1. (a) En geno mane ma Jehova osemiyowa? (b) Tiend ‘geno kuom Jehova’ en ang’o? (Ne “Weche Moler.”)

 JEHOVA osemiyo ji duto mohere geno ma jaber ahinya. Machiegnini obiro golo tuoche, kuyo, kod tho. (Fwe. 21:3, 4) Obiro konyo “jo mamuol” mogeno kuome mondo gilok pinyni ma bed paradiso. (Zab. 37:9-11) Obiro miyo ng’ato ka ng’ato kuomwa obed gi winjruok machiegni kode moloyo winjruok ma sani wan-go kode. To mano doko geno ma jaber! Kata kamano, ang’o momiyo wan gadier ni gik ma Nyasaye osingo biro timore? En nikech kinde duto ochopoga singoge. Mano e momiyo onego ‘wagen kuom Jehova.’ b (Zab. 27:14) Wanyiso ni wageno kuome sama wahore ka warito mondo obi ochop singoge.​—Isa. 55:10, 11.

2. En ang’o ma Jehova osetimo?

² Jehova osenyiso ni en Nyasaye ma chopo singoge. Wane ane ranyisi achiel ma jiwo wachno. E bug Fweny, Jehova nosingo ni e ndalowagi nodhi choko ji moa e ogendni mopogore opogore, dhoudi mopogore opogore, kod pinje mopogore opogore mondo giriwre kanyachiel e lame. E kindegi, jogo iluongo ni ‘oganda mang’ongo.’ (Fwe. 7:9, 10) Kata obedo ni oganda mang’ongono oting’o chwo, mon, kod nyithindo ma a e ogendni mopogore opogore kod dhok mopogore opogore kendo mopon kuonde mopogore opogore, giduto gin gi kuwe makende e piny mangima. (Zab. 133:1; Joh. 10:16) Bende, giyalo wach maber gi kinda. Kinde duto giikorega yalo wach maber ne ng’ato  ang’ata ma gombo ng’eyo geno mar piny maber mabiro. (Mat. 28:19, 20; Fwe. 14:6, 7; 22:17) Ka po ni in achiel kuom joma nie oganda mang’ongo, onge kiawa ni imor gi geno ma jaber mar kinde mabiro.

3. Dwaro mar Satan en ang’o?

³ Satan dwaro ketho geno ma in-go mar kinde mabiro. Odwaro ni ipar ni Jehova ok dewi kendo ni Jehova ok bi chopo weche mosingo. Ka Satan omiyo walalo geno ma wan-go, mano biro nyoso chunywa kendo wanyalo kata weyo tiyo ne Jehova. Mana kaka wabiro neno, Satan notemo ketho geno ma ne Ayub nigo kendo nodwaro ni Ayub owe tiyo ne Jehova.

4. Ang’o mwabiro nono e sulani? (Ayub 1:9-12)

⁴ E sulani, wabiro neno yore ma Satan notiyogo kodwaro ni Ayub owe tiyo ne Jehova. (Som Ayub 1:9-12.) Bende, wabiro nono gik mwanyalo puonjore kuom ranyisi ma Ayub noketo, kod gimomiyo dwarore ni wang’e kinde duto ni Jehova oherowa kendo ni obiro chopo singoge.

5-6. Gin masiche mage ma Ayub noromogo apoya?

⁵ Ayub nodak e ngima maber. Ne en gi winjruok maber gi Jehova. Joode ne ng’eny, ne gidak gi mor, kendo ne en gi mwandu mathoth. (Ayub 1:1-5) Kata kamano, e odiechieng’ achiel kende, Ayub nolalo chiegni gike duto. Mokwongo nolalo mwandune. (Ayub 1:13-17) Kae to nyithinde duto notho. Temie paro wachno! Jonyuol winjoga malit ahinya sama nyathigi otho. Koro temie paro kaka Ayub gi jaode nobwok, nokuyo, kendo nobedo gi lit bang’ ka nosenyisgi ni nyithindgi apar duto notho. Wanyalo neno gimomiyo Ayub noyiecho lepe kae to opodho piny auma!​—Ayub 1:18-20.

