1. (a) Us op Jiova dɔn gi wi? (b) Wetin i min fɔ “abop pan Jiova”? (Rid “Wɔd we Dɛn Ɛksplen.”)

 JIOVA dɔn gi fayn op to ɔl di wan dɛn we lɛk am. I nɔ go te igen, i go mek siknɛs, pwɛlat, ɛn day nɔ de igen. (Rɛv. 21:​3, 4) I go ɛp di wan dɛn “we nɔ tek dɛnsɛf mek natin” we de abop pan am fɔ mek dis wɔl bi Paradays. (Sam 37:​9-11) Ɛn i go mek am pɔsibul fɔ lɛ ɔlman gɛt tayt padi biznɛs wit am, we wi go ɛnjɔy pas di wan we wi de ɛnjɔy naw. Dat na wɔndaful op! Bɔt wetin mek wi biliv se Gɔd in prɔmis dɛn go kam tru? Na bikɔs ɛnitɛm we Jiova prɔmis fɔ du sɔntin, i de du am. So wi gɛt gud rizin fɔ “abop pan Jiova.” * (Sam 27:​14, NWT) Wi de sho dis bay we wi de wet peshɛnt wan ɛn wit gladi-at fɔ mek wi Gɔd du wetin i dɔn prɔmis.—Ayz. 55:​10, 11.

2. Wetin Jiova dɔn ɔlrɛdi du?

² Jiova dɔn ɔlrɛdi pruv se i de du di tin dɛn we i prɔmis. Tink bɔt wan fayn ɛgzampul. Insay di Baybul buk we nem Rɛvɛleshɔn, Jiova bin prɔmis se insay wi tɛm, i go mek pipul dɛn we de tɔk difrɛn langwej dɛn ɛn we kɔmɔt na ɔl di neshɔn dɛn ɛn trayb dɛn wɔship am wit wanwɔd. Tide, dɛn kɔl da spɛshal grup de di “bɔku bɔku pipul dɛn.” (Rɛv. 7:​9, 10) Pan ɔl we dis grup gɛt ɔlkayn  man, uman, ɛn pikin dɛn we kɔmɔt ɔlsay na di wɔl, dɛn ɔl na wan famili we gɛt pis. (Sam 133:​1; Jɔn 10:​16) Dɛn bɔku bɔku pipul dɛn de, de prich wit zil. Dɛn rɛdi ɔltɛm fɔ tɛl di wan dɛn we want fɔ lisin bɔt dɛn op fɔ wɔl we bɛtɛ pas dis. (Mat. 28:​19, 20; Rɛv. 14:​6, 7; 22:​17) If yu na wan pan dɛn bɔku bɔku pipul dɛn de, wan dawt nɔ de se di op fɔ se tin go bɛtɛ rili impɔtant to yu.

3. Wetin Setan want fɔ du?

³ Setan nɔ want yu fɔ gɛt op fɔ tumara bambay. I want yu fɔ biliv se Jiova nɔ bisin bɔt yu, ɛn I nɔ go du wetin i dɔn prɔmis. If Setan pwɛl di op we wi gɛt, wi nɔ go gɛt maynd, ɛn sɔntɛm wi go ivin stɔp fɔ sav Jiova. As wi go lan, Setan bin tray fɔ pwɛl di op we Job bin gɛt ɛn mek i stɔp fɔ sav Jiova.

4. Wetin wi go tɔk bɔt insay dis atikul? (Job 1:​9-12)

⁴ Insay dis atikul, wi go tɔk bɔt di tin dɛn we Setan bin du fɔ fos Job fɔ mek i nɔ kɔntinyu fɔ fetful to Jiova. (Rid Job 1:​9-12.) Wi go tɔk bak bɔt wetin wi go lan frɔm Job in ɛgzampul ɛn wetin mek wi nid fɔ mɛmba se Gɔd lɛk wi ɛn I go du wetin i dɔn prɔmis.

