1. a) ¿Ndáaña káʼa̱n Jehová taxira ndaʼa̱yó chí nu̱únínu? b) ¿Ndáa ki̱ʼva na̱ʼa̱yó ña̱ ndáa-iniyó Jehová? (Koto nota).

 NDIʼIYÓ na̱ kúʼvi̱-ini xíni Jehová, ndátuyó ña̱ taxira ku̱a̱ʼání ña̱ va̱ʼa ndaʼa̱yó chí nu̱únínu, saáchi si̱lóʼo kúma̱ní ta sandíʼi-xa̱ʼa̱ra kue̱ʼe̱ xíʼin ña̱ kúsuchí-iniyó ta va̱ása kuvikayó (Apoc. 21:3, 4). Saátu chindeétáʼanra xíʼinyó ña̱ ndasaliviyó nu̱ú ñuʼú yóʼo tá vitá íyo iniyó (Sal. 37:9-11). Ta saátu chindeétáʼanra xíʼinyó ña̱ va̱ʼaníka xa̱a̱yó kutáʼanyó xíʼinra. Ña̱kán liviníva ña̱ ndátuyó ndakiʼinyó. Soo, ¿nda̱chun kándíxayó ña̱ ndixa xi̱nu ña̱ káʼa̱n Jehová keʼéra chí nu̱únínu? Saáchi ta̱kán, ndiʼi tiempo sáxi̱nura ña̱ káʼa̱nra. Íyova ña̱ náʼa̱ nu̱úyó ña̱ kivi kandíxayó ña̱ káʼa̱nra (Sal. 27:14). * ¿Ndáa ki̱ʼva náʼa̱yó ña̱ ndáa-iniyóra? Xíniñúʼu kúee koo iniyó ta kusi̱í-iniyó kundatuyó ña̱ saxínura ndiʼi ña̱ káʼa̱nra (Is. 55:10, 11).

2. ¿Ndáaña xa̱a̱ ke̱ʼé Jehová?

² Xa̱a̱ náʼa̱va Jehová ña̱ sáxi̱nura ña̱ káʼa̱nra. Ná kotoyó iin ña̱ va̱ʼaní náʼa̱ ña̱yóʼo. Tá kúú, nu̱ú tutu Apocalipsis, Jehová ni̱ka̱ʼa̱nra ña̱ sandátakara na̱ yiví na̱ kixi ti̱xin ñuu náʼnu xíʼin ñuu válí, na̱ káʼa̱n ndiʼi nu̱ú tu̱ʼun ta ki̱xina ti̱xin ndiʼi tribu ña̱ ndasakáʼnunara. Ta tiempo vitin ku̱a̱ʼání kúú na̱yóʼo (Apoc. 7:9, 10). Ta ndiʼi na̱yóʼo kúúna ta̱a, ñaʼá xíʼin na̱ va̱lí na̱ xa̱a̱ síín raza, xa̱a̱ síín tu̱ʼun káʼa̱nna ta xa̱a̱ síín ñuu ke̱ena, soo ndiʼina kúúna iin familia na̱ íyo nu̱ú iníísaá ñuyǐví ta va̱ʼaní kítáʼanna (Sal. 133:1; Juan 10:16). Ta ndiʼi na̱yóʼo kúsi̱íní-inina nátúʼunna xíʼin na̱ yiví xa̱ʼa̱ Ndióxi̱. Ta saátu ndiʼi tiempo íyo tu̱ʼvana ña̱  natúʼunna xíʼin na̱ yiví na̱ kúni̱ kuniso̱ʼo xa̱ʼa̱ ña̱ va̱ʼa ña̱ ndátuyó ndakiʼinyó chí nu̱únínu (Mat. 28:19, 20; Apoc. 14:6, 7; 22:17). Tá kúún táʼan na̱yóʼo, chíndayáʼvinívaún ña̱ va̱ʼa ña̱ ndátún ndakiʼún chí nu̱únínu.

3. ¿Ndáaña kúni̱ ta̱ Ndi̱va̱ʼa keʼéra?

