1. (a) Le Yehova i mwitupe lukulupilo’ka? (b) Le ‘kukulupila mudi Yehova’ kushintulula bika? (Tala “Nshintulwilo ya Kishima.”)

 YEHOVA i mupe boba bonso bamusenswe lukulupilo lwa kutendelwa. Panopano ponka usa kupwija misongo, njia, ne lufu. (Kus. 21:3, 4) Usa kukwasha “betyepeje” bakulupile mwadi, bālamune ino ntanda ke paladisa. (Ñim. 37:9-11) Kadi usa kukwasha umo ne umo motudi ekale nandi mu kipwano kilumbuluke mpata, kutabuka ne kyotupwene nandi dyalelo. Bine, luno i lukulupilo lwa kutendelwa! Ino mwanda waka tukulupile amba milao ya Yehova isa kufikidila? I mwanda Yehova ufikidijanga nyeke byalaya. Nanshi tudi na bubinga bwendele’mo bwa ‘kukulupila mudi Yehova.’ * (Ñim. 27:14) Tulombolanga’mba tukulupile mwadi na kwilaija na kitūkijetyima kadi na nsangaji, amba Leza wetu afikidije mpango yandi yonso.​—Isa. 55:10, 11.

2. Le i bika ke bilonge kala Yehova?

² Yehova ke mwilombole kala amba ufikidijanga byalaya. Tutalei’ko’tu kimfwa kimo. Mu mukanda wa Kusokwelwa, Yehova wālaile’mo amba mu ano etu mafuku ukabungila pamo bantu ba mizo yonso, bisaka, ne ndimi, ne kwibalungila pamo mu butōtyi butōka. Dyalelo bano bantu bayukene bu “kibumbo kikatampe kya bantu.” (Kus. 7:9, 10) Nansha byomudi bana-balume, bana-bakaji ne bana, ba nkoba, ndimi ne bibidiji bishileshile, bano bantu bonso badi mu kisaka kya ndoe kadi  kidi mu bumo. (Ñim. 133:1; Yoa. 10:16) Kadi bano bantu ba mu kibumbo kikatampe, i basapudi bapyasakane. Basapulanga nyeke lukulupilo lwabo lwa ntanda milumbuluke ku muntu yense usaka kwivwana. (Mat. 28:19, 20; Kus. 14:6, 7; 22:17) Shi nobe wi wa mu kibumbo kikatampe, na bubine ukwete na bulēme luno lukulupilo lwa bintu bilumbuluke.

3. Lelo Satana udi na kitungo’ka?

³ Dyabola kasakengapo wikale na lukulupilo lwa būmi bwa kumeso. O mwanda kitungo kyandi i kya kukulengeja ukulupile amba Yehova kakusenswepo kadi kakafikidijapo milao yandi. Shi Satana wabwanya kwitulengeja tujimije luno lukulupilo, nabya tukabulwa bukankamane, kadi tubwanya enka ne kuleka’byo kwingidila Yehova. Monka motusa kwikimwena, Dyabola wāsakile kulengeja Yoba ajimije lukulupilo lwandi ne kuleka kwingidila Yehova.

4. Le i bika byotusa kubandaula mu kino kishinte? (Yoba 1:9-12)

⁴ Mu kino kishinte, tusa kubandaula’mo manwa āingidije Satana mwanda wa kuningila Yoba atyumune bululame bwandi. (Tanga Yoba 1:9-12.) Kadi tusa kwisambila’mo ne pa ñeni yotubwanya kuboila ku kimfwa kya Yoba, ne pa kine kyotufwaninwe kuvulukila’mba Leza witusenswe kadi ukafikidija milao yandi.

5-6. Le i bika byāfikīle Yoba mu kitatyi’tu kityetye?

⁵ Yoba wādi na būmi buyampe. Wādi mu kipwano kiyampe na Yehova. Wādi na kisaka kikatampe kya nsangaji, kadi wādi na bupeta buvule. (Yoba 1:1-5) Ino mu difuku’tu dimo, Yoba wājimija kisengele bintu byonso. Dibajinji, wājimija bupeta. (Yoba 1:13-17) Kupwa, bandi bana basenswe bonso bāfwa. Langulukila’po bityetye pa kino kizumba. Shi mwana umo wafu, bambutwile batyumukwanga mutyima bininge. Pano langa’po bidi kyaso, njia, ne mutyima kupepa byādi na Yoba pamo ne wandi mukaji, pobāivwene amba babo bana bonso dikumi abafu. Bine, ke kya kutulumukapo shi Yoba wāsanine bivwalwa byandi ne kupona panshi!​—Yoba 1:18-20.

