1. (a) Tiindaŋ sɔvɛ sɔvɛ kuɛɛ Chɛhowa ke yɛ naa? (b) Vɛɛ naŋ chɔm yɛ maa ŋ dɔu tiindaŋ naa o Chɛhowa niŋ? (Tofa “Tɛɛsiaa le Diomndo.”)

 CHƐHOWA ke wanaa cho ndu piɛiyo wa kpou tiindaŋ sɔvɛ sɔviɔɔ. O lo lɛ teleŋ vilɛi le, mbo huŋ faŋa naalaŋ, kɔlta tambɛilaŋ, a piɔmndo. (Sɔɔŋ. 21:​3, 4) O cho wanaa tusiŋ nduyɛ ma wa tiindaŋ ndaa dɔwɔɔ o ndu niŋnda mala le chieeŋndo kpou siiŋguuwo kpele hɛnɛkiɔɔ. (Sam 37:​9-11) O cho tosa mi naa pilɛŋ pilɛŋnda kpou tuei chaŋyɛi kpɛɛluŋnde yeela a ndu, mbo hiou bɛɛ i naŋ cho suŋ suŋ tueiyɔɔ yeela a ndu ve. Nuawɔ se tiindaŋ sɔvɛ sɔvɛ naŋ nɔ wo! Kɛ yɛɛ ke yɛ naa tiindaŋndo maa mɛɛla Mɛlɛkalaŋ kpou la cho hunɔɔ peelɔŋ? Wana lo o lediom ndo Chɛhowa cho ni. Le hei, ŋ nɔ sabu kɛndɔɔ le tiindaŋ naa dɔwɔɔ o ndu niŋ. * (Sam 27:​14) Ŋ chɔm hei te ŋ biunuŋ pɛ a kɔl kɛndɛ, nduyɛ miŋ chum le mi Mɛlɛka siou sabu ndɔɔ peelu.—Aisaya 55:​10, 11.

2. Diomnde mɛyaale kuɛɛ Chɛhowa cho yɛ suŋ suŋ peeloo?

² Chɛhowa chɔm niŋ kpendekele maa Mɛlɛka lo o lediom ndo o cho ni. Ŋ tofaŋndɔ tamaseliiyo opilɛ. O yau Sɔɔŋ Chɔɔmaŋndoŋ niŋ, mbo mɛi lediom maa o palɛi nɛi niŋ, o cho waŋnda fulaa o lɛŋii yɛ yɛi niŋ, lekaa o lekaa, a sɔɔŋ maŋgalaŋ yɛ yiɔɔŋ dɔwɔɔ diompilɛ o piɛile tonyaleŋ niŋ. Hau, diomnde mɛyaaleŋ ndeŋ le cho peelɔŋndo. Waŋnda “faŋga bɛndoo” cho ndu piɛiyo o diompilɔɔ niŋ. (Sɔɔŋ. 7:​9, 10) Mi che bɛɛ waŋnda suu o suu cho o faŋga bɛndoo hoo niŋ ni, kɛ nda kpou cho Mɛlɛka piɛiyo diompilɛ, nduyɛ ma wa o kɔl nyulu niŋ chieeŋndo balɔɔ silɔ.  (Sam 133:​1; Chɔŋ 10:​16) Wanaa cho o kundaa hoo choo wa nɔ sɛmbɔɔ tau le yooŋgu kɛndɔɔ dimioo. A cho a bɛɛndiaŋ teleŋ o teleŋ le wanaa nɔ yeemɛiya dimullo a tiindaŋ nda nɔ le chila sɔvɛlaŋ ndo okɔɔ. (Maa. 28:​19, 20; Sɔɔŋ. 14:​6, 7; 22:​17) Te a cho pɛ o kundaa hoo choo, mɛɛ tiindaŋ ŋ nɔ le chila sɔvɛlaŋ ndo cho o sɔvɛ tau le num.

