1. a) Ejhehero baani ananivaha Yehova? b) ‘Omujheha Yehova’ winatapulela ddi? (Osugwe “woonelamo.”)

 YEHOVA ohavaha ejhehero yapama aatene yaale enamudhivela. Mohilegela anere omariha oredda, wukuuwa ni okwa. (Apo. 21:3, 4) Oliye anere wakavihera ale enamuroromela osaddula elabo yavati okala parayizu. (Sal. 37:9-11) Mwilaboni exa, nnere okanna wandana wapama, teto woliba ni Yehova, wandana wapama wohiyana ni ola ninnihuna peeno. Mwebaribarene nihikanna ejhehero yohagalasa osongolo! Mbwenye mwahaya bwaddi nigakanna ebaribari wihina Yehova anere wakwaneliha dhatedhene dhendha osogolo? Kaavo ethu anapaganya Yehova ahakwaneliha. Bumwahaya nihikanna ebaribari yatene ‘yomujheha Yehova.’ * (Sal. 27:14) Eyo enatapulela wi nnerege ojheha nuhagalala wihina Yehova akwanelihe mpaganyo dhaye. — Isa. 55:10, 11.

2. Mpaganyo baani Yehova akwanelihiye?

² Yehova uhoniha pamadhene wihina anowakwaneliha mpaganyo dhaye. Kabeni noone yotajhiha modha. Livuru na Apocalipse, Yehova ohupaganya wi malabo yala a peeno, oliye eere wegeredha nikuru naathu amahimo amatene, ni adhiwogelo dhatedhene yaamwebedhege nuwiwanana. Peeno, nikuru nna navayekiwa nnoniwe ninga ‘muthithi wathu.’ (Apo. 7:9, 10) Nikuru nna ehikalavo alobwana, ahiyana, anamwani a elabo yatene, naari dhigaari ndo, emudhi yowiwanana. (Sal.  133:1; João 10:16) Athu enakosa epaddi wa muthithi ola wathu, naliwaya enolaleya muthenga womwene nuviheya. Aliwa eri owiwegeredhene wihina emwaddele ole anafuna wiwa, wodhela ejhehero ya elabo yapama. (Mat. 28:19, 20; Apo. 14:6, 7; 22:17) Akala we onokosa epaddi wa muthithi ola waathu, onojhehera wihina osongolo dhithudha dhinere owomela.

3. Efunelo ya Saddana siivi?

³ Ddiyabo kanafuna wi okanne ejhehero osogolo. Bumwahaya ethu anafuniye fuwuthukulela wubuwela wi Yehova kanuthuwathuwela, ni kanaakwanelihe mpaganyo dhaye. Saddana anda onleketha wihina kaninna ejhehero, nnere okwerebeya teto nihiye omulabela Yehova. Ninga nnafunihu woona, Saddana afuna athimihe ejhehero ya Jo, ni omuxixa wihina ahiye omulabela Yehova.

4. Musolo ola, nnahudhere ddi? (Jó 1:9-12)

⁴ Musolo ola, nnere woona makalelo Saddana amwehiliye Jo ohiya okala oororomeleya. (Omwileri Jó 1:9-12.) Teto nnere woona ethu nnahudherihuvo ni yotajhiha ya Jo, ni mwahaya bwaddi ekala yathima okanna ebaribari wihina Yehova anondhivela ni anere wakwaneliha mpaganyo dhaye.

5-6. Mudhidhi mug’onove epadduwe ddi ni egumi ya Jo?

⁵ Jo ahikanna egumi yapama. Oliye ahikanna wandana wapama ni Yehova. Ahikanna emudhi enlubale ni yowiwanana, ni ahithabwa oreela. (Jó 1:1-5) Mbwenye nlabo nimodha baahi, oliye oyelela dhatedhene anniyena. Omambelelowene, oliye oyelela dhoreela dhaye dhatedhene. (Jó 1:13-17) Vasogolova, anaaye aatene athabwesiye wadhivela okwa. Kubuwela makalelo dhopadduwa ndhe dhimukuliwa Jo. Ababi enowukuuwa vanlubale yamuyelela mwaana mmodha bahi. Kubuwela wukuuwa, widdela ni makalelo unlile Jo vamodha ni mwariye nunona wihina aniwa kumi yahimala okwa. Enowoneleyamo mwahaya bwaddi Jo adhe atalege dhowara dhaye ni wuburuwa vati! — Jó 1:18-20.

