MUTWE WA KUFUNDA 27
“Ketekelai mwi Yehoba”
“Ketekelai mwi Yehoba; Chinchikai ne kukosa.” —SALA. 27:14.
LWIMBO 128 Kuchinchika Kufika ne ku Mpelo
BIJI MU UNO MUTWE *
1. (a) Ñanyi bintu byawama bitulaya Yehoba? (b) “Kuketekela mwi Yehoba” kulumbulula ka? (Monai “Kulumbulula Byambo.”)
YEHOBA walaya bantu bamutemwa bintu byawama bingi. Katatakatu akafumyepo misongo, bulanda ne lufu. (Lum. 21:3, 4) Ukakwasha “bakimote” bamuketekela kwalula ino ntanda ke paladisa. (Sala. 37:9-11) Kabiji atweba bonse pa muntu pa muntu uketulengela kwikala na bulunda bwawama ne aye. Buno bulunda bukakosa bingi. Uno mulaye wawama bingi. Pano ñanyi bintu bitulengela kushiinwa kuba’mba milaye ya Yehoba ikafika? Mambo Yehoba ufikizha byonse byo alaya. Kuyuka kino kwitulengela “kuketekala mwi Yehoba.” * (Sala. 27:14) Tumwesha’mba twaketekela mwi Yehoba inge twatwajijila kupembelela kuba’mba Yehoba ukafikizha milaye yanji.—Isa. 55:10, 11.
2. Ñanyi mulaye Yehoba ye afikizha kala?
2 Ano moba Yehoba wamwesha’mba ufikizha milaye yanji. Akilangulukai pa kino. Yehoba walayile’mba ukakonkanya pamo bantu ba mu bisaka byonse, mu mitundu yonse ya bantu ne mu njimi ne kwibaleta mu bupopweshi bwa kine. Jino jibumba ja bantu bonse lelo jino jitelwa’mba “jibumba jikatampe.” (Lum. 7:9, 10) Nangwa kyakuba abano banabalume, banabakazhi ne baana bamba milaka yapusana pusana, baji na nkomeno yapusana pusana ne bikoba byapusana pusana, Yehoba wibaleta pamo ne kwibalengela kwikala kisemi kimo kyakwatankana mwaya ntanda yonse. (Sala. 133:1; Yoa. 10:16) Kabiji jino jibumba jikatampe jisapwila na mukoyo. Babuulako bakwabo bakeba kufunda bukine pa bikekala ntanda ipya iji kulutwe. (Mat. 28:19, 20; Lum. 14:6, 7; 22:17) Inge muji pa jino jibumba jikatampe, mwanemeka bintu bitulaya Lesa.
3. Ñanyi kintu Satan kyo akeba kuba kwi atweba?
3 Diabola kechi ukeba anweba’mba muketekele mu bintu byawama bimulaya Yehoba ne. Ukeba mwitabile’mba Yehoba kechi wimuta muchima ne, kabiji amba kechi ukafikizha milaye yanji ne. Umvwe twaswisha ino milanguluko ya kwa Satana, tukakankalwa kuchinchika kabiji tukaleka kwingijila Yehoba. Byonka byo tusakufunda mu uno mutwe, Diabola wakebelenga konauna lwitabilo lwa kwa Yoba ne kumulengela kuleka kwingijila Yehoba.
4. Ñanyi bintu byo tusakwisambapo mu uno mutwe? (Yoba 1:9-12)
4 Mu uno mutwe, tusakwisamba pa mashinda aingijishe Satana kukanjikizha Yoba pa kuba’mba amulengele kubula kwikala wa kishinka kwi Yehoba. (Tangai Yoba 1:9-12.) Kabiji tusakwisamba byo twafwainwa kufunjilako kwi Yoba ne ene mambo o twafwainwa kuyukila’mba Lesa witutemwa kabiji amba ukafikizha milaye yanji.
SATANA WAKEBELENGA KONAUNA LWITABILO LWA KWA YOBA
5-6. Ñanyi bintu byamwekejile Yoba mu kimyetu kicheche?
