MWAHA WOOSOMIYA 27
‘Munweherere Yehova’
“Umwaarerihe Yehova; ulipe nrima ni wiilipihace wanrimani waa.”—ISAA. 27:14.
NCIPO 128 Persevera Até ao Fim
NINHALA WIITTHUCANI? *
1. a) Niwehereroni Yehova nivahilyaawe? b) ‘Unweherera Yehova’ maanaaya isiyani? (Nwehe “Nuulumo Nootaphuleliya.”)
YEHOVA haavaha nweherero womaana atthu otheene anonfenta. Woohipica, uyo naahala umaliha iretta, uhuva ni ukhwa. (Apoka. 21:3, 4) Uyo naahala waakavihera atthu anonkhuluvela ukhaliha ituninya yotheene ipeephoni. (Isaa. 37:9-11) Upeephoni, ninaahala utepa umpatthanana saana Nluku uvikana inanna cinompatthananeehu nnaco. Khweeliini, iparakha cinweherereehu wahoolo cikhanle comaana! Masi nlattuni ninkupaliihu wiira Yehova naahala wiirannyeeha citthu cotheenennyo? Kontha Yehova khanhiya wiirannyeeha citthu cotheene cinkhuluvelihaawe. Phimaana, nihaana isariya ‘yonweherera.’ * (Isaa. 27:14) Iyo itthwiiyo maanaaya wiira ninaahala unweherera Yehova wiirannyeeha citthu cikhuluvelihilyaawe. Ni ninhala unweherera unitteelaka nrima.—Isai. 55:10, 11.
2. Isiyani Yehova yaakhuluvelihilyaawe inooneehu yiirannyaaka mahukwaala?
2 Yehova hothoonyera wiira naapanka citthu cinkhuluvelihaawe. Nttwee noone ntakihero nimoca. Nlivuruni yo Apokalipise, Yehova ahokhuluveliha wiira mahuku ankhaleehu, uyo anhala waatthenkaca apoovu olapo cotheene, o mahimo otheene ni oluuka cotheene yaahala unswalela yiiwananaka. Ayo atthwaayo akhanle “mphwinko muulupale.” (Apoka. 7:9, 10) Nhina iyo ikhurupwiiyo, ahaavo alopwana, athiyana, anamwane okhapila coovirikana, oluuka coovirikana ni ankhala mapuro oovirikana ntuninyani motheene, masi anawiiwanana. (Isaa. 133:1; Joau 10:16) Atthu o mphwinko muulupale ciicammo anawiikurumica ulalya ihapari comaana ca Nluku. Ayo ananlalyeera nnyo ihaparinnyo khula ntthu nopheela wiiwa. (Mat. 28:19, 20; Apoka. 14:6, 7; 22:17) Wakhala wiira nyuuva nri nhina ikhurupu yo mphwinko muulupale, khweeliini nnaalemeliha nweherero urineenyu wo woona masakha otheene yamalamalihiyaka.
3. Isiyani Sotwani impheelaawe?
3 Sotwani khampheela wiira nyuuva nweherere waakhela iparakha comaana wahoolo. Phimaana uyo naamananiha wuukupalihani nyuuva wiira Yehova khanoowacerani ni khanhala wiirannyeeha citthu cikhuluvelihilyaawe. Nakupaliki wiira hiiva khiivo iparakha yomaana inweherereehu wahoolo, ninaahala ulolovaca ni uhiya unswalela Yehova. Toko cinhaleehu wiitthuca nhina ula mwahoola, Sotwani aapheela umwiiriha Jó uhikhalana nweherero ni ahomananiha unhiiha unswalela Yehova.
4. Ninhala wiitthucani nhina ula mwahoola? (Nwehe Jó 1:9-12.)
4 Nhina ula mwahoola, ninaahala woona mananna Sotwani caamananihilyaawe unhiiha Jó umwiiwelela Yehova. (Nsome Jó 1:9-12. *) Ciicammo ninaahala woona isiyani ntakihero na Jó ninniitthucihaaya ni nlattuni ninlamuliyeehu ukhuluvela wiira Yehova naanifenta ni naahala wiirannyeeha citthu cikhuluvelihilyaawe.
SOTWANI AHOMANANIHA UNHIIHA JÓ UKHALANA NWEHERERO
5-6. Nhina ukati vakaani paahi, isiyani yaamwiirannyenle Jó?