⁶ Dhopadduwa ndha nuvira, Saddana obaddagela egumi ya Jo, wodhela onvokera oredda wowopiha, yathukulela athu weddiwa murima yamusugwa. (Jó 2:6-8; 7:5) Dhithu ndha dhowukuliha dhihinathi opadduwa, Jo oorihiwa naathu aatene yakala murudda yole. Amodha yodhesa omuloba dholaga. (Jó 31:18) Mbwenye vano, athu atene kiyafuna omoona. Oliye ookoddiwa naddibile nakwaye ni adharaye atene! — Jó 19:13, 14, 16.

7. a) Mwahaya bwaddi Jo adhe ubuwelege wihina anna woona goyi, ki ethu baani oliye aakoddiliye werana? b) Monelo wawo, makathamiho baani ooligana ni a Jo mukiristawu peeno anafwanyiwiye?

⁷ Saddana afuna Jo ubuwele wi dhatedhene dhendhe dhamwereyela Yehova damusinyusa. Mudhidhi mug’onovi, Saddana olabihera nipevo nakopolo ofiyera obwanyula nyumbaye, mwemmo yarimo ahima kumi a Jo ejhaga vamodha. (Jó 1:18, 19) Oliye omoriha motho odhulu yapile mambilaye vamodha ni alobwana yaakukula mambilaya. (Jó 1:16) Woona wi nipevo nne nakopolo ni mootho wadhile motikiniha ni wadhele odhulu, Jo wonelamo wi Yehova dawenrena. Oliye wubuwela wihina aherana ethu-sithu yaamutakalele Yehova. Naari dhigaari ndo, Jo okoodda omunyanyuwela Yehova ni omunyanyala. Oliye wubuwela wi akala oowenya dhithu dhatedhene dhapama Yehova anvahiye, oliye oofwanelela wenya dhithu dhatedhene dhabure Yehova anvahiye. Bumwahaya oliye adhe eerege: ‘Ndina na Yehova ndhowegeve nthithimihiwaga.’ (Jó 1: 20, 21; 2:10) Naarive Jo agayelele dhoreela dhatedhene anniyena, anaye, ni agoonile goyi vanlubale, oliye ahididelave okala oororomeleya wa Yehova. Mbwenye Saddana aari ahinathi ononga egumi yatene ya Jo.

8. Makalelo mamodha Saddana aalabiheriye wihina amwehe Jo baavi?

⁸ Saddana walabihera makalelo mamodha oomweha Jo; oliye walabihera alobwana abbili yakala ninga akwaye wihina etakaliye emuthwaye. Aliwa omwinkedha wi makathamiho ale yanfwanya Jo, yaari makalelo oosinyusiwa wa dhithu dhabure enriyena. (Jó 22:5-9) Aliwa oxixa omuthukulela Jo wubuwela wi naarive eerena dhithu dhapama Mulugu kaavaha thima dhithu dhendha. (Jó 4:18; 22:2, 3; 25:4) Mwebaribarene, aliwa yanna omuxixa Jo wubuwela wi Yehova kamudhivela, kamuthuwathuwela, newene kafwanelela omulabela Mulugu. Madhu yala yere omuthukulela Jo ohukanna ejhehero.

9. Yaamukavihere Jo okala oororomeleya ni ooliba murima ddiniyani?

⁹ Karajhiha wubuwela. Jo agakirante vamunddorani iddeliwaga vanlubale. (Jó 2:8) Akwaye ohiroromeleya enna owoga wihina oliye kahiyo muthu apama. Dhithu dhatedhene enriyena kadhinna mabasa. Dhatedhene dhampadduwela Jo, yaari ninga opwathela mutholo wonyemela, ni aanahowela ovilelana goyi yomamukwele mwaha wayelela anaaye. Omambelelowene, Jo kaawonge ethu. (Jó 2:13–3:1) Akala akwaye yahubuwela wihina omaleya wula enatapulela wi oliye anere omusukuma mpaddusaye, yeera wileketha. Malabo mamodha Jo, podi wera oovenyiha musolwaye aasugwaga mmentoni akwaye ale oohiroromeleya yawoga, oliye owoga egi: ‘Ginoofiyedha okwa waga gahiselele nroromelo naaga!’ (Jó 27:5) Emukavihere Jo okala oororomeleya ni ooliba murima naarive afwanyiwaga makathamiho, egumaye egaari neena  nuthima obe ninga enawoga athu amodha agaari vatxelani ddi? Oliye kaayelele ejhehero, ahinona wi Mulugu aye oodhivela eere wamariha makathamiho aye. Teto ahinona wi naarive akwe, Yehova eere onvenyiha muukwani. — Jó 14:13-15.

