DISOLO YA KULONGOKA 27
‘Tula kivuvu na Yehova’
‘Tula kivuvu na Yehova; vanda na bukindi mpe ngolo na ntima.’—NKU. 27:14.
NZIMBU 128 Endure jusqu’à la fin
YINA BETO KE LONGOKA a
1. a) Wapi kivuvu Yehova me pesa beto? b) Yinki zola zonza ‘kutula kivuvu na Yehova’? (Tala “Yina ya zola zonza.”)
YEHOVA me pesa kivuvu ya kitoko na ba yina nyonso ke zolak’ yandi. Na mwa bilumbu yina ke kwiza, yandi ke katula bimbevo, bampasi, mpe lufwa. (Luz. 21:3, 4) Yandi ke sadisa ‘bantu ya kukuluka’ yina ke tulá kivuvu na yandi na kukumisa ntoto nyonso paradis. (Nku. 37:9-11) Mpe yandi ke sala ti, mosi na mosi ya beto vanda na kindiku ya ngolo na yandi kulutila yina beto ke na yawu bubu yayi. Ya ke kivuvu mosi ya kitoko! Kasi yinki ke natá beto na kuvanda na kivuvu ti bamambu yayi Nzambi zonzá ke lungana? Yehova ke salá ntangu nyonso bamambu yina yandi ke zonzaka. Ni na yawu beto me lunga ‘kutula kivuvu na Yehova.’ b (Nku. 27:14) Beto ke lakisá ti beto ke na kivuvu na Yehova, ntangu beto ke vingilá na ntima mosi mpe na kilengi nyonso ti yandi lungisa bamambu yina yandi me kanisa kusala.—Iza. 55:10, 11.
2. Wapi mambu Yehova ke na lungisá bubu yayi?
2 Yehova me lakisa ti yandi ke lungisá bamambu yina yandi ke zonzaka. Beto tala kifwani mosi ya kitoko yina ke na lakisak’ yawu. Na buku ya Luzabusu, Yehova zonzá ti na ntangu ya beto, yandi ke vukisa bantu ya makanda nyonso, mafunda nyonso, mpe ya bandinga nyonso samu ba sadila yandi na bumosi. Ba me zabila bantu yayi na nkumbu ya ‘kimvuka ya nene ya bantu.’ (Luz. 7:9, 10) Na kati ya bawu ya ke na babakala, bakento, mpe bana ya mitindu na mitindu yina me katuka na bisika mingi ya yinza. Kasi ba me kumá dikanda mosi, yina ke na kizunu. (Nku. 133:1; Yoa. 10:16) Mpe ba ke na tiya na kisalu ya kusamuna. Ntangu nyonso, ba ke ya kuyidama samu na kuzonzila kivuvu ya bawu na yinza ya malu-malu, na ba yina nyonso ke kuwa bawu. (Mat. 28:19, 20; Luz. 14:6, 7; 22:17) Si nge ke na kati ya kimvuka ya nene ya bantu, ntembe ve, kivuvu ya nge na bamambu ya mbote yina ke na kwizá, ke ntalu na meso nge.
3. Wapi yina ke dikanisi ya Satan?
3 Satan ke na nsatu ya kukatula kivuvu yina ke na nge. Dikanisi ya yandi ke ya kunata nge na kukanisa ti Yehova ke kipeke ve nge, mpe yandi ke lungisa ve bamambu yina yandi zonzaka. Si Satan lenda kukatula kivuvu ya beto, beto ke vanda ya kulemba, mpe beto lenda bika kusadila Yehova. Faso beto ke tala yawu, Satan sosá kukatula kivuvu ya Yobi mpe kunata yandi na kubika kusadila Yehova.
4. Yinki beto ke zonzila na disolo yayi? (Yobi 1:9-12)
4 Na disolo yayi, beto ke tala yinki Satan salá samu na kunata Yobi na kuvanda dyaka ve ya kukangama na Yehova. (Tanga Yobi 1:9-12.) Beto ke tala mpe yinki kifwani ya Yobi ke na longá beto, mpe samu na yinki beto zolá zimbana ve ti Yehova ke zolá beto, mpe yandi ke lungisa bamambu yina yandi zonzaka.
SATAN SOSÁ KUKATULA KIVUVU YA YOBI
5-6. Yinki kuminá Yobi kaka na kati ya mwa bilumbu?