5 Jó aanaakhala sana-saana. Uyo ahaana itthoko yuulupale ni yowiiwananiya. Ahaana mihakhu cinci ni aanaapuha. (Jó 1:1-5) Masi nihuku nimoca paahi, Jó cahompwetya citthu cotheene caarinaawe. Woopacera, uyo cahompwetya mihakhu cawe cotheene. (Jó 1:13-17) Wowaakulela, asaanaawe otheene yahokhwa. Mweemele ni muupuwele vakaani mananna iyo itthwiiyo canwereelyaaya Jó. Ayari anaakhala ooriipiya nrima mwanaya mmoca akhwaaka. Vano muupuwele mananna Jó ni amwaarawe caakhanlyaaya ukati waacuwenlyaaya wiira asaanaaya 10 yahokhwa wonkwaha mmoca! Jó ahaana isariya yo waahulaca ikuwo cawe, wunla ikuttho ni wiipikirisa vathi!—Jó 1:18-20.
6 Vano, Sotwani ahonvaha Jó iretta yoohiirya yaawiiriha atthu unthanya Jó. (Jó 2:6-8; 7:5) Wiipaceroni, Jó aanaahisimiya naatthu, mpaka ahaavo yaawa unlepela ankhili. (Jó 31:18) Masi vano atthu otheene yaananthanya Jó. Uyo aanaathanyiya naasuulupalyaawe, naasipatthannyaawe ni mpaka ciicammo aanaathanyiya niipottha cawe!—Jó 19:13, 14, 16.
Mayamunna ni miyanuunu enci yaakhumelelaka masakha, anaakhitiri ucuwela inanna ciicoonalyaawe Jó (Nwehe iparaagarafu 7) *
7. a) Jó oopuwenle wiira masakha yankhumelela yaakhuma vayi? b) Masakhani atthunaka anhala unkhumelela nkristau oolikanaca nimasakha anooneehu walataratoni?
7 Sotwani aapheela unkupaliha Jó wiira Yehova phanwaanela masakha otheene. Wootakihera, Sotwani ahowaana iphyoo yaakhuma wiirimu yaamarunle inupa yaathukumannyaaya asaana a Jó wiira alye nkhayi. (Jó 1:18, 19) Sotwani ciicammo ahokurusa mooro wiirimu waapahale inama ca Jó ni ale yaakhalenla nnyo inamannyo. (Jó 1:16) Ukhala wiira iphyoo ni mooro wanwaanenle ihasara Jó waakhuma wiirimu ni waawaale niinanna yootikhiniha, Jó oopuwenle wiira Yehova phaawanne iyo ihasareeyo. Uyo ahoopuwela wiira atthunaka ahopanka itthu yootakhala yanvirusale Nluku. Masi waanookhalaru commo, Jó khanviruwenle Yehova ni khaahiile unswalela. Jó oopuwenle wiira khampa caatthunalyaawe citthu comaana caavahiyaawe ni Yehova, ciicammo ahaana atthunaka nnyo citthu coohinamaanannyo. Phimaana, uyo aheera: “Ncina na Yehova nihihiye uttottopeliya.” (Jó 1:20, 21; 2:10) Waanookhalaru wiira Jó cahompwetya mihakhu cawe cotheene, asaanaawe yahokhwa ni yahonkela iretta, uyo khaahiile umwiiwelela Yehova. Masi Sotwani waari uhinammalela untulumu Jó.
8. Isiyani-tho Sotwani yaavarenlyaawe nteko wiira ankhitiri Jó?
8 Sotwani ahovarela nteko itthu ikhwaawe wiira ankhitiri Jó. Ahaavo alopwana araru yeehimya ukhala apatthannyaawe Jó ni Sotwani ahaakurumica wuuluma citthu coohinamaana wiira anlolovihe makhuva Jó. Ayo yaamwiirela Jó wiira aanaattarusiya nlattu woopanka citthu cinci coohinamaana. (Jó 22:5-9) Ayo yahomananiha unkupaliha Jó wiira hataa apankaka citthu cinci comaana, Nluku khoona ukhalana ifayita nnyo citthunnyo. (Jó 4:18; 22:2, 3; 25:4) Ayo yaapheela umwiiriha Jó ukupali wiira uyo khaafentiya ni khaawaceriya ni Nluku, ni unswalela Nluku khayaari itthu yofayita. Ayo moolumwaayo yanhala umwiiriha Jó uhikhalana hataa nweherero.