10. Ele empadduwele Jo enanihudhiha ddi?

¹⁰ Empadduwele Jo enonihudhiha wihina Saddana kanaaniwadde omusukuma Yehova, teto oliye ohunona dhatedhene dhinanipadduwela. Ele empadduwele Jo, enonikavihera wonelamo dhatedhene dhinavolowelavo wodhela ororomeleya wehu wa Yehova. Nnere woona dhithu dhimodha nnafunihu ohudhera ni Jo.

11. Ebaribari baani nnakannihuna nadidela omuroromela Yehova? (Tiago 4:7)

¹¹ Jo ohoniha wi namuroromela Yehova nnere wanda ogonjhiha dhoweha dhatedhene ni omuthawa Saddana. Mareeliho baavi enaakumelelevo? Bibliya anonroromeliha wi Ddiyabo anere onthawa. — Omwileri Tiago 4:7.

12. Ejhehero yovenyihiwa muukwani emukavihere addi Jo?

¹² Nnohowela opareela pamadhene ejhehero yovenyihiwa muukwani. Ninga nonilihu yohudhera evinre, Saddana malabo owinjhiva anolabihera woova okwa, wihina nihiye okala oororomeleya wa Yehova. Wodhela Jo, Saddana owoga wi Jo eere werana ethu-sithu wihina avuluse egumaye ni ofiyera ohiya omulabela Yehova. Mbwenye Saddana eera wileketha. Naarive Jo oonaga wi aari neena nuukwa, oliye okalave oororomeleya wa Yehova. Ethu emukavihere Jo, furoromela opama wa Yehova ni okanna ebaribari wi Yehova eere wamariha makathamiho aye. Jo ahikanna ebaribari wihina naari Yehova ahamarihe makathamiho aye agaari mento, Yehova eere owomihedha dhithudha osogolo. Jo kanganyedha wi ovenyihiwa muukwani ogahereya. Nakanna ejhehero yela emodhave, kaavo ethu newene othusiwa yoyelela egumihu enere onthukulela ohiya omulabela Yehova.

13. Mwahaya bwaddi sapama waanona makalelo amatene Saddana aalabiheriye wihina amwehe Jo?

¹³ Sapama waanona makalelo amatene Saddana aalabiheriye wihina amwehena Jo, mwaha analabihera dhoweha dhimodhave wihina anehena peeno. Kaasugwe makalelo owinkedha a Saddana awogiliye egi: ‘Muthu ddi muthu [omuhiya Jó] anere oleva dhatedhene dhinniyena mwaha wa egumaye.’ (Jó 2:4, 5) Mwebaribarene vala, Saddana afuna awoge wi iyo kannamudhivela pama Yehova, ni yakala yowandeya ovulusa egumihu kannubuwele dila biili wihina nihiye omulabela Yehova. Ohiya eyo, Saddana owoga wi Yehova kanna odhivela ni iyo, ni kanaapwatha mabasa nnamparelihu oliye. Mbwenye iyo nihanona makalelo amatene Saddana anaalabiheriye, nnomuroromela Yehova ni kannihiya wihina nlekethiwe nuliye.

14. Dhoweha podi oladdanihiwa ninddi? Kawogamo.

¹⁴ Iyo podi wawonaga makathamiho ala ninga ofuru wonona emuthu yehu. Dhoweha aafwanyiwe Jo dhomukavihera woona dhithu ahandiye ni werana masadduwo enahoweleya. Motajhiha, oliye ahonelamo wihina anohowela okala owiyeviha. (Jó 42:3) Teto iyo nihikanna ofuru wowinona pamadhene nafwanyiwaga makathamiho. Ddibila anithaniwa Nikolay, * aapwehiwe mukambura naarive agaari muredda anihina: “Kambura enakala ninga raio-X, dhinowoniha dhikalelo dhamukiristawu eebaribari.” Nanona pamadhene dhithu nihinandihu pama, iyo podi wilibihera wihina niwomihedhe.