5 Yobi vandá nata luzingu mosi ya kitoko. Yandi vandá na kindiku ya ngolo na Yehova. Yandi vandá na bana mingi mpe kilengi vandá na kati ya dikanda ya yandi. Dyaka, yandi vandá na bimvwama ya mingi. (Yobi 1:1-5) Kaka na kilumbu mosi, yandi zimbisá bima nyonso yina vandá na yandi. Ya ntete, bimvwama ya yandi. (Yobi 1:13-17) Na manima, bana ya yandi yina yandi vandá zolá mingi kufwá bawu nyonso na mbala mosi. Kanisa fioti na bamambu nyonso yina kuminak’ yandi. Ya ke salá bibuti mpasi ya kulutila ntangu mwana ya bawu kaka mosi ke kufwaka. Na yawu, kanisa na mpasi, mawa mpe faso ntima ya Yobi na ya kento ya yandi lwalá ntangu ba kwizá zaba ti bana ya bawu nyonso 10, yinzo me bwidila bawu mpe ba me kufwa bawu nyonso. Ya ke pamusá ve beto na kutanga ti Yobi pasulá bilele ya yandi, mpe losá nzutu na ntoto.—Yobi 1:18-20.
6 Satan suká ve kaka kuna. Yandi pesá Yobi kimbevo mosi ya mpasi mpe ya nsoni. (Yobi 2:6-8; 7:5) Tekila bamambu yayi kubwa, bantu vandá pesá Yobi buzitu ya mingi. Ba vandá kwiza na yandi na kuzwa malongi. (Yobi 31:18) Ntangu yayi, bawu nyonso me manga yandi. Bampangi ya yandi, bandiku ya yandi ya ntima ata mpe bisadi ya yandi, bikak’ yandi.—Yobi 19:13, 14, 16.
Bubu yayi bampangi mingi ya kento na ya bakala lenda zaba yinki ya salá Yobi na ntima ntangu bampasi kuminak’ yandi (Tala paragrafe 7) d
7. a) Yinki Yobi vandá kanisa samu na bampasi ya yandi, kasi yinki yandi mangá kusala? b) Wapi bamambu ya mpasi mutindu yina ke na kizizi yayi lendá kumina mukristo?
7 Satan vandá na nsatu Yobi kanisa ti yandi vandá na kati ya bampasi samu Yehova dasukilak’ yandi. Samu na kunata yandi na kuvanda na dikanisi yayi, Satan filisá mupepe ya ngolo samu na kumwangisa yinzo yina bana nyonso ya Yobi vandá ya kuvukana samu na kudya. (Yobi 1:18, 19) Samu na kufwa bibulu ya Yobi mpe bisadi ya yandi yina vandá kipe bawu, Satan salá ti tiya katuka na zulu mpe yoka bawu. (Yobi 1:16) Samu mupepe na tiya yina katuká na zulu, Yobi kanisá ti ni Yehova filisak’ yawu. Ya natá Yobi na kukanisi ti yandi salá mambu yina nyongisá Yehova. Ata faso yina, Yobi mangá kuzonzila yimbi ya Tata ya yandi ya mazulu. Yobi ndimá ti na kati ya bamvula mingi, Yehova pesak’ yandi bima mingi ya mbote. Na yawu, yandi kanisá ti samu yandi ndimá na ntima mosi bima ya mbote, yandi zolá ndima mpe bima ya yimbi. Yandi zonzaka: ‘Bika ti nkumbu ya Yehova baka kaka lukumu.’ (Yobi 1:20, 21; 2:10) Ata yandi vandá dyaka ve na bimvwama, bana ya yandi nyonso kufwá mpe yandi kuzwá kimbevo ya mpasi mingi, Yobi bikaná kaka ya kukangama na Yehova. Kasi Satan talá ti ya lungá ve.
8. Banani Satan sadilá samu na kukatula kivuvu ya Yobi?
8 Na manima, Satan sadilá bantu tatu yina vandá zonzá ti ba ke bandiku ya Yobi samu na kunata Yobi na kukanisa ti yandi ke kaka muntu ya mpamba. Babakala yayi zonzá ti Yobi vandá na kati ya bampasi samu yandi salá bamambu mingi ya yimbi. (Yobi 22:5-9) Ba sosá mpe kunata yandi na kutala ti bangolo nyonso yina yandi vandá sala samu na kusala bamambu ya mbote, Nzambi vandá kipe ve yawu. (Yobi 4:18; 22:2, 3; 25:4) Ba sosá kunata Yobi na kukanisa ti Nzambi ke zolá ve yandi, ti yandi ke kipeke ve yandi, mpe nyonso yina yandi ke salá samu na kusadila Nzambi ke mpamba na meso ya yandi. Bamambu nyonso ba vandá zonza, ya vandá samu na kunata Yobi na kuvanda dyaka ve na kivuvu.