³ Ta̱ Ndi̱va̱ʼa va̱ása kúni̱ra ña̱ ná ndakiʼinyó ña̱ ni̱ka̱ʼa̱n Ndióxi̱ taxira ndaʼa̱yó chí nu̱únínu. Kúni̱ra ña̱ ná ndakanixi̱níyó ña̱ va̱ása ndáyáʼviyó nu̱ú Jehová, ta saátu ña̱ va̱ása saxínura ña̱ ni̱ka̱ʼa̱nra taxira ndaʼa̱yó. Tá ná taxiyó ña̱ sandáʼvi ta̱ Ndi̱va̱ʼa miíyó, va̱ása ndakúka koo iniyó ta nda̱a̱ kivi xa̱a̱yó sandákooyó ña̱ kachíñuyó nu̱ú Jehová. Yóʼo sakúaʼayó ña̱ xi̱kuni̱ ta̱ Ndi̱va̱ʼa ña̱ ná sandákoo ta̱ Job ña̱ kundaa-inira Jehová ta saátu ña̱ ná sandákoora ña̱ ndasakáʼnurara.

4. ¿Ndáaña sakúaʼayó nu̱ú artículo yóʼo? (Job 1:9-12).

⁴ Nu̱ú artículo yóʼo sakúaʼayó xa̱ʼa̱ ña̱ xi̱niñúʼu ta̱ Ndi̱va̱ʼa ña̱ sandákavara-ini ta̱ Job, tasaá sandákoora ña̱ nda̱kú koo inira xíʼin Jehová (kaʼvi Job 1:9-12). * Ta saátu kotoyó ndáaña kivi sakúaʼayó xíʼin ña̱ ndo̱ʼo ta̱ Job ta nda̱chun ndáyáʼviní ndakaʼányó ña̱ kúʼvi̱-ini Ndióxi̱ xínira miíyó ta saátu saxínura ndiʼi ña̱ ni̱ka̱ʼa̱nra keʼéra.

5, 6. ¿Ndáaña ndo̱ʼo ta̱ Job?

⁵ Va̱ʼaníva ni̱xi̱yo ña̱ xi̱taku ta̱ Job chi xi̱kuura migo Jehová, ku̱a̱ʼání ni̱xi̱yo na̱ veʼera ta va̱ʼaní xi̱kitáʼanna ta saátu kúikání ni̱xi̱yora (Job 1:1-5). Soo iin kuití ki̱vi̱ ndi̱ʼi-xa̱ʼa̱ ndiʼi ña̱ xi̱kuumiíra. Ña̱ nu̱ú ndi̱ʼi-xa̱ʼa̱ kúú ña̱ ku̱i̱ká ña̱ xi̱kuumiíra (Job 1:13-17). Tándi̱ʼi, ni̱xi̱ʼi̱ ndiʼi se̱ʼera na̱ xi̱kuʼvi̱ní-inira xi̱xinira. Ná ndakanixi̱níyó xa̱ʼa̱ ña̱ ndo̱ʼora. Tá xíʼi̱ se̱ʼe iin na̱ yiví xóʼvi̱ní-inina xa̱ʼa̱ ña̱yóʼo; ná ndakanixi̱níyó xa̱ʼa̱ ña̱ ndo̱ʼo ta̱ Job xíʼin ñá síʼira, na̱yóʼo ni̱xo̱ʼvi̱ní-inina, ni̱ndi̱ʼi̱ní-inina ta ku̱suchíní-inina tá ku̱nda̱a̱-inina ña̱ ni̱xi̱ʼi̱ u̱xu̱ saá se̱ʼena. Ta xa̱ʼa̱ ña̱ ku̱suchí-inira, nda̱tára ti̱ko̱to̱ra ta xi̱kuxítíra nu̱ú ñuʼú (Job 1:18-20).

