1. (a) Ni maha wahi agho Yehova abirithuha? (b) Kikamanyisayaki ‘erihira amaha oku Yehova’? (Lebaya “Erisoborera Ekinywe.”)

 YEHOVA abiriha abosi abamwanzire b’amaha mabuyanga. Akisiya iniaghunzaho amalhwere, obulighe, n’olhuholho. (Erib. 21:3, 4) Akendi wathikya “abakayikehaya” abakamuhirako amaha erihindulha ekihugho mwa paradiso. (Esy. 37:9-11) Kandi akendi syaleka ikyathokekana okwa buli mughuma w’okw’ithwe eribya n’obughuma obuwene nayu, obughuma obuwene kutsibu kwilhaba obwa thuwithe lino. Ayo ka ni maha mabuya! Aliwe ithwe erikirirya ngoku emilhaghe ya Nyamuhanga yikendi syabererera kiseghemere okuki? Yehova syali athaghana eriberererya emilhaghe yiwe. Neryo thuwithe nzumwa mbuya eyanga leka ‘ithwahira amaha oku Yehova.’ * (Esy. 27:14, NWT) Thukakolha eki omw’ilindirira Nyamuhanga wethu ithunaghumisirizirye kandi ithunatsemire ngoku akendi syaberererya emilhaghe yiwe.​—Isa. 55:10, 11.

2. Ni byahi ebya Yehova abirithakolha?

² Yehova abirikangania kw’akaberereraya emilhaghe yiwe. Lengekanaya okwa ky’erileberyako kighuma. Omwa kitabu ky’Eribisulirwa, Yehova mwalhaghanisya athi omwa biro byethu, angahindenie abandu erilhua omwa buli kithunga n’ebihanda n’emibughe, kandi athi angabahirire haghuma omw’iramya ly’okwenene. Munabwire, egurupu y’embaghane y’abandu eyo yasibwe mwa “endeko nene.” (Erib. 7:9, 10) Nomwakine indi muli abalhume, abakali, n’abaana ab’erangyi n’emibughe muthina-muthina, kandi abalhuire omwa mibere eyithasosene,  egurupu nene eyi lhw’olhughanda lhw’abalikyethu lhw’ekihugho kyosi olhuli buholho kandi bughuma. (Esy. 133:1; Yn. 10:16) Kandi endeko nene eyo ni bathuliri b’omuhwa. Mughulhu wosi bakabya ibanayitheghekire eribwira owosi-wosi oyukendi bahulikirira okwa maha wabu w’ekihugho ekyuwene. (Mt. 28:19, 20; Erib. 14:6, 7; 22:17) Wamabya iwuli w’okwa ndeko nene, ahathe erithika-thika, okw’iwe amaha w’ebibuya ebikayasa ni w’obughuli bunene.

3. Sitani awithe kilhubirirwaki?

³ Diabolo anzire erikusaghulhako amaha wawu. Ekilhubirirwa kiwe ly’erianza w’ikiriraye wuthi Yehova syakutsomene kandi wuthi syendi syaberererya emilhaghe yiwe. Sitani amabirithusaghulhako amaha wethu ithukendihwa amani, kandi nibya ithwangana leka erikolera Yehova. Ngoku thukendi lhangira, Diabolo mwalengaho erisaghulha oku Yobu kw’amaha wiwe n’erianza erimulemesya erikolera Yehova.

4. Thukendi kania okuki omo mwatsi ono? (Yobu 1:9-12)

⁴ Omo mwatsi ono, thukendi lebya ebithegho ebya Sitani akolesaya oku Yobu akanza erimukaka athi athwe obuthaleghulha bwiwe. (Soma Yobu 1:9-12.) Kandi thukendi kania okwa ebya thwang’igha okwa ky’erileberyako kya Yobu n’okwa kikaleka ithwabya ithutholere eryibuka ngoku Nyamuhanga athwanzire kandi kw’akendi berererya emilhaghe yiwe.

5-6. Ni byahi ebyabya oku Yobu omwa buthuku buke?

⁵ Yobu abya iniane omwa ngebe eyuwene. Abya inianawithe obunywani bw’ahakuhi na Yehova. Aby’awithe eka nene eyiri bughuma, kandi abya mugaga. (Yobu 1:1-5) Aliwe omwa kiro kighuma buyira, Yobu mwaherya hakuhi obuli kindu. Erimbere mwaherya obugaga bwiwe. (Yobu 1:13-17) N’abaana biwe abosi bamaholha. Thalengekania okwa kitsibu ekikalire ekyo. Ababuthi bakayowa nabi kutsibu omughuma w’okwa baana babu amaholha. Neryo thalengekania okw’ikukubalha, obulighe, n’erihwa amani ebya Yobu na mukali wiwe bathunga bakaminya ngoku abaana babu bosi ikumi babiriholha. Kwesi sikiriswekaya Yobu eribya imwathulhanga esyongyimba siwe, amalira n’eriwa ahisi okwa kithaka!​—Yobu 1:18-20.