3. Yɛɛ Setana yeema yɛ naa miŋ laalaŋ?

³ Setana yeema naa kposoŋ miŋ nɔ tiindaŋndo le chilaŋ te. O yeema naa miŋ laalaŋ maa Chɛhowa buulaŋ a naa okɔɔ le, nduyɛ maa o peelu niŋ diomnda ndɔla mɛyaalaŋ te. Te Setana tosa pɛ miŋ kɛɛ tiindaŋndo dɔwɔɔ o Chɛhowa niŋ, keŋ tosa ŋ nɔ lɛ kɔl simulaa le, nduyɛ pɛŋ miŋ pɛŋgi Chɛhowa piɛiyo. A mɛɛ naŋ cho chɔ yɛ, mi Setana kindiŋ le tiindaŋ Choobu ndoo dɔu o Mɛlɛka niŋndo tɛɛmbuu wo, le halikpeŋ mi Choobu ndoo pɛŋgi Chɛhowa piɛiyo.

4. Yɛɛ naŋ cho yɛ yaasiaa o buŋgɛi hei niŋ? (Choobu 1:​9-12)

⁴ O buŋgɛi hei niŋ, ŋ cho yaasiaa nɛila Setana soliŋ kpeku le Choobu faŋaa o pimbi ndɔ simiaa choo wo. (Nuawɔ Choobu 1:​9-12.) Ŋ cho vɛlɛ yaasiaa nyɛ naŋ pɛɛku o tamasi Choobu wo niŋndo, a sabu naŋ nɔ miŋ nɔ tiindaŋndo maa Mɛlɛka kaala naa, nduyɛ maa mbo peelu mɛɛla ndɔlaŋ ndo.

5-6. Yɛɛ ndoo yɔŋnuŋ yɛ Choobu o teleŋ biŋgi bɛŋgu?

⁵ Choobu wa bɔɔ yoomoo tueiyɔɔ yeela. Ndoo nɔ chaŋyɛi kpɛɛluŋnde a Chɛhowa. Waŋnda wa tau o yuŋgu ndɔɔ niŋ, nduyɛ nda kpou wa a kɔl kɛndɛ. Sullo pila ndoo sul vɛlɛ ni. (Choobu 1:​1-5) Kɛ o paaleŋ lepilɛ niŋ kpe, wana dimi maa mi nyɛ o nyɛ hialuŋ ndu. I tasei, mi chɔluaa nduaa a sul ndɔɔ kpou hialuŋ ndu. (Choobu 1:​13-17) Okoŋ kɔɔli, mi chuauwaa nduaa bɛɛ kpou sɔla piɔmndo. Nuawɔ se suɛi kpundɛ bɛndu! Mi kalaŋ chuauwa tambu kɔl tau te chuauwaa ndaa opilɛ kpe sɔla pɛ piɔmndo. Yiyaŋndɔ niko mɛɛ Choobu nda laa ndɔ ndaa tambu kɔllɛ, mɛɛ nda tuei maa chuauwaa ndaa tɔ wa sɔla piɔmndo o lepilɛ niŋ kpe. Mi mɔnɛi bii Choobu tau. Mbo sɛɛsiaŋ nyɛlaŋ lekɔɔ, okoŋ mbo chal lɛŋ wɔyɔŋ!—Choobu 1:​18-20.

⁶ Okoŋ kɔɔli, mi Setana chiŋalaŋ vɛlɛ Choobu pila. Mbo duau ndu naa wɔɔŋ wɔɔŋndo choo. (Choobu 2:​6-8; 7:​5) Tuupa mi kpundɔɔ hoo komal ndu, waŋnda ndaa nɔ bɛɛleŋ tau le ndu. Mi ndaa kuɛ pɛŋ o ndu lo le silaa. (Choobu 31:​18) Kɛ mɛɛ kpundɔɔ hoo komal ndu, mi nda kpou fafaŋ ndu. Nduyɛ ndaa nɔ lɛ lebɛɛ le ndu le. Mi pɔmbuaa nduaa, chaŋyaŋ ndɔŋ kpɛɛluŋndoŋ a buɛiyaa nduaa kpou kɛɛ ndu!—Choobu 19:​13, 14, 16.