⁶ Kupwa Satana wātamba’dyo Yoba ku ngitu na kumubeleka misongo isansa kadi ya bumvu. (Yoba 2:6-8; 7:5) Kumeso kwa aye kubela ino misongo, Yoba wādi muntu mulēmekibwe. Bantu bādi bakalomba madingi kwadi. (Yoba 31:18) Ino pa kubela, bādi kebamwepa. Wāelelwe na banababo, balunda, enka ne na bengidi ba mu njibo yandi!​—Yoba 19:13, 14, 16.

7. (a) Le Yoba wākulupile bika pa bitala masusu andi, ino le i bika byakālongelepo? (b) Le mwine Kidishitu ubwanya namani kwikonda na byamalwa na bino bidi pa kifwatulo kyendela pamo na musango?

⁷ Satana wādi usaka Yoba akulupile amba masusu andi atamba ku kubulwa kwitabijibwa na Yehova. Kimfwa, Satana wāingidije kivula kikomo kiponeje njibo mwādi mudīla bana bonso dikumi ba Yoba byakudya. (Yoba 1:18, 19) Kadi wāponeje mudilo mūlu wāipaya luombe lwa Yoba, enka ne bengidi bādi belulama. (Yoba 1:16) Na bubine, kivula ne mudilo byātambile ku bukomo butabukile bwa bantu. O mwanda Yoba wākulupile amba Yehova ye walengeja’byo, ne amba i mulobeje Yehova. Nansha nankyo, Yoba kāfingilepo Shandi wa mūlu. Yoba wāvulukile amba mu bula bwa myaka mivule, Yehova wāmupēle bintu bivule bilumbuluke. Kupwa Yoba wālanga’mba shi wāitabije bintu biyampe, wādi ufwaninwe ne kwitabija bintu bibi. O mwanda wānenene amba: “Dijina dya Yehova ditendelwe nyeke.” (Yoba 1:20, 21; 2: 10) Nansha Yoba byaājimije bupeta, bana, ne kubela misongo, wāshele nyeke na kikōkeji kudi Yehova. Ino Satana kāimaninepo enka papo.

8. Le i manwa’ka makwabo āingidije Satana mwanda wa kutompa Yoba?

⁸ Satana wāingidije manwa makwabo mwanda wa kutompa Yoba; wātonwene balunda basatu ba bubela ba Yoba, bamulengeje emone bu muntu wa bituputupu. Bano bana-balume bānenene amba Yoba wādi ususuka mwanda wālongele bintu bibi bivule. (Yoba 22:5-9) Kadi bāsakile kukulupija Yoba amba, nansha shi wālongele bintu bivule biyampe, Leza kēbimwenine’mopo nansha dimo. (Yoba 4:18; 22:2, 3; 25:4) Bāsakile kulengeja Yoba alange amba Leza kamusenswepo, kamutelepo mutyima, ne amba kwingidila Leza i kwa bituputupu. Bino binenwa byādi bibwanya kulengeja Yoba alange amba, kekudipo muntu ubwanya kumukwasha.

9. Le i bika byākweshe Yoba ekale na bukankamane ne bukomo?

⁹ Fwatakanya’po bidi uno mwanda. Yoba ushikete mu buto koku wikonda na misanshi. (Yoba 2:8) Balunda nandi banena’nka kunena’mba, ke muntupo muyampe kadi kekudipo kintu kyakadi mulonge kya mvubu. Byamalwa byandi byāmulēmenene pamo’nka bwa mabwe alēma. Koku mu mutyima wandi wikonda na njia ya kufwilwa bandi bana. Dibajinji, Yoba wādi ūbile talala. (Yoba 2:13–3:1) Ino shi balunda ba Yoba bālangile amba byawauba talala usa kuleka Umpangi wandi, nankyo bēongwele. Kupwa papo, Yoba wēsamba​—padi ubandwile mutwe koku utala balunda nandi ba bubela​—amba: “Enka ne byomfwa, nkikalekapo bululame bwami!” (Yoba 27:5) Nansha Yoba byaādi mu masusu mavule, le i bika byāmukweshe ekale na bukankamane ne bukomo? Nansha Yoba byawātyumukilwe mutyima bininge, kājimijepo lukulupilo  amba Leza wandi wa buswe ukamukwasha. Wāyukile amba nansha shi wafu, Yehova ukamusangula.​—Yoba 14:13-15.