5 Yoba waikelenga bwikalo bwawama bingi. Kabiji wajinga na bulunda bwakosa bingi ne Yehoba. Wajinga na kisemi kikatampe kyakwatankana ne bunonshi bwavula. (Yoba 1:1-5) Pano bino, mu jubatu jimo bintu byavula byo ajinga nabyo byaonaikile. Kitanshi, bunonshi bwanji bwaonaikile. (Yoba 1:13-17) Kya bubiji, baana banji bonse bafwile. Akilangulukaipotu pa ano makatazho. Bansemi bekala bingi na bulanda inge mwanabotu umo wafwa. Fwanyikizhai bulanda bwajinga ne Yoba ne mukazhanji byo baumvwine kuba’mba baana babo bonse jikumi bafwa. O ene mambo o atabwijile kivwalo kyanji ne kupona panshi.—Yoba 1:18-20.
6 Kyalondejilepo Satana wamanyikile Yoba na kikola kyatama bingi kileta bumvu. (Yoba 2:6-8; 7:5) Saka akyangye kukolwa, Yoba bamunemekele bingi ku bantu. Bantu bayanga na kulomba bukwasho kwi aye. (Yoba 31:18) Pano bino, byo akolelwe, bantu batatwile kumunyema. Balongo banji bamwalukilemo, balunda nanji bamunyemene kuvwangakotu ne bakalume banji.—Yoba 19:13, 14, 16.
Balongo ne banyenga bavula lelo jino bayuka byaumvwinenga Yoba pa makatazho o apichilemo (Monai jifuka 7) *
7. (a) Yoba walangulukilenga kuba’mba makatazho o apichilengamo afuminenga pi, kabiji ñanyi kintu kyo akaine kuba? (b) Ñanyi lweseko lwakonsha kupitamo mwina Kilishitu byonka byo bamwesha pa kipikichala?
7 Satana wakebelenga’mba Yoba etabile kuba’mba ubena kupita mu makatazho na mambo a kuba’mba Lesa wamuzhingijila. Satana waingijishe mwela mukatampe konauna nzubo mwajinga baana ba kwa Yoba jikumi bajilenga kajo. (Yoba 1:18, 19) Kabiji walengejile mujilo kufuma mwiulu kusoka banyama ne bakalume banji bebafungilenga. (Yoba 1:16) Na mambo a kuba’mba uno mwela mukatampe ne mujilo byafumine mwiulu Yoba walangulukile’mba byafuma kwi Yehoba Lesa. Kabiji Yoba walangulukilenga’mba kampe wamuzhingijisha Yehoba. Nangwa byonkabyo, Yoba wakainetu nsalansala kwambila mwenga Shanji wa mwiulu. Yoba wavulukile bintu byonse byawama byamubijile Yehoba pa myaka yavula. Kino kyamulengejile kulanguluka kuba’mba byo atambwijilenga bintu byawama kufuma kwi Lesa wafwainwe ne kutambwila bintu byatama. Kino kyamulengejile kwamba’mba: “Jizhina ja Yehoba jitwajijile kutotwa.” (Yoba 1:20, 21; 2:10) Yoba watwajijile kwikala wa kishinka kwi Yehoba nangwa kyakuba baana banji bafwile, bunonshi bwanji bwaonaikile ne aye mwine kukolwa. Nangwa byonkabyo, Satana watwajijile kumweseka mu mashinda akwabo.
8. Ñanyi jishinda jikwabo Satana jo aingijishe kwesekelamo Yoba?
8 Satana waingijishe jishinda jikwabo ja kwesekelamo Yoba. Waingijishe balunda ba kwa Yoba basatu kwamba byambo bya kumulefula. Bano banabalume baambile’mba Yoba wayanjilenga na mambo a kuba’mba waubile bintu byatama byavula bingi. (Yoba 22:5-9) Bakebelenga’mba aswe kuba’mba nangwa kyakuba waubile bintu byawama byavula, kechi byatokeshenga Yehoba ku muchima ne. Bakebelenga Yoba kulanguluka’mba Lesa kechi wamutemwa ne, amba Lesa kechi wamuta muchima ne, kabiji amba watayilengatu kimye kwingijila Lesa. (Yoba 4:18; 22:2, 3; 25:4) Bino byambo byo baambijile Yoba byafwainwe kumulengela kulanguluka’mba ukatwajijilatu na kuyanda.