9. Yinki sadisá Yobi na kuvanda na bukindi mpe ngolo?
9 Kanisa ntete. Yobi ke ya kuvanda na kati ya fundu-fundu. Nzutu ya yandi nyonso ke na salak’ yandi mpasi ya kulutila. (Yobi 2:8) Babakala yina ke ya kuvanda na yandi ke na zonzá ntangu nyonso ti yandi ke muntu ya yimbi, mpe bamambu nyonso ya mbote yina yandi salá na ntama, ke kaka mpamba. Bampasi ya yandi ke kilo faso matadi ya nene. Mpe mawa samu na lufwa ya bana ya yandi ke faso mbele ba me tula yandi na ntima. Na kubanda, Yobi ke swi. (Yobi 2:13–3:1) Kasi si babakala yayi ke na kanisá ti Yobi ke swi samu yandi me manga Nzambi, ba ke na vunamaka. Na ntangu yina Yobi talá ti ya me lunga, ntangu ya nkaka yandi nanguná yintu, talá bandiku ya yandi ya luvunu mpe zonzaka: ‘Tii munu ke kufwa, munu ke bika ve kukwikama ya munu!’ (Yobi 27:5) Yinki sadisá Yobi na kuvanda na bukindi mpe ngolo ata bampasi nyonso yina vandá kumina yandi? Ata ntima ya yandi vandá ya kulwala mingi, Yobi biká ata fioti ve kuvanda na kivuvu ti, Nzambi ya yandi ya luzolo ke manisa bampasi ya yandi. Yandi zabá ti ata yandi kufwa, Yehova ke vumbula yandi na lufwa.—Yobi 14:13-15.
WA’ FASO BETO LENDA LANDA KIFWANI YA YOBI?
10. Yinki disolo ya Yobi ke na longá beto?
10 Disolo ya Yobi ke na longá beto ti Satan lendá nata ve beto na ngolo na kumanga Yehova, mpe Yehova zaba bamambu ya mpasi yina ke na kuminá beto. Disolo ya Yobi ke na sadisá mpe beto ne kuzaba mbote-mbote bamambu yina Satan zonzá samu na bantu mpe Yehova. Beto tala mwa bileso yina beto lenda longoka na kifwani ya Yobi.
11. Kana beto bika ve kutula ntima na Yehova, yinki ke salama? (Zaki 4:7)
11 Disolo ya Yobi ke na lakisá ti, si beto bika ve kutula ntima na Yehova, beto ke lenda kukanga ntima na mantwala ya bampasi ni bampasi yina lenda kumina beto, mpe Satan ke lenda ve kubwisa beto. Yinki ke salama na manima? Biblia ke zonzá ti Satan ke kima ntama na beto.—Tanga Zaki 4:7.
12. Wa’ faso kivuvu ti Nzambi ke vumbula bantu ya kufwa pesá Yobi ngolo?
12 Beto me lunga kuvanda na kiminu ya ngolo ti bantu ya kufwa ke vumbuka. Mutindu disolo yina lutá zonzilak’ yawu, Satan ke sadilá boma ya lufwa samu na kusosa kunata beto na kubika Yehova. Satan zonzá ti Yobi ke sala nyonso ata mpe kubika kusadila Yehova, samu na kubumba luzingu ya yandi. Kasi Satan vunamaka. Ata na ntangu Yobi vandá tala ti yandi ke kufwa, yandi bikaná kaka ya kukangama na Yehova. Kiminu ya yandi na ntima ya mbote ya Yehova, mpe kivuvu ya ngolo yina yandi vandá na yawu ti Nzambi ke manisa kaka na kuyidika bamambu ya yandi, sadisak’ yandi na kukanga ntima. Yobi vandá na kiminu ti ata Yehova yidika ve bamambu ya yandi ntangu yandi ke ntete moyo, yandi ke vumbula yandi na lufwa na mantwala. Kivuvu ya yandi ti Nzambi ke vumbula bantu ya kufwa vandá ngolo. Si kivuvu ya beto ke ngolo na bantima ya beto, beto ke bikana kaka ya kukangama na Nzambi ata ba zonza na beto ti beto ke kufwa, to ba ke kufwa beto.