9. Isiyani yankavihenre Jó ulipa nrima ni uvilela?
9 Muupuwele itthu yeerannya. Jó honkoma wattuurani yanweryaaka cinene irutthu. (Jó 2:8) Apatthannyaawe oohinamaana khanhiya umwiirela wiira uyo khanakhala ntthu ooreera nrima ni citthu cooreera cotheene cipankilyaawe vanre nteko wo mahala. Citthu cotheene cankhumelela Jó caakhala khampa nrintti woolemela cinene ni nanlelo waananwerya nrima nlattu wookhwa asaanaawe otheene. Wiipaceroni, Jó aanoomaala ni khaakhunle itthu. (Jó 2:13–3:1) Wakhala wiira nwo umaalanwo wahowiiriha apatthannyaawe Jó ukupali wiira uyo anhala uhiya unswalela Yehova, ayo yaanawiithepya. Uvira waya ukati, Jó atthunaka ahovusa murwaawe ni ahaaweha asipatthannyaawe, ni ahowiirela: “Mpaka wanhalaaka ukhwa, akinhala uhiya imaannyaaka!” (Jó 27:5) Isiyani yankavihenre Jó ulipa nrima ni uvilela hataa ahuvaka cinene? Hataa ukati waakhanlyaawe ni masakha menci, khaahiile ukhalana nweherero wiira Nlukwaawe aanaahala umaliha uhuva waarinaawe. Ni Jó aanaakupali wiira hataa akhwaaka, Nluku aanaahala umunweleliha.—Jó 14:13-15.
NINHALA UNTAKIHA CANI JÓ?
10. Itthu yankhumelenle Jó innithoonyera isiyani?
10 Itthu imwiirannyenle Jó innithoonyera wiira Sotwani khankhitiri unikhanyereriha unhiya Yehova, ni innithoonyera wiira Yehova naacuwela citthu cotheene cinniirannyeela. Itthu yaamwiirannyenle Jó ciicammo inaanikavihera ucuwela unvaresesa Yehova isiyani. Nttwee vano noone citthu cinniitthucihaaya ntakihero na Jó.
11. Naahihiyeke unkhuluvela Yehova isiyani inhala wiirannya? (Nwehe Tiyaku 4:7.)
11 Jó hothoonyera wiira hiiva nankhuluvelaka Yehova, ninaahala ukhitiri uvilela masakha otheene anhala unikhumelela ni ninaahala ulipa wiira Sotwani hinikhitiri. Isiyani inhala wiirannya nlattu wo iyo itthwiiyo? Ibiiblya inaanikhuluveliha wiira Sotwani naahala unitthawa.—Nsome Tiyaku 4:7. *
12. Uweherera wunwelelihiya waatthu ookhwa wanlipihale cani Jó?
12 Nihaana nivaresesaka nweherero woohoolo wo wunwelelihiya atthu ookhwa. Khampa ciitthucileehu nhina mwaha woosomiya uvinre, Sotwani naamananiha unihiiha unswalela Yehova nlattu wo woova wihu ukhwa. Sotwani aheera wiira Jó aanaahala upanka yotheene yaahalaawe ukhitiri ni mpaka uhiya unswalela Yehova wiira oopole ukumyaawe. Masi Sotwani aanawootha. Hataa Jó ahalaka vakaani ukhwa, uyo khaahiyale umwiiwelela Yehova. Itthu yankavihenre Jó waari ukhuluvela unamaana wa Yehova ni ukhuluvela wiira Yehova aanaahala umalamaliha uhuva wawe wotheene. Uyo aanaakupali wiira hataa akhwaaka masakhaawe ahinamala, Yehova aanaahala umphwanyiha ukumi womaana waahalaawe umunweleliha wahoolo. Jó aanaakupali wiira wahoolo aanaahala wunwelelihiya. Nakhalanaka ayo moopuwelelwaayo, khiivo hataa itthu inhala unihiiha unswalela Yehova, hataa noopopiheriyaka wiiviya.
13. Nlattuni ninlamuliyeehu weeserera nuutta itapha Sotwani caavarenlyaawe nteko wiira ankhitiri Jó?
13 Nihaana neesereraka nuutta citthu Sotwani caavarenlyaawe nteko wiira ankhitiri Jó, kontha phi citthu nanlelo cinvarelaawe nteko wiira anihapuse. Moone itthu yoolumalyaawe Sotwani. Uyo enre: “Pinaatamu [kahi Jó paahi] naahala uvaha yotheene irinaawe nlattu wookumyaawe.” (Jó 2:4, 5) Wiira wawe commo, Sotwani aapheela uhimya wiira hiiva khaninonfenta cinene Yehova Nluku. Ni uyo aapheela uhimya wiira hiiva ninawaamini unhiya Yehova wiira noopole ukumiihu. Ciicammo, Sotwani enre wiira Yehova khannifenta ni khanoona wiikurumica wihu wiira nincivelihe. Masi ukhala wiira hiiva ninaacuwela itapha ca Sotwani, ninankhuluvela Yehova ni khaninonhiya Sotwani anithepyaka.