⁶ Bang’ mano, Satan nogoyo Ayub gi tuo moro malich ma nomiyo dende okethore marach. (Ayub 2:6-8; 7:5) Ka pok ne wechego otimore, Ayub ne en ng’at ma ji nomiyo luor. Ji ne dhiga ire mondo ong’adnegi rieko. (Ayub 31:18) To koro ne giweyo timo kamano. Ne gichako chaye, osiepene kod owetene nojwang’e, to kata mana jotichne owuon noringe!​—Ayub 19:13, 14, 16.

7. (a) Ayub ne paro ni ng’ano ma ne kelone chandruoge, to ang’o ma notamore timo? (b) Gin chandruoge mage ma Jakristo nyalo romogo minyalo pim gi monyis e picha?

⁷ Satan ne dwaro ni Ayub ochak paro ni nochandore nikech Jehova ne ok mor kode. Kuom ranyisi, Satan nomiyo yamo mager okutho mogoyo ot ma nyithi Ayub ne budhoe ka gichiemo, mi githo gite. (Ayub 1:18, 19) Bende, nomiyo mach owuok e kor polo monego jambe duto kaachiel gi jokwath ma ne kwayogi. (Ayub 1:16) To nikech yamono kod majno noa e kor polo, Ayub ne paro ni Jehova Nyasaye e ma nokelogi. Mano nomiyo Ayub ochako paro ni nitie gima rach ma notimo ne Jehova. Kata kamano, Ayub ne ok okuong’o Wuon-gi manie polo. Ayub nowacho ni kuom higni mang’eny Jehova ne osemiye gik mabeyo ahinya. Omiyo, nopenjo ni, ‘Ka Nyasaye madier otimonwa maber to wayie, koro ang’o ma dimi watamre ka otimonwa marach?’ Nowacho bende ni: “We mondo opak nying Jehova.” (Ayub 1:20, 21; 2:10) Nyaka chop kindego, Ayub noselalo mwandune kod nyithinde kendo ne en gi tuo marach. To pod nomakore amaka gi  Jehova. Kata kamano, Satan nodhi nyime teme.

8. En yo mane machielo ma Satan notiyogo e temo Ayub?

⁸ Satan notiyo gi yo moro machielo e temo Ayub. Notiyo gi osiepe Ayub adek ma nonyiso Ayub kaka ne en ng’at manono. Osiepe Ayubgo nonyise ni nochandore kamano nikech gik maricho ma nosebedo kotimo. (Ayub 22:5-9) Ne ginyise bende ni kata ka di po ni ne ok en jaketho, pod onge gimoro amora ma nonyalo timo ma Nyasaye ne nyalo morgo. (Ayub 4:18; 22:2, 3; 25:4) Gima duong’ ma ne gidwaro ni Ayub oyiego en ni Nyasaye ne ok ohere, ne ok dewe, kendo ne onge tiende tiyone. Wechegigo ne nyalo miyo Ayub opar ni chandruoge ma noyudo ne ok dhi rumo.

9. Ang’o ma nokonyo Ayub bedo gi chir kod teko?

⁹ Tem ane paro kaka weche ne chalo. Ayub nigi lit mang’eny kendo obet e buch kendo. (Ayub 2:8) Osiepene baye gi weche maricho kendo giwacho ni onge gimoro amora maber mosegatimo. Chandruogenego pek mana ka kite madongo kendo okuyo ahinya nikech nyithinde duto osetho. Mokwongo okwongo, Ayub oling’ aling’a thi. (Ayub 2:13–3:1) Ka po ni osiepenego paro ni ling’ moling’gono nyiso ni okwedo Nyasache, mano giparo mobam. Kinde moko bang’e, chopo kama Ayub nyiso osiepenego niya: “Nyaka thona, abiro siko ka an ng’at matir!” (Ayub 27:5) Nyalo bedo ni onyisogi wechego kong’iyo wang’gi tir. Ang’o ma nokonyo Ayub bedo gi chir kod teko kata obedo ni nochandore kamano? Kata mana e kinde ma ne chunye onyosore ahinya, pod ne en gi geno ni Nyasaye nohere kendo nodhi tiekone chandruogene. Nong’eyo ni kata ka otho, Jehova ne dhi chiere.​—Ayub 14:13-15.