7. (a) Nɛɛ Choobu ndoo laalaŋ yɛ maa ndu wa ndu nyɛpalaa tusioo choo ni, kɛ yɛɛ o kɛɛ yɛ le tosaa? (b) Vɛɛ nyɛpalaa komal Kilisiɔŋnda lepum ndo, velaŋ yɛ a nyɛ naŋ cho chɔɔ o fotueiyo niŋndo?

⁷ Setana ndoo yeema mi Choobu laalaŋ maa, le mɛɛ Chɛhowa tambu kɔl a ndu yɛ o tusi ndu kpundɛ koŋ choo ni. Le tamaseliiyo, paale pilɛ, chuauwaa Choobu wa kpou wa nyɛdiaa dioo naapilɛ. Okoŋ, mi Setana tosa mi hueiyii bɛnduei luaa chiɛi nda wa niŋndo, nduyɛ mbo komba nda choo. (Choobu 1:​18, 19) Mbo tosa vɛlɛ mi taŋndeŋ le fula choo choo, mi le diu chɔluaa Choobu wa, a wanaa wa nda mandaa wa. (Choobu 1:​16) Le mɛɛ hueiyii tɔɔmɛi keŋ, a taŋnde leŋ le fula choo choo yɛ, mi Choobu yiyaŋ maa Chɛhowa wa ndu nyɛpalaa tusioo choo ni. Fulamakɔɔlioo wa ni, naapum mbo yiyaŋ maa Chɛhowa tambu kɔllo a ndu. A koŋ kpou, Choobu yei Finya ndɔ cho o choo choo niŋndo le. Mbo dimi pɛŋ maa, o wɔsila hiou laŋ niŋ, mi Chɛhowa tosal ndu sɔɔŋ kɛndɔŋ tau. Le hei, mbo yiyaŋ maa, te o wa pɛ a kɔl kɛndɛ le sɔɔŋ kɛndɛŋ Chɛhowa tosal ndu woŋ, mɛɛ o nɔ vɛlɛ mbo chɛl sɔɔŋ palaŋ komal ndu woŋ. Okoŋ mbo dimi aa: “Saŋgalaa cho le Mɛlɛka Yaawɛɛ.”  (Choobu 1:​20, 21; 2:​10) Mi che bɛɛ mi sul ndɔɔ a chuauwaa nduaa hialuŋ ndu, vɛlɛ mi Setana duau ndu naa wɔɔŋ wɔɔŋndo choo, kɛ o feŋaŋ o pimbi ndɔ simiaa choo le. Le hei, Setana ndoo feŋaŋndɔ ndu kɔɔli le.

8. Nɛi cheleŋ kuɛɛ Setana soliŋ yɛ vɛlɛ kpeku le Choobu faŋaa o laalaŋ ndɔɔ choo?

⁸ Mi Setana soliŋ vɛlɛ nɛi cheleŋ kpeku. Mbo tosa mi chaaŋaa yaa waa Choobu wa nyiinduu ndu choolaŋ choo. Nduyɛ ma tosa mi Choobu sinaŋ maa o cho wana sɔvɛ le. Mi puaa haa dimi maa le hakila o tosa laŋ, sɔɔŋ palaŋ komal ndu ni. (Choobu 22:​5-9) Ma kindiŋ le tosaa mbo yiyaŋ maa, mɛɛ mɛɛ o tosa sɔɔŋ kɛndɔŋ, Mɛlɛka hini kɔl a muŋ te. (Choobu 4:​18; 22:​1-2, 3; 25:​4) O dimi niŋ, a wa kindiŋndo le tosaa mbo kiisaŋ a kaala Mɛlɛka nɔ le ndu wo okɔɔ. Ma ke ndu yiyaŋndo maa Mɛlɛka manda ndu niŋ te, vɛlɛ maa tɔnɔ cho o ndu piɛiyo niŋ te. Nyɛ nda dimul Choobu wo ndoo tiuba mbo tosa mbo kɛɛ tiindaŋndo dɔwɔɔ o Chɛhowa niŋ.