5-6. Wetin bin apin to Job insay shɔt tɛm?

⁵ Job bin de liv gud layf. I bin de ɛnjɔy tayt padi biznɛs wit Jiova. I bin gɛt big famili we bin rili gladi, ɛn i bin jɛntri pasmak. (Job 1:​1-5) Bɔt insay wangren de, Job bin lɔs ɔlmost ɔltin. Fɔs, i lɔs in jɛntri. (Job 1:​13-17) Dɔn bak, ɔl in pikin dɛn bin day. Tek smɔl tɛm fɔ tink bɔt dis bad tin we bin apin to Job. Mama ɛn papa dɛn at kin pwɛl we wan pan dɛn pikin dɛn day. So imajin di shɔk ɛn pwɛlat we Job ɛn in wɛf bin gɛt we dɛn kam fɔ no se ɔl dɛn tɛn pikin dɛn dɔn day. Wi nɔ sɔprayz fɔ no se Job bin chɛr in klos ɛn fɔdɔm na grɔn bikɔs in at bin rili pwɛl.—Job 1:​18-20.

⁶ Dɔn Setan gi Job wan sik we bin de mek i fil pen ɛn we bin de mek i shem. (Job 2:​6-8; 7:​5) Bifo dis tɛm, pipul dɛn bin de rili rɛspɛkt Job. Dɛn bin de kam to am fɔ advays. (Job 31:​18) Naw, nɔbɔdi nɔ bin want fɔ gɛt ɛnitin fɔ du wit am. In brɔda dɛn, in fambul dɛn, ɛn ivin in yon savant dɛn bin lɛf am.—Job 19:​13, 14, 16.

7. (a) Wetin Job bin tink se na di rizin we mek i bin de sɔfa? Wetin i nɔ bin du? (b) Aw Kristian go gɛt prɔblɛm we fiba wetin de na di pikchɔ fɔ dis paregraf?

⁷ Setan bin want Job fɔ biliv se i de sɔfa bikɔs Jiova dɔn vɛks pan am. Fɔ ɛgzampul, Setan yuz big big briz fɔ pwɛl di os usay Job in tɛn pikin dɛn bin de ɛnjɔy as dɛn de it togɛda. (Job 1:​18, 19) Dɔn bak, i bin mek faya kɔmɔt na ɛvin ɛn kil Job in animal dɛn ɛn di savant dɛn we bin de kia fɔ dɛn. (Job 1:​16) Bikɔs di big big briz ɛn faya kɔmɔt na ɛvin, dat mek Job tink se na frɔm Jiova dɛn kɔmɔt. So Job bin biliv se Jiova dɔn vɛks pan am. Bɔt pan ɔl dat, Job nɔ bin gri fɔ kɔs in Papa we de na ɛvin. Job bin gri se bifo dis tɛm, Jiova bin dɔn gi am bɔku gud tin dɛn. So dat mek i tink se if i bin gladi fɔ di gud tin dɛn we i bin gɛt, i nɔ fɔ kɔmplen fɔ di bad tin dɛn we de apin to am. So i bin se: “Mek ɔlman prez [Jiova] in nem.” (Job 1:​20, 21; 2:​10) Pan ɔl we Job bin  dɔn lɔs in jɛntri, in pikin dɛn, ɛn in wɛlbɔdi, i kɔntinyu fɔ fetful to Jiova. Bɔt Setan nɔ bin dɔn dɔn wit am yet.

8. Us ɔda tin Setan bin du to Job?

⁸ Di ɔda tin we Setan bin du na dat i bin mek Job in tri lay lay padi dɛn tray fɔ mek i fil se i nɔ gɛt wan valyu. Dɛn man dɛn de tɔk se Job de sɔfa bikɔs i dɔn du bɔku bad tin dɛn. (Job 22:​5-9) Dɛn tray bak fɔ mek i biliv se ilɛk in nɔto bad pɔsin, ɛnitin we i du fɔ mek Gɔd gladi nɔ go gɛt wan valyu. (Job 4:​18; 22:​2, 3; 25:​4) So dɛn bin de tray fɔ mek Job tink se Gɔd nɔ lɛk am, I nɔ bisin bɔt am, ɛn i nɔ mek sɛns fɔ sav Am. Dɛn wɔd dɛn ya fɔ dɔn mek Job fil se i nɔ gɛt op.