10. Ang’o ma sigand Ayub puonjowa?

¹⁰ Sigand Ayub puonjowa ni Satan ok nyal chunowa ni wawe Jehova, kendo ni Jehova ong’eyo gimoro amora ma waromogo. Siganano bende nyalo konyowa ng’eyo gimomiyo Jehova oyie mondo chandruok odhi nyime. Ne ane moko kuom puonj ma achiel kachiel ma wanyalo yudo kuom Ayub.

11. Ka wadhi nyime geno Jehova, en wach mane ma wanyalo bedogo gadier? (Jakobo 4:7)

¹¹ Ayub nonyiso ni ka wadhi nyime geno Jehova, wanyalo nano e bwo chandruok moro amora, kendo wanyalo kwedo Satan. Ang’o ma Satan biro timo ka wakwede? Muma nyisowa ni obiro ringo.​—Som Jakobo 4:7.

12. Ere kaka geno mar chier notego Ayub?

¹² Dwarore ni wabed gi yie motegno kuom geno mar chier. Mana kaka ne waneno e sula mokalo, Satan tiyoga gi luoro tho nikech odwaro ni wawe makore gi Jehova. E kinde Ayub, Satan nowacho ni Ayub ne nyalo timo gimoro amora, moriwo nyaka ketho timne makare, mana ni mondo ores ngimane. Satan noriambo nikech kata mana e kinde ma chuny Ayub nonyosore ahinya kendo ka ne nenore ka gima nodhi tho, Ayub nosiko ka en ng’at matir. Adiera ma ne en-go ni Jehova ber, kod geno ma ne en-go ni Jehova ne dhi dwoko weche kare, nokonye nano. Ayub ne nigi yie ni kata ka Jehova ne ok dhi golone chandruogene ka pod nongima, nodhi chiere e kinde mabiro. Ayub ne ni gadier kuom geno mar chier. Ka wan bende wan gadier kuom geno mar chier, wabiro siko ka wan gi tim matir kata mana sama tho ochomowa.

13. Ang’o momiyo dwarore ni wang’e yore ma Satan notiyogo e temo Ayub?

¹³ Ber ka wang’eyo yore ma Satan notemogo Ayub nikech mago e yore ma otiyogago e kindegi. Ne ane miriambo ma Satan nowacho: “Dhano [ok mana Ayub kende] nyalo chiwo gimoro amora ma en-go mondo ores ngimane.” (Ayub 2:4, 5) Gima Satan ne temo wacho en ni ok wahero Jehova Nyasachwa kuom adier kendo ni wabiro timo gimoro amora mondo wares ngimawa sama weche ok dhinwa maber. Satan nomedo wacho bende ni Nyasaye ok oherowa kendo ni ok odew kinda moro amora mwatimo mondo wamore. Nikech waseng’eyo yore ma Satan tiyogago, ok wabi yie mondo owuondwa gi yorenego.

14. Tembe nyalo konyowa fwenyo ang’o? Ler ane.

¹⁴ Dwarore ni wane tembe kaka thuolo mar nonore wawegi. Tembe ma Ayub noromogo nokonye ng’eyo nyawone kendo rieyo nyawogo. Achiel kuom gik ma nofwenyo en ni ne dwarore ni omed bedo gi kido mar bolruok. (Ayub 42:3) Wan bende tembe nyalo konyowa fwenyo kuonde monego watimie dongruok. Owadwa moro miluongo ni Nikolay c ma notue e jela kata obedo ni notuore, nowacho kama: “Jela chalo kaka picha mar X-ray. Okonyi neno kido moko maricho ma dwarore ni itimie dongruok.” Bang’ fwenyo nyawo ma in-go, inyalo timo kinda mondo iriegi.