⁶ Tasaá ta̱ Ndi̱va̱ʼa ta̱xira iin kue̱ʼe̱ ña̱ ndeéní ndaʼa̱ ta̱ Job ta ni̱xo̱ʼvi̱níra xa̱ʼa̱ ña̱yóʼo (Job 2:6-8; 7:5). Tá ya̱chi̱, xi̱ ixato̱ʼóníva na̱ yiví ta̱ Job ta nda̱a̱ xi̱ka̱ʼa̱nna xíʼinra ña̱ ná taxira consejo ndaʼa̱na (Job 31:18). Soo vitin ku̱xíkána nu̱úra. Nda̱a̱ na̱ ñanira, na̱ migora na̱ va̱ʼaní xi̱kitáʼan xíʼinra ta saátu na̱ xi̱kachíñu nu̱úra xi̱kundasína xi̱xininara (Job 19:13, 14, 16).

7. a) ¿Ndáaña nda̱kanixi̱ní ta̱ Job tá ki̱xáʼa xóʼvi̱ra, soo ndáaña va̱ása níxiinra keʼéra? b) ¿Ndáaña ndo̱ʼo ta̱ Job kivi kundoʼo na̱ ndásakáʼnu Ndióxi̱? (Koto na̱ʼná ña̱ va̱xi párrafo 7).

⁷ Ta̱ Ndi̱va̱ʼa xi̱kuni̱ra ña̱ ná ndakanixi̱ní ta̱ Job ña̱ xóʼvi̱ra xa̱ʼa̱ ña̱ va̱ása kúsi̱íka-ini Jehová xíʼin ña̱ kéʼéra. Xa̱ʼa̱ ña̱yóʼo, ta̱ Ndi̱va̱ʼa xi̱niñúʼura iin ta̱chí ña̱ ndeéní ña̱ va̱ʼa sandúvara veʼe sa̱tá u̱xu̱ saá na̱ se̱ʼe ta̱ Job tá ndóona xíxina (Job 1:18, 19). Ta saátu sa̱kóyora ñuʼu̱ chí ndiví ta xa̱ʼníña kití sa̱na̱ ta̱ Job ta saátu na̱ xi̱ndaa tíyóʼo (Job 1:16). Kúnda̱a̱ káxi iniyó, ta̱chí ña̱ ndeéní ka̱ni yóʼo xíʼin ñuʼu̱ ña̱ ni̱ko̱yo chí ndiví su̱ví ña̱ níkuu mií kúúña. Xa̱ʼa̱ ña̱kán, ta̱ Job nda̱kanixi̱níra ña̱ mií Jehová kúú ta̱ chi̱ndaʼá ña̱yóʼo, ta xa̱ʼa̱ ña̱yóʼo nda̱kanixi̱níra ña̱ ke̱ʼéra iin ña̱ʼa ña̱ va̱ása kútóo Jehová. Soo ni ndo̱ʼora ña̱yóʼo, va̱ása níchika̱a̱ra chiʼña yivára ta̱ íyo chí ndiví. Nda̱kunira ña̱ xa̱a̱ ku̱a̱ʼání ku̱i̱ya̱ táxi Jehová ña̱ va̱ʼa ndaʼa̱ra ta xi̱kusi̱íva-inira xi̱ndakiʼinra ndiʼi ña̱yóʼo, ta nda̱a̱ táki̱ʼva xi̱ndakiʼinra ña̱ʼa ña̱ va̱ʼa, saátu xi̱niñúʼu ndakiʼinra ña̱ʼa ña̱ va̱ása va̱ʼa. Xa̱ʼa̱ ña̱kán ni̱ka̱ʼa̱nra: “Ná  ndukáʼnuka ki̱vi̱ Jehová” (Job 1:20, 21; 2:10). Ni kǒoka ña̱ʼa níxikuumií ta̱ Job, ni ki̱ʼinra kue̱ʼe̱ ta ni̱xo̱ʼvi̱níra soo nda̱kundeévara nda̱kú ni̱xi̱yo inira xíʼin Jehová. Soo íyo inka ña̱ ke̱ʼé ta̱ Ndi̱va̱ʼa xíʼinra.

8. ¿Ndáa inka ña̱ xi̱niñúʼu ta̱ Ndi̱va̱ʼa ña̱ ixandi̱va̱ʼara xíʼin ta̱ Job?