14. Marikariko annikhumelela anlattanaca niisiyani?
14 Nihaana nuupuwelaka wiira masakha annikhumelela anaanikavihera wiicuwela ciriihu. Masakha yankhumelenle Jó yahonkavihera ucuwelela moopuwelelo oohinamaana yaarinaawe ni urukunusa ayo moopuwelelwaayo. Wootakihera, uyo ahoonelela wiira ahaana eekurumicaka ukhala ntthu owiiyeviha. (Jó 42:3) Hiiva ciicammo yanikhumelelaka marikariko, ninaakhitiri wiicuwela ratta. Munna mmoca neehaniya Nikolay, * aatthukiye hataa ukhalaka wiira aanawerennya, heera: “Ikhatteya inkhala khampa iraio-X. Iyo inanthoonyera nkristau mananna ciryaaya nrimaawe.” Nakhitiriki woona wiira nihaana moopuwelelo oohiloka, nihaana niikurumicaka upanka marukunuso.
15. Tipani nolamuliyeehu umwiiwelela, ni nlattuni?
15 Nihaana niiwelelaka citthu Yehova cinnihimeryaawe, kahi citthu cinnihimeryaaya awananiihu. Jó ahoviriyana sana-saana citthu caahimyeeriyaawe ni Yehova. Waakhala khampa Yehova aamwiirela Jó co: ‘Unnokhitiri woona ikuru civarenlyaaka nteko wiira kumpe citthu cotheenennya? Mi kinaacuwela citthu cotheene cinookhumelela muukumini waa? Unooniha wiira mi akinhala ukhitiri wuuwacera?’ Jó ahaakhula eeyevihaka ni athoonyeraka unsukhuru Yehova: “Kiheewa wuulumilayaka, masi vano kinawoona ni miithwaaka.” (Jó 42:5) Ukati woolumilyaawe iyo itthwiiyo, Jó onkomile wattuurani nari nimakhwatta mwiirutthuni motheene ni wanweryaaka nrima nlattu wookhwa asaanaawe otheene. Waanookhalaru commo, Yehova ahohimya wiira aananfenta venci Jó ni wiira uyo aari nlopwana anciveliha.—Jó 42:7, 8.
16. Toko cinthoonyeraaya Isaiya 49:15, 16, isiyani inlamuliyeehu wuupuwela yanikhumelelaka masakha?
16 Ilelo ciicammo atthu pooti uniruwana ni unithanya. Ayo ciicammo pooti unuuluma pusya awula wuuluma pusya mphwinkweehu woothotokanihiya ni ‘unootherya khula itthu yoonanara.’ (Mat. 5:11) Ihantisi ya Jó innithoonyera wiira Yehova naakhuluvela wiira hi khaninhala uhiya unvaresesa yanikhumelelaka masakha. Yehova naanifenta venci ni uyo khanhala waahiya ale anonkhuluvela. (Nsome Isaiya 49:15, 16. *) Phimaana, nhiiwelele citthu cowoothiya cinnuulumaaya awananiihu. Munna mmoca nokhala u Turquia neehaniya James yahonkhumelela masakha menci wamoca naamucyaawe. Uyo neera: “Hi nahoonelela wiira wiiwelela citthu coohinamaana cinootherihiyaaya apoovu a Nluku waanaahala uniloloviha. Phimaana, ninawiikurumica wuupuwela cinene nweherero woohoolo urineehu ni uhihiya wiikurumica uvara nteko wa Yehova. Nlattu woopanka commo, hiiva nihokhitiri uhihiya ukhala ootteeliya.” Toko Jó, hiiva nimmwiiwelela Yehova. Citthu cowoothiya cinoolumaaya awananiihu khacinhala umalamaliha nweherero woohoolo urineehu.
NWEHERERO WOOHOOLO URINEEHU UNAANILIPIHA
Yehova ahontthuvela Jó nlattu wookhuluvelya wawe. Jó ni amwaarawe yahokhala myaakha cinci ni yahokhala ootteeliya venci (Nwehe iparaagarafu 17) *