15. En ng’ano monego wachikne itwa, to nikech ang’o?

¹⁵ Dwarore ni wawinj Jehova, to ok jowasikwa. Ayub nochiko ite maber ka Jehova ne wuoyo kode. Ka ne Nyasaye wuoyo gi Ayub, nochalo ka ng’ama nyise ni,  ‘Be inyalo neno kaka chuech nyiso tekona? Ang’eyo gik moko duto misekaloe. Iparo ni ok anyal riti?’ Ayub nobolore kendo nomedo goyo erokamano nikech ber mar Jehova. Nowacho kama: “Ita to osewinjo humbi, kata kamano, sani to koro aneni gi wang’a.” (Ayub 42:5) Nenore ni ka ne Ayub owacho wechego, noyudo pod obet e buch kendo, dende pod nopong’ gi adhonde, kendo nyithinde pod ne nie liel. To e ma pod Jehova nojiwone kaka nohere kendo nonyise kaka nomor kode.​—Ayub 42:7, 8.

16. Ka luwore gi Isaya 49:15, 16, en ang’o monego wapar sama waromo gi tembe?

¹⁶ E kindegi bende, inyalo jarwa kendo ji nyalo timonwa gik ma nyiso ni wan joma nono. Ginyalo ketho nyingwa, kata ginyalo ketho nying riwruogwa ka giwacho “weche duto maricho mag miriambo.” (Mat. 5:11) Weche ma notimore ne Ayub puonjowa bende ni Jehova ni gadier ni wabiro siko ka wamakore kode sama waromo gi tembe. Jehova oherowa kendo ok onyal jwang’o joma oketo geno kuome. (Som Isaya 49:15, 16.) Kik ichik iti ne weche mag miriambo ma jowasik Nyasaye kethogo nyingwa! Owadwa moro miluongo ni James ma a e piny Turkey kendo ma joode osekalo e tembe mang’eny, wacho kama: “Ne wafwenyo ni chiko itwa ne weche mag miriambo ma ji ne wacho e wi jo Nyasaye ne nyoso mana chunywa. Kuom mano, ne waketo pachwa kuom gik ma Pinyruoth biro timo, kendo ne wasiko ka wadich e tij Jehova.  Mano osemiyo wasiko ka wamor.” Mana kaka Ayub, chik iti ne Jehova! Miriambo ma jowasikwa wacho e wiwa ok nyal miyo wawe geno ma wan-go.

17. Ang’o mwapuonjore kuom ranyisi mabeyo mag chwo gi mon miwuoyoe e Jo-Hibrania 11?

¹⁷ Ayub ne en achiel kuom jotich Jehova ma nonyiso chir kendo ma nochung’ motegno ka nokalo e tembe madongo. E barua ma jaote Paulo nondiko ne Jo-Hibrania, nowuoyo e wi jotich Jehova mamoko koluongogi ni “joneno mang’eny molworowa kaka boche polo.” (Hib. 12:1) Giduto ne gikalo e tembe madongo, kata kamano, ne gisiko ka gimakore gi Jehova. (Hib. 11:36-40) Be sinani margi ne en kayiem nono? Ooyo ngang’! Kata obedo ni ne ok gineno ka singo mag Nyasaye chopo e kinde ma ne pod gingima, ne gidhi nyime geno kuom Jehova. Kendo, nikech ne ging’eyo ni Jehova ne mor kodgi, ne gin gadier ni ne gidhi neno singoge duto ka chopo. (Hib. 11:4, 5) Ranyisi ma ne giketonwa nyalo konyowa dhi nyime geno kuom Jehova.

18. Ang’o ma ing’ado ni ibiro dhi nyime timo? (Jo-Hibrania 11:6)

¹⁸ Wadak e piny ma gik moko medo mana bedo maricho. (2 Tim. 3:13) Satan pod dhi nyime temo jotich Nyasaye. Bed ni wabiro romo gi chandruoge mage e kinde mabiro, wang’aduru e chunywa ni wabiro dhi nyime tiyo ne Jehova gi kinda ka wan gadier ni “waseketo genowa kuom Nyasaye mangima.” (1 Tim. 4:10) Par ni yo ma Nyasaye noguedhogo Ayub bang’ ka nosenano nyiso ni “Jehova ogundho gi hera matut kendo okecho ji.” (Jak. 5:11) Mad wan bende wang’ad e chunywa ni wabiro siko ka wamakore gi Jehova, ka wan gadier “ni en jachiw-mich ne jo ma manye gi kinda.”​—Som Jo-Hibrania 11:6.