10. Lelo nsekununi ya Yoba itufundija bika?

¹⁰ Nsekununi ya Yoba itufundija’mba, Satana kabwanyapo kwituningila tuleke Yehova, ne amba Yehova uyukile senene myanda yotutanwa nayo. Kadi bintu byātene Yoba bibwanya kwitukwasha twivwanije kine kyotususukila. Tubandaulei’ko ñeni imoimo yotubwanya kuboila ku kimfwa kya Yoba.

11. Shi twendelele kukulupila mudi Yehova, le tukabwanya kulonga bika? (Yakoba 4:7)

¹¹ Yoba wālombwele amba shi twendelele kukulupila mudi Yehova, tubwanya kūminina matompo o-onso ne kukomena Satana. Le shi tubamukomena i bika bikalongeka? Bisonekwa bitukulupija’mba Dyabola uketunyema.​—Tanga Yakoba 4:7.

12. Le lukulupilo lwa lusangukilo lwākōmeje Yoba namani?

¹² Tusakilwa kwikala na lwitabijo lukomo mu lukulupilo lwa lusangukilo. Monka motwekimwenine mu kishinte kibadikile, Satana wingidijanga divule kityino kya lufu mwanda wa kwitulengeja tutyumune bululame bwetu. Mu mwanda wa Yoba, Satana wānenene amba Yoba ukalonga kintu kyo-kyonso, enka ne kutyumuna bululame bwandi, mwanda wa kupandija būmi bwandi. Satana wābepele. Nansha ke mu makambakano makomo ādi abwanya kumutwala ku lufu, Yoba kātyumwinepo bululame bwandi. Kukulupila’mba Yehova i muyampe ne lukulupilo lwandi lukomo lwa amba Yehova usa kumukwasha, byāmukweshe ominine. Kadi Yoba wādi na lwitabijo lwa amba, nansha shi Yehova kamukweshepo pakidi mūmi, ukamusangulanga mu mafuku a kumeso. Yoba wādi ukulupile bya binebine mu lusangukilo. Shi netu tukulupile bya binebine mu lusangukilo, nansha shi betuzakaje amba basa kwitwipaya, ketukatyumunapo bululame bwetu.

13. Mwanda waka tufwaninwe kuta mutyima ku manwa āingidije Satana pa kutompa Yoba?

¹³ Tufwaninwe kuta mutyima bininge ku manwa āingidije Satana pa kutompa Yoba, mwanda i manwa amo onka aingidijanga ne dyalelo. Satana wānenene amba: “Muntu [ke’nkapo Yoba] ukapāna bintu byonso byadi nabyo mwanda wa būmi bwandi.” (Yoba 2:4, 5) Satana wādi usaka kunena’mba, ketusenswepo’tu Yehova Leza, ne amba tukamuleka shi bitulomba kupandija būmi. Kadi Satana wāsakile kunena’mba Leza ketusenswepo, ne amba kamonengapo bukomo botulonga mwanda wa kumusangaja. Ino byotuyukile kitungo kya Satana ketukulupilangapo mu bubela bwandi.

14. Le matompo abwanya kwitukwasha namani? Leta kimfwa.

¹⁴ Tufwaninwe kumona matompo bu mukenga wa kwiyukila’ko senene. Matompo a Yoba āmukweshe ajingulule bukōkekōke bwaādi nabo ne kwilemununa. Kimfwa, wājingulwile amba usakilwa kuvudijija’ko monka ngikadila ya kwityepeja. (Yoba 42:3) Netu tubwanya kwiyukila’ko kitatyi kyotudi mu matompo. Tutu witwa bu Nikolay, * waelelwe mu kaso aye papo na misongo mikatampe, unena’mba: “Kitatyi kyonapityije mu kaso, kyaunkweshe njingulule ngikadila yonadi nsakilwa kwilumbulula’mo.” Shi tubayuka bukōkekōke bwetu, tubwanya kulonga bukomo bwa kwilumbulula.