9. Yɛɛ mala yɛ Choobu mbo nɔ kɔl simulaa, nduyɛ mbo lo o tiindaŋ ndɔɔ choo mi che bɛɛ mi sɔɔŋ palaŋ komal ndu?

⁹ Yiyaŋndɔ a hei okɔɔ. Choobu cho ichali o pultaŋ niŋ, nduyɛ mbo wa nyɛ nɛiyaa sinaŋndo tau. (Choobu 2:​8) Chaaŋaa nduaa cho ndu dimullo maa o cho wana kɛndɛ le, nduyɛ maa sɔɔŋ o cho tosaa woŋ cho Mɛlɛka kɔllo nɛŋi le. Sɔɔŋ palaŋ cho ndu choo, mɛɛ pou lusulɛiyo wa nuaa waŋndo o lebol lɛ. Mɔnɛi cho ndu tau le chuauwaa nduaa sɔla piɔmndo wa. O tasela ndɔ, mbo mei doŋ, o suu nyɛ o nyɛ le. (Choobu 2:​13–3:​1) Naapum, mi chaaŋaa nduaa yaa wa yiyaŋ maa le mɛɛ o mei doŋ yɛ, keŋ cho tosa mbo faŋaŋ o laalaŋ ndɔɔ choo. Kɛ keŋ yɔŋnuŋ kposoŋ te. Kanifuule mɛɛ teleŋ tiŋ hiou, naapum mi Choobu heelu hɔlla, okoŋ mbo dimul chaaŋaa nduaa yaa waa kaŋ kpendekele aa: “I wu lende, I feŋaŋ o pimbi ni simiaa choo le!” (Choobu 27:​5, NWT) Yɛɛ mala yɛ Choobu mbo nɔ kɔl simulaa waa nuaa, nduyɛ mbo lo o tiindaŋ ndɔɔ choo mi che bɛɛ mi sɔɔŋ palaŋ komal  ndu? A teleŋ o wa bɛɛ o kɔl tambɛi bɛndoo niŋndo, ndoo nɔ tiindaŋndo kɛ maa Mɛlɛka ndɔ kaalaa cho ndu soli leniŋ. Ndoo sina maa o yɔŋ bɛɛ mbo vi, Chɛhowa wa ndu miŋgi yoomu.—Choobu 14:​13-15.

10. Yɛɛ bundɛi Choobu ve pɛɛku yɛ naa?

¹⁰ Nyɛ yɔŋnuŋ Choobu wo pɛɛku naa maa, Setana beŋ naa le miŋ mal Chɛhowa piɛiyo le. Nduyɛ maa Chɛhowa sina sɔɔŋ komal naa woŋ kpou. O pɛɛku naa vɛlɛ sɔɔŋ sɔvɛŋ cheleŋ. Ŋ tofaŋndɔ sɔɔŋ kulloŋ ŋpum ŋ naŋ pɛɛku Choobu o ba woŋ.

11. Te ŋ hiou pɛ lachi a tiindaŋndo dɔwɔɔ o Chɛhowa niŋ, vɛɛ keŋ mala yɛ naa? (Chemisi 4:​7)

¹¹ Mi Choobu chɔm kpendekele maa, te ŋ hiou pɛ lachi a tiindaŋndo dɔwɔɔ o Chɛhowa niŋ, mi keŋ mala naa miŋ biunuŋ tɔɔndaŋ kɛ kɛ komal naa pɛ, nduyɛ miŋ simul Setana. Yɛɛ cho yɛ wa fulamakɔɔlioo? Baabuiyo dimul naa maa, o cho naa nyaanɔŋ.—Nuawɔ Chemisi 4:​7.