17. Matakihero aalopwana ni aathiyana anoolumiya nhina Maberewu ikapiitulu 11 anwiitthucihani isiyani?
17 Jó khanle nswali a Yehova mmoca paahi aavilenle hataa yankhumelelaka masakha menci. Nhina iwarakha apostolu Paulu yaawantikhenlyaawe makristau maberewu, uyo ahowuuluma atthu enci yanvaresesale Yehova. Uyo aawiihanne ayo atthwaayo “nihutte nuulupale no masaahiti.” (Mabere. 12:1) Otheene caya yahaakhumelela masakha menci, masi khayaahiyale umwiiwelela Yehova. (Mabere. 11:36-40) Niireke anaahala utthuveliya nlattu wo wiikurumica waya ni uvilela waya? Iyee! Hataa ukhalaka wiira ayo atthwaayo khayaakhanle myaakha cinci wiira yoone ciirannyaaka citthu caakhuluvelihilyaawe Nluku, ayo khayaahiile unweherera Yehova. Ciicammo, ayo yaanaakupali wiira yaananciveliha Yehova. Phimaana yaanaakhuluvela wiira wahoolo yaanaahala woona inatiri ca Yehova ceerannyaaka. (Mabere. 11:4, 5) Matakiherwaaya anaanikavihera utepa unkhuluvela Yehova.
18. Isiyani nyuuva ilakenleenyu upanka? (Nwehe Maberewu 11:6.)
18 Makhalelo o ntuninyani inkhaleehu anvira yatepaka urika. (2 Tim. 3:13) Sotwani nanlelo khanamaliha ntekwaawe wo waatteha apoovu a Nluku. Hi ninaacuwela wiira anaahala unikhumelela masakha menci. Hataa ukhalaka commo, nihaana nilakelaka unvaresesa Yehova ni ukhuluvela wiira “niweherero nihu ninlipiheriya ni Nluku nkumi.” (1 Tim. 4:10) Yehova ahontthuvela Jó nlattu wookhuluvelya wawe. Iyo itthwiiyo inthoonyera wiira Nlukwiihu Yehova “naathoonyera venci uthunku ni uyo nakiriri.” (Tiya. 5:11) Khampa Jó, nihihiye unvaresesa Yehova nikhuluvelaka wiira uyo “nawaatthuvela ale anontotha niikuru caya cotheene.”—Nsome Maberewu 11:6. *
NCIPO 150 Utothe woopoliya ni Yehova
^ Namuupuwelaka ntthu yankhumelenle masakha menci, hi khaninonhiya uttuli Jó. Ntakihero na Jó ninniitthuciha isiyani? Ninniitthuciha wiira Sotwani khankhitiri unikhanyereriha uhiya unswalela Yehova. Ciicammo ninniitthuciha wiira Yehova nawoona citthu cotheene cinniirannyeela. Ni khampa Yehova caamalihalyaawe masakha a Jó, woohipica naahala umaliha uhuva wihu wotheene. Makhalelweehu yathoonyeraka wiira ninaakhuluvela iyo itthwiiyo, maanaaya wiira hiiva ‘ninanweherera Yehova.’
^ NUULUMO NOOTAPHULELIYA: Nuulumo noluuka iheperewu nitaphuleliye “nweherero” maanaaya uweherera itthu ni upheela cinene woona iyo itthwiiyo yiirannyaaka. Ciicammo maanaaya wiira unkhuluvela ntthu.—Isaa. 25:2, 3; 62:5.
^ Jó 1:9 Sotwani ahomwaakhula Yehova eeraka co: “Niireke Jó mmoova Nluku nlattu woociveliya? 10 Khamunkhikicenre, hataa khankhikicenre inupaawe ni cotheene cirinaawe? Nhohela iparakha miteko cotheene cinvaraawe, ni watuninyani wotheene cicanre inama cawe. 11 Masi nkattehani umwaakha citthu cotheene cirinaawe, mwaahimoone khweeli awuulumakani pusya.” 12 Yehova ahomwaakhula Sotwani co: “Cotheene cirinaawe ciri mmatatani waa. Masi uyova uhinkwanyeni!” Sotwani ahokhuma waamulumanaawe Yehova.
^ Tiyaku 4:7 Coo, mmwiiwelele Nluku; masi munkhottele Sotwani, ni uyo naahala wuutthawani.
^ Macina makiina ahaakakhanihiya.
^ Isaiya 49:15 Pooti nthiyana unliyala mwanawe, woohimoonela uthunku mwaana nyanryaawe? Hataa yala athiyana ala pooti uliyala, masi miiva akinhala wuuliyala. 16 Woone! Kihowantikha mmatatani waka! Isiri caa cinhala ukhala ukati wotheene uhoolo waka.
^ Maberewu 11:6 Ciicammo, woohaamini khawankhitiryaa unciveliha Nluku, kontha ule nomwaattamela Nluku haana akupaliki wiira Nluku haavo ni nawaatthuva ale anontotha niikuru caya cotheene.