9. Wetin bin ɛp Job fɔ gɛt maynd ɛn tinap tranga wan?

⁹ Imajin dis. Job sidɔm pan ashis, ɛn i de fil siriɔs pen we nɔ de dɔn. (Job 2:​8) In padi dɛn de kɔntinyu fɔ tɛl am se in nɔto gud pɔsin, ɛn i nɔ ɛva du ɛnitin gud na in layf. In prɔblɛm dɛn tan lɛk ebi lod na in ed, ɛn in at stil pwɛl bad bad wan bikɔs in pikin dɛn dɔn day. Fɔs, Job nɔ bin tɔk natin. (Job 2:​13–3:​1) If Job in lay lay padi dɛn bin tink se bikɔs i nɔ de tɔk natin dat min se i go kɔmɔt biɛn di Wan we mek am, dɛn bin rɔng. Wantɛm, i go bi se Job bin es in ed ɛn luk dɛn in padi dɛn de ɛn tɔk se: “Te a day, a nɔ go ɛva lɛf fɔ sav Gɔd.” (Job 27:​5, NWT) Wetin bin ɛp Job fɔ gɛt maynd ɛn tinap tranga wan pan ɔl we i bin de sɔfa? Pan ɔl we in at bin rili pwɛl, i nɔ bin ɛva stɔp fɔ abop se Gɔd we lɛk am go mek i lɛf fɔ sɔfa. I bin no se ilɛk i day, Jiova go gi am layf bak.—Job 14:​13-15.

10. Wetin Job in ɛgzampul tich wi?

¹⁰ Job in ɛgzampul tich wi se Setan nɔ ebul fos wi fɔ lɛf fɔ sav Jiova, ɛn Jiova de si ɔl wetin de apin to wi. Dɔn bak, Job in ɛgzampul go tich wi ɔda impɔtant lɛsin dɛn. Tink bɔt sɔm pan di lɛsin dɛn we wi go lan frɔm Job.

11. If wi kɔntinyu fɔ abop pan Jiova, wetin wi shɔ bɔt? (Jems 4:​7)

¹¹ Job in ɛgzampul pruv se if wi kɔntinyu fɔ abop pan Jiova, wi go ebul fɔ bia ɛni prɔblɛm we go mit wi ɛn nɔ mek Setan win. Wetin go apin if wi du dat? Di Baybul tɛl wi se Setan go rɔnawe pan wi.—Rid Jems 4:​7.

12. Aw di op fɔ se wi go gɛt layf bak bin ɛp Job?

¹² Wi nid fɔ gɛt strɔng fet se wi go gɛt layf bak. Lɛk aw wi bin dɔn tɔk na di atikul bifo dis wan, Setan de tray fɔ yuz di fred we wi de fred day fɔ mek wi nɔ kɔntinyu fɔ fetful to Jiova. Setan bin tɔk se Job go du ɛnitin, ilɛksɛf na fɔ stɔp fɔ fetful to Jiova, fɔ sev in layf. Setan bin rɔng. Pan ɔl we Job bin tink se i go day, i bin stil kɔntinyu fɔ fetful to Jiova. Di kɔnfidɛns we i bin gɛt pan Jiova in gudnɛs ɛn di strɔng op we i bin gɛt se Jiova go ɛp am bin mek i kɔntinyu fɔ bia. Job bin gɛt fet se ilɛk Jiova nɔ ɛp am we i de alayv, I go gi am layf bak tumara bambay. Di op fɔ se wi go gɛt layf bak bin rial to Job. If da op de rial to wisɛf, i go mek wi nɔ stɔp fɔ fetful to Jiova ilɛk dɛn trɛtin fɔ kil wi.