13. Bamambu yina Satan salá na Yobi ke na longá beto yinki?
13 Beto me lunga kuzaba mbote-mbote nyonso yina Satan sadilá samu na kubwisa kiminu ya Yobi, samu ni yawu mpe yandi ke sadilá bubu yayi samu na kubwisa beto. Tala bamambu yayi Satan zonzaka: ‘Muntu [kaka Yobi ve] ke pesa konso kima yina yandi kele na yawu samu na luzingu ya yandi.’ (Job 2:4, 5) Satan zonzá ti luzolo ya beto samu na Yehova ke ve ya tsyeleka. Samu na yandi, beto ke manga kusadila Yehova kana luzingu ya beto ke na mpasi. Satan zonzá mpe ti Nzambi ke zolá ve beto. Mpe, bangolo nyonso yina beto ke salá samu na kusepelisa yandi ke kaka mpamba na meso ya yandi. Samu beto zaba yina Satan ke sosá kusala, beto ke tulá ve ntima na luvunu ya yandi.
14. Yinki bampasi lenda sadisa beto na kuzaba? Pesa kifwani.
14 Bampasi yina ke kuminá beto ke sadisá beto na kuzaba faso ke ntima ya beto. Bampasi ya Yobi sadisak’ yandi na kuzaba mwa bifu ya yimbi yina vandá na yandi, mpe na kuyidika yawu. Na kifwani, yandi kwizá tala ti yandi vandá na nsatu ya kukulisa kukuluka ya yandi. (Yobi 42:3) Beto mpe lenda zaba faso ke ntima ya beto ntangu beto ke na kati ya bampasi. Nikolay, c mpangi mosi ya bakala yina ba tulá na bokolo ata yandi vandá na kimbevo mosi ya ngolo, me zonza: “Bantangu yina mu lutisá na boloko vandá mutindu munu me sala radio ya ntima ya munu. Ya lakisá munu bifu ya mbote yina mu vandá na nsatu ya kukulisa.” Ntangu beto ke zabá bifu ya yimbi yina ke na beto, beto ke salá bangolo na kukatula yawu.
15. Nani beto me lunga kuwa, mpe samu na yinki?
15 Beto me lunga kuwa Yehova, kasi bambeni ya beto ve. Yobi kuwá mbote-mbote ntangu Yehova vandá zonza na yandi. Samu na kunata Yobi na kutadila bamambu na mutindu ya mbote, Yehova yufulak’ yandi byuvu ya faso yayi: ‘Bima yina mu yidiká ke na lakisá kwandi nge ve ti mu ke na ngolo ya mingi? Mu zaba bamambu nyonso yina me kumina nge. Nge kanisa ti mu ke ve na ngolo ya kuyidika bamambu ya nge?’ Na ntima ya kukuluka nyonso, Yobi pesá mvutu na Yehova. Yandi vutulá matondo ya mingi samu na ntima ya mbote ya Yehova. Yandi zonzaka: ‘Makutu ya munu me waka mambu ya nge, kasi ntangu yayi munu me tala nge na meso ya munu.’ (Yobi 42:5) Ntangu Yobi zonzá bamambu yayi, ntangu ya nkaka yandi vandá ntete ya kuvanda na kati ya fundu-fundu, nzutu ya yandi nyonso ya kufuluka na bamputa, mpe ntima ya yandi ya kulwala samu na lufwa ya bana ya yandi. Ata mpila yina, Yehova lakisá na Yobi ti yandi biká ve kuzola yandi, mpe yandi vandá ndima yandi.—Yobi 42:7, 8.
16. Faso Izaya 49:15, 16, ke na lakisak’ yawu, yinki beto me lunga kuzimbana ve ntangu ba ke meká kiminu ya beto?
16 Bubu yayi mpe, bantu lenda finga beto mpe kubakila beto mutindu bantu ya mpamba. Ba lenda sosa kubebisa nkumbu ya beto to ya kimvuka ya Yehova, mpe ‘kuvunina beto mambu ya mutindu na mutindu.’ (Mat. 5:11) Disolo ya Yobi ke na longá beto ti, Yehova ke tulá bisadi ya yandi ntima. Yandi ke na kivuvu ti na mantwala ya bampasi, ba ke bikana kaka ya kukangama na yandi. Yehova zola beto, mpe yandi lenda bika ata fioti ve ba yina ke tulá kivuvu na yandi. (Tanga Izaya 49:15, 16.) Kulanda ve bamambu nyonso ya luvunu yina bambeni ya Nzambi ke zonzaka! James, mpangi mosi ya bakala, ke vandá na Turquie. Yandi na dikanda ya yandi kutaná na bamambu yina meká na faso ya ngolo kiminu ya bawu. Yandi me zonza: “Beto kwizá tala ti kuwa bamambu ya luvunu yina ba ke zonzá na nkumbu ya bisadi ya Nzambi, vandá lembisa beto. Na yawu, beto vandá kulisa kivuvu ya beto na Kimfumu ya Nzambi, mpe beto vandá sala mingi na kisalu ya Yehova. Ni yina salá ti beto bumba kilengi ya beto.” Mutindu Yobi, beto ke wá Yehova. Na yawu, beto ke biká ve luvunu yina bambeni ya beto ke zonzá, bebisa kivuvu ya beto.
