CIPANDE CA KUSAMBILILAMO 27
“Uwataila Yeova”
“Uwataila Yeova; Usipe nupya utatoovoka.” —MASA. 27:14, NWT.
LWIMBO NA. 128 Mwazizimizya Mpaka nu ku Mpela
VINO TUMASAMBILILAPO *
1. (a) Uupaalilo ci uno Yeova watupeela? (b) Uzye cikapiliula cani ukutaila Yeova?
YEOVA wapeela antu yonsi amutemwa upaalilo usuma. Likwene sile alafumyapo ukulwala, ulanda, ni mfwa. (Kuso. 21:3, 4) Alazwa aicefye aataila ukuti alalenga insi ukuya paladaise. (Masa. 37:9-11) Nupya alalenga swensi kwene ukuya na ucuza usuma sana na aliwe ukucila uno twaya nao ndakai. Uu upaalilo usuma sana. Nomba i cani calenga tutaile ukuti malayo yakwe Leza yalafikiliziwa? Yeova lyonsi akafikilizya vino walanda. Cii cingalenga tutaile sana Yeova. (Masa. 27:14) Tungalanga vii ndi cakuti tuli ateekele lino tukulolela ukuti Leza akafikilizye malayo yakwe.—Eza. 55:10, 11.
2. I vyani vino Yeova wacita?
2 Yeova watulanga mpiti ukuti akafikilizya vino walaya. Lekini tulandeko pa ulayo umwi. Umwi buku lya Kusokolola Yeova walavile ukuti umu manda itu wali nu kulonganika antu amu nko, imitundu, ni ndimi, nupya wali nu kuyaleta umu kupepa kwa cumi. Ndakai iumba lii ilicindame likaamwa ukuti “iumba ilikalamba.” (Kuso. 7:9, 10) Nanti cakuti umwi umba lii mwaya antu apusanepusane aonsi, anaci, na ana afuma umu nsi yonsi yapanga ulupwa longa umwaya umutende. (Masa. 133:1; Yoa. 10:16) Nupya aya umwi umba likalamba yakaombesya sana umu mulimo wa kusimikila. Lyonsi yaipekanya ukunenako yauze pa upaalilo uno yakwata. (Mate. 28:19, 20; Kuso. 14:6, 7; 22:17) Ndi cakuti mwaya umwi umba likalamba, ukwaula nu kutwisika upaalilo wakuti ivintu vilazipa uku nkoleelo wacindama sana kuli mwemwe.
3. I cani cino Satana akalondesya?
3 Ciwa asilonda mukwate upaalilo wakuti ivintu vilazipa uku nkoleelo. Akalonda muzumile ukuti Yeova asimusakamala nu kuti atalafikilizya amalayo yakwe. Ndi cakuti tuvwila Satana tungata ukuya nu upaalilo, tungata ukuya asipe, nupya limwi tungata nu kuombela Yeova. Wakwe vino tumalola, Ciwa wezizye ukulenga Yobo ukuta ukuya nu upaalilo nu kuta ukuombela Yeova.
4. I vyani vino tumasambililapo umu cipande ci? (Yobo 1:9-12)
4 Mu cipande ci tumasambilila pa nzila zino Satana waomvizye pakuti apatikizye Yobo ukuta ukuya na ucisinka kuli Yeova. (Belengini Yobo 1:9-12.) Nupya tumalanda na pali vino tungasambilila kuli vino vyacitikile Yobo nu mulandu uno tulinzile ukwiusizya ukuti Leza watutemwa nupya alafikilizya amalayo yakwe.
SATANA WEZIZYE UKULENGA YOBO UKUTA UKUYA NU UPAALILO
5-6. I vyani ivyacitikiile Yobo umu nsita sile inono?
5 Yobo wali nu umi usuma. Waipakizyanga ucuza usuma na Yeova. Wakweti ulupwa ulukulu, ululemane nupya wakweti sana ivyuma. (Yobo 1:1-5) Nomba umu wanda sile onga Yobo waponzizye vyonsi vino wakweti. Inkoleelo waponzizye ivyuma vyonsi vino wakweti. (Yobo 1:13-17) Lyene ana yakwe yonsi yafwile. Tale elenganyini panono pa viipe ivyamucitikile. Avyazi yakavulunga sana ndi cakuti umwana wao wenga wafwa. Lyene elenganyini vino Yobo na mamakwe yuvwile sana ulanda nu kuvulunganyiziwa lino yayanenyile ukuti ana yao yonsi 10 iyafwa. Ali mulandu uno lino Yobo waloosyanga walepwilile ivyakuzwala vyakwe nu kupona pansi.—Yobo 1:18-20.