13. Wetin mek wi nid fɔ tink gud wan bɔt di tin dɛn we Setan bin yuz pan Job?

¹³ Wi nid fɔ tink gud wan bɔt di tin dɛn we Setan bin yuz pan Job bikɔs i de yuz dɛn sem tin dɛn de pan wi tide. Notis wetin Setan tɔk. I se: “Pɔsin [nɔto jɔs Job] kin du ɛnitin fɔ mek i nɔ day.” (Job 2:​4, 5) So Setan bin de tɔk se wi nɔ rili lɛk Jiova Gɔd, ɛn wi go stɔp fɔ sav Am jɔs fɔ sev wi layf. Setan tɔk bak se Gɔd nɔ rili lɛk wi ɛn I nɔ de notis we wi de tray tranga wan fɔ mek I gladi. Bikɔs wi no wetin Setan de tray fɔ du, wi we de abop pan Jiova nɔ de biliv Setan in lay dɛn.

14. Wetin prɔblɛm dɛn kin ɛp wi fɔ no bɔt wisɛf? Gi wan ɛgzampul.

¹⁴ Wi fɔ si di prɔblɛm dɛn we de mit wi as chans fɔ lan bɔt wisɛf. Di prɔblɛm dɛn we bin mit Job bin ɛp am fɔ si sɔm eria dɛn we i bin nid fɔ mek chenj. Fɔ ɛgzampul, Job bin lan se i nid fɔ put insɛf dɔŋ mɔ. (Job 42:​3) Wisɛf kin lan bɔku tin bɔt wisɛf we wi gɛt prɔblɛm. Wan brɔda we nem Nikolay, * we dɛn put na prizin pan ɔl we i bin gɛt siriɔs wɛlbɔdi prɔblɛm tɔk se: “Prizin tan lɛk X-ray mashin, i de ɛp yu fɔ si udat yu rili bi insay.” We wi si eria dɛn we wi nid fɔ mek chenj, wi fɔ wok tranga wan fɔ mek di chenj dɛn.

15. Udat wi fɔ lisin to? Wetin mek?

¹⁵ Na Jiova wi fɔ lisin to, nɔto wi ɛnimi dɛn. Job bin tek tɛm lisin we Jiova bin de tɔk to am. Gɔd bin mek Job tink bay we i aks am kwɛstyɔn dɛn lɛk: ‘Yu de si di kayn pawa we a gɛt fɔ mek tin dɛn? A de si ɔl wetin de apin to yu. Yu tink se a nɔ ebul kia fɔ yu?’ Job bin tɔk ɔmbul wan, ɛn i bin sho se i rili gladi fɔ Jiova in gudnɛs bay we i bin tɔk se: “A  bin no yu nɔmɔ bay wetin a yɛri pipul dɛn de se, bɔt naw a dɔn si yu wit mi yon yay.” (Job 42:​5) I go bi se di tɛm we Job tɔk dɛn wɔd ya, i bin stil sidɔm pan ashis, i bin gɛt wund ɔlsay na in bɔdi, ɛn in at bin stil pwɛl bikɔs in pikin dɛn bin dɔn day. Bɔt pan ɔl dat, Jiova bin ɛp Job fɔ si se I lɛk am ɛn I gladi fɔ am.—Job 42:​7, 8.