KIVUVU YA NGE KE SALA TI NGE KUBWA VE
Yehova sakumuná Yobi samu yandi bikaná ya kukangama na yandi. Yehova pesá Yobi na kento ya yandi luzingu ya kilengi mpe ya yinda (Tala paragrafe 17) e
17. Yinki nge ke na longoká na kifwani ya bisadi ya Yehova ya kento na ya bakala yina ke na Baebre kikapu 11?
17 Kaka Yobi ve lakisá bukindi mpe ngolo na kati ya bampasi ya kulutila. Bisadi ya nkaka ya Yehova mpe bikaná ya kukangama na yandi na kati ya bampasi. Na mukanda ya yandi ya Baebre, Polo zonzilá bisadi mingi ya Yehova ya nkaka yina lakisá kiminu ya ngolo na kati ya bampasi. Yandi bokilá bawu “nkonga [. . .] ya nene ya bambangi.” (Ebr. 12:1) Ata bampasi ya ngolo, ba bikaná ya kukangama na Yehova luzingu ya bawu nyonso. (Ebr. 11:36-40) Nyonso yina ba vandá sala samu na kukanga ntima mpe kisalu ya bawu ya ngolo vandá kwandi ya mpamba? Ata fioti ve! Ata ti na ntangu ba vandá moyo ba talá ve kulungana ya bamambu yina Yehova zonzá, kasi ba biká ve kuvanda na kivuvu na Yehova. Mpe samu ba zabá ti Yehova vandá sepela na bawu, ba vandá na kiminu ti ba ke tala kulungana ya bamambu yina yandi zonzaka. (Ebr. 11:4, 5) Kifwani ya bawu lenda kumisa ngolo nsatu ya beto ya kutula kaka kivuvu na Yehova.
18. Yinki nge ke sala? (Baebre 11:6)
18 Beto ke na zingá na yinza yina ke na kumá kaka yimbi. (2 Tim. 3:13) Nabunu Satan manisa na kumeka kiminu ya bisadi ya Nzambi. Bampasi ni bampasi yina beto ke kutana na yawu na mantwala, beto bika ve kusala mingi samu na Yehova, samu beto zaba ti “beto tulaka kivuvu ya beto na Nzambi ya moyo.” (1 Tim. 4:10) Kuzimbana ve ti, bambote yina Yehova pesá na Yobi ke lakisá ti “Mfumu kele ya kufuluka na mbote mpe na kyadi.” (Zaki 5:11) Bika ti beto mpe vanda kaka ya kukangama na Yehova, samu beto zaba ti yandi ke pesa bambote na “bayina ke sosaka yandi.”—Tanga Baebre 11:6.
NZIMBU 150 Cherche Dieu pour être délivré
a Ntangu nge ke kanisá na muntu yina lutisá bantangu ya mpasi ya kulutila, ntangu ya nkaka ni Yobi ke kwizilá nge na yintu. Yinki beto lenda longoka na bamambu yina kuminá kisadi ya Yehova yayi? Disolo ya yandi ke longá beto ti Satan lenda nata ve beto na ngolo na kubika Yehova. Beto ke longoká mpe ti Yehova zaba bamambu nyonso yina ke na kuminá beto. Mpe kaka mutindu yandi manisá bampasi ya Yobi, ya ke na kilumbu yina yandi ke manisa bampasi ya beto. Si beto ke lakisá na ndyatulu ya beto ti beto ke na kiminu na bamambu nyonso yayi, beto ke vanda na kati ya ba yina ke ‘tulá kivuvu na Yehova.’
b YINA YA ZOLA ZONZA: Na ndinga ya Ebre “kivuvu” zola zonza “kuvingila” kima kuma na mbangu. Ya zola zonza mpe kutula ntima na muntu.—Nku. 25:2, 3; 62:5.
c Ba me soba bankumbu ya nkaka.