⁸ Ta̱ Ndi̱va̱ʼa xi̱niñúʼura inka ña̱ʼa ña̱ ixandi̱va̱ʼara xíʼin ta̱ Job. Xi̱niñúʼura u̱ni̱ na̱ xi̱ka̱ʼa̱n ña̱ kúúna migo ta̱ Job ña̱ va̱ʼa sandákavana-inira. Na̱yóʼo ni̱ka̱ʼa̱nna ña̱ xi̱xoʼvi̱ ta̱ Job xa̱ʼa̱ ña̱ ke̱ʼéra ku̱a̱ʼání ña̱ʼa ña̱ va̱ása va̱ʼa (Job 22:5-9). Ta saátu xi̱kuni̱na ná kandíxara ña̱ ni ku̱a̱ʼání ña̱ʼa ña̱ va̱ʼa ná keʼéra, va̱ása kuchiñura sakúsi̱íra-ini Ndióxi̱ (Job 4:18; 22:2, 3; 25:4). Ña̱ xi̱kuni̱na kúú ña̱ ná kaka-ini ta̱ Job ta kandíxara ña̱ va̱ása kúʼvi̱-ini Ndióxi̱ xínirara ni ña̱ va̱ása kundaarara, ta saátu ña̱ va̱ása ndáyáʼvi chiñu ña̱ kéʼéra nu̱ú Jehová. Xa̱ʼa̱ ña̱ ni̱ka̱ʼa̱n na̱yóʼo, ta̱ Job nda̱kanixi̱níra ña̱ kǒoka nda̱a̱ ni iin ña̱ kivi keʼéra.

9. ¿Ndáaña chi̱ndeétáʼan xíʼin ta̱ Job ña̱ ndakúní ni̱xi̱yo inira?

⁹ Ná ka̱ʼa̱nyó xa̱ʼa̱ ña̱ ndo̱ʼo ta̱ Job. Ta̱yóʼo íyora nu̱ú ya̱a̱ ta ñuú xíʼin káʼñu ndeéní xóʼvi̱ra (Job 2:8). Na̱ migora xi̱ndakundeéna xi̱ka̱ʼa̱nna ña̱ ndi̱va̱ʼaní-inira ta nda̱a̱ ni iin ña̱ xi̱keʼéra va̱ása ndáyáʼviña. Xa̱ʼa̱ ña̱ ku̱a̱ʼání tu̱ndóʼo ni̱ya̱ʼa ta̱ Job nu̱ú, nda̱kavaní-inira ta saátu ku̱suchíní-inira xa̱ʼa̱ ña̱ ni̱xi̱ʼi̱ se̱ʼera. Tá xa̱ʼa̱, kǒo nda̱a̱ ni iin ña̱ʼa níka̱ʼa̱nra (Job 2:13–3:1). Xa̱ʼa̱ ña̱yóʼo, na̱ migora nda̱kanixi̱nína ña̱ sandákoovara Jehová, soo su̱ví saá níxi̱yoña. Ta sana ta̱ Job nda̱kotora nu̱ú na̱ migora ta ni̱ka̱ʼa̱nra xíʼinna: “Nda̱kú koo inii̱ xíʼin Ndióxi̱ nda̱a̱ ná kuvii̱” (Job 27:5). ¿Nda̱chun ndakúní ni̱xi̱yo ini ta̱ Job ni ni̱ya̱ʼara nu̱ú ndiʼi ña̱yóʼo? Ni ndeéní tu̱ndóʼo ni̱ya̱ʼara nu̱ú, soo va̱ása nísandákoora ña̱ kundaa-inira ña̱ chindeétáʼanva Jehová xíʼinra. Xi̱kunda̱a̱-inira ña̱ ni ná kuvira sandátakuva Jehová miíra (Job 14:13-15).

10. ¿Ndáaña sákuaʼayó xíʼin ña̱ ndo̱ʼo ta̱ Job?