9. Ñanyi bintu byakwashishe Yoba kuchinchika?
9 Fwanyikizhai kuba’mba Yoba waikala mu buto ne bilonda byanji saka bibena kutanta. (Yoba 2:8) Balunda nanji batwajijila kumwambila’mba ke muntu watama bingi kabiji amba bintu byonse byo oba kechi bitookesha Yehoba ku muchima ne. Bijikila byamuvujila kabiji uji bingi na bulanda na mambo a kufwisha baana banji. Yoba waikalatu nzoo. (Yoba 2:13–3:1) Umvwe banabalume basatu babena kwibepekezha’mba balunda nanji Yoba babena kulanguluka’mba usakusankilapo bulunda bwanji ne Yehoba na mambo a kuba’mba wazhindama, ko kuba’mba babena kwibepatu. Palutwe kacheche, Yoba wainuna mutwe saka abena kutala balunda nanji babubela. Wibambila’mba: “Kufikatu ne byo nkafwa, kechi nkasankilapo bulumbuluke bwami ne.” (Yoba 27:5) Ñanyi bintu byakwashishe Yoba kuchinchika mu bintu byonse byo apichilengamo? Nangwatu kimye kyo alefwilwe bingi, watwajijile kuketekela kuba’mba Lesa wanji ukapwisha makatazho onse o apichilengamo. Kabiji wayukile kuba’mba nangwatu inge wafwa Lesa ukamusangula.—Yoba 14:13-15
TWAKONSHA KUBA BYEPI BYONKA BYAUBILE YOBA?
10. Ñanyi bintu byo tufunjilako ku jishimikila ja kwa Yoba?
10 Jishimikila ja kwa Yoba jitufunjisha’mba Satana kechi wakonsha kwitukanjikizha kusankilapo Yehoba ne. Ne kuba’mba Yehoba wayuka byonse byo tupitamo. Kabiji bintu byapichilemo Yoba byakonsha kwitukwasha kumvwisha ne bintu byavwangwamo. Akilangulukai pa bintu bimo byo twafwainwa kufunjilako kwi Yoba.
11. Ñanyi kintu kikafumamo inge twatwajijila kuketekela mwi Yehoba? (Yakoba 4:7)
11 Yoba wamwesheshe kuba’mba inge twatwajijila kuketekela mwi Yehoba, tukachinchika meseko onse ne kumukana Satana. Ñanyi kintu kikafumamo? Binembelo bitubuula kuba’mba Diabola uketunyema.—Tangai Yakoba 4:7.
12. Kuketekela mu lusanguko kwakwashishe byepi Yoba?
12 Twafwainwa kwikala na luketekelo lwakosa mu lusanguko. Byonka byo twafunjile mu mutwe wafumako, Satana wingijisha moyo wa kuchiina lufu pa kuba’mba tubule kutwajijila kwikala bakishinka kwi Yehoba. Satana waambilenga’mba Yoba wakonsha kuba kintu kyonse nangwa kusankilapo lwitabilo lwanji kubatu’mba apulushe bumi bwanji. Satana wabepelenga, nangwatu kimye Yoba byo alangulukilenga’mba usakufwa, watwajijile kwikala wa kishinka kwi Yehoba. Kuketekela mu buwame bwa Yehoba ne kuyuka kuba’mba Yehoba ukapwisha makatazho onse o apichilengamo kwakwashishe Yoba kutwajijila kuchinchika. Yoba waketekejile kuba’mba Yehoba inge wabula kumukwasha saka akiji mumi ukamusangula inge wafwa. Yoba wajinga na lwitabilo lwakosa bingi mu lusanguko. Ne atweba umvwe twaikala na lwitabilo lwakosa mu lusanguko, kuchiina lufu kechi kuketulengela kubula kutwajijila kwikala bakishinka kwi Yehoba ne.