15. Le i ani otufwaninwe kuteja, ne mwanda waka?

¹⁵ Tufwaninwe kuteja Yehova, ke balwana netupo. Yoba wātejeje na katentekeji Yehova  paādi wisamba nandi. Leza wālangulukile na Yoba enka bwa aye umusapwila amba: ‘Lelo ubamone bukomo bwami mu bintu byompangile? Ndyukile senene bintu byonso bikutene. Le ulanga’mba nkibwanyapo kukukwatakanya?’ Yoba wālondolwele na kwityepeja ne na mutyima wa kufwija’ko pa buyampe bwa Yehova. Wānena’mba: “Matwi ami aivwene myanda yobe, ino pano nakumone na meso ami.” (Yoba 42:5) Bimweka bu pānenene Yoba bino binenwa, wākidi’nka mu buto, umbidi wandi na bilonda bitutumuka, kadi ukikonda na njia ya bandi bana bāfwile. Nansha nankyo, Yehova wākulupije Yoba amba umusenswe kadi umwitabije.—Yoba 42:7, 8.

16. Mungya Isaya 49:15, 16, le i bika byotufwaninwe kulama mu ñeni kitatyi kyotwikonda na bitompibwa?

¹⁶ Ne dyalelo nadyo, bantu babwanya kwitufūtulula ne kwitumwekeja bu ba bituputupu. Babwanya kukimba kwitumwekeja bu bantu babi, batwe nansha bulongolodi bwetu, ne ‘kwitunenena bintu bibibibi bya bubela bya miswelo yonso.’ (Mat. 5:11) Twifunda ku nsekununi ya Yoba amba, Yehova ukulupile amba tukashala nyeke na kikōkeji kitatyi kyotutompibwa. Yehova witusenswe kadi kakelapo nansha dimo boba bakulupile mwadi. (Tanga Isaya 49:15, 16.) Kokateja bubela bo-bonso bubepa balwana na Leza! James tutu wa mu Tirki, wa kisaka kyekondele na bitompibwa bikomo unena’mba: “Twajingulwile amba kuteja bubela bubepelwa bantu ba Leza kuketuzōzeja. O mwanda twatele mutyima ku lukulupilo lwetu lwa Bulopwe, ne kushala bapyasakane mu mwingilo wa Yehova. Kino kyetulengeje twikale nyeke na nsangaji.”  Netu pamo bwa Yoba, tutejanga Yehova! Bubela bwa balwana netu kebubwanyapo kuzōzeja lukulupilo lwetu.

17. Le i bika byowefunda ku bana-balume ne bana-bakaji batelelwe mu Bahebelu shapita 11?

¹⁷ Yoba i umo’tu mu bengidi ba Yehova bālamine bukankamane bwabo ne bukomo mu byamalwa. Mutumibwa Polo i mutele bantu bakwabo bavule mu mukanda waālembele Bahebelu ne kwibatela bu “kibumbo kikatampe . . . kya batumoni.” (Bah. 12:1) Abo bonso bāpityile mu byamalwa bikomo; ino bālama kikōkeji kyabo kudi Yehova. (Bah. 11:36-40) Le kūminina kwabo ne kuputumina mu mingilo kwādi kwa bitupu? Nansha dimo! Nansha byokebēmweninepo kufikidila kwa milao yonso ya Leza mu kitatyi kyabo, bālamine lukulupilo lwabo mudi Yehova. Kadi byobādi bakulupile amba Yehova wibetabije, bākulupile amba bakamona kufikidila kwa milao ya Leza. (Bah. 11:4, 5) Kimfwa kyabo kitukankamika twendelele kukulupila mudi Yehova.

18. Le ubasumininwa kulonga bika? (Bahebelu 11:6)

¹⁸ Dyalelo tudi mu ntanda yenda ibipila’ko. (2 Tm. 3:13) Satana kalekele’byopo kutompa bantu ba Leza. Ino nansha shi tubatompibwa namani, tusumininwei kwingidila Yehova bininge, koku tukulupile amba “tutūdile lukulupilo lwetu mudi Leza mūmi.” (1 Tm. 4:10) Vuluka, muswelo wāfudije Yehova myanda ya Yoba ulombola’mba, “Yehova i muyule kisanso kya ku mutyima kadi i wa lusa.” (Yak. 5:11) Netu tukōkelei nyeke Yehova koku tukulupile amba ukapala mpalo “boba bamukimba na mikeketo.”​—Tanga Bahebelu 11:6.