6 Lyene Satana walwalike Yobo ulwale wamuzewanya. (Yobo 2:6-8; 7:5) Lino Yobo atatala walwala antu yamucindike sana. Nupya yayanga kuli aliwe ukuti ayapandeko mano. (Yobo 31:18) Nomba lino walwile antu yatandike ukumutaluka. Aina yakwe, ya cuza yakwe, kumwi sile na aomvi yakwe yatandike ukumukana.—Yobo 19:13, 14, 16.
Aina aingi na ya nkazi ndakai yamanya vino Yobo wayuvwile lino wali ni ntazi (Lolini palaglafu 7) *
7. (a) Uzye Yobo wazumiile ukuti i cani icalenzile acule umu musango uwo, nomba i vyani vino wakanyile ukucita? (b) Iintazi ci izikoline na zino tukulola pa cikope zino aina Klistu yangakwata?
7 Satana walondanga Yobo ukuzumila ukuti waculanga pa mulandu wakuti Yeova wamusokiile. Satana waomvizye icimuza ukuponya ing’anda muno ana yakwe Yobo yonsi 10 yaliilanga pamwi. (Yobo 1:18, 19) Nupya waomvizye umoto ukufuma ukwi yulu ukonona iviteekwa vyonsi vyakwe Yobo ukwikako sile na aomvi. (Yobo 1:16) Pa mulandu wakuti icimuza nu moto vyafumile ukwi yulu, Yobo welenginye ukuti vyafumile kuli Yeova. Nupya cico calenzile Yobo ukuzumila ukuti afwile wasosizye Yeova. Nomba nanti ciye vivyo Yobo wakanyile ukutuka Isi wa kwi yulu. Wilwike ukuti pa myaka iingi wapokelelanga ivintu ivisuma ukufuma kuli Yeova. Fwandi welenginye ukuti nga wazumilanga ukupokelela ivintu ivisuma alinzile ukuitemelwa ukupokelela ni viipe kwene. Walanzile ukuti: “Si Yawe sile wenga awino acindikwe!” (Yobo 1:20, 21; 2:10) Nanti cakuti Yobo waponzizye ana, impiya, nu kulwala ulwale uwipisye watwalilile ukuya uwa cisinka kuli Yeova. Nomba Satana atapelelile sile papo kwene.
8. I vyani vyuze vino Satana wacisile kuli Yobo?
8 Satana waomvizye ya cuza yakwe Yobo aufi yatatu ukulenga Yobo ukuyuvwa uwa sile sile. Aonsi yaa yalanzile ukuti Yobo waculanga pa mulandu wakuti wacisile ivintu ivingi iviipe. (Yobo 22:5-9) Nupya yalondanga azumile ukuti asi mulandu ni vintu uwingi visuma vino wacitanga, Leza atavisileko mano. (Yobo 4:18; 22:2, 3; 25:4) Umu nzila yuze tungati yalondanga Yobo azumile ukuti Leza atamutemilwe, atamusakamalanga nupya atataizyanga pali vino wamuombelanga. Vino yalandanga vifwile vyalenzile Yobo ukulayuvwa ukuti vintu vitalatala vizipepo nupya.
9. I cani icazwile Yobo ukuya umusipe nupya umukome?
9 Elenganyini vii vikucitika. Yobo ataikala umwitwi, nupya akuwaika sana. (Yobo 2:8) Auze iyatwalilila sile ukumunena ukuti asi muntu musuma nupya kusi icili consi cino watala wacitapo ica mpomvu. Intazi zino akweti izilenga atoovoke, nupya ukufwilwa ana yakwe yonsi ikulenga aye sana nu ulanda. Pa kutandika Yobo asikuvwanga icili consi. (Yobo 2:13–3:1) Nomba ndi cakuti ya cuza yakwe yakulola ukuti vyonsi vii vimalenga ate ukuombela Yeova yakubepa sile. Lino papita insita Yobo wakatusya umutwe nu kulolekesya ya cuza yakwe alino ayanena ati: “Mpaka sile ni mfwa yane, ntalatala inte ukuvwanga ukuti nene muntu umwi uwakaele.” (Yobo 27:5) I cani icalenzile Yobo ukuya umusipe nupya umukome asi mulandu ni ntazi zino wakweti? Yobo watwalilile ukutaila Leza na lino watoovwike ukufika lino Leza wafumizyepo vyonsi ivyamucuzyanga. Wamanyile ukuti nanti cakuti wafwa Yeova wali nu kumutuutulula.—Yobo 14:13-15.
UZYE TUNGAKOLANYA ULI YOBO?