13. Mambo ka o twafwainwa kuyukila mashinda aingijishe Satana kwesekelamo Yoba?
13 Twafwainwa kuyuka bulongo mashinda Satana o aingijishe kwi Yoba mambo o engijisha ne kwi atweba lelo jino. Satana waambile byambo bya kuba’mba: “Muntu [kechi Yoba yenkatu ne] wakonsha kupana kintu kyonse kyo aji nakyo pa kuba’mba apulushe bumi bwanji.” (Yoba 2:4, 5) Satana walumbulwilenga’mba kechi twatemwa Yehoba Lesa kufuma panshi ya muchima ne. Kabiji amba twakonsha kumusankilapo pa kubatu’mba tupulushe bumi bwetu. Kabiji Satana waambile’mba Lesa kechi witutemwa ne. Kabiji amba byo tuba kechi bimutookesha ku muchima ne. Kechi tulondela bubela bwa kwa Satana ne, mambo twayuka kine kintu kyo aimenapo.
14. Meseko akonsha kwitukwasha kuyuka ka? Lumbululai.
14 Twafwainwa kufunjilako bintu bimo ku meseko o tupitamo. Meseko apichilemo Yoba amukwashishe kuyuka bukooke bwanji ne kwingijilapo. Nabiji wayukile kuba’mba wafwainwe kutwajijila kwipelula. (Yoba 42:3) Ne atweba twafwainwa kufunjilako bintu byavula bingi inge tubena kupita mu meseko. Mulongo Nikolay * ye bakashile mu kaleya wajinga na kikola kikatampe waambile’mba: “Kunkasa mu kaleya kwankwashishe kuyuka byubilo byo nafwainwa kwikala nabyo.” Umvwe twayuka bukooke bwetu kiketupelela kwingijilapo.
15. Ñanyi ye twafwainwa kukookela kabiji mambo ka?
15 Twafwainwa kutelekanga kwi Yehoba, kechi ku balwanyi betu ne. Yoba wateleko bingi muchima ku byamwambijile Yehoba. Lesa byo esambilenga ne Yoba, kijitu nobe wamwambijilenga’mba: ‘Nanchi wamona bilengwa byo nalengele nyi? Nayuka bya malwa byonse byo ubena kupitamo. Nanchi ubena kulanguluka’mba nakonsha kukankalwa ku kulama nyi?’ Pa kukumbula, Yoba wipelwile kabiji wasanchijile Yehoba pa buwame bwanji. Waambile’mba: “Nemumvwangatu na matwi ami, pano nemumona na meso ami.” (Yoba 42:5) Kyamweka Yoba waambilenga bino byambo saka aikala mu buto. Wajinga na bipute pa mubiji yense kabiji wakijijilenga baana banji bafwile. Nangwa byonkabyo, byambo byaambile Yehoba byamwesheshe’mba watemwa Yoba.—Yoba 42:7, 8.
16. Kwesakana na byaamba Isaya 49:15, 16, ñanyi bintu byo twafwainwa kuvulukanga inge tubena kupita mu meseko?
16 Nangwatu mu ano moba bantu bakonsha kwitwambila mwenga ne kwitulengela kumona’mba Lesa witulengulula. Bakonsha kwamba byatama pe atweba nangwa pa jibumba jetu. Kabiji bakonsha “[kwitubepela] mu misango yonse ya bubi.” (Mat. 5:11) Ku jishimikila ja kwa Yoba tufunjilako kuba’mba Yehoba waketekela kuba’mba tukatwajijila kwikala bakishinka inge tubena kupita mu meseko. Yehoba witutemwa bingi kabiji kechi ukalekelela bonse baketekela mwi aye ne. (Tangai Isaya 49:15, 16.) Kange mulondelenga byambo byatama byamba balwanyi ba Lesa ne. Mulongo James wikala mu kyalo kya Turkey wapita mu meseko avula bingi na kisemi kyanji waambile’mba: “Twayukile kuba’mba kuteleka byambo bya bubela byo bamba pa bantu ba Lesa byakonsha kwitulefula. Onkao mambo, twatele muchima pa luketekelo lwetu lwa Bufumu ne kutwajijila kwingijila Yehoba na mukoyo. Kuba bino kwitulengejile kutwajijila kwikala na lusekelo.” Byonka byaubile Yoba, tukookela Yehoba. Byambo bya bubela byamba balwanyi betu kechi bipwisha luketekelo lwetu ne.