¹⁰ Xíʼin ña̱ ndo̱ʼo ta̱ Job kúnda̱a̱-iniyó ña̱ va̱ása kuchiñu ta̱ Ndi̱va̱ʼa ixandúxara xíʼinyó ña̱ kuxíkáyó nu̱ú Jehová. Ta saátu, Jehová kíʼinra kuenta xíʼin ndiʼi ña̱ ndóʼoyó. Xíʼin ndiʼi ña̱ ndo̱ʼo ta̱ Job ta saátu ña̱ nda̱kú ni̱xi̱yo inira xíʼin Ndióxi̱ íyo iin ña̱ ndáyáʼviní sákuaʼayó xíʼinña. Vitin ná kotoyó ndáaña kivi sakúaʼayó xíʼin sava ña̱ ndo̱ʼora.

11. ¿Ndáaña kivi kandíxayó tá ndiʼi tiempo ndáa-iniyó Jehová? (Santiago 4:7).

¹¹ Ta̱ Job ni̱na̱ʼa̱ra ña̱ tá ndáaní-iniyó Jehová kundeéva-iniyó ya̱ʼayó nu̱ú nda̱a̱ ndáaka tu̱ndóʼo ta va̱ása kuchiñu ta̱ Ndi̱va̱ʼa xíʼinyó. Ta, ¿ndáaña va̱ʼa ndakiʼinyó xa̱ʼa̱ ña̱yóʼo? Tu̱ʼun Ndióxi̱ káchiña ña̱ kuxíká ta̱ Ndi̱va̱ʼa nu̱úyó (kaʼvi Santiago 4:7).

12. Ña̱ xi̱kandíxa ta̱ Job ña̱ ndataku na̱ ni̱xi̱ʼi̱, ¿ndáa ki̱ʼva chi̱ndeétáʼanña xíʼinra?

¹² Ná kandíxaníyó ña̱ ndataku na̱ ni̱xi̱ʼi̱. Nda̱a̱ táki̱ʼva sa̱kuaʼayó nu̱ú artículo ña̱ ni̱ya̱ʼa, iin ña̱ xíniñúʼu ta̱ Ndi̱va̱ʼa ña̱ va̱ʼa sandákooyó ña̱ nda̱kú koo iniyó xíʼin Jehová kúú ña̱ yi̱ʼvíyó kuviyó. Ná ndakanixi̱níyó xa̱ʼa̱ ña̱ ndo̱ʼo ta̱ Job. Ta̱ Ndi̱va̱ʼa ni̱ka̱ʼa̱nra ña̱ keʼé ta̱ Job nda̱a̱ ndáaka ña̱ʼa xa̱ʼa̱ ña̱ va̱ása kuvira, ta nda̱a̱ kivi xa̱a̱ra sandákoora ña̱ kachíñura nu̱ú Jehová. Soo va̱ása níkeʼé ta̱ Job ña̱yóʼo. Ni yo̱ʼvi̱ní ña̱ ni̱ya̱ʼa ta̱ Job nu̱ú ta nda̱a̱ nda̱kanixi̱níra ña̱ kuvira, va̱ása nísandákoora Ndióxi̱. ¿Nda̱chun va̱ʼa ku̱ndeé-inira? Saáchi xi̱kandíxara ña̱ va̱ʼaní-ini Jehová ta saátu xi̱xini̱ra ña̱ tá ná ya̱ʼa tiempo, sandíʼi-xa̱ʼa̱va Ndióxi̱ ndiʼi ña̱ sáxo̱ʼvi̱ miíra. Saátu xi̱kandíxara ña̱ tá ná kǒo chindeétáʼan Ndióxi̱ xíʼinra tá tákura, tá ná kuvira, chí nu̱únínu sandátakuvarara. Ta̱ Job xi̱kandíxaníra ña̱ ndixava ndataku na̱ ni̱xi̱ʼi̱. Tá saátu kándíxa miíyó ña̱yóʼo, va̱ása sandákooyó ña̱ nda̱kú koo iniyó xíʼin Jehová ni ná kuni̱na kaʼnína miíyó.

13. ¿Nda̱chun xíniñúʼu kiʼinníyó kuenta xíʼin ña̱ xi̱niñúʼu ta̱ Ndi̱va̱ʼa ña̱ sa̱xóʼvi̱ra ta̱ Job?