10. Uzye ilyasi lyakwe Yobo likutusambilizya vyani?
10 Ilyasi lyakwe Yobo likutusambilizya ukuti Satana atange atupatikizye ukuta ukuombela Yeova nu kuti Yeova akamanya vyonsi vikatucitikila. Ivyacitikile Yobo vingatwazwa nu kumanya ningo umulandu uno tukaculila. Lekini tulande pali vimwi vino tungasambilila kuli Yobo.
11. I vyani vino tungasininkizya ukuti vilacitika ndi cakuti twatwalilila ukutaila Yeova? (Yakobo 4:7)
11 Vino Yobo wacisile vyalangilile ukuti ndi cakuti twatwalilila ukutaila Yeova tungazizimizya intazi izili zyonsi zino tungakwata nu kukaanya Satana. I vyani ivilacitika nga twacita vivyo. Malembo yakatunena ukuti Ciwa aluutuka ukufuma kuli sweswe.—Belengini Yakobo 4:7.
12. Uzye ukutaila ukuti kulaya ukutuutululwa kwakomelizye uli Yobo?
12 Tulinzile ukutaila sana ukuti kulaya ukutuutululwa. Wakwe vino twasambilile umu cipande icafumako, Satana akaomvya imfwa ukututiinya pakuti tute ukuya acisinka kuli Yeova. Satana walanzile ukuti Yobo wali nu kucita icili consi nanti sile ukuta ukuombela Yeova pakuti sile atwalilile ukuya nu umi. Nomba vino walanzile i vya ufi. Nanti cakuti Yobo watandike ukwelenganya ukuti amafwa watwalilile ukuya uwa cisinka kuli Yeova. Ukutaila ukuti Yeova akacitila antu yakwe ivisuma nu kuti alasisyapo iviipe vyonsi ivyamucitikilanga kwamwazwile ukuzizimizya. Yobo wataile ukuti ndi cakuti Yeova atamwazwile lino ali nu umi wali nu kumutuutulula uku nkoleelo. Umu cumi Yobo wataile ukuti kulaya ukutuutuluka. Ndi cakuti twataila ukuti kulaya ukutuutuluka kusi icili consi nanti sile imfwa icingalenga tute ukuya acisinka kuli Yeova.
13. I vyani vino tukusambilila kuli vino Satana wacisile kuli Yobo?
13 Tulinzile ukwika sana mano kuli vino Satana wacisile kuli Yobo pa mulandu wakuti viivi kwene avino akacita na kuli sweswe ndakai. Uvwini vino Satana walanzile, watiile: “Umuntu [asi Yobo sile] ali nu kupeela vyonsi vino wakwata pakuti aikale nu umi.” (Yobo 2:4, 5) Fwandi cino Satana walandangapo i cakuti tutatemwa Yeova Leza nupya tulata ukumuombela ndi cakuti tukulonda ukuya nu umi. Satana walanzile nu kuti Leza atatutemwa nupya asitaizya pali vino tukaezya na maka ukumuombela. Pa mulandu wakuti twamanya vino Satana akalonda ukucita tusizumila ufi wakwe.
14. Uzye intazi zingatwazwa uli? Langililini.
14 Nga twakwata intazi tulinzile ukulola ukuti ali nsita yakuimanya sweineco. Intazi zino Yobo wakweti zyamwazwile ukulola utonte wakwe nu kumanya vino angaombelapo. Icintu conga cino wasambilile i cakuti walondekwanga ukuya sana umuicefye. (Yobo 42:3) Naswe kwene tungasambilila ivingi pali sweineco ndi cakuti tuli ni ntazi. Umwina umwi wino isile umu cifungo nanti cakuti walwalililanga, watiile: “Icifungo caya kwati acimasyini icikapima vino umuntu ali umukasi, cingalenga umwina Klistu ukumanya imiyele yakwe.” Ndi cakuti twamanya utonte witu tungaombelapo zuwa.
15. A weni wino tulinzile ukukutikako, nupya u mulandu ci?
15 Tulinzile ukukutika kuli Yeova asi ku yalwani itu. Yobo wisileko sana mano lino Leza walandanga nawe. Leza uzizye Yobo ati: ‘Uzye waweniko kuno naumbanga ivintu? Namanya vyonsi ivyakucitikila. Uzye ukwelenganya ukuti ntange nkusakamale?’ Yobo waicefizye lino wasukanga Yeova nu kulanga ukutaizya pa visuma vino akacitila antu yakwe. Watiile: “Mpiti nakumanyile ukupitila muli vino nuvwanga kuli yauze. Ilelo lyene, awe nakulola na manso yane ntontonto!” (Yobo 42:5) Yobo afwile wali ala acili wataikala umwitwi ali ni vilonda umwili onsi nupya ala acili akuloosya na ana yakwe lino walanzile amazwi yaa. Nanti ciye vivyo Yeova walangizye Yobo ukuti wamutemwa nupya wataizyanga pali vino wamuombelanga.—Yobo 42:7, 8.