LWITABILO LWENU LUKEMUKWASHA KUCHINCHIKA
Yoba bamupesheshe pa kutwajijila kwikala wa kishinka. Aye ne mukazhanji baikele myaka yavula na lusekelo (Monai jifuka 17) *
17. Ñanyi bintu byo mwafunjilako ku banabalume ne banabakazhi bakishinka bo batongola mu Bahebelu kitango 11?
17 Yoba uji pa bakalume ba Yehoba batwajijile kwikala na lwitabilo lwakosa ne kuchinchika meseko. Mu nkalata yo anembejile Bahebelu, mutumwa Paulo watelele ne bakwabo bavula’mba “jibumba jikatampe jituzhokoloka ja bakamonyi.” (Hebe. 12:1) Bano bonse bapichile mu meseko avula bingi kabiji batwajijile kwikala bakishinka kwi Yehoba mu bwikalo bwabo bonse. (Hebe. 11:36-40) Nanchi kuchinchika kwabo kwayiletu mu mema nyi? Ine. Nangwa kyakuba kechi bamweneko kufika kwa milaye yonse ya Lesa ne, bino batwajijile kuketekela mwi Yehoba. Kabiji na mambo a kuba’mba bayukile kuba’mba baitabilwa kwi Yehoba, baketekejile’mba milaye yonse ya Lesa ikafika. (Hebe. 11:4, 5) Byo baubile bitutundaika kutwajijila kuketekela mwi Yehoba.
18. Mwafuukulapo kutwajijila kuba ka? (Bahebelu 11:6)
18 Ntanda yo tubena kwikalamo lelo jino ibena kuya na kutaminakotu. (2 Timo. 3:13) Satana kechi waleka kweseka bantu ba Lesa ne. Kechi na mambo a byakonsha kumweka kulutwe ne, twafwainwa kwibikako kwingijila Yehoba na mukoyo ne “[kuketekela] mwi Lesa mumi.” (1 Timo. 4:10) Vulukainga kuba’mba byonse Lesa byo aubijile Yoba bimwesha kuba’mba “Yehoba ye wa kifyele ne lusa.” (Yako. 5:11) Ne atweba twayai tutwajijile kwikala bakishinka kwi Yehoba ne kuketekela kuba’mba “ye ufweta aba bamukebesha.”—Tangai Bahebelu 11:6.
LWIMBO 150 Mukebai Lesa pa Kuba’mba Mukapuluke
^ Umvwe twalanguluka pa bantu bachinchikile meseko, javula tuvuluka Yoba. Ñanyi bintu byo twakonsha kufunjilako ku byapichilemo umo mwanamulume wa kishinka? Tufunjilako kuba’mba Satana kechi wakonsha kwitukanjikizha kuleka kwingijila Yehoba ne. Kabiji tufunjilako kuba’mba Yehoba wayuka bintu byonse byo tupitamo kabiji byonka Yehoba byo apwishishe makatazho apichilengamo Yoba, juba jimo ukapwisha makatazho onse o tupitamo. Byo tuba mu bwikalo bwetu byo bimwesha’mba twashiinwa na bino bishinka. Kabiji kino kikamwesha’mba twi bantu “baketekela mwi Yehoba.”
^ KULUMBULULA BYAMBO: Mu Kihebelu kyambo kya kuba’mba “kuketekela” kilumbulula kupembelela kintu kyo ubena kukebesha’mba kifike kabiji kyakonsha ne kulumbulula kuketekela muntu.—Sala. 25:2, 3; 62:5.
^ Mazhina amo apimpulwa.