¹³ Xíniñúʼu kiʼinníyó kuenta ndáaña xi̱niñúʼu ta̱ Ndi̱va̱ʼa ña̱ sa̱xóʼvi̱ra ta̱ Job, saáchi ña̱kán kúú ña̱ xíniñúʼutura vitin ña̱ saxóʼvi̱ra miíyó. Ná kotoyó ndáaña ni̱ka̱ʼa̱nra xa̱ʼa̱ ta̱ Job ta saátu xa̱ʼa̱ ndiʼi na̱ yiví. Ka̱chira: “Ndiʼi ña̱ kúúmií na̱ yiví taxinaña xa̱ʼa̱ ña̱ kúni̱na kutakuna” (Job 2:4, 5). Ña̱ xi̱kuni̱ kachi ta̱ Ndi̱va̱ʼa kúú ña̱ va̱ása ndixa kúʼvi̱-iniyó xíniyó Jehová chi tá ná kixi iin tu̱ndóʼo nu̱úyó sandákoovayóra. Saátu káʼa̱nra ña̱ va̱ása kúʼvi̱-ini Jehová xínira miíyó ta va̱ása chíndayáʼvira ndiʼi ña̱ kéʼéyó ña̱ sakúsi̱íyó-inira. Miíyó na̱ ndáa-ini Jehová va̱ása kuchiñu ta̱ Ndi̱va̱ʼa sandáʼvira miíyó, saáchi xa̱a̱ xíni̱vayó ndáaña xíniñúʼura.

14. ¿Ndáaña kivi kunda̱a̱-iniyó xa̱ʼa̱ tá yáʼayó nu̱ú iin tu̱ndóʼo?

¹⁴ Tá ná kixi iin tu̱ndóʼo nu̱úyó, xíniñúʼu kotoyó ndáaña kúú ña̱ íxayo̱ʼvi̱ka xíʼinyó. Tá ni̱ya̱ʼa ta̱ Job nu̱ú tu̱ndóʼo, ki̱ʼinra kuenta ña̱ íyo sava ña̱ xíniñúʼu nasamara. Tá kúú, xi̱niñúʼu vitáka koo inira (Job 42:3). Saátu miíyó, tá yáʼayó nu̱ú tu̱ndóʼo kivi kotoyó ndáaña íxayo̱ʼvi̱ka xíʼinyó. Ña̱yóʼo kúú ña̱ ndo̱ʼo ta̱ Nikolái, * chi̱ka̱a̱nara veʼeka̱a ni ndeéní ndóʼora. Ta̱yóʼo káchira: “Ña̱ ni̱xa̱ʼi̱n veʼeka̱a chi̱ndeétáʼanña xíʼi̱n ña̱ kotoi̱ ndáa ña̱ʼa kúú ña̱ʼa xíniñúʼu viíka keʼíi̱”. Tá xítoyó ndáaña kúú ña̱ íxayo̱ʼvi̱ka xíʼinyó keʼéyó, kiviva chika̱a̱yó ndee̱ ña̱ viíka keʼéyóña.

15. ¿Ndáana xíniñúʼu kuniso̱ʼoyó, ta nda̱chun?