16. Akɔdin to Ayzaya 49:​15, 16, wetin wi nid fɔ mɛmba we wi gɛt prɔblɛm dɛn?

¹⁶ Tide bak, pipul dɛn de tɛl wi bad wɔd dɛn ɛn trit wi lɛk se wi nɔ gɛt wan valyu. Dɛn kin tray fɔ pwɛl wi gudnem ɔ di ɔganayzeshɔn in gudnem bay we dɛn de “lay . . . bad bad wan” pan wi. (Mat. 5:​11) Frɔm Job in ɛgzampul, wi lan se Jiova biliv se wi go kɔntinyu fɔ de biɛn am ilɛk wi gɛt prɔblɛm dɛn. Jiova lɛk wi, ɛn i nɔ go ɛva lɛf di wan dɛn we abop pan am. (Rid Ayzaya 49:​15, 16.) Nɔ pe atɛnshɔn pan di lay lay tɔk dɛn we Gɔd in ɛnimi dɛn de tɔk. Jems, we na wan brɔda we de na Tɔki, we in famili dɔn sɔfa siriɔs wan fɔ sɔm tɛm tɔk se: “Wi bin kam fɔ si se if wi de lisin to di lay lay tin dɛn bɔt Gɔd in pipul dɛn, dat go mek wi at pwɛl. So wi bin pe atɛnshɔn pan wi Kiŋdɔm op ɛn kɔntinyu fɔ sav Jiova wit zil. Bikɔs ɔf dis, wi de kɔntinyu fɔ gɛt gladi-at.” Lɛk Job, wi de lisin to Jiova. Di lay lay tɔk dɛn we Gɔd in ɛnimi dɛn de tɔk nɔ go mek wi stɔp fɔ gɛt op.

17. Wetin yu lan frɔm di ɛgzampul bɔt di fetful man ɛn uman dɛn we Ibruz chapta 11 tɔk bɔt?

¹⁷ Job na jɔs wan pan Jiova in savant dɛn we kɔntinyu fɔ gɛt maynd ɛn tinap tranga wan we i bin gɛt siriɔs prɔblɛm dɛn. Insay apɔsul Pɔl in lɛta to di Ibru Kristian dɛn, i bin tɔk bɔt bɔku ɔda wan dɛn we i kɔl di “bɔku witnɛs dɛn we tan lɛk klawd.” (Ibru. 12:​1) Dɛn ɔl bin gɛt siriɔs prɔblɛm dɛn, bɔt dɛn kɔntinyu fɔ fetful to Jiova te dɛn day. (Ibru. 11:​36-40) Fɔ se dɛn tranga wok ɛn di bia we dɛn bia bin go fɔ natin? Nɔ, nɔto so i bi. Pan ɔl we dɛn nɔ bin si we Gɔd in prɔmis dɛn ɔl kam tru, dɛn bin kɔntinyu fɔ abop pan Jiova. Ɛn bikɔs dɛn bin biliv se dɛn dɔn mek Jiova gladi, dɛn bin gɛt kɔnfidɛns se dɛn go si we dɛn prɔmis dɛn de go kam tru. (Ibru. 11:​4, 5) Dɛn ɛgzampul de ɛp wi fɔ mekɔp wi maynd fɔ kɔntinyu fɔ abop pan Jiova.

18. Wetin yu dɔn mekɔp yu maynd fɔ du? (Ibruz 11:​6)

¹⁸ Tide, wi de na tɛm we tin jɔs de bad-ɔf mɔ ɛn mɔ. (2 Tim. 3:​13) Setan nɔ dɔn yet fɔ tɛst Gɔd in pipul dɛn. Ilɛk uskayn prɔblɛm dɛn mit wi tumara bambay, lɛ wi mekɔp wi maynd fɔ wok tranga wan fɔ Jiova ɛn gɛt kɔnfidɛns se “wi dɔn put wi op pan Gɔd we de alayv.” (1 Tim. 4:​10) Mɛmba se di tin dɛn we Gɔd du fɔ Job sho “se Jiova rili lɛk wi ɛn i gɛt sɔri-at.” (Jems 5:​11) Lɛ wisɛf kɔntinyu fɔ de biɛn Jiova ɛn biliv se I go blɛs “di wan dɛn we de luk fɔ am wit ɔl dɛn at.”—Rid Ibruz 11:​6.