15. Nnohowela onvuruwana aani, ki mwahaya?

 ¹⁵ Nnohowela ovuruwana pamadhene ndhe Yehova anawogiye, waahiya amwiddanihu. Jo ahinvuruwana pamadhene Yehova mudhidhi awogaga nuliye. Yehova opendda nuliye, yakala ninga awoga egi: ‘We uhona kopolo gilabiherimi wihina gipadduse dhithu dhamutene dhiri mwilaboni? Miyo gihinona dhithu dhatedhene dhinupadduwela mwigumini mwawo. We onoonamo wi kaginande wukabelela?’ Jo wakula nuwiyeviha ni otamalela wodhela opama wa Yehova. Oliye anihina: ‘Gihiwa ewogiwaga wodhela nyu, mbwenye vano, ginna wuwoonani ni mento aaga.’ (Jó 42:5) We ohunonawo wego aariwo Jo aawogaga madhu yala? Oliye aakirante vanddorani, mwiili waye ogaari makwaddave ni oonaga goyi enlubale wodhela okweliwa anaaye. Mbwenye Yehova owoga wi oomudhivela vanlubale Jo ni oomurumedha vamentoni vaye. — Jó 42:7, 8.

16. Mowiwanana ni Isaías 49:15, 16, naafwanyiwaga makathamiho nihiddiwalege ddi?

¹⁶ Peeno, athu podi onruwanaga ni oneddiha ni makalelo abure. Aliwa podi oxixa otakaliha emuthu yehu ni nikuru nehu ni ‘ewogaga dhithu dhatedhene dhabure’ wodhela iyo. (Mat. 5:11) Yopadduwa ya Jo enanihudhiha wi Yehova anororomela wi nnere okala oororomeleya naafwanyiwaga makathamiho. Yehova anondhivela vanlubale, ni kadha aasukuma ale enamuroromela. (Omwileri Isaías 49:15, 16.) Mowindala, kuwavuruwanege madhu bi madhu abure enaawoga amwiddani a Mulugu! Tiago ddibila oTurkiya afwanyiwe makathamiho owinjhiva vamodha ni amudhaye anihina: “Iyo wonelamo wihina ovuruwana  dhithu dhowota athu enawogiwa wodhela nlogo na Mulugu yere onikwerebeyiha. Bumwahaya nnathabwa osugwera ejhehero ya Omwene wa Mulugu, ni nnodidela okala ooviheya ni mabasa a Yehova. Ni makalelo yala, iyo nnohagalala.” Moligana ni Jo, iyo nnonvuruwana Yehova! Dhowota enawoga amwiddanihu kinaathimihe ejhehero yehu.

17. Onahudheravo ddi ni dhotajhiha dha alobwana ni ahiyana oororomeleya enasorihiwa va Hebreus kapitulu 11?

¹⁷ Jo mudhaari mmodha a Yehova, aarive txithi ni aalimbe murima naarive eehiwaga. Karta aalebeliye akudda Heberewu, Pawulo wawoga addibila owinjhiva eri oororomeleya, oliye wawithana athu yala ninga ‘murabo munlubale wa Anamona.’ (Heb. 12:1) Atene yala ehifwanyiwa makathamiho oorusa mwigumini mwewa, naarive dhigaari ndo, aliwa okalave oororomeleya wa Yehova. (Heb. 11:36-40) Neerege ovilela wewa ni mabasa yapanriwa ehikanna mabasa? Hee ehikanna! Naarive aliwa ehikanlewo yaka dhowinjhivadhene, wihina yoone mpaganyo dha Yehova dhakwanelaga, yahidhowave emuroromelaga Yehova. Ohiya eyo, adhaari ala oororomeleya yahikanna ebaribari wihina yorumedhiwa vamentoni va Yehova, bumwahaya kiyanganyedha wi egahona mpaganyo dha Yehova dhakwanelaga osogolo. (Heb. 11:4, 5) Yotajhiha yewa, enonikavihera iyo omuroromela pamadhene Yehova.

18. We wikomile weera ddi? (Hebreus 11:6)

¹⁸ Elabo nnakalihu enna othabwa wopiha kadda labo. (2 Tim. 3:13) Saddana kanaamarihe mabasaye oowaweha adhaari a Yehova. Nnere ofwanyiwa dhoweha dhowinjhiva osogolo. Naarive dhigari ndo, niikome okala oororomeleya wa Yehova, nroromelaga wihina ‘ejhehero yehu enaadhela wa Mulugu ookalawo.’ (1 Tim. 4:10) Yehova ahireeliha ororomeleya wa Jo, eyo enowoneyiha wihina ‘Yehova ohuthabwa okanna thagaraga ni nthebwa.’ (Tia. 5:11) Ninga Jo, nnafuna nikale oororomeleya wa Yehova, nihaganyedhaga wihina oliye ‘onowareeliha ale enamusayela ni murima watene.’ — Omwileri Hebreus 11:6.