12. Vɛɛ tiindaŋ Choobu ndoo nɔ maa Mɛlɛka cho hunɔɔ waŋnda miŋgi yoomu wo luei yɛ ndu yoomuaŋ?

¹² Ŋ nɔ miŋ nɔ laalaŋ kala kalaa maa Mɛlɛka cho hunɔɔ waŋnda miŋgi yoomu. A mɛɛ naŋ che o buŋgɛi naŋ hiou ve niŋ yɛ, mi Setana soliŋ siooŋii piɔmndo kpeku le tosaa miŋ faŋaŋ o pimbi naa simiaa choo. Mbo dimi maa, Choobu cho nyɛ o nyɛ malɔɔ, o yɔŋ bɛɛ chaŋyɛi ndoo nɔ a Chɛhowa ve le halikpeŋ mbo piŋi yoomu ndɔɔ. Kɛ choolaŋ Setana ndoo dimi laŋ ni. A teleŋ Choobu ndoo yiyaŋ maa o hiŋ piɔmndo sɔla wo bɛɛ, o feŋaŋ o pimbi ndɔ simiaa choo le. Tiindaŋ ndoo nɔ maa Chɛhowa cho wana kɛndɛ, nduyɛ maa o cho ndu soli o dɛnɛpalaa koŋ niŋndo mala ndu ni mbo biunuŋ. Ndoo nɔ tiindaŋndo maa te Chɛhowa soli ndu o dɛnɛpalaa koŋ niŋ te, mɛɛ o cho ndu miŋgi yoomu o chilaŋ niŋ. Choobu ndoo nɔ tiindaŋ kala kalaa maa, Mɛlɛka cho hunɔɔ waŋnda miŋgi yoomu. Te naa bɛɛ nɔ pɛ tiindaŋ kala kalaa maa Mɛlɛka cho hunɔɔ naa miŋgi yoomu, keŋ tosa o yɔŋ bɛɛ ma kɔŋgɔlaŋ naa maa a cho naa diyɔɔ, ŋ feŋaŋ o pimbi naa simiaa choo le.

13. Le yɛɛ naŋ nɔ yɛ miŋ handu kɔllo o nɛila Setana soliŋ kpeku le Choobu nyɛpalaa tusioo choo laŋ choo?

¹³ Ŋ nɔ miŋ handu kɔllo o nɛila Setana soliŋ kpeku le Choobu nyɛpalaa tusioo choo laŋ choo. Kanifuule, nɛila pilɛ la laŋ kpe o cho hau soliŋndo kpeku ni le naa nyɛpalaa tusioo choo. Tofawɔ nyɛ Setana dimi wo. Mbo dimi aa: “Waŋndo [o cho ko Choobu le] mbo yɔŋgu nyɛm ndɔŋ kpou le yoomu ndɔɔ baŋaa.” (Choobu 2:​4, 5) O dimi niŋ, dimioo Setana wa ni maa ŋ kaala Chɛhowa a kɔllo kpou le, nduyɛ maa ŋ cho ndu kɔɔ mulul le halikpeŋ miŋ piŋi yoomu naa. Mi Setana dimi vɛlɛ maa Mɛlɛka kaala naa le. Nduyɛ maa o chi sɛmbɛ naŋ duau le ndu piɛiyo wo o sɔvɛ le. Naŋ cho Chɛhowa piɛiyo wa, ŋ sina nɛila kaŋgalaala Setanalaŋ. Le hei, pesiŋ bɛɛ ŋ laalaŋ choola ndɔlaŋ ndaŋ te.

14. Te tɔɔndaŋndo komal naa pɛ, vɛɛ keŋ mala yɛ naa? Chɔmndɔ tamaseliiyo.

¹⁴ Te nyɛpalaa komal naa pɛ, ŋ nɔ miŋ sina maa dikeŋnaŋndo naŋ sɔla koŋ ni le chɔɔ mɛɛ kpɛ tiindaŋ naa cho o kala yɛ. Mi sɔɔŋ palaŋ keeku Choobu choo woŋ mala ndu le sinaa naa o vi ŋdial la, nduyɛ mbo siɛɛnduu biondɔŋnda ndɔlaŋ. Le tamaseliiyo, mbo pɛɛku maa o nɔ mbo chɔɔlu kaa tusiaŋndo nɔ mbo hiou maa paandu. (Choobu 42:​3) Naa bɛɛ te tɔɔndaŋndo komal naa pɛ, mi keŋ mala naa le sinaa naa naŋ nɔ miŋ tosa hiouwɔɔ lachioo wa. Ma duau puaapilɛnɔ pilɛ diolaŋ Nikoli * o chiɛi manyumndo niŋ, mi che bɛɛ ndoo nɔ kɛndiaa sɔvɛ le. Mbo dimi aa: “Chiɛi manyumndo cho ko maa maasii nda soliŋ kpeku le chɔɔ naa cho waŋndo o dialloŋ niŋndo. Mi chiɛi manyumndo chɔm suliŋnda leKilisiɔŋnda ŋ nɔ laŋ.” Te ŋ sina pɛ naa naŋ nɔ dialuŋ vilɛiyoŋ nda, mɛɛ ŋ nɔ miŋ tosa wallo kalaŋ le muŋ siɛɛnduuwo.