16. Ukulingana na Ezaya 49:15, 16, i vyani vino tulinzile ukulaiusya ndi cakuti twakwata intazi?
16 Na ndakai kwene antu yangatutuka nu kutulola ukuti sweswe ya sile sile. Yangezya ukutononela izina nanti izina li uvi nu kutubepezya “ivintu viipe.” (Mate. 5:11) Ukwi lyasi lyakwe Yobo, tukusambililako ukuti Yeova wasininkizye ukuti tulatwalilila ukuya acisinka kuli aliwe lino twakwata intazi. Yeova watutemwa nupya atalatala atazyele yayo amutaila. (Belengini Ezaya 49:15, 16.) Mutaika mano uku ufi uli onsi uno alwani yakwe Leza yakalanda. Umwina James, aakaikala uku Turkey wino ulupwa lwakwe lwakweti sana intazi watiile: “Twilwike ukuti ukukutika uku ufi uno antu yakalanda pa yantu yakwe Leza kungalenga tutoovoke. Fwandi twisile sile mano pa kutaila ukuti Uwene sile uulazifya ivintu uku nkoleelo nu kutwalilila ukuombesya umu mulimo wakwe Yeova. Na cico calenzile tutwalilile ukuya nu luzango.” Wakwe Yobo, tulinzile ukukutika kuli Yeova. Ufi uno alwani itu yakalanda utalinzile ukutulenga tute ukuya nu utailo.
UTAILO WINU ULALENGA MUTWALILILE UKUOMBELA YEOVA
Yobo wapaazilwe pali vino wali na ucisinka. Wene nu muci yaipakizye amapaalo aingi ukufuma kuli Yeova pa nsita itali (Lolini palaglafu 17) *
17. I vyani vino mukusambilila uku yonsi na anaci autailo alandwapo umu Aebele icipande 11?
17 Yobo waya pa yaomvi yakwe Yeova atwalilile ukuya asipe nupya akome lino yali ni ntazi. Muli kalata ino umutumwa Paulo walembiile Aebele walanzile pa yaomvi aingi yano wamile ukuti “iumba lyakwe ya kambone.” (Aeb. 12:1) Yonsi kwene yakweti intazi nomba yatwalilile ukuya acisinka kuli Yeova. (Aeb. 11:36-40) Uzye vino yazizimizye nu kuombesya vyali ivya sile sile? Awe foo. Nanti cakuti lino yali nu umi yataweni amalayo yakwe Leza yonsi yafikiliziwa, yatwalilile ukutaila Yeova. Nupya pa mulandu wakuti yasininkizye ukuti Yeova wataizyanga pali vino yamuombelanga, yasininkiziye ukuti yali nu kulola kuno amalayo yakwe yakufikiliziwa. (Aeb. 11:4, 5) Vino yacisile vingatwazwa ukutwalilila ukutaila Yeova.
18. I vyani vino mukulondesya ukucita? (Aebele 11:6)
18 Ndakai tukwikala umu nsi muno ivintu vikuya vikwipilako sile. (2 Tim. 3:13) Satana atatala wata ukwezya antu yakwe Leza. Asi mulandu ni ntazi izili uku nkoleelo, lekini twatwalilila ukuombesya umu mulimo wakwe Yeova nu kusininkizya ukuti “twapaalila Leza wa umi.” (1 Tim. 4:10) Iusyini ukuti vino Leza wacitiile Yobo vikalangilila sile ukuti “Yeova waya sana nu kutemwa nu luse.” (Yako. 5:11) Lekini naswe kwene tutwalilile ukuya acisinka kuli Yeova nu kusininkizya ukuti alalambula “yayo akamulondesya.”—Belengini Aebele 11:6.
LWIMBO NA. 150 Soololini Leza Pakuti Mukapusuke
^ Nga twelenganya pa muntu umwi uwazizimizye sana intazi, ilingi tukaelenganya pali Yobo. I vyani vino tungasambilila kuli vino vyacitikile umonsi wi uwali nu utailo? Tukasambililako ukuti Satana atange atupatikizye ukusya Yeova. Nupya tukasambililako ukuti Yeova akamanya vyonsi ivikatucitikila. Nupya wakwe viivi kwene vino Yeova wafumizyepo intazi zyonsi zino Yobo wakweti avino alafumyapo nu kucuula konsi ukwayako ndakai. Ndi cakuti tukulanga muli vino tukucita ukuti twataila ivisinka vii, tulaya pa yantu yayo aataila Yeova umu cumi cumi.