⁶ Enyuma waho Sitani mwaswirya Yobu omwa bulhwere obukalhuma kutsibu n’erimughunzamo ekitsumbi. (Yobu 2:6-8; 7:5) Ebyo bithe byabya, abandu babya basikirye Yobu ya kutsibu. Abandu ibakasamusaba amenge. (Yobu 31:18) Aliwe lino mubamuyihighulhako. Baghalha babu, banywani biwe b’okwa ndungu, nibya n’abaghombe biwe mubamunuwa n’erimughana!​—Yobu 19:13, 14, 16.

7. (a) Yobu mwikirirya athi ni kyahi ekikaleka iniaghalhwa, aliwe ni kyahi ekyo aghana erikolha? (b) Omukristayo angaghumira athi ebitsibu ebiri ng’ebikanganibwe omwa kisasani?

⁷ Sitani aby’anzire Yobu ikiriraye athi akaghalhawa kundi Yehova syakimwanzire. Ng’eky’erileberyako, Sitani mwakolesya ekiyagha kinene eritherya enyumba eyo abaana bosi ikumi ba Yobu babyamo ibanemulya haghuma. (Yobu 1:18, 19) Kandi mwaleka omuliro inialhua elhubulha n’erithoghothya ebihangulho biwe byosi n’abaghombe biwe ababya bakabitheya. (Yobu 1:16) Kundi ekiyagha n’omuliro byalhua elhubulha, neryo Yobu mwaghunzerera athi bitholere eribya ibikalhua oku Yehova Nyamuhanga. Neryo busana n’ekyo, Yobu mw’ikirirya athi angabya iniabirihithania Yehova. Nomubyanabya bithya, Yobu mwaghana eritsuma Thatha wiwe w’elhubulha. Yobu abya iniabirilhangira ngoku ahabw’emyaka mingyi Yehova abya iniabirimuha ebindu bingyi ebyuwene. Neryo mwaghanirya  athi amabya imwanaligha ebyuwene, atholere inialigha n’ebithuwene. Neryo mwabugha athi: “Erina ly’Omwami Mukulhu litsumulhawe.” (Yobu 1:20, 21; 2:10) Yobu nomwanaheraya ebindu biwe, abaana biwe, n’amaghalha, mwasighalha muthaleghulha oku Yehova. Aliwe Sitani abya isyali amulekera aho.

8. Ni kindi kithegho kyahi ekya Sitani akolesaya oku Yobu?

⁸ Sitani mwakolesya ekindi kithegho oku Yobu; mwahongererya banywani biwe basathu ab’amabehi nuku baleke Yobu ayowe mo wabbule. Abalhume abo mubabugha bathi eriaghalhwa lya Yobu likakanganaya ngoku abirikolha ebibi bingyi. (Yobu 22:5-9) Kandi mubalengaho erimulighisya bathi nomwangabya isyabya mukolha-nabi, akaghalha ako abya akahiraho eritsemesya Nyamuhanga kabya ikakakwira bbule. (Yobu 4:18; 22:2, 3; 25:4) Ni bugha ambu, babya ibali kw’anza Yobu alengekanaye athi Nyamuhanga syamwanzire, syamutsomene, kandi ngoku erimukolera siriwithe mughaso. Ebyo babugha byanga lekire Yobu iniayowa nga sihakiri maha.

9. Ni byahi ebya wathikaya Yobu eribya inianasikire kandi inianawithe amaaka?

⁹ Thakilengekaniako. Yobu an’ikere omw’ibu, ane omwa bulhumi bw’olhughumerere. (Yobu 2:8) Banywani biwe bakalholha embere erimubwira bathi ni mundu mubi kandi bathi sihali n’ekibuya ekyo abirithakolha. Ebitsibu biwe byabirimulithohera ng’amabwe awalitholire, n’obulighe bw’eriholerwa abaana biwe ni bunene okwa muthima wiwe. Okw’itsuka, Yobu akabya bukuthu. (Yobu 2:13–3:1) Banywani ba Yobu bamabya imubalengekania bathi erihuna liwe likakanganaya lithi Yobu akayalholhaya oko Muhangiki wiwe kw’omughongo, imubathebwa. Okwa ndambi ndebe, Yobu​—obundi akasumba omuthwe wiwe n’erisamalira banywani biwe b’amabehi—​n’eribugha athi: “Erihika okw’iholha lyaghe singendi syaghana erithunganene lyaghe!” (Yobu 27:5) Ni byahi ebya wathikaya Yobu eribya inianasikire  kandi inianawithe amaaka nomwanaghalhawa? Nibya n’omughulhu abya ahwere amani kutsibu, abya inianawithe amaha ngoku erighunzerera Nyamuhanga wiwe w’olhwanzo angaghunzireho ebitsibu biwe. Abya inianasi ngoku nomwangaholha, Yehova angamulhubukirye.​—Yobu 14:13-15.