15. Nɛɛ naŋ nɔ yɛ miŋ yaŋ nilaŋ, nduyɛ le yɛɛ?

 ¹⁵ Ŋ nɔ miŋ yaŋ Chɛhowa nilaŋ, o cho yaamɔɔwaa naa le kanifuule, o chɔm niŋ maa ŋ tiuba miŋ dɔu laalaŋndo o ndu niŋ. Mi Choobu yaŋ nilaŋ yekeŋ mɛɛ Chɛhowa wa suɛi o ndu lo. O dimi niŋ, nyuuniaa Mɛlɛka wa Choobu ni aa: ‘A cho pa chɔɔ kpaaya nuu o nyɛm ya toosiaa woŋ niŋ? I sina nyɛ o nyɛ cho num choo. Baa a yiyaŋ pa maa I tiuba mi manda num te?’ Mi Choobu muli o nɛi tusiaŋ niŋ, nduyɛ mbo chɔm balika melaa le sɔɔŋ kɛndɛŋ Chɛhowa wa ndu tosallo woŋ. Mbo dimi aa: “Paandu tueiyɔɔ koni ya ii tuei a num okɔɔ ni Mɛlɛka, kɛ I che niŋ num a hɔlte nileŋ pɛɛŋ.” (Choobu 42:​5) Naapum Choobu wa wɔ ichali o pultaŋ niŋ, pauve wa ndu lekɔɔ, nduyɛ o wa mɔnɛi biyɔɔ le chuauwaa nduaa vi wa, mbo dimi diomndaŋ ndaŋ. A koŋ kpou, mi Chɛhowa chɔm Choobu maa o kaala ndu, nduyɛ maa o hini kɔl a ndu.—Choobu 42:​7, 8.

16. A mɛɛ Aisaya 49:​15, 16 dimi yɛ, yɛɛ naŋ nɔ yɛ miŋ kɛsiŋ o kɔl te sɔɔŋ kindilaŋ komal naa pɛ?

¹⁶ Hau bɛɛ, mi waŋnda dimul naa diomnda wɔɔŋndaŋ, nduyɛ ma bii naa naŋ chaa ŋ cho wanaa sɔvɛ le. Ma kindiŋ le naa pilɛŋ pilɛŋnda ɔɔ le kɔɔna Chɛhowaa tɔɔ tɛɛmbuuwo. Nduyɛ pɛŋ, “ma hɛɛnduu [naa] choola wɔɔŋ wɔɔŋndaŋ choo.” (Maa. 5:​11) Bundɛi Choobu ve pɛɛku naa maa, Chɛhowa nɔ tiindaŋndo o naa niŋ le lo lechoo wo chɔmndo o ndu lo o yɔŋ bɛɛ mi tɔɔndaŋ ndaŋ le komal naa. O kaala naa tau, nduyɛ pɛŋ, o mel wanaa duau tiindaŋ ndaa o ndu niŋ nda le. (Nuawɔ Aisaya 49:​15, 16.) Lelaŋ, yaŋ nilaŋ o choola yaamɔɔwaa Mɛlɛkaa cho pɛŋgɛlaa laŋ te. Puaapilɛnɔ naa pilɛ cho o lɛŋnde Tɔkileŋ niŋ diolaŋ Chemisi. Teleŋ pilɛ,  mi nyɛkindilaa kala kalaa komal ndu nda yuŋgu ndɔɔ. Mbo dimi aa: “Miŋ bii bila maa te ŋ yaŋ pɛ nilaŋ o choola nda dimi a wanaa Mɛlɛkaa okɔɔ laŋ, keŋ cho naa kɔllo tɛɛmbuu tau. Lelaŋ, miŋ handu kɔllo o tiindaŋ naŋ nɔ o Masale Mɛlɛkaleŋ niŋndo choo. Nduyɛ miŋ hiau lachi a yɔŋgɔŋndo tau o wali Chɛhowaa niŋ. Fulamakɔɔlioo wa ni, mi keŋ mala naa le hiouwɔɔ lachi a waa a kɔl kɛndɛ.” Maa Choobu, ŋ nɔ miŋ yaŋ Chɛhowa nilaŋ! Choola yaamɔɔwaa naa dimi laŋ la tɛɛmbuu tiindaŋ naŋ nɔ wo le.