¹⁵ Xíniñúʼu kuniso̱ʼoyó ña̱ káʼa̱n Jehová ta su̱ví ña̱ káʼa̱n na̱ sáa̱-ini xíni miíyó. Ta̱ Job viíní xi̱niso̱ʼora tá ni̱ka̱ʼa̱n Jehová xíʼinra. Ña̱ va̱ʼa chindeétáʼan Jehová xíʼinra ña̱ kunda̱a̱-inira ña̱ ndáyáʼviníra nu̱úra, nda̱a̱ táki̱ʼva íyo ta̱ ni̱ka̱ʼa̱n ña̱yóʼo xíʼinra saá ni̱xi̱yora: “¿Á xa̱a̱  xi̱niún ndiʼi ña̱ ke̱ʼíi̱ xíʼin ndeéi̱? Yi̱ʼi̱ kíʼinvai̱ kuenta xíʼin ndiʼi ña̱ ndóʼún. ¿Á va̱ása kuchiñui̱ kundai̱ yóʼó túviún?”. Vitání ni̱xi̱yo ini ta̱ Job ta ta̱xiníra tíxa̱ʼvi ndaʼa̱ Jehová xa̱ʼa̱ ña̱ va̱ʼaní-inira xíʼinra, ña̱kán ni̱ka̱ʼa̱nra ña̱yóʼo: “Xi̱xiniso̱ʼo kuitívai̱ xa̱ʼún, soo vitin kúú ña̱ xíto káxii̱ yóʼó xíʼin nduchúnu̱úi̱” (Job 42:5). ¿Á ndákaʼún ndáa mií íyo ta̱ Job tá ni̱ka̱ʼa̱nra ña̱yóʼo? Íyokavara nu̱ú ya̱a̱, iníí ku̱ñura ka̱na ndi̱ʼi ta kúsuchíní-inira xa̱ʼa̱ ña̱ ni̱xi̱ʼi̱ ndiʼi se̱ʼera. Tá ndo̱ʼora ndiʼi ña̱yóʼo, saá ni̱ka̱ʼa̱n Jehová xíʼinra ña̱ kúʼvi̱ní-inira xínirara ta kúsi̱í-inira xíʼin ndiʼi ña̱ kéʼéra (Job 42:7, 8).

16. Nda̱a̱ táki̱ʼva káchi Isaías 49:15, 16, ¿ndáaña xíniñúʼu kiʼinyó kuenta xíʼin tá yáʼayó nu̱ú iin tu̱ndóʼo?

¹⁶ Tiempo vitin, na̱ yiví sana káʼa̱n-ndi̱va̱ʼana xíʼinyó á íxandi̱va̱ʼana xíʼinyó. Sana káʼa̱nna ku̱a̱ʼání ña̱ vatá xa̱ʼa̱yó á xa̱ʼa̱ na̱ ñuu Ndióxi̱ (Mat. 5:11). Ña̱ ndo̱ʼo ta̱ Job sánáʼa̱ña miíyó ña̱ kándíxava Jehová ña̱ nda̱kú koo iniyó xíʼinra tá ná ya̱ʼayó nu̱ú tu̱ndóʼo. Kúʼvi̱ní-ini Jehová xínira miíyó ta va̱ása nandósóra xa̱ʼa̱ na̱ ndáa-ini miíra (kaʼvi Isaías 49:15, 16). * Ná kǒo kuniso̱ʼoyó ña̱ vatá ña̱ káʼa̱n na̱ sáa̱-ini xíni Ndióxi̱. Ná kotoyó ña̱ ni̱ka̱ʼa̱n iin ta̱ hermano ta̱ íyo chí Turquía ta̱ naní James, ta̱yóʼo ndeéní tu̱ndóʼo ni̱ya̱ʼara nu̱ú xíʼin na̱ veʼera. Káchira: “Ki̱ʼinndi̱ kuenta ña̱ kivi ndakava-inindi̱ tá ná kuniso̱ʼondi̱ ña̱ vatá ña̱ káʼa̱nna xa̱ʼa̱ na̱ ñuu Ndióxi̱. Xa̱ʼa̱ ña̱kán, nda̱kanixi̱níndi̱ xa̱ʼa̱ ña̱ va̱ʼa ña̱ ndakiʼinndi̱ ti̱xin Reino Ndióxi̱, ta ni̱ndi̱ʼi̱ka-inindi̱ xa̱ʼa̱ ña̱ kachíñundi̱ nu̱ú Jehová ta ña̱yóʼo  chi̱ndeétáʼanña xíʼinndi̱ ña̱ kusi̱í-inindi̱”. Ná keʼéyó nda̱a̱ táki̱ʼva ke̱ʼé ta̱ Job ta ná kuniso̱ʼoyó ña̱ káʼa̱n Jehová. Na̱ sáa̱-ini xíni miíyó ndakundeévana ka̱ʼa̱nna ña̱ vatá xa̱ʼa̱yó, soo ná kǒo taxiyó ña̱ sandákavana-iniyó.