10. Omwatsi owahambire oku Yobu akathweghesayaki?

¹⁰ Omwatsi owahambire oku Yobu akathweghesaya ngoku Sitani syanga thukaka erisighania Yehova kandi ngoku Yehova akabya inianasi ebyosi ebya thukalhabamo. Kandi ebya Yobu alhabamu byangana thuwathikya eriyitheghererya ndeke emyatsi mikulhu-mikulhu eyabirihanganaho. Thulebaye amasomo malebe agho thwang’ighira oku Yobu.

11. Thwamalholha embere eriyikethera Yehova, ithukendi kakasyaki? (Yakobo 4:7)

¹¹ Yobu mwakangania ngoku thwamalholha embere eriyikethera Yehova, ithwangana ghumira ekitsibu kyosi-kyosi kandi ithwathoka erilhwa na Sitani. Imukendi lhwiririraki? Amasako akathukakasaya athi Diabolo iniakendi thusagha.​—Soma Yakobo 4:7.

12. Amaha w’erilhubuka mwaghumya athi Yobu?

¹² Thutholere ithwamakirira amaha w’erilhubuka. Ngoku kiri omo mwatsi owahwere, Sitani mughulhu mungyi akakolesaya eky’erisagha olhuholho akanza thuyighane erikirirya lyethu. Oku Yobu, Sitani mwabugha athi Yobu angakolire ekyosi-kyosi, nibya n’erighana erithunganene liwe, anamathalhamya engebe yiwe. Sitani aby’awire. Nibya n’omughulhu Yobu aby’akalengekania athi akendi holha, mwathaleghulha. Eribya inianayikethere obubuya bwa Yehova n’eribya inianawithe amaha awaghumire ngoku erighunzerera Yehova ang’uwanirye emyatsi mukyamughumya. Yobu aby’ikirirye ngoku Yehova amathendyuwania emyatsi iniakineho, angamulhubukirye omwa buthuku obukasa. Yobu aby’ayikethere ndeke amaha w’erilhubuka. Nethu thwamayikethera ndeke amaha w’erilhubuka, isithwanga leghulha nomuthwangabya b’eriholha.

13. Busana naki thutholere ithwayitheghererya ndeke ebithegho ebya Sitani akolesaya oku Yobu?

¹³ Thutholere ithwayitheghererya ndeke ebithegho ebya Sitani akolesaya oku Yobu, kundi by’anemukolesya n’okw’ithwe munabwire. Lhangira erihangirira erya Sitani abugha: ‘Omundu [butsira Yobu musa] anganaha ebyosi awithe busana n’engebe yiwe.’ (Yobu 2:4, 5) Ni bugha ambu, Sitani abya iniakabugha athi sithwanzire ndeke Yehova Nyamuhanga kandi athi ithukendi musighania kyamabya iky’ekikendi lhamya engebe yethu. Sitani mwongera eribya ng’oyukabugha athi Nyamuhanga syathwanzire kandi athi syanga tsomana n’akaghalha ako thukahiraho erimutsemesya. Kundi thwabirisangwa thwaghuswako akasali, ithwe ng’abakahira amaha oku Yehova sithwanga thebibwa omwa bithegho bya Sitani.

14. Ebitsibu byanga thubisulha kwaki? Iha eky’erileberyako.

¹⁴ Thutholere ithwalhangira ebitsibu ng’akaghisa k’eriyiminya. Ebitsibu ebya Yobu abana mubyamuwathikya eriminya obutseke bwiwe bulebe n’eribuhengulha. Ng’eky’erileberyako, mwaminya ngoku akayithagha erikulha-kulhania kutsibu omubere w’eriyikehya. (Yobu 42:3) Nethu kuthya thwangana yiminyako bingyi thukabana ekitsibu. Mughalha wethu oyukahulhawamo Nikolay, * oyuwahirawa omwa ngomo nomwanabya awithe ebitsibu ebikalire eby’amaghalha, akabugha athi: “Engomo yiri ng’esikani, erikangania emibere y’Omukristayo ey’omwakathi.” Thwamabiriminya obutseke bwethu, ithwangana hiraho akaghalha eribuhengulha.