17. Yɛɛ ŋ pɛɛku yɛ o tamasi puaa a waŋ laanduaa laalaŋaa Hibuluiya bolle 11 soo a nda okɔɔ wa niŋ?

¹⁷ Choobu cho waŋndo opilɛ o buɛiyaa Chɛhowaa tɛɛŋ a chɔm kɔl simulaa nduyɛ ma biunuŋ nyɛkindilaa kala kalaa wa. Mɛɛ Pɔɔl wa Hibuluiya yauwo poonyiallo, mbo suaa a buɛiyaa Chɛhowaa haa apum okɔɔ. Mbo veelu nda pɛŋ aa ‘seiyaa faŋga bɛnduaa.’ (Hibu. 12:​1) Mi nyɛkindilaa kala kalaa komal waŋnda haa kpou. Kɛ ma lo o laalaŋ ndaa choo haaa ma sɔla piɔmndo. (Hibu. 11:​36-40) Baa biuwɔŋ ndaa a wali kala kala nda tosa wo wa pa fondo fuu? Sako. Mi che bɛɛ teleŋ nda wa yoomu wo a chi mɛɛla Mɛlɛkalaŋ kpou o peelɔŋndo le, kɛ ma hiau lachi a tiindaŋ ndaa dɔwɔɔ o Chɛhowa niŋ. Nduyɛ le mɛɛ ndaa nɔ tiindaŋndo maa Chɛhowa hini kɔl a nda yɛ, mi keŋ mala nda ma laalaŋ kɛsɛ maa a cho mɛɛla ndɔlaŋ chɔ o peelɔŋndo. (Hibu. 11:​4, 5) Tamaseliilaŋ ndaŋ la nɔla mi la luei naa yoomuaŋ le hiouwɔɔ lachi a tiindaŋndo dɔwɔɔ o Chɛhowa niŋ.

18. Yɛɛ naŋ nɔ yɛ miŋ kɛɛsiaŋ o kɔl le tosaa? (Hibuluiya 11:​6)

¹⁸ Hau, chieeŋndo cho hiouwɔɔ lachi a wɔuleŋ. (2 Timo. 3:​13) Nduyɛ, Setana cho hiouwɔɔ lachi a wanaa Mɛlɛkaa nyɛpalaa tusioo choo. Mɛɛ mɛɛ sɔɔŋ palaŋ komal naa o chilaŋ niŋ, maa ŋ kɛɛsiaŋ o kɔl le hiouwɔɔ lachi a wallo tosaa kalaŋ le Chɛhowa. Ŋ nɔŋnuŋ laalaŋndo kɛsɛ maa, “o Mɛlɛka cho yoomu wo niŋ naŋ dɔu tiindaŋ naa ni.” (1 Timo. 4:​10) Loonuŋ maa, mi Mɛlɛka fanda Choobu le mɛɛ o lo o laalaŋ ndɔɔ choo yɛ. Nduyɛ mi keŋ chɔm maa, “wana inyiɛɛyo a wana ikɛndɔɔ [o] cho ni.” (Chemi. 5:​11) Maa naa bɛɛ chɔmnuŋ lo lechoo wo o Chɛhowa lo, nduyɛ miŋ nɔ tiindaŋndo maa, “mbo fanda wanaa cho ndu nuuviaa wa.”—Nuawɔ Hibuluiya 11:​6.