwa Jihova. (Jih. 11:36-40) O kwila o kikalakalu kyabhange ene ni kukolokota kwâ ki kwakexile ni valolo? Kana ngana! Sumbala kyoso ene kyakexile ku mwenyu, kamono o kikumbidilu kyoso kya ikanenu ya Nzambi, né kiki asuluka mu kudyelela kwa Jihova. Kuma ene ejidile kyambote kwila exile ni valolo bhupholo ya Jihova, mu kiki adyelele kwila o ikanenu yoso ya Jihova yejidikumbidila. (Jih. 11:4, 5) O phangu yâ, itena kutukwatekesa kusuluka mu kudyelela kwa Jihova.

18. Eye wala polondo phala kubhanga ihi? (Jihebelewu 11:6)

¹⁸ Mu ngongo yiyi mu twala, o kuyibha kwa muya ni kudibandekesa kyavulu. (2 Ti. 3:13) Satanaji wamusuluka hanji mu kutendala o mundu wa Nzambi. Twejiya kwila kupholo dya kwenda twanda dibhana ni ibhidi, maji né kiki tukala polondo phala kukalakala ni nguzu yoso kwa Jihova, ni kuxikina ni kidi kyoso kwila “o kidyelelu kyetu kitunda kwa Nzambi ya mwenyu.” (1 Ti. 4:10) Lembalala kuma, o mabesá abhana Nzambi kwa Jobe alondekesa “kwila Jihova o henda yê yadikota ni kwila, mukwa kulenduka.” (Tiy. 5:11) Kala Jobe, tukolokotyenu mu ufiyele kwa Jihova, mu kwijiya kwila mwene wandabesowala “oso amusota ni kidi kyoso.”—Tanga Jihebelewu 11:6.