15. Thutholere ithwahulikirira ndi, kandi busana naki?

 ¹⁵ Thutholere ithwahulikirira Yehova butsira esyonzighu syethu. Yobu mwahulikirira ndeke Yehova akakania nayu. Nyamuhanga mwaghanirya na Yobu, eribya ng’oyukamubulhaya athi: ‘Wanamalhangira amaaka waghe w’erihangika? Nganasi ebyosi ebyabirikubyako. Wukalengekanaya wuthi sinanga kutsomana?’ Yobu mwasubirya omw’iyikehya n’erisima kutsibu obubuya bwa Yehova. Mwabugha athi: “Oko mughulhu oyo naminya ebyo abandi bambwira; nikwa lino eriso lyaghe likakulholhako.” (Yobu 42:5) Yobu ang’abya iniabya iniakin’ikere omw’ibu, omubiri wiwe iniakine kw’ebironda, n’abaana biwe ibane omw’isinda, akabugha ebinywe ebyo. Nomubyanabya bithya, Yehova mwakangania kw’anzire Yobu kandi mwamukakasya kw’anamulighire.​—Yobu 42:7, 8.

16. Ngoku kiri omu Isaya 49:15, 16, thutholere ithwabya ithun’ibukireki thukabana ebitsibu?

¹⁶ Nethu munabwire, abandu bangana thubughako ebikathuponesaya n’erithulhangira nga sithuwithe mughaso. Bangananza eritsandya okw’ithwe kutse ekithunga kyethu kw’erina ‘n’erithulegha omo misindo yosi y’ebibi.’ (Mt. 5:11) Omo mwatsi wa Yobu, thuk’igha ngoku Yehova ayikethere ngoku thukendi sighalha bathaleghulha okw’iyo thukabana ebitsibu. Yehova athwanzire kandi syendi syasighania abakamuhirako amaha. (Soma Isaya 49:15, 16.) Isiwahulikirira amabehi wosi-wosi w’esyonzighu sya Nyamuhanga! James, mughalha wethu erilhua e Turkey oyo eka yabu yabana ebitsibu ebikalire, akabugha athi: “Muthwaminya ngoku erihulikirira amabehi awahambire oko bandu ba Nyamuhanga kyanga thughunzire amani. Neryo muthwahira  amalengekania w’okwa maha wethu w’Obwami n’eribya ithune n’omuhwa omwa mubiiri wa Yehova. Busana n’ekyo, muthwabya ithunatsemire.” Nga Yobu, thukahulikirira Yehova! Amabehi w’esyonzighu syethu syalithughunza amaha.

17. Eky’erileberyako ky’abalhume n’abakali abathaleghulha abakanibweko omwa Abaebrania sura 11 kikakweghesayaki?

¹⁷ Yobu ni mughuma w’okwa baghombe ba Yehova oyuwasighalha inianasikire kandi inianawithe amaaka akabana ebitsibu ebikalire. Omwa baruha yiwe okwa Baebrania, omukwenda Paulo akakanaya okwa bandi bangyi, eribahulhamo “endeko nene y’abalhangiri.” (Ebr. 12:1) Abosi mubabana ebitsibu ebikalire; aliwe basibwe ng’abasighalha bathaleghulha oku Yehova. (Ebr. 11:36-40) Mbwino eriyiyinia lyabu n’erikolha kutsibu lyabya ini nubira busa? Eyihi na hake! Nomwakine indi omwa ngebe yabu yosi mubathalhangira eribererera ly’emilhaghe yosi ya Nyamuhanga, mubalholha embere erihira amaha oku Yehova. Kandi kundi babya ibanayikethere ngoku Yehova anabalighire, babya ibanakakasirye ngoku bakendi syalhangira emilhaghe yiwe yikabererera. (Ebr. 11:4, 5) Eky’erileberyako kyabu kyangana ghumya erithwamu lyethu ly’erilholha embere erihira amaha oku Yehova.

18. Wamathwamu erikolhaki? (Abaebrania 11:6)

¹⁸ Munabwire thw’ikere omwa kihugho ekik’ongera eritsandira ighuma. (2 Tim. 3:13) Sitani syali aleka erilenga okwa bandu ba Nyamuhanga. Thunalindirire ebitsibu ebikayasa ahambere aha, thuthwemu erikolera Yehova n’omuhwa, ithunayikethere ngoku “thwabirihira amaha wethu oku Nyamuhanga oyuliho.” (1 Tim. 4:10) Wibuke, ebibuya ebya Nyamuhanga aha Yobu bikakanganaya ngoku “Omukama ni w’erighanyira kutsibu, kandi akaghanyira abandu.” (Yak. 5:11) Nethu kuthya thwangana sighalha bathaleghulha oku Yehova ithunakakasirye ngoku akendi syahemba “abakamusonda-sonda.”​—Soma Abaebrania 11:6.