17. ¿Ndáaña sákuaʼayó xíʼin ña̱ ke̱ʼé na̱ ta̱a xíʼin ná ñaʼá na̱ nda̱kú ni̱xi̱yo ini xíʼin Ndióxi̱ na̱ káʼa̱n Hebreos capítulo 11 xa̱ʼa̱?

¹⁷ Su̱ví iinlá ta̱ Job kúú ta̱ nda̱kú ni̱xi̱yo ini xíʼin Jehová tá ni̱ya̱ʼara nu̱ú tu̱ndóʼo ña̱ ndeéní. Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n ndaʼa̱ na̱ xi̱kuu hebreo, ni̱ka̱ʼa̱nra xa̱ʼa̱ ku̱a̱ʼání na̱ ndásakáʼnu Ndióxi̱ ña̱ íyona nda̱a̱ táki̱ʼva íyo iin vi̱kó ña̱ káʼnuní (Heb. 12:1). Ni yo̱ʼvi̱ní tu̱ndóʼo ña̱ ni̱ya̱ʼana nu̱ú, soo ndiʼi na̱yóʼo nda̱kúní ni̱xi̱yo inina xíʼin Jehová (Heb. 11:36-40). Soo, ¿á ndáyáʼvi ña̱ chi̱ka̱a̱na ndee̱ ña̱ nda̱kúní ni̱xi̱yo inina? Ndáyáʼvinívaña. Ni va̱ása níxinina ña̱ ni̱xi̱nu ndiʼi ña̱ ni̱ka̱ʼa̱n Ndióxi̱, soo kǒo nísandákoona ña̱ kundaa-ininara. Ta xa̱ʼa̱ ña̱ xi̱kunda̱a̱-inina ña̱ xi̱kusi̱íva-ini Jehová xíʼin ña̱ xi̱keʼéna, va̱ása níxi̱ka-inina ña̱ kunivana ña̱ xi̱nu ndiʼi ña̱ ni̱ka̱ʼa̱nra (Heb. 11:4, 5). Tá ndákanixi̱níyó xa̱ʼa̱ ña̱ ke̱ʼéna, ña̱yóʼo chíndeétáʼanña xíʼinyó ña̱ nda̱kúka koo iniyó ta kandíxayó ña̱ saxínuva Jehová ndiʼi ña̱ ni̱ka̱ʼa̱nra keʼéra chí nu̱únínu.

18. ¿Ndáaña xíniñúʼu keʼéyó ni nda̱a̱ ndáaka tu̱ndóʼo ná kixi nu̱úyó? (Hebreos 11:6).

¹⁸ Kininíka ku̱a̱ʼa̱n ndúu nu̱ú ñuyǐví yóʼo (2 Tim. 3:13). Ta̱ Ndi̱va̱ʼa ndákundeéra íxandi̱va̱ʼara xíʼin na̱ ndásakáʼnu Ndióxi̱. Ni nda̱a̱ ndáaka tu̱ndóʼo ná kixi nu̱úyó chí nu̱únínu, ná ndakundeéyó kachíñuyó nu̱ú Jehová xíʼin ndiʼi níma̱yó, “chi ta̱ ndáaní-iniyó kúú Ndióxi̱ ta̱ táku” (1 Tim. 4:10). Tándi̱ʼi ni̱xo̱ʼvi̱ ta̱ Job ku̱a̱ʼání ña̱ va̱ʼa ta̱xi Jehová ndaʼa̱ra, ña̱yóʼo náʼa̱ña nu̱úyó ña̱ “kúni̱ní Jehová xínira miíyó ta kúndáʼviní-inira xínira miíyó” (Sant. 5:11). Nda̱a̱ táki̱ʼva ke̱ʼé ta̱ Job, ndiʼi tiempo nda̱kúní ná koo iniyó xíʼin Jehová ta ná kandíxayó ña̱ taxira ña̱ va̱ʼa ndaʼa̱yó tá chíka̱a̱yó ndee̱ ña̱ nandukúyóra (kaʼvi Hebreos 11:6).